1. (a) Mbuubuli bulangilizi Jehova mbwaakatupa? (b) Chaambaanzi ‘kulangila kuli Jehova’? (Langa “Bupanduluzi Bwamabala.”)

 JEHOVA wakabapa bulangilizi bubotu aabo boonse bamuyanda. Lino-lino uzoomaninsya kuchiswa, koomoka alufu. (Ciy. 21:3, 4) Jehova uzoogwasya “babombe myoyo” aabo balangila kulinguwe kuti bachinche nyika eeyi kuti ibe paradayizi. (Int. 37:9-11) Uyoopa kuti umwi awumwi wesu abe aabweenzinyina busimide anguwe kwiinda mbutulaabo mazubaano. Bulangilizi oobu, mbubotu loko! Pesi niinzi chipa kuti tube aachoonzyo chakuti Leza uyoozizuzikizya zisyomezyo zyakwe? Jehova ulazichita zyoonse nzyawamba. Eezi zitugwasya kuti ‘tulangile kuli Jehova.’ * (Int. 27:14) Tutondeezya kuti tulangila kuli Jehova kwiinda mukumulindila katuli aamoyo mulamfu kumwi katubotelwa kuti azuzikizye makanze aakwe.—Is. 55:10, 11.

2. Niinzi Jehova nzyaakachita kale?

² Jehova wakatondeezya kale kuti ukkala kabamba zisyomezyo zyakwe. Muchikozyano, mubbuku lyaCiyubunuzyo, wakasyomezya kuti mumazubaano ngitulikupona uzoopa kuti bantu bazwa kuzisi, kumisyobo akumilaka yoonse bajatane mubukombi busalala. Mazubaano, kabunga aaka kagambya kazibidwe kuti ‘ninkamu mpati.’ (Ciy. 7:9, 10) Nikuba kuti iswaanizya baalumi, banakazi abana bali aazikanda zisiyene, baambuula milaka iisiyene alubo bali aamaponeno aasiyene, nkamu eeyo ilaaluumuno alubo ilijisini. (Int. 133:1; Joh. 10:16) Bankamu mpati mbasungu mumulimu wakukambawuka, balilibambilide kwaabila aabo bayanda kuswiilila atala abulangilizi  mbubalaabo atala anyika mbotu. (Mt. 28:19, 20; Ciy. 14:6, 7; 22:17) Kuti kuli umwi wabaabo bali munkamu mpati, kwaamba choonzyo, bulangilizi bwakuti zintu zizoobota ububona kabuyandikana loko.

3. Makanze aaSaatani nganzi?

³ Dyabbulosi uyanda kuti tusyome kuti Jehova takwe ndaba pe andiswe akuti tazibambi pe zisyomezyo zyakwe. Kuti Saatani wazwidilila kupa kuti tutabi aabulangilizi, tulamana manguzu alubo tulaleka kukomba Jehova. Mbuli mbututabone, Dyabbulosi wakeezya kupa kuti Jobu atabi aabulangilizi akuti aleke kukomba Jehova.

4. Tulalanga-langaanzi muchiiyo eechi? (Jobu 1:9-12)

⁴ Muchiiyo eechi, tulalanga-langa nzila Saatani nzyaakabelesya mukweezya kupa kuti Jobu atasyomeki pe kuli Jehova. (Bala Jobu 1:9-12.) Alubo tulabona zyiiyo nzitukonzya kwiiya kuzwa kuli Jobu akuti nkamboonzi nitweelede kuyeeya kuti Leza ulatuyanda akuti uyoozizuzikizya zisyomezyo zyakwe.

5-6. Niinzi zyakachitika kuli Jobu muchiindi chifwiifwi?

⁵ Buumi bwakali kumweendela kabotu Jobu. Wakali aabweenzinyina busimide aJehova. Wakalinotede alubo wakali aampuli mpati iijisini. (Job. 1:1-5) Pesi mubuzuba bumwi, Jobu wakasweekelwa zintu zyoonse. Chakusaanguna, wakasweekelwa aabunoti bwakwe. (Job. 1:13-17) Kuzwa waawo, bana bakwe boonse bakafwa. Amuyeeye atala amapenzi ngaakaswaana Jobu. Bazyali ngabawusa loko kuti mwana uumwi wafwa. Pesi amuyeeye kukataazikana, buumba akumaninwa nkwaakaswaana Jobu amwanakazaakwe nibakamvwa kuti bana babo boonse bali kkumi bafwa. Eezi zyakapa kuti Jobu adelule zigogo zyakwe akuliwaalila aansi.—Job. 1:18-20.

