NKHANI YAKUPFUNZA 27
“Dikhirira Yahova”
“Dikhirira Yahova; khwimika ucilimbisa mtima wako.” — SALIMO 27:14.
NYIMBO 128 Tipirire Mpaka Kuphampha
BZOMWE TIN’PFUNZA *
1. (a) Kodi ni cidikhiro ciponi comwe Yahova adatipasa? (b) Kodi ‘kudikhirira Yahova’ kumbathandauza ciyani? (Onani “Kafotokozedwe ka Mafala Yanango.”)
YAHOVA adapereka cidikhiro cabwino kwa wanthu wentse omwe ambamufuna. Tsapanopapa iye an’malisa matenda, kusunama na infa. (Apokalipse 21:3, 4) Yahova an’dzathandiza ‘wanthu wakulungama’ omwe akumudikhirira kukonza dzikoli kuti likhale paraizo. (Salimo 37:9-11) Pa nthawe imweyo, tentsenefe tin’dzakhala tiri pa uxamwali bwabwino na bwakulimba na Yahova. Ndipo uxamwali bumwebu bun’dzakhala bwabwino kwene-kwene kuposa bomwe tinabo na iye ntsiku zino. Cimweci ni cidikhiro cabwino kwene-kwene kwa tentsenefe! Tsono, thangwe ranyi tin’funika kukhulupira kuti bzentse bzomwe Mulungu adalewa bzin’dzacitikadi? Thangwe Yahova ambacita bzomwe ambalewa; iye ambanama lini. Ndipopa ifepano tina mathangwe yakubveka kuti ‘tidikhirire Yahova.’ * (Salimo 27:14) Ndipo tingalatize kuti timbadikhirira Yahova na mtima wentse mwakukhala wakupirira ticidikhirira mwakukondwa nthawe yomwe Mulunguyo an’dzacita bzentse bzomwe adalewa. — Zaiya 55:10, 11.
2. Kodi n’ciyani comwe Yahova akucita kale mu ntsiku zathu zino?
2 Bzomwe Yahova ambacita bzimbalatiza kuti iye nthawe zentse ambateweza bzomwe ambalewa. Bukhu la Apokalipse limbalewa kuti mu ntsiku zathu zino, Yahova angadatsonkhanisa wanthu wakucokera ku mitundu yentse, dzinza liri-lentse na cirewedwe ciri centse. Ndipo wentse pabodzi angadadzamunamata mwakukhulupirika. Tikuwona kuti mafala yamweya yakukwanisikadi mu ntsiku zathu zino. Yahova akutsonkhanisadi wanthu omwe akudziwika na dzina lakuti “thimu likulu.” (Apokalipse 7:9, 10) Thimu limweri lina amuna, akazi na wana wakucokera m’madziko yakusiyana-siyana, m’mitundu yakusiyana-siyana na bzirewedwe bzakusiyana-siyana. Napo bziri tenepo, wentse mbakubverana ndipo ambakhala mwa mtendere. (Salimo 133:1; Juwau 10:16) Wanthu wa mu thimu likuluwa ambaphata basa lakupalizira na nyongo. Nthawe zentse, iwo ambakhala wakukonzeka kuuzambo anzawo bza cidikhiro cawo cabwino kwene-kwene cakudzakhala mu dziko lipsa. (Mateu 28:19, 20; Apokalipse 14:6, 7; 22:17) Penu imwepo mumbacita mbali ya thimu likululi, tikukhulupira kuti mumbadziwa kuti bzinthu bzabwino bzomwe bzikubwera kutsogoloku mpsakufunika kwene-kwene.
3. Kodi n’ciyani comwe Sathani akufuna?
3 Sathani akufuna lini kuti ifepano tikhale na cidikhiro. Bzomwe iye akufuna ni kuticitisa kukumbuka kuti Yahova alibe nafe basa ndipo an’dzateweza lini bzomwe adalewa. Tikabvuma kuti Sathani aticitise kukhala wakusaya cidikhiro, ifepano tingawofoke, ndipo pinango tingasiiretu kutumikira Yahova. Mu nkhani ino, tiniwona bzomwe Dyabu adacita kuti ayezere kucitisa Djobi kukhala wakusaya cidikhiro na kumucitisa kusiya kutumikira Yahova.
