SIHLOKO LESIFUNDVWAKO 27
“Tsemba Jehova”
“Tsemba Jehova; bani nesibindzi futsi ucine.”—HLA. 27:14.
INGOMA 128 Kucinisela Kuze Kube Sekugcineni
LOKUTAWUCOCWA NGAKO KULESIHLOKO *
1. (a) Nguliphi litsemba Jehova lasinike lona? (b) Kusho kutsini ‘kwetsemba Jehova’? (Buka “Inchazelo Yeligama.”)
JEHOVA unike bonkhe labo labamtsandzako litsemba lelihle kakhulu. Ngekushesha, utawucedza kugula, buhlungu kanye nekufa. (Semb. 21:3, 4) Utawusita “labamnene” labametsembako kutsi bashintje lomhlaba ube lipharadisi. (Hla. 37:9-11) Ngetulu kwaloko, utawenta kutsi sonkhe sibe nebuhlobo lobuhle kakhulu naye, kwendlula lobu lesinabo nyalo. Leli litsemba lelihle sibili! Kodvwa yini lesenta setsembe kutsi Nkulunkulu utawutifeza tetsembiso takhe? Jehova akasephuli setsembiso. Ngako sinesizatfu lesivakalako ‘sekwetsemba Jehova.’ * (Hla. 27:14) Loko sikukhombisa ngekutsi simlindzele ngesineke kutsi afeze tonkhe tetsembiso takhe futsi simlindzele sijabulile.—Isa. 55:10, 11.
2. Ngusiphi setsembiso Jehova lasasifezile?
2 Jehova sewuvele ukhombisile kutsi uyatifeza tetsembiso takhe. Cabanga nganasi sibonelo lesihle. Encwadzini yeSembulo, Jehova wetsembisa kutsi emalangeni etfu utawuhlanganisa bantfu labavela kuto tonkhe tive, tinhlanga kanye netilwimi kuze bamkhonte ngebunye. Lamuhla, lelicembu libitwa ngekutsi “sicumbi lesikhulu.” (Semb. 7:9, 10) Nanobe lelicembu lakhiwa ngemadvodza, bafati nebantfwana labehlukahlukene labavela emhlabeni wonkhe, kodvwa bangumndeni lonekuthula. (Hla. 133:1; Joh. 10:16) Ngetulu kwaloko, labo labangemalunga esicumbi lesikhulu bashumayela ngekutimisela. Bahlale bakulungele kucocela nobe ngubani lofuna kulalela ngelive lelisha lelincono kakhulu. (Mat. 28:19, 20; Semb. 14:6, 7; 22:17) Nangabe ulilunga lesicumbi lesikhulu, siyaciniseka kutsi lelitsemba lekutsi tintfo titawuba ncono kakhulu liligugu kuwe.
3. Yini Sathane layifunako?
3 Develi akafuni ube nelitsemba. Ufuna kukwenta ukholelwe kutsi Jehova akanendzaba nawe nekutsi angeke atifeze tetsembiso takhe. Nakangakhona kucedza litsemba letfu, singaphelelwa sibindzi futsi singahle siyekele kukhonta Jehova. Njengobe sitawubona, Develi wetama kucedza litsemba laJobe, wetama nekumenta kutsi ayekele kukhonta Jehova.
4. Sitawucoca ngani kulesihloko? (Jobe 1:9-12)
4 Kulesihloko, sitawucoca ngaloko Sathane lakwenta kuze etame kwenta Jobe kutsi angetsembeki kuJehova. (Fundza Jobe 1:9-12.) Sitawuphindze sicoce ngalesingakufundza esibonelweni saJobe nekutsi yini leyenta kudzingeke kutsi sikhumbule kutsi Nkulunkulu uyasitsandza nekutsi utawutifeza tetsembiso takhe.
SATHANE WETAMA KUCEDZA LITSEMBA LAJOBE
5-6. Yini leyenteka kuJobe ngesikhashana nje?
5 Konkhe ekuphileni bekumhambela kahle Jobe. Bekanebuhlobo lobuhle naJehova. Bekanemndeni lomkhulu, lonebunye futsi anjinge kakhulu. (Jobe 1:1-5) Kodvwa ngelilanga linye nje, Jobe walahlekelwa cishe ngiko konkhe lebekanako. Wacale walahlekelwa yimfuyo yakhe. (Jobe 1:13-17) Ngemuva kwaloko, washonelwa ngibo bonkhe bantfwana bakhe. Cabanga nje kutsi loko bekumatima kanjani! Batali beva buhlungu lobukhulu nabashonelwa ngumntfwana munye. Ngako cabanga ngekumangala, buhlungu lobukhulu nekudvumateka lokukhulu Jobe nemkakhe labakuva ngesikhatsi batjelwa kutsi bonkhe bantfwana babo labangu-10 bashonile. Bekafutile Jobe kudzabula ingubo yakhe alila nekuguca emhlabatsini!—Jobe 1:18-20.
