1. (a) Sortu howpu Yehovah gi wi? (b) San a wani taki fu howpu tapu Yehovah? (Luku „San a wortu disi wani taki”.)

 YEHOVAH gi den wan di lobi en wan moi howpu. Heri esi a o tyari wan kaba kon na siki, sari nanga dede (Openb. 21:3, 4). A o yepi „den safri-ati sma” di e howpu na en tapu fu meki a grontapu disi tron wan paradijs (Ps. 37:9-11). Èn a o sorgu taki ibriwan fu wi abi wan krosibei matifasi nanga en. A matifasi disi o tranga moro leki a wan di wi abi now nanga en. Dati na wan moi howpu trutru. Fu san ede wi kan bribi taki den pramisi fu Gado o kon tru? Fu di Yehovah e du san a pramisi ala ten. Sobun wi abi bun reide fu howpu tapu Yehovah * (1 Tim. 4:10). Wi e sori taki wi e howpu tapu Yehovah te wi e wakti nanga pasensi èn nanga prisiri teleki a meki den pramisi fu en kon tru.​—Yes. 55:10, 11.

2. San Yehovah du kaba?

² Yehovah buweisi kaba taki ala ten a e du san a pramisi. Kow luku wan moi eksempre fu dati. Na ini a buku Openbaring, Yehovah ben pramisi taki na ini a ten fu wi a ben o tyari wan bigi grupu sma kon na wán komoto fu ala kondre, lo, pipel nanga tongo fu anbegi en na ini wánfasi. Tide wi sabi a spesrutu grupu disi leki a „bigi ipi” (Openb. 7:9, 10). Aladi den man, uma nanga pikin disi de fu difrenti ras, difrenti kulturu, e taki difrenti tongo èn  kweki na difrenti fasi, toku den alamala e libi na ini wánfasi nanga makandra (Ps. 133:1; Yoh. 10:16). Den wan di de fu a bigi ipi e preiki fayafaya tu. Èn ala ten den de klariklari fu fruteri iniwan sma di wani arki fu a howpu di den abi taki wan moro bun grontapu e kon (Mat. 28:19, 20; Openb. 14:6, 7; 22:17). Efu yu de na ini a bigi ipi, dan a no de fu taki dati a howpu di yu abi taki wan moro bun ten e kon prenspari gi yu srefisrefi.

3. San Satan wani meki wi bribi?

³ Didibri no wani taki wi abi wan howpu gi a ten di e kon. A wani taki wi bribi taki Yehovah no e broko en ede nanga wi èn taki a no o du san a pramisi. Efu Satan meki wi lasi howpu, dan wi o lasi-ati èn a kan srefi taki wi drai baka gi Yehovah. Soleki fa wi o si, dan Didibri pruberi fu meki Yob lasi howpu èn fu meki a drai baka gi Yehovah.

4. San wi o leri na ini na artikel disi? (Yob 1:9-12)

⁴ Na ini na artikel disi wi o luku fa Satan pruberi fu meki Yob drai baka gi Yehovah. (Leisi Yob 1:9-12.) Wi o luku tu san wi kan leri fu na eksempre fu Yob èn fu san ede wi musu hori na prakseri ala ten taki Yehovah lobi wi èn taki a o du san a pramisi.

5-6. San pasa nanga Yob na ini wan syatu pisi ten?

⁵ Yob ben abi wan bun libi èn a ben abi wan bun matifasi nanga Yehovah. A ben abi wan bigi èn koloku osofamiri èn a ben gudu srefisrefi (Yob 1:1-5). Ma na ini wán dei nomo, Yob lasi bijna ala sani. A fosi sani di a lasi, na den gudu fu en (Yob 1:13-17). Baka dati, ala den pikin di a ben lobi so te dede. Prakseri a sari sani di miti Yob. Papa nanga mama e brokosaka te den lasi wan pikin na ini dede. Sobun, prakseri fa Yob nanga en wefi skreki di den yere taki ala den tin pikin fu den dede. A musu fu de so taki den ben sari èn taki den lasi-ati. A no e fruwondru wi taki Yob fadon na gron èn priti en dyakti fu di a ben sari srefisrefi.​—Yob 1:18-20.

