1. (a) Bulangalire buhi Yehova arhuhîre? (b) ‘Okulangalira Nyamuzinda’ k’okuderha gurhi? (Olole “Amahugûlo ga Luderho Luguma.”)

 YEHOVA ahîre abantu bamuzigira obulangalire bwinja bwenene. Hano hofi-hofi, ayusa endwala, amababalè n’olufû. (Maf. 21:3, 4) Arhabala abantu “batûdu” bamulangalira bahindule igulu libe paradizo. (Enna. 37:9-11) Na kandi, ayish’ihashisa ngasi muguma wirhu abe n’obwîra bwa hofi-hofi haguma naye, obo bwîra bwanabe bwinja bwenene kulusha obu rhujira haguma naye ene. Obo buli bulangalire bwinja bwenene! Cikone, bici birhuyemezize oku ebiragane bya Nnâmahanga byanahikirire? Ngasi mango Yehova anahikirize ebiragane byage. Muli ntyo, rhugwerhe ecirhumire cinja c’‘okulangalira Nyamuzinda.’ * (Enna. 27:14) Rhunayerekane ntyo omu kulinda n’omwishingo gurhi Nnâmahanga wirhu ahikiriza ebiragane byage.​—Iz. 55:10, 11.

2. Bici Yehova ayerekine?

² Yehova ayerekine oku anahikirize ebiragane byage. Rhuganirire lwiganyo luguma lwinja bwenene. Omu citabu c’Amafulûlo, Yehova alanganyize oku omu mango girhu, akagushire haguma abantu b’omu ngasi ishanja na ngasi bûko na ngasi lulimi, n’oku akabalunzire haguma omu nterekêro ecîre. Ene, olo lubaga lwago-lwago lumanyikine nka ‘hitû hy’abantu.’ (Maf. 7:9, 10) Ciru akaba ehyo hitû hy’abantu hijijirwe n’abalume, n’abakazi, n’abana bagwerhe irangi ly’omubiri liri lubero, barhaderha lulimi luguma, banagwerhe enkomêdu ziri  lubero, baba bajijire mulala muguma gw’omw’igulu lyoshi gugwerhe omurhûla. (Enna. 133:1; Yn. 10:16) Na kandi, abo b’omu hitû hy’abantu banayalize omwanzi mwinja n’obushiru. Ngasi mango, baba babidu okuganirira ngasi muntu wakabayumvirhiza okubiyerekire obulangalire bwabo bw’igulu linja lyayisha. (Mt. 28:19, 20; Maf. 14:6, 7; 22:17) Akaba oli muguma w’omu hitû hy’abantu, kobinali oba oshagalukire bwenene obulangalire bwawe okubiyerekire amango minja gayisha.

3. Bici Shetani aba alonzize?

³ Shetani arhaba alonzize obe n’obulangalire okubiyerekire amango gayisha. Aba alonzize oyemere oku Yehova arhakushibirira n’oku arhakahikiriza ebiragane byage. Erhi Shetani akahikira aha arhujira rhuheze obulangalire bwirhu, rhwanaheza n’oburhwali bwirhu, ciru rhwanaleka n’okukolera Yehova. Nk’oku rhwayish’ibona, Shetani ajijire okwage koshi ly’arhuma Ayubu aheza obulangalire bwage n’okuleka okukolera Yehova.

4. Bici rhwaganirira mw’eci cigabi? (Ayubu 1:9-12)

⁴ Mw’eci cigabi, rhwayish’ibona obulenga Shetani akolesize ly’arhuma Ayubu aleka obwishwekerezi bwage. (Osome Ayubu 1:9-12.) Na kandi, rhwayish’iganirira ebi rhwakaciyigiriza kugerera olwiganyo lwa Ayubu na bulya gurhi rhukwanine rhugendekere rhwakengera oku Yehova aba arhuzigire n’oku ahikiriza ebiragane byage.

5-6. Bici byahikire Ayubu omu kasanzi kasungunu?

⁵ Ayubu agwerhe akalamo kinja. Al’igwerhe obwîra bwinja haguma na Yehova. Al’igwerhe omulala munene gwalimwo ecinyabuguma, anali mugale bwenene. (Ayu. 1:1-5) Cikone, omu lusiku luguma lone, Ayubu aheza hofi ngasi kantu. Burhangiriza, aheza obugale bwage. (Ayu. 1:13-17) Enyuma z’aho, abana bage bazigirwa boshi bafâ. Orhanye hitya k’obo buhanya bwamuhikiraga. Ababusi banaciyumve kubi bwenene erhi mwana wabo muguma akafâ. Co cirhumire, orhanye gurhi Ayubu na mukage baciyumvirhe erhi bababwira oku abana babo ikumi boshi bafîre. Rhurhakasomerwa okubona Ayubu asharhulaga emishangi yage anacirhimba oku idaho omu kulakira abana bage!​—Ayu. 1:18-20.

