NKHANI YOPHUNZILA N.° 27
“Yembekezela Yehova”
“Yembekezela Yehova. Tang’a ntima ndipo uchite vinthu mwamphamvu.”—SAL. 27:14.
NYIMBO N.° 128 Tipilile mpaka pa mapeto
VATIKUTI TIPHUNZILE *
1. (a) Kansi Yehova watipasa chiyembekezo chotyani? (b) Kansi ‘kuyembekezela Yehova’ kutanthauza chinji? (Onani mawu akuti “Kumvwikisha luweme.”)
YEHOVA wapeleka chiyembekezo chokondwelesha ngako kuli ŵala ŵanthu omukonda. Kwalombapano, yove azasilije matenda, chisoni na imfwa. (Chiv. 21:3, 4) Azayavyesoti “ofasa” amene omuyembekezela kuchinja chalo kuti chinkhale paladaiso. (Sal. 37:9-11) Ndipo azachitishe kuti aliyense wa sewo ankhale naye pa ushamwali uweme ngako kupambana watusangalala nawo palipano. Chamene ichi ni chiyembekezo chiweme ngako! Lomba kansi tili na vifukwa votyani vokhulupilila kuti malonjezo a Mulungu azakwanilishiwe? Yehova nthawe zonse okwanilisha malonjezo ŵake. Tetyo, tili na vifukwa vomvwika ‘voyembekezela Yehova.’ * (Sal. 27:14) Tuwonesha vamene ivi mwa kuyembekezela moleza ntima komasoti mosangalala kuti Mulungu akwanilishe malonjezo ŵake.—Yes. 55:10, 11.
2. Kansi Yehova wachita kale chinji?
2 Yehova wawonesha kale kuti okwanilisha malonjezo ŵake. Ganizilani tyala chisanzo chimozi. M’buku ya Chivumbulutso, Yehova elonjeza kuti mu nthawe yasu azaunganishe ŵanthu a mitundu yonse, fuko iliyonse na chilaŵilo chilichonse kuti akomutumikila mokatijana. Masiku ŵano, gulu yapadela yamene iyi ya ŵanthu yuziŵika kuti a “gulu ikulu.” (Chiv. 7:9, 10) Olo kuti m’gulu yamene iyi muli ŵanthu ofumila m’mitundu, m’vilaŵilo na m’vinkhalidwe vosiyana-siyana, ove ali monga ni banja imozi ya ntendele komasoti yokatijana. (Sal. 133:1; Yoh. 10:16) A gulu ikulu nawo ni alaliki akhama. Nthawe zonse ove onkhala okonzeka kuujako aliyense angamvwishile za chiyembekezo chawo chokhuza chalo chiweme. (Mt. 28:19, 20; Chiv. 14:6, 7; 22:17) Keno mwewo muli m’gulu yamene iyi, mosakaikila chiyembekezo chanu cha vinthu viweme vamene vikuza kusogolo ni cha ntengo wapatali ngako kuli mwewo.
3. Kansi cholinga cha Satana n’chotyani?
3 Mdyelekezi ofunalini kuti mwewo munkhale na chiyembekezo cha kusogolo. Yove ofuna kukuchitishani kukhulupilila kuti Yehova okuganizilanilini mwewo ndipo azakwanilishelini malonjezo ŵake. Keno tingalole kuti Satana atiwonongele chiyembekezo chasu, tingataye ntima ndipo payakine tingaleke kutumikila Yehova. Monga mwatikuti tiwonele, Mdyelekezi eyeja kuwononga chiyembekezo cha Yobu nomuchitisha kuti aleke kutumikila Yehova.
4. Kansi tikambilane chinji mu nkhani ino? (Yobu 1:9-12)
4 Mu nkhani ino, tikambilane mwechichitila Satana poyeja-yeja kukakamija Yobu kuti aleke kunkhala wokhulupilika kwa Yehova. (Ŵelengani Yobu 1:9-12.) Tikambilanesoti vatingaphunzile kufumila pa chisanzo cha Yobu komasoti chifukwa chake tufunika kukumbukila kuti Yehova otikonda ndipo azakwanilishe malonjezo ŵake.
SATANA EYEJA-YEJA KUCHITISHA YOBU KUTI ATAYE CHIYEMBEKEZO
5-6. Kansi n’chinji chichitikila Yobu mu kanthawe katontho?