⁶ Baka dati, Satan meki Yob kisi wan takru siki èn en skin ben lai woron nanga doti. A sani disi ben meki a firi syen (Yob 2:6-8; 7:5). Fosi ala den sani disi ben pasa, sma ben e lespeki Yob. Sma ben e go na en fu aksi en rai (Yob 31:18). Ma now, sma ben e wai pasi gi en. Den brada fu en, den bun mati fu en èn srefi en eigi futuboi ben drai baka gi en!​—Yob 19:13, 14, 16.

7. (a) Soleki fa Yob ben e bribi, dan suma ben e meki a pina, ma san a weigri fu du? (b) Te wi e luku den sani di miti Yob nanga en wefi, dan fa wan srefi sortu sani kan miti wi leki Kresten?

⁷ Satan ben wani meki Yob bribi taki a e pina fu di Yehovah ben e atibron nanga en. Fu eksempre, Satan meki wan tranga winti naki na oso broko èn kiri den tin pikin fu Yob di ben kon makandra fu nyan wan sani (Yob 1:18, 19). Satan meki srefi taki faya komoto na hemel, di kiri den meti nanga den futuboi fu Yob di ben e luku den meti (Yob 1:16). Fu di a winti nanga a faya ben komoto na hemel, meki Yob ben e prakseri taki na Yehovah Gado ben e du den sani disi. A bakapisi ben de taki Yob ben e bribi taki a du wan sani di meki Yehovah ati bron. Aladi Yob ben e denki so, a ben weigri fu fluku en hemel Papa. Yob ben e frustan taki na ini ala den yari di pasa Yehovah ben gi en furu  bun sani. Sobun a ben e prakseri: ’Efu mi breiti nanga den bun sani di mi ben kisi, dan mi musu teki na ogri tu.’ Dati meki a taki: „Meki sma prèise a nen fu Yehovah fu ala ten” (Yob 1:20, 21; 2:10). Aladi Yob lasi ala en gudu, den pikin fu en èn a kon siki, toku a no drai baka gi Yehovah. Ma Satan no ben kaba ete nanga en.

8. Sortu tra sani Satan du nanga Yob?

⁸ Satan du ete wan sani nanga Yob. A gebroiki dri man di ben du leki den na mati fu Yob, fu meki Yob firi leki a no warti. Den man disi taigi Yob taki na fu di a du furu ogri sani meki den sani disi ben e miti en (Yob 22:5-9). Den pruberi tu fu meki Yob bribi taki awinsi fa a ben du furu bun sani, toku den sani dati no ben prenspari gi Gado (Yob 4:18; 22:2, 3; 25:4). Fu taki en leti, den ben e pruberi fu meki Yob bribi taki Gado no lobi en, taki a no ben o sorgu en èn taki na anbegi fu en no ben prenspari gi en. Den sani di den ben taigi Yob ben kan meki Yob lasi ala howpu.

9. San yepi Yob fu abi deki-ati èn fu no frede?

⁹ Pruberi fu si a sani disi na yu fesi. Yob e sidon na ini asisi fu di a e sari srefisrefi èn en skin e hati en (Yob 2:8). Den man di ben du leki den na mati fu Yob, e taigi Yob taki en a no wan bun sma èn taki ala den bun sani di a ben du ben de fu soso. Den tesi fu Yob ben hebi gi en èn a ben sari srefisrefi fu di a lasi ala den pikin fu en na ini dede. Na a bigin, Yob ben de pî (Yob 2:13–3:1). Efu den man di ben taki den ben de mati fu Yob, ben denki taki Yob ben o drai baka gi Yehovah, dan den ben e kori densrefi. Te fu kaba, a kan taki Yob opo en ede luku den man disi èn a taigi den: „Mi o tai hori na Gado teleki mi hari mi lasti bro!” (Yob 27:5) San ben yepi Yob fu abi so furu deki-ati èn fu no  frede aladi a ben e pina? Aladi Yob ben brokosaka noiti a ben lasi howpu taki a Gado fu en di ben lobi en ben o yepi en èn taki a ben o tyari den tesi fu en kon na wan kaba. A ben sabi taki awinsi a ben o dede, Yehovah ben o gi en wan opobaka.​—Yob 14:13-15.

