مطالعے دا مضمون نمبر 27
یہوواہ دی آس رکھو
یہوواہ دی آس رکھ، دلیر بن تے اپنا دل مضبوط کر۔—زبور 27:14۔
گیت نمبر 42: خدا دے خادم دی دُعا
مضمون تے اِک نظر a
1. (الف)یہوواہ نے سانوں کیہڑی اُمید دِتی اے؟ (ب)یہوواہ دی آس رکھن دا کیہہ مطلب اے؟
یہوواہ نے اوہناں سارے لوکاں نُوں اِک شاندار اُمید دِتی اے جیہڑے اوہنوں پیار کردے نیں۔ اوہنے وعدہ کیتا اے کہ بوہت چھیتی اوہ بیماری، دُکھ تے موت نُوں ختم کر دَوے گا۔ (مکاشفہ 21:3، 4) اوہ حلیم لوکاں دی مدد کرے گا تاکہ اوہ ساری زمین نُوں عدن دے باغ وانگوں سوہنا بنا دین۔ (زبور 37:9-11) یہوواہ اَج اپنے ہر بندے دے نیڑے وے، پر نوِیں دُنیا چ اوہدے نال ساڈی دوستی ہور وی مضبوط ہوئے گی۔ ایہہ کِنّی شاندار اُمید اے۔ پر اَسی ایہہ یقین کیوں رکھ سکنے آں کہ یہوواہ اپنے سارے وعدے پورے کرے گا؟ کیونکہ اوہ ہمیشاں اپنا وعدہ پورا کردا اے۔ ایسے وجہ توں اَسی اوہدی آس رکھنے آں۔ b (زبور 27:14) ایہہ ثابت کرن لئی کہ اَسی یہوواہ دی آس رکھنے آں اَسی صبر تے خوشی نال اوس وقت دا اِنتظار کر رہے آں جدوں یہوواہ اپنے وعدے پورے کرے گا۔—یسعیاہ 55:10، 11۔
2. یہوواہ نے اپنا کیہڑا وعدہ پورا کیتا اے؟
2 یہوواہ نے کیہڑی گل ثابت کیتی اے؟ یہوواہ نے ثابت کیتا اے کہ اوہ ہمیشاں اپنے وعدے پورے کردا اے۔ ذرا اِک مثال تے غور کرو۔ مکاشفہ چ یہوواہ نے ساڈے زمانے بارے وعدہ کیتا سی کہ اوہ ہر قوم، قبیلے تے زبان دے لوکاں نُوں جمع کرے گا تاکہ اوہ مل کے اوہدی عبادت کرن۔ لوکاں دے ایس خاص گروہ نُوں بائبل چ وڈی بِھیڑ کہیا گیا اے۔ (مکاشفہ 7:9، 10) بھانویں کہ وڈی بِھیڑ چ شامل مرد، عورتاں تے بچے فرق فرق قوماں توں نیں تے فرق فرق زباناں بولدے نیں پر اوہ سارے اِک وڈے خاندان وانگوں صلح نال رہندے نیں تے اِک دُوجے نال بوہت پیار کردے نیں۔ (زبور 133:1؛ یوحنا 10:16) اوہ جوش نال دُوجیاں نُوں اپنی ایس اُمید بارے دَسدے نیں کہ خدا دی بادشاہی اِک نوِیں دُنیا لیان والی اے۔ (متی 28:19، 20؛ مکاشفہ 14:6، 7؛ 22:17) جے تُسی ایس وڈی بِھیڑ دا حصہ او تے بےشک توانوں ایس اُمید دی وجہ توں بڑی خوشی ملی ہونی اے۔
3. شیطان کیہہ چاہندا اے؟
3 شیطان نئیں چاہندا کہ اَسی نوِیں دُنیا دی اُمید رکھئے۔ اوہ سانوں ایہہ یقین دَوانا چاہندا اے کہ یہوواہ نُوں ساڈی کوئی فکر نئیں اے تے اوہ اپنے وعدے پورے نئیں کرے گا۔ جے اَسی شیطان دے ایس دھوکھے چ آ گئے تے اَسی ہمت ہار بیٹھاں گے۔ ایتھوں تک کہ اَسی یہوواہ دی عبادت کرنا وی چھڈ دَواں گے۔ شیطان نے ایوب نال وی ایہی کرن دی کوشش کیتی سی۔
