1. a) Nkongi djɛkɔnge djɛ Yehova ndatɔpɛyɛ? b) Kɛkɔnge kesakisola ‘nkongela me Yehova’? (Lenda “Djɛ ndjoka wɔlɔ.”)

 YEHOVA apɛyɛka anto ankfumɔ wɔkɔpa nkongi djɛ wɔlɔ efula. Lak’ilá nde angimɛ elando, tɛnyi, la nyɔyi. (Ndj. 21:3, 4) Nde angokotshɛ́ ase ‘okitshakitshɛ’ wakongela mende djɛ nde nkadjimola looko paradiso. (Yee. 37:9-11) Edjinge nde angonangha djɛ onto onkfumɔ wɔl’anteyi kɛso ndjala la djokanelo djɛ wɔlɔ nyande ndeka dj’oyɛso lande lɔɔko kɛnɛ. Ɔsɔngo nkongi djɛsɔ wɔlɔ! Iya donga djɛkɔnge djetotshinda djɛ ndjawola ente alaka wa Ndjambe wangokotshama? Yehova angokotshɛke wina enkfumɔ kɛnɛ k’otepelande. Lasɔ tolekɔ l’elonga k’iso ‘nkongela me Yehova.’ * (Yee. 27:14) Iso nyɛnyɛka nkambo djɛsɔ má nkonga la bale ntshitshi edjinge l’osasa onkfumɔ djɛ Ndjambe nkotshɛ alaka wande.​—Iza. 55:10, 11.

2. Kɛkɔnge kɛ Yehova ndomboshiyɛka nyɛnyɛ?

² Yehova amboshiyɛká nyɛnyɛ djɛ nde nkotshɛka alaka wande. Tokoshishima ndjɔmbɔmba kɛmɔtshi kɛ wɔlɔ efula. L’onkanda wɔ Ndjiso, Yehova alakaka ante l’etsho wɛso wɛnɛ, nde angotshumanyɛ anto wemá engindji enkfumɔ, tɔkɔlɛ tonkfumɔ l’etepela enkfumɔ, ko angasanghanyɛ l’etolo kɛ nsɔsɔlɔ. Lɔɔko kɛnɛ, oloyi wotshikitanyi w’anto wɔsɔ ndjetamaka ambɔ ‘oloyi w’ekekete w’anto.’ (Ndj. 7:9, 10) Kaanga yombokfumbama l’ampame, amato, la wana wa mposo yetshikitananyi, etepela edjinge anto wayisa má djena djetshikitanyi, oloyi w’anto wotshikitanyi  wɔsɔ wambokfumba nkfumbo kɛ wananyɔ l’ankaana kel’andja w’otondo kelekɔ lá vu la l’osanga. (Yee. 133:1; Dj. 10:16) Oloyi w’ekekete w’anto wɔsɔ mpoposanyɛka l’osasalo. Iwɔ walekɔ winá enkfumɔ entshupa djɛ mpoposanyɛ nkongi djɛwɔ djelendana l’andja wa bango le onto onkfumɔ wɔkɔpa ndawekameyɛ. (Mat. 28:19, 20; Ndj. 14:6, 7; 22:17) Ntsha olekɔ l’anteyi k’oloyi w’ekekete w’anto, ape l’ehamo nkongi djelendana l’akambo wa wɔlɔ wakɔpa nanghema djelekɔ ntshina efula le wɛ.

3. Okoma wɔkɔnge wolekɔ́ la Satana?

³ Djabolo nkombolaka nkotshitela nkongi djɛko. Okoma wɔnde nde nkotshinda djɛ wɛ ndjawola ente Yehova apakile yimba la apangokotshɛ alaka wande. Ntsha Satana ndonga djɛ ntotshitela nkongi djɛso, tongotshutshɛ oloko wolo, la tokoka kaanga ntshika nkambela Yehova. Etengo sɔngɛna, Djabolo ahonaká ntshinda Djɔbɔ djɛ ntshita nkongi djɛnde la ntshika nkambela Yehova.

