LONGO DIA 27
‘Sha Mutshima Gudi Yehowa’
‘Sha mutshima gudi Yehowa, khala nu gikhesa nu ngolo.’—NGI. 27:14.
LUNGIMBO 128 Endure jusqu’à la fin
NDAGA JIDI MU LONGO EDI *
1. (a) Felela ditshi Yehowa watuhanele? (b) ‘Gusha mutshima gudi Yehowa’, gudi mukotelesa itshi? (Tala “Ukoteleshi wa Mbimbi.”)
YEHOWA, wahanele felela diabonga diago gudi athu ana gumuzumba. Gualeha ndo mbawukatula misongo, ndaga jia gikenene nu gufua. (Gumo. 21:3, 4) Mbawukuatesa “athu agudibulumuisa,” anyi ana sha mutshima gudi muene ha gubalumuna mavu awa phaladiso. (Ngi. 37:9-11) Mbawutshita yagasue ha gutukuatesa ha gukhala nu ufuta wabonga n’enji gubalega wuwu tudi nayo mangino. Felela diabonga diago! Itshi idi gutukuatesa ha gukhala nu gutshigina egi Nzambi mbawutagenesa ndaga jiatulayele muene? Yehowa wana tagenesa ndaga jiagasue jiana laya muene. Yene idi gutukuatesa ha ‘gumushila mutshima.’ * (Ngi. 27:14) Tuana monesa egi tuana gumushila mutshima, tangua tuana nengenena nu guhuminyina guagasue gutagenesewa gua mafelela enji.—Yesh. 55:10, 11.
2. Itshi Yehowa wakalegele gale?
2 Yehowa wana monesa egi wana tagenesa ndaga jiana laya muene. Tutadilenu gifezegeselo gimoshi. Mu mukanda wa Gumonesa, Yehowa walayele egi mu masugu etu, mbawubungisa athu a ifutshi yagasue, a mazuelelo a gasue ha gumukombelela hamoshi. Mangino, athu ene ana tamegewa egi, “thundu yakoma ya athu.” (Gumo. 7:9, 10) Mukatshi dia athu ene, mudi nu mala nu akhetu nu ana a ilema ya muila ya gudisha, a mazuelelo a gudisha, nu a mafundo a gudisha. Ikhale ngenyi, aphangi awa a ha mavu agasue ana jinga mu guhuima hamoshi. (Ngi. 133:1; Yone 10:16) Mukat’awo agasue ana longesa lukuma luabonga nu gikhesa. Ana khala hehi ha gulongesa felela diawo diabonga mukunda nu masugu adi muza gudi athu anyi ana tshigina guategelela. (Mat. 28:19, 20; Gumo. 14:6, 7; 22:17) Gula udi mukatshi dia thundu yakoma ya athu, idi yadiago egi felela dia ndaga jiabonga mbajikalegewa mu masugu adi muza diana gugusuanguluisa muavula.
3. Itshi Satana wana tshigina egi tutshite?
3 Diabulu wana tshigina egi, wutotese felela diaye mukunda nu masugu adi muza. Wana tshigina nji egi tutangize egi Yehowa ganago gutukuatesa nu mbagashigo mutagenesa ndaga jiana gutulaya muene. Gula tuabua mu muheto wa Satana nu tuatotesa felela dietu, mbatushigo mukhala nu gikhesa, tuajiya nji gubemba gukombelela Yehowa. Gifua luholo tuza guyimona, Diabulu watshitshile yagasue hagula Yobo atotese felela dienji hagula abembe gukombelela Yehowa.
4. Ha gutadila Yobo 1:9-12, itshi tuza muzuelela mu longo edi?
4 Mu longo edi, tuza muzuelela ndaga Satana watshitshile hagula Yobo gakhadigo luko ya gujinginyina gudi Yehowa. (Yobo 1:9-12.) Tuza nji mumona longo tuajiya guzula mu gifezegeselo gia Yobo nu mukunda natshi tudi naye guwunguluga egi Yehowa wana gutuzumba nu mbawutagenesa ndaga jiagasue jialayele muene.
