1. a) ¿Tlenon kichiuas Jehová? b) ¿Tlenon kijtosneki tiktlalis moyojlo itech Jehová? (Xkita nota).

 JEHOVÁ yotechijli ika ajsis se tonajli ijkuak xok tikualoskej, xok tajmanaskej niman xok timikiskej (Apoc. 21:3, 4). Niman kinpaleuis akin yolyemankej makikuepakan se xochitlalpan yejuin tlaltikpaktli (Sal. 37:9-11). Maski aman ueli iuan touikaj, ipan yejon tonajli uelis más kuajli iuan touikaskej. ¡Melak kualtsin tlen kichiuas toTajtsin! San ika ¿kenon tikmatij ika toTajtsin yemelak kichiuas tlen yotechijli? Pampa yejua nochipa kichiua tlen kijtoua. Ika yejon, uelis itech titlaneltokaskej niman itech tiktlaliskej toyojlo (Sal. 27:14). b ¿Niman kenon tikteititiaj ika itech tiktlaliaj toyojlo? Tla ika toyojlo tikchiaj nochi tlen yokijto kichiuas niman tla xtosiaujkauaj (Is. 55:10, 11).

2. ¿Tlenon yokichiuj Jehová?

² Jehová miyekpa yotechititi ika yejua nochipa kichiua tlen kijtoua. Ipan Apocalipsis Jehová okijto ika ipan totonaluan kinsentlaliskia miyekej tlaltikpakchanejkej akin oksekan ualeuaj niman okse tlajtojli tlajtouaj para san sekan makiueyichiuakan. Niman yejuin grupo noixmati ken “sanoyej miyek tlakatl” (Apoc. 7:9, 10). Maski ipan yejuin grupo nemij tlakamej, siuamej niman kokonej akin oksekan ualeuaj niman tlajtouaj okse tlajtojli, melak notlasojtlaj  niman san sekan kiueyichiuaj Jehová (Sal. 133:1; Juan 10:16). Yejuamej ika inyojlo tenojnotsaj niman sa kinektokej kimijliskej oksekimej tlen kichiuas toTajtsin ika tlayekapan (Mat. 28:19, 20, TNM; Apoc. 14:6, 7; 22:17). Tla tejua tinemi ipan yejuin grupo, tikmatstokej ika sa tiknektika ika Jehová makichiua tlen yokijto.

3. ¿Tlenon kineki Satanás?

³ Diablo kineki techtlaneltokiltis ika Jehová xtechtlasojtla niman ika xkichiuas tlen yejua yotechijli. ¿Tlenon ueliskia panos tla tikneltokaj tlen Satanás techijlia? Xok titlaxikoskej ijkuak tikixnamikiskej tlen ouijtika niman hasta uelis tiktlalkauiskej Jehová. Amantsin tikitaskej kenon Diablo kinekiya kichiualtis Job makitlalkaui Jehová.

4. ¿Tlenon tikitaskej ipan yejuin tlamachtijli? (Job 1:9-12).

⁴ Ipan yejuin tlamachtijli tikitaskej tlen Satanás okichiuili Job ijkuak kinekiya kichiualtis makitlalkaui Jehová (xpoua Job 1:9-12). Noijki tikitaskej tlenon techmachtia tlen ipan onochiuj Job niman tleka melak noneki nochipa matikilnamiktokan ika Jehová techtlasojtla niman ika yejua kichiuas tlen yokijto.

5, 6. ¿Tlenon ipan onochiuj Job?

⁵ Job ika iyojlo chantiya, kuajli nouikaya iuan Jehová, kinpiaya miyek ichanejkauan niman kuajli imiuan nouikaya niman noijki kipiaya miyek tomin (Job 1:1-5). San ika, san ipan se tonajli okipolo nochi tlen kipiaya. Kachtopa, omijkej niman okinmichtekilijkej iyolkauan (Job 1:13-17). Sakin omijkej nochimej ikoneuan akin melak kintlasojtlaya. Tajtin melak noyolkokouaj ijkuak miki se inkoneuj. Aman san matikonnemilikan kenon melak onoyolkokojkej niman oajmankamijkej Job niman isiuauj ijkuak okimatkej ika on majtlaktli inkoneuan yomijkaj. Ika yejon, ¡Job onotlakentetsayan niman onotlajkal ipan tlajli! (Job 1:18-20).

