STUDU 27
‘Pera na Jeova’
‘Pera na Jeova, bu ten koraẑen, bu fortifika bu korson.’ — SAL 27:14.
KANTIKU 128 Persevera Até ao Fim
KE KU NO NA BIN FALA DEL *
1. (a) Kal speransa ku Jeova danu? (b) Ke ku signifika ‘pera na Jeova’? (Jubi “Palabra ku Splikadu.”)
JEOVA da un speransa bonitu pa tudu kilis ku amal. I ka na tarda, i na kaba ku duensa ku dur i ku mortu. (Apok 21:3, 4) I na juda “jintis mansu” ku tene speransa nel pa e torna Tera na un paraísu. (Sal 37:9-11) I na fasi pa kada un son di nos tene un amisadi intimu ku el, ku na sedu mas minjor di ki kil ku no tene aos. Es i un speransa bonitu dimas! Ma, kal provas ku no tene di fia di kuma, purmesas di Deus na bin kumpri? Jeova sempri ta kumpri ke ku i purmiti. Pa kila, no tene bon motivu di ‘pera na Jeova’. * (Sal 27:14) No ta mostra kila, ora ku no pera ku pasensa, ku alegria pa no Deus kumpri purmesas ki fasi. — Isa 55:10, 11.
2. Ke ku Jeova fasi ja?
2 Jeova mostra ja di kuma, i ta kumpri si purmesas. Jubi un isemplu garandi ku ta mostra kila. Na livru di Apokalipsi, Jeova purmiti di kuma na no tempu, i na tisi jintis di tudu nason, rasa ku lingua i junta elis pa e pudi sirbil na union. Aos, es grupu spesial di jintis kunsidu suma “garandi multidon”. (Apok 7:9, 10) Apesar di kuma es grupu tene tudu tipu di omis, minjeris ku mininus di tudu parti di mundu, e sedu un familia ku tene pas. (Sal 133:1; Jon 10:16) Kilis di garandi multidon ta pega tesu na pregason. Tambi e ta sta sempri pruntu pa fala di speransa ke tene di un mundu minjor pa kualker algin ku na sukuta elis. (Mat 28:19, 20; Apok 14:6, 7; 22:17) Si bu fasi parti di garandi multidon, sin duvida, speransa di kusas minjor ku na bin, tene balur garandi pa bo.
3. Ke ku Satanas misti pa bu fia nel?
3 Diabu ka misti pa bu tene speransa pa futuru. I misti pa bu fia di kuma, Jeova ka ta preokupa ku bo, tambi i ka na kumpri si purmesas. Si Satanas konsigi punu pirdi speransa, no na pirdi koraẑen, te mesmu no pudi para sirbi Jeova. Suma ku no na bin oja, Diabu tenta pui Jo pirdi si speransa i fasil pa i para sirbi Jeova.
4. Ke ku no na fala del nes studu? (Jo 1:9-12)
4 Nes studu, no na fala di kuma ku Satanas tenta forsija Jo pa i ka sedu fiel pa Jeova. (Lei Jo 1:9-12.) No na fala tambi di ke ku no pudi aprindi di isemplu di Jo i pabia ku no pirsisa di lembra kuma, Deus amanu, i na bin kumpri si purmesas.
SATANAS TENTA PUI JO PIRDI SPERANSA
5-6. Ke ku pasa ku Jo na puku tempu?
5 Jo staba na vivi sabi. I teneba un amisadi intimu ku Jeova. I teneba un familia garandi, filis, i teneba manga di rikesa. (Jo 1:1-5) Ma, so na un dia, Jo pirdi kuas tudu. Purmeru, i pirdi si limarias. (Jo 1:13-17) Dipus, tudu si fijus ki ama muri. Pensa un bokadu nes kasabi. Papes ku mames ta sinti un kasabi garandi na se korson si un di se fijus muri. Gosi imaẑina dur garandi, tristesa ku kasabi na korson, ku Jo ku si minjer sinti oca ke obi kuma tudu se des fiju muri. I ka di dimira, ku tristesa Jo rumpi si ropa i kai na con! — Jo 1:18-20.
