SEHLOGO SE ITHUTWAGO 27
“Holofela Jehofa”
“Holofela Jehofa; eba le sebete gomme o bete pelo.”—PS. 27:14.
KOPELO 128 Go Kgotlelela go Fihla Bofelong
SEO RE TLAGO GO ITHUTA SONA a
1. (a) Modimo o re holofeditše eng? (b) Go “holofela Jehofa” go bolela eng? (Bala “Tlhaloso ya mantšu a itšego.”)
JEHOFA o neile batho ka moka bao ba mo ratago kholofelo e botse. E se kgale o tlo fediša malwetši, bohloko le lehu. (Kut. 21:3, 4) O tlo thuša “ba boleta” bao ba mo holofelago go fetoša lefase gore e be paradeise. (Ps. 37:9-11) E bile o tlo thuša yo mongwe le yo mongwe gore a thabele go ba mogwera wa gagwe go feta ka tsela yeo re thabelago segwera seo gona bjale. Ye ke kholofelo e botse kudu! Eupša ke’ng seo se dirago gore re tshepe gore Modimo o tlo phethagatša dilo tšeo a re tshepišago tšona? Jehofa o dula a phethagatša dilo tšeo a di tshepišago. Ka gona, re na le lebaka le lebotse la go “holofela Jehofa.” b (Ps. 27:14) Re bontšha se ka go leta ka go se fele pelo gore Jehofa a phethagatše seo a se holofeditšego.—Jes. 55:10, 11.
2. Ke eng seo Jehofa a šetšego a thomile go se dira?
2 Jehofa o šetše a phethagatša dilo tše dingwe tšeo a di tshepišitšego. Nagana ka mohlala wo. Ka pukung ya Kutullo Jehofa o tshepišitše gore mehleng ye ya rena, o tlo dira gore batho ba go tšwa ditšhabeng tšohle, melokong yohle le malemeng ohle ba bokane felo gotee gore ba mo hlankele. Lehono batho bao ba tsebja e le “lešaba le legolo.” (Kut. 7:9, 10) Le ge sehlopha se se bopša ke banna, basadi le bana go tšwa lefaseng ka moka, se tsebja e le lapa letee leo le nago le khutšo. (Ps. 133:1; Joh. 10:16) Lešaba le legolo le bolela ditaba tše dibotse ka mafolofolo. Ba dula ba ikemišeditše go botša batho bao ba ba theetšago ka kholofelo yeo ba nago le yona ya lefase le lefsa. (Mat. 28:19, 20; Kut. 14:6, 7; 22:17) Ge e ba o le karolo ya lešaba le legolo, ga go pelaelo gore o letetše go bona dilo tše tše dibotse di direga go wena.
3. Sathane o nyaka go dira eng?
3 Sathane ga a nyake gore o be le kholofelo. O nyaka gore o nagane gore Jehofa ga a na taba le wena e bile a ka se phethagatše dilo tšeo a di tshepišitšego. Ge Sathane a ka kgona go dira gore re se sa hlwa re e ba le kholofelo, re tlo fela matla e bile re ka ba ra tlogela le go hlankela Jehofa. Ka ge re tlo bona, Sathane o ile a leka go dira gore Jobo a se ke a ba le kholofelo a ba a leka go mo tlogediša go hlankela Jehofa.
4. Re tlo ithuta eng sehlogong se? (Jobo 1:9-12)
4 Sehlogong se, re tlo boledišana ka dilo tšeo Sathane a ilego a di dira ge a be a leka go dira gore Jobo a tlogele go hlankela Jehofa. (Bala Jobo 1:9-12.) Le gona re tlo ithuta ka mohlala wa Jobo le gore ke ka baka la’ng re swanetše go gopola gore Jehofa o a re rata e bile o tlo phethagatša dilo tšeo a di tshepišago.
SATHANE O ILE A LEKA GO DIRA GORE JOBO A SE SA BA LE KHOLOFELO
5-6. Ke’ng seo se ilego sa diragalela Jobo ka nako e kopana?
5 Bophelo bja Jobo bo be bo kgahliša. E bile e be ele mogwera wa Jehofa. O be a na le lapa le legolo leo thabilego e bile a humile kudu. (Jobo 1:1-5) Eupša Jobo o ile a lahlegelwa ke mo e ka bago dilo tša gagwe ka moka ka letšatši letee. Mathomong o ile a lahlegelwa ke diphoofolo tša gagwe. (Jobo 1:13-17) Ke moka ka morago bana ba gagwe ka moka ba ile ba hlokofala. Nagana ka bohloko bjo a ilego a bo kwa. Batswadi ba kwa bohloko kudu ge yo mongwe wa bana ba bona a hlokofala. Ka gona, nagana gore Jobo le mosadi wa gagwe ba ile ba kwa bohloko bjang ge ba ekwa gore bana ba bona ba lesome ba hlokofetše ka nako e tee. Ke ka baka leo Jobo a ilego a gagola diaparo tša gagwe ke moka a wela fase!—Jobo 1:18-20.
