EDWƐKƐ 27
“Fa Ɛ Nye To Gyihova Anwo Zo”
“Fa ɛ nye to Gyihova anwo zo; nyia akɛnrasesebɛ na si wɔ ahonle.”—EDW. 27:14.
EDWƐNE 128 Gyinla Kpundii Kɔ Awieleɛ
MƆƆ YƐBAZUKOA *
1. (a) Anyelazo boni a Gyihova ɛmaa yɛnyia a? (b) Duzu a edwɛkɛ, “fa ɛ nye to Gyihova anwo zo” kile a? (Nea “Edwɛkɛ Mɔɔ Bɛhilehile Nu.”)
GYIHOVA ɛmaa menli mɔɔ kulo ye la kɔsɔɔti ɛnyia anyelazo kɛnlɛma bie. Ɔnrɛhyɛ ɔbaye anwodolɛ, alɔbɔlɛlilɛ nee ewule yeavi ɛkɛ. (Yek. 21:3, 4) Ɔbaboa “bɛlɛvoma” mɔɔ bɛfa bɛ nwo bɛto ɔ nwo zo la yeamaa bɛaziezie azɛlɛ ne bɛamaa yeayɛ paladaese. (Edw. 37:9-11) Eza ɔbamaa yɛ nuhua ko biala nee ye anyia agɔnwolɛvalɛ kpalɛ mɔɔ le kpalɛ tɛla mɔɔ yɛ nee ye lɛ ye ɛnɛ bɔbɔ la. Ɔle anyelazo kɛnlɛma kpalɛ! Noko duzu ati a yɛdie yɛdi kɛ Nyamenle ɛwɔkɛ ne mɔ bara nu a? Gyihova di ye ɛwɔkɛ zo dahuu. Ɛhye ati yɛbahola ‘yɛava yɛ nye yɛado Gyihova anwo zo.’ * (Edw. 27:14) Adenle mɔɔ yɛdua zo yɛyɛ ɛhye la a le kɛ yɛbava abotane nee anyelielɛ yɛahendɛ yɛ Nyamenle ne yɛamaa yeali ye bodane nwo gyima.—Aye. 55:10, 11.
2. Duzu a Gyihova ɛlimoa ɛyɛ a?
2 Gyihova ɛlimoa ɛmaa yela ali kɛ ɔdi ye ɛwɔkɛ zo. Suzu neazo kɛnlɛma ko anwo. Gyihova bɔle ɛwɔkɛ wɔ Yekile buluku ne anu kɛ, wɔ yɛ mekɛ ye azo, ɔbaha menli mɔɔ bɛvi maanle, mbusua nee aneɛ ngakyile nu la yeabɔ nu yeamaa bɛava koyɛlɛ bɛazonle ye nɔhalɛ nu. Ɛnɛ, bɛfɛlɛ ekpunli titili ɛhye “menli ekpunli kpole.” (Yek. 7:9, 10) Mrenyia, mraalɛ yɛɛ ngakula mɔɔ bɛvi maanle nee aneɛ ngakyile nu na asolo kɛzi bɛtetele bɛ la a wɔ ekpunli ɛhye anu a, noko bɛyɛ abusua ko mɔɔ anyelielɛ wɔ bɛ avinli. (Edw. 133:1; Dwɔn 10:16) Eza menli mɔɔ wɔ ekpunli kpole ne anu la bɔ mɔdenle wɔ edwɛkɛhanlɛ gyima ne anu. Dahuu bɛziezie bɛ nwo kɛ bɛbaha anyelazo mɔɔ bɛlɛ kɛ kenle bie ewiade kpalɛ bara la anwo edwɛkɛ bɛahile awie biala mɔɔ ɔbadie la. (Mat. 28:19, 20; Yek. 14:6, 7; 22:17) Saa ɛboka menli ekpunli kpole ne anwo a, ye biala anu ninyɛne mgbalɛ mɔɔ bara la anwo anyelazo ne sonle bolɛ kpalɛ maa wɔ.
