1. (a) Eaa to Iehova manakonakoanga no tatou? (e) Eaa te aiteanga kia “tiaki ia Iehova”? (Akara i te “Akamārama Anga Tuatua.”)

 KUA oronga mai a Iehova i tetai manakonakoanga manea no te aronga tei akaperepere iaia. Kare e roa ka takore aia i te maki, te mamae, e te mate. (Apo. 21:3, 4) Ka tauturu aia i “te aronga maru” tei tapapa atu i te enua ei parataito. (Sala. 37:9-11) Ka rauka tetai pirianga pumaana kiaia tei meitaki atu i to teianei. Mei teaa atura te manakonakoanga manea! Inara eaa tatou ka irinaki ei e ka tupu te au taputou a te Atua? Kare rava a Iehova e aati i tana taputou. E tumu meitaki ta tatou kia “tiaki ia Iehova.” * (Sala. 27:14) Ka akaari tatou i teia na te tiaki marie anga i to tatou Atua kia akatupu i tona akakoroanga ki te openga.—Isa. 55:10, 11.

2. Eaa ta Iehova i rave takere?

² Kua akapapu takere mai a Iehova e ka akono aia i tana au taputou. Akamanako ana i tetai akaraanga puapinga. I te puka o Apokalupo, kua taputou a Iehova e i to tatou tuatau ka akaputu mai aia i te iti tangata mei te au enua ravarai, te kopu e te reo, e ka taokotai ia ratou ki roto i te akamorianga mou. I teia rā, kua kiteaia te reira iti tangata e ko te “aronga maata rava.” (Apo. 7:9, 10) Noatu e tukeke te katiri tangata, vaine, e te tamariki, te reo, e te tu oraanga, te akatupu ra teia i tetai akataeake anga ‘au,  e te taokotaiia i te ao katoa. (Sala. 133:1; Ioa. 10:16) E aronga tutu aere maroiroi te aronga maata rava. Kua papa ratou i te akakite i to ratou manakonakoanga no tetai ao meitaki ki tetai ua atu. (Mata. 28:19, 20; Apo. 14:6, 7; 22:17) Me ko koe tetai o teia aronga maata rava, kare e ekoko e puapinga te manakonakoanga no te au mea meitaki e aere maira.

3. Eaa to Satani akakoroanga?

³ Te inangaro ra te Tiaporo i te keia i toou manakonakoanga. Tona akakoroanga, kia akakeu ia koe kia irinaki e kare a Iehova e maara mai ana ia koe. E kare Aia e akono i tana au taputou. Me manuia a Satani i te keia i to tatou manakonakoanga, ka ngere tatou i te tu ngakau toa, e penei e akamutu tatou i te tavini ia Iehova. Mei ta tatou ka kite, kua tauta te Tiaporo i te keia i to Iobu manakonakoanga e kia kore e tavini ia Iehova.

4. Eaa ta tatou ka uriuri i teia atikara? (Iobu 1:9-12)

⁴ I teia atikara, ka akara matatio tatou i ta Satani au ravenga kia māro ia Iobu kia aati i tona tu tiratiratu. (E tatau ia Iobu 1:9-12.) Ka apii katoa tatou mei te akaraanga o Iobu e kia akamaara e te akaperepere ra te Atua ia tatou e ka akatupu aia i tana au taputou.

5-6. Eaa tei tupu kia Iobu i roto i tetai tuatau poto?

⁵ Te meitaki ua ra to Iobu oraanga. Kua rekareka aia i tetai pirianga vaitata kia Iehova. E maata tona ngutuare tangata, e taokotai, e te apinganui. (Iobu 1:1-5) I tetai rā, kua ngere a Iobu i tana au mea ravarai. Kua ngere aia i tana au apinganui. (Iobu 1:13-17) Kua matemate tana au tamariki akaperepere. Akamanako ana i tona tumatetenga. E taitaia ana te au metua me takake atu ta ratou tamariki. Akamanako ana i to Iobu e tana vaine poitirere, te mii, e te taitaia, te kiteanga e kua matemate ta raua tai ngauru tamariki. No reira a Iobu i vevete ei i tona kakau ma te mii e kua topa ki raro!—Iobu 1:18-20.

