1. (a) Yehowa mmuitupe lukulupilo kinyi? (b) “Kukulupila mui Yehowa” akupushisha kinyi? (Tala “Kishima kiabadi bapatuule.”)

 YEHOWA mmupe baaba booso bamufule lukulupilo lui buwa bukile. Mu kapindi kapeela amu afuisha nfudiilo a buntomboshi, a kinyongua, na a lufu. (Kibaf. 21:3, 4) Akakuasha bantu “beyishe” bamukulupile, buabadia kualuula nsenga bu mpaladiso. (Mis. 37:9-11) Na dingi, mukite bia’shi muntu ooso akuatudi ekadikie n’aye mu kipuano ki bukopo na ki buwa ngofu kubanga binobino. Luno nyi ndukulupilo lui buwa bukile! Anka nkinyi kiatudia kukita bua kukumiina’shi milayilo y’Efile Mukulu ayikekadika ya binyibinyi? Yehowa t’akutuaa kulombasha milayilo yaye. Tui na kabingilo ke buwa katudia “kukulupila mwi Yehowa.” * (Mis. 27:14) Atuibilesha p’atutengiela na luishinko looso na muloo Efile Mukulu eetu p’akalombasha milayilo yaye yoso.​—Yesh. 55:10, 11.

2. Nkinyi kiabadi bapue kukita kui Yehowa?

² Yehowa mmuleshe’shi alamaa milayilo yaye. Tubandeyi kutala kileshesho kimune. Mu mukanda wa Kibafumbwilwe, Yehowa mulee’shi mu ano mafuku eetu, akabungu bantu na miilo yoso, bisamba bioso, na ndimi yoso buabadia kuikala mu buumune mu lulanguilo luaye. Lelo uno, kino kisaka kia bantu, akimueka patooka na akiuukibua bu “kibumbu kikata.” (Kibaf. 7:9, 10) Kino kisaka ki na bantu belekeenelekeene, balume, bakashi, bana belekeene ku makoba, belekeene ku ndimi, ku ma mbalo abadi bakudile, booso be mu butaale na mu buumune mu nsenga ishima. ( Mis. 133:1; Yo. 10:16) Bano booso ba mu kisaka kikata, mbalungudi ba mukandu wi buwa baasha kisumi. Abalungulaa pabitale lukulupilo luabo lui buwa, mu nsenga ishima kui muntu ooso akumiina kuibateemesha. (Mat. 28:19, 20; Kibaf. 14:6, 7; 22:17) Su we a mu kibumbu kikata, kushi mpaka okuete kukulupila bintu bi buwa abifiki na bi na muulo ukata koodi.

3. Satana e na kepatshila kinyi?

³ Diabulu akumiina nkuiba lukulupilo loobe. Kepatshila kaye nka’shi okumiine’shi Yehowa t’akupasukilaa na’shi t’alombashaa milayilo yaye. Su Satana bobesha kuituiba lukulupilo luetu, tui balombene kushimisha eshimba dinyingie na tui balombene kuleka kufubila Yehowa. Nka bu bi’atuibimono, Diabulu batompele kuiba Yoobo lukulupilo luaye na kumukitshisha bua’shi alekie kufubila Yehowa.

4. Nkinyi ki’atukataluula mu uno muisambo? (Yoobo 1:9-12)

⁴ Mu uno muisambo, atukataluula mayele a Satana abaadi mufubishe bua’shi akitshishe Yoobo pa bukopo bua kushimisha kululama kuaye. (Badika Yoobo 1:9-12.) Atukesambila dingi, kiatudi balombene kulongiela ku kileshesho kia Yoobo, na buakinyi abitungu tutentekieshe’shi Efile Mukulu mmuitufule na akalombasha milayilo Yaye.

5-6. Nkinyi kibafikidiile Yoobo mu mafuku apeela?

