1. (a) Andi Jehovah paamusi u? (b) Andi a kë taki u „futoou Jehovah”? (Luku di pisi „Soni di taki möön fini”.)

 JEHOVAH paamusi dee sëmbë dee lobi ën taa de o feni bunu a di ten di ta ko. Abiti möön a o puu siki, tjali ku dëdë (Ako. 21:3, 4). A o heepi dee „sakafasi sëmbë” dee ta futoou ën u de mbei di goonliba toon wan paladëisi (Ps. 37:9-11). Söseei a o heepi hiniwan fuu fuu ku ën ko dë mati a wan apaiti fasi. Di soni aki dë wan gaan soni seei! Ma andi ta mbei u ta biibi taa dee soni di Gadu paamusi u aki o pasa tuutuu? Hii juu Jehovah ta du dee soni dee a paamusi u. Nöö fëën mbei u sa „futoou Jehovah” * (Ps. 27:14). U ta lei taa u ta futoou Jehovah te u ta wakiti ën ku pasensi, söseei te u ta wakiti ën ku wai faa du dee soni dee a paamusi u.​—Jes. 55:10, 11.

2. Andi Jehovah du kaa?

² Jehovah lei u kaa taa hii juu a ta du dee soni dee a paamusi u. Kai pakisei a di apaiti woto aki. A di buku Akoalimbo, Jehovah bi taki taa a di ten fuu aki a o tja sëmbë u peipei nasiön, lö ku töngö ko a wan u de dini ën makandi. A di ten aki, u sabi  dee sëmbë aki kuma dee „gaan hia sëmbë” (Ako. 7:9, 10). Hii fa di gaan kulupu aki abi womi, mujëë ku miii u hii së u goonliba, tökuseei de ta libi fiifii makandi kuma wan famii (Ps. 133:1; Joh. 10:16). Söseei dee sëmbë aki da sëmbë di ta peleiki fajafaja. Hii juu de ta dë kabakaba u konda soni u di njunjun goonliba da dee sëmbë dee kë haika (Mat. 28:19, 20; Ako. 14:6, 7; 22:17). Ee i da wan u dee sëmbë dë, nöö an dë u taki taa dee soni dee Gadu paamusi u u di njunjun goonliba, dë wan gaan soni da i.

3. Andi Saatan kë?

³ Saatan an kë fii feni gaan bunu a di ten di ta ko. A kë fii biibi taa Jehovah an ta booko hën hedi ku i, söseei taa an o du dee soni dee a paamusi i. Ee Saatan dou di maaka fëën aki, nöö woo lasi hati, söseei woo tapa u dini Jehovah tu. Woo luku unfa Saatan bi pooba u mbei Jöpu an futoou Jehovah möön, söseei faa tapa u dini ën tu.

4. Andi woo luku a di woto aki? (Jöpu 1:9-12)

⁴ A di woto aki, woo taki u dee fasi fa Saatan bi pooba u mbei Jöpu an hoi hënseei a Jehovah möön. (Lesi Jöpu 1:9-12.) Söseei woo luku andi u sa lei u di woto u Jöpu, faandi mbei wa musu fëëkëtë taa Gadu lobi u, söseei taa a o du dee soni dee a paamusi u.

5-6. Andi bi pasa ku Jöpu a wan kölö pisiten?

⁵ Hii soni bi nango bunu a di libi u Jöpu. Hën ku Jehovah bi dë gaan mati. A bi pai hia mii, a bi abi wan suti wosudendu libi, nöö a bi gudu seei (Jöpu 1:1-5). Ma a wan kodo daka dendu, hën a lasi bëina hii soni di a bi abi. Dee mbeti fëën da dee fosu soni di a lasi (Jöpu 1:13-17). Hën baka di dë, hën hii dee mii fëën tuu dëdë. Pakisei unfa di soni aki bi dë da Jöpu. A ta hati wan mama ku wan tata gaanfa seei te wan mii u de lasi libi. Nöö i sa fusutan unfa di soni aki bi hati Jöpu ku hën mujëë tjika, di hii dee teni mii u de tuu lasi libi a wan kodo daka. Fëën mbei Jöpu tënë di koosu di bi dë nëën sinkii, hën a tjökö kini a goon ta bai ta këë!​—Jöpu 1:18-20.

