EKICWEKA EKY’OKWEGA 27
Gira Amatsiko Omuri Yehova
“[Gira amatsiko omuri Yehova], gira amaani, guma omutima.”—ZAB. 27:14.
EKYESHONGORO 128 Okugumisiriza Okuhitsya aha Muheru
EBIRAAGAMBWEHO *
1. (a) Yehova atuhaire matsiko ki? (b) Nikimanyisa ki okugira amatsiko omuri Yehova? (Reeba “Ebishobooroirwe.”)
BOONA abarikukunda Yehova abahaire amatsiko marungi. Juba naija kumaraho endwara, obusaasi, n’okufa. (Kush. 21:3, 4) Naija kuhwera “abacureezi” abamwinemu amatsiko kuhindura ensi paradiso. (Zab. 37:9-11) Kandi naija kubaasisa buri omwe ahariitwe kugira omukago murungi nawe, ogurikukirira kimwe ogu twine nawe hati. Ago ka n’amatsiko g’omuhendo! Kwonka shi twine buhame ki oburikworeka ngu ebi Ruhanga arikuraganisa nibiija kuhikiirira? Yehova tarikuhenda kuraganisa kwe. N’ahabw’ekyo twine enshonga ehikire erikutureetera kugira amatsiko omuri Yehova. * (Zab. 27:14) Eki nitukikora turikutegyereza Yehova Ruhanga waitu kuhikiiriza ekigyendererwa kye, twine okugumisiriza n’okushemererwa.—Isa. 55:10, 11.
2. Ni bintu ki ebi Yehova yaaherize kukora?
2 Yehova yaayorekire ngu naahikiiriza ebi arikuraganisa. Teekateeka aha ky’okureeberaho kimwe eky’omutaano. Omu kitabo ky’Okushuuruurwa, Yehova akaraganisa ngu omu bunaku bwaitu, akaba naija kurundaana abantu b’amahanga goona, enganda zoona, n’endimi zoona, abareete omu kuramya okushemeire. Hati, abantu b’omutaano aba nyamwingi nibeetwa “omutwe muhango gw’abantu.” (Kush. 7:9, 10) N’obu baraabe barimu abashaija, abakazi, n’abaana abatarikushushanisa erangi, endimi, n’obukomooko, nibakora oruganda rw’eishe-emwe orwine obumwe. (Zab. 133:1; Yoh. 10:16) Kandi abantu nyamwingi aba n’ababuurizi abeeziriki. Butoosha nibaba beeteekateekire kugambira buri omwe orikuhurikiza aha matsiko marungi ngu nihaija kubaho ensi nungi. (Mat. 28:19, 20; Kush. 14:6, 7; 22:17) Ku oraabe ori omwe aha mutwe muhango gw’abantu, hatariho kubangaanisa amatsiko g’ebintu birungi ebirikwija kubaho n’ag’omuhendo ahariiwe.
3. Ekigyendererwa kya Sitaane ni kiiha?
3 Omuregi naayenda kukuremesa kugira amatsiko. Ekigyendererwa kye n’okukureetera kwikiriza ngu Yehova tarikukufaho, kandi ngu tarikwija kuhikiiriza ebi arikuraganisa. Sitaane yaasingura omu kuturemesa kugira amatsiko, nitwija kuhwamu amaani, kandi nitubaasa n’okurekyera aho kuheereza Yehova. Nk’oku turikuza kureeba, Omuregi akateeraho kuremesa Yobu kugira amatsiko, kandi akaba naayenda n’okumureetera kurekyera aho kuheereza Yehova.
4. Nituza kushwijuma ki omu kicweka eki? (Yobu 1:9-12)
4 Omu kicweka eki, nituza kushwijuma obukoryo obu Sitaane yaakoreise kuteeraho kureetera Yobu kutaguma ahamiire ahari Yehova. (Shoma Yobu 1:9-12.) Kandi nituza n’okureeba eki turikubaasa kwegyera ahari Yobu, n’enshonga ahabw’enki twine kwijuka ngu Ruhanga naatukunda, kandi ngu naija kuhikiiriza ebi arikuraganisa.