⁶ Na kandi, Shetani alerhera Ayubu endwala y’amalumwa manji n’okumuhegeza olukengwa. (Ayu. 2:6-8; 7:5) Embere z’aho, Ayubu al’ikenzirwe bwenene omu eneo yage. Abantu bakagiyish’imuhûna amahano. (Ayu. 31:18) Lero barhondera okumuyaka. Bene wabo, abîra bage ba hofi-hofi, ciru n’abanya-kazi bage boshi bamuyaka!​—Ayu. 19:13, 14, 16.

7. (a) Ngahi Ayubu akag’irhanya amalibuko gage gakag’irhenga, cikone bici alahire okujira? (b) Gurhi Omukristu akahikirwamwo n’amarhangulo gali nk’agayerekinwe oku nfoto?

⁷ Shetani al’ilonzize Ayubu ayemere oku ali alibuzibwa bulya arhaciyemirwi na Yehova. Kwa lwiganyo, Shetani akolesa empusi ndârhi bwenene ly’ehongola enyumba abana ikumi ba Ayubu bakag’ishagalukiramwo ebiryo boshi haguma. (Ayu. 1:18, 19) Kandi alerha omuliro gwahona kurhenga empingu n’okushereza ebishwekwa bya Ayubu, ciru n’abakag’ibiyabula. (Ayu. 1:16) Bulya eyo mpusi n’ogo muliro byahonyire kurhenga empingu, Ayubu arhanya mpu byarhengaga emwa Yehova. N’oko kwarhuma arhanya mpu agayisize Yehova. Ciru akaba ntyo, Ayubu alahira okujacira Ishe w’omu mpingu. Al’ihugûsirwe oku, omu myaka minji yageraga, Yehova amuhîre bintu binji binja. Oko kwarhuma arhanya oku, erhi akaba ashagalukire ebyo bintu binja, al’ishinganine ayemere  n’ebyo bintu bibi. Aderha ntya: “Izino [lya Yehova] likuzibwe!” (Ayu. 1:20, 21; 2:10) Kuhikira aha, Ayubu agendekera okulembera obukenyi, amalumwa g’ekandalala, n’ag’omubiri, cikone arhalekaga obwishwekerezi bwage kuli Yehova. Cikoki Shetani arhalekeraga aho.

8. Bulenga buhi Shetani acibir’ikolesa ly’arhangula Ayubu?

⁸ Shetani ac’ibikolesa obundi bulenga ly’arhangula Ayubu; akolesa abîra bage basharhu b’obunywesi lyo bajira Ayubu aciyumve nk’ali wa busha-busha. Abo balume basharhu bayeresa Ayubu oku akag’ilibuzibwa bulya hali bintu binji bibi ajijire. (Ayu. 22:5-9) Kandi bajira okwabo koshi lyo bamuyemeza oku, ciru akaba arhali nyankola-maligo, ebi akag’ijira byoshi ly’ashagalusa Nnâmahanga, Nnâmahanga arhal’ibishagalukire. (Ayu. 4:18; 22:2, 3; 25:4) Bakag’ilonza Ayubu abe n’akarhinda oku Nnâmahanga arhaba amuzigire, oku arhakamulanga, n’oku nta bunguke buli omu kumukolera. Enderho zabo zakarhumire Ayubu aheza obulangalire okubiyerekire akanga kage.

9. Bici byarhabire Ayubu abe n’oburhwali n’emisi?

⁹ Obone Ayubu omu bwenge bwawe. Atamire omu luvu, n’amalumwa gage garhali gahwa. (Ayu. 2:8) Abîra bage bagendekire okumuyeresa oku ali muntu mubi banali bamuhegeza irenge. Amazibu Ayubu alimwo gali mazirho nka mabuye n’obu acigwerhe n’ebihulu oku murhima enyanya z’okuheza abana bage. Oku murhondero, Ayubu arhaderhaga kantu koshi-koshi. (Ayu. 2:13–3:1) Nkaba abo bîra bage b’obunywesi barhanyize mpu okuhulika kwage kuyerekine oku alahira Omulemi wage, bacirhebire bwenene. Mango malebe, byanahashikana Ayubu ayinamula amalanga, alaba abo bîra bage b’obunywesi, anaderha erhi: “Kuhika nninde nfâ, ntamango nanaleke obwishwekerezi bwani!” (Ayu. 27:5, NWT) Bici byarhabire Ayubu abe n’oburhwali  bwa ntyo n’emisi mw’ago malibuko goshi? Ciru n’omu mango al’ivunisire omurhima bwenene, arhahezagya obulangalire oku, buzinda Nnâmahanga wage w’obuzigire akayusize ago malibuko gage. Al’imanyire oku ciru akafâ, Yehova akamufûzire.​—Ayu. 14:13-15.