⁵ Yoobo baadi na nshalelo e buwa. Baadi asangeela kipuano kiaye na Yehowa. Baadi na muloo wi bungi mu kifuko kiaye, na baadi na bupeta bui bungi. (Yob. 1:1-5) Anka dingi efuku, Yoobo baadi mushimishe bintu bioso. Kumpala bashimiishe bupeta buaye. (Yob. 1:13-17) Dingi bana baye booso baadi mufule babafuile. Banda kunangushena lukalakashi bukata lubaadi nalo mu kiakia kipungo. Banambutuile abakalakashibuaa ngofu, nsaa ayifu muana umune a ku bana baabo. Banda kunangushena bukata bua kenyongoshi, bubaadi bupushe Yoobo na mukashi aaye pababauukile’shi bana baabo booso ekumi babaafu. Tatua kukaanya, Yoobo baadi musaane bilamba biaye adila maalo, ashaala mpaa na mu nsenga!​—Yob. 1:18-20.

⁶ Satana baadi dingi mukiengieshe Yoobo ngofu na maladi. (Yob. 2:6-8; 7:5) Kumpala kua ano makienga, bantu babaadi abaneemeka Yoobo ngofu. Bantu babaadi abafiki kuadi mu kuteka malango. (Yob. 31:18) Binobino, bantu abamusumbushena. Babaadi bamusumbushene kui bakuabo, bakuuku baye ba kifulo, mpaa na kui bafubi baye ba mu nshibo yaye’ye nabene!​—Yob. 19:13, 14, 16.

7. (a) Nkinyi kibaadi Yoobo mukumiine pa muanda wa dikienga diaye, kadi nkinyi kiashi mukumiine kukita? (b) Muina Kidishitu mmulombene kunyingiila nkalakashi ifuanene na i pa kifuatulo ki kipusu mushindo kinyi?

⁷ Satana baadi akimbi bia’shi Yoobo akumiine’shi, kuete akiengie ku muanda’shi Yehowa mmumufiitshile munda. Bu kileshesho, Satana baadi mufubishe kipapi ki bukopo bua kuipaa bana ba Yoobo ekumi babaadi mu nshibo abadi biakudia pamune. (Yob. 1:18, 19) Satana baadi mufubishe dingi kaalo, kabaadi akayiki muiyilu bua kuipaa nyema yoso ya Yoobo, anka bafubi baye babaadi bakaluilue ku kaaka kaalo. (Yob. 1:16) Pa muanda kipapi na kaalo bibaadi abifiki muiyilu, anka paapa, Yoobo baadi munangushene’shi abifiki kui Yehowa. Bu kipeta, Yoobo baadi mukumiine’shi Yehowa ngi mumufiitshile munda. Sunga mbiabia, Yoobo baadi mupele kusumbushena Nshaye a muiyilu. Yoobo baadi auuku’shi munda a bipua bi bungi, baadi apete bintu bi bungi bukile abifiki kui Yehowa. Baadi munangushene’shi su e na muloo wa kukumiina bintu bi buwa, abitungu akumiine dingi bintu bi bubi. Biabia, Yoobo bambile’shi: “Eshina dya Yehowa dyende ntumbo.” (Yob. 1:20, 21; 2:10) Sunga mbibaadi Yoobo mushimishe makuta aaye e bungi, bana baye, na mbidi yaye ibaadi buwa,  baadi mushaale nka na lulamato kui Yehowa. Anka Satana ta mmulekie kumutompa.

8. Mmayele kinyi abaadi Satana mufubishe dingi kui Yoobo?

⁸ Satana bafubiishe’nyi angi mayele kui Yoobo; baadi mutakule bakuuku baye basatu, bua’shi bafikie mu kulesha Yoobo epushe bu shi na muulo. Bano bana balume, babaadi balungule Yoobo’shi akiengie pa muanda wa’shi mmukite mianda i bungi i bubi. (Yob. 22:5-9) Babaadi dingi abekitshisha bua kumukuminyisha’shi su ta nkitshishi a bubi, kuikitshisha kuaye kooso kubadia kuikadika akusankisha Efile Mukulu na kubadia kuikadika na muulo kuadi. (Yob. 4:18; 22:2, 3; 25:4) Babaadi abatompo kukitshisha Yoobo bua’shi, afikie mu kunangushena’shi, Efile Mukulu ta mumufule. Na’shi Ta mmulombene kumupasukila na’shi T’ataa na muulo midimo yaye y’Amufubila. Uno ngakuilo aabo, baadi mulombene kutakula Yoobo mu kuipusha’shi sunga mu muanda waye, ta mmulombene kuikadika na lukulupilo.