4. ایس مضمون چ اَسی کیہڑیاں گلاں تے غور کراں گے؟ (ایوب 1:9-12)
4 ایس مضمون چ اَسی ویکھاں گے کہ شیطان نے کیہڑیاں چالاں چلیاں تاکہ ایوب یہوواہ دی عبادت کرنا چھڈ دَوے۔ (ایوب 1:9-12 نُوں پڑھو۔) اَسی ایہہ وی ویکھاں گے کہ اَسی ایوب دی مثال توں کیہہ سکھنے آں تے سانوں ایہہ کیوں یاد رکھنا چاہی دا اے کہ یہوواہ سانوں پیار کردا اے تے اوہ اپنے وعدے ضرور پورے کرے گا۔
شیطان نے ایوب دی اُمید نُوں ختم کرن دی کوشش کیتی
5، 6. تھوڑے ای وقت چ ایوب نال کیہہ کجھ ہویا؟
5 ایوب خوشیاں بھری زندگی گزار رہیا سی۔ اوہدی یہوواہ نال بڑی گُوڑھی دوستی سی۔ اوہدا بوہت وڈا خاندان سی تے اوہ بڑا امیر سی۔ (ایوب 1:1-5) پر اِک ای دن چ اوہدی پوری دُنیا اُجڑ گئی۔ سب توں پہلاں اوہدا سارا مال ڈنگر ماریا گیا۔ (ایوب 1:13-17) ایہدے بعد اوہدے سارے بچے مر گئے۔ ذرا سوچو کہ جدوں کسے ماں پیو دا صرف اِک بچہ فوت ہوندا اے تے اوہ دُکھ دے مارے کِنّے ٹُٹ جاندے نیں۔ جدوں ایوب تے اوہدی بیوی نُوں پتہ چلیا ہوئے گا کہ اوہناں دے سارے بچے مر گئے نیں تے اوہناں تے کیہہ بیتی ہوئے گی! ایوب ایناں دُکھی سی کہ اوہنے اپنے کپڑے پھاڑ دِتے تے زمین تے ڈِگ پیا۔—ایوب 1:18-20۔
6 ایہدے بعد شیطان نے ایوب نُوں اِک دردناک بیماری لا دِتی۔ اوہدے بُرے حال دی وجہ توں اوہنوں بوہت شرمندگی ہوئی۔ (ایوب 2:6-8؛ 7:5) اِک وقت سی کہ لوک ایوب دی بڑی عزت کردے سن تے اوہدے کولوں صلاح مشورہ لین لئی آندے سن۔ (ایوب 31:18) پر ہُن اوہ سارے اوہدے کولوں دُور رہن لگ پئے۔ اوہدے بھراواں، قریبی دوستاں،ایتھوں تک کہ اوہدے نوکراں نے وی اوہدے توں موُنہہ موڑ لیا سی۔—ایوب 19:13، 14، 16۔
اَج بوہت سارے یہوواہ دے گواہ سمجھ سکدے نیں کہ دُکھ تکلیف دے ویلے ایوب تے کیہہ بیتی ہوئے گی۔ (پیراگراف نمبر 7 نُوں ویکھو۔) d
7. (الف)ایوب دے خیال چ اوہدیاں مصیبتاں پچھے کدا ہتھ سی تے اوہنے کیہہ نئیں کیتا؟ (ب)اَج شاید سانوں وی کیہڑیاں مصیبتاں توں لنگھنا پے سکدا اے؟
