1. a) Ino ty raha nampitamanini-Jehovah antsika? b) Ino ty dikani-hoe ‘mitamà ani-Jehovah’? (Henteo amy hoe “Fanazavà.”)

 MISY raha soasoa nampitamanini-Jehovah ho ani-ze olo tea azy. Kely sisa le hafahiny ty arety, ty raha mampalahelo, noho ty fahafatesa. (Apok. 21:3, 4) Hampeany ty olo “mpandefitsy” mitamà azy mba hanova ani-tany toy ho paradisa. (Sal. 37:9-11) Hataony koa ze hahavy antsika hifandramby soa aminy. Fa mifandramby soa aminy tsika henanizao fe mbo ho soa mandilatsy ani-zay ty amy hoavy. Tena soasoa vatany ty raha tamanintsika! Fe ino ty antony mahavy antsika mino hoe ho tanteraky raha ampitamani-Ndranahary reo? Satria tsy mivaliky amy ty safàny mihintsy Jehovah. Misy antony soa zany mahavy antsika ‘mitamà ani-Jehovah.’ * (Sal. 27:14) Asehontsika hoe mitamà ani-Jehovah tsika laha mahaliny azy avao sady falifaly aminy, zisiky hanatanterahany ty raha ampitamaniny.​—Isaia 55:10, 11.

2. Ino ty raha fa nataoni-Jehovah?

² Fa nasehoni-Jehovah hoe manatanteraky ty raha ampitamaniny avao ie. Diniho ohatsy raiky miavaky toy. Amy bokini-Apokalypsy ao, nampitamà Jehovah fa amy androntsika zao, le havoriny ty olo iaby baka amy firenena noho foko noho fivolana samby hafa, ka haharony raiky anatini-fivavaha marina ao. “Vahoaky be” ty ahaiza ani-olo reo henanizao. (Apok. 7:9, 10) Olo sankarazany baka amy tany toy iaby ro mahaforo ani-vahoaky be io. Ao ty lahilahy, ty ampela, noho ty ajà. Fe ndre zay, fianakavia raiky avao rozy sady miharo raiky. (Sal. 133:1; Jaona 10:16) Tena mazoto mitory olo anisani-vahoaky be reo. Mitamà rozy hoe ho soasoa biby ty fiaina amy hoavy, le parè avao rozy hiresaky ani-raha tamanin-drozy zay amy ze olo hijanjy an-drozy. (Mat. 28:19, 20; Apok. 14:6, 7; 22:17) Laha anisani-vahoaky  be io iha, le azo antoky hoe tena lafovily aminao ty raha soasoa tamaninao.

3. Ino ty raha kendreni-Satana?

³ Manahaky mpangalatsy io ty Devoly. Teany halà raha tamaninao io. Teany laha mino iha hoe tsy midary anao Jehovah sady tsy ho tanterahiny ty raha nampitamaniny. Laha vitani-Satana amy zay ty mandrava ty raha tamanintsika, le tsy hana herim-po tsika, sady mety tsy hanompo ani-Jehovah sasy. Ho hitantsika ato fa zay mihintsy ty nataoni-Devoly tamy Joba. Nataony ze hahavy ani-Joba tsy hanan-draha tamany noho hijano tsy hanompo ani-Jehovah sasy.

4. Ino ty hodinihintsika amy lahatsoratsy toy ato? (Joba 1:9-12)

⁴ Hodinihintsika amy lahatsoratsy toy ato hoe ino ty nataoni-Satana mba hahavy ani-Joba hivaliky amy Jehovah. (Vakio Joba 1:9-12.) Ho hitantsika koa hoe ino ty azontsika ianara baka amy Joba, le manino tsika ro mila mitiaro avao hoe tea antsika Ndranahary sady hanatanteraky ty raha nampitamaniny.

5-6. Ino ty raha nahazo ani-Joba tanatini-ndraiky andro avao?

⁵ Tena nisoasoa ty fiainani-Joba. Nifandramby soa tamy Jehovah ie. Nanan’anaky maro ie, nisambatsy ty fianakaviany, sady tena nanan-kanana ie. (Joba 1:1-5) Fe tanatini-ndraiky andro avao, le presky nirava raha iaby rezay. Voalohany, nirava ty hariny. (Joba 1:13-17) Bakeo, nimaty iaby anany rey. Mba alao sary an’eritseritsy moa loza io. Malahelo biby ty ray aman-dreny lafa maty ty raiky amy ty anany. Ka mba eritsereto amy zay ty alaheloni-Joba noho valiny iny lafa naharè hoe nimaty iaby anan-drozy folo rey. Tsy mahatseriky laha nandriatsy ty sikiny Joba sady nihohoky tamy tany eo!​—Joba 1:18-20.