5 Poyamba vinthu venzemuyendela bwino ngako Yobu. Yove enze pa ushamwali wotang’a na Yehova. Enze na banja ikulu, yokatijana ndipo enze wolemela ngako. (Yobu 1:1-5) Koma pa nsiku imozi tyala, Yobu eluza pafupi-fupi vonse venze navo. Poyamba, yove eluza chuma chake. (Yobu 1:13-17) Pavuli pake, ŵana ŵake onse okondewa emwalila. Ganizilani za soka yamene iyi yamene ichitika mu kanthawe katontho tyala. Makolo onkhala na chisoni ngako mwana wawo akamwalila. Tetyo, ganizilani mwamene Yobu pamozi na nkazi wake mwechidabwila, kumvwa chisoni na kutaya ntima pechimvwa kuti ŵana ŵawo okwana 10 afyanthiwa ndipo afwilatu. N’vosadabwisa kuti Yobu ekezula vovwala vake chifukwa cha chisoni nopona pansi!—Yobu 1:18-20.
6 Pavuli pake, Satana eleta matenda ochitisha nsoni ngako pa muŵili wa Yobu. (Yobu 2:6-8; 7:5) Vamene ivi pevenze vikaliyechitika, ŵanthu enzemulemekeza ngako Yobu. Ove enzeluta kuli yove kuti akaŵapase malangizo. (Yobu 31:18) Koma pevichitika vamene ivi, ove eyamba kumupewa. Yove ekaniwa na achibale ŵake, azishamwali ŵake apantima ndipo mpaka na antchito ŵake apang’anda!—Yobu 19:13, 14, 16.
Abale na alongo anyinji masiku ŵano angakwanishe kumvwisha mwechimvwila Yobu pechikumana na mavuto (Onani ndime 7) *
7. (a) Kansi Yobu enzekhulupilila kuti n’chinji chenzechitisha kuti avutike, lomba kansi yove ekana kuchita chinji? (b) Kansi Mkhilisitu angamvwe tyani akakumana na mayeselo olingana na ŵatuwona pachithunzi?
7 Satana enzefuna kuti Yobu akhulupilile kuti enzevutika chifukwa chakuti Yehova waleka kumukonda. Mwachisanzo, Satana ekatishila ntchito chimphepo champhamvu kuti awononge ng’anda yamene mwenze ŵana onse okwana 10 a Yobu amene enzesangalala pamozi pakulya chakulya. (Yobu 1:18, 19) Yove eponeshasoti mulilo kufumila kululu nowononga vifuwo va Yobu pamozi na antchito ŵake amene enzevisamalila. (Yobu 1:16) Chifukwa chakuti chimphepo na mulilo vifumila kululu; tetyo Yobu eganiza kuti vichokela kwa Yehova. Ndipo monga vokonkhapo vake, yove ekhulupilila kuti enze emukalipisha Yehova mwa njila iyakine. Olo venze tetyo, Yobu ekana kutembelela Atata ŵake ŵakululu. Yobu evomekeja kuti kwa vyaka vinyinji elondela vinthu vinyinji kufumila kwa Yehova. Tetyo, yove eganiza kuti keno enze wokondwela kulondela vinthu viweme, enzefunikasoti kunkhala wokonzeka kulondela vinthu viipa. N’chifukwa chake yove enena kuti: “Zina ya Yehova ipitilije kutamandiwa.” (Yobu 1:20, 21; 2:10) Olo kuti Yobu eluza ndalama zake, ŵana ŵake komasoti thanzi yake, epitilija mphela kunkhala wokhulupilika kwa Yehova. Koma pavuli pake, Satana eyeja kuchitasoti chinthu chiyakine.
8. Kansi ni njila iyakine yotyani yechikatishila ntchito Satana pofuna kuyesa Yobu?
8 Pavuli pake, Satana ekatishila ntchito ŵanthu atatu amene enzetala wenye kuti ni azishamwali a Yobu kuti amuchitishe kulimvwa kuti ni watyala-tyala. Analume amene aŵa enena kuti Yobu enzevutika chifukwa chakuti echita vinthu vinyinji viipa. (Yobu 22:5-9) Ove eyejasoti kumuchitisha kukhulupilila kuti viliyekanthu na vinthu viweme vechichita, kuyeja-yeja kwake kwenzeve tanthauzo kwa Mulungu. (Yobu 4:18; 22:2, 3; 25:4) Ove enzeyeja kuchitisha Yobu kuganiza kuti Mulungu omukondalini, angamusamalilelini komasoti kuti kumutumikila kwenzeve na pindu. Mawu ŵawo echitisha Yobu kulimvwa kuti aliye chiyembekezo.
