1. (a) O le ā le faamoemoe ua tuuina mai e Ieova iā i tatou? (e) O le ā le uiga o le “faamoemoe atu iā Ieova”? (Tagaʻi i le “Uiga o Faaupuga.”)

 UA TUUINA mai e Ieova se faamoemoe matagofie iā i latou e alolofa iā te ia. Ua toeitiiti ona faamutaina lea e Ieova o maʻi, faanoanoa ma le oti. (Faaa. 21:3, 4) O le a ia fesoasoani i “ē agamalu” o ē e faamoemoe atu iā te ia, e toe faafoʻisia le lalolagi i se parataiso. (Sala. 37:9-11) O le a fesoasoani foʻi Ieova ina ia maua e i tatou taʻitoʻatasi se faiā māfana ma ia, e sili atu nai lo le faiā o loo tatou olioli ai ma ia i le taimi lenei. Maʻeu se faamoemoe matagofie! Ae o le ā e faavae aʻe ai lo tatou mautinoa e taunuu moni folafolaga a le Atua? E lē mafai ona tala pepelo Ieova e uiga i ana folafolaga. O lea la, e iai māfuaaga talafeagai e tatou te ʻfaamoemoe atu ai iā Ieova.’ * (Sala. 27:14) E tatou te faia faapea, e ala i le faatalitali ma le onosaʻi ma le olioli i le taimi o le a faataunuu ai e le Atua ana folafolaga.​—Isa. 55:10, 11.

2. O ā mea ua faia e Ieova?

² Ua faamaonia mai e Ieova e na te faataunuuina ana folafolaga. Mātau se faaaʻoaʻoga mataʻina. I le tusi o Faaaliga, na folafola ai e Ieova o le a ia aoaoina i o tatou aso tagata mai i  atunuu uma, ituaiga ma nuu ma gagana, ma o le a ia autasia i latou i le tapuaʻiga moni. I aso nei, ua taʻua lenā vaega faapitoa o le “motu o tagata e toʻatele.” (Faaa. 7:9, 10) E ui e faia aʻe lenei vaega i tane, fafine, ma tamaiti mai i gagana uma ma atunuu eseese o le lalolagi, ae o se ʻauaiga filemu ma autasi. (Sala. 133:1; Ioa. 10:16) E maelega le motu o tagata e toʻatele i le talaʻiga. E latou te nofosauni e faailoa atu i so o se tasi e fia faalogo, lo latou faamoemoe i se lalolagi e sili ona lelei. (Mata. 28:19, 20; Faaa. 14:6, 7; 22:17) Pe afai o oe o se vaega o le motu o tagata e toʻatele, e mautinoa e matuā tāua iā te oe le faamoemoe i se lalolagi e sili ona lelei.

3. O le ā le sini o Satani?

³ E lē manaʻo le Tiapolo e te maua le faamoemoe mo le lumanaʻi. O lona sini o le faatalitonuina lea o oe, e lē manatu mamafa Ieova ma e na te lē faataunuuina ana folafolaga. Pe a taulau Satani i le aveesea o lo tatou faamoemoe, o le a iʻu ai ina tatou lotovaivai ma lē toe auauna iā Ieova. Na taumafai le Tiapolo e aveesea le faamoemoe o Iopu ma aua neʻi toe auauna iā Ieova.

4. O le ā o le a tatou iloiloina i lenei suʻesuʻega? (Iopu 1:9-12)

⁴ O le a tatou iloiloina i lenei suʻesuʻega, auala na taumafai Satani e faaaogā e aveesea ai le faamaoni o Iopu. (Faitau le Iopu 1:9-12.) O le a tatou iloiloina ai foʻi lesona e tatou te aʻoaʻoina mai i le faaaʻoaʻoga a Iopu, ma māfuaaga e manaʻomia ai ona tatou manatua e alofa le Atua iā i tatou ma o le a ia faataunuuina Ana folafolaga.

5-6. O le ā na tupu iā Iopu i se taimi puupuu?

⁵ Na sologa lelei le olaga o Iopu. Na olioli i se faiā vavalalata ma Ieova. E toʻatele ma autasi lona aiga, ma e tamaoaiga foʻi. (Iopu 1:1-5) Peitaʻi i le aso e tasi, na toetoe aveesea ana mea uma. Muamua, na aveesea lona tamaoaiga. (Iopu 1:13-17) Na maliliu uma foʻi lana fanau. Seʻi mafaufau i le matuā mafatia o Iopu i lenā taimi. E matuā faavauvau mātua pe a maliu se tasi o le fanau. Seʻi manatu la i le faateʻia, faavauvau ma le leai o se faamoemoe o Iopu ma lana avā ina ua maliliu si a la fanau e toʻasefulu. E lētioa a saeia e Iopu ona ofu, tagiauē ma faapaʻū faō i le eleele!​—Iopu 1:18-20.