⁶ Sakin, Satanás okichiuj ika Job makajsi se kokolistli tlen melak tekoko niman tlen melak tepinajti (Job 2:6-8; 7:5). Ijkuak xikualouaya, miyekej melak kitlakaitayaj niman hasta konitayaj para makinpaleui (Job 31:18). San ika, aman kicholouiliayaj niman xkitasnekiyaj. Ikniuan, iamigos niman itlakeualuan xkinekiyaj kipaleuiskej (Job 19:13, 14, 16).

7. a) ¿Tlenon okinemili Job ijkuak tlajyouijtoya, niman tlenon xokichiuj? b) ¿Tlenon uelis kixnamikis se itekipanojkauj Jehová? (Xkita tlaixkopinajli tlen noteneua ipan párrafo 7).

⁷ Satanás kinekiya ika Job makinemili ika Jehová xok kitlasojtlaya. Ika yejon, okichiuj ika chikauak maajaka niman makitlajkali on kajli kampa kualtsin tlakuajtoyaj on majtlaktli ikoneuan Job (Job 1:18, 19). Noijki okinmikti iyolkauan niman itlakeualuan Job ika se tlitl tlen oualeuj desde ne iluikak (Job 1:16). Pampa xkeman ijkon chikauak ajakaya niman xkeman uajtemouaya tlitl de ne iluikak, Job okinemili ika Jehová kitlajyouiltijtoya pampa yokichiujka itlaj tlen yejua xkuelita. Maski ijkon, Job xkeman okiuijuikalti Jehová. Yejua okijto ika ijkon ken kuajli okiseli tlen Jehová okimakak, noijki nonekiya kixikos nochi tlen xkuajli ipan nochiujtoya. Yejua okijto: “¡Ma nikiyekteneua toTEKO!” (Job 1:20, 21; 2:10). Maski Job xok kipiaya tomin, najmantoya niman kualouaya xkeman okitlalkaui Jehová.  Niman Satanás xokuelitak, ika yejon, itlaj okse okichiuili.

8. ¿Kenon Satanás okiyolkoko Job?

⁸ Aman, Satanás okichiuj ika yeyimej iamigos Job makiyolkokotij. Okijlikej ika Jehová kitlajyouiltijtoya pampa yokichiujka miyek tlen xkuajli (Job 22:5-9). Noijki okijlikej ika maski tla kichiuaskia tlen kuajli, yejua xkeman kiyolpaktiskia Jehová (Job 4:18; 22:2, 3; 25:4). Yejuamej kinekiyaj ika Job makinemili ika toTajtsin xkitlasojtla, xkitlajpiya niman ika xtlaj ika tepaleuij tla se kitekichiuilia Jehová. Tlen okijlikej melak okiyolkoko niman okinemili ika xok keman ueliskia ika iyojlo nemis.

9. ¿Kenon ouel otlaxiko Job?

⁹ San matikonnemilikan kenon nomachiliaya Job. Yejua yeuatika ipan tlikonextli niman ika tonajli niman yeuajli melak nokokoua (Job 2:8). Iamigos san tlemach kijliaj niman kipijpinaujtiaj. Job melak noyolkokoua pampa kixnamiktika miyek tlen ouijtika, niman melak najmana pampa nochimej ikoneuan yomijkej. Pampa yejua xtlaj kijtoua, iamigos kinemiliaj ika yejua kitlalkauis Jehová. San ika, nopopolouaj (Job 2:13–3:1). Sakin, Job kominita iamigos niman kimijlia: “Chika nejua ninemi, nochipa nikijtos ika nejua xitlaj nikchiua tlen xkuajli” (Job 27:5). ¿Kenon ouel otlaxiko Job? Nochipa okitlali iyojlo itech Jehová niman kimatstoya ika yejua kipaleuiskia niman ika tla mikiskia, yejua kiyolitiskia (Job 14:13-15).

10. ¿Tlenon techmachtia tlen ipan onochiuj Job?

¹⁰ Tlen ipan onochiuj Job techmachtia ika Satanás xuelis texchiualtis matiktlalkauikan Jehová, niman ika Jehová  kitstok nochi tlen topan nochiua. Noijki techititia akinon techtlajyouiltia. Aman matikitakan kenon uelis tikchiuaskej ken Job.