SATANA WATSHITSHILE YAGASUE HAGULA YOBO ATOTESE FELELA DIENJI
5-6. Ndanga itshi yabuidile Yobo?
5 Yobo wakhalele nu lujingu luabonga. Wakhalele nji nu ufuta wabonga nu Yehowa. Wakhalele nu fami yakoma, akhalele mujinga mu gusuanguluga nu wakhalele nji nu umonyi wavula. (Yobo 1:1-5) Uvi lusugu lumoshi, Yobo watotesele ima yenji yavula. Ya thomo, watotesele umonyi wenji. (Yobo 1:13-17) Gungima, an’enji agasue afile. Tutangize gale malamba ene abuidile Yobo. Mvuaji jiana vua lamba diavula gula mun’awo mumoshi wafua. Henyaha tangiza gale luholo Yobo nu mukaji’enji adivile tangua avile egi an’awo agasue afui. Idi yadiago egi Yobo watawudile milele yenji nu wabuile mu mavu!—Yobo 1:18-20.
6 Gungima Satana wamulowele misongo yakola diago. (Yobo 2:6-8; 7:5) Thomo athu akhalele munemesa Yobo muavula, akhalele nji gumutoga malongo. (Yobo 31:18) Uvi gungima dia gukata misongo, athu avula amulengele. Aphangi’enji, mafuta enji nu enya mudimo enji amutunyile!—Yobo 19:13, 14, 16.
Mangino aphangi avula ajiya gukotelesa muabonga luholo Yobo wadivuile hataganele muene nu malamba (Tala paragrafe 7) *
7. (a) Itshi Yobo watangijile mukunda nu malamba enji, uvi gatshitshilego itshi? (b) Luholo lutshi Muklisto wajiya gutagana nu lamba gifua dinyi adi mumonesa ha gifuanesa?
7 Satana watshitshile yagasue hagula Yobo atangize egi udi mukata handaga gakhalelego luko musuanguluisa Yehowa. Ha gufezegesa, tangua ana agasue a Yobo akhalele mudia mu inzo Satana watumine funji yakola wabuishile inzo, ana agasue afuile. (Yobo 1:18, 19) Watumine nji tshuya tuakatugile mu dilu tuashiyile shitu jiagasue jia Yobo nu abambi a shitu jiene. (Yobo 1:16) Luholo funji nu tshuya tuakatugile mu dilu, Yobo wamonele gifua Yehowa wakhalele gumumonesa malamba. Ndaga yene yamutumine ha gutangiza egi wahanele Yehowa khabu. Ikhale ngenyi Yobo gazuelelego ndaga yabola mukunda nu Sh’enji wa mu dilu. Yobo wakhalele mujiya egi mu ivo yabalega Yehowa wamuhanele ima yavula yabonga. Watangijile luholo luakhalele muene musuanguluga nu ndaga jiabonga jiahetele muene. Ngenyi, wakhalele naye nji gutshigina malamba amubuidile. Wazuelele egi: ‘Jina dia Yehowa dilandule gutumbuishiwa.’ (Yobo 1:20, 21; 2:10) Ngatshima Yobo watotesele umonyi wenji nu an’enji nu wakatele nji misongo yakola, uvi wasalele ya gujinginyina gudi Yehowa. Uvi Satana wakalegele nji ndaga iko.
8. Ndaga itshi iko Satana wakalegele?
8 Satana watumine mafuta mutatu a Yobo a mambo ha gumutuma ha gutangiza egi gakhalelego nu ndando. Athu ene azuelele egi, Yobo wakhalele mumona lamba handaga wakalegele ndaga jiabola. (Yobo 22:5-9) Mafuta a Yobo akalegele yagasue ha gumutshiginyisa egi Nzambi ganago guzula ndaga jiana kalagala muene ha gumusuanguluisa nu ndando. (Yobo 4:18; 22:2, 3; 25:4) Amuwambelele nji egi Nzambi ganago gumuzumba, mbagashigo gumukuatesa nga hazonda. Mbimbi jiawo jialebesele diago Yobo muila.