9. Kansi n’chinji chiyavya Yobu kunkhala wotang’a ntima komasoti wamphamvu?
9 Yelekezelani kuti muwona vamene vuchitika. Yobu alinkhale pa vimulota ndipo akumvwa ululu. (Yobu 2:8) Ayake opitilija kulaŵila kuti yove ni munthu muipa ndipo paliye chilichonse chantengo wapatali chechichita. Mayeselo ŵake ayamba kumulema Yobu monga ni vimyala vikulu-vikulu ndipo muntima mwake ali ana chisoni chikulu chifukwa cha imfwa ya ŵana ŵake. Poyamba, Yobu onkhala chelele. (Yobu 2:13-3:1) Koma keno analume amene otala wenye kuti ni azishamwali a Yobu oganiza kuti vamene ivi vutanthauza kuti Yobu asiye Yehova, niyekuti olisempha. Pa nthawe iweme—Yobu oimya mutu wake nololeshesha azishamwali ŵake amene ni awenye—nonena kuti: “Mpaka newo kumwalila, nilekelini kunkhala na ntima wosayaŵanika!” (Yobu 27:5) Kansi n’chinji chiyavya Yobu kunkhala wotang’a ntima komasoti wamphamvu pa mavuto ŵake onse? Olo pa nthawe yamene enze wofoka ngako, yove aliyetaye chiyembekezo olo patontho chakuti Mulungu wake wachikondi azasilije mavuto ŵake. Yove enzeziŵa kuti olo amwalile, Yehova azamuushe.—Yobu 14:13-15.
KANSI TINGAMUKONKHEJE TYANI YOBU?
10. Kansi nkhani ya Yobu yutiphunzisa chinji?
10 Nkhani ya Yobu yutiphunzisa kuti Satana angatikakamijelini kuti tileke kutumikila Yehova komasoti kuti Yehova oziŵa chilichonse chuchitika. Vinthu vichitikila Yobu vingatiyavyesoti kumvwisha luweme nkhani zufotokozewa mu chochitika chake. Tiyeni tiwone viyakine mwa vinthu vatingaphunzile kufumila kwa Yobu.
11. Keno tingapitilije kukhulupilila Yehova, kansi tingankhale osimikijila za chinji? (Yakobo 4:7)
11 Yobu ewonesha kuti keno tingapitilije kukhulupilila Yehova, tingakwanishe kupilila chiyeso chilichonse nokwanisha kumugonjesa Satana. Kansi vokonkhapo vake vingankhale votyani? Malemba otisimikijila kuti Mdyelekezi atiutuke.—Ŵelengani Yakobo 4:7.
12. Kansi chiyembekezo chakuti akufwa azauke chimutang’isha tyani Yobu?
12 Tufunika kunkhala na chikhulupililo chotang’a pa chiyembekezo chakuti akufwa azauke. Monga mwetifotokozela mu nkhani yapita, kanyinji-kanyinji Satana okatishila ntchito kuyopa imfwa poyeja-yeja kutichitisha kuti tileke kunkhala okhulupilika kwa Yehova. Pa nkhani ya Yobu, Satana enena kuti Yobu angachite chilichonse olo kuleka kutumikila Yehova kuti apulumushe moyo wake. Koma wamene uyu wenze wenye. Olo pa nthawe yamene venzewoneka kuti Yobu amwalile, yove epitilija mphela kunkhala wokhulupilika kwa Yehova. Chidalilo chake pa ubwino wa Yehova na chiyembekezo chake champhamvu chakuti m’kupita kwa nthawe Yehova azakonze vinthu, chimuyavya kupilila. Yobu enzekhulupilila kuti keno Yehova amuyavyelini ali moyo, azamuushe kusogolo. Chiyembekezo chakuti akufwa azauke chenze ngacho-ngacho kuli Yobu. Chiyembekezo chamene ichi chikankhala ngacho-ngacho kuli sewo, olo kuyofyewa kuti tipaiwe kungatichitishelini kuti tileke kunkhala okhulupilika kwa Yehova.
