OSHITOPOLWA SHOKUKONAKONWA 27
Inekela muJehova
“Inekela Omuwa. Itaala, ino limbililwa.” — EPS. 27:14.
EIMBILO 128 Idhidhimika sigo okehulilo
ELALAKANO LYOSHITOPOLWA *
1. (a) Jehova okwe tu pa etegameno lini? (b) ‘Okwiinekela muKalunga’ otashi ti shike? (Tala “Uutumbulilo wa yelithwa.”)
JEHOVA okwa pa mboka ye mu hole etegameno ewanawa. Masiku ota ka hulitha po uuwehame, oluhodhi neso. (Eh. 21:3, 4) Ota ka kwathela “aaifupipiki” mboka ye mu inekela ya ninge evi Oparadisa. (Eps. 37:9-11) Ote ke shi ninga wo tashi wapa, opo kehe gumwe gwomutse a kale e na ekwatathano ewanawa naye, li vule ndyoka tu na naye ngashingeyi. Ndyoka kali shi tuu etegameno ewanawa! Ihe omolwashike tu na okukala twi itaala kutya Kalunga ota ka gwanitha po omauvaneko ge? Jehova oha gwanitha po aluhe shoka a uvaneka. Onkee ano, otu na etompelo ewanawa ‘lyokwiinekela muye.’ * (Eps. 27:14) Shoka ohatu shi ulike mokutegelela Kalunga ketu neidhidhimiko nonenyanyu a gwanithe po omauvaneko ge. — Jes. 55:10, 11.
2. Jehova okwa ninga po nale shike?
2 Jehova okwe shi ulika nale kutya oha gwanitha po omauvaneko ge. Natu taleni koshiholelwa shimwe sha dhenga mbanda kombinga yaashoka. Membo lyEhololo, Jehova oku uvaneka kutya pethimbo lyetu ota ka gongela aantu okuza miigwana ayihe, momalaka agehe nomomihoko adhihe, note ke ya hanganitha melongelokalunga lyashili. Kunena, ongundu yaantu mboka yi ikalekelwa ohayi ithanwa “ongundu onene.” (OB-1954) (Eh. 7:9, 10) Nonando oya thikama po maalumentu, maakiintu naanona yomomihoko, yomalaka, noyomomaputuko gi ili nogi ili, ongundu ndjika onene oyi na ombili noyi li uukwanegumbo wa hangana muuyuni awuhe. (Eps. 133:1; Joh. 10:16) Mboka ye li oshitopolwa shongundu ndjoka ohaya uvitha wo nuulaadhi. Ohaya kala aluhe yi ilongekidha okulombwela yalwe mboka ye na ehalo lyokupulakena kombinga yetegameno lyawo lyuuyuni uupe. (Mat. 28:19, 20; Eh. 14:6, 7; 22:17) Ngele owu li oshitopolwa shongundu onene, osha yela kutya etegameno lyoye lyiinima iiwanawa tayi ke ya owe li lenga noonkondo.
3. Elalakano lyaSatana olini?
3 Ondiyapoli oya hala oku ku ningitha wu kale kuu na we etegameno. Elalakano lyayo oku ku ningitha wi itaale kutya Jehova ke na ko nasha nangoye nosho wo kutya Ita ka gwanitha po omauvaneko ge. Ngele Satana okwe tu ningitha tu kale kaatu na etegameno, itatu ka kala we tu na uulaadhi notashi vulika tu ethe po okulongela Jehova. Ngaashi tatu ke shi mona, Ondiyapoli oya li ya kambadhala okuningitha Job kaa kale we e na etegameno noku ethe po okulongela Jehova.
4. Otatu ka kundathana shike moshitopolwa shika? (Job 1:9-12)
4 Moshitopolwa shika otatu ka tala komikalo ndhoka Satana a li a longitha opo a teye po uudhiginini waJob. (Lesha Job 1:9-12.) Otatu ka kundathana wo shoka tatu vulu okwiilonga koshiholelwa shaJob nosho wo kutya omolwashike twa pumbwa okudhimbulukwa aluhe kutya Jehova oku tu hole nota ka gwanitha po omauvaneko Ge.
SATANA OKWA LI A KAMBADHALA OKUNINGITHA JOB A KANITHE ETEGAMENO
5-6. Job okwa li a ningilwa shike muule wethimbo efupi?