11. ¿Tlenon panos tla nochipa titlaneltokaj itech Jehová? (Santiago 4:7).

¹¹ Tlen okichiuj Job techititia ika tla nochipa titlaneltokaj itech Jehová, uelis titlaxikoskej ijkuak tikixnamikiskej tlen ouijtika niman uelis tikixnamikiskej Satanás. Niman Biblia techijlia ika tla ijkon tikchiuaj, Diablo texcholouilis (xpoua Santiago 4:7).

12. ¿Tlenon kimatstoya Job?

¹² Ipan okse tlamachtijli otikitakej ika Satanás kuelita ijkuak kita ika tejuamej tikmakasij timikiskej pampa yejua kineki matiktlalkauikan Jehová. Ika yejon, noneki kuajli tikmatstoskej ika tla timikij, Jehová techyolitis. Oksejpa matontlanemilikan itech Job. Satanás okijto ika Job kichiuaskia nochi tlen nonekiskia san para xmikiskia niman okijto ika hasta kitlalkauiskia Jehová. ¡San ika onopopolo! Pampa maski Job okinemili ika mikiskia, xkeman okitlalkaui Jehová. ¿Niman tleka ouel otlaxiko? Pampa kimatstoya ika Jehová yolkuajli niman ika kipaleuiskia. Niman kuajli kimatstoya ika tla yejua mikiskia, toTajtsin oksejpa kiyolitiskia. Tla tejuamej noijki ijkon titlanemiliaj, uelis timelajkanemiskej ijkuak kinekiskej techmiktiskej.

13. ¿Kenon techpaleuis tla tikitaj tlen Satanás okichiuili Job?

¹³ Melak kuajli tla tikitaj tlen Satanás okichiuili Job, pampa aman noijki ijkon kichiua. Yejua itlaj okijto itech Job niman itech tlaltikpakchanejkej, okijto: “Tla sen tlakatl xakaj kiteloua, yejua xitlaj kijtoua. Pero tla yakaj kimiktisneki, san tlinon kitemakasneki para nomanauis” (Job 2:4, 5). Satanás okijto ika xmelauak tiktlasojtlaj Jehová, pampa okijto ika tiktlalkauiskej tla yakaj kinekiskia techmiktis. Noijki kijtoua ika toTajtsin xtechtlasojtla niman ika xkitlasojkamati tlen tikchiuaj ipampa. San ika, akin kitlaliaj inyojlo itech Jehová, Satanás xkeman uelis kinkajkayauas.

14. ¿Tlenon uelis tikitaskej ijkuak itlaj tikixnamikiskej, niman tlenon okijto Nikolái?

¹⁴ Ijkuak Job okixnamik miyek tlen ouijtika, okitak ika nonekiya más yolyemanki yes. Kuakon, ijkuak tejuamej tikixnamikiskej tlen ouijtika noijki matikitakan kanon noneki topatlaskej (Job 42:3). Ijkuak tikixnamikij tlen ouijtika, tikitaj tlen kuajli tikchiuaj niman tlen xkuajli tikchiujtokej. Ijkon okitak Nikolái, c yejua okitsajkej maski melak kualouaya. Yejua kijtoua: “Ijkuak mitstsakuaskej, yeskia kentla mitskixtiliskiaj se radiografía: ompa tikitas nochi tlen kuajli tikchiujtika”. Ijkuak tikitaskej ika tikchiujtokej itlaj tlen xkuajli, uelis nimantsin topatlaskej.

15. ¿Akinon noneki tijkakiskej, niman tleka?

¹⁵ Ijkuak tikixnamiktoskej tlen ouijtika, ¿akinon noneki tijkakiskej, Jehová noso totlauelikniuan? San Jehová. Niman yejon tlen okichiuj Job, yejua kuajli okikak Jehová ijkuak okinots. Ijkuak yejua tlajyouijtoya, Jehová kanaj ijkin okijli: “¿Yotikitak nochi tlen onikchijchiuj? Nejua melak nikojtik niman nikitstika nochi tlen mopan nochiujtika. ¿Tiknemilia ika xuelis nimitspaleuis?”. Job onoyolyemanili niman okitlasojkamachili Jehová, niman okinankili: “Achtoj, san nikakiya mitsteneuaj, pero aman, nimitsita ikan nixtololojuan”  (Job 42:5). Ijkuak Job ijkin okijto kanaj yejua ok yeuatikatka ipan tlikonextli, melak kinkokouaya itsotsouan niman melak najmanaya pampa yomijkaj ikoneuan. Maski Job ijkon ipan nochiujtoya, Jehová okijli ika melak kitlasojtlaya niman kitlasojkamatiya tlen kichiujtoya (Job 42:7, 8).

