TLAMACHTILI 27
Ximotemachi ipan Jehová
“Ximochia ipan [Jehová], ximotemaka uan ximosemaka uan amo ximomajmati” (SAL. 27:14).
UIKATL 128 Xikijiyoui nochi
TLEN MOIXTOMAS *
1. 1) ¿Tlake timotemachiaj tijselisej teipa? 2) ¿Tlake kineki kiijtos timotemachisej ipan Jehová? (Xikita nopa nota).
NOCHI katli tikikneliaj Jehová uelis timotemachisej nechka kitsontlamiltis kokolistli, kuesoli uan mikilistli (Apoc. 21:3, 4). Kinpaleuis katli motemachiaj ipan ya ma kichiuakaj ni Tlaltipaktli se xochimili (Sal. 37:9-11). Nojkia, kichiuas nojua kuali ma timouikakaj iuaya. ¡Tlauel yejyektsi tlen tijselisej teipa! Uajka, ¿kenke timotemachiaj nelia tijselisej tlen techtenkauilijtok? Pampa Jehová nochipa kichiua tlen kiijtoua, uan kichijtok se keski tlamantli tlen kichiua ma timotemachikaj ipan ya (Sal. 27:14). * Kema tijpiaj toyolo uan tijchiaj ika pakilistli ma kichiua nochi tlen kitenkajtok, tijnextiaj timotemachiaj ipan toTeotsij (Is. 55:10, 11).
2. ¿Tlake tlamantli ya kichijtok Jehová?
2 Jehová kinextijtok nelnelia kichiua tlen kiijtoua. Ma tikitakaj se neskayotl. Ipan amochtli Apocalipsis kiijtok ipan ni tonali kinsentiliskia tlauel miakej maseualmej katli kampa ueli euaj, amo kamanaltij sanse tlajtoli uan kiueyichiuasej kej ya kineki. Inijuantij elij nopa “miak[ej] tlakamej” o maseualmej (Apoc. 7:9, 10). Maske ni tlakamej, siuamej uan konemej kampa ueli euaj, amo sanse elij uan amo kamanaltij sanse tlajtoli, nochi tlauel kuali mouikaj (Sal. 133:1; Juan 10:16). Nojkia, tlajtolmoyauaj ika pakilistli uan kinekij kiniljuisej sekinok kenijkatsa teipa kuali tiitstosej (Mat. 28:19, 20; Apoc. 14:6, 7; 22:17). Tlaj ta tieli se tlen ni miakej maseualmej, uelis tlauel tijpatiita tlen tijselis teipa.
3. ¿Tlake kineki Satanás ma tijchiuakaj?
3 Satanás kineki ayokmo ma timotemachikaj ipan tlen tijselisej teipa. Ya kineki ma timoiljuikaj Jehová amo techpatiita uan amo kichiuas tlen kitenkajtok. Tlaj Satanás kichiuas ayokmo ma timotemachikaj ipan tlen tijselisej teipa, peuas timajmauisej uan uelis ayokmo tijtekipanosej Jehová. Ipan ni tlamachtili tikitasej kenijkatsa Satanás kinekiyaya kichiuas Job ayokmo ma motemachi ipan tlen kiseliskia teipa uan kiampa ayokmo kiueyichiuaskia Jehová.
4. Kej kiijtoua Job 1:9-12, ¿tlake tikitasej ipan ni tlamachtili?
4 Ipan ni tlamachtili tikitasej tlake kichijki Satanás pampa kinekiyaya Job ma kitlauelkaua Jehová (xijpoua Job 1:9-12). Nojkia, tikitasej tlake uelis tijyekosej tlen Job kipanok uan kenke moneki tikilnamikisej Jehová techiknelia uan kichiuas tlen kitenkajtok.
SATANÁS KINEKIYAYA JOB AYOKMO MA MOTEMACHI IPAN TLEN KISELISKIA
5, 6. ¿Kenijkatsa Job mopatlatiuetski inemilis?