5 Job okwa li e na onkalamwenyo ombwanawa. Okwa li e na uukuume wa kola naJehova. Okwa li wo e na uukwanegumbo wu na aantu oyendji, wa hangana nokwa li omuyamba noonkondo. (Job 1:1-5) Ihe muule owala wesiku limwe, Job okwa li a kanitha konyala kehe shimwe. Shotango, okwa kanitha omaliko ge. (Job 1:13-17) Opo nduno aanona ye ayehe oya si. Dhiladhila owala kutya oshiningwanima shoka osha li oshiwinayi shi thike peni. Aavali ohaya kala ya dhengwa pomitima, uuna kamwe komaanona yawo ka si. Onkee Job nomukadhi oye na okukala ya li ya kumwa, ya nika oluhodhi, yo oya yemata noonkondo sho ya uvu kutya aanona yawo ayehe omulongo oya sa. Nomolwaashono Job a li a tuula oonguwo dhe sho ta lili e ti ihata pevi! — Job 1:18-20.
6 Shimwe ishewe, Satana okwa li a etele Job uuvu tawu sitha ohoni. (Job 2:6-8; 7:5) Pompito yimwe, Job okwa li a simanekwa noonkondo kaantu yomomudhingoloko gwawo. Aantu oya li haye ya kuye e ya pe omayele. (Job 31:18) Ihe ngashingeyi oya li taye mu yanda. Okwa li a ekelwahi kaakwawo, kookuume ke kopothingo nokaapiya ye nokuli! — Job 19:13, 14, 16.
Aamwatate naamwameme oyendji kunena oye shi kutya Job okwa li e uvite ngiini sho a li muudhigu wa kwata miiti, oshoka nayo oyi iyadha momaudhigu ngaashi ge (Tala okatendo 7) *
7. (a) Job okwa li e wete kutya okumona iihuna kwe okwa zi peni, ihe okwa li a tindi okuninga shike? (b) Omukriste otashi vulika a adhike keshongo lini ngaashi sha ulikwa methano?
7 Satana okwa li a hala Job a itaale kutya ota mono iihuna molwaashoka Jehova ine mu hokwa we. Pashiholelwa, Satana okwa li a longitha ombepo yoshikungulu ndjoka ya hanagula po egumbo moka mwa li oyana yaJob omulongo mboka ya li taya li pamwe. (Job 1:18, 19) Okwa li wo a ningitha omulilo gu ze megulu e tagu dhipaga po iimuna ayihe yaJob nosho wo aapiya ye mboka ya li taye yi tonatele. (Job 1:16) Ombepo ndjoka nomulilo ngoka oyi na okukala ya li ya zi konzo yontumba kaayi shi yopaunshitwe, nomolwaashono Job a li a thiki pehulithodhiladhilo kutya Jehova Kalunga oye e yi etitha. Shoka osha ningitha Job a itaale kutya oku na okukala a ninga sha sha yemateka Jehova. Ihe nonando ongawo, Job okwa tindi okutuka He gwomegulu. Job okwa li e shi popi kutya momukokomoko gwomimvo okwa li a pewa iinima iiwanawa oyindji kuJehova. Okwa li a dhiladhila kutya ngele okwa li a nyanyukwa okutaamba ko mbyoka iiwanawa, oku na wo okukala e na ehalo lyokutaamba ko mbyoka iiwinayi. Onkee okwa ti: “Edhina [lyaJehova] nali simanekwe.” (Job 1:20, 21; 2:10) Nonando Job okwa li a kanitha omaliko ge, aanona ye nuukolele we, okwa kala omudhiginini kuJehova. Ihe Satana okwa li ishewe a kambadhala po oshinima shilwe.
8. Omukalo gulwe ishewe guni Satana a li a longitha a makele Job?
8 Satana okwa li wo a longitha omukalo gulwe a makele Job. Okwa li a longitha aantu yatatu mboka ya li tayi iningitha ya fa ookuume kaJob ye mu ningithe a kale e uvite kee na oshilonga. Aalumentu mboka oya li wo ya popi kutya Job ota mono iihuna molwaashoka anuwa okwa ninga iinima oyindji iiwinayi. (Job 22:5-9) Oya li ya kambadhala oku mu itaalitha kutya nonando ye ke shi omukolokoshi, oonkambadhala adhihe ndhoka a li a ningi dhokunyanyudha Kalunga osima yowala. (Job 4:18; 22:2, 3; 25:4) Oya li nokuli taya kambadhala okuningitha Job a kale a limbililwa ngele Kalunga oku mu hole, ota vulu oku mu sila oshimpwiyu, nosho wo kutya oku Mu longela kwe oku na ngaa ongushu kuYe. Oohapu dhawo odha li dha ningitha Job a kale e uvite kutya onkalo ye itayi ke ya we kondjila.