⁶ Na sosoo ai ma le taia e Satani o Iopu i se maʻi e sili ona leaga, ma taumafai e aveesea lona faamaoni. (Iopu 2:6-8; 7:5) Muamua atu, na faaaloalogia e tagata Iopu. Na latou saʻili atu iā te ia mo fautuaga. (Iopu 31:18) Ae o lea ua latou ʻalofia ma inosia o ia. Na teena foʻi o ia e ona uso, ana uō vavalalata, e oo lava i ana auauna!​—Iopu 19:13, 14, 16.

7. (a) O le ā na talitonu ai Iopu i le māfuaaga o ona mafatiaga, ae o le ā e leʻi faia e Iopu? (e) I le ata, e ono faapefea ona fesagaʻia e se Kerisiano se tofotofoga?

⁷ Na manaʻo Satani e faatalitonu Iopu o le māfuaaga ona mafatiaga, ona ua lē fiafia le finagalo o Ieova iā te ia. O se faataʻitaʻiga, na faaaogā e Satani se matagi malosi e faaleagaina ai le fale na aai fiafia ai le fanau e toʻasefulu a Iopu. (Iopu 1:18, 19) Na ia faapogaia foʻi se afi e paʻū mai le lagi, ma susunuina ai manu ma auauna na tausia na manu. (Iopu 1:16) O lea la, na manatu ai Iopu na faapogaia e Ieova le matagi ma le afi ona na sau mai i le lagi. O le iʻuga, na talitonu Iopu ua ia faia se mea e lē fiafia ai le finagalo o Ieova. E ui i lea, e leʻi faifai Iopu i lona Tamā i le lagi. Na malamalama Iopu e tele tausaga na ia maua ai le tele o mea lelei mai iā Ieova. O lea, na ia manatu ai pe afai na fiafia e talia mea lelei, e tatau foʻi ona ia lotomalie e talia mea lē lelei.  Na ia faapea mai ai: “Ia viia pea le suafa o Ieova.” (Iopu 1:20, 21; 2:10) E ui na aveesea le tamaoaiga o Iopu, fasiotia lana fanau ma faaleagaina lona soifua mālōlōina, ae e leʻi aveesea ai lona faamaoni. Peitaʻi, e leʻi muta ai taumafaiga a Satani.

8. O le ā le isi auala na faaaogā e Satani iā Iopu?

⁸ O le isi auala a Satani, o le faaaogā lea o uō pepelo e toʻatolu a Iopu e faalotovaivaia ai o ia. Na tuuaʻia e nei tane Iopu, o ona mafatiaga e māfua ona o le tele o ana agasala. (Iopu 22:5-9) Na latou taumafai foʻi e faatalitonu Iopu, e tusa pe lē o ia o se tagata amioleaga ae e lē tāua i le Atua ana taumafaiga e faafiafia o ia. (Iopu 4:18; 22:2, 3; 25:4) O le mea moni, na latou taumafai e faatupu le masalosalo o Iopu i le alofa o le Atua ma lana tausiga iā te ia, ma le tāua o lana auaunaga i le Atua. O a latou faamatalaga na ono lagona ai e Iopu le leai o sona faamoemoe.

9. O le ā na fesoasoani iā Iopu e lototele ma faamalosi ai?

⁹ Seʻi faaata i lou mafaufau le vaaiga lenei. Na lagona e Iopu le matuā tigā a o nofo i le lefulefu. (Iopu 2:8) Na taumafai pea ana uō pepelo e toʻatolu e faaleaga lona talaaga. Sa pei o le mamafa o ni maa tofotofoga na ia fesagaʻia, a o matuā mafatia i le maliliu o lana fanau. I le taimi muamua, e leʻi tali atu Iopu. (Iopu 2:13–3:1) Pe afai na manatu uō a Iopu o lona lē tali atu o se faailoga lea o lona nofosauni e fulitua iā Ieova, na matuā sesē la o latou manatu. Na iai le taimi, na ea aʻe le ulu o Iopu, vaai saʻo atu i ana uō pepelo ma faapea atu: “Seʻia oo lava i loʻu oti, ou te lē aveesea loʻu faamaoni!” (Iopu 27:5) O le ā na fesoasoani iā Iopu e lototele ma faamalosi ai e ui i ona mafatiaga? E oo lava i le taimi na matuā lotovaivai ai Iopu, e leʻi aveesea ai lona faamoemoe e mafai e lona Atua alofa ona faaiʻuina ona mafatiaga. Na ia iloa e tusa lava pe  oti ai, o le a toe faatūina o ia e Ieova.​—Iopu 14:13-15.

