1. a) ¿Jehová Diosca ima esperanzacunatataj ñucanchijman cun? b) ¿Jehová Diospi confiashcata ricuchingapajca imatataj rurana canchij? (Notamantapishmi parlai tucungui).

 JEHOVÁ DIOSCA ñallami tucui ungüicunata, llaquicunata, huañuitapish tucuchinga (Apocalipsis 21:3, 4). Alli shungu gentecunatapish cai Allpata shuj Paraisota rurachunmi ayudanga (Salmo 37:9-11). Paraíso Allpapicarin Jehová Diospaj alli amigosmi cai tucushun. Jehová Diosca ñucanchijmanca cai alaja esperanzacunatami cun. Pero ¿Jehová Dios cusha nishcacunata pajtachinataca imamantataj seguros canchij? Jehová Diosca pai nishcacunataca siempremi pajtachin. Chaimantami paipi tucui shunguhuan confianchij (Salmo 27:14). * ¿Jehová Diospi tucui shunguhuan confiashcata ricuchingapajca imatataj rurana canchij? Pai nishcacunata pajtachingacamami pacienciahuan cushilla shuyashpa catina canchij (Isaías 55:10, 11).

2. ¿Jehová Diosca pajtachij cashcataca ima shinataj ña ricuchishca?

² Jehová Diosca pai nishcacunataca siempremi pajtachin. Shuj alli ejemplomanta parlashunchij. Jehová Diosca Apocalipsis libropica cai tucuri punllacunapi tucui laya llajtacunamanta, tucui laya razacunamanta, achca gentecunatami paita adorachun tandachisha nirca (Apocalipsis 7:9, 10). Cai profeciaca cai tiempopimi pajtaricun. Cunan punllacunapica chꞌican chꞌican llajtacunamanta, chꞌican chꞌican culturamanta caj achca cꞌaricuna, huarmicuna, huahuacunapishmi Jehová Diosta tandalla sirvicuncuna (Salmo 133:1;  Juan 10:16). Paicunaca tucuicunaman Diosmanta predicangapaj, Dios cusha nishcacunamanta predicangapajpish listosmi can (Mateo 28:19, 20; Apocalipsis 14:6, 7; 22:17). Canpish cai achcacunapuramanta cashpaca Dios cushca esperanzata charishcamantami cushilla sintiringui.

3. ¿Diabloca imatataj rurachun munan?

³ Diabloca Jehová Dios ñucanchijmanta mana preocuparishcata crichun, Dios cusha nishcacunata mana pajtachinatapish crichunmi munan. Diablo chashna pandachijpica fuerza illajmi saquirishun, Diosta sirvinatapishmi saquishun. Diabloca Jobtapish Dios cusha nishcacunapi ama crichun, Diosta sirvinata saquichunmi pandachisha nirca.

4. ¿Cai yachaipica imatataj yachashun?

⁴ Cai yachaipica Diablo, Jobta imacunallahuan pandachisha nishcatami ricushun (Job 1:9-12-ta liyipai). Ñucanchijpish Jobmanta imata yachai tucushcatami yachashun. Shinallataj Jehová Dios ñucanchijta cꞌuyashcata, Dios cusha nishcacunapi crina cashcatapishmi ricushun.

5, 6. ¿Jobca ima llaquicunallatataj ñapish charirca?

⁵ Jobca Jehová Diospaj alli amigomi carca. Shuj jatun tandalla familiatapishmi charirca. Cullquiyuj runapishmi carca (Job 1:1-5). Pero shuj punllallapimi ñapish tucuita chingachirca. Puntaca pai charishca tucui cosascunatami chingachirca (Job 1:13-17). Qꞌuipaca paipaj cꞌuyashca tucui huahuacunami huañurca. Pai ima shina sintirishcapi yuyashunchij. Shuj huahua huañujpica yaya mamaca achcatami llaquirincuna. Jobpish, paipaj huarmipish paicunapaj diez huahuacuna huañujpicarin dimastij llaquillami sintirishcangacuna. Achca llaqui sintirishcamantami Jobca paipaj churanatapish lliquishpa, uma ajchatapish raparishpa pambaman urmarca (Job 1:18-20).

