ARTIKEL WAMAHAʼÖ 27
”Döna-Döna khö Yehowa”
”Döna-döna khö Yehowa; böi ataʼufi ba aroʼö dödöu.”—SI. 27:14.
SINUNÖ 128 Anau Gölö Irugi Gamozua
NITUTUNÖ *
1. (a) Hadia dötönafö nibeʼe Yehowa khöda? (b) Hadia geluahania ”döna-döna khö Yehowa”? (Faigi ”Geluaha Ngawua Wehede”.)
NO IBEʼE dötönafö sahöli-höli dödö Lowalangi Yehowa ba niha sangomasiʼö yaʼia. Ba zi lö ara tö, iheta ngawalö wökhö, faʼabu dödö, hegöi faʼamate. (Fam. 21:3, 4) Itolo dania ”niha si so fangide-ngideʼö” sanötöna khönia ba wombaliʼö faradaiso gulidanö andre. (Si. 37:9-11) Tola dania taʼokhögö wahuwusa si sökhi khönia, töra moroi ba niʼokhögöda iadaʼa. No sahöli-höli dödöda dötönafö andrö! Hizaʼi, hadia zi tobali dane-dane waʼafaduhu dödöda wa hasambalö alua nifabuʼu Lowalangi? Lö irai isawö mbuʼusa linia Yehowa. Daʼa zi tobali dane-dane saro khöda wa lö tebulö ’tadöna-döna khö Yehowa’. * (Si. 27:14) Tola taforomaʼö wa manötöna ita khö Lowalangi na tabaloi si fao faʼomuso dödö ba faʼebolo dödö irege ifalua fefu mbuʼusa linia.—Yes. 55:10, 11.
2. Hadia zi no ifalua Yehowa?
2 No iforomaʼö Yehowa wa hasambalö ifalua fefu mbuʼusa linia. Nehegö atö sambua duma-duma sahöli-höli dödöda. Ba mbuku Wamaʼeleʼö, ifabuʼu Yehowa wa ba götöda andre, hasambalö iʼowuloi niha moroi ba ngawalö soi, mado, hegöi li, ba iʼosambuaʼö ira ba wamosumange satulö. Ba götöda andre, mufotöi ira ”ngawawa sato sibai”. (Fam. 7:9, 10) Yaʼira andre ira matua, ira alawe, hegöi iraono moroi ba ngawalö mado, li, hegöi waö-waö waʼauri si faböʼö-böʼö. Teʼosambuaʼö ira ba nösi nomo ba wamati safönu fahasara dödö ba zi sagörö ulidanö. (Si. 133:1; Yoh. 10:16) Baero daʼö, owölö-ölö göi ngawawa sato sibai ba wamalua halöwö fanuriaigö. Lö tebulö lafaʼanö ira ba wanutunö ba niha böʼö dötönafö niʼokhögöra sanandrösa ba gulidanö si bohou. (Mat. 28:19, 20; Fam. 14:6, 7; 22:17) Na farahu ndraʼugö ba ngawawa sato sibai, tatu örasoi wa no sebua böli dötönafö niʼokhögömö sanandrösa ba zi so miföna.
3. Hadia gohitö dödö Zatana?
3 Omasi Gafökha ba wanayaigö fanötönada. Ohitö dödönia yaʼia daʼö enaʼö faduhu dödöda wa lö iʼameʼegö tödö ita Yehowa ba lö ifalua hadia zi no ifabuʼu. Na mofozu Zatana ba wanayaigö fanötönada, tola manö taya waʼaterou dödöda ba taböhöli wamosumange Yehowa. Simane nitutunöda dania, no irai iforege Satana enaʼö taya wanötöna Yobi ba iböhöli wamosumange Yehowa.
4. Hadia nitutunöda ba artikel daʼa? (Yobi 1:9-12)
4 Ba artikel daʼa, tatutunö dania hadia manö dandrawa niʼogunaʼö Zatana me iforege enaʼö faröi Yobi khö Lowalangi. (Baso Yobi 1:9-12.) Tatutunö göi hadia wamahaʼö si tola tahalö moroi ba duma-duma nibeʼe Yobi. Aefa daʼö, tatutunö hadia mbörö wa moguna tatörö tödöda wa iʼomasiʼö ita Lowalangi ba hasambalö ifalua fefu mbuʼusa linia.
IFOREGE SATANA WANAYAIGÖ FANÖTÖNA YOBI
5-6. Hadia zalua khö Yobi ba zi lö arara?
