1. а) Сави надеж денѓа амен о Јехова? б) Со значинела те надина амен ко Јехова? (Дикх ко објасниме лафија.)

 О ЈЕХОВА денѓа јекх бут шужи надеж са околенге со мангена ле. Панда хари ка цидел о насвалипе, о муке хем о мерибе (Отк. 21:3, 4). Ов ка поможинел е кротка манушенге кола со надинена пе ки лесте те керен и пхув рај (Пс. 37:9-11). Хем исто аѓаар, секоле јекхе амендар ка овел ле прилика те овел попаше е Јеховаја, нешто ко со ка уживина панда повише него авдиве. Акаја тани бут шужи надеж. Ама соске шај те верујна кај е Девлескере ветувања ка исполнинен пе? О Јехова секогаш ачхола ко пло лафи. Адалеске иси амен шукар причина те надина амен ко Јехова * (Пс. 27:14). Сикаваја кај надинаја амен ко Јехова аѓаар со сием стрплива хем бахтале џикоте аџикераја те исполнинел пле ветувања (Иса. 55:10, 11).

2. Со керѓа више о Јехова?

² О Јехова више докажинѓа кај исполнинела адава со ветинела. Размислин башо акава бут шужо ветување. Ко лил Откровение, о Јехова ветинѓа кај ко амаро време ка кхедел народо тари секоја нација, племе хем чхиб те шај те обожавинен ле ко јекхипе. Авдиве акаја посебно група мануша тани пенџарди сар „баро мноштво“ (Отк. 7:9, 10). Иако ки акаја група иси мурша, џувља хем чхаве таро цело  свето, сепак ола тане сар јекх фамилија која со живинела ко мир (Пс. 133:1; Јован 10:16). Ола исто аѓаар тане ревна проповедникија. Секогаш тане спремна те керен лафи секасаја баши пумари надеж (Мат. 28:19, 20; Отк. 14:6, 7; 22:17). Ако ту да сиан дело таро баро мноштво, сигурно и надеж кај ка авел пошукар време туке тани бут скапоцено.

3. Која тани е Сатанаскири цел?

³ О Сатана мангела те нашаве тли надеж. Лескири цел тани те чхивел тут те верујне кај о Јехова на грижинела пе туке хем кај ов нане те исполнинел пле ветувања. Ако о Сатана успејнела ко адава те нашава амари надеж тегани ка нашава амари храброст хем шај чак те чхинава те служина е Јеховаске. Сар со ка дикха, ов керѓа са те шај о Јов те нашавел пли надеж хем те чхинавел те служинел е Јеховаске.

4. Со ка дикха ки акаја статија? (Јов 1:9-12).

⁴ Ки акаја статија ка дикха саве тактике користинѓа о Сатана кеда мангља те чхивел е Јове те на овел више верно е Јеховаске. (Читин Јов 1:9-12.) Исто аѓаар ка дикха со шај те сикљова таро е Јовескоро пример хем соске на ваљани те бистра кај о Девел мангела амен хем кај ов ка исполнинел пле ветувања.

5-6. Со случинѓа пе е Јовеске башо кратко периоди?

⁵ Е Јове сине ле бут шужо живото. Ов сине бут паше е Јеховаја, сине ле бари фамилија која со сине бут бахтали хем сине барвало (Јов 1:1-5). Ама башо само јекх диве ов нашавѓа скоро са. Прво нашавѓа пло барвалипе (Јов 1:13-17). Пало адава са лескере чхаве муле. Шај ли само те замислине сави бари трагедија сине адаја. Кеда јекх чхаво мерела, адаја тани бут бари дукх е родителенге. А камоли те мерен 10 чхаве таро родителија, сар со сине адава случај е Јовеа хем лескере ромњаја. Сигурно сине бут пхаге тари дукх. Адалеске ни хари на изненадинела амен адава со о Јов пхаравѓа пле шеја тари жал хем пело теле ки пхув (Јов 1:18-20).

