NKHANI YOPHUNZILA 27
‘Mukoyembekezela Yehova’
“Yembekezela Yehova, tang’a mtima ndipo ucite zinthu mwamphamvu.”—SAL. 27:14.
NYIMBO 128 Pililani Mpaka Posilizhyila
ZATI TIPHUNZILE *
1. (a) Kansi Yehova watilonjeza cinji? (b) Kansi ‘kuyembekezela Yehova’ kutanthauzanji? (Onani “Tanthauzo ya Mau Ayakine.”)
YEHOVA walonjeza atumiki ŵake zinthu zabwino zosiyanasiyana. Lombapano akasilizhye matenda, cisoni na imfwa. (Chiv. 21:3, 4) Akayavye soti “ŵanthu ofasa” amene omuyembekezela, kucinja calo kuti cinkhale paladaiso. (Sal. 37:9-11) Kuyangizhyila apo, akatiyavye kunkhala pa ushamwali wotang’a na yove kupambana watili nao pali lomba. Ici n’ciyembekezo cosangalasa ngako. Kansi n’cinji cutipangisha kunkhala osimikizhya kuti Mulungu akakwanilishe malonjezo ŵake? N’cifukwa cakuti nthawi zonse Yehova okwanilisha malonjezo ŵake. Tetyo, tili na cifukwa cabwino cotipangisha ‘kuyembekezela Yehova.’ * (Sal. 27:14) Tuonesha izi mwa kuyembekezela mwacimwemwe koma soti moleza mtima kuti Mulungu akakwanilishe colinga cake.—Yes. 55:10, 11.
2. Kansi ni zinthu zotyani zawacitako kale Yehova?
2 Yehova waonesha kale kuti okwanilisha malonjezo ŵake. Ganizilani cisanzo ici. M’buku ya Chivumbulutso, Yehova elonjeza kuti m’masiku osilizhya akacitishe ŵanthu ofumila m’calo ciliconse, mtundu ulionse na cilaŵilo ciliconse kuyamba kumulambila mokatizhyana. Masiku ŵano, ŵanthu aŵa oziŵika kuti “gulu ikulu.” (Chiv. 7:9, 10) Olo kuti gulu iyi ni yopangiwa na analume, anakazi na ŵana ofumila mu vilaŵilo vosiyanasiyana na vinkhalidwe vosiyanasiyana, olambila Yehova mokatizhyana ndipo ali pa ukwao wa pacalo conse. (Sal. 133:1; Yoh. 10:16) Kuyangizhyila apo, a gulu ikulu olalikila uthenga uweme mwacangu koma soti mozipeleka. Nthawi zonse onkhala okonzeka kuuzhyako ayakine za ciyembekezo cao. (Mat. 28:19, 20; Chiv. 14:6, 7; 22:17) Ngati nimwe mbali ya gulu ikulu, tukaikila lini kuti muyembekezela mwacidwi kukwanilishiwa kwa zinthu zonse ziweme zawatilonjeza Yehova.
3. Kansi Satana ofuna kuti tikokhulupilila cinji?
3 Maleŵania ofuna kutitaisha ciyembekezo casu. Yove ofuna kuti tikokhulupilila kuti Yehova otisamalila lini na kuti akakwanilishe lini malonjezo ŵake. Ngati tingakhulupilile wenye wa Satana notaya ciyembekezo casu, zingatipangishe kuti tifooke noleka kutumikila Yehova. Monga ni mwati tionele m’nkhani ino, Maleŵania eyesayesa kucitisha Yobu kuti ataye ciyembekezo cake na kuti aleke kutumikila Yehova.
4. Kansi tiphunzile cinji m’nkhani ino? (Yobu 1:9-12)
4 M’nkhani ino, tione njila zosiyanasiyana zeciseŵenzesha Satana pofuna kucitisha Yobu kuti aleke kutumikila Yehova. (Ŵelengani Yobu 1:9-12.) Tione soti zatingaphunzilepo pa cisanzo ca Yobu na cifukwa cake nthawi zonse tufunika kukumbukila kuti Mulungu otikonda na kuti okwanilisha malonjezo ŵake.
SATANA EYESAYESA KUCITISHA YOBU KUTI ATAYE CIYEMBEKEZO CAKE
5-6. Kansi Yobu ekumana na mavuto otyani m’kanthawi tyala katontho?