5 Ba wamobörö, ohahau sibai dödö Yobi ba waʼaurinia. Iʼokhögö wahuwusa saro khö Yehowa. Ato nösi nomonia ba so khöra wahasara dödö. Kayo sibai ia ba oya gurifönia. (Yob. 1:1-5) Hizaʼi, ha ba zi maʼö-maʼökhö, taya fefu niʼokhögönia andrö. Si oföna, taya gokhötania. (Yob. 1:13-17) Aefa daʼö, mate fefu ndraononia niʼomasiʼönia. Khalaigö hadia nirasoi Yobi hegöi foʼomonia me luo daʼö. Abu sibai dödö zatua na so samösa moroi ba gotalua ndraonora zi mate. Börö daʼö, tatu afatö sibai dödö Yobi hegöi foʼomonia me larongo wa no ahori mate fefu ndraonora si dafulu. Andrö wa lö tokea ita me isika mbarunia Yobi ba ituhi danö börö waʼabu dödönia!—Yob. 1:18-20.
6 Lö ara aefa daʼö, iʼasogö wökhö ba mboto Yobi Satana irege tefakao waʼaurinia ba teʼailasi ia. (Yob. 2:6-8; 7:5) Ba zilalö, Yobi andrö niha nifosumange. Asese laʼondrasi ia niha ba wangandrö fanuturu lala. (Yob. 29:7, 8, 21) Hizaʼi iadaʼa, latimbagö ia. Latiboʼö ia ira talifusönia, si fahuwu khönia, hegöi ira sohalöwö khönia!—Yob. 19:13, 14, 16.
Ato ndra Samaduhuʼö ba götöda andre si no irai manaögö abula dödö simane salua khö Yobi (Faigi ngenoli si 7) *
7. (a) Moloʼö Yobi, hadia mbörö wa göna ia famakao, hizaʼi hadia zi lö omasi ia ifalua? (b) Hewisa wa tola alua khö zi samösa niha Keriso wanandraigö si fakhili ba niforomaʼö ba gambara?
7 Omasi Zatana na faduhu dödö Yobi wa göna ia famakao börö me mofönu khönia Yehowa. Duma-dumania, me manga-manga ndraono Yobi si dafulu ba zi sambua omo, iʼogunaʼö nangi sabölö-bölö Satana ba wanudugö omo daʼö. (Yob. 1:18, 19) Baero daʼö, iʼekhugö göi galitö moroi ba dalu mbanua ba wangohori biri-biri Yobi hegöi ira sanarogö urifönia. (Yob. 1:16) Tatu manö, tenga faʼabölö niha gulidanö wa tola alua daʼö. Börö daʼö, faduhu dödö Yobi wa Lowalangi Yehowa zangaʼasogö angi hegöi alitö andrö moroi ba dalu mbanua. Lua-luania, faduhu dödö Yobi wa so zala nifaluania irege mofönu khönia Yehowa. Hewaʼae simanö, lö omasi ia iʼelifi Namania si so ba zorugo. Aboto ba dödönia wa oya sibai howu-howu nitemania moroi khö Yehowa sagötö zi hauga fakhe. Börö daʼö, iwaʼö tödönia wa na omasi ia itema ngawalö zi sökhi, moguna göi omasi ia itema ngawalö zi lö sökhi niʼasogö Lowalangi. Daʼö mbörö wa imane Yobi, ”Yalötebulö tesuno döi Yehowa.” (Yob. 1:20, 21; 2:10) Hewaʼae na no taya gokhötania, mate ndraononia, ba göna ia fökhö sabölö-bölö, lö faröi Yobi khö Yehowa. Hizaʼi, lö nasa iböhöli Satana ba wanandraigö yaʼia.
8. Hadia nasa dandrawa niʼogunaʼö Zatana ba wanandraigö Yobi?
8 So nasa dandrawa tanö böʼö niʼogunaʼö Zatana ba wanandraigö Yobi. Iʼogunaʼö datölu zi fahuwu khö Yobi ba wangaʼasogö ba dödönia wa si lö eluaha waʼaurinia. Lawaʼö khönia wa göna ia abula dödö börö me oya zala nifaluania. (Yob. 22:5-9) Laforege göi ba wamaduhuʼö ba dödönia wa hewaʼae na yaʼia andrö tenga niha si lö sökhi, hizaʼi zaya-zaya gölö fefu wamorege nifaluania ba wangomusoiʼö tödö Lowalangi. (Yob. 4:18; 22:2, 3; 25:4) Sindruhunia, omasi ira na so ba wangera-ngera Yobi wa lö iʼomasiʼö ia Lowalangi ba lö iʼameʼegö tödö wamosumange nifaluania. Na ifaduhusi tödö wehedera andrö Yobi, tola manö iwaʼö tödönia wa lö hadöi saʼae fanötönania.
