1. (a) Ifiẹrorhọ ọgo yi Jehova ọ yẹre ọwan ne? (b) Me yo mevirhọ re ne vwo “ifiẹrorhọ kpahen Jehova”? (Se “Ẹmro re Dje Fiotọre.”)

 JEHOVA ọ yẹ ọsoso ihworho ri vwo ẹguọlọ kpahiẹn obọdẹn ifiẹrorhọ. Phẹrẹkpẹ, ono tiẹ emiamo, ojẹriọ ọrhẹ uhwu nie. (Rev. 21:3, 4) Ọnọ ha userhumu rẹn “ihworho dẹndẹn” ra hẹrosuiẹ ruẹ otọrakpọ na rhiẹ i paradais. (Ps. 37:9-11) Ono ji ruie nẹ ọwan i vwo obọdẹn onyerẹnkugbe kpẹnkpẹnkpẹn rhẹ ọye, rọ nọ ghwẹ oborẹ ọwan a riamerhiẹn vwana. Ọrana ghini obọdẹn ifiẹrorhọ! Ọrẹn, me yọ yẹre ọwan imwẹro taghene ive i Jehova ine rugba? Jehova o ruẹ oborẹ ọ tare ephian. Omarana, e vwo oborẹ ọsoriẹ ene vwo “ifiẹrorhọ kpahen Jehova.” * (Ps. 27:14) Ọwan e dje ọnana phia nyoma re vwo erhionrin ọrhẹ aghọghọ hẹrhẹ i Jehova nọ ha ive yi te orugba.​—Isa. 55:10, 11.

2. Me yi Jehova o ru rẹn ọwan ne?

² Jehova o djephia ne taghene ọye o ruẹ ive yi gba. Roro kpahen obọdẹn udje owu. Uvuẹn ọbe i Revelation, Jehova o veri taghene uvuẹn ẹdẹ ọwan na, ono koko ihworho nẹ amwa, uvwiẹ ọrhẹ edjadjẹ sansan rhe, nẹ aye i kwomakugbe ga ogame urhomẹmro na. Inyenana, e rhe ẹko oghẹnrensan ọrana rhẹ “otu gbidigbidi na.” (Rev. 7:9, 10) Dedevwo aye ehworhare, emẹse, ọrhẹ emọvwerhe ri vwo ophianroma ọrhẹ edjadjẹ sansan, ri ji nẹ ẹkwotọre sansan rhe, aye a ga kugbe ọrẹ ufuoma ọrhẹ okugbe. (Ps. 133:1; John 10:16) Otu gbidigbidi na e ji vwobọrhọ owian aghwoghwo na rhẹ oruru. Aye i ji mwuegbe aye ina ta rẹn awọrọ ifiẹrorhọ aye kpahen obọdẹn obaro akpọ  na. (Matt. 28:19, 20; Rev. 14:6, 7; 22:17) Orhianẹ wu ha usuẹn otu gbidigbidi na, wa ha ukẹro ọghoghanren ni ifiẹrorhọ kpahen ekwakwa irhorhomu ra sa na.

3. Me yẹ Echu ọ guọlọre nọ phia?

³ Dẹbolo ọ guọlọ taghene wu vwo ifiẹrorhọ kpahen obaro na-a. Ọ guọlọ taghene wu vwo imwẹro taghene Jehova o vwo ọdamẹ kpahuọ-ọn, habaye o ji ruẹ ive yi gba-a. Echu ọrhọ sabu ghwọghọ ifiẹrorhọ ọwan, erhe vwo uduefigbere-e, ana ji sabu dobọ ogame i Jehova ji. Jerẹ oborẹ ene yono, Dẹbolo ọ damoma ghwọghọ ifiẹrorhọ i Job, ji da ye obọ ji nọ jọ ga i Jehova.

4. Me ye ne yono kpahen uvuẹn urhomu-ẹmro ọnana? (Job 1:9-12)

⁴ Uvuẹn urhomu-ẹmro ọnana, ene yono kpahen ena Echu ọ ha ruiruo nọ sabu gba i Job nọ tiẹn emevigbanhon ọnẹyen. (Se Job 1:9-12.) Ana ji ta kpahen oborẹ ene yono nẹ udje i Job, ọrhẹ oborẹ ọsoriẹ o fo na karorhọ taghene Jehova o vwo ẹguọlọ kpahen ọwan, ọnọ ji ha ive yi te orugba.