4. Kɛkɔnge kɛ songoshishima lá djamba djɛnɛ? (Djɔbɔ 1:9-12)

⁴ Lá djamba djɛnɛ, tongoshishima mayɛlɛ wokambisá la Satana djɛ nde ntshinda Djɔbɔ djɛ ntshita nkɔmano djɛnde. (Wala Djɔbɔ 1:9-12.) Tongoshishima lonkina elakanyelo w’okokaso mba má ndjɔmbɔmba kɛ Djɔbɔ, edjinge lamo oyɛso ladjɛ mvungɔka ente Ndjambe ntɔkɔpaka la angokotshɛ alaka wande.

5-6. Kɛkɔnge kekomelisá Djɔbɔ l’itenyi yɛ wina?

⁵ Djɔbɔ ayalaki la lowiko lɔ wɔlɔ efula. Nde ayalaki la djokanelo djɛ ma ma nya Yehova. Nde ayalaki la nkfumbo k’ekekete kayalaki l’osanga, la ayalaki l’okfudji efula. (Djɔbɔ 1:1-5) Koko ngo lá lofu lɔmɔ, Djɔbɔ atshutshɛka nkete djɛnde nsuke la nkfumɔ. Ntondontondo, nde atshutshɛka okfudji wɔnde. (Djɔ. 1:13-17) Masɔ, wana wande ankfumɔ wavɔka. Kokanela nyangho djoyi djɛsɔ. Ambotshi wangoyalake l’otshutshumalo w’efula winá wovusɛwɔ kaanga wɔna ɔmɔ. Ya kokanela paa, yɛnyi, la otshutshumalo woyalisá la Djɔbɔ nya wadjɛnde winá w’iyoke ambɔ wana wawɔ ankfumɔ djomi wambovɔ. Djɛkondeke Djɔbɔ ndaate ntshendja djɛnde winá wɔ ndalelaka edjinge ndayakfɛyɛ lá looko!​—Djɔ. 1:18-20.

⁶ Masɔ Satana apɛyɛka Djɔbɔ olando wɔ wolo la wɔ nsɔnyi efula. (Djɔ. 2:6-8; 7:5) Ntondo k’akambo wasɔ ndokomela, Djɔbɔ alɛmɛyamaki efula me anto wa l’eleko kɛnde. Anto wayɛki lende ndohona alako. (Djɔ. 31:18) Winá wɔsɔ wambotateyɛ ndopengɔpengɔ. Wananyɔ wande, tolongo tɔnde tɔ ma ma, edjinge kaanga enkambi wɛnde w’okadjɛka!​—Djɔ. 19:13, 14, 16.

7. a) Djɔbɔ ndawolaka ante má elonga kɛkɔnge kɛnande ndjolo, ko kɛkɔnge kɛ ndotakɔpa nangha? b) Wopo wɔkɔnge Okristo okokande mpomana l’ohemba w’etengo w’okoka ndjɛlama la w’ɛnaso lá ntshango dj’itenyi yɛnɛ?