SITAANE AKATEERAHO KUREETERA YOBU KUHWA AMATSIKO
5-6. Niki ekyahikire ahari Yobu omu kaanya kakye?
5 Buri kimwe kikaba nikigyendera gye Yobu. Akaba aine omukago murungi na Yehova. Akaba aine eka mpango, erimu obumwe, kandi ari omugaiga. (Yob. 1:1-5) Kwonka Yobu akafeerwa haihi buri kimwe omu izooba rimwe ryonka. Okubanza, akafeerwa eby’obugaiga. (Yob. 1:13-17) Ekyakuratsireho, abaana be abakundwa bakafa. Teekateeka aha kagwe ako. Abazaire nibagwerwa akagwe omwe aha baana baabo yaafa. Teebereza okushoberwa, obujune, n’okurimbagirirwa ebi Yobu n’omukazi we baagizire baaheza kumanya ngu abaana baabo ikumi enju yaababandamira baafa. Tikirikutangaaza kureeba ngu Yobu akaganya yaataagura ekijwaro kye, kandi yaajuumara omu mucuucu!—Yob. 1:18-20.
6 Ekyakuratsireho, Sitaane akacwekyereza ebintu bya Yobu, kandi yaamwihaho n’ekitiinisa kye. (Yob. 2:6-8; 7:5) Enyima, Yobu akaba naaheebwa ekitiinisa omu kyanga kyabo. Abantu bakaba baija owe kumushaba obuhabuzi. (Yob. 31:18) Kwonka hati bakaba nibamwetantara. Akahinduka nk’omushuhuuki yaayangwa beene ishe, banywani be, nangwa n’abakozi b’omu ka ye!—Yob. 19:13, 14, 16.
Abajurizi ba Yehova hati nibeetegyereza obusaasi bwa Yobu obu yaafeerwa haihi buri kimwe (Reeba akacweka 7) *
7. (a) Yobu akaba naateekateeka ngu n’oha orikumureetera kubonabona, kwonka akanga kukora ki? (b) Omukristaayo naabaasa kuhikwaho ata embeera erikushushana n’ei turikureeba omu kishushani?
7 Sitaane akaba naayenda ngu Yobu aikirize ngu akaba naabonabona ahabw’okugira ngu takisiimwa Yehova. Nk’eky’okureeberaho, Sitaane akakoresa omuyaga gw’amaani kuhirimya enju ei abaana ba Yobu ikumi baabaire barimu barikurya hamwe. (Yob. 1:18, 19) Kandi akareetera n’omuriro kuruga omu iguru gwacwekyereza amatungo ga Yobu n’abariisa abaabaire bagariisize. (Yob. 1:16) Omuyaga n’omuriro buzima bikareetwa amaani agatarikwetegyerezibwa, n’ahabw’ekyo we Yobu akateekateeka ngu Yehova Ruhanga niwe yaabaire ari obukomooko bwabyo. Kandi ekyarugiremu, Yobu akaikiriza ngu naabaasa kuba yaagwisize kubi Yehova. Kwonka nabwo, akanga kukyeena Ishe ow’omu iguru. Akeetegyereza ngu kumara emyaka, Yehova akaba atwire naamuha ebirungi. N’ahabw’ekyo akagira ngu ku araabe yaashemereirwe kwikiriza ebirungi ebyo, akaba aine n’okuba ayeteekateekire kwikiriza ebibi. N’ahabw’ekyo akagira ati: “Eiziina rya [Yehova] risiimwe!” (Yob. 1:20, 21; 2:10) Yobu akabaasa kugumira oburemeezi bw’eby’entaatsya, enyehurira, n’omu by’omubiri. Kwonka Sitaane akaba atakaherize orukwe rwe.