⁶ Baka di dë, Saatan bi mbei Jöpu kisi wan gaan taku siki di mbei sëmbë bi ko ta si ën kuma sösö sëmbë (Jöpu 2:6-8; 7:5). Ufö di soni aki bi miti Jöpu, nöö Jöpu bi dë wan sëmbë di hii sëmbë bi ta lesipeki. Sëmbë bi lo’ u go suku köni lai nëën (Jöpu 31:18). Ma nöunöu sëmbë an bi ta kë ko zuntu ku ën möön. Dee baaa fëën an bi dë nëën du möön, söseei dee mati fëën ku dee futuboi fëën seei an bi dë nëën du möön!​—Jöpu 19:13, 14, 16.

7. (a) Andi da di soni di Jöpu bi si kuma bi mbei fuka bi ta miti ën, ma andi an bi kë du? (b) Unfa dee tesi dee ta miti wan Keesitu sëmbë sa dë kuma di u ta si a di peentje?

⁷ Saatan bi kë u Jöpu biibi taa soni bi ta miti ën, u di Jehovah an bi ta feni ën u bunu möön. Saatan bi mbei wan gaan ventu ko booko di wosu ka hii dee teni mii u Jöpu bi dë ta njan makandi (Jöpu 1:18, 19). A bi mbei faja kumutu a liba ala tu ko kii dee mbeti u Jöpu ku dee futuboi fëën dee bi ta luku dee mbeti tuu (Jöpu 1:16). U di di ventu ku di faja bi kumutu a liba ala, mbei Jöpu bi si kuma Jehovah hën bi ta du dee soni aki ku ën. Di soni aki bi mbei Jöpu ko ta si kuma a bi du wan soni di bi mbei Jehovah hati boonu ku ën. Hii fa Jöpu bi ta pakisei sö, an bi kë siba di Tata fëën di dë a liba ala. Jöpu bi sabi taa Jehovah bi mbei a feni sömëni gaan bunu a dee jaa dee bi pasa. Nöö fëën mbei a bi pakisei taa ee a bi tei dee bunu dee  Jehovah bi dëën, nöö a bi musu dë kabakaba u tei dee hogi soni tu. A bi taki taa: „Be sëmbë gafa di në u Jehovah u nöömö” (Jöpu 1:20, 21; 2:10). Hii fa Jöpu bi lasi dee gudu fëën ku dee mii fëën, söseei hii fa a bi ko dë ku suwaki, tökuseei a bi hoi hënseei a Jehovah go dou. Ma Saatan bi o mbei woto soni miti Jöpu jeti.

8. Un woto soni Saatan bi du ku Jöpu jeti?

⁸ Saatan bi du wan woto soni ku Jöpu jeti. A bi tei dii sëmbë di bi ta taki taa de dë mati u Jöpu, u mbei Jöpu fii kuma an bunu tjika. Dee womi aki bi taki taa fuka bi ta miti Jöpu, u di a bi du sömëni hogi (Jöpu 22:5-9). Söseei de bi kë lei Jöpu taa aluwasi fa a bi ta du bunu soni seei, tökuseei Gadu an bi o si dee bunu dee a bi ta du u soni (Jöpu 4:18; 22:2, 3; 25:4). De bi kë u Jöpu si kuma Gadu an lobi ën, taa an bi o luku ën, söseei taa an bi o si di dini di Jöpu ta dini ën u soni. Dee soni di de bi taki bi sa mbei Jöpu si kuma sö nöö libi fëën bi o dë kaa.

9. Andi bi heepi Jöpu faa hoi dou?

⁹ Pakisei di soni aki. Jöpu dë sindosindo a sindja liba, ku sinkii hati (Jöpu 2:8). Dee mati fëën ta piki ën taa hën na bumbuu sëmbë, söseei taa an du wan bumbuu soni wan daka möönsö. Dee soni dee miti Jöpu ta hebi dëën gaanfa seei. Söseei a dë ku gaan fuka a hati, u di dee mii fëën dëdë. Bigibigi Jöpu dë fëën piii. An ta piki dee mati fëën (Jöpu 2:13–3:1). Ma ee dee womi aki bi ta si kuma Jöpu bi o bia baka da Jehovah u di an bi ta piki de, nöö ganjan seei de bi ta ganjan deseei. Biga baka wan pisiten, hën Jöpu bi taki taa: „Mi o ta hoi miseei a Gadu u te böö u mi koti.” A kan taa Jöpu bi hopo wojo luku dee mati fëën di a bi taki di soni aki (Jöpu 27:5). Andi bi heepi Jöpu faa hoi dou, hii fa hii dee soni dë bi ta miti ën? Wë hii fa soni bi hebi  dëën gaanfa seei, tökuseei a bi ta dë hii juu ku di mëni taa di Gadu fëën bi o heepi ën nöömö. A bi sabi taa ee a bi dëdë seei Jehovah bi o weki ën ko a libi baka.​—Jöpu 14:13-15.