⁶ E oti kua takinokino a Satani i to Iobu oraanga kopapa e kua taakama iaia. (Iobu 2:6-8; 7:5) I mua ana, e akangateiteiia ana a Iobu e tona iti tangata. Kua aere mai te tangata kiaia no te tauturu. (Iobu 31:18) I teianei kua kopae ratou iaia. Kua riro aia ei tuitarere, kua kopaeia e tona au taeake, te au oa piri mou, e te au tavini o te ngutuare!—Iobu 19:13, 14, 16.

7. (a) Eaa ta Iobu i irinaki i mamae ei aia, inara eaa tana kare i rave ana? (e) Akapeea tetai Kerititiano me aro atu i te timata anga tei aite ki to roto i te tutu?

⁷ Kua inangaro a Satani ia Iobu kia irinaki e te mamae ra aia no te mea kare a Iehova e mareka ana iaia. Ei akaraanga, kua taangaanga a Satani i tetai matangi kino kia takore i te are tei reira ta Iobu tai ngauru tamariki e te kaikai kapiti ra ma te mataora. (Iobu 1:18, 19) Kua akatupu katoa aia i te aʼi mei te rangi e kua takore i te au manu a Iobu e tona au tavini. (Iobu 1:16) Kua tupu te matangi e te aʼi na roto i tetai mea umere no reira kua manako a Iobu e na te Atua ko Iehova i Akatupu i te reira. Tei tupu mai, irinaki a Iobu, penei kua akamareka kore aia ia Iehova. Kare ra a Iobu i taumaa ana i tona Metua i te rangi. Kua āriki a Iobu e kua rauka te au mea meitaki mei  ko ia Iehova. No reira, me kua āriki aia i te meitaki, ka āriki katoa aia i te kino. Karanga aia: “Kia akameitakiia te ingoa o Iehova.” (Iobu 1:20, 21; 2:10) E tae ua atu ki te reira taime, kua akakoromaki a Iobu i te au manamanata i te pae o te moni, te manako ngakau, e te pae kopapa. Kare ra a Satani i akamutu ana.

8. Eaa ta Satani i taangaanga i teia taime kia Iobu?

⁸ E ravenga atu ta Satani i taangaanga kia Iobu; kua akakeu aia e toru nga oa pikikaa kia akakino ia Iobu. Karanga teia tokotoru e kua mamae o Iobu no te mea kua apa aia. (Iobu 22:5-9) Karanga ratou noatu kare aia i te tangata kino, kua puapinga kore tana au tauta anga te akamareka i te Atua. (Iobu 4:18; 22:2, 3; 25:4) Mei tera te tu, kua akakeu ratou ia Iobu kia ekoko i ta te Atua akaperepere iaia, Tana akono iaia, e me e puapinga tana tavini anga Iaia. Ae, kua riro ta ratou tuatua akakino kia manako a Iobu e e puapinga kore aia.

9. Eaa tei tauturu ia Iobu kia ngakau toa e kia maroiroi?

⁹ Akamanako ana i teia akatutuanga. Te noo ra a Iobu i roto i te reu one, ma te mamae kino. (Iobu 2:8) Kua akakino tona au oa iaia e kua takore i tona ingoa meitaki. Kua aite tona au manamanata mei te au toka teiaa, e kua taitaia kino i tana tamariki. I te akamata anga, kua noo muteki ua a Iobu. (Iobu 2:13–3:1) Me kua akaaite te au oa o Iobu i tona tu muteki e kua akaruke aia i Tei Anga iaia, kua tarevake ratou. I tetai atianga, i to Iobu—taaki anga i tona upoko ki runga e kua akara tika atu ki tona au oa pikikaa—te na ko anga: “E mate ua atu au, kare rai au e pa i te tuatua-tika naku ra.” (Iobu 27:5) Eaa tei tauturu ia Iobu kia  ngakau toa e kia maroiroi? Noatu tona au mamae kino, kare rava aia i akaruke ana i tona manakonakoanga e ka akamaru tona Atua aroa i tona au mamae. Kua kite aia e noatu ka mate aia, ka akatu akaou mai a Iehova iaia.—Iobu 14:13-15.