8. Sitaane akakoresa kakoryo ki akandi ahari Yobu?
8 Sitaane akakoresa akakoryo akandi kugyeza Yobu. Akareetera banywani ba Yobu ab’ebishobobo kumureetera kwehurira nk’otaine mugasho. Abashaija aba bakagira ngu okubonabona kwa Yobu kukaba nikworeka ngu akaba akozire ebibi bingi. (Yob. 22:5-9) Bakateeraho n’okumuhamiza ngu nangwa n’obu yaakubaire atari mubi, okuteeraho kwe kushemeza Ruhanga kukaba kutaine mugasho na kakye. (Yob. 4:18; 22:2, 3; 25:4) Bakaba bariyo nibateeraho kumureetera kubangaanisa yaaba Ruhanga naamukunda, naija kumureeberera, nari yaaba okumuheereza kwine omugasho gwona. Ebigambo byabo bikaba nibibaasa kureetera Yobu kwehurira nk’otaine matsiko goona ahabw’embeera ye.
9. Niki ekyahweraire Yobu kuguma ahami kandi ari emanzi?
9 Teera akashushani. Yobu ashutami omu iju, aine obuhurizi obutarikutuuza. (Yob. 2:8) Bagyenzi be bariyo nibateeraho kumucwa busha n’okushiisha eiziina rye. Okugyezibwa kwe kukaba nikumurutsya nk’oyekoreire amabaare garemeire munonga, kandi omu mutima gwe akaba naakiganya ahabw’okufeerwa abaana be. Yobu akabanza kuhunama. (Yob. 2:13–3:1) Ekyo ku kiraabe kyareeteire bagyenzi be kuteekateeka ngu hati obu yaahunama yaaza kwehakana Ruhanga, bakaba bagwereire kimwe. Yobu naabaasa kuba yaarugireho akaimutsya omutwe gwe akareeba butunu banywani be b’ebishobobo, reero akagira ati: “Okuhitsya obu ndifa, tindireka kuguma ndi omwesigwa!” (Yob. 27:5) Niki ekyahweraire Yobu kuguma ahami, kandi ari emanzi n’obu araabe yaabaire naabonabona? N’obu yaabaire ari omu ncwamba za rufu, akaguma aine matsiko omuri Ruhanga we owa rukundo, ngu naija kurugaho naamureetera oburuhuuko. Akaba naamanya ngu n’obu yaakufa, Yehova naija kumuzoora.—Yob. 14:13-15.
NITUBAASA KUTOOREZA TUTA YOBU?
10. Ebyahikire ahari Yobu nibitwegyesa ki?
10 Ebyahikire ahari Yobu nibitwegyesa ngu Sitaane tarikubaasa kutugyema kuruga ahari Yehova, kandi ngu Yehova naamanya buri mbeera yoona. Kandi nibituhwera kwetegyereza gye enshonga zoona ezaabaire nizitwarirwamu. Yetegyereze gamwe aha mashomo agandi agu turikubaasa kwegyera ahari Yobu.
11. Twaguma tutaire obwesigye bwaitu omuri Yehova, nitugira buhame ki? (Yakobo 4:7)
11 Yobu akooreka gye ngu twagumizamu tutaire obwesigye bwaitu omuri Yehova, nitubaasa kugumisiriza okugyezibwa, kandi tusingure Sitaane. Eki nikirugamu ki? Ebyahandiikirwe nibituhamiza ngu Omuregi naija kutuhunga.—Shoma Yakobo 4:7.
12. Amatsiko g’okuzooka gakagumya gata Yobu?
12 Twine kuhamira aha matsiko g’okuzooka. Nk’oku kirikworekwa omu kicweka eky’enyima, Sitaane naakira kukoresa okutiina okufa kuturemesa kuguma tuhamiire ahari Yehova. Sitaane akagira ngu Yobu akaba naija kukora kyona ekirikubaasika, nangwa arekye n’okuguma ari omwesigwa kubaasa kujuna amagara ge. Sitaane akaba agwereire kimwe. Nangwa n’omu bwire bugumire obu Yobu yaabaire ari omu ncwamba za rufu, tararekire kuguma ari omwesigwa. Okuguma naayesiga Yehova ahabw’oburungi bwe, n’okuguma amwinemu amatsiko maingi, bikabaasa kumuhwera kugumira okugyezibwa. Yobu akaba naikiriza ngu Yehova yaaba atataahire omu nshonga akihuriire, naija kumuzoora omu biro by’omumaisho. Amatsiko g’okuzooka gakaba gari agaabuzima ahari Yobu. Amatsiko ago gaaba gari agaabuzima, n’obu twakutiinisibwa kwitwa nitwija kuguma tuhamiire ahari Yehova.