9. Itshi yakuatesele Yobo ha gukhala nu gikhesa nu ngolo?
9 Tangiza gale ndaga eyi. Yobo udi ya gukhala hashi mu fuphi, udi nu lamba diakola. (Yobo 2:8) Mafuta enji asendesa gumuwambela egi gashigo muthu wabonga nu ndaga jiagasue jiakalegele muene jishigo nu ndando. Malamba enji akhalele gifua seso diakoma diakhalele mubata muene ha kunda. Thomo, Yobo gakhalelego muzuela. (Yobo 2:13–3:1) Mafuta a Yobo adihuigile handaga akhalele mutangiza egi luholo Yobo wahuenele tedie yakhalele mukotelesa egi mbawutuna Yehowa. Uvi mu tangua diene, Yobo wawambelele mafuta enji abola egi: ‘Mbangusala ya gujinginyina gudi Yehowa uu nu gu gufua guami!’ (Yobo 27:5) Itshi yakuatesele Yobo ha gukhala nu gikhesa nu ngolo ha gukolesela mu malamba enji? Ngatshima walebele muila, uvi walanduile gusha mutshima egi Nzambi wenji wa guzumba mbawumukuatesa. Wakhalele mujiya egi gula wafua, Yehowa mbawumufuzumuna.—Yobo 14:13-15.
LUHOLO LUTSHI TUAJIYA GULANDULA GIFEZEGESELO GIA YOBO?
10. Lumene lua Yobo ludi gutulongesa itshi?
10 Lumene lua Yobo ludi gutulongesa egi Satana gajiyilego gutushinjiga ha gutuna gukombelela Yehowa. Yehowa nji wanajiya malamba etu agasue. Gifezegeselo gia Yobo giajiya gutukuatesa nji ha gujiya ndaga tuajiya gutshita gula tuatagana nu malamba. Tutadilenu malongo ako tuajiya guzula mu gifezegeselo gia Yobo.
11. Ha gutadila Yakoba 4:7, gula tualandula gushila Yehowa mutshima Satana mbawutshita itshi?
11 Yobo wamonesele egi gula tudi mushila Yehowa mutshima, tuajiya gukolesela mu malamba agasue nu gusala ya gujinginyina gudi Nzambi. Biblia idi gutumonesa egi gula tuatshita ngenyi, Satana mbawulenga gualeha nu esue.—Tanga Yakoba 4:7.
12. Luholo lutshi felela dia gufuzumuga diahanele Yobo gikhesa?
12 Tudi naye gukhala nu gutshigina guakola mu felela dietu dia gufuzumuga. Luholo tuayimonyi mu longo diabalega, Satana wana kalegela woma wa gufua hagula tukhadigo luko ya gujinginyina gudi Yehowa. Satana wazuelele egi, Yobo mbawukalagala ndaga yagasue nu mbawubemba gukombelela Yehowa ha guhuluisa monyo wenji. Satana wambile mambo. Ngatshima mu tangua dimoshi ngenyi Yobo wakhalele hehi ha gufua, uvi wasalele ya gujinginyina gudi Yehowa. Yobo wakolesele mu malamba awa agasue handaga, wakhalele nu gutshigina mu mutshima wabonga wa Yehowa nu wakhalele nji nu felela diakola gudi muene. Yobo washile mutshima egi gula Yehowa gamukuateselego hakhalele muene nu monyo, mbawudi gumufuzumuna mu masugu adi muza. Yobo wakhalele diago musha mutshima mu felela dia gufuzumuga. Gula esue nji tudi musha mutshima mu felela diene, ngatshima ndaga imoshi yajiya gutubata mu gufua yatubuila, mbatusala ya gujinginyina gudi Yehowa.
