1. 1) ¿Imacunatataj Jehová aunimashcanchi? 2) ¿Ima nishwantaj Jehovalaman yäracur shuyaranapaj? (Notatapis ricäriy).

 TAYTALANCHI Jehovaga payta cuyajcunatami aunimanchi ichiclacho tucuy gueshyacunata, laquicuyta y wanuytapis ushacächinanpaj (Apoc. 21:3, 4). Payman yäracojcunataga yanapanga cay Pachata juc shumaj paraisuman ticrachinanpaj (Sal. 37:9-11). Nircur runacunata yanapanga paywan ali amigo capäcunanpaj y chayga cananpitapis más ali canga. ¡Mayraj chay junaj chayamunanpaj shuyaraycanchi! ¿Y imanirtaj seguro caycanchi Jehová aunimashganchita cumplinanpaj? Payga lapan aunicushganta imaypis cumplinmi (Sal. 27:14). * Chaymi payman yäracur shuyaraycanchi prometimashganchicunata chasquinapaj. ¿Y imano cawacurtaj chayta ruranchi? Pacienciacoj captinchi y cushi cushila shuyaraptinchi Jehová aunishgancunata cumplinanpaj (Is. 55:10, 11).

2. ¿Imatataj Jehová rurashgana?

² Jehová mayna ricächicurgan aunicushgancunata cumplishganta. Mä ricärishun. Payga Apocalipsis librucho aunicurgan may chay naciuncunapita, tucuy tribucunapita, y tucuy rimaycunapita runacunata shuntananpaj paylata adurapäcunanpaj; y chaytami canan ricaycanchi cumplicushganta. Chaypita parlarmi Biblia nin “yupaytapis mana atipaypaq”  runacuna cashganta (Apoc. 7:9, 10). Jehovata aduraj runacuna, warmicuna, wamracuna, tucuy coloryoj carpis, ima idiumata parlarpis y may chaypita carpis lapancuna juc yarpayla Jehovata adurapäcun (Sal. 133:1; Juan 10:16). Jina cushi cushila Diospita yachachipäcun y imaypis listo carcaycan waquincunata parlapänanpaj shamoj tiempucho caway imano cananpaj cajpita (Mat. 28:19, 20; Apoc. 14:6, 7; 22:17). Gampis cay Pachacho cawanayquipaj Jehová aunicushganta shuyaraycarga, alapachi cushichishunqui.

3. ¿Ima creichimänanchipätaj Satanasga munan?

³ Diabluga imaycacunatami ruran Jehovaman mana yäracunapaj. Payga creichimänanchipaj munan Jehová mana cuyamashganchita y aunicushgancunata mana cumplinanpaj cajtapis. Jehovaman yäracushganchita Satanás ushacächiptenga imatapis manchacur calpaynaj ricacushpanchi Jehovata sirviytapis jaguirishwanchi. Y Diabluga chaytami munargan Jobta pasananpaj Jehovata manana adurananpaj.

4. ¿Imacunatataj canan yachacushun? (Job 1:9-12).

⁴ Cay yachachicuychoga ricashun imacunataj Satanás rurargan Job Jehovaman manana yäracunanpaj (leiriy Job 1:9-12). Jina yachacushun Job rurashganpita imataj yachacunchi y imanirtaj ama gongashunchu Jehová cuyamashganchita y promesancunatapis cumplinanpaj cajta.

5, 6. ¿Job ali cawacuycaptin ilajpita imataj pasargan?

⁵ Jobga ali cawacuycargan, payga Jehovapa ali amigun cargan, wamrancuna y imaycancunapis achca cargan (Job 1:1-5). Pero ilajpita juc junajlacho casi lapanta ograycurgan. Puntataga imaycancunata ograshga (Job 1:13-17). Nircur lapan cuyashga wamrancuna wanurgan. Job imano ricacushganman yarparcushun. ¿Manachu juc wamra wanucuptenga taytancuna alapa laquicärin? Chaynolami Jobwan warminpis masrächi laquicärergan y shonguncunapis nanaycurganrächi chunca wamrancuna wanucushganta musyarir. ¡Chaychi Jobga ropanta rachir laquicushpan “pampaman lätakuykur” wagargan! (Job 1:18-20).