9. Oshike sha kwathele Job a kale e na uulaadhi nomukumo?
9 Kala andola wa fa wu wete Job a kuutumba momutoko, ye ota ehama. (Job 2:8) Ookuume ke otaye mu ula kutya ye ke shi omuntu omwaanawa nosho wo kutya ina ninga nando osha shi na oshilonga. Uupyakadhi we owe mu gwilila po wa fa omamanya omadhigu, ye okwa sa oluhodhi sho a silwa aanona ye ayehe. Petameko, Job okwa kala a mwena. (Job 2:13–3:1) Ngele ookuume kaJob oya li taya dhiladhila kutya sho a mwena okwa hala okweetha po Omushiti gwe, nena ayehe oya li ya puka lela. Pompito yimwe otashi vulika Job a li a popi a yelutha omutse ye okwa tala miipala yookuume ke mboka aafundja a ti: “Sigo okusa itandi ki idhimbika uuyuuki wandje [nenge tu tye itandi etha po uudhiginini wandje]”! (Job 27:5) Oshike sha kwathele Job a kale e na uulaadhi nomukumo nonando ota mono iihuna? Nonando okwa li e taka omukumo noonkondo, kali a kanitha etegameno lye muKalunga ke omunahole kutya ota ka hulitha po okumona iihuna kwe. Okwa li e shi kutya nonando oku se, Jehova ote ke mu yumudha. — Job 14:13-15.
ONGIINI TATU VULU OKUHOLELA JOB?
10. Ehokololo kombinga yaJob otali tu longo shike?
10 Ehokololo kombinga yaJob otali tu longo kutya Satana ke na esiku e tu ethithe po okulongela Jehova nosho wo kutya Jehova oku shi onkalo moka tu li. Oshimoniwa shaJob otashi vulu wo oku tu kwathela tu kale tu na euvoko lyomondjila kombinga yaashoka hashi kala sha kwatelwa mo. Natu ka tale kiiyilongomwa yimwe yokondandalunde mbyoka tatu vulu okwiilonga kuJob.
11. Oshike tatu ka ningilwa, ngele otwa tsikile okukala twi inekela muJehova? (Jakob 4:7)
11 Job okwa li a ulike kutya ngele otwa tsikile okukala twi inekela muJehova, otatu vulu okwiidhidhimikila uudhigu kehe, notatu ka pondola mokukondjitha Satana. Oshizemo? Omanyolo otage tu shilipaleke kutya Satana ote ke tu ya ontuku. — Lesha Jakob 4:7.
12. Etegameno lyeyumuko olya li lya tsu ngiini Job omukumo?
12 Otwa pumbwa okukala tu na eitaalo lya kola meyumuko. Ngaashi sha popiwa moshitopolwa sha tetekele, Satana olundji oha longitha uumbanda wokutila eso e tu ningithe tu ethe po uudhiginini wetu. Monkalo yaJob, okwa li a ti kutya Job ote ke etha po kehe shimwe, nokuli nuudhiginini we kuJehova, opo a hupithe omwenyo gwe. Satana ka li tuu a puka. Nopompito ndjoka Job a li monkalo ondhigu lela e wete kutya oku li pokusa, ina etha po uudhiginini we. Omolwashike mbela? Omolwaashoka okwa li i inekela muJehova kutya oha ningile aluhe aantu uuwanawa nosho wo kutya ote ke mu kwathela i idhidhimike. Job okwa li e na eitaalo kutya ngele Jehova ine mu kwathela sho e na omwenyo, monakuyiwa Ote ke mu yumudha. Etegameno lyeyumuko olya li lyolela kuJob. Ngele etegameno ndyoka olyolela kutse, nonando otu tilithwe neso, itatu ka etha po uudhiginini wetu kuJehova.