3. Seetan bodane a le boni?
3 Abɔnsam ɛngulo kɛ ɛbanyia kenle bie nwo anyelazo. Ye bodane a le kɛ ɔmaa wɔalie wɔali kɛ Gyihova ɛndwenle ɛ nwo yɛɛ ɔnrɛli ye ɛwɔkɛ ne mɔ azo. Saa Seetan kola sɛkye yɛ anyelazo ne a, ɔbamaa yɛ sa nu ado na bie a yɛagyakyi Gyihova ɛzonlenlɛ. Kɛ mɔɔ yɛbanwu ye la, Abɔnsam bɔle mɔdenle kɛ ɔsɛkye Dwobu anyelazo ne na yeamaa yeagyakyi Gyihova ɛzonlenlɛ.
4. Duzu a yɛbazuzu nwo wɔ edwɛkɛ ɛhye anu a? (Dwobu 1:9-12)
4 Wɔ edwɛkɛ ɛhye anu, yɛbazuzu mɔdenle mɔɔ Seetan bɔle kɛ ɔmaa Dwobu agyakyi ye nɔhalɛlilɛ nu la anwo. (Kenga Dwobu 1:9-12.) Eza yɛbazuzu mɔɔ yɛbahola yɛazukoa yɛavi Dwobu neazo ne anu nee deɛmɔti ɔhyia kɛ yɛkakye kɛ Nyamenle kulo yɛ na ɔbali Ye ɛwɔkɛ ne mɔ azo la anwo.
SEETAN BƆLE MƆDENLE KƐ ƆSƐKYE DWOBU ANYELAZO NE
5-6. Duzu a dole Dwobu wɔ mekɛ ezinraa bie anu a?
5 Ɛnee ninyɛne ɛlɛkɔ boɛ amaa Dwobu. Ɛnee ɔ nee Gyihova lɛ agɔnwolɛvalɛ kpalɛ. Ɔlɛ abusua kpole mɔɔ koyɛlɛ wɔ bɛ nu yɛɛ ɛnee yenyia ɔ nwo kpole kpalɛ. (Dwobu 1:1-5) Noko wɔ kenle ko pɛ anu, asɛɛ Dwobu debie biala vile ɔ sa. Mɔɔ limoa, ye anwonyia ne vile ɔ sa. (Dwobu 1:13-17) Akee ɔ mra mɔɔ ɔkulo bɛ edwɛkɛ la kɔsɔɔti wule. Dwenle zɔhane esiane ne anwo ekyii nea. Saa awovolɛ ara ko bɔbɔ wu a, bɛ nwo bubu bɛ. Ɔti mɔɔ Dwobu nee ɔ ye dele kɛ bɛ mra bulu ne amuala ɛwu la, nea kɛzi bɛ kunlu hwenle bɛ, bɛlile nyane na bɛ nwo bubule bɛ a. Ɔnyɛ nwanwane kɛ nyane ngome maanle Dwobu tetele ye tɛladeɛ ne anu na ɔpɛle ɔfinle la!—Dwobu 1:18-20.
6 Akee Seetan maanle ewule bie mɔɔ yɛ nyane na ɔbɔ sonla anyiemgba la guale Dwobu. (Dwobu 2:6-8; 7:5) Mekɛ bie ɛnee bɛbu Dwobu kpalɛ wɔ ye sua zo. Ɛnee menli ba ye ɛkɛ bɛmaa ɔtu bɛ folɛ. (Dwobu 31:18) Kɛkala, bɛhwe bɛ nwo bɛvi ɔ nwo. Ɔ mediema, ɔ gɔnwo mɔ kpalɛ kpalɛ yɛɛ ɔdaye mumua ne ye azonvolɛ bɔbɔ kpole ye!—Dwobu 19:13, 14, 16.
Ɛnɛ, mediema mrenyia nee mraalɛ dɔɔnwo bahola ade mɔɔ dole Dwobu la abo kpalɛ (Nea ɛdendɛkpunli 7) *
7. (a) Duzu a ɛnee Dwobu die di kɛ yemɔ a ɛlɛmaa yeanwu amaneɛ a, na duzu a ɔkpole kɛ ɔbayɛ a? (b) Kɛzi Kilisienenli bie bahola ayia sɔnea mɔɔ le kɛ mɔɔ wɔ nvoninli ne anu la ɛ?