⁷ Satana akombolaki djɛ Djɔbɔ ndjawola ante ntsha nde ɛna ndjolo nde ladjikɛnde Yehova apowawola. Ndjɔmbɔmba, Satana akambaka la lompopo l’ekekete djɛ mvuta mvulu kɛ wana wa Djɔbɔ ankfumɔ djomi iyalɛka nkete esanga. (Djɔ. 1:18, 19) Nde akitshɛka lonkina iyɛ m’olongo djɛ ntshumba anyama yɛ Djɔbɔ la enkambi wɛnde walamaki anyama yɛkɔ. (Djɔ. 1:16) Ladjikɛnde lompopo la iyɛ iyɛka m’olongo, Djɔbɔ afɛnyɛka ante Yehova Ndjambe ndeke loyalisá Ikɔkɔ yɛ nkambo djɛsɔ. Ko eposelo weyalisá nde, Djɔbɔ awolaka ante nde akiyanyɛka Yehova lá lɛdji lɔmɔtshi. Koko kaanga iyayale nghɔsɔ, Djɔbɔ atatola Papa kɛnde kel’olongo. Djɔbɔ asipisoyɛka ante l’ilá k’ɛnɔnyi efula nde awaki nkete djɛ wɔlɔ lombobe me Yehova. Nde atɔnɔlaka ante ntsha nde awolaki nsasanga la nkete djɛ wɔlɔ, nde ladjɛ  ndjala entshupa djɛ ndjawola edjinge kɛnɛ kelekɔ́ nyɛtshi. Djɛkondeke ndatepela ante: ‘Djiina djɛ Yehova djekindjɛ numɛma.’ (Djɔ. 1:20, 21; 2:10) Kaanga Djɔbɔ ndatshutshɛ okfudji, wana wande, la ndayale l’olando lá demba, nde atshikalaka la nkɔmano te Yehova. Koko Satana atakoma ngo lasɔ.

8. Mayɛlɛ onkina wɔkɔnge wokambisá la Satana lá nkambo djɛ Djɔbɔ?

⁸ Satana akambaka la mayɛlɛ kenkina lá nkambo djɛ Djɔbɔ, nde atshindaka tolongo tosato tɔ nyɛtshi tɔ Djɔbɔ djɛ ndotshinda djɛ ndjawola ante nde alekɔ onto w’anyanya. Ampame yɛsɔ watepelaka ambɔ ndjolo yɛ Djɔbɔ yɛnyɛ djɛ nde ananghaka evunga wɛ nkekete efula. (Djɔ. 22:5-9) Lonkina, iwɔ wahonaka ndowawoyɛ ambɔ kaanga ntsha nde atayala onanghi wɔ mpekanto, Ndjambe apasasanga la welo enkfumɔ w’ilande djɛ ndosasangɛ. (Djɔ. 4:18; 22:2, 3; 25:4) Lá nsɔsɔlɔ, iyahonaka nde ntshinda Djɔbɔ djɛ nkanela ante Ndjambe apɔkɔpɛ, apayakiyanyɛ lá nkambo djɛnde, edjinge apalekɔ djonyi ndookambela. Etepela wɛwɔ wekokaka ntshinda Djɔbɔ djɛ nkanela ante lako kaanga nkongi lá nkambo djɛnde.

9. Kɛkɔnge kekotshisá Djɔbɔ djɛ ndjala l’oloko wolo edjinge la lokembo?

⁹ Kokanela nkambo djɛnɛ. Djɔbɔ mbosama ngo l’otoko, ko alekɔ la paa efula. (Djɔ. 2:8) Ntombe yɛnde wakindjɛ ndoshimela ambɔ apalekɔ onto wɔ wɔlɔ edjinge wanangha la wolo djɛ ndotshitela lokumu lɔnde. Ehemba wenanaki lande wemboyala odjito le nde etengo banga, edjinge alekɔ la yɛnyi y’efula l’oloko yɛ nyɔyi kɛ wana wande. Má bango, Djɔbɔ atshikalaka ngo vu. (Djɔ. 2:13–3:1) Ntsha ntombe yɛ Djɔbɔ wakanelaka ambɔ vu djɛnde djɛsɔ alekɔ ilembetelo yɛnyɛ ente nde angɔpɛyɛ Ontongi wɔnde ɔkɔngɔ, mbɔ koko wayadjimbaka. Lá mbamba kɛmɔtshi, Djɔbɔ inolaka ɔtɛ ko atokomelaka ntombe yɛnde y’engolo yɛsɔ ko ashimelaka ante: ‘Tii winá wɔ mongovɔ,  mpangotshika nkɔmano djɛmi!’ (Djɔ. 27:5) Kɛkɔnge kekotshisá Djɔbɔ djɛ nde ndjala l’oloko wolo edjinge la lokembo lɔ nghɔsɔ kaanga l’anteyi kɛ ndjolo inkfumɔ yɛsɔ? Kaanga winá wɔ ndalɛmbɛ, nde atatshutshɛ nkongi ante Ndjambe kɛnde kɛ ngandji angosuka. Nde ewaki ante kaanga ntsha ambovɔ, Yehova angookfundola.​—Djɔ. 14:13-15.