⁶ Qꞌuipaca Diabloca Jobtaca millai ungüihuanmi unguchirca (Job 2:6-8; 7:5). Job alli cajpica gentecunaca paitaca respetajcunami carca. Consejotapish cuchunmi Jobpajman rijcuna carca (Job 31:18). Pero Job ungushca cashcamantami paipaj huauquicunapish, paipaj amigocunapish, familiacunapish, paita sirvijcunapish paitaca ña mana ricunayachirca (Job 19:13, 14, 16).

7. a) ¿Diabloca Job imatataj yuyachun munarca? b) ¿Tucuita mana alli intindishpapish Jobca imatataj mana rurarca? c) ¿Ñucanchijpish Job shinaca ima llaquicunatataj charinchij? (Párrafo 7-paj dibujomantapishmi parlai tucungui).

⁷ Diabloca, “Diosta pꞌiñachishcamantami cai llaquicunata charini” nishpa yuyachunmi Jobtaca crichisha nirca. Chaimantami jatun acapanata cachashpa Jobpaj diez huahuacuna cashca huasita urmachirca (Job 1:18, 19). Jahua pachamanta shuj ninata cachashpapish Jobpaj tucui animalcunata, paita sirvijcunatapishmi huañuchirca (Job 1:16). Cai jatun acapana, ninapish jahua pachamanta shamucujta ricushpaca Jobca “Diosmi cai llaquicunata cachacun” nishpami yuyarca. Chashna yuyashpapish Jobca mana pꞌiñarishpa Diostaca mana rimarcachu. Ashtahuanpish Jehová Dios paipaj tucui causaipi ima shina bendiciashcatami yuyarirca. Llaquicunata ahuantashpa catina cashcatapishmi intindirca. Chaimantami Jobca: “Mandaj Diosca alli nishca cachun” nirca (Job 1:20, 21;  2:10). Jobca cai tucui llaquicunata charishpapish Yayitu Diosta sirvishpami catirca. Pero chaita ricushpaca Diabloca Jobta llaquichishpami catirca.

8. ¿Diabloca Jobtaca ima shinataj desanimachisha nirca?

⁸ Diabloca quimsa mana alli amigocunatami Jobta desanimachichun cacharca. Paicunaca Jobtaca: “Can mana allicunata rurashcamantami cai llaquicunata charingui” nishpami juchachirca (Job 22:5-9). Shinallataj “Can allita rurajpipish Diosca mana valichinchu” nircacunami (Job 4:18; 22:2, 3; 25:4). Cai quimsa runacunaca Jehová Dios Jobta mana cꞌuyashcata, mana cuidashcata, Diosta sirvina mana importante cashcata yuyachunmi munarcacuna. Caicunata uyashpaca Jobca esperanza illajchari sintirirca.

9. ¿Jobca maimantataj fuerzasta japirca?

⁹ Job ima shina sintirishcapi yuyashun. Jobca ungushca cashcamantami ushpa jahuapi achca nanaihuan tiyacun (Job 2:8). Chashna cajpipish paipaj mana alli amigocunaca paimanta llullacunata nishpami desanimachincuna. Paipaj huahuacuna huañushcamantacarin Jobca achca llaquimi can. Callaripica Jobca upallami saquirin (Job 2:13–3:1). Paipaj mana alli amigocunaca Job upalla saquirishcata ricushpaca: “Jehová Diosta sirvinatami saquinga” nishpachari yuyancuna. Pero mana chashnachu can. Jobca paicunata ricushpaca: “Huañungacamami Diosta sirvishpa catisha” ninmi (Job 27:5, La Biblia. Traducción del Nuevo Mundo). ¿Jobca maimantataj fuerzasta japirca? Paica Jehová Dios ayudanatami tucui shunguhuan crirca. Shinallataj huañushpapish Dios causachinatapishmi tucui shunguhuan confiarca. Chaimantami fuerzasta japirca (Job 14:13-15).  