⁶ Kuzwa waawo, Saatani wakapa kuti Jobu achiswe akupa kuti abule bulemu. (Job. 2:6-8; 7:5) Kazitanachitika zintu zyoonse eezi, Jobu wakali kulemekwa loko mundawu mwaakali kukkala. Bantu bakali kusika kulinguwe kuti bazooyanduule malayilile. (Job. 31:18) Pesi aachiindi eechi, bakamutantamuka. Wakali waba muntu uusesemya. Bamumpuli yakwe, beenzinyina ababelesi bamung’anda yakwe teebakachili kumuyanda pe.—Job. 19:13, 14, 16.

7. (a) Jobu wakali kuyeeya kuti mapenzi aakwe akali kuzwa kuli pesi niinzi nzyaakakaka kuchita? (b) Ngaali mapenzi ngibakonzya kuswaana maKristu aakozyenie aamapenzi aatondeezedwe mupikicha?

⁷ Saatani wakali kuyanda kuti Jobu asyome kuti wakali kuswaana mapenzi akaambo kakuti Jehova taakachili kumuyanda pe. Muchikozyano, Saatani wakabelesya guwo lilaanguzu kuti linyonyoone ng’anda oomo bana baJobu bali kkumi mubakali kupobweda. (Job. 1:18, 19) Alubo Saatani wakapa kuti mulilo uloke kuzwa kujulu kuti unyonyoone lubono lwaJobu kuswaanizya abakali kulweembela. Zilaantanganana kuti teebantu pe bakapa kuti kube guwo amulilo. Nkinkaako, Jobu wakayeeyela kuti kweelede nguJehova Leza wakapa kuti zintu eezi zichitike. Eezi zyakapa kuti Jobu abonaanga kuli nzyaakali wabisizya Jehova. Nikuba oobo, Jobu taakwe naakamutukila pe Wisi wakujulu. Wakabona kuti kwaminyaka myiingi, wakali watambula zintu zyiingi zibotu kuzwa kuli Jehova. Nkinkaako, wakayeeya kuti, kuti kali wakali kubotelwa kutambula zintu zibotu wakeelede kuzumina nikuba kutambula zintu zibi. Nkinkaako, wakati: “Alizumanane kutembaulwa izina lya Jehova.” (Job. 1:20, 21; 2:10) Kusikila kuchiindi eechi, Jobu wakazumanana kulisimya nikuba kuti wakali aapenzi lyamali, wakaluuside akuti wakali kuchiswa. Pesi Saatani taakamusiya  kupela pe Jobu pesi wakamuzida kulilimbi bbazu.

8. Njiili imwi nzila Saatani njaakabelesya kukusunka Jobu?

⁸ Saatani wakabelesya imwi nzila yakusunka Jobu. Wakabelesya beenzinyina baJobu basikuupawupa batatu kuti bape kuti abonaanga taakwe ambabede pe. Baalumi aabo, bakaamba kuti Jobu wakali kuswaana mapenzi nkaambo wakali kubisya. (Job. 22:5-9) Alubo bakeezya kumutondeezya kuti, nikuba kuti taakali sizibi pesi kweezya kukomba Leza nkwaakali kuchita taakwe ambukwakali kugwasya pe. (Job. 4:18; 22:2, 3; 25:4) Kwaamba choonzyo, bakali kuyanda kuti Jobu asyome kuti Leza tamuyandi pe, tamulanganyi akuti kumukomba nkwaakali kuchita teekwakali kugwasya pe. Majwi aabo akali kukonzya kupa kuti Jobu atabi aabulangilizi.

9. Niinzi chakagwasya Jobu kuti alisimye akuti abe aachibindi naakali mumapenzi?

⁹ Amuyeeyele Jobu kakkede mudyota, kali mumachise mayumu nta. (Job. 2:8) Ooku beenzinyina kabali kumuninda akumuubula. Mapenzi aakwe kalikumumana manguzu alubo moyo wakwe kawuli kuchisa akaambo kakufwidwa aabana bakwe. Kumasaangunino, Jobu wakali kuzilanzya aameso luzutu zyakali kuchitika. (Job. 2:13–3:1) Kuti kakuli beenzinyina baJobu bakali kubonaanga kuumuna kwaJobu kwakali kwaamba kuti ulikuyeeya kufutatila Mulengi wakwe, bakalisweekede. Aali chimwi chiindi, kulakonzeka kuti Jobu wakabusya mutwe wakwe mpawo walanga beenzinyina batatu bakubeja, mpawo wakati: “Kusikila ndikafwe, tandikaleki kusyomeka pe!” (Job. 27:5) Niinzi chakagwasya Jobu kuti alisimye akuti atamani manguzu chiindi naakali mumapenzi? Nikuba kuti wakali muchiimo chitalombozeki, pesi taakaleka pe kusyoma kuti Leza siluyando wakali kuyoomugwasya muchiindi eecho chamapenzi. Wakalizi kuti nikuba kuti wafwa, Jehova wakali kuyoomubusya.—Job. 14:13-15.