10. Kɛkɔnge ketolakanyɛ ɔkɔndɔ wɔ Djɔbɔ?

¹⁰ Ɔkɔndɔ wɔ Djɔbɔ ntolakanyɛka djɛ Satana apakoke ntotshinda la wolo dj’iso ntshika nkambela Yehova la lonkina Yehova ndjewaka akambo ankfumɔ waheta. Kɛnɛ kekomelisá Djɔbɔ nkoka ntokotshɛ́ lonkina dj’iso nsipisoyɛ wɔlɔwɔlɔ wayi walendana la nkambo djɛsɔ. Tokoshishima elakanyelo ɛmɔtshi wɛ kɔɔ w’okokaso mba me Djɔbɔ.

11. Ntsha iso nkindjɛ ndawɛkɛ te Yehova, eshikikelo kɛkɔnge kengoyala laso? (Djakɔbɔ 4:7)

¹¹ Djɔbɔ ɛnyɛka ante ntsha iso nkindjɛ ndawɛkɛ te Yehova, iso nkoka nkfulumeyɛ wopo w’ohemba onkfumɔ edjinge mpikama lá ntondo kɛ Satana. Lɔla lɔkɔnge longoyala? Afunelo ntoshikikɛka ante Djabolo angotolota.​—Wala Djakɔbɔ 4:7.

12. Wopo wɔkɔnge nkongi dj’ekfundwelo yakembɛ Djɔbɔ?

¹² Iso ladjɛ ndjala la djawo djɛ wolo tá nkongi dj’efundwelo. Etengo isɛnyi lá djamba djembohetá, Satana nkambaka efula la wɔma wɔ nyɔyi djɛ ntotshinda dj’iso ntshutshɛ nkɔmano djɛso. Lá nkambo djɛ Djɔbɔ, Satana apomelaka ikole ante, Djɔbɔ anghonangha kenkfumɔ kokokande nangha ayale kaanga ntshika nkambela Ndjambe djɛ nde mbikɛ lowiko lɔnde. Satana atepelaka ongolo. Ayale kaanga lá winá wɔ ndjolo wɔ Djɔbɔ ndɛnyi ante alekɔ nsuke la nyɔyi, nde atatshutshɛ nkɔmano djɛnde. Djawo djɛnde tá wɔlɔ wɔ Yehova la nkongi djɛ wolo djeyalisá lande ante ekom’ekomo Yehova angosembola akambo, okotshɛka djɛnde nkfulumeyɛ. Djɔbɔ ayalaki la djawo ante kaanga ntsha Yehova apasembolisa akambo winá woyɛnde la lowiko, Nde angookfundola l’etsho weyaye. Nkongi dj’ekfundwelo djayalaki nkambo djɛ nsɔsɔlɔ le Djɔbɔ. Ntsha nkongi djɛsɔ dekɔ nsɔsɔlɔ edjinge leso, mbɔ kaanga lá ntondo kɛ nyɔyi topangotshutshɛ nkɔmano djɛso.