⁶ Пало адава, о Сатана чхивѓа е Јовеске јекх пхаро насвалипа хем понижинѓа ле англо јавера (Јов 2:6-8; 7:5). Англедер адава, о мануша бут поштујнена сине е Јове, авена сине ки лесте те роден лестар совет (Јов 31:18). Ама акана избегинена ле сине. Ов сине отфрлимо таро пле пхраља, таро пле паше амала, па чак таро пле слуге (Јов 19:13, 14, 16).

7. а) Кастар мислинѓа о Јов кај авена о неволје, хем со на мангља те керел? б) Сар сој сикавдо ки слика, сар шај јекх верно слуга те доживинел слично неволја?

⁷ О Сатана мангља о Јов те мислинел кај доживинела адала неволје адалеске со о Девел хољанѓа леске. На пример, о Сатана користинѓа јекх силно балвал те шај те рушинел о кхер коте со е Јовескере деш чхаве кхединѓе пе те хан заедно маро (Јов 1:18, 19). Ов исто аѓаар мукхља јаг таро небо, колаја со уништинѓа на само е Јовескере животнен него хем е слуген со аракхена сине адале животнен (Јов 1:16). О Јов мислинѓа песке кај о Јехова мукхља и балвал хем и јаг, соске авена сине таро небо хем адалеске мислинѓа кај о Јехова леске хољамо. Ама чак тегани о Јов на мангља те дел арман пле небесно Даде. Ов сине свесно кај о Јехова бершенцар дела ле сине шукар буќа. Хем адалеске мислинѓа кај ако тано спремно те прифатинел о шукар буќа, ваљани исто аѓаар те  овел спремно те прифатинел о лошна да. Адалеске пхенѓа: „Нека овел понадари да фалимо е Јеховаскоро анав“ (Јов 1:20, 21; 2:10). Иако о Јов нашавѓа пло барвалипе, пле чхавен хем пло састипе, ов понадари да ачхило верно е Јеховаске. Ама о Сатана на завршинѓа леа.

8. Со јавер керѓа о Сатана е Јовеске?

⁸ Јекх јавер тактика со користинѓа о Сатана тани адаја со бичхалѓа ко Јов трин ховавне амала те шај те чхивен ле те мислинел кај ов на врединела. Акала мануша вакерѓе кај ов доживинела неволје адалеске со керѓа бут лошна буќа (Јов 22:5-9). Ола исто аѓаар мангле те убединен ле кај бизи разлика кобор шукар буќа керѓа, е Девлеске нане важно са адава со керела (Јов 4:18; 22:2, 3; 25:4). Уствари, ола мангле о Јов те сумнинел пе дали о Девел чаче мангела ле, дали грижинела пе леске хем дали врединела те служинел леске. Ленгере лафија шај сине те чхивен е Јове те мислинел кај леске нане више надеж.

9. Со поможинѓа е Јовеске те овел храбро хем силно?

⁹ Замислин туке сар о Јов бешела теле ко право хем иси ле баре дукха (Јов 2:8). Лескере амала цело време вакерена леске кај нане шукар мануш хем кај било со те керел ништо на врединела. Лескере неволје сине леске сар баро товар ко пиќе, а и душа лескири андрал дукхала ле сине башо лескере чхаве со муле. Ко почеток, ов чутинела сине (Јов 2:13—3:1). Шај адала ховавне амала мислинѓе песке кај адалеске со чутинела ка цидел пе таро Јехова. Ако мислинѓе аѓаар, бут ховавѓе пе. Ама ко јекх моменти о Јов ваздинѓа пло шеро, дикхља лен ко јакхја хем вакерѓа ленге: „Са џикоте на мерава, нане те откажинав ман тари мли беспрекорност“ (Јов 27:5). Со поможинѓа леске те овел храбро хем силно иако бут мучинела пе  сине? Чак кеда сине бут обесхрабримо, ов никогаш на чхинавѓа те надинел пе кај лескоро мангло Девел јекх диве ка анел крајо лескере мукенге. Ов џанља кај чак те мерел, о Јехова ка воскреснинел ле (Јов 14:13-15).