⁶ Bakeo, nasiani-Satana arety tena nampijaly noho nanala baraka Joba. (Joba 2:6-8; 7:5) Tena nihajàn’olo Joba talohani-zay. Niavy taminy eo rozy mba hila torohevitsy aminy. (Joba 31:18) Fe lafa narary Joba le nihatakatahan-drozy. Tsy nahoani-rahalahiny noho namany narìny azy rey iaby ie. Ndre mpanompony rey aza tsy nidary azy!​—Joba 19:13, 14, 16.

7. a) Ino ty raha nieritseretini-Joba hoe nahavy azy nijaly, fe ino ty tsy nataony? b) Ino ty raha sarotsy mety hatrehini-Kristiana, mitovy amy hitantsika amy sary io?

⁷ Teani-Satana hino Joba hoe nijaly ie satria tsy nahazo hatò tamy Jehovah. Nandefa tsioky mahery, ohatsy, Satana mba handravà ani-trano nisy ani-anakini-Joba folo rey. Nifalifaly noho niaraky nihina tanatini-trano io anany rey tamy fotoa zay. (Joba 1:18, 19) Nandatsaky afo baka an-danitsy any koa ie, mba handripaha ani-harini-Joba rey miaraky amy mpiarakandrony rey. (Joba 1:16) Baka an-danitsy any tsioky noho afo rey ka nieritseritsy Joba hoe baka amy Jehovah raha rey. Nanao akory amy zay Joba? Nino ie hoe nisy raha nataony nampeloky ani-Jehovah. Fe ndre zay, tsy nety nanozo ani-Babany an-danitsy any iny Joba. Hainy hoe nanome raha soa maro ho azy Jehovah tanatini-tao maro. Farany nieritseritsy ie hoe laha naneky ani-raha soa rey ie, le tokony ho parè haneky ty raty koa. Nivola amy zay ie hoe: “Hoderà avao lahy ty anarani-Jehovah!” (Joba 1:20, 21; 2:10) Nirava ty dralani-Joba, nimaty anany rey, le narary koa ie. Fe mbo tsy nivaliky tamy Jehovah avao Joba. Nieny amy zay va Satana?

8. Ino koa ty raha nataoni-Satana tamy Joba?

⁸ Nisy raha hafa koa nataoni-Satana tamy Joba. Nampiasa olo telo rezay ie. Nanao kisary namani-Joba lahilahy reo le nataon-drozy ze hahavy azy hahatsapa hoe tsy misy dikany ie. Nivola rozy hoe nanao raha raty maro Joba kanao nijaly. (Joba 22:5-9) Nataon-drozy ze  hahavy ani-Joba hieritseritsy hoe ndre maro manao akory ty raha soa nataony, le tsy ahoa-Ndranahary ino zao. (Joba 4:18; 22:2, 3; 25:4) Nataon-drozy koa ze hahavy ani-Joba hieritseritsy hoe tsy tea azy Ndranahary, tsy midary azy ie, sady tsy misy dikany ty fanompoa Azy. Nikivy Joba lafa naharè ani-raha nivolanin-drozy reo ka nieritseritsy ie hoe tsy misy raha tamany sasy ty aminy.

9. Ino ty nanampy ani-Joba ho be herim-po noho hatanjaky avao?

⁹ Mba alao sary an’eritseritsy tantara io. Nipetraky tamy lavenoky teo Joba sady naharary azy avao bainy rey. (Joba 2:8) Nivolambola azy avao namany rey hoe olo raty Joba sady tsy misy dikany ze raha iaby nataony bakany zay. Sahala nitontà vatobe io Joba lafa nitratsini-raha rey, amin’io ie mbo nalahelo marè ani-anany nimaty rey. Tsy nivola tse Joba tamy voalohany. (Joba 2:13–3:1) Nieritseritsy lahilahy nanao kisary namany rey hoe nivaliky tamy Jehovah Joba kanao nitsỳ. Fe diso hevitsy rozy! Ndraiky andro, nivola amy zay Joba. Mety niandra kelikely ie, le nanenty ani-lahilahy nanao kisary namany rey sady nivola hoe: “Tsy haneky hivaliky mihintsy aho zisiky ahafatesako.” (Joba 27:5) Ino ty nanampy ani-Joba ho be herim-po noho hatanjaky avao ndre teo raha iaby nampijaly azy rey? Ndre nisy fotoa aza ie nikivy marè, le mbo nitamà avao ie hoe hanampy azy Ndranahariny be fitiava iny. Hainy fa ndre maty aza ie le mbo hovelomini-Jehovah ndraiky.​—Joba 14:13-15.