13. Kansi tuphunzila chinji kufumila pa vechichita Satana kuchitila Yobu?
13 Tufunika kunkhala ngako tchelu na njila zechikatishila ntchito Satana poyesa Yobu, chifukwa chakuti yove okatishilasoti ntchito njila zolingana na zamene izo kuli sewo masiku ŵano. Onani vechinena Satana: “Munthu [osati tyala Yobu] angalolele kupeleka chilichonse chali nacho kuti apulumushe moyo wake.” (Yobu 2:4, 5) Tetyo, pamene apa Satana enzetanthauza kuti sewo tumukondalini chendi Yehova Mulungu ndipo tingaleke kumutumikila kuti tipulumushe moyo wasu. Satana onenasoti kuti Mulungu otikondalini ndipo owonalini kuyeja-yeja kwasu kwatuchita kuti timukondweleshe. Chifukwa chakuti tuchenjejewa, sewo amene tuyembekezela Yehova tusemphewalini na wenye wakutala Satana.
14. Kansi kuziŵa vofoka vasu kungatiyavye kuchita chinji?
14 Tikowona mayeselo ŵatakumana nawo monga mwayi wakuti tiphunzilepo kanthu. Mayeselo ŵechikumana nawo Yobu emuyavya kuziŵa vofoka vake nokatilapo ntchito. Mwachisanzo, yove ephunzila kuti ofunika kunkhala wolichefya ngako. (Yobu 42:3) Nase tingaphunzile vinyinji keno tuyesewa. M’bale muyakine zina yake Nikolay, * wamene eikiwa mu djeli olo kuti enzelwala ngako, enena kuti: “Nthawe yonse yeninkhala ku djeli iniyavya kuziŵa minkhalidwe yenenzefunikila kukulisha.” Keno tuziŵa vofoka vasu, niye patingakatilepo ntchito kuti tikonzepo.
15. Kansi sewo tufunika kumvwila ŵani, ndipo ndaŵa yanji?
15 Tufunika kumvwila Yehova osati adani ŵasu. Yobu enkhala tchelu ngako Yehova penzelaŵila naye. Mulungu ekambilana na Yobu, ponena kuti: ‘Kansi uwona mphamvu zangu za kulenga? Newo nuziŵa vonse vakuchitikila wewo. Kansi wewo uganiza kuti ningakwanishelini kukusamalila?’ Yobu eyankha molichefya, notembeja ngako ubwino wa Yehova. Yove enena kuti: “Nenzekungokumvwa za mwewo, koma lomba linso yangu yakuwonani.” (Yobu 42:5) Vuwoneka kuti Yobu enze akalinkhale pa vimulota, muŵili wake wenze na vilonda ndipo ŵana ŵake onse enze m’manda pechilaŵila mawu amene aŵa. Olo n’tetyo, Yehova emusimikijila Yobu kuti omukonda ndipo akalikondwela naye.—Yobu 42:7, 8.
16. Mokatijana na Yesaya 49:15, 16, kansi tufunika kukumbukila chinji keno tukumana na mayeselo?
16 Masiku ŵanosoti, ŵanthu angotinyoza notichitila vinthu monga nise ŵanthu atyala-tyala. Ove angayeje kuwononga mbili yasu aliyense payeka-payeka olo ya gulu yasu ‘notiyopejela vinthu viipa va ntundu uliwonse.’ (Mt. 5:11) Pa nkhani ya Yobu, tuphunzilapo kuti Yehova okaikilalini zakuti tipitilije kunkhala okhulupilika kuli yove tikakumana na mayeselo. Yehova otikonda ndipo ŵala oyembekezela muli yove aŵasiyelini olo patontho. (Ŵelengani Yesaya 49:15, 16.) Osati tikoikila nzelu wenye uliwonse wakutala adani a Mulungu! M’bale muyakine waku Turkey zina yake James, wamene banja yake ikumana na mayeselo akulu, enena kuti: “Tichizaziŵa kuti kumvwishila wenye wakutalijiliwa ŵanthu a Mulungu kungatifokeshe. Tetyo, tenzeganizila ngako za chiyembekezo cha Ufumu wa Mulungu komasoti kuchita vinyinji pomutumikila. Vamene ivi vitiyavya kuti tipitilije kunkhala osangalala.” Molingana na Yobu, sewo tumvwila Yehova! Ndipo wenye wakutitalijila adani ŵasu ungawonongelini chiyembekezo chasu.
