1. (a) Beku wa la Jéhovah amû na e? (b) Ti zia bê na ndö ti Jéhovah aye ti tene nyen? (Bâ “Nda ti mbeni tënë.”)

 JÉHOVAH amû mbeni pendere beku na azo kue so aye lo. Fafadeso lo yeke sara si kobela, vundu nga na kuâ ahunzi (Apoc. 21:3, 4). Lo yeke aidé “azo so asara terê ti ala kete” so azia bê ti ala na ndö ti lo ti sara si sese aga Paradis (Ps. 37:9-11). Lo yeke sara nga ande si e oko oko kue e wara lege ti duti na kpengba songo na lo, songo so ayeke pendere mingi ahon ti so e yeke na ni na lo laso. So tâ pendere beku! Me nyen la asara si e mä na bê so azendo ti Nzapa ayeke ga tâ tënë? Jéhovah ayeke sara lakue aye so lo mû zendo ni. Tongaso, e yeke na nzoni raison ti “zia bê ti [e] na ndö ti Jéhovah”. * (Ps. 27:14). E yeke fa ni tongana na ngia e kanga bê e ku ti tene Nzapa ti e asara aye so lo mû zendo ni.—És. 55:10, 11.

2. Nyen la Jéhovah asara awe?

² Jéhovah afa awe so lo yeke sara ye alingbi na azendo ti lo. Bâ mbeni pendere tapande ni. Na yâ ti mbeti ti Apocalypse, Jéhovah amû zendo so, na ngoi ti e, lo yeke bungbi oko azo ti amara kue, ti akete mara kue nga na ti ayanga ti kodro kue ti voro lo. Laso, groupe ti azo so ayeke nde so  ayeke “azo mingi mingi”. (Apoc. 7:9, 10). Atâa so na yâ ti groupe so mo yeke wara akoli, awali nga na amolenge so alondo na ndo kue na yâ ti dunia, ala yeke sewa oko so ayeke na siriri (Ps. 133:1; Jean 10:16). Azo mingi mingi ayeke nga azo so ayapu na fango tënë. Ala yeke lakue nduru ti fa beku ti ala ti mbeni pendere dunia na azo kue so ayeke yeda ti mä ala (Mat. 28:19, 20; Apoc. 14:6, 7; 22:17). Tongana mo yeke na popo ti azo mingi mingi, kite ayeke dä ape so beku ti apendere ye so ayeke ga ayeke kota ye mingi na lê ti mo.

3. Nyen la Satan aye?

³ Zabolo aye ti tene mo duti na beku ape. Lo ye ti tene mo pensé so Jéhovah ayeke pensé na mo ape nga lo yeke sara ye alingbi na azendo ti lo ape. Tongana Satan awara lege ti sara si e duti na beku ape, e yeke découragé nga e peut même ti zia ti sara na Jéhovah. Tongana ti so e yeke bâ ande, Zabolo agi lani ti sara si Job aduti na beku ape nga ti sara si lo zia ti sara na Jéhovah.

4. Nyen la e yeke bâ na yâ ti article so? (Job 1:9-12).

⁴ Na yâ ti article so, e yeke bâ akode so Satan asara na kua ti forcé Job ti duti be-ta-zo ape. (Diko Job 1:9-12.) E yeke bâ nga aye so e lingbi ti manda na lege ti tapande ti Job nga ndani so e doit ti girisa ape so Nzapa aye e nga lo yeke sara ye alingbi na azendo ti lo.

5-6. Nyen la asi na Job na yâ ti mbeni kete ngoi?

⁵ Gigi ti Job ayeke lani nzoni mingi. Lo yeke lani kota kamarade ti Jéhovah. Lo yeke na mbeni kota sewa so ayeke na ngia, nga lo yeke na mosoro mingi (Job 1:1-5). Me gï na yâ ti lango oko, Job aperdre aye kue. Kozoni, lo perdre mosoro ti lo (Job 1:13-17). Na pekoni, amolenge ti lo kue, so lo ye ala mingi, akui. Gbu li kete na ndö ti kota ye ti vundu so. Tongana ababâ na amama aperdre mbeni molenge ti ala oko, vundu ayeke hon ndö ti ala. Tongaso, imaginé kota vundu so asara Job na wali ti lo nga tongana nyen la bê ti ala ason na ala découragé na ngoi so ala mä so amolenge ti ala bale-oko kue akui. Li ti e akpe ape so Job asuru bongo na terê ti lo na vundu nga lo tï na sese.—Job 1:18-20.