5 Zinthu zenzoyenda bwino mu umoyo wa Yobu. Enze pa ushamwali wotang’a na Yehova ndipo enze na banja ikulu koma soti yokatizhyana. Kuyangizhyila apo, enze na cuma cinyinji. (Yobu 1:1-5) Koma m’kanthawi katontho tyala, Yobu eluza vinthu vonse veenze navo. Coyamba, viŵeto vake vonse vecifwa. (Yobu 1:13-17) Pavuli pake, ŵana ŵake onse ecifwa. Ganizilani tyala mwamene izi zemukhuzila Yobu. Makolo onkhala na cisoni cikulu ngako ngati mwana wao m’mozi wamwalila. Lomba ganizilani tyala mwecimvwila Yobu na mkazi wake pecimvwa kuti ŵana ŵao onse 10 amwalila. Niye cifukwa cake Yobu eng’amba vovwala vake polila nopona pansi.—Yobu 1:18-20.
6 Pavuli pa izi, Satana ecitisha Yobu kulwala matenda akulu koma soti ocitisha nsoni. (Yobu 2:6-8; 7:5) Izi zikaliyocitika, Yobu enzolemekezewa ngako na ŵanthu, ndipo ayakine enzomusenga malangizo. (Yobu 31:18) Koma pavuli pakuti walwala, ŵanthu onse kuyangizhyilapo akwake, ashamwali ŵake na anchito ŵake, eyamba kumupewa.—Yobu 19:13, 14, 16.
Akwasu na azilongosi anyinji masiku ŵano omvwishisha cisoni ceenze naco Yobu cifukwa okumana na mavuto monga ni yecikumana nayo yove (Onani ndime 7) *
7. (a) Kansi Yobu enzoganiza kuti enzokumana na mavuto cifukwa ca cinji, koma kansi ekana kucitanji? (b) Kansi Mkhristu angakumane na mavuto yotyani yamene yangalingane na zatuona pa cithunzithunzi?
7 Satana enzofuna kucitisha Yobu kuganiza kuti enzokumana na mavuto cifukwa cakuti Yehova enze ekhumudwa naye. Mwacisanzo, Satana eseŵenzesha cimphepo camphamvu kuti aphwanye ng’anda mwamene ŵana onse 10 a Yobu enzocitilamo phwando. (Yobu 1:18, 19) Kuyangizhyila apo, Satana ecitisha mulilo kupona kufumila kululu noononga viŵeto vonse va Yobu, kuyangizhyilapo anyanchito ŵake amene enzovisamalila. (Yobu 1:16) Cifukwa cakuti cimphepo na mulilo vefumila kululu, payakine Yobu eganiza kuti Yehova niye evitumizhya. Ndipo izi zemupangisha kukhulupilila kuti Yehova enze ekhumudwa naye. Olo n’tetyo, yove ekana kutukwana Ausuwake akululu. Yobu ekumbukila kuti Yehova emupasa vinthu vabwino kwa vyaka vinyinji. Tetyo, eganiza kuti cifukwa cakuti enze elandila vinthu vabwino vinyinji, niye kuti enzofunika soti kunkhala wokonzeka kulandila vinthu viipa kufumila kwa Yehova. Yove elaŵila kuti: “Zina ya Yehova ipitilizhye kutamandiwa.” (Yobu 1:20, 21; 2:10) Olo kuti Yobu eluza cuma cake, ŵana ŵake ndipo enze na matenda akulu pa nthawi iyi, yove epitilizhya kunkhala wokhulupilika kwa Yehova. Koma Satana emuletela soti mavuto ayakine.
8. Kansi Satana eseŵenzesha soti njila yotyani poyesa Yobu?
8 Pavuli pa izi, Satana eseŵenzesha ashamwali a Yobu atatu kumucitisha kuzimvwa kuti ni watyalatyala. Analume aŵa elaŵila kuti Yobu enzokumana na mavuto cifukwa pali zinthu ziipa zeenzocita. (Yobu 22:5-9) Ove eyesayesa soti kumupangisha kuzimvwa kuti olo kuti enzocita zinthu zabwino, zenzeve phindu kwa Yehova. (Yobu 4:18; 22:2, 3; 25:4) Analume aŵa enzofuna kuti Yobu akokhulupilila kuti Mulungu omukonda lini, angamusamalile lini na kuti kumutumikila kuliye phindu. Zokamba zao sembe zemufookesha Yobu.
