1. (a) Mbulangizi nzi mbwatupede Jehova? (b) Ino ‘kulangila Jehova’ caamba nzi? (Amubone “Bupanduluzi Bwamabala.”)

 JEHOVA wakabapa bulangizi bubotu kapati boonse aabo ibamuyanda. Ino-ino uyakukugusya kuusa, kuciswa alimwi alufwu. (Ciy. 21:3, 4) Uyoobagwasya “babombe myoyo” ibalangila nguwe kucinca nyika kuba paradaiso. (Int. 37:9-11) Kuyungizya waawo, uyoopa kuti cikonzyeke kuli umwi aumwi wesu kuba acilongwe cibotu anguwe, calo ncotuyookkomanina kwiinda lino. Eelo kaka bulangizi oobu mbubotu! Pele ino ncinzi citupa kusyoma kuti zisyomezyo zya Leza ziyoozuzikizyigwa ncobeni? Jehova lyoonse ulacita nzyaamba. Aboobo tulijisi kaambo kabotu ikeelede kutupa “kulangila Jehova.” * (Int. 27:14) Tulacita oobo kwiinda mukulindila cakukkazyika myoyo alimwi acalukkomano ikuti Leza wesu akaazuzikizye makanze aakwe.—Is. 55:10, 11.

2. Ino ncinzi Jehova ncaacita kale?

² Jehova wakatondezya kale kuti ulazuzikizya zisyomezyo zyakwe. Amubone cikozyanyo comwe cikkomanisya. Mubbuku lya Ciyubunuzyo, Jehova wakasyomezya kuti muciindi ecino, ulayobolola bantu kuzwa kumisyobo yoonse, kumilaka yoonse alimwi akumyaambo yoonse kutegwa abakamantanye antoomwe mubukombi busalala. Mazuba aano, mbunga yabantu eeyo iilibedelede iitwa kuti “nkamu mpati.” (Ciy. 7:9, 10) Nokuba kuti nkamu eeyi ibikkilizya bamaalumi, bamakaintu alimwi  abana munyika yoonse, nkokuti mukwasyi omwe uukamantene. (Int. 133:1; Joh. 10:16) Kuyungizya waawo, bankamu mpati eeyi, mbakambausi basungu. Lyoonse balilibambilide kwaambila bamwi kujatikizya bulangizi bwabo bwanyika mbotu. (Mt. 28:19, 20; Ciy. 14:6, 7; 22:17) Ikuti kamuli umwi wankamu eeyi, tacidoonekwi buya kuti bulangizi bwanu bwazintu zyakumbele bulayandika kapati kulindinywe.

3. Makanze nzi ngajisi Saatani?

³ Diabolosi uyanda kutupa kuleka kuba abulangizi bwakumbele. Makanze aakwe ngakutupa kusyoma kuti Jehova tatubikkili maano alimwi akuti takazizuzikizyi zisyomezyo zyakwe. Ikuti Saatani wazwidilila mukucita boobo, tuyootyompwa, alimwi ambweni inga twacileka kubelekela Jehova. Mbubwenya mbotutiibone, Diabolosi wakasola kupa Jobu kuti aleke kuba abulangizi alimwi akuleka kubelekela Jehova.

4. Ncinzi ncotutiilange-lange mucibalo eeci? (Jobu 1:9-12)

⁴ Mucibalo eeci, tulalanga-langa nzila zyabucenjezu Saatani nzyaakabelesya kusola kupa kuti Jobu acileke kusyomeka kuli Jehova. (Amubale Jobu 1:9-12.) Kunze lyaboobo, tulalanga-langa ncotukonzya kwiiya kucikozyanyo ca Jobu alimwi akaambo ncotweelede kubona kuti Leza ulatuyanda akuti uyoozizuzikizya zisyomezyo zyakwe.

5-6. Nzintu nzi izyakamucitikila Jobu muciindi cisyoonto buyo?

⁵ Zintu zyoonse zyakali buyo kabotu mubuumi bwa Jobu. Wakalijisi cilongwe cibotu a Jehova. Wakalijisi mukwasyi mupati uukamantene alimwi wakalivwubide kapati. (Job. 1:1-5) Pele mubuzuba buyo bomwe, Jobu wakasweekelwa zintu zyoonse nzyaakajisi. Kusaanguna, wakasweekelwa lubono lwakwe loonse. (Job. 1:13-17) Kumane, bana bakwe boonse bayandwa bakafwa. Amuyeeye buyo kujatikizya mapenzi aaya. Bazyali balausa kapati ciindi mwanaabo omwe buyo naafwa. Aboobo amweezyeezye buyo Jobu amukaintu wakwe mbobakanyongana alimwi akuusa kapati ciindi nobakamvwa kuti bana babo boonse bali kkumi bafwa. Nkakaambo kaako Jobu wakazapula zisani zyakwe akuwa ansi kumwi kalila!—Job. 1:18-20.