4. Kodi n’ciyani comwe tin’pfunza mu nkhani ino? (Djobi 1:9-12)
4 Mu nkhani ino, tiniwona bzomwe Sathani adayezera kucita kuti atazise Djobi kukhala wakukhulupirika kwa Yahova. (Werengani Djobi 1:9-12.) Ndipo tiniwonambo bzomwe ifepano tingapfunze na bzomwe Djobi adacita. Tin’pfunzambo kuti thangwe ranyi mpsakufunika kukumbukira kuti Mulungu ambatifuna na kuti an’dzateweza ayai kucita bzentse bzomwe adalewa.
SATHANI ADAYEZERA KUCITISA DJOBI KULEKA KUKHALA NA CIDIKHIRO
5-6. Kodi n’ciyani comwe Sathani adacitira Djobi mu kanthawe kakucepa?
5 Pakuyamba, bzinthu bzikhamufambira bwino Djobi. Iye akhali pa uxamwali bwakulimba na Yahova, akhana mui ukulu, wana azinji ndipo akhadadala kwene-kwene. (Djobi 1:1-5) Tsono pa ntsiku ibodzi yokha, Djobi adaluza bzentse bzomwe akhanabzo. Cakutoma, iye adaluza vida yace yentse. (Djobi 1:13-17) Ndipo wana wace wentse adafa kabodzi na kabodzi. Ndokumbukirani kuti Djobi adabva tani pa nthawe imweyi. Ifepano timbadziwa kuti abereki ambawawidwa kwene-kwene mwana wawo m’bodzi akasaika. Tsono mukukumbuka kuti Djobi na mkazace adabva tani pomwe adauzidwa kuti wana wawo wentse 10 agweredwa na nyumba ndipo afera m’mwemo? Iwo adabva kuwawa kwene-kwene mu mtima mwawo ndipo adasaya muti wakuphata. Ndipopa Djobi adang’amba bzakubvala bzace ndipo adabulumunda pantsi uko akulira kwene-kwene! — Djobi 1:18-20.
6 Cinthu cinango comwe Sathani adacita ni kuduwalisa Djobi matenda yakuwawa kwene-kwene na yakupasa manyazi. (Djobi 2:6-8; 7:5) Pomwe mabvutoya yakhanati kubwera, Djobi akhali munthu wakulemekezeka kwene-kwene m’mudzi omwe akhakhala. Ndipo wanthu akhayenda kuna iye kukakumbira nzeru. (Djobi 31:18) Tsono pomwe adadzayamba kuduwala, wanthu adasiya kucita naye tsantsa. Ndipo abale wace, axamwali wace wa ponda ndipondembo na anyabasa wace caiwo adasiyambo kucita naye tsansa! — Djobi 19:13, 14, 16.
Abale na mpfumakazi zizinji ntsiku zino akukwanisa kubvesesa kuti Djobi adabva tani pomwe adagumana na mabvuto (Onani ndime 7) *
7. (a) Kodi Djobi akhakumbuka kuti mbani akhamuboneresa, tsono n’ciyani comwe iye adalamba kucita? (b) Kodi Mkristau angagumane tani na mabvuto yakundendemerana na yomwe yakuwoneka pa cithunzi-thunzici?