10. ¿Jobmantaca imatataj yachai tucunchij?

¹⁰ Jobpaj ejemplopi ricushca shinaca Diabloca Diosta sirvinata saquichunca mana obligai tucunchu. Ashtahuanpish Jehová Diosca tucui ñucanchijmantami achcata preocuparin. Jobmanta yachashpaca imamanta llaquicunata charishcataca allimi intindinchij. Cunanca Jobpaj ejemplota ima shina cati tucushcatami ricushun.

11. ¿Imamantataj Jehová Diospi confiana canchij?

¹¹ Ñucanchijpish llaquicunata ahuantangapajmi Job shina Jehová Diospi confiana canchij. Chashnami Diablopaj contra tucushun. Chaita rurajpica Diabloca ñucanchijmanta caruyangallami (Santiago 4:7-ta liyipai).

12. ¿Jobca Dios paita causachinata crishpaca imatataj ahuantai tucurca?

¹² Job shinami Jehová Dios causachinapi tucui shunguhuan crina canchij. Pasaj yachaipi ricushca shinaca Diabloca huañunata manchashcamanta Diosta sirvinata saquichunmi munan. Jobpaj ejemplopi yuyashun. Diabloca: “Paipaj causaita quishpichingapajmi Jobca imatapish ruranga, Diosta sirvinatapish saquinga” nishpami juchachirca. Pero chaica mana ciertochu carca. Jobca achca llaquicunata charishpapish, millai ungüimanta anchayacushpapish Yayitu Diosta sirvinataca manataj saquircachu. ¿Imamantataj Jobca chai llaquicunata ahuantai tucurca? Paica Jehová Dios alli cashcata, shamuj punllacunapi tucui llaquicunata allichinata confiashcamantami ahuantai tucurca. Ashtahuancarin huañujpipish Jehová Dios paita causachinapi tucui shunguhuan crishcamantami llaquicunata ahuantai tucurca. Ñucanchijpish Dios causachinata crishpaca huañuchishun nijpipish Diosta sirvinataca manataj saquishunchu.

13. ¿Diabloca ñucanchijtapish ima shinataj desanimachisha nin?

¹³ Diabloca ima shinami Jobta juchachirca, ñucanchijtapishmi chashnallataj juchachin. Diabloca tucui ñucanchijcunataca: ‘Runaca mana huañusha nishpaca, tucui charishcacunahuanmi paipaj causaitaca quishpichisha ninga’ nishpami juchachirca (Job 2:4, 5). Chashna nishpaca Diabloca ñucanchijcuna Jehová Diosta shungumanta mana cꞌuyashcatami nicurca. Shinallataj, “runaca paipaj causaita quishpichingapajmi Diosta sirvinataca saquinga” nishpami juchachirca. Ashtahuancarin “Diosca cancunataca mana cꞌuyanchu. Allita rurajpipish paica mana valichingachu” nishpami desanimachisha nin. Pero Jehová Diospi tucui shunguhuan confiashpaca Diablo nishca llullacunataca manataj crishunchu.

14. ¿Llaquicunahuan chꞌimbapuracushpaca imatataj cuentata cushun? Shuj ejemplomanta parlai.

¹⁴ Jobca llaquicunata chꞌimbapurashpami imapi mejorana cashcata cuentata curca. Por ejemplo, paica humilde cana cashcatami yacharca (Job 42:3). Ñucanchijpish llaquicunata chꞌimbapurashpami imapi mejorana cashcata cuentata cushun. Por ejemplo, Nikolay shuti huauquitaca pai ungushca cajpipish carcelpimi churarcacuna. * Paica: “Ima shinami shuj radiografiapi ñucanchij cuerpopi ima mana alli cashcata ricunchij. Chashnallatajmi carcelpi cashpaca imapi fallacushcataca cuentata curcani” ninmi. Ñucanchijpish imapi fallacushcata  cuentata cushpaca mejorangapajmi esforzarina canchij.

15. ¿Pitataj uyana canchij?