9. Hadia zanolo Yobi irege anau gölönia ba lö mangiwa dödönia?
9 Khalaigö atö zalua me luo daʼö. No modadao Yobi ba dete nawu ba lö tebulö irasoi waʼafökhö. (Yob. 2:8) Lawaʼö ira si fahuwu khönia wa yaʼia andrö tenga niha si sökhi, ba si lö eluaha fefu zi no irai ifalua ba zilalö. Amaedola noro sabua wanandraigö salua khönia andrö, ba hulö nihökha-hökha dödönia börö me no mate ndraononia. Ba wamobörö, ilau zi lö hede-hede Yobi. (Yob. 2:13–3:1) Te lawaʼö tödöra ira si fahuwu khönia wa ilau zi lö hede-hede börö me no iröi saʼae Lowalangi Yehowa. Hizaʼi, fasala lala wangera-ngera simane daʼö. Ba gafuriata, ifaöga ia Yobi ba ifaigi ndra si fahuwu sofaya andrö, ba imane khöra, ”Irege aetu nosogu, ba lö uböhöli waʼalöfaröigu!” (Yob. 27:5) Hadia zanolo Yobi irege anau gölönia ba lö mangiwa dödönia? Hewaʼae na irasoi waʼide-ide dödö, lö irai taya wanötönania wa hasambalö itolo ia Lowalangi sebua faʼomasi. Aboto ba dödönia wa hewaʼae na mate ia, hasambalö isusugi ia Yehowa.—Yob. 14:13-15.
HEWISA WOLOʼÖDA DUMA-DUMA YOBI?
10. Hadia wamahaʼö nihalöda moroi ba waö-waö Yobi?
10 Moroi ba waö-waö Yobi, tafahaʼö ita wa tebai ifaso ita Satana ba wondröi Yehowa ba aboto ba dödö Lowalangi fefu hadia ia zalua khöda. Tola göi möi fanoloda zi no irai alua khö Yobi enaʼö itugu aboto ba dödöda hadia manö dandrawa niʼogunaʼö Zatana. Iadaʼa, datatutunö wamahaʼö si tola tahalö moroi khö Yobi.
11. Na lö tebulö taʼodaligö Yehowa, hadia zi tola faduhu dödöda? (Yakobo 4:7)
11 Simane si no iforomaʼö Yobi, na lö tebulö taʼodaligö Yehowa, tola tataögö ngawalö wanandraigö ba mofozu ita wolawa Satana. Hadia mbuania? Ifaduhuʼö ba dödöda Sura Niʼamoniʼö wa hasambalö iröi ita Afökha.—Baso Yakobo 4:7.
12. Hewisa wa tola möi fangabölöʼö Yobi dötönafö sanandrösa ba wanusugi?
12 Böi taʼefasi wanötönada sanandrösa ba wanusugi. Simane si no tatutunö ba artikel si no tataluʼi, sambua lala sasese iʼogunaʼö Satana enaʼö taröi Lowalangi yaʼia daʼö faʼataʼu ba waʼamate. Iwaʼö Satana wa hasambalö ifalua gofu hadia manö Yobi ba iʼerogö Lowalangi, asala auri ia. Hizaʼi, lö atulö niwaʼö Zatana andrö. Hewaʼae na iwaʼö tödönia Yobi wa lö ara tö mate ia, lö iböhöli waʼalöfaröinia khö Yehowa. Tola anau gölönia börö me ifaduhusi tödö waʼasökhi dödö Yehowa ba aro wanötönania wa hasambalö iheta gabula dödö salua khönia Yehowa ba zi so miföna. Hewaʼae na duma-dumania lö itolo ia Yehowa sagötö faʼaurinia ba gulidanö, mamati Yobi wa hasambalö isusugi ia Lowalangi ba zi so miföna. No so föna duduma hörö Yobi dötönafö sanandrösa ba wanusugi. Simanö göi, na so föna duduma höröda dötönafö fanusugi, lö taʼerogö Lowalangi hewaʼae na teʼala waʼaurida.
