ARTÍCULO RÍ MUʼNIGAJMAA 27
“Araʼthi̱i̱n náa Jeobá”
“Araʼthi̱i̱n náa Jeobá; xámiñaaʼ, gakhii a̱jkia̱a̱nʼ gátani” (SAL. 27:14).
AJMÚÚ 128 Gaʼngulú asndu índo̱ gártumuu mbiʼi
RÍ MUʼNIGAJMAA *
1. a) Ndiéjuunʼ eʼthí maxnúlú Jeobá rá. b) Xú káʼnii esngajmá rí nuguaʼthi̱i̱n Jeobá rá. (Atayáá nota.)
JEOBÁ naʼthí dí maxnúún mbá rí májánʼ xúgíinʼ bi̱ nandún kuyáá, xó dí maʼni gámbáa nandii, tsingíná ga̱jma̱a̱ dí nakháñulú (Apoc. 21:3, 4). Ga̱jma̱a̱ mambáñún xa̱bu̱ bi̱ míjíinʼ bi̱ nuguaʼthi̱i̱n náa ikhaa, mu maʼni̱i̱ mbá Ku̱ba̱ʼ mitsaanʼ (Sal. 37:9-11). Ma̱ngaa maʼni asndu xó má eʼngo̱o̱ mu xúʼko̱ mambájxulú itháán májánʼ gajmiúlú ikhaa. ¡Ra̱ʼkhá tháán mitsaanʼ dí kuaʼti̱i̱nlú! Náá numuu nduʼyáá gajkhun dí mambanúu rí nakudaminaʼ maʼni Dios rá. Numuu dí ikhaa naʼnimbanuu má xúʼko̱ ajngóo. Ma̱ngaa guaʼdáá mbaʼa numuu dí makumulúʼ kuʼyáá Jeobá (Sal. 27:14). * Xú kaʼnii esngajmá dí nuguáʼthíi̱nʼlú Jeobá rá. Índo̱ nadxulú kuwáánʼ ruguaʼthi̱i̱n mambanúu dí ikhaa nikudaminaʼ maʼni (Is. 55:10, 11).
2. Ndiéjunʼ nikudaminaʼ maʼnii Jeobá dí mbiʼi xúgi̱ rá.
2 Jeobá nasngájma dí naʼnimbánuu ajngóo. Guʼyáá mbá xkri̱da dí mitsaanʼ wéñuuʼ. Jeobá nikudaminaʼ maʼni rígi̱ náa libro ndrígóo Apocalipsis, dí mbiʼi xúgi̱ magimbíin mbaʼin wéñuuʼ xa̱bu̱ bi̱ kúwíin náa xúgíʼ xuajen mba̱ʼo̱ ga̱jma̱a̱ xuajen majkhaʼ ma̱ngaa bi̱ nuthi mixtiʼkhu ajngáa, mu xúʼko̱ mbuyamajkuíí i̱ndó Jeobá. Rí xúgi̱ najmaʼniúúnʼ xóo ‹xa̱bu̱ bi̱ mbaʼin wéñuuʼ› (Apoc. 7:9, 10). Maski ajndu xa̱bu̱ bi̱ mbaʼin wéñuuʼ bigi̱ nindxu̱ún xa̱bekha, gu̱ʼu̱ ga̱jma̱a̱ e̱ji̱n, bi̱ mixtiʼkhu̱u̱n color, ajngáa rí nuthi ga̱jma̱a̱ náa naguwáʼ, mú xúgíinʼ kúwá mbá jnduʼ ga̱jma̱a̱ tsímáá (Sal. 133:1; Juan 10:16). Ma̱ngaa nutaraʼa ga̱jma̱a̱ gagi, ga̱jma̱a̱ kúwá xawii mu muthún xa̱bu̱ bi̱ nandún mudxawíín, dí kuáʼti̱i̱n marigá nda̱wa̱á (Mat. 28:19, 20; Apoc. 14:6, 7; 22:17). Á mu ikháán nindxa̱a̱ʼ mbáa dí ikhaa, gajkhun rí natayamajkuíí dí wíji̱ marigá nda̱wa̱á.