13. Lamo oyɛso ladjɛ ndjila yimba efula lá tosawo tɔ mayɛlɛ tɔ Satana ndakambe djɛ mpemba Djɔbɔ?

¹³ Iso ladjɛ ndjila yimba efula lá tosawo tɔ mayɛlɛ tokambisá la Satana djɛ mpemba Djɔbɔ ladjikɛnde nde akamba la tosawo tɔkɔ tɔmɔ l’etsho wɛso wɛnɛ. Kekameyɛ kɛnɛ kɛ Satana ndatepela: ‘Onto [ape ngo Djɔbɔ toko] angɔpɛyɛ kenkfumɔ k’okotshɛnde djɛ mbikɛ lowiko lɔnde.’ (Djɔ. 2:4, 5) Ee, Satana apomelaka ikole ante topalekɔ la ngandji kɛ nsɔsɔlɔ te Yehova Ndjambe la tongotshika ndokambela ntsha kɛsɔ ndeke lɔlɔmbama djɛ mbikɛ lowiko lɔso. Satana apomelaka ikole lonkina ante Ndjambe apatɔkɔpɛ edjinge apile yimba lá welo wilaso djɛ ndoosasangɛ. Koko ladjikɛnde tewa tosawo tɔ mayɛlɛ tokamba la Satana, iso wanɛ wakongela me Yehova topangodjimbama.

14. Ehemba okokawɔ nyɛnyɛ nge leso? Pɛyɛ ndjɔmbɔmba.

¹⁴ Iso ladjɛ ndɔsa ehemba etengo mbamba ketokotshɛ́ dj’iso ndawewa isɔmɛlɛ. Ehemba wepomanisá la Djɔbɔ w’okotshɛka djɛ nde ndjewa wɛdju wɛnde la ndalɔngɔsɔla. Ndjɔmbɔmba, nde awaka olakanyelo ante ngo nde ndeka ndjala l’okitshakitshɛ. (Djɔ. 42:3) Edjinge iso tokoka ndawewa wɔlɔ winá woyɛso l’ohemba. Wɔnanyɔ Nikolay, * kanga liyavunde lá lokando kaanga ndayalaka l’elando wɛ nkekete, atepelaka ante: “Lokando alekɔ etengo mashinyi wɔ rayon-X, ntokotshɛka djɛ nyɛna wekeka w’Okristo wa l’eteyi.” Ntsha tombisola  wɛdju wɛso, tonghonangha la wolo djɛ ndalɔngɔsɔla.

15. Onto wɔkɔnge w’oyɛso ladjɛ ndjekameyɛ, ko lamo?

¹⁵ Iso ladjɛ ndjekameyɛ Yehova, koko ape antonyi waso. Djɔbɔ ekameyɛka la nkɔmɛ nkfumɔ winá wɔ Yehova ndasawolaka nyande. Ndjambe atɔnɔlaka nya Djɔbɔ edjinge ayalaka etengo oshimelaka ante: ‘Wɛ nyɛnaka etongelo kɛmi kɛ nkfulu? Lemi ndjewaka kenkfumɔ kekokomelisá. Okanelɛ nde ente mpakile yimba?’ Djɔbɔ akadjimolaka l’okitshakitshɛ onkfumɔ edjinge la djedjɛ dj’efula lá wɛlɔ wɛ Yehova. Nde atepelaka ante: ‘Atoyi wami wokaka wayi walendana la wɛ, koko winá wɔsɔ lambɔkɛna la wiso wami.’ (Djɔ. 42:5) Djɔbɔ ayalaki ngo l’otoko, demba djɛnde ndola kfu l’atshuku, edjinge wana wande lá anketa, winá wɔ ndatepelaka etepela wɛsɔ. Kaanga oyɛwɔ nghɔsɔ, Yehova ɛnyɛka ngandji kɛnde te Djɔbɔ la oshikikɛka ante Nde ndowawolaka.​—Djɔ. 42:7, 8.