10. Bici omwanzi guganirire Ayubu gurhuyigirizize?

¹⁰ Ogo mwanzi guganirire Ayubu gurhuyigirizize oku Shetani arhakarhuseza oku rhuleke okukolera Yehova n’oku Yehova aba amanyire ngasi kanga. Na kandi, ogo mwanzi gwanarhurhabala rhuhugûkwe bwinja ebintu akanga kage kal’ihiziremwo. Rhuganirire masomo maguma na maguma rhwakaciyigiriza kugerera Ayubu.

11. Erhi rhwakagendekera okulangalira Yehova, bici rhwakayemera n’obwalagale? (Yakobo 4:7)

¹¹ Ayubu ayerekine oku, erhi rhwakagendekera rhwalangalira Yehova, rhwanahash’ilembera ngasi marhangulo n’okuhagalika Shetani. Bunguke buci okujira ntyo kwakarhulerhera? Amandiko garhuyeresire n’obwalagale oku Shetani anarhuyaka.​—Osome Yakobo 4:7.

12. Gurhi obulangalire bw’obufûke bwazibuhizemwo Ayubu?

¹² Rhushinganine rhube n’obulangalire busêzire omu bufûke. Nk’oku rhwabwine omu cigabi c’embere, kanji-kanji Shetani anakolese oboba bw’olufû ly’arhujira rhuleke obwishwekerezi bwirhu kuli Yehova. Omu kanga ka Ayubu, Shetani adesire oku Ayubu akajijire ngasi kantu, ciru n’okuleka obwishwekerezi bwage, mpu ly’acungula obuzine bwage. Shetani adesire obunywesi. Ayubu agendekire aba mwishwekerezi ciru n’omu kasanzi akag’ibona oku akola afâ. Okuyemera n’obwalagale oku Yehova aba mwinja n’okulangalira bwenene oku Yehova akakubwîre ebintu kwamurhabala alembere. Ayubu al’iyemire oku, erhi akaba Yehova arhakamurhabire amango acir’izine, akamufûzire omu kasanzi kayisha. Obulangalire bw’obufûke bwali bw’okunali kuli Ayubu. Erhi akaba obo bulangalire buli bw’okunali kuli rhwe, rhurhakaleka obwishwekerezi bwirhu ciru akaba rhuli hofi h’okufâ.

13. Bulya gurhi rhushinganine rhumanyirire obulenga Shetani akolesize kuli Ayubu?

¹³ Rhushinganine rhumanyirire obulenga Shetani akolesize kuli Ayubu bulya obo bulenga bo n’obo bo ali akolesa ene kuli rhwe. Olole gurhi Shetani arhushobesire. Aderha ntya: “Ebi omuntu [arhali Ayubu yene] agwerhe byoshi anabijahike mpu ly’afûngira amagala!” (Ayu. 2:4, 5) Omu kuderha ntyo, Shetani ayerekine oku rhurhajira obuzigire bw’okunali kuli Yehova Nnâmahanga n’oku, erhi byakahûna rhumuleke lyo rhuciza obuzine bwirhu, rhwanajira ntyo. Kandi, Shetani ayerekana oku Nnâmahanga arhaba arhuzigire n’oku arhashagalukira obushiru rhujira lyo rhumushagalusa. Co cirhumire, rhurhayemera obunywesi bwa Shetani bulya rhumanyire ebi aba alonzize okuhikiriza.

14. Bici amarhangulo gakayerekana okubirhuyerekire? Ohâne olwiganyo.

¹⁴ Rhushinganine rhukabona amarhangulo oku buli bulyo bw’okurhurhabala rhucimanye rhwennene. Amarhangulo Ayubu alwisize gamurhabire amanye obuzamba bwage buguma na buguma n’okubukubûla. Kwa lwiganyo, ahugûkwa oku al’ishinganine abe mwirhohye kulusha. (Ayu. 42:3) Nirhu rhwanamanya binji okubirhuyerekire amango rhuli omu marhangulo. Mwene wirhu muguma ohamagalwa Nikolay, * wahiragwa omu prizo  ciru akaba al’ilwazire bwenene, adesire ntya: “Nka kula eradiyo eyerekana endwala omuntu alwazire omu kandalala, eprizo nayo enayerekane amorhere g’ekandalala g’Omukristu.” Erhi rhwakamanya obuzamba bwirhu, rhwanajira okwirhu koshi lyo rhubukubûla.