10. Andi di woto u Jöpu ta lei u?

¹⁰ Di woto u Jöpu ta lei u taa Saatan an sa duwengi u fuu bia baka da Jehovah, söseei taa Jehovah ta si hii soni di ta pasa. Dee soni dee bi pasa ku Jöpu ta lei u woto fanöudu soni tu. Buta pakisei a wantu soni di u sa lei a Jöpu.

11. Fuun soni u sa dë seiki ee u ta futoou Jehovah go dou? (Jakobosi 4:7)

¹¹ Jöpu ta lei u taa ee u ta futoou Jehovah go dou, nöö woo sa hoi dou te soni ta miti u, nöö Saatan an o sa wini u. Nöö andi o pasa baka di dë? Di Bëibel ta piki u taa Saatan Didibi o kule go disa u.​—Lesi Jakobosi 4:7.

12. Unfa di biibi di Jöpu bi ta biibi taa Gadu o weki sëmbë ko a libi baka bi heepi ën?

¹² U musu ta biibi ku hii u hati taa Gadu o weki sëmbë ko a libi baka. Kumafa u bi taki a di woto di pasa, Saatan ta mbei u fëëë, sö taa u bia baka da Jehovah. A ta kë fuu si kuma woo lasi u libi ee wa bia baka da Jehovah. Saatan bi taki taa Jöpu bi o du hii soni faa sa fika a libi, aluwasi a bi musu bia baka da Jehovah seei. Ma soni wë a bi ta mindi. Hii fa Jöpu bi ta si kuma a bi o sa lasi hën libi seei, tökuseei a bi hoi hënseei a Jehovah. A bi dë seiki taa Jehovah abi bunuhati, söseei taa Jehovah bi o hopo du wan soni nöömö. Di soni dë bi heepi ën faa hoi dou. Jöpu bi ta biibi taa aluwasi ee Jehovah an bi heepi ën ku dee fuka dee bi ta miti ën dë, tökuseei a bi o weki ën ko a libi baka a di ten di ta ko. Jöpu bi ta biibi tuutuu taa Gadu o weki sëmbë ko a libi baka. Ee useei ta biibi di soni dë, nöö wa o bia baka da Gadu, aluwasi sëmbë kë kii u seei.

13. Faandi mbei u musu buta pakisei a dee fasi fa Saatan bi suku u ganjan Jöpu?

¹³ U musu buta pakisei a dee fasi fa Saatan bi suku u ganjan Jöpu, u di a ta suku u ganjan u a dee seei fasi dë tu. Buta pakisei a di soni di Saatan bi taki. A bi taki taa: „Hii soni di wan sëmbë abi [hën da na Jöpu wanwan nöö] a o da faa sa fika a libi” (Jöpu 2:4, 5). Ee fuu taki ën, nöö Saatan bi ta taki taa wa lobi Jehovah tuutuu, söseei taa woo bia baka dëën ee di soni dë o mbei taa u fika a libi. Saatan bi taki tu taa Gadu an lobi u, söseei taa an ta si dee möiti dee u ta mbei u libi kumafa a kë. U di u sabi andi Saatan kë du, mbei wa ta biibi dee mindimindi soni fëën.

14. Konda wan woto di ta lei andi dee tesi dee ta miti u sa heepi u fuu ko sabi.

¹⁴ U musu ta si dee tesi dee ta miti u, kuma soni di ta heepi u fuu ko möön sabi useei. Dee tesi dee miti Jöpu bi heepi ën faa ko sabi un suwakifasi a bi abi, söseei faa mbei möiti u tooka de. A bi ko si taa a bi musu mbei möiti faa ko abi möön sakafasi (Jöpu 42:3). Useei sa ko sabi useei möön bunu tu te tesi ta miti u. De bi buta wan baaa de kai Nikolay * a dunguwosu, hii fa a bi dë ku suwaki gaanfa seei. Di baaa aki bi taki taa: „Di buta di de buta mi a dunguwosu bi heepi mi u mi ko sabi un fasi mi bi musu mbei möiti u mi ko abi, nasö un fasi mi bi musu mbei möiti u mi ko abi möön gaanfa.” Te u ko sabi un suwakifasi u abi kaa, nöö u sa mbei möiti fu wa abi de möön.