⁶ Chaypita Satanasga Jobta gueshyachergan manchariypaj guericunawan y mana valishganno ricacunanpaj munargan (Job 2:6-8; 7:5). Jobtaga pïmaypis respetaj y consejananpäpis ashej (Job 31:18). Pero gueshyawan captin runacunaga ricaytapis munajchu, pipis cäsupajchu y contrantami parlapäcoj. Wauguincuna, amiguncuna y ashmaynincunapis payta melanajmi (Job 19:13, 14, 16).

7. 1) ¿Imataj yarpargan Job nacashgancunapita, y imataj mana rurarganchu? 2) ¿Imacunapataj juc cristiano pasanman Jobta pasashganno? (7 caj parrafupa dibujuta ricäriy).

⁷ Satanasga Jobta creichiyta munargan Jehová manana cuyashganta. Chaymi Jobpa chunca wamrancuna wasincho ali micurcaycaptin ilajpita shucucuy wayrawan wasita juchuchergan janancunaman (Job 1:18, 19). Chaypitapis räyuta pashtachimur ninawan ushacächergan Jobpa uywancunata michejnintinta (Job 1:16). Chay shucucuy wayra y ninaga manami jinaylapitachu yurimushga. Job yarpargan chaycuna Jehovapita shamushganta. Paypa contrancho imatapis ruraycashgantachi yarpargan. Chayno captinpis, Jobga manami maldiciunarganchu Diosninta. Payga cuentata gocurgan lapan cawaynincho Jehová alicunata goycushganta.  Chauraga alicunata chasquishganno, mana alicunatapis chasquinanpaj decidido caycargan. Chaymi nergan: “¡TAYTA DIOSGA fiyupa alabasha cachun!” (Job 1:20, 21; 2:10). Imaycancuna mana captin, wamrancuna wanushga captin y gueshyaycaptinpis Jobga Jehovalaman yäracur caycargan. Pero Satanasga manami chaylatachu rurargan.

8. ¿Ima mastataj Satanás rurashga Jobta nacachinanpaj?

⁸ Satanasga Job mana valishganta yarpänanpaj munargan. Chaytaga rurargan quimsa ali tucoj amiguncunawan. Chay runacunaga Jobpita manacajcunata parlargan, mana alita rurashganraycur nacashganta nipäcurgan (Job 22:5-9). Jobta creichiyta munargan mana alicunata mana rurashga carpis Diosta cushichiyta mana puedinanpaj ali runa captinpis (Job 4:18; 22:2, 3; 25:4). Paycunaga munapäcurgan Job yarpänanpaj Jehová mana cuyashganta, mana täpashganta y Diosta sirvishganga yangalapaj cashganta. Chay runacuna nipäcushganga Jobta yarpächirganchi nacaycarla wanucunanpaj.

9. ¿Imataj Jobta yanapargan calpata tarinanpaj y mana manchacunanpaj?

⁹ Jobman yarparcushun. Payshi uchpa janancho jamaraycan y goyaypa chacaypapis nanaywan nacaycan (Job 2:8). Ali tucoj amiguncunaga imaycacunata Jobpita parlapäcun, pay mana valishganno ricacunanpaj. Chay jinanpa pasaycar Jobga calpaynaj ricacun y wamrancuna wanushganpita shongunpis nanaycunrämi. Payga upälala cacun (Job 2:13–3:1). Chayta ricaycur ali tucoj amiguncunaga yarpapäcurganchi Jehovapa contranta rimananpaj, ichanga chaynochu cargan. Chaypita Job paycunata ricarchi nergan ‘¡cawaycashgäcamaga Jehovata manami cachaycushächu!’ nir (Job 27:5). ¿Imataj Jobta yanapargan calpata tarinanpaj y mana manchacunanpaj chay sasacunapa pasaycarpis?  Payga musyarganmi Jehová imanolapapis yanapänanpaj. Jobga seguro caycargan wanunanpaj captinpis Jehová cawarachimunanpaj (Job 14:13-15).