10. Ino ty ianarantsika baka amy tantarani-Joba?

¹⁰ Hitantsika baka amy tantarani-Joba hoe tsy afaky miforosè antsika hivaliky amy Jehovah Satana sady haini-Jehovah ty raha iaby mahazo antsika. Afaky manampy antsika hahay soa ty raha mahazo antsika koa tantara io. Fe mbo misy raha hafa koa azontsika ianara baka amy Joba.

11. Ino ty azontsika atokisa laha matoky ani-Jehovah avao tsika? (Jakoba 4:7)

 ¹¹ Niporofoeni-Joba hoe laha matoky ani-Jehovah avao tsika, le afaky hiaritsy ndre ino ino raha sarotsy mahazo antsika. Ho vitantsika koa ty hanohitsy ani-Satana. Hanao akory amy zay ie? Manome toky antsika ty Soratsy Masy hoe hilay antsika ty Devoly.​—Vakio Jakoba 4:7.

12. Manino ty fitamàna fameloma ty maty ro nanatanjaky ani-Joba?

¹² Tena mila matoky tsika hoe hovelomy vatany ty maty. Fa niresahy tamy lahatsoratsy taloha tao iny hoe matetiky Satana mampiasa ty tahotsy fahafatesa, mba hahavy antsika hivaliky amy Jehovah. Tamy raha nahazo ani-Joba rey, le nivola Satana hoe hila fomba Joba, na hijano tsy hanompo ani-Jehovah sasy mba hiarova ty ainy. Fe diso hevitsy Satana. Ndre fa nieritseritsy aza Joba hoe ho maty ie, le mbo tsy nivaliky tamy Jehovah avao ie. Natoky Joba hoe soa toetsy Jehovah sady tena nino ie hoe manao ty rariny avao Jehovah, le zay ro nanampy azy hiaritsy. Nino Joba hoe laha tsy manampy azy Jehovah amy ie mbo velo iny, le mbo hovelominy avao ndraiky ie amy hoavy. Tena natoky Joba hoe hovelomy vatany ty maty. Laha mino ani-zay koa tsika, le tsy hivaliky mihintsy ndre ho maty aza.

13. Manino tsika ro mila mandiniky soa ty tetiky nampiasani-Satana tamy Joba?

¹³ Tsy maintsy dinihintsika soa tetiky nampiasani-Satana tamy Joba rey, satria mitovy amy rey avao ty raha ataony amintsika henanizao. Henteo moa fandratiratia nivolanini-Satana toy: “Hanome ani-ze raha iaby ananany ty olo [fa tsy Joba avao] mba hiarova ty ainy.” (Joba 2:4, 5) Ta hivola Satana hoe tsy tena tea ani-Jehovah Ndranahary tsika sady hivaliky aminy mba hiarova ty aintsika. Fa ty tena raty, ta hivola koa Satana hoe tsy tea antsika Ndranahary sady tsy misy dikany aminy ty ezaky ataontsika mba hampifalefalea azy. Tsy hino ani-vandini-Satana rezay tsika satria haintsika hoe ino ty teany hatao.

14. Manino ro manampy antsika hahay ty handrantsika ty raha sarotsy atrehintsika? Manomeza ohatsy.

¹⁴ Lafa miatriky raha sarotsy tsika le tokony hohararaotintsika raha rey mba handiniha ty vatantsika. Lafa niatriky raha sarotsy, ohatsy, Joba le lasa nihainy hoe ino ty raha sisany mampalemy azy, le nareniny raha rey. Lasa nihainy, ohatsy, fa mbo mila miezaky miambany ie. (Joba 42:3) Afaky mianatsy raha maro mikasiky ty vatantsika koa tsika lafa miatriky raha sarotsy. Nigadrà rahalahy mana anara Nikolay zay, * ndre narary mafy aza. Hoy ty asany: “Lafa zaho tam-prizon any le lasa nihaiko hoe ino iaby ty toetsy mbo mila iezahako.” Lafa haintsika hoe ino ty handrantsika, le azontsika atao ty miala azy.

