1. (a) Koja nada dela amen o Jehova? (b) So značini te ovel amen nada? (Dikh o „Objasnime lafija“)

 O JEHOVA sarinenđe kola mangena le dela jekh but šuži nada. Ov phenela so pana hari na ka ovel nabormipe, muke, rojbe, dukha hem meribe (Otkr. 21:3, 4). Ov ka pomožini e „krotko“ manušenđe te šaj on te ćeren i phuv te ovel raj (Ps. 37:9-11). Ama, odova soj tano pana považno, ko raj ka ćerel amaro amalipe oleja te ovel pana pozoralo. Sose šaj te verujina so o Devel ka ćerel odova? Odolese so o Jehova uvek ćerela odova so phenela. Ćaće isi amen šukar razlog te ovel amen nada b ko Jehova (Ps. 27:14). Jedva ađićeraja o vreme ked o Jehova ka ispunini pe obećanja! (Is. 55:10, 11).

2. So o Jehova đi akana ćerđa?

² O Jehova već mothovđa so ispunini odova so obećini. Aće te dikha jekh primer. Ki knjiga Otkrivenje pisini so ko amaro vreme o Jehova ka ćedel e manušen ando sa o narodija, plemenija, nacije hem ćhibja te služinen olese. Avdije odija grupa tani o „baro mnoštvo“ (Otkr. 7:9, 10). Iako ki odija grupa isi murša, đuvlja, phure, terne hem ćhavore, on sare služinena e Jehovase sar jekh bari porodica (Ps. 133:1; Jov. 10:16). Isto ađahar, on dena sa pestar te vaćeren e manušenđe i šukar vest  (Mat. 28:19, 20; Otkr. 14:6, 7; 22:17). Ako hem tu hijan deo ando baro mnoštvo, sigurno hijan but bahtalo so isi tut nada so o buća ka oven pošukar.

3. So o Beng mangela?

³ O Beng na mangela te ovel amen nada asi budućnost. Odolese, mangela te ćhivel amen te verujina so o Jehova na brinini pe amendar hem so na ka ićeri pe ko po lafi. Ako ka ćhivel amen te našala amari nada, šaj te ova obeshrabrime hem čak te ćhinava te služina e Jehovase. Akana ka dikha sar o Beng manglja te ćhivel e Jove te ćhinavi te služini e Jehovase hem te našali pi nada.

4. Sostar ka vaćera ko akava članko? (Jov 1:9-12)

⁴ Ko akava članko, ka dikha sar o Beng manglja te ćhinavi e Jove te služini e Jehovase. (Čitin Jov 1:9-12.) Isto ađahar, ka dikha so šaj te sikljova ando Jov hem sose na valjani te bistra so o Jehova mangela amen hem so ka ispunini pe obećanja.

5-6. So ulo e Jovese aso kratko vreme?

⁵ O Jov hine le šukar životi. Hine paše e Jehovaja. Hine le bari hem bahtali porodica. Isto ađahar, hine barvalo manuš (Jov 1:1-5). Ama, jekhe divese sa našalđa. Najangleder našalđa po barvalipe (Jov 1:13-17). Palo odova, sa olese ćhave mulje. Odova ćaće hine bari tragedija. Šaj te zamislina kobor tano pharo jekhe roditeljese ked našali samo jekhe ćhave, a o Jov ko jekh dive našalđa deše ćhaven. Odolese, nane čudno so o Jov pharavđa pe šeja upro peste hem bešlja ko praho (Jov 1:18-20).

⁶ Palo odova, o Beng ćerđa o Jov te ovel le but baro nabormipe (Jov 2:6-8; 7:5). Angleder, o Jov hine but poštujimo maškaro narodo. Čak o manuša avena hine koro leste te roden savet (Jov 31:18). Ama, akana niko više na poštujinđa e Jove. Sare cidinđe pe olestar, olese phralja, olesi familija, pa čak hem olese sluge (Jov 19:13, 14, 16).

7. (a) So o Jov mislinđa, kastar avena olese pharipa hem so na manglja te ćerel? (b) Sar so dikhaja ki slika, sar šaj e Devlese sluge avdije te ovel len ista problemija save hine len o Jov hem olesi romni?

⁷ O Satana manglja te ćhivel e Jove te mislini so o Jehova holjanđa upro leste. Na primer, o Beng mukhlja te phudel jekh bari bavlal. Sebepi odija bavlal, o ćher ko kova hine e Jovese ćhave rušinđa pe hem on mulje (Jov 1:18, 19). Isto ađahar, ćerđa te perel jag kotar nebo. Odija jag uništinđa e Jovese životinjen hem e manušen kola brininđe pe ando odola životinje (Jov 1:16). Odolese so i bavlal hem i jag alje kotar nebo, o Beng manglja te ćhivel e Jove te mislini so olese pharipa avena ando Devel. Sebepi odova, o Jov šaj mislinđa so ćerđa diso sovaja holjanćerđa e Jehova. Ama, ipak na odrekninđa pe ando po Devel. O Jov phenđa so na bisterđa so o Jehova beršencar dinđa le but šukar buća. Odolese razmislinđa, ako prihvatinđa o šukar buća kola o Jehova dinđa le, sose akana te na prihvatini hem o lošna buća. Sebepi odova phenđa: „Nek e Jehovaso anav ovela hvalimo“ (Jov 1:20, 21; 2:10). Iako o Jov našalđa pe ćhaven, po barvalipe hem po sastipe, ov hem ponodri služinđa e Jehovase. Ama, o Beng pana na aćhavđa le ki mira.