9. Nkinyi kibakuashishe Yoobo bua kuikala n’eshimba dinyingie na bukome?

⁹ Tubandeyi kutala uno muanda. Yoobo baadi ashaala mu buto, muanda wa kenyongoshi kakata. (Yob. 2:8) Bakuuku baaye, babaadi abatungunuka na kumuakula’shi nta muntu e buwa, ta kui kintu su nkimune kiadi mukite ki na muulo bua kuluisha nkumo yaye. Bitompuanga biaye bi bushito kuadi nka bu mabue, mpaa na kinyongua kia kushimisha bana baye, kikuete kumuluisha eshimba. Kumpala, Yoobo baadi muumiine. (Yob. 2:13–3:1) Su bakuuku ba Yoobo babaadi baluule kuumiina kuaye’shi nyi nkitunduilo kia’shi Yoobo bealusha kui Mupangi aaye, babaadi be bubi bukile. Ingi nsaa, Yoobo baadi abusha mutue waye atalanga bakuuku baye ba madimi na kuamba’shi: “Mpaa na pa nkafuila, ntaanandekie kululama kuande!” (Yob. 27:5, NWT) Nkinyi kibaadi kikuashe Yoobo buadia kuikala n’eshimba dinyingie na bukome munkatshi mua makienga aaye ooso? Sunga nsaa ibaadi Yoobo mutshobolokie, ta baadi  mushimishe lukulupilo luaye lua’shi Efile Mukulu aaye sha kifulo, atungunuka na kumukuasha nya. Baadi auuku’shi sunga afua, Yehowa ana musangule.​—Yob 14:13-15.

10. Muanda wa Yoobo awitulongiesha kinyi?

¹⁰ Muanda wa Yoobo awitulongiesha’shi, Satana ta mmulombene kuitukitshisha pa bukopo buatudia kusumbushena Yehowa nya, na’shi Yehowa auuku muanda ooso kalolo. Na muanda wa Yoobo ngulombene’nyi dingi kuitukuasha, buatudia kuikadika na mpushisho e buwa a mianda yoso ayituku. Tubandeyi kutala angi malongiesha atudi balombene kulongiela kui Yoobo.

11. Su tubatungunuka na kulupila mui Yehowa, nkinyi ki’atuikala bashinkamishe? (Shake 4:7)

¹¹ Yoobo mmuleshe’shi su tuatungunuka na kulupila mui Yehowa, tui balombene kunyingiila kitompuanga kioso kiakia na tui koobesha kubianduila Satana. Bi kutusha kipeta kinyi? Bifundue abitushinkamiisha’shi Diabulu, asuuku kula netu.​—Badika Shake 4:7.

12. Mmushindo kinyi ubaadi lukulupilo lua lusangukilo lunyingishe Yoobo?

¹² Abitungu tuikadikie na lukulupilo lui bukopo mu lusangukilo. Nka bu biatuibimuene mu muisambo ushaale, Satana kuete afubisha moo wa lufu bua’shi atue tusumbushene kululama kuetu. Mu muanda wa Yoobo, Satana baadi amono’shi Yoobo mmulombene kukita kintu kampanda, akikutuena na kululama kuaye bua’shi akutue kupaashibua. Satana baadi bubi bukile. Sunga nsaa ibaadi Yoobo mumone’shi takiebe kufua, bashadile nka na lulamato kui Yehowa. Kishinkamiisho kiaye kia kalolo ka Yehowa, na lukulupilo luaye lui bukopo lua’shi Yehowa mmulombene kukita nka mianda i buwa, mbimukuashe buadia kunyingiila. Yoobo baadi na lukumiino lua’shi sunga Yehowa ta mmulumbuule mianda paki na muwa, Akamubusha mu mafuku aafiki. Lukulupilo lua lusangukilo, lubaadi lua binyibinyi kui Yoobo. Su tui na luno lukulupilo binyibinyi, moo wa lufu ta ngulombene kuitukitshisha bua’shi tushimishe kululama kuetu nya.