3. Ndiéjunʼ dí nandoo maʼni Gixa̱a̱ ga̱jma̱á ni̱ndxu̱lú rá.
3 Dí phú nandoo Gixa̱a̱ nindxu̱u̱ dí xuguáʼthíi̱nlú nimbá nda̱wa̱á ga̱jma̱a̱ nandoo rí mundxaʼwamíjna̱lú dí Jeobá tséxmiéjuunʼ kaʼyulú ga̱jma̱a̱ dí ikhaa xáʼnimbánuu dí nakudaminaʼ maʼni. Á mu Gixa̱a̱ naʼngo̱o̱ naʼni dí mundxaʼwamíjna̱lú rí nda̱a̱ dí kua̱ʼthi̱i̱n nda̱wa̱á, rúʼko̱ gáʼni dí mamiñulú o asndu muniʼñááʼ ru̱ʼni̱ ñajuunʼ Jeobá. Xó má guʼyáá xúgi̱, Gixa̱a̱ nindoo dí Job xágiʼthu̱u̱n nimbá nda̱wa̱á mu xúʼko̱ maniñuuʼ raʼni ñajuunʼ Jeobá.
4. Ndiéjuunʼ guʼyáá náa artículo rígi̱ rá. (Job 1:9-12.)
4 Náa artículo rígi̱ mbuʼyáá ndiéjuunʼ dí nijmuu Gixa̱a̱, mu xúʼko̱ maʼni rí Job maʼndoo maniñuuʼ Jeobá (atraxnuu Job 1:9-12). * Ma̱ngaa mbuʼyáá ndiéjuunʼ gándoo gajmañulú náa xkri̱doo Job. Ga̱jma̱a̱ ndíjkha rí gíʼdoo wéñuuʼ numuu marmáʼáan a̱jkiu̱lú dí Dios nandoo kaʼyulú ma̱ngaa dí ikhaa maʼnimbánuu rí nakudaminaʼ maʼni.
GIXA̱A̱ NINDOO MAʼNI DÍ JOB XÁGIʼTHU̱U̱N NIMBÁ
5, 6. Xú káʼnii nixtiʼkhu̱u̱ mbá nacha̱ xóo nixtáa Job rá.
5 Job nixtáa májánʼ wéñuuʼ; nindxu̱u̱ mbáa xa̱bu̱ bi̱ nambájxu̱u̱ májánʼ ga̱jma̱a̱ Dios, mbáa xa̱bu̱ bi̱ gíʼdoo wéñuuʼ, bi̱ gíʼdiin mbaʼin e̱ji̱i̱n ga̱jma̱a̱ bi̱ numbayíí ma̱ngaa nambájxu̱u̱n májánʼ (Job 1:1-5). Mú káaʼ mbá mbiʼíí nindáti̱ga̱a̱ xúgíʼ rí gíʼdoo (Job 1:13-17). Nda̱wa̱á nikháñúún mbá xúgíinʼ e̱ji̱i̱n bi̱ nindoo kaʼñún wéñuuʼ. Gundxaʼwamíjna̱lú dí ikháánʼ kuwáánʼ xúʼko̱ kaʼnii. Índo̱ nakháñuu mbáa aʼdiún xabuanii, ra̱ʼkhá tháán gawúúnʼ. Gundxaʼwamíjna̱lú xú káʼnii nikumu̱u̱ Job ga̱jma̱a̱ a̱ʼgiu̱u̱ índo̱ nidxawíín dí mbá gu̱wi̱i̱nʼ e̱ji̱i̱n nikháñúún, ikhiin nigawúnʼ ga̱jma̱a̱ nikúwá ngíná wéñuuʼ. Ikha jngóo Job nixkuʼturiyaʼ xtíñuu mu masngájma dí xtáa ngíná ga̱jma̱a̱ nismbati̱go̱o̱ mbayíʼ (Job 1:18-20).