7 Sathani akhafuna kucitisa Djobi kukhulupira kuti iye akhabonera thangwe rakuti Mulungu akhamufuna lini pomwe. Sathani adaphatisa basa conzi kuti cigwese nyumba yomwe wana 10 wa Djobi akhadyera. (Djobi 1:18, 19) Ndipo iye adacitisambo kuti moto ucoke kudzulu ucicontha bzifuwo bza Djobi pabodzi na anyabasa wace omwe akhabziusa. (Djobi 1:16) Moto na conzico bzidacokera kudzulu, ndipopa Djobi adakumbuka kuti ni Mulungu omwe adabzicitisa. Thangwe ra bzimwebzi, Djobi adakumbuka kuti pakhana cinthu comwe akhadaphonyera Yahova. Napo bzikhali tenepo, iye adalamba kutukwana Baba wace wa kudzulu. Djobi akhadziwa kuti bzinthu bzentse bzabwino bzomwe akhanabzo pa moyo wace bzikhadacokera kwa Yahova. Ndipopa iye adayamba kukumbuka kuti, penu Mulungu adamupasa bzinthu bzabwino ndipo adatambira, ndiye kuti akhafunikambo kubvuma kutambira bzinthu bzakuipa. Ndipopa iye adati: “Dzina la Yahova lipitirize kutumbizidwa.” (Djobi 1:20, 21; 2:10) Napo kuti Djobi akhadaluza vida yace, wana wace ndipo akhaduwala, iye adapitiriza kukhala wakukhulupirika kwa Yahova. Tsono Sathani adanyang’ana njira inango basi kuti ayeze Djobi.
8. Kodi n’ciyani cinango comwe Sathani adacitira Djobi?
8 Sathani adacitira pomwe Djobi cinthu cinango. Iye adacitisa kuti axamwali atatu wa Djobi amucitise kukumbuka kuti iye alibe na basalo. Amuna atatu amwewa adalewa kuti Djobi akhabonera thangwe rakuti adacita bzinthu bzizinji bzakuipa. (Djobi 22:5-9) Ndipo iwo adauzambo Djobi kuti nyongo iri-yentse yomwe akhacita kuti akondwese Mulungu ikhalibe na basalo, napo penu iye akhacita lini bzinthu bzakuipa. (Djobi 4:18; 22:2, 3; 25:4) Mafala yawoya yakulatiza kuti bzomwe iwo akhafuna ni kucitisa Djobi kukumbuka kuti Mulungu akhamufuna lini, angadamuthandiza lini ndipo kutumikira Mulunguyo kukhalibe phindu. Ndipo iwo akhafuna kucitisambo Djobi kuwona kuti akhalibe na cidikhiroco.
9. Kodi n’ciyani cidathandiza Djobi kukhala wakukhwimika?
9 Tiyezezere kuti mukumuwona Djobi adakhala padotha, ndipo akubva kuwawa kwene-kwene. (Djobi 2:8) Axamwali wace akupitiriza kumulewa kuipa ndipo akulewambo kuti bzomwe iye ambacita bziribe na basalo. Pa nthawe imweyi, iye akubva kuwawa thupi lace na mu mtima mwace ndipo akubuula thangwe ra kusaikidwa wana wace. Tsono pomwe papita nthawe pang’ono, Djobi wanyamala. (Djobi 2:13–3:1) Pomwe axamwali wacewo akumuwona, pinango iwo akukumbuka kuti iye wanyamala thangwe rakuti akukonzekera kulewa mafala kuti atukwane Mulungu. Penu iwo akukumbuka bzimwebzi, anemba m’madzi. Thangwe ranyi? Thangwe pomwe Djobi akudjigumisa msolo wace, akunyang’anisa axamwali wacewo, ndipo iye akuwauza kuti: “Mpaka kufa kwangu, ndin’dzasiya lini kukhala na mtima wakusaya kugawanika.” (Djobi 27:5) Kodi n’ciyani cidathandiza Djobi kukhala wakukhwimika napo kuti akhagumana na mabvuto yentseneya? Comwe cidamuthandiza n’cakuti iye adapitiriza kukhala na cidikhiro, akhafuna Mulungu ndipo akhakhulupirambo kuti mabvuto yomwe akhagumana nayo yangadadzamala. Iye akhacita bzimwebzi napo pa nthawe yakunesa kwene-kwene. Ndipo akhadziwambo kuti napo acifa, Yahova angadadzamulamusa acikhala pomwe na moyo. — Djobi 14:13-15.
KODI TINGATEWEZERE TANI DJOBI?