6 Ka morago Sathane o ile a dira gore Jobo a be le bolwetši bjo bohloko kudu le bjo bo lešago dihlong. (Jobo 2:6-8; 7:5) Peleng batho ba be ba hlompha Jobo kudu. E bile ba be ba etla go yena gore a be eletše. (Jobo 31:18) Eupša ge a babja ba se sa hlwa ba mmatamela. O ile a hlanogela ke bana babo, batho bao ba lego kgauswi le yena gotee le bahlanka ba gagwe!—Jobo 19:13, 14, 16.
Lehono bana babo rena ba bantši le dikgaetšedi ba kwešiša gore Jobo o be a ikwa bjang ka mathata a gagwe (Bona serapa 7) d
7. (a) Jobo o be a nagana gore ke’ng seo se mmakelago mathata, gona o ile a gana go dira eng? (b) Mokriste a ka kopana bjang le mathata a go swana le ao re a bonago mo seswantšhong se se sepedišanago le serapa?
7 Sathane o be a nyaka gore Jobo a nagane gore o galefišitše Modimo gomme o a mo otla. Ka mohlala, Sathane o ile a diriša ledimo le matla go wiša ntlo yeo bana ba lesome ba Jobo ba bego ba dutše go yona ba eja. (Jobo 1:18, 19) Le gona o ile a diriša mollo o tšwago legodimong gore o tšhume leruo la Jobo le bahlanka ba gagwe. (Jobo 1:16) Ledimo leo le mollo e be e le matla a sa tlwaelegago, ka gona Jobo o ile a nagana gore di tlišitšwe ke Modimo. Ke moka a thoma go nagana gore o ile a galefiša Jehofa. Eupša Jobo o ile a gana go roga Tatagwe wa Legodimong. O ile a bontšha le gore Jehofa ke kgale a mo šegofatša. O ile a bolela le gore, ge e ba Jehofa a be a mo direla dilo tše dibotse a thaba, le gona bjale o swanetše go amogela dilo tše mpe. O itše: “Anke leina la Jehofa le tšwele pele le tumišwa.” (Jobo 1:20, 21; 2:10) Jobo o ile a dula a botegela Jehofa le ge a ile a lahlegelwa ke leruo la gagwe, bana ba gagwe e bile a babja kudu. Eupša Sathane o be a se a fetša go leka Jobo.
8. Sathane o dirišitše leano lefe go tlaiša Jobo?
8 Sathane o ile a diriša bagwera ba bararo ba Jobo bao ba bego ba itira okare ba a mo rata go dira gore a ipone okare ga a na mohola. Banna bao ba boletše gore Jobo o a tlaišega ka lebaka la dilo tše dintši tše mpe tšeo a di dirilego. (Jobo 22:5-9) Ba ile ba leka le go dira gore a bone eka a ka se tsoge a kgahlišitše Modimo. (Jobo 4:18; 22:2, 3; 25:4) Ge e le gabotse ba be ba leka go dira gore Jobo a bone eka Modimo ga a mo rate, a ka se tsoge a mo hlokometše e bile ga go na lebaka la gore a mo hlankele. Mantšu a bona a ka ba a ile a dira gore Jobo a bone okare boemo bja gagwe bo ka se tsoge bo fetogile.
9. Ke eng seo se thušitšego Jobo gore a be le sebete le matla?
9 Nagana ka boemo bjo: Jobo o dutše meloreng e bile o kwa bohloko kudu. (Jobo 2:8) Batho bao ba phelago le yena ba mmolela gampe e bile ba mmotša gore ga a na mohola. Mathata ao a nago le ona ke a mantši, a a mo imela e bile o kwa bohloko ka baka la go lahlegelwa ke bana ba gagwe. Jobo o thoma a homotše. (Jobo 2:13–3:1) Banna bao ba bego ba phela le yena ba be ba fošitše ge ba be ba nagana gore Jobo o tlo tlogela go hlankela Jehofa. Ge banna bao ba bona Jobo a homotše, ba nagana gore o dumelelana le bona ke moka o tlo tlogela go hlankela Jehofa, ruri ba be ba fošitše. Jobo o lebelela bagwera bao ba gagwe ba maaka ke moka o bolela gore: “Ke tla ba ka hwa ke se ka lahla potego ya ka!” (Jobo 27:5) Ke eng seo se thušitšego Jobo gore a be le sebete le matla le ge a be a na le mathata? Le ge a be a na le mathata a mantši, o be a tseba gore Jehofa o tlo mo thuša. O be a tseba gore le ge a ka hwa, Jehofa o tlo mo tsoša bahung.—Jobo 14:13-15.