5-6. Me yọ phia rẹn Job uvwre ibiọke?

⁵ Akpọ ọ dabu rhomu rẹn Job. Ọ riamerhen obọdẹn onyerẹnkugbe rhẹ Jehova. O vwo ekrun ọduado ro vwo okugbe, ọye ọ ji dabu fe omamọ. (Job 1:1-5) Ọrẹn, uvwre ẹdẹ owu, joma ọsoso ekwakwa ri Job o vwori ni variẹ obọ. Ọrukaro, efe yi. (Job 1:13-17) Ọke oru, ọsoso emọyen ro vwo ẹguọlọ kpahen. Roro kpahen omiamiamo ọrana vwẹre. Ọ da emiemọ tẹ ẹhẹn ọke ọmọ aye owu orho hwu. Omarana, gbe roro kpahen omiamiamo, ighweghwe ọrhẹ oja ri Job o rhiẹromẹrẹn, ọke ọye ọrhẹ aniẹ e rhon taghene ọsoso emọyen awan ikpe i hwuru ukwọgbọ. Ọrana yọ soriẹ i Job ọ bẹrẹ ewẹn yen, ji se bruotọre ọrẹ omemwurhọ!​—Job 1:18-20.

⁶ Ọke oru, Echu nọ bọn kpahen omọkpokpọ i Job, ji yẹ ye emiamo ọgbogbanhon rọ lẹrhẹ awọrọ nie sakamu. (Job 2:6-8; 7:5) Bọmọke o ki kpomu, Job ohworho ra dabu họghọ riẹn uvuẹn amwa ro rhirhiẹ. Ihworho e bruie nya ya guọlọ ọkpọvi. (Job 31:18) Vwana, aye na kẹnoma riẹn. Imizie, igbehian yen ri kpẹnkpẹnren ọrhẹ idibo yi ra wian riẹn ni ten riẹn!​—Job 19:13, 14, 16.

7. (a) Me yi Job o vwo imwẹro kpahen taghene yọ suẹ ojẹriọ ye, ọrẹn me ọyẹ o vwo ru? (b) Marhẹ Olele Kristi ono ru rhiẹromẹrẹn aruẹ ọdamuni re dje rhẹ ifoto na?

⁷ Echu ọ guọlọre ni Job o vwo imwẹro taghene ọ rioja fọkime orho vwo ekwerhọ i Jehova ghwomara-an. Jerẹ udje, Echu ọ ha aphẹrẹ ọgbogbanhon ghwọghọ oghwa rẹ emọ i Job awan ikpe e havwọ, rẹ aye a riakpọ kugbe. (Job 1:18, 19) Ọ ji lẹrhẹ erhanren nẹ odjuwu rhe, nọ ghwọghọ ọsoso eranmo ro vwori, ọrhẹ idibo yi ra hẹrote eranmo na. (Job 1:16) Fọkime aphẹrẹ na ọrhẹ erhanren na i nẹ odjuwu rhe, Job no rorori taghene aye i nẹ obẹ i Jehova rhe. Omarana, Job no vwo imwẹro taghene ọkezẹko o ruẹ oborẹ o biomu i Jehova evwan. Udabọ ọrana, Job o kwe phien i Jehova-a. Job nọ djokarhọ ye taghene uvwre ẹgbukpe buebun rhe na Jehova ọ yẹriẹ ekwakwa irhorhomu buebun ne. Omarana, orhianẹ ọye ọ ha ekwakwa irhorhomu mie i Jehova, nọyẹ o ji fo no rhiabọ ha ekwakwa ibiobiomu na. Nọ tare: “Jene rhe jiri odẹ i Jehova.” (Job 1:20, 21; 2: 10) Dedevwo efe i Job, emọyen ọrhẹ omọkpokpọ ye i variẹ obọ, ọye o vwo atamwu kpahen Jehova. Ọrẹn, Echu o ji vwo ọdamuni ọrọrọ hariẹn.