⁶ Na pekoni, Satan asara si Job awara mbeni kobela so ason mingi nga so asara lo kamene (Job 2:6-8; 7:5). Kozo na ni, azo ane Job mingi. Azo ayeke ga lani na mbage ti lo ti hunda wango (Job 31:18). Fadeso ala yeke kpe lo kpengo. Aita ti lo, akota kamarade ti lo nga même azo ti kua ti lo ake lo.—Job 19:13, 14, 16.

7. (a) Job apensé lani so nyen la asara si lo yeke bâ pasi? Nyen la lo ke ti sara? (b) Tongana nyen la mbeni Chrétien apeut ti wara mara ti kpale so ayeke na yâ ti foto so?

⁷ Satan aye lani ti tene Job apensé so lo yeke bâ pasi ndali ti so lo zia ngia na bê ti Jéhovah encore ape. Na tapande, Satan asara kua na mbeni ngangu pupu ti kungbi da so amolenge ti Job bale-oko kue ayeke te kobe dä ndo oko (Job 1:18, 19). Lo sara nga si wâ alondo na yayu afâ anyama ti lo nga na azo so ayeke bâ lege ti anyama ni (Job 1:16). So pupu nga na wâ ni alondo na yayu, Job apensé lani so a londo na Jéhovah. Ye so asara si Job abâ so lo sara mbeni ye so ason bê ti Jéhovah. Atâa so kue, Job ake ti zonga Babâ ti lo ti yayu. Job ahinga so, na yâ ti angu mingi, Jéhovah amû na lo anzoni ye mingi. Tongaso, lo pensé lo tene tongana lo yeke lani na ngia ti wara anzoni ye, lo doit nga ti yeda na asioni ye so asi na lo. Ndani la,  lo tene: “Zia iri ti Jéhovah angbâ lakue ti wara gonda.” (Job 1:20, 21; 2:10). Atâa so Job aperdre mosoro ti lo, amolenge ti lo nga terê ti lo ason, lo ngbâ be-ta-zo na Jéhovah. Me Satan azia lo ape.

8. Nyen la Satan asara na pekoni na Job?

⁸ Na pekoni, Satan asara kua na azo ota so asara ye mo bâ mo tene ala yeke akamarade ti Job ti sara si lo bâ so lo yeke ye oko ape. Akoli so atene Job ayeke bâ pasi ndali ti gbâ ti asioni ye so lo sara (Job 22:5-9). Ala gi nga ti sara si lo yeda so même tongana fade lo yeke sioni zo ape, a-effort so lo yeke sara ti zia ngia na bê ti Nzapa ayeke ye oko na lê ti lo ape (Job 4:18; 22:2, 3; 25:4). Ala yeke gi lani ti sara si Job apensé so Nzapa aye lo ape, lo yeke bâ lege ti lo ape nga ti sara na lo ayeke kota ye ape. Atënë so ala tene apeut lani ti sara si Job abâ so mbeni ye ti sara ndali ti lo ayeke dä ape.

9. Nyen la amû lani maboko na Job ti sara mbeto ape nga ti luti ngangu?

⁹ Tara ti imaginé ye ni. Job aduti na yâ ti mburu ti wâ, na ye ayeke son lo lakue (Job 2:8). Akamarade ti lo ni angbâ ti tene so lo yeke nzoni zo ape, nga lo sara mbeni sörö ye lâ oko ape. Akpale ti lo ane na ndö ti lo tongana nengo tênë, nga kuâ ti amolenge ti lo azia kota kä na bê ti lo. Na tongo nda ni, Job azi yanga ape (Job 2:13–3:1). Tongana akamarade ti lo ni apensé so, so lo zi yanga ape aye ti fa so lo yeke zia ti sara na Jéhovah, andâ ala tene mvene. A si na mbeni ngoi, peut-être Job ayô li ti lo lo bâ asioni kamarade ti lo ni, lo tene: “Juska mbi kui, mbi yeke ngbâ gï na ndö ti sarango ye ti mbi ti mbilimbili!” (Job 27:5). Nyen la a-aidé lani Job ti sara mbeto ape nga ti luti ngangu atâa apasi kue so lo bâ? Même na ngoi so lo découragé lani ngangu, lo ngbâ lakue ti duti na beku so Nzapa ti lo so aye lo ayeke  hunzi pasi ti lo. Lo hinga so même tongana lo kui, Jéhovah ayeke zingo lo.—Job 14:13-15.