6 Sathane wenta Jobe waba nesifo lesibuhlungu nalesamenta walahlekelwa sitfunti. (Jobe 2:6-8; 7:5) Ngaphambi kwaloku, Jobe bekahlonishwa endzaweni. Bantfu bebacela kuye seluleko. (Jobe 31:18) Kodvwa nyalo besebambalekela. Bekangasafunwa ngisho nabomnakabo, bangani bakhe labakhulu kanye netisebenti takhe!—Jobe 19:13, 14, 16.
BoFakazi labanyenti lamuhla bayayicondza indlela Jobe lativa ngayo nakabhekene netinkinga takhe (Buka sigaba 7) *
7. (a) Jobe bekacabanga kutsi yini lembangele letinkinga, kodvwa yini langazange ayente? (b) UmKhristu angabhekana njani nesimo lesimatima lesifana nalesi lesisibona kulesitfombe?
7 Sathane bekafuna Jobe akholelwe kutsi letintfo timehlele ngobe Jehova umtfukutselele. Sibonelo nje, Sathane wasebentisa umoya lomkhulu lowabhidlita lendlu lapho bonkhe bantfwana baJobe bebadla khona. (Jobe 1:18, 19) Waphindze wenta kutsi umlilo wehle uvela uzulwini futsi wabulala yonkhe imfuyo yaJobe kanye netisebenti lebetiyelusile. (Jobe 1:16) Lomoya nalomlilo bekuvela ezulwini; ngako Jobe wacabanga kutsi bekuvela kuJehova. Ngenca yaloko, wacabanga kutsi kukhona lebekakwentile lokwente Jehova wamtfukutselela. Nobe kunjalo, akazange ametfuke Babe wakhe wasezulwini. Wabona kutsi kuyo yonkhe leminyaka Jehova umentele tintfo letinyenti letinhle. Ngako waphetsa ngekutsi nangabe emukele lokuhle, bekufanele akulungele kwemukela nalokubi. Watsi: “Alichubeke lidvunyiswa libito laJehova.” (Jobe 1:20, 21; 2:10) Nanobe Jobe alahlekelwa ngumcebo wakhe, bantfwana futsi wagula kakhulu kodvwa wachubeka etsembekile kuJehova. Nobe kunjalo, Sathane bekasengakacedzi ngaye.
8. Nguliphi lichinga Sathane labese uyalisebentisa kuJobe?
8 Sathane wasebentisa lelinye lichinga; wasebentisa emadvodza lamatsatfu lebekenta ngatsi abangani baJobe kuze amente ative angasilutfo. Lamadvodza atsi kunetintfo letinyenti letimbi Jobe latentile. (Jobe 22:5-9) Etama nekumenta akholelwe kutsi ngisho nobe ente tintfo letinyenti letinhle, Nkulunkulu bekanganendzaba nato. (Jobe 4:18; 22:2, 3; 25:4) Ecinisweni, beketama kumenta acabange kutsi Nkulunkulu akamtsandzi, angeke amnakekele nekutsi akusiti ngalutfo kumkhonta. Emavi abo bekangenta Jobe aphelelwe litsemba ngesimo bekakuso.
9. Yini leyasita Jobe kutsi abe nesibindzi futsi acine?
9 Sibone ngeliso lengcondvo lesimo. Jobe uhleti emlotseni, uva buhlungu lobungapheli. (Jobe 2:8) Bangani bakhe solo bayachubeka batsi akasuye umuntfu lokahle futsi konkhe lakwentile lokuhle akukabaluleki. Simo labhekene naso simesindza kuhle kwemtfwalo, futsi buhlungu bekushonelwa bantfwana bakhe bumephula inhlitiyo. Wacale wathula. (Jobe 2:13–3:1) Nangabe lamadvodza bekacabanga kutsi kuthula kwaJobe kusho kutsi utawulahla Jehova, bekashaye phasi. Jobe waphakamisa inhloko, wabuka labangani bakhe mbumbulu, wabese utsi: “Ngitawuze ngife solo ngingakabulahli bucotfo bami!” (Jobe 27:5) Yini leyasita Jobe waba nesibindzi futsi wacina nanobe abhekene nato tonkhe letinkinga? Ngisho nangesikhatsi advumateke kakhulu, akazange alilahle litsemba lekutsi Nkulunkulu wakhe lonelutsandvo utawugcine amsitile. Bekati kutsi ngisho angafa, Jehova utamvusa.—Jobe 14:13-15.
SINGAMLINGISA NJANI JOBE?