10. Со сикљоваја таро извештај башо Јов?

¹⁰ О извештај башо Јов сикавела амен кај о Сатана нашти те чхивел амен силаја те цида амен таро Јехова хем кај о Јехова тано свесно башо са со случинела пе аменге. Лескоро искуство исто аѓаар поможинела аменге пошукар те хаљова соске доживинаја несаве неволје. Те дикха несаве конкретна поуке со шај те сикљова лен таро Јов.

11. Ако понадари да иси амен доверба ко Јехова, ко со шај те ова увериме? (Јаков 4:7).

¹¹ О Јов докажинѓа кај ако понадари да иси амен доверба ко Јехова амен шај те издржина било сави неволја хем успешно те противина амен е Сатанаске. Хем тегани и Библија уверинела амен кај о Сатана ка нашел амендар. (Читин Јаков 4:7.)

12. Сар и надеж ко воскресение керѓа позорало е Јове?

¹² Ваљани те ова цврсто увериме ки надеж башо воскресение. Сар со сине спомнимо ки англуни статија, о Сатана бут пути користинела и дар таро мерибе те шај те на ова више верна е Јеховаске. Башо Јов о Сатана вакерѓа кај ов ка керел са, чак ка чхинавел те служинел е Јеховаске, само те шај те спасинел пло живото. Ама е Сатана на сине ле право. О Јов ачхило верно е Јеховаске, чак ко најпхаре моментија кеда мислинѓа кај ка мерел. Адава со сине уверимо ко е Јеховаскоро шукарипе хем лескири силно надеж кај о Јехова ко крајо ка чхинавел лескере муке, бут поможинѓа леске те истрајнел. О Јов сине уверимо кај ако о Јехова на поможинела ле џикоте тано џивдо, тегани ов ка воскреснинел ле ки иднина. И надеж ко воскресение сине реално е Јовеске. Ако аменге да и надеж тани реално, тегани ка ачхова верна е Јеховаске чак кеда амаро живото ка овел ки опасност.

13. Соске ваљани шукар те џана кола тактике користинѓа о Сатана е Јовеске?

¹³ Ваљани шукар те џана кола тактике користинѓа о Сатана башо Јов соске ов користинела слична тактике аменге да авдиве. Приметин со вакерѓа о Сатана: „О мануш [на само о Јов] ка дел са со иси ле башо пло живото“ (Јов 2:4, 5). Ов уствари мангља те вакерел кај на мангаја чаче е Јехова хем кај ка цида амен лестар ако амаро живото тано ки опасност. О Сатана исто аѓаар вакерела кај о Девел на мангела амен хем кај на приметинела адава со кераја баши лесте. Адалеске со џанаја лескере тактике амен нане те верујна ко акала ховајба.

14. Кеда сием ки неволја, со шај те открина баши аменде? Вакер пример.

¹⁴ Ко неволје ваљани те дикха сар прилика те сикљова нешто баши аменде. О неволје со доживинѓа о Јов поможинѓе леске те откринел несаве слабостија ки песте хем те керел бути ки ленде. На пример, ов халило кај ваљани те овел попонизно (Јов 42:3). Амен да шај те сикљова бут баши аменде кеда накхаја тари несави неволја. О Николај *‚ јекх пхрал кова со сине чхивдо ко затвор иако сине ле пхаро насвалипе, вакерела: „О затвор тано сар јекх рентген апарати кова со сикавела саве  особине чаче иси јекхе христијане“. Кеда ка открина несаве слабостија ки аменде, ваљани те кера бути ки ленде.

15. Касте ваљани те шуна хем соске?