RE KA EKIŠA JOBO BJANG?
10. Re ithuta eng pegong ya Jobo?
10 Pego ya Jobo e re ruta gore Sathane a ka se re gapeletše go tlogela go hlankela Jehofa le gore Jehofa o bona maemo a rena ka moka. Mohlala wa Jobo o ka re thuša go kwešiša gore ke ka lebaka la eng re welwa ke mathata. A re bone tše dingwe tša dilo tšeo re ka ithutago tšona go Jobo.
11. Ke eng seo re ka kgodišegago ka sona ge e ba re tshepa Jehofa? (Jakobo 4:7)
11 Jobo o bontšhitše gore ge e ba re tshepa Jehofa re ka kgona go fenya mathata ra ba ra lwantšha Sathane. Go tlo ba le mafelelo afe? Beibele e bontšha gore Diabolo o tlo re tšhaba.—Bala Jakobo 4:7.
12. Kholofelo ya tsogo e matlafaditše Jobo bjang?
12 Re swanetše go ba le tumelo e tiilego kholofelong ya tsogo. Sehlogong se se fetilego re ithutile gore Sathane o diriša taba ya go tšhaba lehu go leka go re dira gore re tlogele go botegela Jehofa. Sathane o ile a bolela gore Jobo a ka tlogela le go hlankela Jehofa gore a leke go šireletša bophelo bja gagwe. Sathane o be a fošitše. Le ge Jobo a be a nagana gore o kgauswi le go hwa, o ile a dula a botegela Jehofa. Jobo o be a bota Jehofa e bile a tshepa gore o tlo lokiša dilo gomme seo se ile sa mo thuša gore a kgotlelele. Jobo o be a na le tumelo ya gore le ge Jehofa a ka se mo thuše a sa phela, o tlo mo tsoša nakong e tlago. Jobo o be a na le kholofelo ya gore go tlo ba le tsogo. Le rena ge re ka ba le kholofelo yeo, lehu le ka se re tšhoše gomme re tlo dula re botega.
13. Re ithutile eng go seo Sathane a se dirilego Jobo?
13 Mekgwa yeo Sathane a e dirišitšego go leka Jobo, o sa dutše a e diriša le lehono. Sathane o itše: “Se sengwe le se sengwe seo motho [e sego Jobo fela] a nago le sona, o tla se gafa ka baka la moya wa gagwe.” (Jobo 2:4, 5) Ge e le gabotse Sathane o bolela gore ga re rate Modimo, le gona re ka tlogela go mo hlankela ge re kopana le mathata. Sathane o bolela le gore Modimo ga a re rate e bile ga a na taba le rena ge re mo hlankela. Re tseba seo Sathane a lekago go se dira gomme ga re tshepe maaka ao a gagwe.
14. Mathata a re thuša gore re dire eng? Nea mohlala.
14 Mathata ao a re welago a ka re thuša gore re ithute se sengwe ka rena. Mathata ao a ilego a wela Jobo a mo thušitše gore a bone tše dingwe tša dilo tšeo a ka di lokišago bophelong bja gagwe. Ka mohlala, o ithutile gore o swanetše go hlagolela boikokobetšo. (Jobo 42:3) Le rena re ka ithuta dilo tše dintši ge re kopana le mathata. Ngwanabo rena yo a bitšwago Nikolay c yo a ilego a išwa kgolegong le ge a be a babja kudu o re: “Nako yeo ke e feditšego ke le kgolegong e nthušitše gore ke bone dika tša Bokriste tšeo nka kaonafatšago go tšona. Ge re lemoga gore re na le diphošo re swanetše go di lokiša.
15. Re swanetše go theetša mang, gona ka baka la’ng?
15 Re swanetše go theetša Jehofa e sego manaba a rena. Jobo o ile a theetša gabotse ge Jehofa a be a bolela le yena. Modimo o ile a bolela le Jobo a mmotšiša gore: ‘Na o kgona go bona matla a ka? Ke tseba dilo ka moka tšeo di diragetšego go wena. Na o nagana gore ga ke na taba le wena?’ Jobo o ile a araba ka boikokobetšo le ka go leboga botho bja Jehofa. O itše: “Ke kwele ka wena ka mabarebare eupša bjale leihlo la ka le a go bona.” (Jobo 42:5) Jobo o be a sa dutše moloreng, mmele wa gagwe o na le dišo e bile a llela bana ba gagwe bao ba hlokofetšego. Le ga go le bjalo Jehofa o ile a bontšha Jobo gore o a mo rata e bile o a mo amogela.—Jobo 42:7, 8.