8. So o Satana pana ćerđa e Jovese?

 ⁸ Palo odova, o Satana koristinđa trine manušen kola ćerđe pe soj tane e Jovese amala, te ćhiven e Jove te mislini so ništa na vredini. On phenđe lese soj tano ov krivo sebepi sa odova so desinđa pe lese (Jov 22:5-9). Isto ađahar, phenđe lese kobor god te trudini pe te ćerel šukar buća, anglo Jehovase jaćha odova ništa na vredini (Jov 4:18; 22:2, 3; 25:4). Odola trin manuša manglje te ćhiven e Jove te mislini so o Jehova na mangela le hem so na brinini pe olestar. Sebepi olenge lafija, o Jov šaj hine te našali pi nada.

9. So pomožinđa e Jovese te ovel zoralo?

⁹ Zamislin akija slika. O Jov bešela ko praho hem isi le but bare dukha (Jov 2:8). Olese amala phenena lese soj tano lošno manuš hem so ništa na vredini. O problemija kola isi le tane phare sar bar, a i dukh palo olese ćhave tharela oleso vilo. Ki početka, o Jov ništa na vaćeri (Jov 2:13–3:1). Ama, ako olese amala mislinđe so ov ka irini po dumo e Jehovase sebepi sa odova so ulo lese, on but pogrešinđe. Ko jekh trenutko, ov vazdela po šero hem dikhela len pravo ko jaćha hem phenela lenđe: „Sa đi na merava na ka ćhinavav te ovav besprekorno“ (Jov 27:5). So pomožinđa e Jovese te aćhol zoralo? Iako hine obeshrabrimo, ov na našalđa pi nada so o Jehova ka pomožini lese hem so ka del le snaga. O Jov đanđa so čak ako valjani te merel, o Jehova ka uskrsnini le (Jov 14:13-15).

10. So sikljovaja ando izveštaj kotar Jov?

¹⁰ Kotar izveštaj ando Jov sikljovaja so o Beng nikas našti silaja te ćhivel te cidel pe e Jehovastar hem so o Jehova  uvek đanela so desini pe amenđe ko životi. Akana ka dikha pana nekobor buća kola šaj te sikljova ando Jov.

11. Ko so šaj te ova sigurna ako uzdajinaja amen upro Jehova? (Jakovljeva 4:7)

¹¹ E Joveso primer mothovi amenđe so ked jekh e Devleso sluga uzdajini pe upro Jehova, ov šaj te istrajini ko svako pharipe hem te suprotstavini pe e Satanase. So šaj te ovel sebepi odova? Ki Biblija pisini so o Satana tegani ka našel amendar. (Čitin Jakovljeva 4:7.)

12. Sar i nada ko uskrsenje zorjaćerđa e Jove?

¹² Amari nada ko uskrsenje valjani uvek te ovel zorali. Sar so dikhljam ko okova članko, podijekh puti o Satana šaj te koristini amari dar ando meribe te ćhivel amen te cida amen ando Jehova. Ked o Jov hine le odola bare pharipa, o Satana phenđa so o Jov ka ćerel sa, pa čak hem ka irini po dumo e Jehovase samo te aćhol đivdo. Ama, o Satana na hine u pravu. Čak hem ked hine ko najbare muke hem ked mislinđa so ka merel, o Jov hem ponodri hine verno e Jehovase. Ov verujinđa so o Jehova ka pomožini lese hem odova dinđa le snaga. O Jov đanđa so o Jehova na ka pomožini lese samo đi tano đivdo, već hem ako merela, ov hine sigurno so o Jehova ka vazdel le. Olesi nada ko uskrsenje ćaće hine but zorali. Ako hem amari nada ko uskrsenje tani odobor zorali, tegani ništa hem niko na ka šaj te ćhinavi amen te ova verna e Jehovase.

13. So sikljovaja ando odova so o Satana ćerđa e Jovese?

¹³ Amen valjani te đana kola buća o Satana koristinđa te iskušini e Jove, sose odola ista buća šaj te koristini avdije te šaj amen te iskušini. Ov phenđa: „Sa so isi le o manuš [na samo o Jov] ka del aso po đivdipe“ (Jov 2:4, 5). O Satana akaleja manglja te phenel so ked amaro životi ka ovel ki opasnost, amen ka irina amaro dumo e Jehovase. Isto ađahar, ov manglja te phenel so o Jehova na mangela amen hem so odova so ćereja ništa na vredini anglo lese jaćha. Odolese so đanaja kova tano e Satanaso cilj, amen na mangaja te verujina ko akala hovajba.