6 Nda̱wa̱á Gixa̱a̱ niʼni rí Job mbayóo mbá nandii rí xkawiʼ wéñuuʼ (Job 2:6-8; 7:5). Xa̱bu̱ ndiyamajkuíí wéñuuʼ Job asndu nagún gúyáaʼ mu maxnún consejo (Job 31:18). Mú rí xúgi̱, bi̱ nambájxuu májánʼ gajmíi̱n, bi̱ numbayíí asndu a̱ngui̱i̱n, na̱nguá eñún guyáá (Job 19:13, 14, 16).
Mbaʼin a̱ngiu̱lú dí mbiʼi xúgi̱ nakru̱ʼu̱u̱n májánʼ xóo nixtáa ramínúuʼ Job. (Atayáá kutriga̱ 7). *
7. a) Ndiéjuunʼ nikumu̱u̱ Job índo̱ xtáa ramínúuʼ rá. b) Ndiéjuunʼ dí táʼni Job rá. c) Ndiéjuunʼ rí ma̱ndoo maguáʼníí xúgi̱ xó má Job rá. (Atayáá xtiʼkhuu dí na̱ʼkha̱ náa kutriga̱ 7.)
7 Gixa̱a̱ nindoo dí Job mandxaʼwáminaʼ rí Jeobá nánguá eyoo kaʼyoo, ikha jngóo niʼni dí maxnúu mbá giñán gakhii náa guʼwá rí triʼi̱i̱n ruphiʼtsu mbá gu̱wi̱i̱nʼ e̱ji̱i̱n Job, ikhú nigajxi̱i̱ (Job 1:18, 19). Ma̱ngaa niʼni dí magajtaa aguʼ asndu náa mekhuíí ga̱jma̱a̱ nikháñún xujkhúʼ bi̱ gíʼdiin Job, mú raʼkháa i̱ndó rúʼko̱, ma̱ngaa niʼni dí makhañún bi̱ nuñewu̱u̱n xujkhúʼ (Job 1:16). Numuu dí náa mekhuíí ni̱ʼkha̱ aguʼ ga̱jma̱a̱ giñáánʼ, ikha jngóo Job nindxa̱ʼwáminaʼ rí Jeobá niʼni, ma̱ngaa rúʼko̱ niʼni mandxaʼwáminaʼ dí ikhaa niʼni mbá dí ra̱májánʼ náa iduu Jeobá. Maski ajndu xúʼko̱ nikumu̱u̱ Job, ikhaa na̱nguá niʼthá tsríguíi Anu̱lú Jeobá. Ndiʼyoo má dí mbayuuʼ tsiguʼ Dios nixnúu xúgíʼ rí nindxu̱u̱ májánʼ, ikha jngóo, xó má ikhaa nigruigú rí májánʼ xúʼko̱ ma gíʼmaa magruigú dí ra̱májánʼ ma̱ngaa. Ikhaa niʼthí: “Gaguma mba̱a̱ má xúʼko̱ mbiʼyuu Jeobá” (Job 1:20, 21; 2:10). Maski ajndu nindáti̱ga̱a̱ xúgíʼ rí gíʼdoo, nigawúunʼ ga̱jma̱a̱ niʼñuu nandii, ikhaa tániñuuʼ nditháan Jeobá. Nda̱wa̱á Gixa̱a̱ ndiyáʼ i̱ʼwáʼ dí maʼñuu.
8. Ndiéjuunʼ imbo̱o̱ tsáʼkhá nigíʼ Gixa̱a̱ náa inuu Job rá.
8 Gixa̱a̱ nigíʼ i̱mba̱ tsáʼkhá náa inuu Job. Niʼni rí ajtsíin bi̱ nambájxuu gajmíi̱n muthán rí nándáa numuu. Ma̱ngaa nitháán dí ikhaa niʼni mbaʼa dí raʼkhí, ikha jngóo xtáa namínuʼ (Job 22:5-9). Nindúún dí maku̱mu̱u̱, rí maski ajndu táʼni dí ra̱májánʼ rígi̱, ikhaa nditháan xáʼngo̱o̱ gáʼni dí Dios naniguuʼ, maski asndu nindxu̱u̱ xa̱bu̱ májáanʼ (Job 4:18; 22:2, 3; 25:4). Dí phú nindúún muni nindxu̱u̱ dí Job maku̱mu̱u̱, rí Dios nánguá eyoo kaʼyoo ga̱jma̱a̱ rí ikhaa xañewu̱u̱n ma̱ngaa rí nándáa má numuu rí mbaʼyamajkuu. Mbáa ajngáa rígi̱ nijkha kayáa mandxaʼwáminaʼ dí ga̱jma̱a̱ numuu gamiéjunʼ dí xtáa raraʼnuu, nándáa dí ma̱ndoo maʼni.