16. Ken kijtoua Isaías 49:15, 16, ¿tlenon xnoneki tikilkauaskej ijkuak tikixnamiktoskej miyek tlen ouijtika?

¹⁶ Aman, miyekej noijki techuijuikaltiaj niman kijtouaj ika tejuamej xtlaj ika titepaleuiyaj. Miyekej xkinekij kuajli matlajtokan totech noso itech ikalpan Jehová, ika yejon, techteneuiliaj “tlajtlamach tlen xmelauak” (Mat. 5:11). San ika, tlen ipan onochiuj Job techititia ika Jehová kineltoka ika tejuamej uelis itech timelajkanemiskej ijkuak tikixnamikiskej miyek tlen ouijtika. Jehová techtlasojtla niman xkeman kilkauas kenon tejuamej itech tiktlaliaj toyojlo (xpoua Isaías 49:15, 16). Kuakon, maka matijkakikan tlen kijtouaj itlauelikniuan toTajtsin. Tokniuj James, akin chanti Turquía, kijtoua tlenon okichiuj yejua iuan ichanejkauan ijkuak okixnamijkej tlen ouijtika. Yejua kijtoua: “Otikitakej ika techijtlakoskia tla tijkakiyaj tlen kijtouiliayaj ikalpan toTajtsin. Tejuamej san ouel otiyolpajkej pampa tikonnemiliayaj tlenon kichiuas iTekiuajyo toTajtsin niman pampa otokojtilijkej chikauak tiktekichiuiliskej Jehová”. Matikchiuakan ken Job niman san Jehová matijkakikan. Nochipa matiktlalikan toyojlo  itech Jehová niman maka matikinkakikan totlauelikniuan.

17. ¿Tlenon techmachtia tlen okichiujkej on tlakamej niman siuamej akin noteneuaj ipan Hebreos capítulo 11?

¹⁷ Xsan Job omelajkanen itech Jehová ijkuak okixnamik tlen ouijtika. Ipan Biblia, apóstol Pablo okijkuilo: “Sanoyej miyek tlakatl tikpiyaj yejuan okiteititijkej intlaneltok” (Heb. 12:1). Maski yejuamej okixnamijkej miyek tlen ouijtika, nochipa omelajkanenkej itech Jehová (Heb. 11:36-40). Yejuamej xsan nenka otlaxikojkej. Maski xokitakej nochi tlen toTajtsin okijto kichiuas, nochipa itech okitlalijkej inyojlo. Niman pampa kuajli kimatstoyaj ika kiyolpaktijtoyaj Jehová, kineltokayaj ika ajsiskia se tonajli ijkuak kitaskiaj tlen yejua yokijto kichiuas (Heb. 11:4, 5). Tlen okichiujkej, noijki techpaleuiya matiktlalikan toyojlo itech Jehová.

18. ¿Tlenon noneki tikchiuaskej maski san tlenon tikixnamikiskej? (Hebreos 11:6).

¹⁸ Aman, melak yotlaixpoliuj (2 Tim. 3:13). Niman Satanás mojmostla kintlatlata itekipanojkauan toTajtsin. Maski san tlenon matikixnamikikan, nochipa chikauak matiktekichiuilikan Jehová, niman matiktlalikan toyojlo “itech on Dios yejuan yoltikaj” (1 Tim. 4:10). Pampa Job otlaxiko, Jehová okiteochiuj. Niman yejua okijto: “ToTEKO sanoyej tenotski niman teikneliani” (Sant. 5:11). Kuakon, ijkon ken Job, nochipa matimelajkanemikan itech Jehová niman kuajli matikmatstokan ika yejua kinteochiuas “on yejuan melauak kitejtemouaj” (xpoua Hebreos 11:6).