⁶ Mpoonya Saatani wakapa Jobu kuciswa bulwazi bucisa kapati alimwi busampuzya. (Job. 2:6-8; 7:5) Aciindi cimwi Jobu wakali muntu uulemekwa kapati mucilawo mwaakali kukkala. Bantu bakali kuboola kulomba lugwasyo alimwi alulayo kulinguwe. (Job. 31:18) Pele aciindi aawa boonse bakamutantamuka. Wakali kulibonya mbuli muntu uutazyibidwe, banabokwabo, balongwe alimwi ababelesi bamuŋanda yakwe bakamukaka!—Job. 19:13, 14, 16.

7. (a) Ino Jobu wakazyi kuti upengela nzi, alimwi ncinzi ncaakacita? (b) Mbuti Munakristo mbwakonzya kujana masunko aakozyenye ayaayo ngotubwene mucifwanikiso?

⁷ Saatani wakali kuyanda kupa Jobu kusyoma kuti wakali kupenga akaambo kakuti Jehova tanaakali kumukkomanina. Mucikozyanyo, Saatani wakabelesya guwo kunyonyoona ŋanda mobakabede bana ba Jobu boonse bali kkumi nobakali kulya antoomwe. (Job. 1:18, 19) Wakapa kuti mulilo uloke kuzwa kujulu, akunyonyoona zivwubwa zya Jobu alimwi ababelesi bakwe ibakali kuzilanganya. (Job. 1:16) Mbwaanga guwo alimwi amulilo zyakazwa kujulu; Jobu wakayeeya kuti zyakazwa kuli Jehova Leza. Akaambo kaceeci, Jobu wakasyoma kuti ambweni wakamunyemya Jehova. Nokuba boobo, Jobu wakakaka kumutukila Usyi wakujulu. Jobu wazikuzyiba kuti myaka  yoonse wakali kupegwa zintu zinji zibotu kuzwa kuli Jehova. Aboobo wakayeeya kuti ikuti naa wakali kupegwa zintu zibotu kuzwa kuli Leza, nkokuti wakeelede kulyaaba akutambula zintu zibyaabi. Wakaamba kuti: “Alizumanane kutembaulwa izina lya Jehova.” (Job. 1:20, 21; 2:10) Nokuba kuti Jobu wakasweekelwa lubono, bana alimwi wakuciswa, wakazumanana kusyomeka kuli Jehova. Pele Saatani wakabelesya nzila aimbi.

8. Ninzila nzi Saatani njaakabelesya kuli Jobu?

⁸ Nzila imwi njaakabelesya Saatani; mbaalumi botatwe balo ibakalicengeezya kuba balongwe ba Jobu akumupa kulimvwa kuti takwe mpindu. Baalumi aaba bakaambila Jobu kuti wakali kupenga akaambo kakuti kuli zibi ziindene-indene nzyaakacita. (Job. 22:5-9) Abalo bakasola kumupa kusyoma kuti nokuba kuti kunyina cibi ncaakacita, kusolekesya koonse nkwaakali kucita ikusola kukkomanisya Leza, kwakali kwabuyo. (Job. 4:18; 22:2, 3; 25:4) Munzila imwi, baalumi aaba bakali kusola kupa Jobu kudooneka kuti Leza ulamuyanda, ulakonzya kumulanganya, alimwi akuti kumubelekela takugwasyi pe. Majwi aabo aakali kukonzya kupa Jobu kulimvwa kuti tajisi bulangizi.

9. Ncinzi icakagwasya Jobu kuba sicamba alimwi akuyuma?

⁹ Amweezyeezye icakali kucitika. Jobu ulikkede mumulota kumwi kamvwide kucisa kapati. (Job. 2:8) Beenzinyina baluujisi kwaamba kuti muntu mubyaabi alimwi akuti zyoonse nzyaakali kucita tazijisi mpindu. Jobu lyamuleka ciindi nauside akaambo kakusweekelwa bana bakwe. Kumatalikilo, Jobu uluumwine. (Job. 2:13–3:1) Pele kuti naa balongwe ba Jobu aaba bakali kuyeeya kuti Jobu ncaumwine uyanda kumuzangila Jehova, bakalilubizyide. Aciindi cimwi, kweelede kuti Jobu wakabalanga cantongola meso baalumi aaba akwaamba kuti: “Kusikila ndikafwe, tandikaleki  kusyomeka pe!” (Job. 27:5) Ncinzi cakagwasya Jobu kuba sicamba alimwi akuyuma nokuba kuti wakali mumapenzi? Nociba ciindi naakatyompedwe kapati, Jobu kunyina naakaleka kuba abulangizi bwakuti Leza wakwe siluyando wakali kuyakwaamana mapenzi aakwe. Wakalizyi kuti nokuba kuti wafwa, Jehova wakali kuyoomubusya.—Job. 14:13-15.