9. Náá numuu rí Job nigiʼdoo tsiakii mu maraʼnuu xúgíʼ gamiéjunʼ rígi̱ rá.
9 Gundxaʼwamíjna̱ rí kuwáanʼlu ikhí. Job gíʼ ragawúunʼ náa idiʼ kañiʼ mbiʼi ga̱jma̱a̱ mbruʼun (Job 2:8). Bi̱ nambájxuu gajmíi̱n nutháán má xúʼko̱ dí ikhaa ra̱májánʼ niʼni. Ga̱jma̱a̱ nagawúunʼ wéñuuʼ numuu rí nikháñúún e̱ji̱i̱n. Xúgíʼ xkujndu rígi̱ naʼni rí Job maʼni néʼngo̱o̱ ga̱jma̱a̱ mikhu a̱jkiu̱u̱n (Job 2:13-3:1). Job wíí gíʼ raʼdxu̱u̱n, ikha jngóo bi̱ nambájxuu gajmíi̱n nikumu̱ún rí maniñuuʼ Jeobá, numuu rí nda̱a̱ dí eʼthí. Mú tárígá xóo nindxaʼwamíjna̱ ikhiin. Nda̱a̱ tsu̱ma̱ Job niyejxu̱u̱n bi̱ nambájxuu gajmíi̱n, ikhú niʼthún: “¡Asndu índo̱ gákháñuʼ, káxi̱ má xúʼko̱ a̱jkiu̱nʼ gání!” (Job 27:5). Náá numuu rí Job nigiʼdoo tsiakii mu maraʼnuu xúgíʼ gamiéjunʼ rígi̱ rá. Numuu rí nditháan tándxa̱ʼwáminaʼ rí Dios maniñuuʼ maski ajndu xtáa ramínúuʼ wéñuuʼ. Ikhaa ndiʼyoo gajkhun, rí maski má nakháñuu, Jeobá maʼnigabi̱i̱ (Job 14:13-15).
XÓO GUʼYARIDÁÁ JOB
10. Dí eʼsngúlú xóo nixtáa Job rá.
10 Dí nigíʼnuu Job naʼsngúlú dí Gixa̱a̱ xándoo maxtumáánʼ dí muniʼñááʼ Jeobá, numuu rí Dios ndaʼyoo xúgíʼ dí nugíʼníílú. Xkri̱da ndrígóo ga̱jma̱a̱ xóo nixtáa Job, naʼsngúlú imba̱ dí gíʼdoo numuu. Guʼyáá ndiéjuunʼ nindxu̱u̱.
11. Dí gárígá á mu nakumulú kuʼyáá Jeobá rá. (Santiago 4:7.)
11 Job nisngájma, á mu nakumulú kuʼyáá Jeobá maʼngulú muraʼníí asndu ndiéjúúnʼ má gamiéjunʼ ga̱jma̱a̱ maʼngulú murikháá Gixa̱a̱. Ndiéjuunʼ gárígá á mu nuʼni xúʼko̱ rá. Náa Biblia naʼthúlú dí Gixa̱a̱ matsínguunʼ náa ikháanʼ (atraxnuu Santiago 4:7).