7 Ɛnee Seetan kulo kɛ Dwobu die di kɛ kɛmɔ Gyihova anye ɛnlie ɔ nwo bieko la ati a ɔlɛnwu amaneɛ a. Kɛ neazo la, Seetan maanle anwoma kpole bie dule bubule sua ne mɔɔ ɛnee Dwobu amra bulu ne amuala wɔ nu ɛlɛdi aleɛ la guale bɛ nwo zo. (Dwobu 1:18, 19) Eza ɔmaanle senle vile anwuma rahunle Dwobu nyɛmoa nee ye azonvolɛ ne mɔ mɔɔ ɛlɛnea bɛ la. (Dwobu 1:16) Kɛmɔ anwoma ne nee senle ne vi anwuma a rale la ati, Dwobu adwenle yɛle ye kɛ bɛvi Gyihova Nyamenle ɛkɛ. Ɛhye ati ɛnee Dwobu die di kɛ ɔzɔho kɛ yevo Gyihova. Noko Dwobu kpole kɛ ɔbadendɛ yeatia ye anwuma Selɛ ne. Dwobu liele dole nuhua kɛ Gyihova ɛmaa ye ninyɛne mgbalɛ dɔɔnwo wɔ ɛvolɛ dɔɔnwo anu. Ɔti ɔnyianle adwenle kɛ saa ɔliele ninyɛne mgbalɛ ne mɔ a, ɛnee ɔwɔ kɛ ɔdie ɛtane ne noko. Ɔhanle kɛ: “Ayɛlɛyelɛ ɛha Gyihova duma ne dahuu.” (Dwobu 1:20, 21; 2:10) Dwobu ezukoa nee ɔ mra vile ɔ sa yɛɛ ye kpɔkɛdelɛ zɛkyele ɛdeɛ, noko ɔhɔle zo ɔlile nɔhalɛ ɔmaanle Gyihova. Noko ɛnee Seetan ɛtɛgyakyile ye.
8. Duzu bieko a Seetan vale yɛle Dwobu a?
8 Seetan vale debie bieko yɛle Dwobu; ɔluale Dwobu adalɛ agɔnwolɛma nsa bie anwo zo ɔmaanle bɛhanle edwɛkɛ mɔɔ ɔbamaa yeade nganeɛ kɛ nvasoɛ ɛnle ɔ nwo zo la. Mrenyia ɛhye mɔ hanle kɛ kɛmɔ Dwobu ɛyɛ ɛtane dɔɔnwo la ati a ɔlɛnwu amaneɛ a. (Dwobu 22:5-9) Eza bɛbɔle mɔdenle kɛ bɛmaa yealie yeali kɛ saa ɔtɛyɛle ɛtane bɔbɔ a, nvasoɛ biala ɛnle mɔdenle mɔɔ ɔbɔle ɔzonlenle Nyamenle la azo. (Dwobu 4:18; 22:2, 3; 25:4) Ɛnee bɛlɛbɔ mɔdenle bɛamaa Dwobu alie ali kɛ Nyamenle ɛngulo ye, ɔnrɛnlea ye yɛɛ nvasoɛ biala ɛnle zo kɛ ɔbazonle Nyamenle. Anrɛɛ bɛ edwɛkɛ ne bahola amaa Dwobu ade nganeɛ kɛ ɔnlɛ anyelazo biala.