10. Ino cibalo caamba zya Jobu cituyiisya nzi?

¹⁰ Cibalo caamba zya Jobu cituyiisya kuti Saatani takonzyi kutusinikizya kumuzangila Jehova alimwi akuti Jehova ulizyi zintu zyoonse zicitika. Icakamucitikila Jobu cilakonzya kutugwasya kutumvwisya kabotu twaambo itwakajatikizyidwe. Atulange-lange ziiyo zyacigaminina nzyotukonzya kwiiya kuli Jobu.

11. Ncinzi ncotukonzya kulangila kuti twazumanana kusyoma Jehova? (Jakobo 4:7)

¹¹ Jobu wakatondezya kuti, ikuti naa twazumanana kumusyoma Jehova, tuyoocikonzya kuliyumya kusunko lili lyoonse alimwi akuzwidilila kumukazya Saatani. Ino ncinzi ciyoocitika? Magwalo atwaambila kuti Diabolosi uyootuccija.—Amubale Jakobo 4:7.

12. Mbuti bulangizi bwabubuke mbobwakamuyumya Jobu?

¹² Tweelede kuba alusyomo luyumu mubulangizi bwabubuke. Mbubwenya mbotwakaiya mucibalo cainda, Saatani kanji-kanji ubelesya kuyoowa lufwu kusola kutulesya kusyomeka. Mubukkale bwa Jobu, Saatani wakaamba kuti Jobu ulakonzya kucita cili coonse, nokuba kucileka kusyomeka kutegwa akwabilile buumi bwakwe. Saatani wakalilubide. Nociba ciindi Jobu naakalangene alufwu, wakazumanana kusyomeka kuli Jehova. Lusyomo ndwaakajisi lwakuti Jehova mubotu alimwi abulangizi mbwaakajisi bwakuti Jehova wakali kuyoozilulamika zintu, zyakamugwasya Jobu. Jobu wakali kusyoma kuti, ikuti naa Jehova taamugwasya ciindi nacipona, nkokuti wakali kuyoomubusya kumbele. Bulangizi bwabubuke bwakali bwini-bwini kulinguwe. Kuti andiswe bulangizi bwabubuke kabuli bwini-bwini kulindiswe, nkokuti noluba lufwu kunyina noluyootupa kuleka kusyomeka.

13. Nkaambo nzi ncotweelede kubikkila maano kunzila zyabucenjezu Saatani nzyaakabelesya kuli Jobu?

¹³ Tweelede kuzibikkila kapati maano nzila zyabucenjezu Saatani nzyaakabelesya kuli Jobu, nkaambo ulazibelesya amazuba aano. Amubone kutamikizya nkwaakacita Saatani naakati: “Muntu [kutali Jobu alikke] uyoopa zintu zyoonse nzyajisi kutegwa avwune buumi bwakwe.” (Job. 2:4, 5) Munzila imwi, Saatani waamba kuti tatumuyandi ncobeni Jehova Leza alimwi akuti tulakonzya kumuzangila ikuti naa caamba kufwutula buumi bwesu. Kuyungizya waawo, Saatani waamba kuti Leza tatuyandi alimwi akuti kusolekesya kuli koonse nkotucita kutegwa tumukkomanisye, takuboni pe. Mbwaanga twacenjezyegwa, swebo notujisi bulangizi muli Jehova, tatweelede kucengwa abucenjezu bwa Saatani.

14. Ncinzi masunko ncaayubununa mulindiswe? Amupe cikozyanyo.

¹⁴ Masunko tweelede kwaabona kuti ncoolwe cakuzyiba bwini mbotubede. Masunko ngaakajana Jobu akamugwasya kuzyiba kulezya nkwaakajisi alimwi akukubambulula. Mucikozyanyo, wakaiya kuti wakeelede kuba abube bwakulicesya kapati. (Job. 42:3) Andiswe tulaiya zinji kujatikizya mbotubede ciindi notuli mumasunko. Mukwesu Nikolay, * iwakabikkwa muntolongo nokuba kuti wakali kuciswa bulwazi bupati, wakaamba kuti: “Ntolongo ili mbuli X-ray iitondezya bube bwa Munakristo bwamukati.” Ciindi notwazyiba kulezya kwesu, tulakonzya kukubambulula.