12. Xú kaʼnii nimbáyúu Job dí matujxi̱ín bi̱ nikháñún rá.
12 Guʼyáá gajkhun dí matujxi̱ín bi̱ nikháñún. Xó má niʼthá náa artículo dí ninújngoo, rí Gixa̱a̱ najmuu dí naʼnimíñulú, xóo dí makhañúlúʼ, mu xúʼko̱ muniʼñááʼ Jeobá. Gundxaʼwamíjna̱ ga̱jma̱a̱ numuu Job. Gixa̱a̱ niʼthí rí Job maʼni asndu ndiéjúúnʼ mu maʼni kríyami̱naʼ ga̱jma̱a̱ rí maniñuuʼ Jeobá. Ndiéjuunʼ niʼni Job rá. Maski ajndu nimínúuʼ wéñuuʼ ga̱jma̱a̱ nikumu̱u̱ rí makhañúu, ikhaa nditháan tániñuuʼ Jeobá. Xú kaʼnii niʼngo̱o̱ xá. Dí mbaʼyoo rí Jeobá nindxu̱u̱ májáanʼ a̱jkiu̱u̱n ga̱jma̱a̱ rí Ikhaa maʼni májáanʼ xúgíʼ nda̱wa̱á. Ikhaa ndiʼyoo gajkhun rí, maski ajndu Dios tsembáyúu índo̱ xtáa mbiʼyuu, mú nda̱wa̱á maʼni rí matujxi̱i̱. Job ndiʼyoo gajkhun rí matujxi̱ín bi̱ nikháñún, xúʼko̱ má mangáanʼlú. Nditháan xúniʼñáánʼ Jeobá maski asndu nutulúʼ dí muradiáanʼ.
13. Ndíjkha rí májánʼ mbuʼyáá ndiéjuunʼ tsáʼkhá nijmuu Gixa̱a̱ náa Job rá.
13 Májánʼ gáʼni rí mbuʼyáá tsáʼkhá rí nijmuu Gixa̱a̱ náa Job, numuu rí ikhaa kayúúʼ má ejmuu rí mbiʼi xúgi̱ ma̱ngaa. Guʼyáá nduwaʼ dí niʼthí ga̱jma̱a̱ numuu Job ma̱ngaa ga̱jma̱a̱ numulú mbá xúgiáánʼ. Ikhaa niʼthí: “Xa̱biya̱ maxná xúgíʼ rí gíʼdoo mu maʼni kríyaminaʼ” (Job 2:4, 5). Gixa̱a̱ nindoo gaʼthí rí tsíyulú kuʼyáá gajkhun Jeobá, ga̱jma̱a̱ á mu dí kuwáanʼlu ruraʼníí mbá gamiéjunʼ muniʼñááʼ Jeobá. Ma̱ngaa niʼthí rí Dios tsíyoo kaʼyulú ga̱jma̱a̱ tsémajkhuu nimbá dí nuʼnilú. Ikháanʼ bi̱ naguáʼthíi̱nlú Jeobá, Gixa̱a̱ xáʼngo̱o̱ gaʼni nduwáanʼlú numuu rí nduʼyáá ndiéjuunʼ tsáʼkhá ejmuu.
14. a) Ndiéjuunʼ gándoo mbuʼyáá índo̱ nuraʼníí mbá tsáʼkhá rá. b) Xkaʼnii xkri̱da gándoo gámbáyulú makru̱ʼu̱lú rígi̱ rá.
14 Índo̱ nuraʼníí tsáʼkhá májánʼ gaʼni rí mbuʼyáá xóo ni̱ndxu̱lú. Gamiéjunʼ dí niraʼnuu Job nimbáyúu mbaʼyoo ndiéjuunʼ rí xóó tígo̱o̱ maʼni. Mbá xkri̱da ndiʼyoo rí ndayóoʼ mani̱ndxu̱u̱ xa̱bu̱ guabaaʼ (Job 42:3). Xúʼko̱ má mangáánʼ ma̱ndoo mbuʼyáá xú kaʼnii xa̱bu̱ ni̱ndxu̱lú índo̱ kuwáanʼ ranújngulú náa mbá gamiéjunʼ. Xúʼko̱ nigíʼnuu Nikolái, * nixuda̱a̱ʼ guʼwá ejua̱a̱nʼ maski ajndu nandoo kháñuu, ikhaa niʼthí: “Índo̱ nixtáá náa guʼwá ejua̱a̱nʼ nimbáyuʼ mba̱yo̱o̱ ndiéjuunʼ cualidades rí ndayóoʼ xóó magúʼdoo”. Índo̱ nduʼyáá dí rígá rí ndayóoʼ xóó muʼni, ma̱ndoo mugíʼdi̱i̱ muʼnilú.