10. ¿Imataj yachachimanchi Job pasashganpita?

¹⁰ Jobta pasashganga yachachimanchi Satanasga manami camäpacunchu obligamänanchipaj Jehovata cachaycunapaj, Diosninchega altanto caycan ima pasamashganchipita. Job imapa pasashganpitaga mastarämi yachacunapaj caycan. Waquilanlata ricärishun.

11. ¿Imataj pasanga Jehovaman imaypis yäracuptinchega? (Santiago 4:7).

¹¹ Job rurashganpitaga yachacunchi Jehovaman imaypis yäracuptinchega ima pruebacunatapis aguantashunmi y Satanaspa contranchopis churacäshunmi. Chayta ruraptinchega Bibliaga nin Satanás aywacongami (leiriy Santiago 4:7).

12. ¿Imanotaj Jobta yanapargan wanushgacuna cawarimunanpaj cajta musyar?

¹² Jobno yäracushwanmi imaylapis wanurga cawarimunapaj cajta. Guepa yachachicuycho ricashganchinopis Satanasga munan wanuyta manchacur Jehovata sirviyta jaguirinapaj. Y chaytami munargan Job rurananpaj. Satanasga nergan Job cawayninta salvananpajraycur imaycacunata rurananpaj, Jehovatapis mana sirvinanpäna. Ichanga manami chaynochu cargan. Job alapa nacaycar y wanunanpäna caycaptinpis Diospa contranman rimarganchu. Y ¿imanotaj chay lapanta aguantargan? Payga musyarganmi Jehová ali cashganta y yäracurgan tiempuwan chay lapanta alchacächinanpaj. Jobga seguro caycargan cawashgan wichan Jehová mana yanapaptinpis, shamoj tiempucho cawarachimunanpaj. Aumi, Jobga lapan shongunwanmi yäracurgan wanushgacuna cawarimunanpaj. Noganchipis chayman lapan shongunchiwan yäracuptinchega manami manchacushunchu wanunapaj captinpis.

13. ¿Imanirtaj ali canman tantiarcunapaj Jobta ima pruebacunata Satanás churashganta?

¹³ Alimi canman tantiarcunapaj ima pruebacunata Jobta Satanás churashganta, chaynolami canan wichanpis ruran. Satanasga manami Joblatachu tumpargan sinoga lapan runacunata. Cayno nergan: “Bïdanta salbanan-casha runaga imatapis ruranmanmi” (Job 2:4, 5). Chaywanga Satanás niycargan Jehovata cuyashganchega yangala cashganta y cawayninchita salvananchiraycur Jehovapa contranman churacänapaj. Jina creichimänanchipaj munan Jehová mana cuyamashganchita y payraycur lapan rurashganchicunaga mana valishgantano ricashganta. Jehovaman yäracojcunataga Satanás manami engañannachu, noganchega musyanchimi trampancuna ima cashganta.

14. Ima pruebacunapa pasarga, ¿imapitataj cuentata gocunchi, y pitaj chaypa pasargan?

¹⁴ Tucuy pruebacunapa pasarga yanapämanchi quiquinchi imano cashganchita musyanapaj. Jobpis sasacunapa pasarmi cuentata gocurgan imalachopis mejorananpaj cashganta. Jucmi cargan más humilde cananpaj (Job 42:3). Noganchipis pruebacunapa pasarga cuentata gocushunmi imacunacho aliyarcunapaj. Y chaypami pasargan Nikolái jutiyoj wauguilanchi, * pay pasaypa gueshyaycaptinpis carcelman wichgarachergan. Payga nin: “Carcelcho caycarga yanapäshunqui shonguyquicho ima cashganta musyanayquipaj y imacunacho mejoranapaj cashgantapis”. Diosta sirvishganchicho  imalachopis mejoranapaj captenga, ruranapämi calpachacushwan.

15. ¿Pitataj wiyacushwan, y imanir?