8. Me yẹ emru ọrọrọ rẹ Echu ọ ru haso i Job?

⁸ Echu nọ ha ona ọrọrọ haso i Job; no ghweri igbehian yen awansa ri vwe vwo ẹguọlọ kpahiẹn, nẹ aye i lẹrhẹ i Job ha ukẹro sakamu ni omayen. Igbehian yen na ta taghene ojẹriọ i Job, o djephia taghene Job o ruẹ edandan buebun ne. (Job 22:5-9) Aye ni ji damoma ruie no vwo imwẹro taghene dedevwo ọye rhẹ ọvwọko-on, ọ sabu ruẹ oborẹ ono merhen Osolobrugwẹ oma-a. (Job 4:18; 22:2, 3; 25:4) Nọyẹ, aye a damoma ruẹ i Job no vwo ẹhẹn eveva sẹ Jehova o vwo ẹguọlọ kpahiẹn, taghene ọnọ hẹrote yi, habaye o vwo oborẹ ọsoriẹ ọnọ ga i Jehova-a. Manẹ ẹmro aye ọ sabu lẹrhẹ i Job je vwo ifiẹrorhọ.

9. Me yọ ha userhumu rẹn Job fiudugbere ji gbanhon?

⁹ Gba ha ẹhẹn roro erhirhiẹ ọnana. Job o siyẹ kẹrẹ iphirhikerewi, oma ọ miamiẹ ọke ephian. (Job 2:8) Igbehian yen a ta taghene ọye rhẹ omamọ ohworho-o, ji ta taghene ekwakwa ro ruru a ghanre-en. Ebẹnbẹn yen a hiẹn yen jerẹ atita ọghwaghwa, aniẹ o mwuomarhọ fọkiẹ emọ aye ri hwuru. Ọke ukaro, Job ọ fọdu. (Job 2:13–3:1) Orhianẹ igbehian yen e roro taghene fọkime ọ fọdu, no mevirhọ taghene ọnọ nyaji Jehova vwo, aye i roro sọ. Uvwre ọke owu, Job​—ọkezẹko nọ kpare urhomie rierun ji ni ehworhare ra gemai ruẹ taghene aye igbehian yen na​—nọ tare: “Bọmọke mi ne hwu, mi na sẹrorẹ emevigbanhon mẹ!” (Job 27:5) Me yọ ha userhumu rẹn Job gbanhon, ji vwo uduefigbere udabọ ojẹriọ ye ephian? Ọke ẹhẹn yen o seriotọre omamọ, o vwo  ifiẹrorhọ kpahen Jehova taghene ọnọ yẹ ye omefuon orho ru. O rheri taghene orho hwu dede, Jehova ọnọ rhọmiẹ nuhwu.​—Job 14:13-15.

10. Me yẹ iyẹnrẹn i Job o yonirin ọwan?

¹⁰ Iyẹnrẹn i Job o yonirin ọwan taghene Echu ọ sabu gba ọwan na nyaji Jehova vwo-o, habaye Jehova o rhe kpahen kemru kemru ra dẹrughwaroghwẹ. Oborẹ ọ phia rẹn Job, ọnọ ji sabu ha userhumu rẹn ọwan vwẹruọ ọkpẹ ẹmro rọ ha otọre rhe ne rhọ. Jene roro kpahen iyono ezẹko ra na sabu yono mie i Job.

11. Imwẹro ọgo ya na sabu vwo arha hẹroso i Jehova ọke ephian? (James 4:7)

¹¹ Job o djephia taghene arha hẹroso i Jehova ọke ephian, ana sabu diẹn ebẹnbẹn ephian ji kparehaso Echu. Me yo no nerhumie rhe? Baibol na ọ tare taghene Dẹbolo ọnọ zẹ ji ọwan vwo.​—Se James 4:7.