9. N’cinji ceyavya Yobu kunkhala wotang’a mtima?
9 Ganizilani kuti muona Yobu apo n’kuti wankhala pa milota ndipo akumvwa ululu wosaneneka. (Yobu 2:8) Ashamwali ŵake atatu opitilizhya kumuuzhya kuti ni munthu lini wabwino na kuti kukhulupilika kwake kwangokuya patyala. Izi pazucitika n’kuti Yobu akaluvutika na maganizo cifukwa ca kutaikiliwa cuma cake conse koma soti imfwa ya ŵana ŵake. Poyamba, Yobu ali celele osakamba ciliconse. (Yobu 2:13–3:1) Pakuona izi, ashamwali ŵake atatu oganiza kuti Yobu aleke kutumikila Nyamalenga wake. Koma niye lini zakuganiza Yobu. Pavuli pake, Yobu onyamula mutu wake nololesha ashamwali ŵake, ndipo oŵauzhya kuti: “Mpaka kumwalila, nileke lini kunkhala na mtima wosayaŵanika.” (Yobu 27:5) Kansi n’cinji ceyavya Yobu kunkhala wotang’a mtima mosasamala kanthu za mavuto yecikumana nayo? Olo kuti pa nthawi iyi enze efooka, Yobu aliyotaye ciyembekezo cake cakuti Mulungu asilizhye mavuto yake. Yove enzoziŵa kuti olo angamwalile, Yehova akamuukishe.—Yobu 14:13-15.
KANSI TINGATOLELE TYANI CISANZO CA YOBU?
10. Kansi nkhani ya Yobu yutiphunzisanji?
10 Nkhani ya Yobu yutiphunzisa kuti Satana angatikakamizhye lini kuti tileke kutumikila Yehova. Yutiphunzisa soti kuti Yehova oziŵa mavuto yonse yatukumana nayo. Kuyangizhyila apo, yutiphunzisa kuti mavuto yonse yatukumana nayo yofumila kwa Satana. Onani mfundo ziyakine zatuphunzilapo pa cisanzo ca Yobu.
11. N’cinji cingacitike ngati tupitilizhya kudalila Yehova? (Yakobo 4:7)
11 Yobu etisiila cisanzo cabwino cakuti ngati tupitilizhya kudalila Yehova, tingakwanishe kupilila mavuto yaliyonse yatingakumane nayo nosusha Satana. Ngati tucita izi, Baibo yulaŵila kuti Maleŵania atithaŵe.—Ŵelengani Yakobo 4:7.
12. Kansi ciyembekezo ca ciukililo cemutang’isha tyani Yobu?
12 Tufunika kunkhala na cikhulupililo cotang’a cakuti Yehova akaukishe akufwa. Monga ni mweteonela m’nkhani yapita, Satana opezelapo mwai pa wowa watili nao wosafuna kufwa pofuna kutipangisha kuti tileke kutumikila Yehova. Ponena za Yobu, Satana elaŵila kuti Yobu sembe ecita zilizonse olo kuleka kutumikila Yehova na colinga cakuti apulumuse moyo wake. Koma uyu wenze wenye ukulu ngako. Olo vinthu pevefwika paipa ngako cakuti Yobu enzoganiza kuti aafwe, aliyoleke kunkhala wokhulupilika kwa Yehova. Yove enze na cidalilo cakuti Yehova ocita zinthu zabwino nthawi zonse, ndipo enze na ciyembekezo cakuti acitepo kanthu kuti asilizhye mavuto ŵake. Izi zemuyavya kuti akwanishe kupilila mavuto yonse yeenzokumana nayo. Kuyangizhyila apo, Yobu enze na cikhulupililo cakuti olo kuti wafwa, Yehova akamuukishe msogolo. Yobu enze na cikhulupililo cotang’a cakuti akufwa akauke. Ngati nase tili na cikhulupililo coteti, tingaleke lini kutumikila Yehova olo pa nthawi yakuti ŵanthu ayakine atiyofya kuti atipaye.