13. Ahabw’enki twine kwetegyereza gye obukoryo obu Sitaane yaakoreise ahari Yobu?
13 Twine kwetegyereza gye obukoryo obu Sitaane yaakoreise ahari Yobu, ahakuba naabukoresa na hati. Yetegyereze okwomesereza kwa Sitaane oku: ‘Ebi omuntu [atari Yobu wenka] atungire byona, naija kubihayo ahabw’amagara ge.’ (Yob. 2:4, 5) Sitaane akaba ari nk’orikugira ngu titurikukunda Yehova Ruhanga buzima, kandi ngu nitwija kumurugaho kyahika aha kujuna amagara gaitu. Kandi Sitaane naagira ngu Ruhanga tarikutukunda, kandi ngu tarikwija kureeba okuteeraho kwaitu kumushemeza. Ahabw’okugira ngu nitumanya obukoryo bwa Sitaane, titurikubaasa kwikiriza ngu atuhabise.
14. Okugyezibwa nikubaasa kutuhwera kwemanyaho ki? Ha eky’okureeberaho.
14 Twine kureeba okugyezibwa nk’omugisha gw’okwongyera kwemanya gye. Okugyezibwa kwa Yobu kukamuhwera kumanya obweremwa obu yaabaire aine n’okugira eki yaakoraho. Nk’eky’okureeberaho, akamanya ngu aine kwongyera kugira omutwarize gw’obucureezi. (Yob. 42:3) Naitwe nitubaasa kwemanyaho bingi twaba nitugyezibwa. Ow’eishe-emwe Nikolay, * owaateirwe omu kihome n’obu araabe yaabaire aine amagara mabi munonga, naagira ati: “Ekihome kiri nka X-ray, nikyoreka emitwarize y’Ekikristaayo ey’omunda.” Twaheza kumanya obweremwa bwaitu, nitugira eki twakora kubutereeza.
15. Twine kuhurikiza oha, kandi ahabw’enki?
15 Twine kuhurikiza Yehova, beitu batari bazigu baitu. Yobu akataho omutima obu Yehova yaabaire naagamba nawe. Akahikaanisa ebiteekateeko nawe, ari nk’orikumugira ati: ‘Nooreeba amaani gangye g’obwaruhanga? Niimanya buri kimwe ekikuhikireho. Nooteekateeka ngu tindikubaasa kukuhwera?’ Yobu akagarukamu omu muringo gw’obucureezi arikusiima oburungi bwa Yehova ati: “Nkaba nkuhuriza amatu, kwonka hati eriisho ryangye ryakwereebera.” (Yob. 42:5) Yobu naabaasa kuba yaabaire akishutami omu iju, omubiri gwe gukijwire ebihuute, kandi n’abaana be bari omu kituuro, obu yaagamba ebigambo ebyo. Kwonka nabwo, Yehova akamuhamiza ngu naamukunda, kandi ngu naamusiima.—Yob. 42:7, 8.
16. Kurugiirira ahari Isaaya 49:15, 16, twine kuguma nitwijuka ki twaba nitugyezibwa?
16 Naitwe hati, abantu nibabaasa kutujuma kandi batutwarize nk’abataine mugasho. Nibabaasa kuteeraho kushiisha eiziina ryaitu nari ery’ekibiina kyaitu, kandi ‘batubeiherere ekigambo kyona ekibi.’ (Mat. 5:11) Ebyahikire ahari Yobu nibituhwera kumanya ngu Yehova atwinemu obwesigye, kandi ngu nitwija kuguma tumuhamiireho twaba nitugyezibwa. Yehova naatukunda kandi tarikubaasa kuhemuka ahari abo abamwinemu amatsiko. (Shoma Isaaya 49:15, 16.) Otata omutima aha bigambo by’ebishuba ebirikugambwa abazigu ba Ruhanga! James, ow’eishe-emwe omuri Turkey ou eka ye yaagyeziibwe munonga, naagira ati: “Tukeetegyereza ngu twahurikiza ebishuba ebirikugambwa aha bantu ba Ruhanga nikiija kutumaramu amaani. N’ahabw’ekyo tukata omutima aha matsiko g’Obukama, kandi twagumizamu turikuheereza Yehova. N’ekyarugiremu, tukaguma tushemereirwe.” Nka Yobu, nituhurikiza Yehova! Ebishuba by’abazigu baitu tibirikumaraho amatsiko gaitu.