15. Tsáá gíʼmaa mudxa̱ʼwíín ga̱jma̱a̱ náá numuu rá.
15 Gíʼmaa mudxa̱ʼwíín Jeobá raʼkháa dí gúthi xa̱bu̱ sia̱nʼ ndrígúlú. Job niʼdxawuun Jeobá índo̱ niʼtámíjná ga̱jma̱a̱, ma̱ngaa Jeobá niʼñuu tikhu graxe̱ Job mu mambáyúu mbaʼyoo dí ikhaa naxmiéjuunʼ kaʼyoo. Jeobá niʼthúu̱n: “Lá nitayáá tsiakii ndrígóʼ ga̱jma̱a̱ xúgíʼ dí niʼni ráʼ. Ikhúún xtáá ra̱yo̱o̱ xúgíʼ dí xtaa ratagíʼníí. Lá naku̱ma̱a̱ʼ dí ikhúún xáʼngo̱ʼ gáñewa̱a̱nʼ ráʼ.” Job niriʼña ga̱jma̱a̱ ajngáa wabaʼ ma̱ngaa nisngájma gamajkhu, ikhaa niʼthí: ‹Nadxun nuthi ga̱jma̱a̱ numaaʼ, mú rí xúgi̱ nda̱ya̱a̱ʼ ga̱jma̱a̱ iduʼ› (Job 42:5). Mbáa índo̱ Job niʼthí ajngáa rígi̱, ikhaa kaʼníí gíʼ náa idiʼ kagu̱ yaʼskha náa xuyuuʼ ga̱jma̱a̱ xtáa rambiyaʼ numuu rí nikháñúún e̱ji̱i̱n. Ikhú Jeobá niʼthúu̱n rí ikhaa nandoo kaʼyoo ma̱ngaa dí maʼni tsajkurámaaʼ (Job 42:7, 8).
16. Xó má eʼthí Isaías 49:15, 16, ndiéjuunʼ gíʼmaa marmáʼáan a̱jkiu̱lú índo̱ nanújngulú náa gamiéjunʼ rá.
16 Rí mbiʼi xúgi̱ mbáa kúwi̱i̱n tikhuun xa̱bu̱ bi̱ nundxaʼwamáanʼlú o nuthi rí nda̱a̱ numulú. Mbáa nandún muni gachíí mbiʼyulú ga̱jma̱a̱ xuajñuu Jeobá, rí asndu ‹muni nduwaʼ mu muthi xúgíʼ enii dí ra̱májánʼ› ga̱jma̱a̱ numulú (Mat. 5:11). Xkri̱doo Job naʼsngúlú dí Jeobá ndaʼyoo dí ikháanʼ ma̱ndoo muguajunlú jmbu índo̱ kuwáanʼlu ruraʼníí mbá gamiéjunʼ. Jeobá nandoo kaʼyulú ga̱jma̱a̱ tsémbumuu kaʼñún bi̱ naguaʼti̱i̱n náa ikhaa (atraxnuu Isaías 49:15, 16). * Xúʼnimbulú nduwaʼ dí gúthi xa̱bu̱ sia̱nʼ ndrígóo Dios. Guyáá rí niʼthí mbáa ndxájulú bi̱ ndiyóoʼ manújngoo náa mbaʼa gamiéjunʼ gakhii gajmíi̱n bi̱ kúwá náa goʼwóo, James bi̱ xtáa náa Turquía. Ikhaa niʼthí: “Nijkhuánuxu ndiya̱a̱ á mu nunimbuxu nduwaʼ dí nuthi ga̱jma̱a̱ numuu xuajñuu Dios, maʼni dí muniʼñááʼ Jeobá. Ikha jngóo, nuʼgíʼ nundxaʼwamíjnaxu̱ itháan dí maʼni xa̱bu̱ ñajunʼ ndrígóo Dios, ga̱jma̱a̱ nunixu mbá tsiakii mu xúniʼñáánʼ runi ñajuunʼ Jeobá mu makuwáanʼxu gagi”. Guʼyaridáá má xúʼko̱ Job ga̱jma̱a̱ guʼdxawíín dí naʼthúlú Jeobá. Xúniʼñáánʼ dí ga̱jma̱a̱ numuu nduwaʼ ndrígu̱ún xa̱bu̱ sia̱nʼ maʼni rí mandáti̱gu̱lú dí kua̱ʼthi̱i̱n marigá nda̱wa̱á.