13. Ndaŵa yanji tufunika kuziŵa bwino misampha yeciseŵenzesha Satana poyesa Yobu?
13 Tufunika kuziŵa bwino misampha yeciseŵenzesha Satana poyesa Yobu cifukwa niye yakuseŵenzesha masiku ŵano poyesa atumiki a Mulungu. Satana elaŵila kuti: “Munthu [osati tyala Yobu] angalolele kupeleka cinthu ciliconse caali naco kuti apulumuse moyo wake.” (Yobu 2:4, 5) Apa Satana enzotanthauza kuti seo atumiki a Mulungu tumukonda lini cendi Yehova na kuti tingaleke kumutumikila na colinga cakuti tipulumuse moyo wasu. Kuyangizhyila apo, Satana olaŵila kuti Mulungu otikonda lini na kuti oyamikila lini zilizonse zatucita poyesayesa kumukondwelesha. Pofwana kuti tuziŵa colinga ca Satana, tukhulupilila lini wenye wake.
14. Kansi mavuto yangatiyavye kuziŵanji?
14 Tufunika kuona mavuto monga mwai wakuti tiziŵe mbali zatufunika kuongolela mu umoyo wasu. Mavuto yecikumana nayo Yobu yemuyavya kuti aziŵe zifooko zeenze nazo na zeenzofunika kucita kuti azigonjese. Mwacisanzo, yove ephunzila kuti enzofunika kukulisha nkhalidwe yolicefya. (Yobu 42:3) Nase ngati takumana na mavuto, yunkhala nthawi yabwino ngako kuti tiziŵe mbali zatufunika kuongolela mu umoyo wasu. Mkwasu Nikolay * wamene enze eikiwa m’jele mosasamala kanthu kuti olwala matenda akulu, elaŵila kuti: “Nthawi yenenkhala m’jele yeniyavya kuziŵa minkhalidwe yacikhristu yenenzofunika kukulisha.” Ngati taziŵa zifooko zasu, tunkhala pa malo abwino kuti tiongolele.
15. Kansi tufunika kumvwila ŵani?
15 Tufunika kumvwila Yehova osati adani ŵasu. Yobu emvwishila mosamala Yehova peenzolaŵila naye. Mulungu emukonsha makonsho osiyanasiyana pofuna kumuonesha kuti enze akalumukonda na kuti enzomusamalila. Pavuli pake, Yobu eyankha molicefya ndipo ekumbukila zinthu zonse zabwino zecimucitila Yehova nomuyamikila. Yove elaŵila kuti: “Nenzokumvwa tyala za mweo, koma lomba menso ŵangu akuonani.” (Yobu 42:5) Peenzolaŵila mau aya Yobu enze akali pa milota, m’muŵili mwake mwenze mukali vilonda ndipo enze akalulila imfwa ya ŵana ŵake. Olo n’tetyo, Yehova emusimikizhyila kuti enze akalumukonda.—Yobu 42:7, 8.
16. Molingana na Yesaya 49:15, 16, kansi tufunikila kukumbukila cinji tikakumana na mavuto?
16 Molingana na zecikumana nazo Yobu, masiku ŵano ŵanthu angatinyoze noticitila vinthu voonesha kuti nise atyalatyala. Angayese kuipisha mbili yasu koma soti mbili ya gulu yasu mwa ‘kulaŵila vinthu vawenye vosiyanasiyana.’ (Mat. 5:11) Kufumila pa cisanzo ca Yobu, tuphunzilapo kuti Yehova ali na cidalilo cakuti tipitilizhye kumutumikila mokhulupilika tikakumana na mavuto. Tufunika kukumbukila kuti yove otikonda ngako ndipo angasiye lini ŵanthu amene omuyembekezela. (Ŵelengani Yesaya 49:15, 16.) Tetyo, mufunika lini kumvwishila ku nkhani zawenye zakulaŵila adani a Mulungu. Mkwasu James wamene onkhala ku Turkey ndipo banja yake yekumana na mayeselo osiyanasiyana, elaŵila kuti: “Tezindikila mfundo yakuti kumvwishila zinthu zawenye zakulaŵila adani kungatifookeshe. Tetyo, teika maganizo ŵasu pa zinthu ziweme zawatilonjeza Yehova nopitilizhya kucita zonse zatingakwanishe pomutumikila. Izi zetiyavya kuti tipitilizhye kunkhala acimwemwe.” Molingana na Yobu, tiyeni tipitilizhye kumvwila Yehova osati adani ŵake. Tisalole kuti zinthu zawenye zakulaŵila adani a Mulungu zitipangishe kutaya ciyembekezo casu.