6 Dipus, Satanas fasi pa Jo paña un duensa ku ta de risu ku ta pul burguñu. (Jo 2:6-8; 7:5) Antis des kusas kontisi, jintis rispitaba Jo ciu. E ta baiba buska konsiju na si mon. (Jo 31:18) Gosi, e ta kuri del. E lunjusi del. Si ermons, si amigus intimu, te mesmu si servus bandonal! — Jo 19:13, 14, 16.
Manga di ermons ku irmas aos pudi ntindi diferentis kasabi di Jo, pabia e pasa mesmu situasons difisil. (Jubi paragrafu 7) *
7. (a) Jo pensa kuma i staba na sufri pabia di ke, ma ke ki i nega fasi? (b) Kuma ku un kriston pudi pasa un situason difisil, suma kil ku sta na diseñu des paragrafu?
7 Satanas mistiba pa Jo fia di kuma, i staba na sufri pabia Jeova paña raiba del. Pur isemplu, Satanas usa un turbada garandi pa bati kasa, nunde ku tudu des fiju di Jo staba na kume juntu. (Jo 1:18, 19) Tambi i manda fugu di seu i mata limarias di Jo juntu ku tarbajaduris ku ta kuida delis. (Jo 1:16) Suma turbada ku fugu bin di seu, Jo pensaba kuma e bin di Jeova Deus. Pabia di kila, Jo fia di kuma i dibi di fasi un kusa ku pui Jeova fika mal ku el. Mesmu asin, Jo nega fala mal kontra si Pape ku sta na seu. Jo rikuñisi di kuma, pa manga di anus i risibi manga di bon kusas di Jeova. Pa kila, i pensa di kuma suma i kontenti pa manera ki risibi bon kusas, i dibi di seta tambi risibi mau kusas. I fala sin: ‘Pa nomi di Jeova ngabadu!’ (Jo 1:20, 21; 2:10) Mesmu manera ku Jo pirdi si diñeru, si fijus, si saudi, i kontinua sedu fiel pa Jeova. Ma, Satanas tenta usa utru kusa mas.
8. Kal utru kusa ku Satanas usa kontra Jo?
8 Satanas usa tris jintis ku finji sedu amigus di Jo, pa pui Jo fia di kuma i ka bali nada. Es omis fala di kuma, Jo staba na sufri pabia i fasi manga di kusas ku ka bali. (Jo 22:5-9) Tambi e tenta fasil fia di kuma, i ka mporta kantu bon kusas ki fasi, pa Deus ki sforsus ki fasi ka bali nada. (Jo 4:18; 22:2, 3; 25:4) E staba na tenta fasi Jo pensa di kuma, Deus ka amal, i ka na kuida del, di kuma i ka bali pena sirbil. Es palabras pudi leba Jo pensa di kuma, i ka ten ja speransa pa si situason.
9. Ke ku juda Jo sedu koraẑosu i forti?
9 Pensa so nes. Jo sinta na sinza ku dur ku ka ta para. (Jo 2:8) Si kumpañeris kontinua na falal di kuma, el i ka bon algin i tudu ke ki fasiba ka tene balur. Purblemas ki sta na pasa i suma kargu pisadu na si ombra. Riba di kila, i sta ku dur na korson di pirdi si fijus. Na kumsada, Jo kala. (Jo 2:13–3:1) Si es omis ku finji sedu amigus di Jo pensa di kuma manera ku Jo kala i na bandona Jeova, e sta nganadu. I ciga un mumentu, nunde ku talves Jo yalsa si kabesa, i jubi si falsus amigus na uju, i fala: “N ka na nega ña bardadi tok N muri.” (Jo 27:5) Ke ku juda Jo sedu koraẑosu i forti apesar di tudu ke ki i sufri? Mesmu oca i staba disanimadu dimas, nunka i pirdi speransa di kuma si Deus ku amal, na kaba ku si sufrimentu. I sibiba kuma mesmu si i muri, Jeova na lantandal. — Jo 14:13-15.
KUMA KU NO PUDI KOPIA JO?
10. Ke ku storia di Jo ta nsinanu?
10 Storia di Jo ta nsinanu di kuma, Satanas ka pudi forsijanu bandona Jeova, i di kuma Jeova sibi tudu ke ku sta na pasa. Ke ku Jo pasa pudi tambi judanu ntindi diritu asuntus ku sta nvolvidu. Jubi alguns lisons pratiku ku no pudi aprindi di Jo.