16. Go ya ka Jesaya 49:15, 16, Ke eng seo re swanetšego go dula re se gopola ge re kopana le mathata?
16 Le lehono batho ba ka re rogaka e bile ba re lebelela re se na mohola. Ba ka leka go senya botumo bja rena goba bja mokgatlo wa rena ka go “bolela mohuta o mongwe le o mongwe wa selo se sebe” ka rena. (Mat. 5:11) Pego ya Jobo e re ruta gore Jehofa o a re tshepa e bile o a tseba gore re tlo dula re mmotegela le ge re na le mathata. Jehofa o a re rata e bile a ka se lahle bao ba mo holofelago. (Bala Jesaya 49:15, 16.) O se ke wa theetša maaka ao a bolelwago ke manaba a Modimo! James, e lego ngwanabo rena wa kua Turkey yo lapa la gabo le ilego la lebeletšana le mathata a magolo, o re: “Re ile ra lemoga gore go theetša maaka ao a bolelwago ka batho ba Modimo go ka re nyamiša. Ka gona re ile ra dula re naganišiša ka kholofelo ya rena ya Mmušo wa Modimo gomme ra hlankela Jehofa ka mafolofolo. Se se ile sa dira gore re dule re thabile.” Re theetša Jehofa go swana le Jobo! Kholofelo ya rena e dula e tiile le ge manaba a rena a bolela maaka ka rena.
KHOLOFELO YA GAGO E TLA GO TIIŠA
Jehofa o ile a putsa Jobo ka baka la go botega ga gagwe. Jobo le mosadi wa gagwe ba ile ba thabela bophelo bjo bo kgahlišago (Bona serapa 17) e
17. O ithuta eng go banna le basadi ba tumelo bao go bolelwago ka bona go Baheberu kgaolo 11?
17 Jobo ke yo mongwe wa bahlanka ba Jehofa bao ba ilego ba dula ba na le sebete le matla le ge ba lebeletšane le mathata a magolo. Ge Moapostola Paulo a ngwalela Baheberu, o ile a bolela ka ba bangwe ba bahlanka ba Jehofa gore “ke leru le legolo la dihlatse.” (Baheb. 12:1) Ka moka ga bona ba ile ba kopana le mathata a magolo eupša ba dula ba botegela Jehofa. (Baheb. 11:36-40) Na go kgotlelela ga bona le go šoma ka thata e be e le ga lefeela? Aowa! Le ge mehleng ya bona ba se ba ka ba bona dilo tšeo Modimo a ba tshepišitšego tšona di phethagala, ba ile ba dula ba tshepa Jehofa. Ka ge ba be ba tseba gore Jehofa o a tshepagala, ba be ba tseba gore o tlo phethagatša dilo tšeo a ba tshepišitšego tšona. (Baheb. 11:4, 5) Mohlala wa bona o ka re thuša gore re dule re holofela Jehofa.
18. O ikemišeditše go dira eng? (Baheberu 11:6)
18 Lehono re phela lefaseng leo le hlakahlakanego. (2 Tim. 3:13) Sathane o tšwela pele a leka batho ba Modimo. Re swanetše go dula re ikemišeditše go šoma ka thata go hlankela Jehofa go sa šetšwe mathata ao re tlago go kopana le ona kua pele ka gobane “re beile kholofelo ya rena go Modimo yo a phelago.” (1 Tim. 4:10) Gopola gore seo Jehofa a ilego a se direla Jobo se bontšha gore o na le “lerato le legolo e bile ke yo a gaugelago.” (Jak. 5:11) Re swanetše go dula re botegela Jehofa ka gobane re a tseba gore ke moputsi wa “bao ba mo tsomago ka phišego.”—Bala Baheberu 11:6.
KOPELO 150 Tsoma Modimo Gore a go Phološe
a Gantši ge re nagana ka batho bao ba ilego ba kopana le mathata, re nagana le ka Jobo. Ke eng seo re ka ithutago sona go monna yoo yo a bego a botega? Re ithuta gore Sathane a ka se re gapeletše go tlogela go hlakela Jehofa. Re ithuta le gore Jehofa o a tseba gore go direga eng bophelong bja rena. Jehofa o tlo fediša mathata a rena ka moka go swana le ge a ile a fediša a Jobo. Ge e ba ditiro tša rena di bontšha gore re tshepa seo re ithutago sona, re ba gare ga batho bao ba ‘holofelago Jehofa.’
b TLHALOSO YA MANTŠU A ITŠEGO: Lentšu la Seheberu leo le hlalositšwego e le “kholofelo” le ka bolela go “fela pelo” ya gore selo se itšego se direge. Le ka bolela le go tshepa motho yo mongwe goba go ithekga ka yena.—Ps. 25:2, 3; 62:5.
c Maina a mangwe a fetotšwe.