10. Mbaï ti Job afa na e nyen?

¹⁰ Mbaï ti Job afa na e so Satan alingbi pëpe ti forcé e ti zia ti sara na Jéhovah nga Jéhovah ahinga aye kue. Ye so asi na Job apeut nga ti aidé e ti hinga nzoni atënë so alondo lani. Bâ ambeni mbilimbili ye so e peut ti manda na lege ti tapande ti Job.

11. Tongana e ngbâ ti sara confiance na Jéhovah, nyen la e peut ti hinga na bê ti e kue? (Jacques 4:7).

¹¹ Job afa so tongana e ngbâ ti zia bê ti e kue na Jéhovah, e peut ti gbu ngangu na yâ ti atara kue nga ti luti na Satan. Ye ti peko ni ayeke nyen? Bible adë bê ti e so Zabolo ayeke kpe yongoro na e.—Diko Jacques 4:7.

12. Tongana nyen la beku ti zingongo ti akuâ amû lani ngangu na Job?

¹² E doit ti duti na kpengba mabe na beku ti zingongo ti akuâ. Tongana ti so article so ahon afa, fani mingi Satan ayeke sara kua na mbeto ti kuâ so ayeke sara e ti sara si e ngbâ be-ta-zo ape. Na yâ ti ye so asi na Job, Satan atene so Job ayeke mû aye kue so lo yeke na ni, lo yeke ngbâ même be-ta-zo ape, ti bata fini ti lo. Satan atene mvene. Même na ngoi so Job abâ so lo yeke gue ti kui, lo ngbâ lani be-ta-zo na Jéhovah. So lo yeke lani na confiance na nzoni bê ti Jéhovah nga lo yeke na kpengba beku so Jéhovah ayeke sara si aye aga nzoni na lo, a kpengba lo. Job ayeke lani na mabe so tongana Jéhovah a-aidé lo ape na ngoi so lo ngbâ na fini, Lo yeke zingo ande lo na kuâ na yâ ti angoi so ayeke ga. Beku ti zingongo ti akuâ ayeke lani tâ ye na lê ti Job. Tongana beku so ayeke tâ ye na lê ti e, même tongana a tene a yeke fâ e, e yeke ngbâ be-ta-zo.

13. Ngbanga ti nyen la e doit ti gi ti hinga akode so Satan asara na kua ti tara Job?

¹³ E doit ti gi ti hinga akode so Satan asara na kua ti tara Job ndali ti so laso lo yeke sara kua na akode ni so ti tara e. Mä tënë so Satan atene lani: “Zo [me gï Job ape] ayeke mû ye kue so lo yeke na ni ti sö na fini ti lo.” (Job 2:4, 5). Ti vrai ni, Satan atene so e ye Jéhovah Nzapa vrai ape nga e yeke tourné peko na lo tongana e doit ti sara ni si e ngbâ na fini. Satan akiri atene so Nzapa aye e ape nga lo yeke bâ pëpe a-effort so e yeke sara ti zia ngia na bê ti lo. So e hinga awe ye so Satan ayeke gi ti sara, e yeke yeda na amvene ti lo ape.

14. Akpale so e wara apeut ti fa nyen na ndö ti e? Mû mbeni tapande ti fa ni.

¹⁴ A yeke nzoni e bâ akpale so e wara tongana mbeni lege ti hinga ye na ndö ti e wani. Akpale so Job awara a-aidé lo ti hinga ambeni wokongo ti lo nga ti leke ni. Na tapande, lo hinga so lo doit ti sara terê ti lo kete mingi ahon ti kozo (Job 42:3). E nga kue e peut ti hinga aye mingi na ndö ti e wani na ngoi so e yeke na yâ ti mbeni kpale. Nikolay, * mbeni ita-koli so a kanga lo lani atâa so lo yeke na angangu kpale ti seni, atene: “Tongana ti so sarango radio ayeke aidé zo ti hinga mbeni kpale ti seni so lo yeke na ni, sarango kanga ayeke aidé mbeni Chrétien ti hinga asarango ye so lo bezoin ti gi ti duti na ni.” Tongana e hinga awokongo ti e, e peut ti gi ti leke ni.