5 Job kuali itstoya pampa kuali mouampojchijtoya ika Jehová, kinpiayaya miakej ikoneuaj uan kuali mouikayayaj, uan nojkia tlauel tlapijpiayaya (Job 1:1-5). Maske kipixtoya nochi ni tlamantli, san ipan se tlalochtli kipolok nochi. Achtoui kipolok tlen tlapijpiayaya (Job 1:13-17). Teipa, mijkej nochi ikoneuaj. Ma timoiljuikaj kenijkatsa kiyolmatki. Kema se tetaj miki se ikone tlauel moyolkokoua uan tlauel mokuesoua, yeka Job uan isiua nojua tlauel mokuesojkej kema kimatkej mijkej matlaktli ininkoneuaj, uan Job kitsayanki iyoyo uan motlankuaketski (Job 1:18-20).
6 Teipa Satanás kichijki ma mokoko, yeka Job kimatki kejuak ayokmo kipiayaya ipati (Job 2:6-8; 7:5). Maseualmej tlauel kitlepanitayayaj uan yeka yauiyayaj kiitaj kema kinekiyayaj ma kintlajtolmaka (Job 31:18). Uan kema kipixki nopa kokolistli, ayokmo kitemojkej uan mouejkatlalijkej. Nojkia kiampa kichijkej iikniuaj, iuampoyouaj uan itekipanojkauaj (Job 19:13, 14, 16).
Miakej toikniuaj kuali kikuamachiliaj tlen Job kipanok. (Xikita párrafo 7). *
7. 1) ¿Tlake moiljuik Job kitlaijiyouiltiyaya uan tlake amo kinejki kichiuas? 2) ¿Tlake ueliskia kiixnamikis se toikni sanse kej Job? (Xikita tlaixkopinkayotl tlen párrafo 7).
7 Satanás kinekiyaya Job ma moiljui tlaijiyouiyaya pampa Jehová ayokmo kuali kiitayaya. Yeka, ika se chikauak ajakatl kichijki ma ueloni nopa kali kampa tlakuayayaj ikoneuaj (Job 1:18, 19). Nojkia, kichijki ma uetsi tlitl uan kintlatik nochi itlapialjuaj uan itekipanojkauaj (Job 1:16). Nopa ajakatl uan nopa tlitl amo elki kej kema ipa mochiua. Yeka, Job moiljuik Jehová kiampa kichijtoya pampa uelis kiixpanotoya. Maske kipanok nochi ni tlamantli, ya amo kema kitlaijiljuik o kitelchijki iTata Jehová. Job pejki moiljuia nochi nopa kuali tlamantli tlen kiselijtoya, uan yeka nojkia monekiyaya kiselis tlen kipanoyaya. Uan kiijtok nojua kiuejkapantlaliskia Jehová (Job 1:20, 21; 2:10). Maske Job ayokmo tlapijpiayaya, tlauel mokuesouayaya uan mokokouayaya, ya nojua kitekipanouayaya toTeotsij. Yeka, Satanás nojua kitemoliskia kenijkatsa kitlaijiyouiltijtos.
8. ¿Tlake seyok tlamantli kitekiuik Satanás tlen ika kiyolkokok Job?
8 Satanás nojkia kintekiuik se keskij tlakamej ma kichiuakaj Job ayokmo ma mopatiita. Ni tlakamej kiiljuijkej tlaijiyouiyaya pampa kichijtoya tlen amo kuali (Job 22:5-9). Nojkia, kiiljuijkej maske amo kichijtoskia nopa tlamantli, toTeotsij amo kema kuali kiitaskia maske kichiuaskia kampeka kuali monejnemiltis (Job 4:18; 22:2, 3; 25:4). Inijuantij kinekiyayaj Job ma moiljui Jehová amo kiikneliyaya, amo kimokuitlauiskia yon amo kinamikiyaya ma kitekipano. Tlen kiiljuijkej kichijki ma moiljui ayokmo kema kuali itstoskia.