10. Eaa ta te akaraanga o Iobu e apii maira?

¹⁰ Te apii maira to Iobu akaraanga, kare e rauka ia Satani i te māro ia tatou kia akaruke ia Iehova e kua kite a Iehova i te au mea ravarai. Ka riro to Iobu akaraanga kia mārama meitaki tatou i tei tupu. Akamanako ana i ta tatou ka apii mai mei ia Iobu.

11. Me irinaki ua tatou ia Iehova, eaa te akapapuia maira? (Iakobo 4:7)

¹¹ Kua akapapu mai a Iobu e me irinaki ua tatou ia Iehova, ka akakoromaki tatou i tetai ua atu timata anga e ka patoi ia Satani. Eaa te ka tupu? Te akapapu maira te au Tuatua Tapu e ka rere ke atu te Tiaporo mei ia tatou.—E tatau ia Iakobo 4:7.

12. Akapeea te manakonakoanga o te tuakaouanga te akamaroiroi anga ia Iobu?

¹² Ka anoanoia tatou kia mou piri i te manakonakoanga o te tuakaouanga. Mei tei taikuia i te atikara i mua akenei, e taangaanga putuputu ana a Satani i te mate, kia kore tatou e tiratiratu. I to Iobu turanga, kua karanga a Satani e ka tiratiratu kore a Iobu, ei akaora iaia uaorai. Kua tarevake a Satani. Noatu i tona tuatau taitaia e kua vaitata i te mate, kua vai tiratiratu a Iobu. Kua riro tona irinaki ia Iehova e te manakonakoanga ei akamaroiroi iaia. Irinaki a Iobu e noatu kare a Iehova e akatikatika i te au mea ravarai iaia e ora ra, ka tauturu te Atua e ka akatuakaou mai iaia a te tuatau ki mua. E tika te manakonakoanga o te tuakaouanga kia Iobu. Me e tika te reira manakonakoanga kia tatou, kare rava te mate e akakeu ia tatou kia aati i to tatou tu tiratiratu.

13. Eaa tatou ka matakite ei i te au ravenga pikikaa a Satani kia Iobu?

¹³ Ka anoanoia tatou kia akara meitaki i tei tupu kia Iobu no te mea ka taangaanga a Satani i teia au ravenga kia tatou. Akara i teia akaapa anga na Satani: “E riro oki ta te tangata [kare ko Iobu anake] ei oko i tona ora.” (Iobu 2:4, 5) Karanga a Satani kare tatou e akaperepere ana i te Atua ko Iehova e ka patoi tatou Iaia ei akaora ia tatou uaorai. Karanga katoa a Satani e kare te Atua e akaperepere ana ia tatou e kare Aia e kite mai ana me akamareka tatou Iaia. Kia matakite, kare tatou e akavareia e te au ravenga pikikaa a Satani.

14. Eaa ta te au timata anga ka akaari mai i roto ia tatou? Akatutu mai.

¹⁴ E akara tatou i te au timata anga, ei tuatau kia kite ia tatou uaorai. Kua riro te au timata anga ta Iobu i akakoromaki, kia kite aia i tona au ngai paruparu e kua akatikatika i te reira. Okotai mea tana i apii e ka anoanoia aia kia akaaka. (Iobu 42:3) E maata katoa ta tatou ka apii me timataia tatou. Karanga tetai taeake ko Nikolay * tona ingoa, tei tukuia ki roto i te are auri noatu tona au manamanata i te pae kopapa: “Kua aite tetai are auri mei te X-ray, tei akaari i te au tu o tetai Kerititiano.” Me kite tatou i to tatou tu paruparu, ka akatikatika tatou i te reira.