¹⁵ Ваљани те шуна е Јехова, а на амаре душманен. О Јов шукар шунѓа е Јехова кеда керѓа леа лафи. Кеда о Јехова објаснинѓа леске несаве буќа, јавере лафенцар вакерѓа леске: Дали дикхеа мли сила преку о створиме буќа? Џанава са со случинѓа пе туке. Мислинеа ли кај нашти те грижинав ман туке? О Јов сикавѓа кај ценинела е Јеховаскоро шукарипе хем понизно одговоринѓа: „Џи акана шунѓум баши туте, ама акана дикхава тут ме јакхенцар“ (Јов 42:5). Кеда вакерѓа акала лафија о Јов панда бешела сине теле ко право, лескоро цело тело сине учхардо раненцар хем панда жалинела сине башо адава со муле лескере чхаве. Ама чак тегани сикавѓа леске о Јехова кај мангела ле хем уверинѓа ле кај дикхела шукар ки лесте (Јов 42:7, 8).

16. Спрема Исаија 49:15, 16, со на ваљани те бистра кеда иси амен неволје?

¹⁶ Авдиве да о мануша шај вреџинена амен хем понашинена пе аменцар лошно. Ола шај пробинена те каљарен амаро анав или амаре организацијакоро хем вакерена „разна лошна ховавне буќа“ против аменде (Мат. 5:11). Таро извештај башо Јов дикхаја кај е Јехова иси ле доверба ки аменде кај ка ачхова леске верна кеда иси амен неволје. О Јехова мангела амен хем ов никогаш нане те мукхел околен со надинена пе ки лесте. (Читин Исаија 49:15, 16.) Ма шун о ховавне буќа со вакерена лен е Девлескере  душмања! О Џејмс, јекх пхрал таро Кхоранипе каскири со фамилија доживинѓа баре неволје вакерела: „Халилем кај ако шунаја о ховајба башо е Девлескоро народо адава ка обесхрабринел амен. Адалеске концентриринѓем амен ки амари надеж башо Царство хем ачхилем активна ки служба. А адава керѓа те ачхова бахтале“. Исто сар о Јов амен шунаја е Јехова. Амаре душманенгере ховајба нашти те керен те нашава амари надеж.

17. Со сикљовеа таро пример е верна муршенгоро хем џувленгоро сој спомниме ко Евреите 11 поглавје?

¹⁷ О Јов тано јекх таро бут слуге е Јеховаскере со ачхиле храбра хем силна џикоте сине лен баре неволје. Баши ленде о апостол Павле ко пло писмо џи ко Евреија вакерѓа кај тане „јекх баро облако таро сведокија“ (Евр. 12:1). Иако сине лен баре неволје, ола цело пло живото ачхиле верна е Јеховаске (Евр. 11:36-40). Дали врединѓа адава со истрајнѓе хем бут трудинѓе пе? Оја, сигурно! Иако на дикхле сар исполнинена пе са е Девлескере ветувања, ола никогаш на чхинавѓе те надинен пе ко Јехова. Хем адалеске со сине сигурна кај о Јехова тано задоволно лендар, ола сине увериме кај ка дикхен сар исполнинена пе о ветувања (Евр. 11:4, 5). Ленгоро пример поможинела аменге понадари да те надина амен ко Јехова.

18. Со сиан одлучно те кере? (Евреите 11:6).

¹⁸ Авдиве живинаја ко свето кова со овела са полошно (2. Тим. 3:13). О Сатана на чхинавѓа те искушинел е Девлескере народо. Бизи разлика саве пхарипа аџикерена амен, те ова одлучна те да амаро најшукар ки служба башо Јехова адалеске со „надинаја амен ко Девел сој џивдо“ (1. Тим. 4:10). Ма бистре кај и награда која со о Девел денѓа е Јовеске сикавела кај „о Јехова тано пхердо сочувство хем милост“ (Јак. 5:11). Те ачхова верна е Јеховаске, увериме кај ов наградинела „околен со родена ле ревно“. (Читин Евреите 11:6.)