13. Omolwashike twa pumbwa okugandja eitulomo kiineya mbyoka Satana a li a longitha a makele Job?
13 Otu na okukala hatu gandja eitulomo kiineya mbyoka Satana a li a longitha a makele Job, oshoka oyo ha longitha nokunena e tu makele. Ndhindhilika nkene Satana a li a lundile Job. Okwa ti: “Omuntu [ihe ke shi owala Job] ota gandja po iinima ye ayihe, opo a kale e na omwenyo.” (Job 2:4, 5) Kungawo, Satana okwa li ta ti kutya katu hole shili Jehova Kalunga nosho wo kutya otatu ka etha po oku Mu longela uuna oomwenyo dhetu dhi li moshiponga. Satana okwa ti wo kutya Kalunga ke tu hole nosho wo kutya iha kala e na ko nasha noonkambadhala ndhoka tatu ningi tu Mu nyanyudhe. Ihe molwaashoka otu shi kutya Satana ota kambadhala okuninga shike, ihatu itaale iifundja ye.
14. Omashongo ohaga vulu okuholola shike kombinga yetu? Shi thaneka.
14 Otu na okutala ko omashongo ge li ompito yokwiilonga sha kombinga yetu yene. Omashongo ngoka Job a li i iyadha mugo oga li ge mu kwathele a ndhindhilike mo omaunkundi ge, e te ga pukulula. Pashiholelwa, okwa li i ilongo kutya okwa pumbwa okukokeka uukwatya weifupipiko shi vulithe nale. (Job 42:3) Natse otatu vulu okwiilonga oshindji kombinga yetu yene uuna tu li meshongo lyontumba. Omumwatate Nikolay, * ngoka a li a tulwa mondholongo nonando okwa li e na uuvu wa kwata miiti, okwa ti: “Ondholongo oya fa eshina lyokuthaneka molutu. Ohayi holola puuyelele uukwatya wOmukriste womeni.” Ngele otwa ndhindhilike omaunkundi getu, otatu vulu okulongela ko tu ga pukulule.
15. Otu na okupulakena kulye, nomolwashike?
15 Otwa pumbwa okupulakena kuJehova, ihe hakaatondi yetu. Job okwa li lela a gandja eitulomo sho Jehova a li ta popi naye. Kalunga okwa li a tompathana naye a fa ta ti: ‘Owu wete ngaa oonkondo dhandje meshito? Ondi shi kehe shimwe shoka wa ningilwa. Sho to tala mbela itandi vulu oku ku sila oshimpwiyu?’ Job okwe mu yamukula neifupipiko nonolupandu omolwuuwanawa we a ti: “Nale onda li nde ku uvu omufofoto, ihe ngashingeyi ondi ku wete nomeho gandje mwene.” (Job 42:5) Job otashi vulika natango a li a kuutumba momutoko, olutu lwe lwu udha iilalo, nokwa li natango ta lili oyana ayehe mboka ya sa, sho a popi oohapu ndhoka. Ihe nonando ongawo, Jehova okwa li e mu lombwele kutya oku mu hole nokwe mu shilipaleke kutya okwe mu hokwa. — Job 42:7, 8.
16. Shi ikolelela kuJesaja 49:15, 16, oshike tu na okukaleka momadhiladhilo uuna tu li momaudhigu?
16 Kunena, aantu otashi vulika ye tu tuke nokuungaunga natse twa fa kaatu na oshilonga. Otashi vulika ya kambadhale okunyateka edhina lyetu pauhandimwe nenge tu li ehangano noku tu “popila muuwinayi auhe nokufundja.” (Mat. 5:11) Ehokololo lyaJob otali tu longo kutya Jehova oku na einekelo mutse kutya otatu ka tsikila okukala aadhiginini kuye uuna tu li momaudhigu. Jehova oku tu hole, noke na esiku a ekelehi mboka ye na etegameno muye. (Lesha Jesaja 49:15, 16.) Ino gandja eitulomo kiifundja yaatondi yaKalunga! Omumwatate James gwokoTurkey ngoka uukwanegumbo we wa li momaudhigu ga kwata miiti, okwa ti: “Otwa ndhindhilike kutya okupulakena kiifundja kombinga yaapiya yaKalunga otaku tu teya omukumo. Onkee otwa kala tatu gandja eitulomo ketegameno lyetu lyUukwaniilwa notwa tsikile okukala twi ipyakidhila niilonga yaJehova. Shoka oshe tu kwathele tu kale twa nyanyukwa.” Ngaashi Job a li a ningi, ohatu pulakene kuJehova! Iifundja yaatondi yetu itayi vulu okuteya po etegameno lyetu.