15. Ia ro tokony hojanjinintsika, le ino ty antony?

¹⁵ Jehovah ro tokony hojanjinintsika fa tsy ty fahavalontsika. Nijanjy soa Joba lafa niresaky taminy Jehovah. Nametraky fanontanea maromaro taminy Ndranahary mba hanampea azy hahita hoe tena midary azy ie. Zao ty sisany amy fanontanea rey: ‘Tsy hitanao amy raha namboariko reo va fa mahery aho? Haiko ty raha iaby nahazo anao. Ataonao tsy ho vitako va ty mikarakara anao?’ Niambany Joba lafa namaly ani-Jehovah sady tena nankasitraky ty hasoa toetsini-Jehovah. Hoy ty asany: “Fa naharè mikasiky anao aho, fa henanizao le ty masoko mihintsy ro mahita anao.” (Joba 42:5) Mety mbo nipetraky tamy lavenoky teo Joba tamy ie nivola ani-safà reo, feno bay ty vatany, sady mbo nalahelo ani-anany nimaty rey ie. Fe ndre teo zay,  le nambarani-Jehovah hoe teany Joba sady nahazo hatò aminy.​—Joba 42:7, 8.

16. Laha hentea ty Isaia 49:15, 16, ino ty tokony hotiarovintsika avao lafa tsika miatriky raha sarotsy?

¹⁶ Mety hanambanimbany noho tsy hanisy dikany antsika koa ty olo henanizao. Mety hataon-drozy ze haharaty laza antsika kiraidraiky na ty fandaminantsika, le ‘amoronan-drozy vandy tsika ka asaran-drozy nanao kila raha raty iaby zao.’ (Mat. 5:11) Hitantsika amy tantarani-Joba iny fa matoky Jehovah hoe tsy hivaliky aminy mihintsy tsika lafa miatriky raha sarotsy. Tea antsika Jehovah. Tsy hengany mihintsy ze olo mitamà azy. (Vakio Isaia 49:15, 16.) Ka mifantoky amy ty fandratiratia ataoni-fahavalo-Ndranahary zany! Niatriky raha sarotsy sankarazany ty fianakaviani-rahalahy James, mipetraky a Tirkỳ any, le hoy ty asany: “Hainay hoe ho kivy zahay laha mijanjy ty vandy ataon’olo mikasiky ty vahoaki-Ndranahary. Farany nifantoky tamy raha tamanintsika mikasiky ani-Fanjakà iny zahay sady nazoto nanompo ani-Jehovah avao. Lasa nifalifaly avao zahay lafa nanao ani-zay.” Manao manahaky ani-Joba tsika ka mijanjy ani-Jehovah. Tsy handrava ty raha tamanintsika ty vandy ataoni-fahavalontsika.

17. Ino ty ianaranao baka amy modelini-lahilahy noho ampela tsy nivaliky resahy amy Hebreo toko faha-​11 ao reo?

¹⁷ Maro biby ty mpanomponi-Jehovah nibe herim-po noho nana finoa matanjaky lafa niatriky raha sarotsy, le raiky amy zay Joba. Mbo niresaky olo maro hafa koa apostoly Paoly lafa  nanoratsy taratasy ho ani-Hebreo rey. “Vavolombelo maro biby manahaky rahona” ty nikaihiny an-drozy. (Heb. 12:1) Samby niatriky raha sarotsy olo reo, fe nasehon-drozy tamy fiainan-drozy hoe tsy nivaliky tamy Jehovah mihintsy rozy. (Heb. 11:36-40) Nisera va ty fiareta noho ty asa mafy nataon-drozy? Tsy zay mihintsy! Ndre tsy nihitan-drozy aza ty fahatanterahani-raha iaby nampitamani-Ndranahary, le mbo nitamà ani-Jehovah avao rozy. Lafa nihain-drozy hoe nahazo hatò tamy Jehovah rozy, le natoky rozy fa hahita ty fahatanterahani-raha nampitamaniny. (Heb. 11:4, 5) Vomaiky hanampy antsika ho tapa-kevitsy hitamà ani-Jehovah avao ty modelin-drozy.

18. Tapa-kevitsy hanao ino iha? (Hebreo 11:6)

¹⁸ Vomaiky miharaty avao tontolo misy antsika toy henanizao. (2 Tim. 3:13) Tsy mieny Satana fa mbo mitsapa ty vahoaki-Ndranahary avao. Fe ndre ino ino ty raha sarotsy hatrehintsika, le loniky lahy tsika ho tapa-kevitsy hiasa mafy ho ani-Jehovah, satria tsika “mitamà ani-Ndranahary velo iny.” (1 Tim. 4:10) Tiarovo fa fitahia nameani-Jehovah ani-Joba rey le mampiseho fa “tena be fitiava Jehovah sady mamindra fo.” (Jak. 5:11) Loniky tsika tsy hivaliky amy Jehovah mihintsy, ka hatòky koa hoe hamaly soa “ani-ze sahira mila azy” Jehovah.​—Vakio Hebreo 11:6.