¹⁵ Jehovatami wiyacushwan, chiquimajninchicunata mana. Jobga Jehovatami shumaj wiyacurgan. Caynochi Jehovaga Jobta parlapargan tantiachinanpaj: “¿Camashgäcunacho ricashcanquichu munayniyoj cashgäta? Noga musyämi gam imacunapa pasashgayquita. Chauraga ¿manachuraj yanaparcöman?” nir. Jobnami ñanpu shongulanwan y Jehová ali cashganta agradecido cashpanmi cayno nergan: “Canancama gampäga wiyayllami wiyarä. Cananmi ichanga ñawëwan ricar rasunpa tantiyä imano cashantapis” (Job 42:5). Job chayno ninanpäga uchpa jananchorächi jamaraycargan, cuerpunpis achca guericunawan caycarganchi y wamrancunapäpis wagaycarganrächi. Chayno captinpis, Jehovaga Jobta musyachicurgan cuyashgantami y paypa ricaynincho alita ruraycashganta (Job 42:7, 8).

16. Isaías 49:15, 16 textucuna wilacushganno, ¿imataj ama gongashunchu pruebacunapa pasarga?

¹⁶ Canan wichanpis Jehovata sirvishganchipita runacunaga ashlipämashwanmi y mana alipa tratamashwanmi. Jina lulacur ima aycatapis parlacurinmanmi jutinchita ganratachinanpaj y Diospa marcan mana ali ricashga cananpaj (Mat. 5:11). Job pasashganga yachachimanchi Jehovaga noganchicunaman yäracun imayca pruebacunapa pasaptinchipis payta mana cachaycunapaj. Jehovaga cuyamanchimi y manami imaypis gongaycungachu payman yäracojcunata (leiriy Isaías 49:15, 16). Diospa chiquejnincuna  parlashgancunataga cäsupashwanchu. Turquiapita James jutiyoj wauguilanchi wilacamushganta ricärishun, payga familianwan sasa pruebacunapa pasashga. Payga nin: “Diospa marcanpa contrancho parlajcunata cäsupar imarga guelanacärëmanmi cargan. Chaypa trucanga Jehová aunimashganchicunaman yarpachacärej cä y payta jinalami sirvir carcaycargä, chayga cushichipäcamajmi”. Job rurashganno Jehovalatami wiyacushun. Chiquimajninchicuna lulacur parlashgancunaga, ¡Jehovaman yäracushganchita ushacächinmanchu!

17. ¿Imatataj yachacunchi Hebreos 11 caj capitulucho yäracoj runacunapita wilacushgan?

¹⁷ Jobno waquin Diospa sirvejnincunapis valiente capäcurgan y imayca pruebacunata aguantargan. Chaypita parlarmi apóstol Pablo hebreo cristianucunata cartacamushgancho nergan achca runacuna cashganta (Heb. 12:1). Paycuna imayca pruebacunaraycur alapa nacaycarpis yäracoj runacuna cashganpita Jehová paycunata ali ricargan (Heb. 11:36-40). Jehovapa lapan aunicuynincuna cumplicushganta mana ricaycarpis, jinalami payman yäracärergan. Y Jehová ali ricashganta musyar, paycuna seguro caycargan shamoj tiempucho ricänanpaj Jehová aunicushgancuna cumplicushganta (Heb. 11:4, 5). Paycuna rurashgancunaman yarpachacurga calpatami gomanchi Jehová prometimashganchicunata cumplinanpaj shuyaränapaj.

18. ¿Imatataj rurashwan shamoj tiempucho imacuna captinpis? (Hebreos 11:6).

¹⁸ Cay munduga más mana alimanmi chayanga (2 Tim. 3:13). Y Satanasga jinalami Diospa sirvejnincunata pruebacunata churaycanga. Chauraga shamoj tiempucho ima captinpis jinalami lapan shongunchiwan Jehovata sirviycäshun y “imayyaqpis kawaq Tayta Diosman yärakushpantsi” payga yanapämäshun (1 Tim. 4:10). Ama gongashunchu “Tayta Dios ali shonqu y kuyapäkuq kashpan” Jobta bendiciycushganta (Sant. 5:11). Chauraga Job rurashganno imaypis Jehovalata sirviycäshun, chayta rurashpanchega Jehová “payta ashiqkunata” bendiciycungami (leiriy Hebreos 11:6).