13. Buakinyi abitungu tudimukile mayele a Satana abaadi mufubishe kui Yoobo?

¹³ Abitungu tudimukile mayele abaadi Satana mufubishe kui Yoobo, muanda kuete afubisha aa mayele amune kuatudi lelo uno. Tala abitufundaa Satana: ‘Muntu [kushi penda Yoobo] akatuusha kyooso kyadi nakyo bwa muuwa waye.’ (Yob. 2:4, 5) Biabia, Satana amonaa’shi ta tui balombene kufula Yehowa Efile Mukulu binyibinyi nya, na’shi tui balombene kumutombokiela su abitungu tupaashe muwa wetu. Satana apuandikishaa’shi Efile Mukulu ta muitufule, na’shi t’amonaa kuikitshisha kuetu kuatukitaa bua kumusankisha nya. Ku muanda atuuku’shi Satana kuete ekitshisha buadia kuitukambila, ta tui balombene kukumiina ano madimi aaye nya.

14. Bitompuanga mbilombene kuitulesha kinyi ki muatudi? Tusha kileshesho.

¹⁴ Abitungu tumone bitompuanga bu mushindo watudia kuiwuka kiatudi bekale atue banabene kalolo. Bitompuanga bibaadi Yoobo mufumankane nabio, bibamukuashiishe buadia kutundula kungi kubofula kui muadi na bua kuikulumbuula. Bu kileshesho, bauukile’shi e na lukalo lua kukimba eyikashi dia kuiyisha ngofu. (Yob. 42:3) Na atue namu tui balombene kulonga bi bungi pa bitutale atue banabene, nsaa y’atunyingiila bitompuanga. Mukuetu mulume abetanyinaa bu Nikolay, * Babaadi bamuele mu lukano na baadi akiengie ngofu pa muanda wa mikumbo, amba’shi: “Lukano lui nka bu kiamo kia radiographie, akindesha ngikashi ya buina Kidishitu yanshi nayo.” Su tubatundula kubofula kuetu, tui balombene kuikitshisha bua kuikulumbuula.

15. Abitungu’shi tuteemeshe nnanyi, na buakinyi?

 ¹⁵ Abitungu tuteemeshe Yehowa, kushi kuteemesha beshikuanyi betu. Yoobo baadi ateemesha kalolo nsaa ibaadi Yehowa akula naye. Efile Mukulu baadi munangushene na Yoobo pa kuamba’shi: ‘Bomono bukome buande bua kupanga? Nauuku kalolo kintu kioso kikukitshikile. Onangushena’shi ntshi mulombene kukupasukila?’ Yoobo baadi mualuule na kuiyisha kooso, na atumbula Yehowa bua kalolo kaye. Bambile’shi: “Naapushanga nkumo yoobe kwi babeesambanga, binobino neemwen’ami nabeene.” (Yob. 42:5) Yoobo baadi mushaale mu buto, mbidi yaye ibaadi i na malonda, na bana baye mbapue kushiikibua, nsaa ibaakuile ano mayi. Sunga mbiabia, Yehowa baadi mushinkamiishe Yoobo kifulo Kiaye, na kumushinkamiisha’shi mmumukumiine.​—Yob. 42:7, 8.

16. Muyile mukanda wa Yeeshaya 49:15, 16, nkinyi akitungu’shi tutuule mu binangu bietu nsaa y’atufumankana na bitompuanga?