11. Kal sertesa ku no pudi tene, si no kontinua konfia na Jeova? (Tiagu 4:7)
11 Jo mostra di kuma, si no kontinua konfia na Jeova, no na konsigi nguenta kualker purblema i sai ben na luta kontra Satanas. Kal ku na sedu rusultadu? Biblia garantinu di kuma, Diabu na kuri di nos. — Lei Tiagu 4:7.
12. Kuma ku speransa di resureison fortalisi Jo?
12 No pirsisa di tene fe forti na resureison. Suma ki faladu na studu ku pasa, manga di bias, Satanas ta usa medu di mortu pa tenta punu para sirbi Jeova. Na kasu di Jo, Satanas fala di kuma Jo na fasi kualker kusa, te mesmu para sirbi Jeova pa salva si vida. Satanas staba nganadu. Mesmu oca Jo pensaba di kuma i na muri, i kontinua manti fiel pa Jeova. Si konfiansa na bondadi di Jeova i si speransa forti di kuma Jeova na pui pa kusas minjoria, judal nguenta. Jo teneba fe di kuma, nin si Jeova ka judal nkuantu i staba na vivi, I na bin lantandal na futuru. Pa Jo, speransa di resureison i un kusa di bardadi ku na bin sedu. Pa nos tambi, si es speransa sedu un kusa di bardadi i ku na bin sedu, te mesmu ameasa di mortu ka na punu para sirbi Jeova.
13. Pabia ku no pirsisa di sta atentu ku ke ku Satanas fasi Jo?
13 No dibi di sta atentu ku ke ku Satanas fasi kontra Jo, pabia i ta usa mesmu kusa kontra nos aos. Nota akusason ku Satanas fasi: “Omi [i ka so Jo] ta da tudu ki tene pa guarda si vida.” (Anos ku pui italiku, Jo 2:4, 5) Pa kila, Satanas fala di kuma na bardadi no ka ama Jeova Deus, di kuma no na para sirbil si kontra kila na salva no vida. Satanas fala mas di kuma Deus ka amanu, i di kuma i ka ta nteresa ku sforsu ku no ta fasi pa kontental. Suma no sibi ke ku Satanas sta na tenta fasi, no ka ta fia na si mintidas.
14. Kuma ku situasons difisil pudi judanu sibi kal tipu di algin ku no sedu? Da isemplu.
14 No dibi di oja situasons difisil suma un oportunidadi di kunsi no kabesa. Situasons difisil ku Jo pasa, judal sibi kal ki si pontus fraku i kuriẑi elis. Pur isemplu, Jo nota di kuma i pirsisa di sedu mas umildi. (Jo 42:3) Anos tambi, no pudi aprindi ciu aserka di no kabesa, ora ku no na pasa situason difisil. Un ermon di nomi Nikolay, * pudu na prison apesar di i sta na sufri purblemas gravi di saudi. I fala sin: “Prison i suma raiu-x, ku ta mostra maneras di sedu ku un kriston tene dentru del.” Ora ku no diskubri kal ki no pontus fraku, no dibi di sforsa pa kuriẑi elis.
15. Kin ku no dibi di sukuta i pabia di ke?
15 No pirsisa di sukuta Jeova, i ka no inimigus. Jo sukuta Jeova diritu oca ki na papia ku el. Deus fasiba Jo purguntas ku fasil pensa. I suma si falal: ‘Bu oja ña puder na kusas ku N kumpu? N oja tudu ke ku sta na pasa ku bo. Bu pensa kuma N ka pudi kuida di bo?’ Ku umildadi i ku gardisimentu garandi pa bondadi di Jeova, Jo ruspundi. I fala sin: “Ami N kunsiuba son pa kil ku N obi, ma gosi ña uju ojau.” (Jo 42:5) Parsi kuma, oca ku Jo fala es palabras i staba sintadu na sinza ku cagas na tudu partis di kurpu, tambi i na coraba si fijus ku muri. Mesmu asin, Jeova mostra Jo di kuma I amal, I dal garantia di kuma i tene Si fabur. — Jo 42:7, 8.