9. Duzu a boale Dwobu maanle ɔnyianle akɛnrasesebɛ ɔgyinlanle kpundii a?
9 Pɛ tɛnlabelɛ ne anwo nvoninli nea. Ɛnee Dwobu de nzonle nu na ɔ nwo ɛlɛfofo ye. (Dwobu 2:8) Ɔ gɔnwo mɔ hɔle zo hanle kɛ ɔnlɛ subane kpalɛ yɛɛ ɔtɛyɛle debie kpalɛ ɛlɛ. Ɛnee ye sɔnea ne mɔ ɛlɛbu ɔ kɔme, yɛɛ ɔ mra ne mɔ ewule ne anwo nyane ɛmaa ɔ nwo ɛyɛ ye bɛtɛɛ. Mɔlebɛbo ne, Dwobu andendɛ. (Dwobu 2:13–3:1) Saa kɛmɔ Dwobu andendɛ la ati, ɔ gɔnwo mɔ adwenle yɛle bɛ kɛ ɔbadwazo yeatia ye Bɔvolɛ ne a, ɛnee bɛvonle kpole. Nzinlii, bie a Dwobu maanle ɔ ti zo na ɔnleanle ɔ gɔnwo mɔ adalɛma ne anyunlu na ɔhanle kɛ: “Kɔkpula kɛ mekɛwu la, menrɛgyakyi me nɔhalɛlilɛ nu ɛlɛ!” (Dwobu 27:5) Duzu a boale Dwobu maanle ɔnyianle akɛnrasesebɛ ɔgyinlanle kpundii wɔ ye amaneɛnwunlɛ kɔsɔɔti anu a? Mekɛ mɔɔ ɛnee ɔ rɛle ɛbɔ bɔbɔ la, anyelazo mɔɔ ɛnee ɔlɛ kɛ ye Nyamenle ne mɔɔ lɛ ɛlɔlɛ la balie ye avi ye amaneɛnwunlɛ ne anu la anzɛkye ɛlɛ. Ɛnee ɔze kɛ saa ɔwu bɔbɔ a, Gyihova badwazo ye.—Dwobu 14:13-15.
KƐ ƆKƐYƐ NA YƐAZUKOA DWOBU Ɛ?
10. Duzu a yɛsukoa yɛfi Dwobu edwɛkɛ ne anu a?
10 Dwobu edwɛkɛ ne maa yɛnwu kɛ Seetan ɛngola ɛntinlitinli yɛ nwo zo kɛ yɛkpo Gyihova yɛɛ Gyihova ze tɛnlabelɛ biala mɔɔ yɛwɔ nu la. Eza Dwobu anwubielɛ ne bahola aboa yɛ yeamaa yɛade tɛnlabelɛ mɔɔ yɛwɔ nu la abo kpalɛ. Suzu ninyɛne titili mɔɔ yɛbahola yɛazukoa yɛavi Dwobu ɛkɛ la bie mɔ anwo.
11. Saa yɛkɔ zo yɛfa yɛ rɛle yɛwula Gyihova anu a, anwodozo boni a yɛbahola yɛanyia a? (Gyemise 4:7)
11 Dwobu hilele kɛ saa yɛkɔ zo yɛfa yɛ rɛle yɛwula Gyihova anu a, yɛbahola yɛagyinla sɔnea biala anloa na yɛaho yɛatia Seetan. Na duzu a bavi nu ara a? Ngɛlɛlera ne maa yɛnwu kɛ Abɔnsam bavi yɛ nwo anriandi.—Kenga Gyemise 4:7.
12. Kɛzi ewudwazo nwo anyelazo ne maanle Dwobu anwosesebɛ ɛ?
12 Ɔwɔ kɛ yɛnyia diedi kpole wɔ ewudwazo nwo anyelazo ne anu. Kɛ mɔɔ yɛnwunle ye wɔ edwɛkɛ mɔɔ li ɛhye anyunlu anu la, Seetan bɔ mɔdenle dahuu kɛ ɔdua ewule nwo ɛzulolɛ zo yeamaa yɛagyakyi yɛ nɔhalɛlilɛ nu. Wɔ Dwobu afoa nu, Seetan hanle kɛ Dwobu bayɛ debie biala, bɔbɔ yeagyakyi ye nɔhalɛlilɛ nu amaa yeadɛnla ngoane nu. Seetan edwɛkɛ ne anyɛ nɔhalɛ. Mekɛ bɔbɔ mɔɔ Dwobu adwenle yɛle ye kɛ ɔbawu la, yeangyakyi ye nɔhalɛlilɛ nu. Anwodozo mɔɔ ɛnee ɔlɛ wɔ Gyihova kpalɛyɛlɛ ne anu nee anyelazo kpole mɔɔ ɛnee ɔlɛ kɛ Gyihova bayɛ ninyɛne boɛ la a boale ye maanle ɔgyinlanle kpundii a. Ɛnee Dwobu lɛ diedi kɛ saa Gyihova anli ninyɛne nwo gyima wɔ mekɛ mɔɔ ɔde ngoane nu bɔbɔ la a, ɔbadwazo ye kenle bie. Ɛnee Dwobu die ewudwazo ne di kpalɛ. Saa yɛdie zɔhane anyelazo ne yɛdi a, ewule nwo ɛzulolɛ bɔbɔ ɛnrɛmaa yɛnrɛgyakyi yɛ nɔhalɛlilɛ nu.