14. So o kušnje šaj te mothoven amendar? Vaćer jekh primer.

¹⁴ Ked isi amen kušnje, šaj te dikha save ćaće hijam andral. Ked o Jov hine le kušnje, šaj hine te dikhel kola slabostija isi le hem te ispravini len. Na primer, ov tegani sikljilo so valjani te ovel pana pobuter ponizno (Jov 42:3). Isto ađahar, hem amen valjani te sikljova diso ked isi amen kušnje. Na primer, amaro phral o Nikolaj, c kova hine ko phanlipe iako hine but nabormo, phenela: „O phanlipe tano sar rendgen, šaj tačno te mothovi tuće savo hijan andral.“

15. Kas valjani te šuna hem sose?

¹⁵ Amen valjani te šuna odova so o Jehova phenela, a na amare dušmanja. O Jov pažljivo šunđa so phenđa lese o Jehova. Te šaj te mothovi e Jovese kobor brinini pe olestar, o Jehova koristinđa nekobor pućiba: Da li dikheja sa so ćerđum? Da li ando odova dikheja kobor hijum moćno? Da li mislineja so na brininava man tutar? Ama, o Jov hine ponizno hem but ceninđa sa odova so o Jehova ćerđa lese. Odolese phenđa:  „Me kana šunđe tutar, ama akana hem me jaćha dikhena tut“ (Jov 42:5). Kaj hine o Jov ked phenđa akala lafija? Ov pana bešlja ko praho, oleso telo hine pherdo čirija hem pana osetinđa dukh sebepi pe ćhave. Ama, hem tegani o Jehova utešinđa le hem mothovđa lese kobor mangela le (Jov 42:7, 8).

16. Premalo Isaija 49:15, 16, so na valjani te bistra ked isi amen kušnje?

¹⁶ Avdije hem amen šaj te uvredinen o manuša hem te phenen amenđe so hijam nisose. On šaj te den sa pestar te lađaćeren amen ja amari organizacija, ađahar so ka vaćeren but baro hovajbe amendar (Mat. 5:11). Ando e Joveso primer sikljovaja so o Jehova isi le poverenje upro pe sluge so na ka irinen lese po dumo ked ka ovel len bare kušnje. O Jehova mangela amen hem niked na ka aćhavi okolen kola uzdajinena pe upro leste. (Čitin Isaija 49:15, 16.) Odolese, na valjani te šuna ked amare dušmanja vaćerena hovajbe amendar. Amaro phral o Džejms andi Turska, phenela: „Amen haljiljam so ako šunaja ked neko vaćeri hovajba ando Devleso narodo, odova šaj te obeshrabrini amen. Odolese, razmislinaja andi nada koja isi amen ko Devleso Kraljevstvo hem daja sa amendar ki služba e Jehovase. Sebepi odova, amen hijam bahtale.“ Sar o Jov, hem amen valjani te šuna e Jehova. Na valjani te mukha o hovajba ando amare dušmanija te len amari nada.

17. So sikljovaja ando Jehovase sluge kolendar vaćeri pe ko Jevrejima 11. poglavlje?

¹⁷ O Jov na hine jedino e Jehovaso sluga kova aćhilo lese verno hem zoralo ked hine le kušnje. Ko po lil e Jevrejenđe, o Pavle phenđa so but avera sluge aćhilje verna e Jehovase. Ov olendar phenđa soj tane sar „baro oblako ando svedokija“ (Jevr. 12:1). Sare olendar hine len bare pharipa, ama ipak aćhilje verna e Jehovase (Jevr. 11:36-40). Da li odova so hine verna hem istrajna hine uzaludno? Naravno so na! Iako na hine len prilika te dikhen sar o Jehova ispunini pe proročanstvija, on na našalđe pi nada. Odolese so hine sigurna soj tano o Jehova ki olengi strana, on hine uverime so jekh dive ka dikhen sar o Jehova ispunini pe obećanja (Jevr. 11:4, 5). Olengo primer šaj te zorjaćeri hem amen te na našala amari nada.

18. So hijan odlučno te ćere? (Jevrejima 11:6)

¹⁸ O sveto ko kova živinaja ovela sa pološno (2. Tim. 3:13). O Satana pana na ćhinavđa te iskušini e Devlese narodo. Ama, save god pharipa te oven amen, amen hijam odlučna te ćera buti e Jehovase hem te na našala amari nada (1. Tim. 4:10). Ando odova sar pomožinđa e Jovese, šaj te dikha „so o Jehova tano but samilosno hem milosrdno“ (Jak. 5:11). Sar o Jov, hem amen šaj te aćhova verna e Jehovase hem te ova uverime so ov nagradini „okolen kola iskreno rodena le.“ (Čitin Jevrejima 11:6.)