15. Ino nguni ngotweelede kuswiilila, alimwi nkaambo nzi?

 ¹⁵ Tweelede kuswiilila Jehova, ikutali basinkondoma. Jobu wakaswiilila cakubikkila maano ciindi Jehova naakabandika anguwe. Leza wakabuzya Jobu kuti: ‘Sena ulizyibwene nguzu zyangu zyakulenga? Ndilizyi zintu zyoonse izyakakucitikila. Sena uyeeya kuti tandikonzyi kukulanganya?’ Cakulicesya alimwi akulumba kapati kububotu bwa Jehova, Jobu wakaingula kuti. “Ndakali kumvwa buyo mpuwo yako, pele lino ndakubona ameso aangu.” (Job. 42:5) Ciindi Jobu naakaamba majwi aaya, kweelede kuti wakacili mumulota, mubili wakwe kauzwide zilonda, alimwi bana bakwe bakacili mucuumbwe. Nokuba boobo, Jehova wakatondezya luyando lwakwe kuli Jobu alimwi akumwaambila kuti ulamukkomanina.—Job. 42:7, 8.

16. Kweelana a Isaya 49:15, 16, ncinzi ncotweelede kuyeeya ciindi notwajana masunko?

¹⁶ Mbubwenya buyo amazuba aano, bantu balakonzya kututukila alimwi akutweendelezya mbuli kuti tatujisi mpindu. Balakonzya kunyonganya mpuwo yesu naa yambunga, alimwi ‘akutubejelezya zintu zibi ziindene-indene.’ (Mt. 5:11) Kuzwa kucibalo ca Jobu twaiya kuti Jehova ulaalusyomo lwakuti tuyoozumanana kusyomeka kulinguwe twaakujana masunko. Jehova ulatuyanda alimwi kunyina nayakubalekelezya aabo balangila nguwe. (Amubale Isaya 49:15, 16.) Aboobo mutanikuswiilili makani aali woonse aakusampaula aambwa abasikondonyina Leza! Mukwesu James uukkala ku Turkey, uuli aamukwasyi wakajana masunko mapati, wakaamba kuti: “Twakabona kuti kuswiilila kububeji ibwaambwa kujatikizya  bantu ba Leza kulakonzya kututyompya. Aboobo, twakabikkila buyo maano kubulangizi bwesu bwa Bwami alimwi akuzumanana kuba basungu mumulimo wesu kuli Jehova. Akaambo kaceeci, twakazumanana kuba alukkomano.” Mbubwenya mbuli Jobu, tulamuswiilila Jehova! Bubeji bwabasinkondoma tabukonzyi kunyonganya bulangizi bwesu.

17. Ncinzi ncomwiiya kucikozyanyo cabamaalumi abamakaintu ibaambidwe ku Bahebrayo caandaano 11?

¹⁷ Jobu ngumwi wababelesi ba Jehova ibakatondezya busicamba alimwi akuyuma ciindi nobakali mumasunko mapati. Mulugwalo ndwaakalembela bana Hebrayo, mwaapostolo Paulo wakaamba abamwi banji kuti ‘ninkamu mpati yabakamboni.’ (Heb. 12:1) Boonse bakajana masunko aasiyene-siyene, nokuba boobo, bakazumanana kusyomeka kuli Jehova mubuumi bwabo boonse. (Heb. 11:36-40) Sena kuliyumya kwabo alimwi akubeleka canguzu kwakali kwabuyo? Peepe! Nokuba kuti ciindi nobakali kupona tiibaakubona kuzuzikizyigwa kwazisyomezya zya Leza zyoonse, bakazumanana kulangila Jehova. Alimwi akaambo kakuti bakalisinizyide kuti Jehova wakali kubakkomanina, bakali masimpe kuti bakali kuyoozibona zisyomezyo kazizuzikizyigwa. (Heb. 11:4, 5) Cikozyanyo cabo cilakonzya kutugwasya kuzumanana kulangila Jehova.

18. Ino ncinzi ncomukazinde kucita? (Bahebrayo 11:6)

¹⁸ Mazuba aano tupona munyika iiyabwiindila buya kubija. (2Tim. 3:13) Saatani tanaleka kusunka bantu ba Leza. Aboobo, nokuba kuti tatwaazyi mapenzi aali kumbele, aabe makanze eesu kuzumanana kumubelekela Jehova kusikila mpotugolela, katusinizyide kuti “tubikkide bulangizi bwesu muli Leza uupona.” (1Tim. 4:10) Katuyeeya kuti, zilongezyo Leza nzyaakapa Jobu ncitondezyo cakuti “Jehova ulaalubomba kapati aluse.” (Jak. 5:11) Atuzumanane kusyomeka kuli Jehova, katusinizyide kuti uyoobapa bulumbu “aabo bamuyandaula cabusungu.”—Amubale Bahebrayo 11:6.