13. Hadia mbörö wa moguna taʼangenanöi dandrawa niʼogunaʼö Zatana ba wanandraigö Yobi?
13 Moguna taʼangenanöi dandrawa niʼogunaʼö Zatana ba wanandraigö Yobi börö me lö tebulö iʼogunaʼö daʼö irugi iadaʼa. Nehegö atö wamobahulu niʼogunaʼö Zatana andre: ”Itehegö gofu hadia zi so khönia niha [tenga ha Yobi] asala lö mate ia.” (Yob. 2:4, 5) Eluahania, iwaʼö Satana wa tenga soroi ba dödöda wangomasiʼö Lowalangi Yehowa, ba hasambalö taʼerogö ia asala auri ita. Baero daʼö, iwaʼö göi wa lö iʼomasiʼö ita Lowalangi ba lö iʼameʼegö tödö wamorege nifaluada ba wangomusoiʼö tödönia. Hizaʼi, lö telimo ita yaʼita sanötöna khö Yehowa börö me no saʼae taʼila hadia manö dandrawa niʼogunaʼö Zatana.
14. Hadia zi tola aboto ba dödöda na göna ita fanandraigö? Beʼe duma-duma.
14 Na göna ita fanandraigö, tola itugu aboto ba dödöda haniha ita. Me alua wanandraigö khö Yobi, tola möi fanolonia daʼö ba wangiʼila hadia manö zoʼamböta ia ba aefa daʼö ibulöʼö gamuatania. Duma-dumania, aboto ba dödö Yobi wa moguna idouʼö mbua-bua fangide-ngideʼö. (Yob. 42:3) Simanö göi, tola itugu aboto ba dödöda haniha ita na göna ita fanandraigö. Nehegö atö hadia niwaʼö Nikolay, * samösa talifusöda ira matua nibeʼe ba gurunga sagötö göna ia fökhö sabölö-bölö. Imane, ”Kurunga andrö hulö simane mesin ronsen, iforomaʼö khögu hadia manö mbua-bua sinangea udouʼö.” Na no aboto ba dödöda hadia zoʼamböta ita, tola taforege ba wombulöʼö amuatada.
15. Haniha zinangea tafondrondrongo, ba hadia mbörö?
15 Moguna tafondrondrongo Yehowa, tenga si faʼudu khöda. Ihaogö wamondrondrongo Yobi me fahuhuo khönia Yehowa. Hulö imane khönia Lowalangi, ’Nehegö atö fefu gomböila dangagu. Uʼokhögö kuaso sebua, ba ahori aboto ba dödögu fefu zalua khömö. Na simanö, hadia tebai urorogö ndraʼugö?’ Ba gafuriata, iforomaʼö Yobi wa iʼandrö sibai saohagölö ba waʼasökhi dödö Yehowa. Imane si fao fangide-ngideʼö, ”No irai irongo talingagu sanandrösa khöu, ba iadaʼa, ba no iʼila hörögu.” (Yob. 42:5) Me iwaʼö wehede daʼö Yobi, no modadao ia ba dete nawu, ahori akuba gulinia, ba lö nasa si taya waʼabu dödö nirasoinia börö me no mate ndraononia. Hewaʼae simanö, ifaduhuʼö Yehowa wa iʼomasiʼö ba omuso dödönia khö Yobi.—Yob. 42:7, 8.
16. Moloʼö Yesaya 49:15, 16, hadia zinangea tatörö tödöda na göna ita fanandraigö?
16 Ba götöda andre, itaria göi laʼoʼaya ita niha ba lawaʼö tödöra wa yaʼita andre niha si lö eluaha. Tola manö laforege enaʼö tekiko döi si sökhi niʼokhögöda ero zamösana mazui laʼobousi organisasida ba ’laböbögö khöda ngawalö zi lö duhu’. (Mat. 5:11) Moroi ba waö-waö Yobi, tola aboto ba dödöda wa faduhu dödö Yehowa wa lö faröi ita khönia hewaʼae na tataögö wanandraigö. Iʼomasiʼö sibai ita ba lö irai faröi ia ba niha sanötöna khönia. (Baso Yesaya 49:15, 16.) Böi fondrondrongo wehede si lö sökhi nifaʼema niha solawa Lowalangi! Imane talifusöda ira matua sotöi James moroi ba Turki me alua ba nösi nomonia ngawalö wanandraigö, ”Aboto ba dödöma wa tola tobali fangawuwuma na mafondrondrongo walimosa sanandrösa ba nono mbanua Lowalangi. Börö daʼö, maʼosambuaʼö dödöma ba dötönafö niʼasogö Wamatörö Lowalangi ba lö tebulö mangai halöwö ndraʼaga khö Yehowa. Buania, lö mamalö marasoi waʼomuso dödö.” Simane Yobi, datafondrondrongo Yehowa! Böi tatehegö taya wanötönada börö walimosa nifaʼema niha si faʼudu khöda.