CHIYEMBEKEZO CHANU CHINGAKUYAVYENI KUPILILA
Yobu edalisiwa na Yehova chifukwa cha kukhulupilika kwake. Yove pamozi na nkazi wake enkhala na moyo utali komasoti wosangalala (Onani ndime 17) *
17. Kansi muphunzila chinji kufumila pa visanzo va analume na anakazi okhulupilika otomolewa m’buku ya Aheberi chapitala 11?
17 Yobu ni mmozi mwa atumiki a Yehova amene epitilija kunkhala otang’a ntima na amphamvu penzelimbana na mayeselo akulu. Mu kalata yake yoluta kuli Aheberi, ntumwi Paulo efotokoza za ŵanthu ayakinesoti anyinji amene eŵatomola kuti “nkumbi ukulu wa mboni.” (Ahe. 12:1) Onse ekumana na mayeselo akulu-akulu; koma epitilija kunkhala okhulupilika kwa Yehova kwa moyo wawo wonse. (Ahe. 11:36-40) Kansi kupilila kwawo na khama yawo vichingopita patyala? Yayi! Olo kuti mu nthawe yawo paliye ewonako kukwanilishiwa kwa malonjezo a Mulungu, ove epitilija kuyembekezela Yehova. Ndipo chifukwa chakuti enze osimikijila kuti enzekondewa na Yehova, enze na chidalilo chakuti azawone kukwanilishiwa kwa malonjezo amene awo. (Ahe. 11:4, 5) Chisanzo chawo chingatitang’ishe kuti tipitilije kuyembekezela Yehova.
18. Kansi mwewo nimwe osimikija kuchita chinji? (Aheberi 11:6)
18 Masiku ŵano tunkhala m’chalo chamene chupitilija kuipila-ipila. (2 Tim. 3:13) Satana akaliyesilija kuyesa ŵanthu a Mulungu. Viliyekanthu kuti tikumane na mavuto otyani kusogolo, tiyeni tinkhale osimikija kupitilija kutumikila Yehova mwakhama, nokhulupilila kuti “chiyembekezo chasu chili mwa Mulungu wa moyo.” (1 Tim. 4:10) Tikokumbukila kuti madaliso ŵechipasiwa Yobu na Mulungu owonesha “kuti Yehova ni wachikondi chikulu komasoti wachifundo.” (Yak. 5:11) Ndipo nase tiyeni tipitilije kunkhala okhulupilika kwa Yehova ndipo osati tikokaikila kuti yove azadalise “ŵanthu omusakila-sakila na ntima wonse.”—Ŵelengani Aheberi 11:6.
NYIMBO N.° 150 Welani kwa Mulungu kuti muzapulumuke
^ Tikaganizila za munthu wamene epilila mayeselo akulu, kanyinji-kanyinji tuganizila za Yobu. Kansi tingaphunzile chinji kufumila pa vinthu vichitikila munthu wamene uyu wokhulupilika? Tuphunzila kuti Satana angatikakamijelini kuti tileke kutumikila Yehova. Tuphunzilasoti kuti Yehova oziŵa chilichonse chutichitikila. Ndipo monga mwamene Yehova mwechisilijila viyeso vechikumana navo Yobu, nsiku iyakine azasilije mavuto ŵasu onse. Keno tuwonesha kupitila m’vochita vasu kuti tukhulupilila chendi mfundo zamene izi, tinkhale mu gulu ya ŵanthu amene ‘oyembekezela Yehova.’
^ KUMVWIKISHA LUWEME: Mawu achiheberi omasuliliwa kuti “chiyembekezo” maka-maka otanthauza “kuyembekezela” chinthu mwachidwi. Mawu amene aŵa angapelekesoti lingalilo ya kukhulupilila munthu muyakine olo kumudalila.—Sal. 25:2, 3; 62:5.
^ Mazina ayakine achinjiwa.