7 شیطان چاہندا سی کہ ایوب ایہہ سوچے کہ اوہدے تے مصیبتاں ایس لئی آئیاں نیں کیونکہ یہوواہ اوہدے نال ناراض اے۔ ایس لئی شیطان نے کجھ چالاں چلیاں۔ مثال لئی، شیطان نے اِک زور دار ہنیری چلائی تاکہ اوہ گھر ڈِگ جائے جِتھے ایوب دے سارے بچے کٹھے کھانا کھا رہے سن۔ (ایوب 1:18، 19) شیطان نے اسمان توں اَگ وی گھلی جدی وجہ توں ایوب دے سارے جانور تے اوہناں دی دیکھبھال کرن والے نوکر مر گئے۔ (ایوب 1:16) ہنیری تے اَگ اسمان توں آئیاں سن ایس لئی ایوب نُوں لگیا کہ ایہہ یہوواہ وَلّوں نیں۔ جدی وجہ توں اوہ سوچن لگ پیا کہ یہوواہ اوہدی کسے گل توں ناراض ہو گیا اے۔ ایناں کجھ ہون دے باوجود ایوب نے اپنے اسمانی باپ بارے کجھ بُرا بھلا نئیں کہیا۔ ایوب جان دا سی کہ اوہدے کول جو کجھ وی سی اوہ یہوواہ نے ای اوہنوں دِتا سی۔ ایسے وجہ توں اوہنے سوچیا کہ جے اوہنے یہوواہ وَلّوں مِلن والیاں برکتاں نُوں خوشی نال قبول کیتا سی تے اوہنوں ایہناں مصیبتاں نُوں وی قبول کرنا چاہی دا اے۔ اوہنے کہیا: یہوواہ دا ناں مبارک ہووے۔ (ایوب 1:20، 21؛ 2:10) بھانویں کہ ایوب کنگال ہو گیا، اوہدے سارے بچے مر گئے تے اوہنوں اِک بھیڑی بیماری لگ گئی پر فیر وی اوہ یہوواہ دا وفادار رہیا۔ پر شیطان نُوں ایہہ سب کر کے وی چین نئیں آیا۔
8. شیطان دی اگلی چال کیہڑی سی؟
8 شیطان نے ایوب نُوں یہوواہ توں دُور کرن لئی اِک ہور چال چلی۔ اوہنے ایوب دے تِن دوستاں دے ذریعے اوہنوں ایہہ احساس دَوان دی کوشش کیتی کہ اوہ کسے کم دا نئیں۔ ایہناں تناں بندیاں نے ایوب نُوں کہیا کہ اوہدے تے ساریاں مصیبتاں ایس لئی آئیاں نیں کیونکہ اوہنے غلط کم کیتے نیں۔ (ایوب 22:5-9) اوہناں نے ایوب نُوں ایہہ یقین دَوان دی کوشش کیتی کہ بھانویں اوہنے کوئی غلطی نہ وی کیتی ہووے تے بھانویں اوہ یہوواہ نُوں خوش کرن لئی جِنّی مرضی کوشش کر لوَے یہوواہ نُوں اوہدے توں کوئی فرق نئیں پیندا۔ (ایوب 4:18؛ 22:2، 3؛ 25:4) اصل چ اوہ ایوب دے دل چ ایس گل بارے شک پیدا کرنا چاہندے سن کہ یہوواہ ایوب نُوں پیار کردا اے، اوہدی عبادت دی قدر کردا اے تے اوہ ایوب دا خیال رکھے گا۔ اوہناں دِیاں گلاں توں ایوب نُوں لگ سکدا سی کہ اوہنوں کسے بہتری دی اُمید نئیں رکھنی چاہی دی۔
9. کیہڑی چیز نے ایوب دی مدد کیتی تاکہ اوہ مشکلاں دے باوجود ہمت نہ ہارے؟
9 ذرا ایوب دی حالت بارے سوچو، اوہ سواہ چ بیٹھا ہویا اے تے درد نال تڑپ رہیا اے۔ (ایوب 2:8) اوہدے جھوٹھے دوست اوہنوں وار وار کہہ رہے نیں کہ اوہ بوہت بھیڑا انسان اے تے اوہنے کدی کوئی چنگا کم نئیں کیتا۔ ایوب دُکھاں دے بھار تھلے دبیا ہویا اے۔ اپنے بچیاں دی موت دے غم نال اوہدا دل بھریا ہویا اے۔ شروع شروع چ ایوب چپ چاپ بیٹھا رہندا اے، جدی وجہ توں اوہدے ساتھیاں نُوں لگدا اے کہ اوہنے یہوواہ توں موُنہہ پھیر لیا اے۔ (ایوب 2:13–3:1) پر ایہہ اوہناں دی غلط فہمی اے۔ اگلی گل کہندے ویلے شاید ایوب نے اپنا سر چُک کے اوہناں وَل ویکھیا ہووے۔ ایوب اوہناں نُوں کہندا اے: مردے دم تک میں اپنی وفاداری نئیں چھڈاں گا۔ (ایوب 27:5) کیہڑی چیز نے ایوب دی مدد کیتی کہ اوہ ایہناں ساریاں مشکلاں دے باوجود ہمت نہ ہارے؟ اوکھی توں اوکھی گھڑی چ وی اوہنے اُمید نئیں چھڈی۔ اوہنوں پورا یقین سی کہ اوہدا شفیق خدا اوہنوں دُکھاں چوں ضرور کڈھے گا۔ نالے اوہ جان دا سی کہ جے اوہ مر وی گیا تے یہوواہ اوہنوں زندہ کر دَوے گا۔—ایوب 14:13-15۔
اَسی ایوب دی مثال تے کیویں چل سکنے آں؟
10. اَسی ایوب دی زندگی توں کیہہ سکھنے آں؟
10 ایوب دی زندگی توں اَسی سکھنے آں کہ شیطان سانوں یہوواہ نُوں چھڈن لئی مجبور نئیں کر سکدا۔ نالے یہوواہ چنگی طرحاں جان دا اے کہ اَسی کیہڑے حالاتاں چوں گزر رہے آں۔ اَسی ایہہ وی سمجھ جانے آں کہ ساڈے تے مصیبتاں کیوں آندیاں نیں۔ آؤ ویکھئے کہ اَسی ایوب دی مثال توں ہور کیہڑیاں گلاں سکھ سکنے آں۔
11. سانوں کیس گل دا یقین دَوایا گیا اے؟ (یعقوب 4:7)
11 ایوب دی مثال توں ثابت ہوندا اے کہ جے اَسی یہوواہ تے بھروسا کردے رہواں گے تے فیر اَسی مشکلاں دے باوجود یہوواہ دے وفادار وی رہ سکاں گے تے شیطان دا مقابلہ وی کر سکاں گے۔ بائبل چ سانوں یقین دَوایا گیا اے کہ جے اَسی اپنے ایمان تے قائم رہے تے شیطان ساڈے توں نس جائے گا۔—یعقوب 4:7 نُوں پڑھو۔
12. مُردیاں دے جی اُٹھن دی اُمید توں ایوب نُوں حوصلہ کیویں ملیا ہوئے گا؟
12 سانوں پکی اُمید رکھنی چاہی دی اے کہ یہوواہ مُردیاں نُوں زندہ کرے گا۔ جیویں کہ اَسی پچھلے مضمون چ ویکھیا کہ شیطان موت دا ڈر استمال کر کے سانوں یہوواہ توں دُور کرن دی کوشش کردا اے۔ شیطان نے دعویٰ کیتا سی کہ ایوب اپنی جان بچان لئی اپنا سارا کجھ قربان کر دَوے گا۔ ایتھوں تک کہ یہوواہ نال اپنی دوستی نُوں وی۔ پر شیطان غلط سی۔ ایوب اوہدوں وی یہوواہ دا وفادار رہیا جدوں اوہنوں لگ رہیا سی کہ اوہ مر جائے گا۔ اوہنوں پورا بھروسا سی کہ یہوواہ بڑا مہربان اے۔ ایوب نُوں ایس اُمید توں مشکلاں سہن دی طاقت ملی کہ یہوواہ آخرکار اوہدے حالات ٹھیک کر دَوے گا۔ نالے اوہدا پکا ایمان سی کہ جے اوہدے جیوندے جی یہوواہ نے سب کجھ ٹھیک نہ وی کیتا تے اوہ مستقبل چ اوہنوں زندہ کر دَوے گا۔ ایوب وانگوں جے اَسی وی مُردیاں دے جی اُٹھن دی اُمید تے پورا بھروسا رکھاں گے تے موت دا ڈر وی سانوں یہوواہ توں دُور نئیں کر سکے گا۔