13. Longo ditshi tuajiya guzula mu ndaga Satana wakalegele Yobo?
13 Tudi naye gumonesa gutema, handaga Satana wana kalegela ba metode a luholo lumoshi gifua anyi gakalegele gudi Yobo. Satana wazuelele egi: ‘Muthu [ishigo phamba Yobo] mbawuhana gima giagasue gidi nagio muene ha guhuluisa monyo wenji.’ (Yobo 2:4, 5) Wamonesele egi tuanago guzumba Yehowa Nzambi nu mbatumutuna gula monyo wetu udi mu gingonza. Satana wazuelele nji egi Nzambi ganago gutuzumba, ndaga jiagasue tuana kalagala ha gumusuanguluisa jiana khalago nu ndando gu meso enji. Luholo tudi mujiya egi Satana udi muenya mambo, tushigo naye gulandula ndaga jiana zuela muene.
14. Malamba ajiya gutukuatesa ha gutshita itshi? Hana gifezegeselo.
14 Tudi naye gutadila malamba etu gifua ba okazio ha guzula malongo. Malamba ataganele nawo Yobo amukuatesele hagujiya ndaga jiakhalele naye gusombegesa muene mu monyo wenji. Ha gufezegesa, wakotelesele egi wakhalele naye gukudisa khadilo dia gudibulumuisa. (Yobo 42:3) Esue nji, tuajiya guzula malongo avula gula tuatagana nu malamba. Phangi Nikolay, * wambiwe mu bologo ngatshima wakhalele nu misongo yakola. Udi muzuela egi: “Tangua ngakhalele mu bologo ngakotelesele egi gudi nu makalegelo ako ngudi naye gusombegesa.” Gula tuajiya ndaga tudi naye gusombegesa, tuajiya gutshita ngolo ha guyisombegesa.
15. Nanyi tudi naye gutegelela nu mukunda natshi?
15 Tudi naye gutegelela Yehowa, uvi mbalagaji jietu ndo. Yobo wategelele muabonga tangua akhalele muta maga nu Yehowa. Nzambi wahudile Yobo egi: ‘Wamona ima ngafugile nu ngolo jiami? Ngudi mujiya ndaga jiagasue jiagubuila. Udi mutangiza egi ngajiyilego gugukuatesa?’ Yobo wahanele Yehowa mvutu nu gudibulumuisa guagasue, wamonesele egi wasuangulugile nu mutshima wabonga wa Yehowa. Wazuelele egi: ‘Ha thomo ngakhalele gugujiya phamba mu ndaga ngavile, uvi luenyelu ngagumona nu meso ami.’ (Yobo 42:5) Yajiya gukhala egi tangua Yobo wakhalele muzuela mbimbi eji, wakhalele hashi mu fuphi, muila wenji waguzala nu ijimbo nu an’enji afui gale. Ikhale ngenyi, Yehowa wamonesele egi wakhalele muzumba Yobo nu wakhalele nji musuanguluga n’enji.—Yobo 42:7, 8.
16. Mu gudivua nu Yeshaya 49:15, 16, itshi tushigo naye gujimbila gula tuatagana nu malamba?
16 Mangino nji, athu ajiya gutushinga nga gutukalegela ndaga gifua tushigo nu ndando. Ajiya nji guzuela ndaga jiabola mukunda nu esue nga mukunda nu ulondegi wa Yehowa nga ndo ajiya ‘gutumbila mambo a luholo nu luholo.’ (Mat. 5:11) Lumene lua Yobo lua tukuatesa ha gujiya egi, Yehowa wana sha mutshima egi mbatusala ya gujinginyina gudi muene ngatshima tuatagana nu malamba. Yehowa wana gutuzumba nu mbagashigo mutuna athu ana gumushila mutshima. (Tanga Yeshaya 49:15, 16.) Tushigo naye gutegelela ndaga jia mambo jiana zuela mbalagaji jia Nzambi. Phangi James gu Turquie nu fami yawo ataganele nu malamba avula. Udi muzuele egi: “Tuakotelesele egi gutegelela ndaga jia mambo athu ana zuela mukunda nu akombeledi a Nzambi, jiajiya gutulebesa muila. Tuakhalele musha matangi etu mu Ufumu wa Nzambi nu tualanduile gukalegela Yehowa mudimo. Ndaga yene yatukuatesele ha gubamba gusuanguluga guetu.” Gifua Yobo, esue nji tuana tegelela Yehowa muabonga. Mambo a mbalagaji jietu ajiyilego gutotesa felela dietu.