10. Isifundzisani indzaba yaJobe?
10 Indzaba yaJobe isifundzisa kutsi Sathane angeke asiphocelele kutsi sishiye Jehova, nekutsi Jehova ukwati konkhe lokwentekako kitsi. Loko lokwenteka kuJobe kungasisita nekutsi sisicondze kancono simo. Ase sicoce ngaletinye tifundvo lesingatifundza kuJobe.
11. Yini lesingaciniseka ngayo nasichubeka setsembela kuJehova? (Jakobe 4:7)
11 Jobe wakhombisa kutsi nasichubeka setsembela kuJehova, singakhona kubeketelela nobe nguluphi luvivinyo futsi simelane naSathane. Utawuba yini umphumela? ImiBhalo iyasicinisekisa kutsi Develi utasibalekela.—Fundza Jakobe 4:7.
12. Litsemba lekuvuswa ekufeni lamcinisa njani Jobe?
12 Kufanele sichubeke sibambelele etsembeni letfu lekuvuswa ekufeni. Njengobe kuvetiwe esihlokweni lesendlulile, Sathane uvame kusebentisa kwesaba kufa kuze etame kusenta kutsi singetsembeki kuJehova. Sathane watsi Jobe angenta nobe ngabe yini, lokufaka ekhatsi kushiya Jehova, kuze nje asindzise kuphila kwakhe. Bekanemanga laluhlata klaba! Ngisho nangesikhatsi Jobe acabanga kutsi utawufa, wachubeka etsembekile kuJehova. Kuciniseka kwakhe ngekutsi Jehova muhle kanye nelitsemba lakhe lelicinile lekutsi Jehova utawutilungisa tintfo, kwamsita wakhona kucinisela. Jobe beketsemba kutsi nangabe Jehova angeke atilungise tintfo asaphila, bekatamvusa ekufeni esikhatsini lesitako. Litsemba lekuvuswa ekufeni belicinile kuJobe. Nangabe nakitsi licinile lelitsemba, ngisho nobe sibona ngatsi sitawukufa, sitawuchubeka setsembekile kuJehova.
13. Kubaluleke ngani kutsi siwanake emachinga lasetjentiswa nguSathane kuJobe?
13 Kufanele siwanakisise emachinga Sathane lawasebentisa kuJobe ngobe usebentisa lafanako nakitsi lamuhla. Naka naku Sathane lakusho, watsi: “Umuntfu [hhayi Jobe kuphela] angalahlekelwa ngiko konkhe lanako kuze alondvolote kuphila kwakhe.” (Jobe 2:4, 5) Ecinisweni, Sathane bekatsi asimtsandzi mbamba Jehova Nkulunkulu nekutsi singamshiya nangabe loko kusho kusindzisa kuphila kwetfu. Sathane waphindze watsi Nkulunkulu akasitsandzi futsi akanendzaba nemetamo lesiyentako kuze simkhonte. Ngenca yekutsi siyati kutsi Sathane ufunani, angeke siwetsembe lamanga akhe.
14. Kuvivinywa kusisita sibone ini? Fanekisa.
14 Kufanele sitsatse tinkinga lesibhekana nato njengelitfuba lekuhlola buntfu betfu. Kuvivinywa labhekana nako Jobe kwamsita wabona lapho bekabutsakatsaka khona futsi watfutfukisa. Sibonelo nje, wabona kutsi bekudzingeka etame kutfobeka kakhudlwana. (Jobe 42:3) Natsi singafundza lokutsite ngebuntfu betfu nasivivinywa. Lomunye umzalwane lokutsiwa nguNikolay, * lowavalelwa ejele nanobe bekagula kakhulu utsi: “Lijele lifana nemshini we-X-ray lowenta ubone tintfo bewungeke ukhone kutibona, nelijele liveta buntfu bemKhristu.” Nasesibona lapho sibutsakatsaka khona, kufanele setame kutfutfukisa.
15. Ngubani lokufanele simlalele, futsi leni?
15 Kufanele silalele Jehova hhayi titsa tetfu. Jobe walalelisisa ngesikhatsi Jehova akhuluma naye. Nkulunkulu wabonisana naye, futsi bekungatsi utsi: ‘Uyawabona yini emandla ami kulokudaliwe? Ngikwati konkhe lokwenteke kuwe. Ngako ucabanga kutsi angeke ngikhone yini kukunakekela?’ Jobe waphendvula ngendlela letfobekile nalebeyikhombisa kutsi bekabonga kakhulu ngebuhle baJehova. Watsi: “Tindlebe tami tivile ngawe, kodvwa nyalo sengiyakubona ngemehlo ami.” (Jobe 42:5) Ngesikhatsi Jobe asho lamavi, kungenteka bekahleti emlotseni, agcwele tilondza emtimbeni futsi bantfwana bakhe basethuneni. Nobe kunjalo, Jehova wamcinisekisa ngekutsi uyamtsandza nekutsi uyamemukela.—Jobe 42:7, 8.