13. شیطان نے ایوب تے جیہڑیاں چالاں چلیاں سانوں اوہناں تے کیوں غور کرنا چاہی دا اے؟
13 شیطان نے ایوب تے جیہڑیاں چالاں چلیاں سانوں اوہناں تے غور کرنا چاہی دا اے کیونکہ اوہ ساڈے خلاف وی ایہو جہیاں چالاں چلدا اے۔ شیطان نے ایہہ دعویٰ کیتا سی کہ انسان، نہ کہ صرف ایوب اپنی جان دی خاطر اپنا سب کجھ دے دَوے گا۔ (ایوب 2:4، 5) اِک طرحاں نال شیطان نے ساڈے اُتے ایہہ اِلزام لایا اے کہ اَسی دلوں یہوواہ نُوں پیار نئیں کردے تے اَسی اپنی جان بچان لئی اوہدے توں موُنہہ پھیر لواں گے۔ شیطان نے ایہہ دعویٰ وی کیتا اے کہ یہوواہ ساڈے نال پیار نئیں کردا۔ اَسی اوہنوں خوش کرن لئی جو وی کرنے آں اوہدی نظر چ اوہ سب کجھ بیکار اے۔ شیطان دِیاں چالاں بارے سانوں پہلاں توں ای دس دِتا گیا اے۔ ایس لئی اَسی اوہدیاں جھوٹھیاں گلاں تے یقین کرن دی بجائے یہوواہ تے اُمید لائی رکھاں گے۔
14. جدوں ساڈے تے مشکلاں آندیاں نیں تے ساڈے بارے کیہڑی گل ظاہر ہوندی اے؟ مثال دے کے سمجھاؤ۔
14 ایوب تے جدوں مشکلاں آئیاں تے اوہ اپنیاں کمیاں کمزوریاں نُوں پچھان سکیا تے اوہناں نُوں سدُھار سکیا۔ مثال لئی، ایوب نے ویکھیا کہ اوہنوں ہور خاکسار بنن دی ضرورت اے۔ (ایوب 42:3) جدوں ساڈے تے مشکلاں آندیاں نیں تے سانوں پتہ چلدا اے کہ سانوں کتھے بہتری لیان دی ضرورت اے۔ ذرا بھرا نکولائے دی مثال تے غور کرو۔ c اوہدی صحت بوہت خراب سی، پر فیر وی اوہنوں جیل چ پا دِتا گیا۔ اوہنے دَسیا: ”جیویں اِک ایکسرے نال جسم دے اندر دی بیماری پتہ چلدی اے اوسے طرحاں جیل چ رہ کے میں ویکھ سکیا کہ مینوں اپنے اندر کیہڑیاں خوبیاں نُوں نکھارن دی ضرورت اے۔“ جدوں سانوں پتہ چل جاندا اے کہ ساڈے اندر کیہڑیاں خامیاں نیں تے فیر اَسی اوہناں نُوں ٹھیک کر سکنے آں۔
15. سانوں کدی گل سننی چاہی دی اے تے کیوں؟
15 سانوں یہوواہ دی گل سننی چاہی دی اے نہ کہ اپنے دُشمناں دی۔ جدوں یہوواہ نے ایوب نال گل کیتی تے ایوب نے اوہدی گل بڑے دھیان نال سنی۔ خدا نے ایوب نُوں کجھ ایہو جہے سوال پچھے جنہاں دی مدد نال اوہ سمجھ پایا کہ خدا نُوں اوہدی کِنّی فکر اے۔ خدا نے اِک لحاظ نال اوہنوں پچھیا: ”کیہہ تینوں میریاں بنائیاں ہوئیاں چیزاں نُوں ویکھ کے اندازہ نئیں ہوندا کہ میں کِنّاں طاقتور آں؟ مینوں پتہ اے تیرے تے کیہہ بیت رہی اے۔ کیہہ تینوں نئیں لگدا کہ میں تیرا خیال رکھ سکنا واں؟“ ایوب نے یہوواہ دِیاں برکتاں لئی دِلوں قدر وکھائی تے خاکساری نال اوہنوں جواب دیندے ہوئے کہیا: میرے کناں نے تیرے بارے سُنیا اے، پر ہُن میں اپنی اَکھیں تینوں ویکھنا واں۔ (ایوب 42:5) ایوب نے شاید ایہہ گل اوہدوں کہی جدوں اوہ سواہ چ بیٹھا ہویا سی تے اوہدا پورا جسم پھوڑیاں نال بھریا ہویا سی۔ اوہ حالے وی اپنے بچیاں دی موت دا سوگ منا رہیا سی۔ پر اوس ویلے یہوواہ نے اوہنوں یقین دَوایا کہ اوہ اوہنوں پیار کردا اے تے اوہدے توں خوش اے۔—ایوب 42:7، 8۔
16. یسعیاہ 49:15، 16 دے مطابق مشکلاں دے دوران سانوں کیہڑی گل یاد رکھنی چاہی دی اے؟
16 اَج شاید لوک ساڈی وی بےعزتی کرن تے ساڈے نال ایہو جیہا سلوک کرن جیویں اَسی بالکل بیکار آں۔ شاید اوہ سانوں یاں ساڈی تنظیم نُوں بدنام کرن دی کوشش کرن یاں ساڈے بارے جھوٹھیاں گلاں پھیلان۔ (متی 5:11) پر ایوب دے واقعے توں اَسی سکھ سکھنے آں کہ یہوواہ نُوں ساڈے تے بھروسا اے کہ اَسی مشکلاں دوران وی اوہدے وفادار رہواں گے۔ یہوواہ سانوں بوہت پیار کردا اے تے اوہناں لوکاں دا ساتھ کدی نئیں چھڈدا جیہڑے اوہدی آس رکھدے نیں۔ (یسعیاہ 49:15، 16نُوں پڑھو۔) خدا دے دُشمن ساڈے تے جیہڑے اِلزام لاندے نیں اوہناں تے دھیان نہ دَوو۔ تُرکی چ رہن والے جیمز ناں دے اِک بھرا تے اوہدے گھروالیاں تے سخت مصیبتاں آئیاں۔ اوہنے کہیا: ”اَسی سمجھ گئے ساں کہ جے اَسی یہوواہ دے بندیاں دے خلاف جھوٹھیاں گلاں سُناں گے تے ایہناں توں اَسی بےحوصلہ ہو جاواں گے۔ ایس لئی اَسی اپنا دھیان اپنی اُمید تے رکھیا کہ بوہت چھیتی خدا دی بادشاہی ساڈیاں مشکلاں نُوں ختم کر دَوے گی۔ نالے اَسی لگن نال یہوواہ دی خدمت کردے رہے۔ اِنج اَسی خوش رہ سکے۔“ ایوب وانگوں اَسی وی یہوواہ دی گل سننے آں۔ ساڈے دُشمناں دِیاں جھوٹھیاں گلاں کدی وی ساڈی اُمید نُوں ختم نئیں کر سکدیاں۔
تواڈی اُمید تواڈی طاقت اے
یہوواہ نے ایوب نُوں اوہدی وفاداری دا اَجر دِتا۔ ایوب تے اوہدی بیوی نے اِک لمی تے خوشیاں بھری زندگی گزاری۔ (پیراگراف نمبر 17 نُوں ویکھو۔) e
17. عبرانیوں 11 باب چ دِتیاں وفادار لوکاں دِیاں مثالاں توں اَسی کیہہ سکھنے آں؟