13. Duzu ati a ɔwɔ kɛ yɛsukoa debie yɛfi mɔɔ Seetan vale yɛle Dwobu la anu a?
13 Ɔwɔ kɛ yɛsukoa debie yɛfi mɔɔ Seetan vale yɛle Dwobu la anu kpalɛ ɔluakɛ zɔhane ala a ɔfa ɔyɛ yɛ ɛnɛ a. Tie somolɛ mɔɔ Seetan bɔle la: “Sonla [tɛ Dwobu angomekye] bava debie biala mɔɔ ɔlɛ la yeamaa yeava yealie ye ngoane.” (Dwobu 2:4, 5) Mɔɔ ɛnee Seetan ɛlɛka la a le kɛ yɛngulo Gyihova Nyamenle kpalɛ na saa ɔba ye kɛ ɔwɔ kɛ yɛkpo Ye amaa yɛadɛnla ngoane nu a, yɛbayɛ ye zɔ. Eza Seetan hanle kɛ Nyamenle ɛngulo yɛ na ɔnrɛnwu mɔdenle biala mɔɔ yɛlɛbɔ kɛ yɛyɛ mɔɔ sɔ Ɔ nye la. Kɛmɔ bɛmaa yɛdayɛ mɔɔ yɛ nye la Gyihova anwo zo la ɛnwu Seetan adwenle la ati, yɛnlie ye adalɛ edwɛkɛ ne yɛnli.
14. Duzu a sɔnea bahola amaa yɛanwu ye wɔ yɛ nwo a? Maa ndonwo.
14 Ɔwɔ kɛ yɛbu sɔnea kɛ ɔle nwolɛ adenle mɔɔ bamaa yɛanwu kɛzi yɛde la kpalɛ a. Sɔnea mɔɔ Dwobu yiale la maanle ɔnwunle ye sinlidɔlɛ bie mɔ na ɔlile nwolɛ gyima. Ɔnwunle kɛ ɔwɔ kɛ ɔnyia mɛlɛbɛnwoaze kpole kpalɛ. (Dwobu 42:3) Saa yɛdayɛ noko yɛyia sɔnea a, ɔbamaa yɛanwu kɛzi yɛde la kpalɛ. Adiema nrenyia bie mɔɔ bɛfɛlɛ ye Nikolay, * mɔɔ bɛdole ye efiade ɔnva nwo kɛ ɛnee ɔnde kpɔkɛ fee la hanle kɛ: “Efiade mɔɔ bɛdole me la maanle menwunle subane bie mɔ mɔɔ ɔwɔ kɛ medi nwolɛ gyima la.” Saa yɛnwu yɛ sinlidɔlɛ ne mɔ a, yemɔ yɛkola yɛdi nwolɛ gyima.
15. Nwane a ɔwɔ kɛ yɛtie ye a, na duzu ati ɔ?
15 Ɔwɔ kɛ yɛtie Gyihova, ɔnle kɛ yɛtie yɛ agbɔvolɛ. Mɔɔ ɛnee Gyihova ɛlɛtendɛ ahile Dwobu la, ɔdiele ye kpalɛ. Nyamenle nee Dwobu zuzule edwɛkɛ nwo, mɔɔ yɛbaha a ɔbizale ye kɛ: ‘Asoo ɛnwu me tumi mɔɔ mefa mebɔ ninyɛne la ɔ? Meze edwɛkɛ biala mɔɔ ɛdo wɔ la. Ɛsuzu kɛ menrɛhola wɔ nea ɔ?’ Dwobu vale mɛlɛbɛnwoaze buale Gyihova na ɔhilele kɛ ɔ nye sɔ ye kpalɛyɛlɛ ne kpalɛ. Ɔhanle kɛ: “Me nzo ɛde ɛ nwo edwɛkɛ, noko kɛkala ɛdeɛ, meva me nye menwu wɔ.” (Dwobu 42:5) Ɔbayɛ kɛ ɛnee Dwobu tɛte nzonle ne anu, ɔ nwo ɛyɛ nganlɛ ngome yɛɛ ɔlɛsu ɔ mra ne mɔ mɔɔ ɛwu la wɔ mekɛ mɔɔ ɔhanle zɔhane edwɛkɛ ne la. Wɔ tɛnlabelɛ ɛhye anu bɔbɔ, Gyihova maanle Dwobu nwunle kɛ ɔkulo ye yɛɛ ɔdie mɔɔ ɔlɛyɛ la ɔto nu.—Dwobu 42:7, 8.