16. Ngekusho kwa-Isaya 49:15, 16, yini lokufanele siyikhumbule nasibhekene netinkinga?
16 Nalamuhla, bantfu bangasetfuka, futsi basiphatsise kwetintfo letingenamsebenti. Bangetama kulimata lidvumela letfu nobe lenhlangano futsi ‘basho konkhe lokubi ngatsi futsi basicalele emanga.’ (Mat. 5:11) Kuloku lokwenteka kuJobe, siyafundza kutsi Jehova uyaciniseka kutsi sitawuhlale setsembekile kuye nasivivinywa. Uyasitsandza, angeke aze abashiye labo labametsembako. (Fundza Isaya 49:15, 16.) Ungatinaki tintfo letinyundzelako letishiwo titsa taNkulunkulu! Umndeni wakuboJames, lohlala eTurkey waba netinkinga letinkhulu kakhulu, James utsi: “Sabona kutsi kulalela emanga lakhulunywako ngebantfu baNkulunkulu kungasidvumata. Ngako sanaka kakhulu litsemba letfu leMbuso futsi sahlala simatasatasa emsebentini waJehova. Ngenca yaloko, sachubeka sijabulile.” NjengaJobe, silalela Jehova! Emanga lashiwo titsa tetfu angeke alicedze litsemba letfu.
LITSEMBA LAKHO LITAKUCINISA
Jobe wabusiswa ngenca yekwetsembeka kwakhe. Yena nemkakhe babusiswa ngemphilo lendze nalemnandzi (Buka sigaba 17) *
17. Yini loyifundza esibonelweni semadvodza nebafati labetsembekile lokukhulunywa ngabo KumaHebheru sehluko 11?
17 Jobe ungulesinye setikhonti taJehova lesahlala sinesibindzi futsi sicinile ngisho sivivinywa kamatima. Encwadzini yakhe layibhalela emaHebheru, umphostoli Pawula wakhuluma ngetikhonti taJehova letinyenti, watibita ngekutsi ‘sicumbi lesikhulu sabofakazi.’ (Heb. 12:1) Tabhekana netimo letimatima kakhulu, kodvwa tahlala tetsembekile kuko konkhe kuphila kwato. (Heb. 11:36-40) Kucinisela kwalabantfu baNkulunkulu nekusebenta kwabo kamatima bekungakabaluleki yini? Bekubalulekile! Nanobe bangazange bakubone kugcwaliseka kwato tonkhe tetsembiso taNkulunkulu, bachubeka betsemba Jehova. Ngenca yekutsi bebaciniseka kutsi Jehova uyabemukela, bebetsemba kutsi batatibona tetsembiso takhe tigcwaliseka. (Heb. 11:4, 5) Sibonelo sabo singasisita kutsi sichubeke setsemba Jehova.
18. Yini lotimisele kuyenta? (KumaHebheru 11:6)
18 Siphila eveni lapho khona tintfo tisuka kulokubi tiya kulokubi kakhulu. (2 Thim. 3:13) Sathane usengakacedzi kuvivinya bantfu baNkulunkulu. Ngisho nobe singabhekana nani esikhatsini lesitako, shengatsi singatimisela kwenta konkhe lokusemandleni etfu kuze sijabulise Jehova, sibe siciniseka kutsi “litsemba letfu silibeke kuNkulunkulu lophilako.” (1 Thim. 4:10) Khumbula kutsi loko Nkulunkulu lakwentela Jobe kuyakhombisa kutsi “Jehova unelutsandvo lolukhulu futsi unemusa.” (Jak. 5:11) Shengatsi natsi singahlala setsembekile kuJehova, futsi siciniseke kutsi ubanika umvuzo “labo labamfuna ngekutimisela.”—Fundza KumaHebheru 11:6.
INGOMA 150 Funa Insindziso Yakho KuNkulunkulu
^ Nasicabanga ngemuntfu lowabeketela nakavivinywa kamatima, sivame kucabanga ngaJobe. Yini lesingayifundza kulokwenteka kulendvodza leyetsembekile? Sifundza kutsi Sathane angeke asiphocelele kutsi sishiye Jehova. Sifundza nekutsi Jehova ukwati konkhe lokwentekako kitsi. Njengobe nje Jehova akucedza kuhlupheka kwaJobe, utakucedza nekuhlupheka kwetfu ngalelinye lilanga. Nangabe sikhombisa ngetento kutsi siyaciniseka ngaloku, sisemkhatsini walabo ‘labametsemba mbamba Jehova.’
^ INCHAZELO YELIGAMA: Ligama lesiHebheru lelihunyushwe ngekutsi “kwetsemba” lisho “kulindzela” lokutsite ngekulangatelela. Lingaphindze lisho kwetsemba lotsite nobe kwetsembela kuye.—Hla. 25:2, 3; 62:5.
^ Lamanye emagama ashintjiwe.