12. Marhẹ ifiẹrorhọ ẹrhọmọnuhwu na o ru ruẹ i Job gbanhon?

¹² O fori ne vwo imwẹro ọgbogbanhon kpahen ẹrhọmọnuhwu na. Jerẹ oborẹ a hunute uvuẹn urhomu-ẹmro rọ vrẹnren, ọgbọ buebun Echu ọ ha uhwu djofẹn mwu ọwan, na sabu tiẹn emevigbanhon ọwan. Uvuẹn erhirhiẹ i Job, Echu ọ tare taghene Job ono ruẹ kemru kemru, tobọ tiẹn emevigbanhon ọnẹyen, nọ sabu simi arhọ ye. Oborẹ Echu ọ tare ọsọre. Ọke uhwu ọ joma kpe i Job dede, ọ sẹrorẹ emevigbanhon ọnẹyen. Imwẹro ro vwo kpahen orhorhomu i Jehova ọrhẹ ifiẹrorhọ ọgbogbanhon taghene Jehova ono ruẹ ekwakwa serhọ, yọ sẹroriẹ. Job o vwo esegburhomẹmro taghene Jehova ọrhọ sabu kpọ ekwakwa vi ọke ro nyerẹ-ẹn, ono ruie obaro na nyoma rọ nọ rhọmiẹ nuhwu. Ifiẹrorhọ ẹrhọmọnuhwu o mwu i Job ẹro. Ifiẹrorhọ ọrana orho ji mwu ọwan ẹro, ofẹn uhwu ọ sabu lẹrhẹ ọwan tiẹn emevigbanhon ọwa-an.

13. Mesoriẹ o fo na kpomavi rẹn ena Echu ọ ha ruiruo rẹn Job?

¹³ O fori na kpomavi rẹn ena rẹ Echu ọ ha ruiruo rẹn Job, fọkime aruẹ ena erana yọ ji ha wian inyenana. Djokarhọ oborẹ Echu ọ tare: “Onyakpọ [orhiẹ i Job ọvo-o] ono tiobọnu kemru kemru ro vwori fọkiẹ arhọ ye.” (Job 2:4, 5) Nọyẹ Echu ọ ta taghene ọwan e ghini vwo ẹguọlọ okokodo kpahen Jehova-a, ana ji sẹrerhumuje vwo na sabu simi arhọ ọwan. Echu nọ ji ta taghene Osolobrugwẹ o vwo ẹguọlọ kpahen ọwa-an, habaye ọ vwọ djokarhọ omẹdamu re djephia uvuẹn ogamiẹ-ẹn. Re rhe ọnana ne na, Echu ọ sabu phiẹ ọwan rhọ-ọ, fọkime ọwan e fiẹrorhọ i Jehova.

14. Me yẹ ebẹnbẹn ina sabu djephia kpahen ọwan? Dje udje yi.

¹⁴ O fori ne ni ebẹnbẹn rhiẹ uphẹn re ne yono kpahen oma ọwan. Ebẹnbẹn ri Job ọ dẹrughwaroghwu i ha userhumu riẹn rhe ekete ezẹko rọ vwiẹlẹ, ji kpọ aye vi. Jerẹ udje, o yonorin taghene o fori no vwo omeriotọre rhọ. (Job 42:3) Ọwan ina ji sabu yono ekwakwa buebun kpahen oma ọwan arha dẹrughwaroghwu ebẹnbẹn. Omizu ọhworhare owu re se Nikolay, * re fi rhẹ ekanron udabọ emiamo ọgbogbanhon ro kpokpie, nọ tare: “Ekanron ọ họhọ imashini ra ha ni uvuẹn oma ohworho, fọkime ọnọ lẹrhuọ rhe iruemru Olele Kristi  ro fori wu wian kpahen.” Arha djokarhọ ekete ra vwiẹlẹ, ana sabu rha wian kpahen aye.

15. Ọrọmo ya na kerhọ ye, mesoriẹ?

¹⁵ O fori na kerhọ i Jehova, orhiẹ evwreghrẹn ọwa-an. Job ọ dabu kpomavi ọke i Jehova o lelie tẹmro. Osolobrugwẹ nọ nọ i Job enọ ezẹko: ‘Wa mẹrẹn omẹgbanhon mẹ uvuẹn emama mẹ? Mi mẹrẹn kemru kemru ri phia wẹn. We roro taghene mi sabu hẹroto-o?’ Job nọ kpahenrhọ ye rhẹ omeriotọre kugbe ọdaremẹro kpahen orhorhomu i Jehova. Job nọ tare, “erhọ me i rhon kpahuọn ne, ọrẹn vwarana, mi ha ukẹro mẹ mẹruọn ne.” (Job 42:5) Ọkezẹko, Job o siyẹ uvwre iphirhikerewi, omayen ọ vuọnren rhẹ era, emọyen ephian i ha uvuẹn usin, ọke rọ tẹmro erana. Udabọ ọrana, Jehova no dje rẹn Job taghene o vwo ẹguọlọ ọrhẹ ekwerhọ kpahiẹn.​—Job 42:7, 8.