AMATSIKO GAAWE NIGAIJA KUKUGUMYA
Yobu akatunga enshumbuushano ahabw’obwesigwa bwe. We n’omukazi we bakahangaara hamwe barikwesiimira omu migisha ya Yehova (Reeba akacweka 17) *
17. Nooyegyera ki aha bashaija n’abakazi abeesigwa abarikugambwaho omu Abaheburaayo 11?
17 Yobu n’omwe aha baheereza ba Yehova owaagumire aine obumanzi, kandi ahami omu kugyezibwa kw’amaani. Entumwa Paulo omu baruha ye ei yaahandiikire Abaheburaayo, akagamba aha ‘mutwe muhango gwa baakareebi.’ (Heb. 12:1) Boona bakaraba omu kugyezibwa kw’amaani, kwonka bakaguma bari abeesigwa ahari Yehova. (Heb. 11:36-40) Mbwenu shi okugumisiriza kwabo n’okukora kwabo n’obweziriki bikafa busha? Ngaaha buzima! N’obu omu kubaho kwabo kwona batarareebire ebiraganiso bya Ruhanga byona nibihikiirira, bakagumizamu bataire amatsiko gaabo omuri Yehova. Kandi ahabw’okugira ngu bakaba nibahamiza kimwe ngu Yehova naabasiima, bakaba nibamanya ngu nibaija kureeba ebiraganiso ebyo nibihikiirira. (Heb. 11:4, 5) Eky’okureeberaho kyabo nikibaasa kutuhwera kumariirira kugumizamu twine amatsiko omuri Yehova.
18. Omaririire kukora ki? (Abaheburaayo 11:6)
18 Hati turi omu nsi erikwongyera kusiisikara. (2 Tim. 3:13) Sitaane na hati naakigyezesa abantu ba Ruhanga. N’obu haraabeho buremeezi ki omu biro by’omumaisho, ka tuteereho kuba abeeziriki omu kuheereza Yehova, tutaire amatsiko gaitu omuri “Ruhanga ohuriire.” (1 Tim. 4:10) Ijuka ngu, ebi Yehova yaahaire Yobu aha muheru bikahamya ngu “aine embabazi nyingi n’okusaasira.” (Yak. 5:11) Naitwe ka tugume tuhamiire ahari Yehova, turikuhamiza kimwe ngu naija kuha emigisha abarikufayo ‘kumusherura.’—Shoma Abaheburaayo 11:6.
EKYESHONGORO 150 Sherura Ruhanga Akucungure
^ Nitukira kuteekateeka ahari Yobu nk’omushaija owaagumisiriize okugyezibwa kw’amaani. Nitubaasa kwegyera ki aha mushaija omwesigwa ogwo? Nitwega ngu Sitaane tarikubaasa kutugyema kuruga ahari Yehova. Kandi nitwega ngu Yehova butoosha naaba naamanya buri mbeera. Kandi nk’oku Yehova yaihireho okugyezibwa kwa Yobu, eizooba rimwe naija kwihaho okubonabona kwaitu kwona. Twayoreka omu bikorwa byaitu ngu buzima nitwikiririza kimwe enshonga ezi, nituba turi bamwe aha abainiire kimwe amatsiko omuri Yehova.
^ EBISHOBOOROIRWE: Ekigambo ky’Oruheburaayo “amatsiko” omu bugufu nikimanyisa “okutegyereza” ekintu oine ekihika. Kandi kiinemu n’amakuru g’okwesiga omuntu nari okumwegamiraho.—Zab. 25:2, 3; 62:5.
^ Amaziina agamwe gahindwirwe.