DÍ MARIGÁ NDA̱WA̱Á NAMBÁYU MAʼNGULÚ
Job niguma tsajkurámaaʼ wéñuuʼ ga̱jma̱a̱ numuu rí tániñuuʼ Jeobá. Dios niʼni rí maxtáa mbayuuʼ ga̱jma̱a̱ a̱ʼgiu̱u̱ ma̱ngaa dí makuwá tsímáá. (Atayáá kutriga̱ 17). *
17. Ndiéjuunʼ ejmañulú ga̱jma̱a̱ numún xa̱bekha ma̱ngaa gu̱ʼu̱ bi̱ naʼthí náa capítulo 11 ndrígóo Hebreos rá.
17 Raʼkháa i̱ndó Job nindxu̱u̱ xa̱bi̱i̱ Jeobá bi̱ niʼngo̱o̱ ga̱jma̱a̱ niwi̱ji̱ gujkhuʼ náa mbaʼa gamiéjunʼ dí niraʼnuu. Náa carta dí nikuʼma apóstol Pablo náa inún a̱ngiu̱lú hebreos niʼthí rí kuwáanʼlu náa majñúnʼ ‹mbaʼin wéñuuʼ xa̱bi̱i̱› Dios (Heb. 12:1). Maski ajndu mbaʼa gaʼkhu gakhii dí ikhiin niraʼníí, mú náa xúgíʼ mbiʼi dí ikhiin nikúwi̱i̱n nditháan túniña̱a̱ʼ Jeobá (Heb. 11:36-40). Lá niyambáá dí ikhiin niʼngu̱u̱n xáʼ. Aan, xúʼko̱. Gajkhun má dí na̱nguá niʼngu̱u̱n guyáá xú káʼnii nimbánuu rí nikudaminaʼ maʼni Dios, mú niguaʼti̱i̱n má xúʼko̱ náa ikhaa. Ga̱jma̱a̱ numuu rí ndiyáá dí Jeobá nigruiguíin, ikha jngóo nikumu̱ún gajkhun rí mambanúu xúgíʼ dí nakudaminaʼ maʼni Dios (Heb. 11:4, 5). Dí mundxaʼwamíjna̱ ga̱jma̱a̱ numún ikhiin naxnúlú tsiakii muguaʼthi̱i̱n má xúʼko̱ Jeobá.
18. Ndiéjuunʼ dí gíʼmaa muʼni maski ajndu nuraʼníí gamiéjunʼ rá. (Hebreos 11:6.)
18 Náa numbaaʼ dí kuwáánʼlú mambá mbiʼi na̱jkha̱ raʼni itháán mixkawiʼ (2 Tim. 3:13). Ma̱ngaa Gixa̱a̱ nagrui̱ga̱ má xúʼko̱ tsáʼkhá náa inún xa̱bi̱i̱ Dios. Ikha jngóo, tséʼñuu asndu ndiéjúúnʼ má dí gugíʼníílú nda̱wa̱á guʼni má xúʼko̱ ñajuunʼ Jeobá ga̱jma̱a̱ xúgíʼ a̱jkiu̱lú, numuu rí nakumulú kuʼyáá ikhaa (1 Tim. 4:10). Garmáʼáan a̱jkiu̱lú ndiéjuunʼ nigíʼnuu Job nda̱wa̱á dí ikhaa nimínúuʼ, ‹Jeobá nisngájmuu dí májánʼ wéñuuʼ a̱jkiu̱u̱n ga̱jma̱á nindxu̱u̱ ma̱ngaa nigáwíinʼ a̱jkiu̱u̱n kaʼyoo› (Sant. 5:11). Xó má Job, xúniʼñáánʼ Jeobá numuu dí ikhaa naʼninumií bi̱ ‹nduyáaʼ ga̱jma̱a̱ xúgíʼ a̱jkiu̱ún› (atraxnuu Hebreos 11:6).