10. Kodi nkhani ya Djobi imbatipfunzisa ciyani?
10 Nkhani ya Djobi ikutipfunzisa kuti Sathani angatingingimize lini kusiya kutumikira Yahova, ndipo ikutipfunzisambo kuti Yahova akudziwa bzentse bzomwe bzikucitika. Tsono nkhani ya Djobiyi ingatithandizembo kubvesesa bwino bzinthu bzinango. Mbatiwoneni bzinthu bzinango bzomwe tingapfunze na Djobi.
11. Kodi n’ciyani comwe tin’dzakwanisa kucita tikakhulupira Yahova? (Tiyago 4:7)
11 Bzomwe Djobi adacita bzikulatiza kuti tikakhulupira Yahova, tin’dzakwanisa kupirira mabvuto yentse yomwe Sathani ambatibweresera ndipo tin’dzakwanisambo kulatiza kuti iye ngwakunama. Kodi ni phindu liponi lomwe tin’dzakhala nalo tikacita bzimwebzi? Bibliya limbalewa kuti Dyabu an’dzatithawa. — Werengani Tiyago 4:7.
12. Kodi cidikhiro cakuti wanthu wakufa an’dzalamuka cidalimbikisa tani Djobi?
12 Ifepano tin’funika kukhulupira na mtima wentse kuti wanthu omwe adafa an’dzakhala pomwe na moyo. Kumbukirani kuti mu nkhani idamala ire, tidapfunza kuti kawiri-kawiri Sathani ambatigopswa mwakuphatisa basa infa kuti tisiye kukhala wakukhulupirika. Sathani adalewa kuti Djobi angadacita ciri-centse kuti apulumuse moyo wace ndipo angadabvumambo kukhala wakusaya kukhulupirika kwa Yahova. Tsono Sathani akhanama. Djobi adapitiriza kukhala wakukhulupirika kwa Mulungu napo pa nthawe yakunesa kwene-kwene, pomwe bzikhawoneka ninga kuti angadafa. Kodi n’ciyani cidamuthandiza kukhala wakukhulupirika? Comwe cidamuthandiza ni kukhulupira kuti Yahova ngwabwino na kuti angadadzamalisa mabvuto yace. Ndipo Djobi akhakhulupirambo na mtima wentse kuti wanthu omwe adafa an’dzamuka. Ndipopa akhadziwa kuti penu Yahova an’malisa lini mabvuto yomwe akhagumana nayo pomwe akhana moyo, iye angadadzamulamusa kutsogolo. Penu ifepano timbakhulupirambo na mtima wentse kuti wanthu omwe adafa an’dzamuka, tin’dzabvuma lini kuti infa ititazise kukhala wakukhulupirika kwa Yahova.
13. Thangwe ranyi tin’funika kudziwa bzomwe Sathani adacitira Djobi?
13 Ifepano tin’funika kudziwa bwino-bwino bzomwe Sathani adacitira Djobi thangwe iye ambacitambo bzibodzi-bodzibzi na ifepano ntsiku zino. Onani mafala yomwe Sathani adalewa. Iye adati: “Munthu [sikuti Djobi yekha] an’dzapereka ciri-centse comwe angakhale naco kuti apulumuse moyo wace.” (Djobi 2:4, 5) Na mafalaya, Sathani akhafuna kulewa kuti ifepano timbafuna lini Yahova na mtima wentse. Ndipo tikagumana na mabvuto, tin’dzasiya kukhala wakukhulupirika kwa iye kuti tipulumuse moyo wathu. Ndipo Sathani adalewa pomwe kuti Mulungu ambatifuna lini ndipo ambawona lini nyongo yomwe timbacita kuti timukondwese. Tsono ifepano tin’dzabvuma lini kupumpsidwa na Sathani thangwe timbadziwa kale njira zace.