¹⁶ Sunga lelo uno namu, bantu mbalombene kuitukaa na kuitukitshiina mianda nka bu atue bashi na muulo. Mbalombene kutompa kuluisha nkumo yetu’tue banabene, sunga ya ndumbuluilo eetu ‘pabetuamba mianda yoso ibi yaya ya madimi.’ (Mat. 5:11, Kilombeeno Kipya 2014) Muanda wa Yoobo awitulongiesha’shi, Yehowa mmushinkamishe’shi atushaala nka na lulamato kuadi nsaa y’atufumankana na bitompuanga. Yehowa mmuitufule na t’anaasumbushene baaba booso bakulupile muadi nya. (Badika Yeeshaya 49:15, 16.) Tatukumanga kuteemesha, ku mianda yoso i bubi yaya y’abetuamba kui beshikuanyi b’Efile Mukulu! James, mukuabo mulume na Turkey babaadi bafumankane na bitompuanga bi bukopo mu kifuko kiabo, amba’shi:  “Tubamuene’shi kuteemeshanga madimi abakula pabitale muilo w’Efile Mukulu, mbilombene kuitutshobolosha. Biabia, tubaadi batuule binangu bietu nka ku lukulupilo luetu lua Bufumu, na tubatungunukile na kufubila Yehowa. Bu kipeta, tuibalame muloo wetu.” Anka bu Yoobo, tuteemesheyi Yehowa! Madimi a beshikuanyi betu, ta ngalombene kuluisha lukulupilo luetu nya.

17. Nkinyi kiodi mulombene kulongiela ku bileshesho bia balume na bakashi baasha lulamato babadi bateemune mu mukanda wa Bena-Ebelu shapitre 11?

¹⁷ Yoobo nyi ngumune a ku bafubi ba Yehowa, babalamine eshimba dinyingie na bukome mu bipungo bia bitompuanga bi bukopo. Mu mukanda wa Mpoolo mutumibua kui Bena-Ebelu, balesheshe bangi bantu be bungi, babetanyina bu “kisaka kikata kya tumonyi.” (Eb. 12:1) Abo booso babaadi bapete bitompuanga bi bukopo; anka sunga mbiabia, mbashaale nka na lulamato kui Yehowa mu nshalelo aabo. (Eb. 11:36-40) Kunyingiila kuabo na kuikitshisha kuabo, kubaadi kua bisumanga su? Nya! Sunga mu mafuku abaabadi baki na muwa, ta mbamone kulombana kua milayilo yoso y’Efile Mukulu, babatungunukile nka na kulupila mui Yehowa. Na pa muanda babaadi bashinkamishe’shi mbakuminyibue na Yehowa, babaadi bashinkamishe’shi abakamona kulombana kua milayilo yaye. (Eb. 11:4, 5) Bileshesho biabo, mbilombene kunyingisha kitshibilo kietu kia kutungunuka na kukulupila mui Yehowa.

18. We na kitshibilo kia kukita kinyi? (Bena-Ebelu 11:6)

¹⁸ Lelo uno, tui bashaale mu nsenga ikuete kuenda na kuluila ngofu kuifuku n’efuku. (2 Tim. 3:13) Satana t’alekiele kutompa muilo w’Efile Mukulu nya. Sunga tuapeta nkalakashi i naminyi, tui kaleyi nka na kitshibilo kia kufubila Yehowa ngofu, bashinkamishe’shi, “atukulupila mwi Efile Mukulu e na muwa.” (1 Tim. 4:10, Kilombeeno Kipya 2014) Tentekiesha bipeta bibaadi Efile Mukulu mupe Yoobo, bua kulesha’shi “Yehowa muwule ndaa na kifulo na lusa.” (Shak. 5:11) Tui balombene na atue namu kushaala na lulamato kui Yehowa, bashinkamishe’shi aye ngi “afutaa baaba abamukimbi.”​—Badika Bena-Ebelu 11:6.