10. San a tori fu Yob e leri wi?

¹⁰ A tori fu Yob e leri wi taki Satan no man dwengi wi fu drai baka gi Yehovah èn taki Yehovah sabi ala sani di e pasa nanga wi. Na ondrofeni fu Yob e leri wi tra prenspari sani. Kow luku wan tu spesrutu sani di wi kan leri fu Yob.

11. Efu wi e tan frutrow tapu Yehovah, dan sortu dyaranti wi abi? (Yakobus 4:7)

¹¹ Yob sori wi taki efu wi e tan frutrow tapu Yehovah, dan wi kan pasa iniwan tesi di Satan e poti na wi pasi èn wi o man kakafutu gi en. San o de a bakapisi? Bijbel e taki dati Didibri o lon gwe fu wi.​—Leisi Yakobus 4:7.

12. Fa na opobaka howpu ben tranga Yob?

¹² Wi musu abi wan tranga bribi na ini na opobaka howpu. Soleki fa wi ben taki na ini na artikel na fesi, dan Satan wani meki sma frede dede so te taki den drai baka gi Yehovah. Na ini a tori fu Yob, Satan taki dati Yob ben o du ala sani fu man tan na libi, srefi efu dati ben wani taki dati a ben musu drai baka gi Yehovah. Ma Satan no ben abi leti. Srefi di Yob ben e prakseri taki a ben kan lasi en libi, a no drai baka gi Yehovah. A ben e frutrow taki Yehovah ala ten e du san bun èn taki a ben o yepi en fu horidoro. Yob ben bribi taki efu Yehovah no ben o yepi en fu tan na libi, a ben o gi en wan opobaka na ini a ten di e kon. Na opobaka howpu ben de wan trutru sani gi Yob. Efu a howpu dati de wan trutru sani gi wi tu, dan wi no o drai baka gi Yehovah awinsi wi ben kan lasi wi libi.

13. Fu san ede wi musu poti prakseri na den sani di Satan du nanga Yob?

¹³ Wi musu poti prakseri na den sani di Satan du nanga Yob fu di a e du den srefi sortu sani dati nanga wi na ini a ten disi. Luku san Satan taki fu ala sma: „Te wan sma [a no Yob wawan] de fu dede, a o gi ala san a abi fu man tan na libi” (Yob 2:4, 5). Fu taki en leti, Satan e taki dati mi nanga yu no lobi Yehovah èn taki wi o drai baka gi en soso fu man kibri wi libi. Satan e taki moro fara taki Gado no lobi wi èn taki a no e poti prakseri na a muiti di wi e meki fu anbegi en. Ma wi sabi san Satan abi na prakseri. Dati meki wi no e bribi den lei fu en.

14. San tesi e tyari kon na krin? Gi wan eksempre.

¹⁴ Te wi e kisi tesi, dan wi musu si dati leki wan okasi fu leri sabi wisrefi moro bun. Den tesi di miti Yob, yepi en fu si san na den swakifasi fu en èn sortu kenki a ben musu tyari kon. Fu eksempre, a leri taki a ben musu abi moro sakafasi (Yob 42:3). Wi kan kon sabi wisrefi moro bun tu, te wi e kisi tesi. Wan brada di nen Nikolay * èn di sma poti na strafu-oso aladi a ben siki seryusu, e taki: „Strafu-oso de leki te wan sma musu go na datra fu meki wan fowtow. A e tyari kon na krin san na den swakifasi fu wi èn fa wi de trutru.” Te wi kon sabi den swakifasi fu wi, dan wi musu meki muiti fu kenki den.