16. Di akordu ku Isaias 49:15, 16, ke ku no dibi di lembra del ora ku no na pasa situasons difisil?
16 Aos tambi, jintis pudi kobanu mal i tratanu suma si no ka tene balur. E pudi tenta dana no nomi o nomi di no organizason, i “konta mintida kontra” nos. (Mat 5:11) Isemplu di Jo nsinanu di kuma, Jeova fia di kuma no na kontinua fiel ora ku no na pasa situasons difisil. Jeova amanu, nunka i ka na bandona kilis ku pera nel. (Lei Isaias 49:15, 16.) Ka bu sukuta nin un informason ku ta dana no nomi, ku ta kontadu pa inimigus di Deus! James, un ermon na Turkia ku si familia pasa situasons difisil, fala sin: “No oja di kuma, sukuta mintidas aserka di povu di Deus, na pui pa no disanima. Pa kila, no konsentra na speransa di Renu i no manti ativu na sirvisu di Jeova. Suma rusultadu, no manti no alegria.” Suma Jo, no ta sukuta Jeova! Mintidas di no inimigus ka ta kaba ku no speransa.
BU SPERANSA NA JUDAU NGUENTA
Jeova bensua Jo pabia di si fidelidadi. Jo ku si minjer vivi filis pa manga di tempu. (Jubi paragrafu 17) *
17. Ke ku bu aprindi di isemplu di omis ku minjeris fiel ku faladu del na Ebreus kapitulu 11?
17 Jo i ka uniku servu di Jeova ku kontinua koraẑosu i forti duranti situasons difisil. Na si karta pa Ebreus, apostulu Paulu fala di manga di utrus servus fiel, i coma elis di “tustumuñas ku rodianu suma nuven.” (Eb 12:1) Elis tudu e pasa situasons difisil, ma, duranti tudu se vida e kontinua fiel pa Jeova. (Eb 11:36-40) Sera ki manera ke nguenta, tambi tarbaju duru ke fasi, i suma nada? Klaru ki nau! Mesmu se ka oja kumprimentu di tudu purmesas di Deus duranti se vida, e kontinua pera na Jeova. Suma e tene sertesa di kuma e tene fabur di Jeova, e tene konfiansa di kuma, e na bin oja purmesa di Jeova kumpri. (Eb 11:4, 5) Se isemplu pudi fortalisi no disison di kontinua pera na Jeova.
18. Ke ku bu sta disididu pa fasi? (Ebreus 11:6)
18 Aos, no sta na vivi na un mundu ku sta na bai di mal pa pior. (2 Tim 3:13) Satanas ka kaba inda testa povu di Deus. I ka mporta difikuldadis ku no na bin pasa, pa anos tudu no sta disididu pa sirbi Jeova di tudu korson, ku konfiansa di kuma “no pui no speransa na Deus bibu”. (1 Tim 4:10) I lembra, bensons ku Deus da Jo ta mostra di kuma, Jeova “ta sinti garandi pena ku miserikordia.” (Tiagu 5:11) Pa anos tambi no kontinua sedu fiel pa Jeova i tene sertesa di kuma, i na da pagamentu “pa kilis ku buskal.” — Lei Ebreus 11:6.
KANTIKU 150 Procurem a Deus Para Obter Livramento
^ Ora ku no na pensa na un algin ku nguenta situasons difisil dimas, manga di bias no ta pensa na Jo. Ke ku no pudi aprindi di isemplu des omi fiel? No aprindi di kuma Satanas ka pudi forsanu bandona Jeova. No aprindi tambi di kuma Jeova sibi tudu ke ku sta na pasa ku nos. Suma ku Jeova kaba ku purblemas di Jo, un dia I na bin kaba tambi ku tudu ke ku ta punu sufri. Si no mostra atraves di no asons di kuma no sta konvensidu di tudu no korson nes ku faladu, no na sta entri kilis ku na bardadi ‘pera na Jeova.’
^ PALABRA KU SPLIKADU: Palabra ebraiku ku traduzidu “pera” signifika pera un kusa ku diseẑu forti. Tambi i pudi transmiti ideia di konfia na un algin. — Sal 25:2, 3; 62:5.
^ Alguns nomi mudadu.