10. O le ā e tatou te aʻoaʻoina mai i le tala iā Iopu?

¹⁰ Ua tatou aʻoaʻoina mai i le tala iā Iopu, e lē mafai e Satani ona faamalosia i tatou e fulitua iā Ieova ma e silafia e Ieova mea uma e tutupu. E fesoasoani le mea na tupu iā Iopu, e tatou te malamalama lelei ai i le māfuaaga na tutupu ai na mea. Seʻi iloilo nisi o lesona patino e mafai ona tatou aʻoaʻoina mai iā Iopu.

11. O le ā e tatou te mautinoa i ai pe a tatou maufaatuatuaina pea Ieova? (Iakopo 4:7)

¹¹ Na faamaonia mai e Iopu, pe afai e faaauau ona tatou maufaatuatuaina Ieova o le a mafai ona tatou tumau i so o se tofotofoga ma tetee iā Satani. O le ā le iʻuga? Ua faamautinoa mai i le Tusi Paia o le a sola ese le Tiapolo mai iā i tatou.​—Faitau le Iakopo 4:7.

12. Na faapefea ona faamalosia Iopu i le faamoemoe o le toetū?

¹² E tatau ona malosi lo tatou faatuatua i le faamoemoe o le toetū. E pei ona taʻua i le mataupu ua mavae, e taumafai Satani e faaaogā le fefe i le oti e aveesea ai lo tatou faamaoni iā Ieova. Na faapea mai Satani e fai e Iopu so o se mea lava ina ia faasaoina ai lona ola, e tusa lava pe e lē faamaoni ai i le Atua. Na matuā sesē lava Satani. Na oo lava i le taimi na manatu ai Iopu o le a oti e leʻi aveesea ai lona faamaoni i le Atua. Na tumau faamaoni o ia ona o lona mautinoa i le lelei o Ieova, ma le malosi o lona faamoemoe e iai le taimi o le a faasaʻo ai e Ieova mea. Na faatuatua Iopu, pe a lē faasaʻoina e Ieova mea a o ola o ia, e mautinoa o le a toe faatūina o ia i le lumanaʻi. Na moni iā Iopu le faamoemoe o le toetū. Pe afai e moni lenā faamoemoe iā i tatou, o le a lē mafai e le fefe i le oti ona aveesea ai lo tatou faamaoni.

13. Aiseā e manaʻomia ai ona tatou mataala i auala na faaaogā e Satani iā Iopu?

¹³ E tatau ona tatou mataala i auala na faaaogā e Satani iā Iopu, ona e talitutusa ma auala o loo ia faaaogāina iā i tatou i aso nei. Mātau le tuuaʻiga na faia e Satani: “O mea uma foʻi ua iai i le tagata [e lē na o Iopu] e avatu e ia e sui ai lona ola.” (Iopu 2:4, 5) O le mea moni na faapea mai Satani e tatou te lē alolofa moni iā Ieova le Atua, ma o le a tatou lē faamaoni iā te Ia pe a manaʻomia ona faasaoina o tatou ola. Na ia faapea mai foʻi e lē alofa le Atua iā i tatou, ma e na te lē amanaʻia a tatou taumafaiga e faafiafia o Ia. Talu ai e tatou te faamoemoe iā Ieova, e tatou te lē valea la i auala a Satani.

14. O le ā e mafai ona faailoa mai e tofotofoga e uiga iā i tatou? Ia faataʻitaʻi.

¹⁴ E tatau ona tatou vaai i tofotofoga o se avanoa e iloa ai le ituaiga tagata e iai i tatou. O tofotofoga na feagai ma Iopu na fesoasoani iā te ia e iloa ai ona vaivaiga ma faia suiga. O se faataʻitaʻiga, na iloa e Iopu e manaʻomia ona faateleina lona lotomaulalo. (Iopu 42:3) E mafai foʻi ona tatou iloa le ituaiga tagata e iai i tatou pe a feagai ma tofotofoga. Na faapea mai Nikolay, * o se uso na faafalepuipui e ui i le tugā o maʻi na maua ai: “O le falepuipui e tai pei o se masini e fai ai faata, e iloa ai uiga moni o se Kerisiano.” O le taimi lava e iloa ai o tatou vaivaiga, e mafai loa ona tatou galulue e faasaʻo.