15. Suma wi musu arki èn fu san ede?

 ¹⁵ Wi musu arki Yehovah, wi no musu arki den feanti fu wi. Yob ben arki bun di Yehovah ben taki nanga en. Gado taki-go-taki-kon nanga Yob. Fu taki en leti, a gersi leki a ben taigi Yob: ’Yob, yu e si omeni makti mi abi? Mi sabi ala den sani di e pasa nanga yu. Yu denki taki mi no man yepi yu?’ Yob ben e warderi den bun sani di Yehovah du èn nanga sakafasi a taki: „Mi ben yere fu yu, ma now mi eigi ai e si yu” (Yob 42:5). Di Yob taki a sani disi, dan a kan taki a ben e sidon na ini asisi ete, taki en skin ben lai soro èn taki den pikin fu en ben de na ini den grebi. Awinsi dati ben de so, toku Yehovah ben sori en taki a lobi en èn a gi en a dyaranti taki a feni en bun.​—Yob 42:7, 8.

16. Soleki fa Yesaya 49:15, 16 e taki, dan san wi musu hori na prakseri te wi e kisi tesi?

¹⁶ Na ini a ten disi tu, sma kan kosi wi èn den kan du sani di kan meki wi firi leki wi no warti noti. Den kan pruberi fu pori wi nen nanga a nen fu na organisâsi, den kan ’lei èn taki ala sortu ogri fu wi’ (Mat. 5:11). A tori fu Yob e leri wi taki Yehovah e frutrow taki wi o tai hori na en awinsi wi e kisi tesi. Yehovah lobi wi èn noiti a e drai baka gi den wan di e howpu na en tapu. (Leisi Yesaya 49:15, 16.) Wi no musu poti prakseri na den sani di den feanti fu Gado e taki fu pori wi nen. James, wan brada fu Torkukondre di pasa hebi tesi nanga en famiri, e taki: „Wi kon si taki te wi ben o poti prakseri na den lei di sma e taki fu Gado pipel,  dan dati ben o meki wi lasi-ati. Sobun, wi poti ala wi prakseri na a howpu di wi abi taki a Kownukondre o tiri na ini a ten di e kon èn wi tan wroko fayafaya na ini a diniwroko fu Yehovah. A bakapisi ben de taki wi no lasi wi prisiri.” Neleki Yob wi e arki Yehovah. Den lei di den feanti fu Gado e taki, no e meki wi lasi howpu.

17. San wi kan leri fu na eksempre fu den getrow man nanga uma di kari na ini Hebrewsma kapitel 11?

¹⁷ Yob na wan fu den getrow futuboi fu Yehovah di tan sori deki-ati èn di no ben e frede aladi a ben kisi hebi tesi. Na ini a brifi di na apostel Paulus ben skrifi gi den Hebrewsma, a e taki fu furu tra futuboi fu Yehovah èn a e agersi den nanga „wan bigi wolku” (Hebr. 12:1). Den alamala kisi hebi tesi, ma den tai hori na Yehovah (Hebr. 11:36-40). Na fu soso den wroko tranga èn horidoro? Kwetikweti! Aladi den no si fa ala den pramisi fu Gado kon tru di den ben de na libi, toku den ben tan howpu tapu Yehovah. Èn fu di den ben de seiker taki Yehovah ben feni den bun, meki den ben e bribi taki den ben o si fa ala den pramisi ben o kon tru (Hebr. 11:4, 5). Na eksempre fu den e tranga wi fu tan howpu tapu Yehovah.

18. San wi o tan du awinsi san e pasa? (Hebrewsma 11:6)

¹⁸ Na ini a ten disi, wi e libi na ini wan grontapu di e kon ogri moro nanga moro (2 Tim. 3:13). Satan o tan tesi a pipel fu Gado. A no kaba nanga wi ete. Awinsi sortu problema wi o kisi na ini a ten di e kon, meki noti no tapu wi fu wroko tranga gi Yehovah. Noiti wi musu tweifri, fu di „wi poti wi howpu tapu wan libilibi Gado” (1 Tim. 4:10). Memre fa Gado ben meki sani waka gi Yob. Disi e sori taki „Yehovah lobi sma trutru èn taki a abi sari-ati” (Yak. 5:11). Meki wi tai hori tu na Yehovah fu di wi de seiker taki a o pai „den wan di e suku en fayafaya”.​—Leisi Hebrewsma 11:6.