CIYEMBEKEZO CIKUYAVYENI KUPILILA
Yobu edalisiwa cifukwa ca cikhulupililo cake. Pecipola, yove na mkazi wake enkhala na umoyo wabwino koma soti wacimwemwe kwa vyaka vinyinji (Onani ndime 17) *
17. Kansi mwaphunzilapo cinji pa cisanzo ca atumiki a Yehova okhulupilika ofotokozewa mu Aheberi caputa 11?
17 Yobu ni m’mozi mwa atumiki a Yehova amene epitilizhya kunkhala otang’a mtima koma soti okhulupilika olo kuti ekumana na mavuto akulu-akulu. M’kalata yecilembela Akhristu aciheberi, mtumwi Paulo etomola mazina anyinji ya atumiki aŵa ndipo eŵaita kuti “mkumbi ukulu wa mboni.” (Aheb. 12:1) Atumiki onse aŵa ekumana na mavuto osiyanasiyana mu umoyo wao. Koma epitilizhya kunkhala okhulupilika kwa Yehova. (Aheb. 11:36-40) Kansi kupilila kwao na khama yao veluta patyala? Yai. Olo kuti peenze akali moyo aliyoone kukwanilishiwa kwa malonjezo onse a Mulungu, epitilizhya kunkhala na ciyembekezo mwa Yehova. Ndipo cifukwa cakuti enzokhulupilila kuti Yehova enzoŵakonda, enze na cidalilo cakuti akaone kukwanilishiwa kwa malonjezo ŵake msogolo. (Aheb. 11:4, 5) Cisanzo cao cingatiyavye kuti tipitilizhye kuyembekezela Yehova.
18. Kansi mwasimikizhya mtima kucitanji? (Aheberi 11:6)
18 Zinthu pacalo zukuya zuipilaipila. (2 Tim. 3:13) Ndipo Satana akalupitilizhya kuyesa atumiki a Mulungu. Mosasamala kanthu kuti tikumane na mavuto otyani msogolo, tiyeni tipitilizhye kutumikila Yehova mwakhama poziŵa kuti “ciyembekezo casu cili mwa Mulungu wamoyo.” (1 Tim. 4:10) Nthawi zonse tikokumbukila kuti Yehova edalisa Yobu cifukwa cakuti epilila mavuto yecikumana nayo. Izi zutionesha kuti “Yehova ni wacikondi cikulu koma soti wacifundo.” (Yak. 5:11) Nase tiyeni tipitilizhye kunkhala okhulupilika kwa Yehova cifukwa akapeleke mphoto ku “ŵanthu amene omufunafuna na mtima wonse.”—Ŵelengani Aheberi 11:6.
NYIMBO 150 Welani kwa Mulungu Kuti Mupulumuke
^ Tikaganizila za munthu wamene ekumana na mavuto akulu, mosakaikila zina ya Yobu niye yuwela m’maganizo ŵasu. Kansi cisanzo cake cutiphunzisa cinji? Cutiphunzisa kuti Satana angatikakamizhye lini kuti tileke kutumikila Yehova. Cutiphunzisa soti kuti nthawi zonse Yehova oziŵa mavuto yonse yatukumana nayo. Ndipo monga ni mwamene Yehova esilizhyila mavuto a Yobu, tili na cidalilo cakuti siku iyakine akasilizhye mavuto yonse yatukumana nayo. Ngati tuonesha mwa zocita zasu kuti tukhulupilila mfundo izi, niye kuti tili pa gulu ya ŵanthu amene ‘oyembekezela Yehova.’
^ TANTHAUZO YA MAU AYAKINE: Liu yaciheberi yecimasulila kuti “ciyembekezo” yutanthauza “kuyembekezela” cinthu ciyakine mwacidwi. Ingatanthauze soti kukhulupilila munthu muyakine olo kumudalila na mtima wonse.—Sal. 25:2, 3; 62:5.
^ Mazina ayakine acinjiwa.