LÖ FARÖI ITA BÖRÖ ME TADÖNA-DÖNA KHÖ YEHOWA
Tefahowuʼö Yobi börö me lö faröi ia khö Yehowa. Ohahau dödönia hegöi foʼomonia ba anau nosora (Faigi ngenoli si 17) *
17. Hadia wamahaʼö nihalöda moroi ba duma-duma ndra matua hegöi ira alawe si lö faröi nitötöi ba Heberaiʼo faza 11?
17 Yobi andrö samösa moroi ba gotalua nono mbanua Yehowa sangoromaʼö faʼanau gölö ba si lö mangiwa hewaʼae na so wanandraigö. Ba zurania ba niha Heberaiʼo, ato nasa niha tanö böʼö nitötöi zinenge sotöi Faulo ba ifotöi ira ’samaduhuʼö sato simane lawuo’. (Heb. 12:1) Hewaʼae na göna ira fanandraigö sabua, lö irai faröi ira khö Yehowa. (Heb. 11:36-40) Hadia zaya-zaya gölö waʼanau gölöra hegöi famorege nifaluara? Tatu manö löʼö! Hewaʼae na lö ahori laʼila waʼalua mbuʼusa li Lowalangi sagötö faʼaurira, lö tebulö manötöna ira khö Yehowa. Börö me faduhu dödöra wa omuso dödö Yehowa khöra, mamati ira wa hasambalö laʼila dania waʼalua mbuʼusa linia andrö. (Heb. 11:4, 5) Duma-dumara andrö zangaʼaroʼö angetulada enaʼö lö tebulö manötöna ita khö Yehowa.
18. Hadia gangetula nihalöu? (Heberaiʼo 11:6)
18 Iadaʼa, itugu lö sökhi zalua ba gulidanö si so yaʼita. (2 Ti. 3:13) Lö irai iböhöli Satana wanandraigö ono mbanua Lowalangi. Hizaʼi, gofu hadia wanandraigö salua khöda ba zi so miföna, datahalö gangetula enaʼö lö tebulö taforege wangai halöwö khö Yehowa börö me faduhu dödöda wa ’khö Lowalangi sauri manötöna ita’. (1 Ti. 4:10) Törö tödöu wa fahöna howu-howu nitema Yobi ba gafuriata. Daʼö zi tobali tandra wa ”safönu faʼomasi Yehowa ba sahakhö tödö”. (Yak. 5:11) Simane Yobi, böi faröi ita khö Yehowa ba datafaduhusi tödö wa hasambalö ”ibeʼe luo ba niha sangalui yaʼia soroi ba dödö”.—Baso Heberaiʼo 11:6.
SINUNÖ 150 Alui Lowalangi, Sangefaʼö Yaʼita
^ Na itörö tödöda zi samösa niha sanau ölö ba wanaögö famakao sabua, sasese itörö tödöda yaʼia daʼö Yobi. Hadia zi tola tahalö khöda famahaʼö moroi ba zalua khö niha si lö faröi andrö? Ba daʼa taʼila wa tebai ifaso ita Satana ba wondröi Yehowa. Tafahaʼö göi ita wa aboto ba dödö Yehowa fefu hadia zalua. Simane me iheta wanandraigö salua khö Yobi, hasambalö göi iheta fefu wanandraigö salua khöda ba zi so miföna. Na taforomaʼö ba gamuatada wa sindruhu-ndruhu tafaduhusi tödö daʼö, no tefarahu ita ba gotalua niha ’sanötöna khö Yehowa’.
^ ELUAHA NGAWUA WEHEDE: Ba li Heberaiʼo, ngawua wehede ”döna-döna” eluahania ”mombaloi” si fao faʼaterou dödö. Tola göi muʼogunaʼö ngawua wehede daʼö ba wangoromaʼö wa tafaduhusi tödö zi samösa niha mazui taʼodaligö ia.—Si. 25:2, 3; 62:5.
^ So ösa zi no mufaböʼöni töi.