AJMÚÚ 150 ¡Jeobá má gaʼni kríñanʼ!
^ Tsáá xa̱bíi e̱ʼkha̱ náa edxa̱a̱ʼ bi̱ niʼngo̱o̱ niraʼnuu xkujndu rí gakhii rá. Mbáa nacha̱ tatsaʼwáminaʼ ga̱jma̱a̱ numuu Job. Ndiéjuunʼ gándoo gajmañulú náa xúgíʼ dí nigíʼnuu xa̱bi̱i̱ Jeobá bigi̱ rá. Najmañulúʼ dí Gixa̱a̱ xándoo matsudáanʼlú muniʼñááʼ Jeobá, ma̱ngaa najmañulúʼ dí Jeobá ndaʼyoo xúgíʼ dí nuraʼníílú. Iwáá kayuuʼ, xó má niʼni gámbóo gamiéjunʼ dí nigiʼdoo Job, xúʼko̱ má mbóoʼ mbiʼi maʼni gámbóo dí nuraʼníílú mangáanʼ. Á mu nusngajmá ga̱jma̱a̱ rí nuʼnilú dí xúʼko̱ marigá, ma̱ndoo muʼthá dí ni̱ndxu̱lú xa̱bu̱ bi̱ naku̱mu̱u̱ kaʼyoo Jeobá.
^ KU̱MA̱ RÍ GÍʼDOO NUMUU: Náa ajngáa hebrea “muguáʼthíi̱nʼlú náa”, nandoo gáʼthúu̱n dí ra̱ʼkhá tháán nandulú dí marigá. Ma̱ngaa nandoo gáʼthúu̱n dí makumaaʼ xtayáá mbáa (Sal. 25:2, 3; 62:5).
^ Job 1:9-12: “Ikhú Gixa̱a̱ niriʼñuu Jeobá: “Rígá dí niraxnáá Job ikha jngóo namíñuu kaʼyaaʼ. Lá tátani mbóo gúláa náa mbájndi ikhaa ga̱jma̱a̱ náa goʼwóo ma̱ngaa náa xúgií dí gíʼdoo xáʼ. Ikháán nitani̱ tsajkurámááʼ ñajunʼ dí gíʼdoo, ga̱jma̱a̱ xujkiúu ni̱jkha̱nú niʼni mbaʼin wéñuuʼ náa tsu̱du̱u̱ ku̱ba̱ʼ. Mú atrígú káyiiʼ xúgíʼ rí gíʼdoo, ma̱ta̱ya̱a̱ á mu xáʼta wéñaaʼ”. Ikhú, Jeobá niʼthúu̱n Gixa̱a̱: “Xúgíʼ rí gíʼdoo rígá náa ñawáanʼ. ¡Mú nda̱a̱ rí gátani̱i̱ ikhaa!”. Ikhú Gixa̱a̱ nigájna̱a̱ náa xtáa Jeobá”.
^ Nixtiʼkhuu mbiʼñún tikhun.
^ Isaías 49:15, 16: “Ma̱ndoo mbáa a̱ʼgu̱ mambumuu kaʼyoo a̱ʼdióo bi̱ chíʼgíiʼ o rí xágawíinʼ a̱jkiu̱u̱n kaʼyoo a̱ʼdióo bi̱ nigu ewáan ráʼ. Maski ajndu gu̱ʼu̱ bugi̱ mambumúún, mú ikhúún xámbumuʼ ka̱ya̱a̱ʼ nditháan. ¡Atadxuun! Niniraʼmáʼ mbiʼyaaʼ náa ñawúnʼ. Nda̱yo̱o̱ má xúʼko̱ xtátsí ndrígáaʼ”.