16. Kɛ mɔɔ Ayezaya 49:15, 16 kile la, saa yɛlɛyia sɔnea a, duzu a ɔwɔ kɛ yɛkakye a?
16 Ɛnɛ noko, bie a menli babɔ yɛ aholoba na bɛ nee yɛ ali kɛ asɛɛ nvasoɛ ɛnle yɛ nwo zo. Bie a bɛbabɔ mɔdenle kɛ bɛsɛkye yɛ nuhua ko biala anzɛɛ ahyehyɛdeɛ ne duma ‘na bɛbɔ adalɛ bɛfa edwɛkɛ bɛto yɛ nwo zo.’ (Mat. 5:11) Yɛnwu ye wɔ Dwobu edwɛkɛ ne anu kɛ, Gyihova die di kɛ saa yɛyia sɔnea a yɛbahɔ zo yɛali nɔhalɛ yɛamaa ye. Gyihova kulo yɛ na ɔnrɛkpo bɛdabɛ mɔɔ bɛ nye la ɔ nwo zo la ɛlɛ. (Kenga Ayezaya 49:15, 16.) Mmatie adalɛ edwɛkɛ biala mɔɔ Nyamenle agbɔvolɛ baha la! Adiema nrenyia bie mɔɔ bɛfɛlɛ ye James, mɔɔ ɔvi Turkey mɔɔ ye abusua ne yiale sɔnea dɔɔnwo la hanle kɛ: “Yɛnwunle kɛ saa yɛtie adalɛ edwɛkɛ mɔɔ bɛka ye wɔ Nyamenle menli ne anwo la a, ɔbamaa yɛ sa nu ado. Ɔti yɛvale yɛ adwenle yɛziele Belemgbunlililɛ ne anwo anyelazo mɔɔ yɛlɛ la azo yɛɛ yɛhɔle zo yɛmianle yɛ nwo wɔ Gyihova ɛzonlenlɛ nu. Ɛhye maanle yɛ nye hɔle zo liele.” Yɛtie Gyihova kɛ mɔɔ Dwobu yɛle la! Adalɛ mɔɔ yɛ agbɔvolɛ bɔ la ɛnzɛkye yɛ anyelazo ne.
WƆ ANYELAZO NE BABƆ Ɛ NWO BANE
Bɛyilale Dwobu wɔ ye nɔhalɛlilɛ ne anwo. Gyihova yilale ɔ nee ɔ ye wɔ mekɛ tendenle anu (Nea ɛdendɛkpunli 17) *
17. Duzu a ɛsukoa ɛfi mrenyia nee mraalɛ nɔhavoma mɔɔ bɛha bɛ nwo edwɛkɛ wɔ Hibuluma tile 11 la neazo ne anu a?
17 Dwobu le Gyihova azonvolɛ mɔɔ hɔle zo vale akɛnrasesebɛ gyinlanle kpundii wɔ sɔnea nu la anu ko ala. Wɔ Pɔɔlo kɛlata mɔɔ ɔhɛlɛle ɔhɔmaanle Hibuluma la anu, ɔhanle menli gyɛne dɔɔnwo mɔɔ ɔvɛlɛle bɛ “alasevolɛ ekpunli kpole” la anwo edwɛkɛ. (Hib. 12:1) Bɛ muala bɛyiale sɔnea mgbole dɔɔnwo; noko wɔ bɛ ɛbɛlabɔlɛ kɔsɔɔti anu, bɛhɔle zo bɛlile nɔhalɛ bɛmaanle Gyihova. (Hib. 11:36-40) Asoo nvasoɛ biala amba bɛ kpundiigyinlanlɛ nee bɛ gyima ɛsesebɛ ne azo ɔ? Ɔnle zɔ fee! Ɔwɔ nuhua kɛ bɛannwu kɛ Nyamenle ɛwɔkɛ ne mɔ kɔsɔɔti ɛra nu wɔ bɛ ngoane mekɛ nu ɛdeɛ, noko bɛhɔle zo bɛvale bɛ nye bɛdole Gyihova anwo zo. Na kɛmɔ ɛnee bɛze ye bɔkɔɔ kɛ bɛnyia Gyihova anyunlu ɛlolɛ la ati, ɛnee bɛlɛ anwodozo kɛ bɛbanwu ye ɛwɔkɛ ne mɔ mɔɔ bara nu la. (Hib. 11:4, 5) Bɛ neazo ne bahola amaa kpɔkɛ mɔɔ yɛbɔ kɛ yɛbahɔ zo yɛava yɛ nye yɛado Gyihova anwo zo la anu amia.