15. Ambë u musu ta haika, nöö faandi mbei u musu ta haikëën?

¹⁵ Jehovah u musu ta haika, na dee felantima fuu. Jöpu bi haika bunu di Jehovah bi ta fan ku ën. Jehovah Gadu bi heepi Jöpu faa  ko fusutan soni möön bunu. A bi hakisi ën taa: ’I ta si di kaakiti u mi a dee soni dee mi mbei ö? Mi si hii dee soni dee ta miti i. Nöö i si kuma ma sa heepi i ö?’ Jöpu bi piki Jehovah ku sakafasi, söseei a bi lei taa a ta tei ën u bigi taa Jehovah dë wan Gadu di abi bunuhati. A bi piki ën taa: „Mi bi jei soni fii. Ma nöunöu mi ta si i ku miseei wojo” (Jöpu 42:5). Di Jöpu bi taki dee soni aki, nöö a kan taa a bi dë sindosindo a sindja liba jeti, nöö boi bi kisi ën hii hën sinkii, söseei a bi ta tjali jeti u di dee mii fëën bi dëdë. Ma Jehovah bi lei Jöpu taa a lobi ën, söseei taa a ta feni ën u bunu.​—Jöpu 42:7, 8.

16. Andi u musu hoi a pakisei te tesi ta miti u, te u luku andi Jesaaja 49:15, 16 ta taki?

¹⁶ A di ten aki, sëmbë sa ta si u kuma u dë sösö sëmbë tu. A kan taa de o ta mbei möiti u poi u në nasö u da di ölganisaasi u Jehovah poi në. De sa „ta mindi hii sootu pei hogi ta buta a [u] hedi” (Mat. 5:11). Di woto u Jöpu ta lei u taa Jehovah ta biibi taa woo hoi useei nëën, aluwasi tesi ta miti u. Jehovah lobi u, nöö nöiti a o go disa dee sëmbë dee ta futoou ën. (Lesi Jesaaja 49:15, 16). Na buta pakisei a dee mindimindi soni di dee felantima u Gadu ta taki! James da wan baaa di ta libi a Tolukuköndë, nöö tesi bi miti hën ku dee sëmbë fëën wosudendu. Di baaa aki bi taki taa: „U bi ko si taa ee u bi ta haika dee mindimindi soni di sëmbë bi ta taki u dee sëmbë u Gadu, nöö dee soni dë bi sa mbei u lasi hati. Fëën mbei u bi ta buta pakisei a dee bunu di di Könuköndë o tja ko, söseei u bi ta dini Jehovah fajafaja go dou. Di soni dë, bi heepi u fuu dë waiwai go dou.” U ta haika  Jehovah, leti kumafa Jöpu bi ta du ën! Dee mindimindi soni di dee felantima fuu ta taki, an ta mbei u lasi di biibi fuu.

17. Andi i ta lei a dee womi ku dee mujëë dee bi hoi deseei a Jehovah, di Hebelejën kapitë 11 ta taki u de?

¹⁷ Sömëni u dee dinima u Jehovah bi hoi dou di gaan tesi bi miti de, nöö Jöpu da wan u de. A di biifi di apösutu Paulosu bi sikifi da dee Hebelejën sëmbë, a bi taki soni u sömëni u dee dinima u Gadu. A bi taki taa de ’hia gidjii’ (Heb. 12:1). Gaan tesi bi miti de, ma tökuseei de bi hoi deseei a Jehovah hii de libi longi (Heb. 11:36-40). U sösö de bi hoi dou, söseei u sösö de bi mbei möiti ö? Na seei! De an bi si fa Gadu bi du hii dee soni dee a bi paamusi de taa a bi o du, ma tökuseei de bi biibi ën go dou. Nöö u di de bi dë seiki taa Jehovah bi ta feni de u bunu, mbei de bi dë seiki taa de bi o si fa dee soni dë bi o pasa tuutuu (Heb. 11:4, 5). Di fasi fa de bi du soni sa da u taanga fuu futoou Jehovah go dou.

18. Andi i dë kabakaba u du? (Hebelejën 11:6)

¹⁸ U ta libi a wan goonliba di ta hogi nango möönmöön (2 Tim. 3:13). Saatan o ta pooba dee sëmbë u Gadu go dou. Ma hii fa a dë sö, boo ta wooko da Jehovah go dou ku hii u hati, söseei boo dë seiki taa ’u ta buta di mëni fuu a di libilibi Gadu liba faa tja u’ (1 Tim. 4:10). Hoi a pakisei taa di fasi fa Gadu bi paka Jöpu, ta lei taa Jehovah Gadu lobi sëmbë tuutuu, söseei taa a ’abi tjalihati u sëmbë’ (Jak. 5:11). Boo hoi useei a Jehovah tu, söseei boo dë seiki taa Jehovah ta paka „dee sëmbë dee ta suku ën ku wan hati”.​—Lesi Hebelejën 11:6.