9. ¿Kenke Job kiijiyouik tlen kipanok uan amo majmajki?
9 Ma timoiljuikaj ipan ni tlamantli: Job moseuijtok ipan kuajnextli, uan mojmostla ajuayoua (Job 2:8). Mojmostla kitlaijiljuiaj iuampoyouaj uan kichiuasnekij ayokmo ma mopatiita. Nopa kichiua tlauel ma moyolkoko, uan kema kinilnamiki ikoneuaj nojua tlauel moyolkokoua. Uelis achtoui amo tleno kiijtoua (Job 2:13–3:1). Yeka, iuampoyouaj moiljuiaj kitlauelkauas toTeotsij. Teipa, uelis Job moixtlalana uan kiniljuia: “¡Tlaj ayamo nimiktos amo nijkauas nijtekipanos [toTeotsij] ika nochi noyolo!” (Job 27:5, TNM). ¿Kenke Job uelki kiijiyouik nopa tlaouijkayotl uan amo majmajki? Pampa nochipa motemachik Jehová kipaleuiskia. Uan kimatiyaya maske mikiskia, ya kiyolkuiskia (Job 14:13-15).
¿KENIJKATSA UELIS TIJCHIUASEJ SANSE KEJ JOB?
10. ¿Tlake techmachtia tlen Job kipanok?
10 Tlen Job kipanok techmachtia Jehová nochipa kiita tlen techpano uan Satanás amo uelis techchiualtis ma tijtlauelkauakaj. Tlen kiixnamijki uan kichijki, nojkia techmachtia sekinok tlamantli. Ma tikitakaj.
11. Kej kiijtoua Santiago 4:7, ¿kenijkatsa techpaleuia tlaj nochipa timotemachiaj ipan Jehová?
11 Job kinextik tlaj nochipa timotemachiaj ipan Jehová, uelis tikijiyouisej tlen techpano uan techpaleuis amo ma techtlani Satanás. Uan Biblia kiijtoua tlaj kiampa tijchiuaj, Satanás mouejkatlalis (xijpoua Santiago 4:7).
12. ¿Kenijkatsa kiyolchikajki Job pampa kimatiyaya moyolkuisej katli miktokej?
12 Moneki tijneltokasej temachtli moyolkuisej katli miktokej. Kej tikitakej ipan tlamachtili 26, Satanás kineki kichiuas ma tijmakasikaj timikisej uan kiampa tijtlauelkauasej Jehová. Ma timoiljuikaj ipan tlen kipanok Job. Satanás kiijtok kichiuaskia miak tlamantli maske kiixpanoskia Jehová pampa kimakasiyaya mikis. ¡Tlauel mokuapolojtoya! Maske Job tlauel tlaijiyouijtoya uan moiljuik mikiskia, amo kema kitlauelkajki toTeotsij. ¿Kenke uelki kiijiyouik? Pampa kineltokayaya Jehová kipia kuali iyolo uan kisenkauaskia nopa tlaouijkayotl. Motemachiyaya tlaj kema yoltoya amo kipaleuiskia, teipa kiyolkuiskia. Kineltokayaya Jehová ueli kinyolkui katli miktokej. Tlaj nojkia timotemachiaj kej Job, amo kema tijtlauelkauasej Jehová maske kinekisej techmiktisej.
13. ¿Kenijkatsa techpaleuia tijmatisej tlen Satanás kitekiuik kema kitlaijiyouiltik Job?
13 Tlauel techpaleuis tlaj tijmatij nochi tlen Satanás kitekiuik kema kitlaijiyouiltik Job, pampa ipan ni tonali nojkia ya nopa kitekiuia. Ma tikitakaj tlen kiijtok Satanás: “Se tlakatl kichiuas miak tlamantli para kimanauis iyolis” (Job 2:4, 5). Ya kinejki kiijtos amo nelia tikikneliaj Jehová uan tijtlauelkauasej tlaj techpanos tlen amo kuali. Nojkia, kiijtoua toTeotsij amo techiknelia uan amo kipatiita nochi tlen tijchiuaj kema tijtekipanouaj. Tlaj nelia timotemachiaj ipan Jehová, amo tijkauasej Satanás ma techkajkayaua pampa kuali tijmatij tlake tlamantli kitekiuia.