15. Ndi rhushinganine rhukayumvirhiza, na bulya gurhi?

¹⁵ Rhukwanine rhukayumvirhiza Yehova, ahali h’okuyumvirhiza abashombanyi birhu. Ayubu ayumvirhizize erhi Yehova amuganiza. Nnâmahanga arhanya na Ayubu, aba nk’omubwizire ntya: ‘K’obwine emisi yani y’obulemi? Mba manyire ngasi kantu kakuhikire. K’orhanyize mpu ntakahash’ikushibirira?’ Ayubu ashuza n’obwirhohye anashagalukira obwinja ba Yehova. Aderha ntya: “Nayumvirhe bakâkuderha, cikwone lero niene nakubwinage.” (Ayu. 42:5, Mashi Bible) Erhi Ayubu aderha ezo nderho, nkaba acir’itamire omu luvu, n’omubiri gwage guyunjwire bihulu, anacikag’ilakira abana bage. Ciru akaba ntyo, Yehova ayemeza Ayubu n’obwalagale oku al’imuzigire n’oku al’imuyemire.​—Ayu. 42:7, 8.

16. Nk’oku biyerekinwe omu Izaya 49:15, 16, bici rhushinganine rhukakengera amango rhuli rhwalwisa amarhangulo?

¹⁶ Ene nalyo, abantu banarhujacire n’okurhujirira nka bantu ba busha-busha. Banarhuhegeza irenge rhwennene erhi kulihegeza ikubuliro lirhu ‘n’okurhuderhera ngasi mabi n’okurhubeshera.’ (Mt. 5:11) Omwanzi guganirire Ayubu gurhuyigirizize oku Yehova aba ayemire n’obwalagale oku rhwabêra bishwekerezi kuli ye amango rhuli omu marhangulo. Yehova aba arhuzigire na nta lusiku akaleka abamulangalira. (Osome Izaya 49:15, 16.) Orhahîraga okayumvirhiza emyanzi y’obunywezi y’abashombanyi ba Nnâmahanga!  Mwene wirhu muguma olama e Turquie ohamagalwa James, omulala gwage gwahikiragwa na marhangulo manji, adesire ntya: “Rhwahugûkwa oku, okuyumvirhiza emyanzi y’obunywesi okubiyerekire abakozi ba Nnâmahanga kwakarhuvunyire omurhima. Oko kwarhuma rhwasegeza obwenge bwirhu oku bulangalire bw’Obwami rhwanagendekera rhwajira binji omu mukolo gwa Yehova. Okujira ntyo kwarhuma rhwagendekera rhwaba n’omwishingo.” Rhunayumvirhize Yehova, aka Ayubu! Emyanzi y’obunywesi y’abashombanyi birhu erharhuma rhwaheza obulangalire bwirhu.

17. Bici ociyigirizize kugerera olwiganyo lw’abalume n’abakazi bishwekerezi baganirirwe omu Abahabraniya cigabi ca 11?

¹⁷ Ayubu ali muguma w’omu bakozi ba Yehova bagendekire baba n’oburhwali n’emisi omu kasanzi k’amarhangulo mazibu. Omu maruba Paulo ayandikiraga Abahabraniya, aganirire abandi banji, aderha oku bali ‘citu cinene c’abahamîrizi.’ (Hb. 12:1, Mashi Bible) Boshi bahikirwe n’amarhangulo mazibu; cikone bagendekera baba bishwekerezi kuli Yehova omu kalamo kabo koshi. (Hb. 11:36-40) K’omukolo gwabo n’okulembera kwabo byafîre busha? Nanga, ciru n’ehitya! Ciru akaba barhabonaga okuhikirizibwa kw’ebiragane byoshi bya Yehova omu kalamo kabo, bagendekire bamulangalira. Na bulya bal’iyemire n’obwalagale oku bal’iyemirwe ne Yehova, bal’iyemire n’obwalagale oku banabone oku ebyo biragane byahikirizibwa. (Hb. 11:4, 5) Olwiganyo lwabo lwanazibuhya omuhigo gwirhu gw’okugendekera rhwalangalira Yehova.

18. Bici ohizire okujira? (Abahabraniya 11:6)

¹⁸ Ene, rhulamire omw’igulu ligendekire lyasherera buca buyira. (2 Tm. 3:13) Shetani arhacirhama okulerhera abakozi ba Nnâmahanga amarhangulo. Ciru rhwakarhimanana na mazibu gahi omu mango gayisha, rhuhige okugendekera rhwakolera Yehova n’obushiru, n’‘okulangalira Nyamuzinda ozine.’ (1 Tm. 4:10) Okengere oku, oluhembo Nnâmahanga ahâga Ayubu luyerekine oku “Nyakasane [Yehova, NWT] aba wa lukogo na wa bwonjo bunji.” (Yk. 5:11) Nirhu rhugendekere rhwaba bishwekerezi kuli Yehova, n’okuyemera n’obwalagale oku anahembe “abamulonza” n’omurhima goshi.​—Osome Abahabraniya 11:6.