¹⁵ Ñucanchij contracunata uyanapaj randica Jehová Diostami uyana canchij. Jobca caitami pajtachirca. Jehová Diosca Jobtaca: “Ñucaca tucuita ruraj, tucui poderta charij Diosmi cani. Canhuan ima tucushcataca allimi yachani. ¿Manachu ñuca canta ayudai tucushcata cringui?” nircami. Chashna sinchiyachijpica Jobca Diostaca achcatami agradicirca. Chaimantami Jobca: “Ñucaca parlashcallatami canmanta uyarcani. Cunanmi cantaca ñuca quiquin ñahuihuantaj ricuni” nirca (Job 42:5). Pero Jobca cashna nicushpaca chairaj ungüihuan, ushpa jahuapimi tiyacurca. Paipaj huahuacuna huañushcamantapishmi llaquilla carca. Chashna sintirijpica Jehová Diosca paita cꞌuyashcata, paita ayudanata crichunmi ayudarca (Job 42:7, 8).

16. Isaías 49:15, 16-pi nishca shinaca ¿llaquicunata charishpaca imatataj yuyarina canchij?

¹⁶ Maipica gentecunaca ñucanchijtami riman, imapaj mana valij shinami tratan. Huaquinpicarin Diospaj organizacionmanta, ñucanchijmantapishmi llullacunata nincuna (Mateo 5:11). Pero chashna llaquichisha nijpipish, Jehová Diosca ñucanchijcuna paita sirvishpa catinatami confian. Jehová Diosca ñucanchijtaca achcatami cꞌuyan. Paipi confiajpica ñucanchijtaca manataj cungaringachu (Isaías 49:15, 16-ta liyipai). Chaimanta contracuna llullacunata nijpipish chaitaca manataj  crinachu canchij. Turquiamanta James shuti huauquipish, paipaj familiapishmi achca llaquicunata charishcacuna. Paica: “Diospaj organizacionmanta nishca llullacunata mana uyana cashcatami cuentata curcanchij. Chaicunata uyashca cashpaca desanimadosmi sintirinman carcanchij. Pero ama llaqui cangapajmi Diospaj Gobierno imata ruragrishcata yuyarircanchij. Diosta sirvishpapish ocupadosmi pasarcanchij” ninmi. Ñucanchijpish Job shinami Jehová Diosta uyashpa catina canchij. Chashnami contracuna llullacunata nijpipish Dios cushca esperanzataca manataj saquishun.

17. ¿Hebreos capítulo 11-pi parlashca Diosta sirvijcunamantaca imatataj yachanchij?

¹⁷ Apóstol Pabloca achcacunapish Job shina llaquicunata mana manchashpa ahuantashcatami parlarca (Hebreos 12:1). Paicunaca achca llaquicunata charishpapish Jehová Diosta sirvishpami catircacuna (Hebreos 11:36-40). Paicunaca Jehová Dios tucui nishcacuna ima shina pajtarishcata mana ricushpapish Jehová Diospi confiashpami catircacuna. Paicunaca shuj punlla Jehová Dios tucui nishcacuna pajtarinatami tucui shunguhuan crircacuna (Hebreos 11:4, 5). Ñucanchijpish paicunapaj alli ejemplomanta yachashpaca Jehová Diospimi confiashpa catishun.

18. ¿Llaquicuna shamujpipish imatataj rurashpa catina canchij?

¹⁸ Llaquicunaca ashtahuan mirarishpami catin (2 Timoteo 3:13). Diablopish Diosta sirvijcunataca ashtahuanmi llaquichisha ninga. Pero ima llaquicuna shamujpipish tucui shunguhuanmi Jehová Diosta sirvishpa catina canchij. Ñucanchijca causaj Diospimi shunguta churashcanchij (1 Timoteo 4:10). Jobta ima shina bendiciashcata ricushpami Jehová Dios yallitaj cꞌuyaj, llaquij cashcata yachashcanchij (Santiago 5:11). Job shina Yayitu Diosta tucui shunguhuan sirvijpica Jehová Diosca ñucanchijtapishmi achcata bendicianga (Hebreos 11:6-ta liyipai).