15. E doit ti mä zo wa? Ngbanga ti nyen?

¹⁵ E doit ti mä Jéhovah, me pëpe awato ti e. Na ngoi so Jéhovah ayeke sara tënë lani  na Job, lo dengi mê lo mä Lo nzoni. Nzapa ahunda Job, lo tene: ‘Eskê mo bâ aye so mbi créé ni na ngangu ti mbi? Mbi hinga aye kue so asi na mo. Mo pensé so mbi peut ti bâ lege ti mo ape?’ Na ngoi so Job akiri tënë na Jéhovah, lo sara terê ti lo kete nga lo kiri singila mingi na lo ndali ti nzoni bê ti lo. Lo tene: “Mbi mä tënë ti mo lani mango na mê ti mbi, me fadeso mbi bâ mo na lê ti mbi.” (Job 42:5). Na ngoi so Job atene atënë so, peut-être lo ngbâ ti duti na yâ ti mburu ti wâ, terê ti lo kue ayeke gï na kä nga amolenge ti lo ayeke na yâ ti dû ti kuâ. Atâa so kue, Jéhovah afa na Job so Lo ye lo nga so lo zia ngia na bê ti Lo.—Job 42:7, 8.

16. Ti gue oko na Ésaïe 49:15, 16, nyen la a yeke nzoni e girisa ape na ngoi so e wara akpale?

¹⁶ Laso nga kue, azo apeut ti zonga e nga ala sara ye na e mo bâ mo tene e yeke ye oko ape. Ala peut ti gi ti buba iri ti e wala iri ti bungbi ti e nga ti tene “mara ti asioni tënë ti mvene nde nde kue na ndö ti” e (Mat. 5:11). Na lege ti ye so asi na Job, e hinga so Jéhovah ayeke na confiance so e yeke ngbâ be-ta-zo na lo tongana e wara akpale. Jéhovah aye e nga lo yeke zia lâ oko ape azo so azia bê ti ala na ndö ti lo. (Diko Ésaïe 49:15, 16.) Mä pëpe atënë so awato ti Nzapa atene ti buba iri ti e. James, mbeni ita-koli na Turquie so sewa ti lo awara angangu kpale, atene: “E bâ so tongana e mä atënë ti mvene so a tene na ndö ti awakua ti Nzapa ayeke découragé e. Tongaso, e zia li ti e na ndö ti beku ti Royaume, nga e ngbâ ti sara kua ti Jéhovah. A sara si e ngbâ ti duti na ngia.” Tongana ti  Job, zia e mä Jéhovah. Atënë ti mvene so awato ti e ayeke tene ayeke sara ye oko na ndö ti beku ti e ape.

17. Nyen la mo manda na lege ti tapande ti akoli nga na awali be-ta-zo so a sara tënë ti ala na aHébreu chapitre 11?

¹⁷ Job ayeke gï mbeni oko ti awakua ti Jéhovah so angbâ ti sara ye na mbeto ape nga ti luti ngangu na ngoi ti angangu kpale. Na yâ ti lettre so bazengele Paul atokua na aHébreu, lo sara tënë ti gbâ ti ambeni, na lo iri ala “atémoin mingi mingi”. (aHéb. 12:1). Ala kue awara lani angangu kpale, me na yâ ti gigi ti ala kue, ala ngbâ be-ta-zo na Jéhovah (aHéb. 11:36-40). Eskê ala gbu ngangu nga ala sara kua ngangu senge senge? Ên-ën. Atâa so ala bâ lâ oko ape gango tâ tënë ti azendo ti Jéhovah kue na ngoi so ala ngbâ na fini, ala ngbâ lani ti zia bê ti ala na ndö ti lo. Nga, ndali ti so ala hinga so ala zia ngia na bê ti Jéhovah, ala yeke na confiance so ala yeke bâ gango tâ tënë ti azendo ti lo (aHéb. 11:4, 5). Tapande ti ala apeut ti aidé e ti leke na bê ti e ti ngbâ ti zia bê ti e na ndö ti Jéhovah encore mingi.

18. Nyen la mo leke na bê ti mo ti ngbâ ti sara? (aHébreu 11:6).

¹⁸ Laso e yeke na yâ ti mbeni dunia so ayeke ga gï sioni sioni (2 Tim. 3:13). Satan angbâ ti tara awakua ti Nzapa. Atâa akpale wa la angbâ ti ku e na devant, zia e leke na bê ti e ti ngbâ ti sara kua ngangu ndali ti Jéhovah, nga e duti na confiance so “e zia beku ti e na ndö ti mbeni Nzapa so ayeke na fini”. (1 Tim. 4:10). Girisa ape so atufa so Nzapa asara na ndö ti Job afa “so Jéhovah ayeke tâ na ndoye mingi nga lo yeke sara nzoni bê na zo.” (Jacq. 5:11). Zia e nga kue e ngbâ be-ta-zo na Jéhovah, nga e hinga biani so lo yeke futa “azo so ayeke gi lo ngangu.”​—Diko aHébreu 11:6.