18. Duzu a wɔbɔ kpɔkɛ kɛ ɛbayɛ a? (Hibuluma 11:6)
18 Ɛnɛ, yɛde ewiade mɔɔ ɔlɛkɔ ɔ nyunlu wɔ ɛtaneyɛlɛ nu la anu. (2 Tim. 3:13) Seetan ɛlɛkɔ zo azɔ Nyamenle menli anlea. Ɔnva nwo ngyegyelɛ biala mɔɔ yɛbayia ye kenle bie la, bɛmaa yɛbɔ kpɔkɛ kɛ yɛbayɛ gyima ɛsesebɛ yɛamaa Gyihova na yɛnyia anwodozo kɛ “yɛva yɛ nye yɛdo tease Nyamenle ne anwo zo.” (1 Tim. 4:10) Kakye kɛ mɔɔ Nyamenle maanle ɔvile Dwobu edwɛkɛ ne anu ɔrale la kile kɛ “Gyihova lɛ ahunluyelɛyelalɛ yɛɛ ɔse anwunvɔne.” (Gye. 5:11) Bɛmaa yɛdayɛ noko yɛhɔ zo yɛli nɔhalɛ yɛmaa Gyihova na yɛnyia anwodozo kɛ ɔbamaa “bɛdabɛ mɔɔ bɛ nye ɛbolo bɛlɛkpondɛ ye la ahatualɛ.”—Kenga Hibuluma 11:6.
EDWƐNE 150 Kpondɛ Nyamenle Na Nyia Ngoane
^ Saa yɛlɛka awie mɔɔ gyinlanle sɔnea dɔɔnwo anloa la a, fane dɔɔnwo ne ala Dwobu a ba yɛ ti anu a. Duzu a yɛbahola yɛazukoa yɛavi nrenyia nɔhavo ɛhye anwubielɛ ne anu a? Yɛnwu ye kɛ Seetan ɛnrɛhola ɛnrɛtinlitinli yɛ nwo zo kɛ yɛgyakyi Gyihova ɛzonlenlɛ. Eza yɛnwu kɛ dahuu Gyihova ze tɛnlabelɛ biala mɔɔ yɛwɔ nu la. Na kɛ mɔɔ Gyihova maanle Dwobu sɔnea ne mɔ rale awieleɛ la, kenle ko dedee ɔbava yɛ amaneɛnwunlɛ kɔsɔɔti yeara awieleɛ. Saa yɛfa yɛ nyɛleɛ yɛkile kɛ yɛdie nɔhalɛ edwɛkɛ ɛhye mɔ yɛdi bɔkɔɔ a, ɛnee amgba yɛlɛkile kɛ yɛboka menli mɔɔ ‘fa bɛ nye to Gyihova anwo zo’ la anwo.
^ EDWƐKƐ MƆƆ BƐHILEHILE NU: Hibulu edwɛkɛ mɔɔ bɛhile ɔ bo ‘fa ɛ nye to zo’ la kile kɛ “ɛkendɛ” debie mɔɔ ɛ nye la ye ade la ɛsesebɛ. Eza ɔkile kɛ ɛdie awie wɔali anzɛɛ ɛfa ɛ nwo wɔado ɔ nwo zo.—Edw. 25:2, 3; 62:5.
^ Bɛhakyi aluma bie mɔ.