ETEGAMENO LYOYE OTALI KU KOLEKE
Jehova okwa li a yambeke Job omolwuudhiginini we. Ye nomukadhi oya li ya kala nomwenyo ethimbo ele ya nyanyukwa (Tala okatendo 17) *
17. Oshike to ilongo moshiholelwa shaalumentu naakiintu aadhiginini mboka ya popiwa mAahebeli ontopolwa 11?
17 Job oye gumwe gwomaapiya yaJehova ngoka a li e na uulaadhi nomukumo pethimbo a li muudhigu wa kwata miiti. Montumwafo ye ndjoka a li a nyolele Aahebeli, Omuyapostoli Paulus okwa popi kombinga yaapiya yalwe oyendji, mboka e yi ithana kutya ‘ongundu onene yoonzapo.’ (Heb. 12:1) Ayehe oya li ya piti momashongo ga kwata miiti, ihe oya kala aadhiginini kuJehova onkalamwenyo yawo ayihe. (Heb. 11:36-40) Mbela eidhidhimiko lyawo nokulonga kwawo nuudhiginini oya li osima yowala? Aawe! Nonando inaya mona omauvaneko agehe gaJehova taga gwanithwa pethimbo sho ya li ye li momwenyo, oya tsikile okukala yi inekela muye. Shimwe ishewe, molwaashoka oya li ye shi kutya oya hokiwa kuJehova, oya li lela ye na einekelo kutya monakuyiwa otaya ka mona nkene ta gwanitha po omauvaneko ge agehe. (Heb. 11:4, 5) Oshiholelwa shawo otashi vulu oku tu tsa omukumo tu kale twa tokola toko tu tsikile okukala twi inekela muJehova.
18. Owa tokola toko okuninga shike? (Aahebeli 11:6)
18 Kunena otu li muuyuni tawu ende tawu nayipala noonkondo. (2 Tim. 3:13) Satana ota tsikile nokumakela oshigwana shaKalunga. Kutya nduno onatu ka adhike komaudhigu ga tya ngiini monakuyiwa, natu kaleni twa tokola toko okulongela Jehova nuudhiginini, tu na omukumo kutya “otwi inekela Kalunga omunamwenyo.” (1 Tim. 4:10) Dhimbulukwa wo kutya shoka Jehova a ningile Job pehulilo, otashi ulike kutya oku li Kalunga “omunesilohenda nomunalukeno.” (Jak. 5:11) Natse natu kaleni aadhiginini kuJehova, tu na uushili kutya ota ka futa “ayehe mboka taye mu kongo.” — Lesha Aahebeli 11:6.
EIMBILO 150 Kongeni Kalunga, opo mu ka hupithwe
^ Uuna tatu dhiladhila kugumwe ngoka i idhidhimikila omaudhigu gwa kwata miiti, olundji momadhiladhilo getu ohamu ya Job. Oshike tatu ilongo mwaashoka omulumentu ngoka omudhiginini a li a ningilwa? Otatu ilongo mo kutya Satana ita vulu oku tu thiminika tu ethe po okulongela Jehova. Otatu ilongo mo wo kutya Jehova oha kala e shi kehe shimwe shoka tatu ningilwa. Shimwe ishewe, ngaashi owala a li a hulitha po omaupyakadhi agehe gaJob, monakuyiwa ota ka hulitha po wo omaupyakadhi getu agehe. Ngele otwe shi ulike meihumbato lyetu kutya otwa tompwa thiluthilu kutya iinima ayihe mbyoka oyoshili, nena otu li yamwe yomwaamboka yi ‘inekela shili Omuwa.’
^ UUTUMBULULILO WA YELITHWA: Oshitya shOshihebeli sha tolokwa “inekela” otashi ti lela okutegelela oshinima shontumba nondjuulukwe. Otashi gandja wo edhiladhilo lyokwiinekela omuntu gwontumba nenge okwiikolelela muye. — Eps. 25:2, 3; 62:5.
^ Omadhina gamwe oga lundululwa.