16. Lele oborẹ ọ ha Isaiah 49:15, 16, me yo fori na karorhọ arha dẹrughwaroghwu ebẹnbẹn?

¹⁶ Ihworho buebun inyenana ina sabu hinmaro kpahen ọwan, ji ha ukẹro sakamu ni ọwan. Aye ina sabu damoma ghwọghọ omamọ odẹ re vwori yanghene ta erharhere ẹmro kpahen imizu owuowu yanghene ukoko ra havwọ, jeghwai “mọrenfian banren” ọwan. (Matt. 5:11) Iyẹnrẹn i Job o yonirin ọwan taghene Jehova o vwo imwẹro taghene ana sẹrorẹ atamwu ọwan kpahiẹn udabọ edamuni. Jehova o vwo ẹguọlọ kpahen ọwan, ọ sẹrerhumuji ihworho ri hẹrosuiẹ-ẹ.  (Se Isaiah 49:15, 16.) Wu vwa kpomavi rẹn erharhere ẹmro evwreghrẹn i Jehova a ta kpahen ọwa-an! James, omizu ọhworhare ro rhirhiẹ Turkey, rẹ ekruien i dẹrughwaroghwu edamuni egbogbanhon, ọrhọ ta: “Ame i mẹrẹnvwrurhe taghene ame i rha kerhọ ẹmro efian ra ta kpahen ihworho i Jehova ọnọ lẹrhẹ ẹhẹn ame seriotọre. Omarana, ame na tẹnrovi ifiẹrorhọ Uvie na, ji ruẹ oruru ame kpahen ogame i Jehova gbanhanrhọ. Fọkiẹ ọnana, ame ni sabu sẹrorẹ aghọghọ ame i vwori.” Jerẹ i Job, ọwan a kerhọ i Jehova! Omarana, efian evwreghrẹn ọwan a mọrọn banren ọwan, ọ vwọ ghwọghọ ifiẹrorhọ ọwa-an.

17. Me wu yono nẹ udje esegburhomẹmro ehworhare ọrhẹ emẹse ra hunute uvuẹn Hebrews urhomu-ẹmro 11?

¹⁷ Job owu usuẹn idibo i Jehova buebun ri fiudugbere ji gbanhon udabọ ebẹnbẹn. Uvuẹn ileta rẹ ọnyikọ Paul ọ ya vwe itu i Hebrew, ọ hunute awọrọ ji se aye “iseri buebun.” (Heb. 12:1) Aye ephian i dẹrughwaroghwu edamuni egbogbanhon; ọrẹn, aye i sẹrorẹ esegburhomẹmro ọgbogbanhon kpahen Jehova. (Heb. 11:36-40) Ana kwosa rẹn aye fọkiẹ edirin ọrhẹ ewian aye? Ee! Dedevwo aye a mẹrẹn orugba ive Osolobrugwẹ ephian ọke aye e ha akpọ-ọ, aye i ji fiẹrorhọ i Jehova. Omarana, no mwurun aye ẹro taghene aye ina mẹrẹn orugba ive na obaro na, fọkime aye i vwo ekwerhọ i Jehova. (Heb. 11:4, 5) Udje aye ọnọ sabu lẹrhẹ ọwan rhe fiẹrorhọ i Jehova.

18. Me wu brorhiẹn yen wu ne ruo? (Hebrews 11:6)

¹⁸ Inyenana, ọwan e nyerẹn uvuẹn akpọ ro biomẹrhọ biomẹrhọ. (2 Tim. 3:13) Echu ọ ji damu ihworho i Jehova. O toro ebẹnbẹn re ha obaro na-a, jene brorhiẹn ra na wian gbanhon rẹn Jehova, rhẹ imwẹro taghene e “fiẹrorhọ Osolobrugwẹ ro nyerẹn” na. (1 Tim. 4:10) Karorhọ taghene oborẹ i Jehova o ru rẹn Job o djephia “taghene Jehova o dje ẹguọlọ okokodo ọrhẹ arodọmẹ phia.” (Jas. 5:11) Jenẹ a ji sẹrorẹ atamwu ọwan kpahen Jehova, rhẹ imwẹro taghene ọye ọnọ kwosa rẹn “ihworho ra guọliẹ nẹ otọre ẹhẹn sa.”​—Se Hebrews 11:6.