14. ¿Tlake ueliskia nesis kema tikixnamikij se tlaouijkayotl, uan tlake neskayotl techpaleuia tijkuamachilisej?
14 Kema Job kipanok nochi nopa tlaijiyouilistli kiitak monekiyaya nojua kichiuas kampeka moechkapantlalis. Kema titlaijiyouiaj nojkia techpaleuia kuali ma tikitakaj kenijkatsa tielij (Job 42:3). Uelis tikitasej miak tlamantli tlen nojua moneki tijnextisej. Ya nopa kiitak toikni Nikolái, * katli kitsajkej maske tlauel mokokouayaya. Ya kiijtoua: “Kema se maseuali kitsakuaj, eli kejuak kichiuiliaj se radiografía pampa kipaleuia ma kiita tlake kuajkuali tlamantli kinextia”. Kema tikitaj tlake nojua moneki tijpatlasej, techpaleuia kiampa ma tijchiuakaj.
15. ¿Ajkia moneki tijtlakakilisej uan kenke?
15 Moneki tijtlakakilisej Jehová uan amo tokualankaitakauaj. Job tlauel kuali kitlakakilik kema kikamanaljuik. Jehová kinejki ma kikuamachili se keski tlamantli, yeka uelis kiiljuik: “¿Tikitstok kenijkatsa nijnextijtok nochikaualis ika nochi tlen nijchijchijtok? Na nikitstok nochi tlen mitspano. ¿Timoiljuia amo uelis nimitsmokuitlauis?”. Job kitlaskamatki uan ika miak tlatlepanitakayotl kiiljuik: “ToTeko nimitsiljuia. Na nijkaktoya tlen ta, pero ama nimitsitstok” (Job 42:5). Kema Job kiijtok ni tlamantli, uelis nojua moseuijtoya ipan kuajnextli, kipixtoya lepra uan tlauel mokuesojtoya pampa mijkej ikoneuaj. Maske tlauel tlaijiyouijtoya, Jehová kiiljuik tlauel kiiknelia uan kuali kiitayaya (Job 42:7, 8).
16. Kej kiijtoua Isaías 49:15, 16, ¿tlake moneki tikilnamikisej kema tikixnamikij tlaouijkayotl?
16 Ipan ni tonali maseualmej uelis nojkia techtlaijiljuiaj uan kichiuaj ma tijyolmatikaj amo tleno topati. Uelis techistlakauiaj ika miak tlamantli tlen kichiua amo kuali ma techitakaj o ayokmo kuali ma kiitakaj tlanechikoli (Mat. 5:11). Tlen Job kipanok kinextia Jehová nojkia motemachia amo tijtlauelkauasej kema titlaijiyouisej. ToTeotsij tlauel techiknelia uan amo kema techilkauas pampa timotemachiaj ipan ya (xijpoua Isaías 49:15, 16). Yeka, amo ma tikintlakakilikaj katli techtlaijiljuiaj. Ma tikitakaj tlen kiijtok toikni James, katli eua Turquía uan kiixnamiktok miak tlaouijkayotl ininuaya ichampoyouaj. Ya kiijtok: “Tikitakej tlaj tijtlakakilijtoskiaj nochi tlen maseualmej kiijtouayayaj tlen toTeotsij itlanechikol, kichiuaskia ma timoyolkokokaj. Yeka, timosentlalijkej ipan tlen tijselisej teipa uan nojua tlauel tijtekipanojkej Jehová, nopa techpaleuik nojua ma tiyolpakikaj”. Sanse kej Job ma tijtlakakilikaj Jehová. Amo ma tijkauakaj nochi istlakatili tlen kiijtouaj tokualankaitakauaj ma kichiua ayokmo timotemachisej ipan tlen tijselisej teipa.