17 ایوب دے علاوہ یہوواہ دے ہور وی بوہت سارے بندے مشکلاں دے باوجود مضبوط رہے تے ہمت نئیں ہاری۔ عبرانیوں دے ناں خط چ پولُس نے کئی وفادار بندیاں دا ذکر کیتا تے اوہناں نُوں گواہواں دا اِک وڈا بدّل کہیا۔ (عبرانیوں 12:1) اوہناں ساریاں تے سخت مصیبتاں آئیاں سن، پر اوہ فیر وی ساری زندگی یہوواہ دے وفادار رہے۔ (عبرانیوں 11:36-40) کیہہ اوہناں نُوں ایہدا اَجر ملیا؟ جی بالکل۔ بھانویں کہ اوہناں نے اپنے جیوندے جی یہوواہ دے سارے وعدیاں نُوں پورا ہوندیاں نئیں ویکھیا، پر فیر وی اوہناں نے اوہدے تے آس رکھی۔ اوہناں نُوں پورا یقین سی کہ یہوواہ اوہناں توں خوش اے۔ ایس لئی اوہناں دی اُمید پکی سی کہ اوہ یہوواہ دے وعدیاں نُوں پورا ہوندیاں ضرور ویکھن گے۔ (عبرانیوں 11:4، 5) اوہناں دی مثال توں ساڈا ایہہ ارادہ پکا ہوندا اے کہ اَسی وی یہوواہ تے اُمید لائی رکھاں گے۔
18. تُسی کیہہ کرن دا ارادہ کیتا اے؟ (عبرانیوں 11:6)
18 اَج دُنیا دے لوک بد توں بدتر ہوندے جا رہے نیں۔ (2-تیمُتھیُس 3:13) نالے شیطان نے وی یہوواہ دے بندیاں نُوں اَزمانا نئیں چھڈیا۔ فیر وی آؤ پکا ارادہ کرئیے کہ ساڈے تے بھانویں جیہڑیاں مرضی مشکلاں آن اَسی جیجان نال یہوواہ دی خدمت کردے رہواں گے کیونکہ اَسی زندہ خدا تے اُمید رکھنے آں۔ (1-تیمُتھیُس 4:10) یاد رکھو کہ یہوواہ نے ایوب نُوں جیہڑا اَجر دِتا سی اوہدے توں ایہہ ثابت ہوندا اے کہ اوہ بوہت ای رحمدل تے شفیق اے۔ (یعقوب 5:11) دُعا اے کہ اَسی وی یہوواہ دے وفادار رہیے تے ایس گل دا پکا یقین رکھئے کہ اوہ اوہناں ساریاں نُوں اَجر دَوے گا جیہڑے لگن نال اوہدی خدمت کردے نیں۔—عبرانیوں 11:6 نُوں پڑھو۔
گیت نمبر 150: نجات پان لئی یہوواہ تے آس لگاؤ
a جدوں اَسی اِک ایہو جہے بندے بارے سوچنے آں جیہڑا سخت مشکلاں دے باوجود یہوواہ دا وفادار رہیا، تے اکثر ساڈے ذہن چ ایوب دا خیال آندا اے۔ اَسی اوہدی مثال توں کیہہ سکھ سکنے آں؟ اَسی سکھنے آں کہ شیطان سانوں یہوواہ نُوں چھڈن لئی مجبور نئیں کر سکدا۔ اَسی ایہہ وی سکھنے آں کہ یہوواہ ساڈے حالاتاں نُوں چنگی طرحاں جان دا اے۔ جیویں یہوواہ نے ایوب دِیاں مصیبتاں نُوں ختم کیتا سی اوسے طرحاں اوہ ساڈیاں مصیبتاں نُوں وی ختم کر دَوے گا۔ جے اَسی اپنے کماں توں ثابت کراں گے کہ سانوں ایہناں گلاں تے پورا یقین اے تے اَسی اوہناں لوکاں چ شامل ہونواں گے جیہڑے ”یہوواہ دی آس“ رکھدے نیں۔
b اِصطلاح دی وضاحت: جیس عبرانی لفظ دا ترجمہ ”آس“ کیتا گیا اے اوہدا مطلب اے بےصبری نال کسے دا اِنتظار کرنا۔ نالے ایہدا مطلب کسے تے بھروسا کرنا وی اے۔—زبور 25:2، 3؛ 62:5۔
c ایس مضمون چ کجھ ناں بدل دِتے گئے نیں۔