15. O ai e tatau ona tatou faalogo i ai, ma aiseā?

¹⁵ E tatau ona tatou faalogo iā Ieova ae lē o tatou fili. Na uaʻi atoatoa atu Iopu a o fetalai mai Ieova. O le mea moni, na pei na talanoa atu le Atua iā Iopu e faapea: ʻPe na e vaaia le  malosi o loʻu mana e foafoaina ai mea? Ou te malamalama i mea uma o loo tutupu iā te oe. Pe e te manatu e lē mafai ona ou tausia oe?’ Na tali atu Iopu ma le lotomaulalo ma le matuā talisapaia o le lelei o Ieova. Na ia faapea mai: “Ua faalogo oʻu taliga e uiga iā te oe, a o lenei ua vaai atu oʻu mata iā te oe.” (Iopu 42:5) A o tautala atu o ia i na upu, o le taimi lenā o loo nofo i le lefulefu, lilofia lona tino i le papala ma faavauvau ona o le maliliu o lana fanau. E ui i lea, na faamautinoa atu e Ieova Lona alofa ma Lona finagalo malie iā Iopu.​—Iopu 42:7, 8.

16. E tusa ai ma le Isaia 49:15, 16, o le ā e tatau ona tatou manatua pe a feagai ma tofotofoga?

¹⁶ I aso nei, atonu foʻi e taufaifai mai tagata ma feutagaʻi ma i tatou e pei o ni tagata lē aogā. Atonu e latou te taumafai e faaleaga o tatou talaaga po o le talaaga o le faalapotopotoga, ma ʻtuuaʻia pepelo i tatou i mea leaga uma.’ (Mata. 5:11) O le tala iā Iopu ua tatou iloa ai e maufaatuatuaina e Ieova i tatou, o le a tatou tumau faamaoni iā te ia pe a feagai ma tofotofoga. E alofa Ieova iā i tatou ma e na te lē tuulafoaʻiina i latou e faamoemoe atu iā te ia. (Faitau le Isaia 49:15, 16.) Ia aua lava neʻi o tatou faalogo atu i so o se tala taufaaleaga e faia e fili o le Atua! Na faapea mai James o se uso mai i Take na fesagaʻia e lona aiga ni tofotofoga ogaoga: “Na matou iloa o le faalogo atu i pepelo e faatatau i tagata o le Atua, e faavaivaia ai i matou. O lea, na matou taulaʻi atu ai i le faamoemoe o le Malo, ma maelega pea i le auaunaga iā Ieova. O le iʻuga, na matou maua ai pea le olioli.” Ia tatou faalogo atu iā Ieova e pei o Iopu! E lē mafai e pepelo  a o tatou fili ona aveesea ai lo tatou faamoemoe.

17. O le ā e te aʻoaʻoina mai i faaaʻoaʻoga a tane ma fafine faamaoni o loo i le Eperu mataupu 11?

¹⁷ O Iopu o se tasi o auauna a Ieova, na tumau ona lototele ma faamalosi i taimi o tofotofoga ogaoga. Na taʻua e le aposetolo o Paulo i lana tusi i Eperu isi e pei o Iopu, o “se vaega e toʻatele o molimau.” (Epe. 12:1) Na feagai uma i latou ma tofotofoga ogaoga, ae na latou atiaʻe ni talaaga mataʻina o le faamaoni iā Ieova. (Epe. 11:36-40) Pe na aogā lo latou tumau ma a latou galuega mamafa? Na matuā aogā lava! Na latou faamoemoe atu pea iā Ieova, e ui e leʻi iai se folafolaga a le Atua na latou vāai o faataunuuina i o latou olaga. Na mautinoa e lenā vaega e toʻatele o molimau, ua latou maua le finagalo malie o Ieova. O lea, na latou mautinoa ai o le a latou vaaia le faataunuuina o ana folafolaga. (Epe. 11:4, 5) O a latou faaaʻoaʻoga e faamalosia ai pea lo tatou faamoemoe iā Ieova.

18. O le ā e te maumauaʻi e fai? (Eperu 11:6)

¹⁸ I aso nei, ua tatou ola i se lalolagi e sili ona leaga. (2 Timo. 3:13) E lē o muta taumafaiga a Satani e tofotofoina tagata o le Atua. Po o ā lava luʻi e tatou te fesagaʻia i le lumanaʻi, ia maumauaʻi pea e galulue mamafa mo Ieova, ma ia mautinoa “ua tuu atu lo tatou faamoemoe i le Atua soifua.” (1 Timo. 4:10) Ia manatua, o le taui na avatu e le Atua iā Iopu na faamaonia ai “e alofa faapelepele ma alofa mutimutivale Ieova.” (Iako. 5:11) Tau ina ia tatou tumau faamaoni foʻi iā Ieova, ma ia mautinoa o le a ia tauia “ē e matuā saʻili iā te ia.”​—Faitau le Eperu 11:6.