TLEN TIJCHIAJ TIJSELISEJ TECHPALEUIS MA TIKIJIYOUIKAJ
Jehová tlauel kiteochijki Job pampa amo kitlauelkajki, uan kichijki ya uan isiua ma itstokaj miak xiuitl uan ma yolpakikaj. (Xikita párrafo 17). *
17. ¿Tlake tijyekouaj tlen toTeotsij itekipanojkauaj tlen Hebreos capítulo 11?
17 Sanse kej Job, sekinok toTeotsij itekipanojkauaj amo majmajtokej kema kiixnamiktokej tlaouijkayotl. Ipan nopa amatlajkuiloli tlen apóstol Pablo kintlajkuiljuilik hebreos, kamanaltik tlen tlauel miakej toTeotsij itekipanojkauaj (Heb. 12:1). Maske kiixnamijkej uejueyi tlaouijkayotl, yon se amo kitlauelkajki Jehová (Heb. 11:36-40). ¿Kinpaleuik pampa kichijkej kampeka kiijiyouisej tlen kinpanok? Kena. Maske amo kiitakej kenijkatsa moaxitik tlen toTeotsij kitenkajtok, nochipa motemachijkej ipan ya. Nojkia, motemachiyayaj Jehová kuali kinitayaya, yeka kimatiyayaj temachtli moaxitiskia tlen kiseliskiaj (Heb. 11:4, 5). Kema tikitaj tlen kichijkej, techpaleuia nochipa ma timotemachikaj ipan Jehová.
18. Kej kiijtoua Hebreos 11:6, ¿tlake moneki tijchiuasej maske tikixnamikisej tlen ueli tlaouijkayotl?
18 Ipan ni tonali nojua panotos tlen amo kuali (2 Tim. 3:13). Uan Satanás nojua techtlaijiyouiltijtos. Yeka, maske tikixnamikisej tlen ueli tlaouijkayotl, nojua ma titlatekipanojtokaj ika nochi toyolo uan ma timotemachijtokaj ipan “toTeko tlen yoltok” (1 Tim. 4:10). Kema tikitaj kenijkatsa Jehová kiteochijki Job, techpaleuia tikitasej ya “tlauel teiknelia uan tetlasojtla” (Sant. 5:11). Yeka, nojkia amo kema ma tijtlauelkauakaj Jehová, uan ma timotemachikaj ya “kinteochiua katli nochipa kichiuaj kampeka kitemosej” (xijpoua Hebreos 11:6, TNM). *
UIKATL 150 Jehová mitsmakixtis
^ Kema timoiljuiaj ipan se katli tlauel tlaijiyouijtok, nima tikilnamikij tlen Job kipanok. ¿Tlake uelis tijyekosej? 1) Satanás amo uelis techchiualtis ma tijtlauelkauakaj Jehová, 2) toTeotsij nochipa kiita tlen techpano uan, 3) se tonali techkixtilis nochi tlen techtlaijiyouiltia sanse kej kipaleuik Job. Tlaj tijnextiaj nelia timotemachiaj ipan ni tlamantli, uajka nojkia tijnextisej timotemachiaj Jehová nelia kichiuas tlen techtenkauilijtok.
^ TLEN TLAUEL IPATI: Nopa tlajtoli tlen motlajtolkuepa ika hebreo “ximochia ipan” kiijtosneki tijchias se tlamantli ika pakilistli. Nojkia, kineki kiijtos timotemachis ipan se akajya (Sal. 25:2, 3; 62:5).
^ Mopatlatok se keski tokajyotl.
^ Hebreos 11:6, TNM: “Tlaj se akajya amo tlaneltokas amo uelis kichiuas tlen toTeotsij kipaktia, pampa katli kinechkauia toTeotsij moneki kineltokas yaya nelia itstok uan kinteochiua katli nochipa kichiuaj kampeka kitemosej”.