16. Lá nkilika Izaya 49:15, 16, kɛkɔnge k’oyɛso ladjɛ mvungɔka winá wopomanaso l’ehemba?

¹⁶ Kaanga lɔɔko kɛnɛ, anto nkoka ntotola la ntonanghela akambo ngo ngete topalekɔ la ntshina. Iwɔ nkoka ntshita lokumu lɔso kana l’olonghanyelo wɔso la ‘ntomama wepo w’akambo ankfumɔ wa nyɛtshi.’ (Mat. 5:11) Tombowa olakanyelo m’ɔkɔndɔ wɔ Djɔbɔ ente, Yehova ndashikikɛka ante tongotshikala la nkɔmano te nde kaanga winá w’opomanaso l’ehemba. Yehova ntɔkɔpaka edjinge apakadjɛki kaanga ndambo daambi wanɛ wakongela me nde. (Wala Izaya 49:15, 16.) Totilake yimba kaanga ndambo daambi lá etepela wɛ nyɛtshi wetepela antonyi wa Ndjambe! James, wɔnanyɔ  ɔmɔtshi wolekɔ lá Turqui kanga nkfumbo kɛnde wɛnaka ndjolo l’ehemba wɛ wolo ntepelaka ante: “Tosipisoyɛka ente ndjekameyɛ engolo w’otepelawɔ lá nkambo dj’enkambi wɛ Ndjambe nkoka ntɔlɛmbɛ. Djɛkondeke tilaka yimba ngo lá nkongi djɛso djelendana l’Onkfumi la totshikalaka l’entete l’olemo wokambelaso Yehova. Eposelo weyalisá nde, totatshutshɛ́ osasa wɔso.” Ngo ngete Djɔbɔ, iso ndjekameyɛka Yehova! Engolo wetepela antonyi waso wepakoke ntotshitela nkongi djɛso.

17. Olakanyelo wɔkɔnge w’owɛ má ndjɔmbɔmba k’ampame l’amato wa nkɔmano w’otepelawɔ lá Hebero shapitrɛ 11?

¹⁷ Djɔbɔ alekɔ ngo ɔmɔtshi lanteyi k’enkambi wɛ Yehova weyalisá l’oloko wolo edjinge la wolo lanteyi k’ehemba. L’onkanda wɔnde ndafunela ase Hebero, ɔpɔstɔlɔ Poolo awalaka anto ankina efula, má ndaweta ante ‘oloyi w’ekekete w’ewakɛ.’ (Heb. 12:1) Yankfumɔ wapomanaka l’ehemba wɛ nkekete, koko watshikalaka la nkɔmano te Yehova lá lowiko lɔwɔ l’otondo. (Heb. 11:36-40) Okfulumeyelo wɔwɔ la olemo wɔwɔ wɔ wolo woyalaka anyanya? Lako! Kaanga yɔtɛná ekotshamelo k’alaka wa Ndjambe winá wɔ iyayalaka la lowiko, iwɔ wakindjɛka nkongela mé Yehova. Edjinge ladjikɛnde wayalaka l’eshikikelo ambɔ wawolamaki mé Yehova, iwɔ wayalaka la djawo ambɔ wangɛna ekotshamelo k’alaka wa Ndjambe. (Heb. 11:4, 5) Ndjɔmbɔmba kɛwɔ nkoka nkembɛ nkano djɛso djɛ nkindjɛ nkongela me Yehova.

18. Kɛkɔnge kɛ ngomboyashikikɛ djɛ nangha? (Hebero 11:6)

¹⁸ Towika lɔɔko kɛnɛ l’andja watakindjɛ ntshɔ ngo tá nyɛtshi. (2 Ti. 3:13) Satana atatshike mpemba enkambi wɛ Ndjambe. Ayale ekakasano wɛkɔnge wetokongela, nyontshɔ toyapɛyɛ l’olemo wɔ Yehova, la ndashikikɛ ente ‘tombilá nkongi djɛso le Ndjambe kewika.’ (1 Ti. 4:10) Tovungɔ ente, ɛtshɔkɔ wɛ Djɔbɔ ndowaka me Ndjambe nyɛnyɛka djɛ ‘Yehova alekɔ la ngandji k’efula edjinge la nkɛtshi.’ (Dja. 5:11) Nyontshɔ totshikale la nkɔmano te Yehova, la ndashikikɛ ente nde angofuta ‘wanɛ w’ohona l’oloko ɔmɔ.’​—Wala Hebero 11:6.