14. Kodi mabvuto yambatipasa mpata wakucita ciyani? Fotokozani.
14 Tikakhala tikugumana na mabvuto, tin’funika kuwona mabvutoyo kuti ni mwayi kuti tibzidziwe bwino. Mabvuto yomwe Djobi adagumana nayo yadamuthandiza kuwona bzinthu bzomwe akhafunika kucinja pa moyo wace, ndipo adacinjadi. Cibodzi mwa bzinthubzo n’cakuti iye adapfunza kukhala wakubzicepesa. (Djobi 42:3) Ifepano tingabzidziwembo bwino tikakhala tikugumana na mabvuto. M’bale wakucemeredwa Nikolay, * adakhala m’kawoko uko akhaduwala. Iye adati: “Kukhala m’kawoko kudandithandiza kudziwa makhalidwe yomwe nin’funika kucita nyongo kuti ndikhale nayo.” Ifepano tikazindikira bzinthu bzinango bzomwe timbaphonya, tin’funika kucita nyongo kuti ticinje.
15. Kodi mbani omwe tin’funika kumutetekera, ndipo n’thangwe ranyi?
15 Ifepano tin’funika kutetekera Yahova sikuti anyamadulanthaka wathu. Djobi adatetekera bwino-bwino pomwe Yahova akhalewalewa naye. Mafala yomwe Mulungu adauza Djobi yadamuthandiza kubvesesa kuti iye akhawona mabvuto yentse yomwe Djobiyo akhagumana nayo. Ndipo bzikhakhala ninga kuti akumuuza kuti: ‘Kodi cirengedweci cimbakucitisa kuwona kuti ndina mphanvu? Ndikuwona bzentse bzomwe bzikukucitikira. Kodi ukukumbuka kuti inepano ningakwanise lini kukuthandiza?’ Djobi adatawira mwakubzicepesa ndipo adatenda Yahova thangwe bzinthu bzabwino bzomwe akhamucitira. Iye adati: “Ndikhandobva bza imwe, koma tsapano ndikucita kukuwonani ndekha na maso yangu.” (Djobi 42:5) Bzikuwoneka kuti Djobi akhanati kucoka padotha pale pomwe adalewa mafala yamweya, thupi lace likhadadzala na bzironda ndipo akhalira wana wace. Napo bzikhali tenepo, Yahova adamutsimikizira kuti akhamufuna kwene-kwene ndipo akhakomedwa naye. — Djobi 42:7, 8.
16. Kodi n’ciyani comwe tin’funika kumbakumbukira tikakhala tikugumana na mabvuto? (Zaiya 49:15, 16)
16 Ntsiku zino, wanthu angatitukwane ayai kuticitira bzinthu bzinango bzakuipa. Iwo angayezere kupswipiza mbiri yathu ayai mbiri ya gulu lathu ndipo ‘angatinamizire bzinthu bzakuipa bza mtundu uli-wentse.’ (Mateu 5:11) Tsono nkhani ya Djobi yatipfunzisa kuti Yahova ambakhulupira kuti ifepano tin’dzapitiriza kukhala wakukhulupirika kwa iye napo tikagumana na mabvuto. Yahova ambatifuna kwene-kwene ndipo an’dzasiya lini wanthu wentse omwe ambakhulupira kuti iye an’dzacita bzomwe adalewa. (Werengani Zaiya 49:15, 16.) Ndipopa, lekani kumbatetekera nkhani zakunama zomwe anyamadulanthaka wa Mulungu ambalewa! Banja la m’bale m’bodzi omwe ambakhala ku Turquia omwe ambacemeredwa James, lidagumana na mabvuto makulu kwene-kwene. Iye adati: “Ifepano tidazindikira kuti kutetekera nkhani za wanthu omwe ambanamizira wanthu wa Mulungu kungadatiwofokesa. Ndipopa tidawona kuti bzikhali bwino kwene-kwene kumbakumbukira bzomwe Umambo bwa Mulungu bun’dzaticitira na kupitiriza kutumikira Yahova. Kucita bzimwebzi kudatithandiza kupitiriza kukhala wakukondwa.” Ninga Djobi, ifepano timbatetekera Yahova! Ndipopa nkhani zakunama zomwe anyamadulanthaka wathu ambalewa zin’dzakwanisa lini kumalisa cidikhiro cathu.