FELELA DIAYE MBADIGUKUATESA
Yobo wahetele gubonga handaga wasalele ya gujinginyina gudi Yehowa. Muene nu mukaji’enji akhalele nu gusuanguluga guavulag (Tala paragrafe 17) *
17. Longo ditshi tuazula mu ifezegeselo ya Aklisto asalele ya gujinginyina adi muzuelela mu Hebelu mukhapho 11?
17 Gudi nji nu akombeledi ako a Yehowa abambele gikhesa giawo nu ngolo gifua Yobo tangua ataganele nu malamba. Mu mukanda wasonegele mupostolo Phaula gudi enya Hebelu, wamonesele athu ako avula. Watamegele athu ene egi: “Matemue avula adi gifua tuta diakoma.” (Heb. 12:1) Mukut’awo agasue ataganele nu malamba avula, uvi asalele agujinginyina gudi Yehowa. (Heb. 11:36-40) Gukolesela guawo nu mudimo wakola atshitshile wakhalele wa githuhu ba? Ndo sha! Ngatshima tangua akhalele nu monyo amonelego gutagenesewa gua ndaga jialayele Yehowa, uvi alanduile gumushila mutshima. Akhalele mujiya egi Yehowa wana suanguluga nawo, hene ashile mutshima egi ndaga jiagasue jialayele muene mbajitagenesewa diago. (Heb. 11:4, 5) Ifezegeselo yawo yajiya gutukuatesa ha gulandula gushila Yehowa mutshima.
18. Ha gutadila Hebelu 11:6, desizio ditshi wazula?
18 Mangino ha mavu ndaga jidi mubola muavula gubalega. (2 Tim. 3:13) Satana yowu genji mulandula gulola akombeledi a Nzambi. Tudi mujiya egi mambo a Satana ajiya gutubatele malamba, hene tudi naye guzula desizio dia gukalagala muavula mudimo wa Yehowa, nu gusha mutshima “gudi Nzambi wa monyo.” (1 Tim. 4:10) Guwuguluga ndaga Yehowa wakalegele mukunda nu Yobo gungima, idi gutukuatesa ha gujiya egi, “Yehowa wana khala nu guzumba guakola nu khenda jiavula.” (Yak. 5:11) Esue nji tuajiya gusala ya gujinginyina gudi Yehowa nu gusha mutshima egi muene mbawuhana “lufuto gudi athu ana gumukamba nu mutshima umoshi.”—Tanga Hebelu 11:6.
LUNGIMBO 150 Cherche Dieu pour être délivré
^ Tangua tuana gutangigiza muthu wakolesele mu malamba avula, yajiya gukhala egi Yobo wana gutujila mu matangi. Longo ditshi tuajiya guzula mu gifezegeselo gienji? Gifezegeselo gienji gidi gutulongesa egi, Satana gajiyilego gushinjiga muthu ha gutuna Yehowa. Gidi nji gutulongesa egi, Yehowa wana jiya ndaga jiagasue jiana gutubuila. Gifua luholo Yehowa wamanesele malamba a Yobo, tudi musha mutshima egi gudi nu lusugu mbawumanesela nji malamba etu agasue. Gula tudi mumonesa mu makalegelo etu egi tudi nu gutshigina guakola mu ndaga jiene, mbayimonesa egi tudi mukatshi dia athu ana shila “Yehowa mutshima.”
^ UKOTELESHI WA MBIMBI: Mbimbi ya Hebelu ana balumuna egi “gusha mutshima,” idi mukotelesa “gunengenena” gima gimoshi nu nzala yakola. Yajiya nji guhana matangi a gushila muthu mutshima.—Ngi. 25:2, 3; 62:5.
^ Mu longo edi, majina ako asombegesewe.