15. Koai ta tatou ka akarongo, e eaa te tumu?

 ¹⁵ Ka anoanoia tatou kia akarongo kia Iehova, kare ki te au enemi. Kua akarongo meitaki a Iobu i te tuatua anga a Iehova kiaia. Kua tuatua te Atua kia Iobu, te na ko anga: ‘Te kite ra koe i toku mana no te anga i te au mea ravarai? Kua kite au i te au mea ravarai e tupu ra kia koe. Kare ainei koe i kite e ka rauka iaku i te akono ia koe?’ Kua ariu atu a Iobu ma te akaaka e te āriki i to Iehova tu meitaki. “I kite akenei au ia koe i te kite taringa nei,” i nana ei, “i teianei ra, te akara nei taku mata ia koe.” (Iobu 42:5) Te noo ra a Iobu ki roto i te reu repo, kua uneuneia tona kopapa, e kua tanuia tana tamariki, te tuatua anga aia i teia au tuatua. Noatu rai, kua akaari a Iehova i Tona aroa no Iobu e kua mareka rava iaia.—Iobu 42:7, 8.

16. Ia Isaia 49:15, 16, eaa ta tatou ka akamanako me timataia?

¹⁶ I teia tuatau, penei ka akakino puapinga kore ua mai te tangata ia tatou. Penei ka takore ratou i to tatou ingoa meitaki e ei akaaere anga, e ka “tapepe pikikaa ua mai te tangata i te au kino katoa nei.” (Mata. 5:11) Mei teia tua o Iobu, kua irinaki a Iehova e ka vai tiratiratu tatou kiaia noatu te au timata anga. Akaperepere a Iehova ia tatou e kare rava aia e akaruke i te aronga tei tiaki iaia. (E tatau ia Isaia 49:15, 16.) Auraka e akarongo i te au tuatua akakino a te au enemi o te Atua! Karanga a James, e taeake i Turkey tei na roto tona  ngutuare tangata i te timata anga pakari: “Kua kite mai matou e na te akarongo anga ki te au pikikaa no runga i te iti tangata o te Atua, ka akataitaia te reira ia matou. No reira kua akamou ua matou ki runga i te au manakonakoanga o te Patireia e kia tavini maroiroi ia Iehova. Tei tupu mai, kua mataora ua matou.” Mei ia Iobu, ka akarongo tatou kia Iehova! Kare te pikikaa a te au enemi e takore i to tatou manakonakoanga.

17. Eaa taau ka apii mei te akaraanga o te au tane e te au vaine tiratiratu ia Ebera pene 11?

¹⁷ Ko Iobu tetai o te au tavini o Iehova tei vai ngakau toa e te maroiroi i te tuatau o te timata anga pakari. I roto i tana reta ki to Epera, kua tuatua te apotetoro ko Paulo, te kapiki anga ia ratou ko “taua urupu maata i kite nei.” (Ebe. 12:1) Kua na roto pouroa ratou i te au timata anga pakari, inara kua tiratiratu ratou kia Iehova. (Ebe. 11:36-40) Kua kaimoumou ainei to ratou tu akakoromaki e te angaanga pakari? Kare! Noatu kare ratou i kite ana i te au taputou a te Atua, kua tiaki ua ratou ia Iehova. No te mea kua papu e kua mareka a Iehova ia ratou, kua irinaki ratou e ka kite ratou i te au taputou me akatupuia. (Ebe. 11:4, 5) Ka akamaroiroi to ratou akaraanga ia tatou kia tiaki ia Iehova.

18. Eaa taau ka aruaru i te rave? (Ebera 11:6)

¹⁸ Te noo nei tatou ki roto i tetai ao te kino ua atura. (2 Timo. 3:13) Kare a Satani i oti ake i te timata i te iti tangata o te Atua. Noatu te au manamanata e tu maira, kia aruaru tatou i te angaanga pakari na Iehova, e “te irinaki nei tatou i te Atua ora.” (1 Timo. 4:10) E akamaara, te akapapu maira ta te Atua i akatupu no Iobu “e kua ki te Atu i te aroa e te takinga-meitaki maata.” (Iako. 5:11) Kia vai tiratiratu rai tatou kia Iehova, e ka tutaki aia i “te aronga i kimi tikai iaia.”—E tatau ia Ebera 11:6.