MUKAKHALA NA CIDIKHIRO MUN’DZAKHALAMBO NA MPHANVU
Yahova adabaira Djobi thangwe ra kukhulupirika kwace. Ndipo iye na mkazace adakhala na moyo wabwino magole mazinji (Onani ndime 17) *
17. Kodi mwapfunza ciyani na bzomwe amuna na akazi wakukhulupirika wa pa Ahebereu kapitulo 11 adacita?
17 Djobi ni m’bodzi mwa atumiki wa Yahova omwe adapitiriza kukhala wakukhwimika na wakulimba pa nthawe yomwe akhagumana na mabvuto. Mu tsamba lomwe mpostolo Paulo adanembera Ahebereu, iye adalewa kuti atumiki azinji wa Mulunguwa ni ‘mtambo ukulu wa mboni.’ (Ahebereu 12:1) Iwo adagumana na mabvuto makulu kwene-kwene; koma adapitiriza kukhala wakukhulupirika kwa Yahova. (Ahebereu 11:36-40) Kodi kupirira na nyongo yawoyo bzidandoyenda papezi? Ne, n’tenepo lini! Napo kuti pomwe akhana moyo alibe kuwona bzinthu bzomwe Mulungu adawauza kuti an’dzacita, iwo adapitiriza kukhala na cidikhiro. Pakuti akhakhulupira kuti Yahova akhakomedwa nawo, iwo adakhulupira kuti bzomwe Mulungu adawauzabzo bzin’dzacitika ndipo iwo an’dzabziwona na maso yawo. (Ahebereu 11:4, 5) Bzomwe iwo adacitabzi bzikutilimbikisambo tentsenefe kuti tipitirize kudikhirira Yahova.
18. Kodi mwatsimikiza kucita ciyani? (Ahebereu 11:6)
18 Ifepano tikukhala mu dziko lomwe bzinthu bzikuyenda bziciipiratu. (2 Timotio 3:13) Sathani akadapitiriza kuyeza wanthu wa Mulungu. Napo kuti tingadzagumane na mabvuto kutsogoloku, bwerani tipitirize kuphatira basa Yahova na nyongo ticimbakhulupira kuti “timbaikha cidikhiro cathu kwa Mulungu wamoyo.” (1 Timotio 4:10) Kumbukirani kuti mabaibai yomwe Mulungu adapasa Djobi yadalatiza kuti “Yahova ngwa lufoyi likulu na wantsisi.” (Tiyago 5:11) Tikatewezera Djobi mwakukhala wakukhulupirika kwa Yahova, tingakhale na citsimikizo centse cakuti iye ‘an’dzabaira wanthu omwe ambamulinga na mtima wentse.’ — Werengani Ahebereu 11:6.
NYIMBO 150 Lingani Yahova Kuti Mudzapulumuke
^ Tikafuna kukumbukira munthu omwe adapirira mabvuto makulu kwene-kwene, kazinji-kazinji timbakumbukira bza Djobi. Kodi tingapfunze ciyani na bzomwe bzidacitikira munthu wakukhulupirikayu? Timbapfunza kuti Sathani angatingingimize lini kusiya kutumikira Yahova. Ndipo timbapfunzambo kuti Yahova ambadziwa mabvuto yomwe tikugumana nayo. Pakuti iye adamalisa mabvuto ya Djobi, an’dzamalisambo mabvuto yomwe timbagumana nayo. Ifepano tikambakhulupira Yahova na mtima wentse, timbalatiza kuti ndife m’bodzi wa wanthu omwe ‘ambadikhirira Yahova.’
^ KAFOTOKOZEDWE KA MAFALA YANANGO: Fala la Cihebereu lomwe lidasanduliziridwa kuti “cidikhiro” limbathandauza “kudikhirira” cinthu na mtima wentse. Ndipo iro lingathandauzembo kukhulupira munthu ayai kumuthemba. — Salimo 25:2, 3; 62:5.
^ Madzina yanango yacinjidwa.