10. Makani aali atala aJobu atuyiisyaanzi?

¹⁰ Makani aali atala aJobu, atuyiisya kuti Saatani takonzyi pe kutusinikizya kuti tuleke kukomba Jehova akuti Jehova ulizizi zintu zyoonse nzituswaana. Zintu zyakachitikila Jobu zilakonzya kutugwasya andiswe kuti tukonzye kumvwisisisya zintu ziswaanizidwe mukukomba Jehova. Lino atulange-lange zimwi zyiiyo nzitukonzya kwiiya kuzwa kuli Jobu.

11. Kuti twayinkilila kunembo kusyoma Jehova, niinzi zitachitike? (Jakobo 4:7)

¹¹ Jobu wakatondeezya kuti, kuti twayinkilila kunembo katukomba Jehova tulakonzya kulisimya kumapenzi woonse akumukazya Saatani. Kuti twamukazya Saatani, niinzi chitachitike? Magwalo aamba kuti, Dyabbulosi ulatuchija.—Bala Jakobo 4:7.

12. Bulangilizi bwakuti bafwide bazoobusigwa bwakamusimya biyeni Jobu?

¹² Tweelede kuba aabulangilizi bwakuti bafwide bazoobusigwa. Mbuli mbutwakayiya muchiiyo chakayinda, chiindi chiingi, Saatani ubelesya kakole kakuyoowa kufwa kuti ape kuti tuleke kusyomeka kuli Jehova. Eezi nzizyo nzyaakachita kuli Jobu. Wakaamba kuti, Jobu wakali kuyoochita kufumbwa chintu nikuba kuleka kusyomeka kuli Jehova kuchitila kuti afutule buumi bwakwe. Kuti kakuli kuti eezi nzizyo nzyaakali kuyeeya Saatani, wakalisweekede. Nikuba kuchiindi eecho chikataazya, lufu kaluli lwaba aafwiifwi, Jobu wakazumanana kusyomeka. Kuziba kuti Jehova mubotu akusyoma kuti uzoolulamika zintu, nkuko kwakamugwasya. Jobu wakali kusyoma kuti, kuti Jehova taanjilila kuti abambulule zintu kachili muumi, wakali kuyoomuyeeya akumubusya muchiindi chili kunembo. Jobu wakali kusyoma choonzyo kuti bafwide bazoobusigwa. Andiswe kuti katusyoma choonzyo kuti bafwide bazoobusigwa, tatukaleki kuyoowa kufwa kuti kutupe kuti tuleke kusyomeka kuli Jehova.

13. Nkamboonzi nitweelede kubikkila maanu kunzila Saatani nzyaakabelesya kuli Jobu?

¹³ Tweelede kubikkila maanu kunzila zyakabelesegwa kukusunka Jobu, nkaambo Saatani uchibelesya nzila zikozyenie akulindiswe mazubaano. Mwazibona na zyakaambwa aaSaatani? Wakati: “Muntu [kutali Jobu luzutu] uyoopa zintu zyoonse nzyajisi kutegwa avwune buumi bwakwe.” (Job. 2:4, 5) Kwaamba choonzyo, Saatani wakali kwaamba kuti iswe tubantu tatumuyandi pe Jehova Leza akuti tulakonzya kumusiya Jehova kuchitila kuti tukwabilile buumi bwesu. Alubo Saatani waamba kuti, Leza tatuyandi pe akuti takwe ndaba pe anzituchita chiindi nitweezya kuchita zintu zimubotezya. Nkinkaako, akaambo kakuti tulizizi nzila zyaSaatani, iswe nitulangila kuli Jehova tatukeenwi pe anzizyo.

14. Niinzi chikonzya kuyubununwa aamapenzi? Amba chikozyano.

¹⁴ Tweelede kubona mapenzi eesu mbuli mweenya uutugwasya kuti tulizibe kabotu. Mapenzi ngaakaswaana Jobu, akamugwasya kuti azibe bumwi buntu butali kabotu mbwaakeelede kubambulula. Muchikozyano, wakeelede kubelekela kuba muntu uulibombya loko. (Job. 42:3) Andiswe mapenzi alakonzya kutugwasya kuti tulizibe kabotu, tubone bumwi buntu butali kabotu mbutweelede kubambulula. Umwi mukwesu uutegwa Nikolay, * ooyo wakali mujele nikuba kuti wakali kuchiswa, wakaamba kuti: “Jele lili mbuli X-ray, liyubununa buntu mbwalaabo muKristu.” Kuti twabona bumwi buntu butali kabotu, tweelede kubeleka changuzu kuti tububambulule.

15. Ngwani ngutweelede kuswiilila alubo nkamboonzi?

 ¹⁵ Tweelede kuswiilila Jehova kutali basinkondoma. Jobu wakateyede matwi chiindi Jehova naakali kwaambuula aanguwe. Mumajwi Leza ngaakali kubuzya Jobu, kuli mbuli kuti wakali kuti, ‘Ulaabwene na manguzu ngindakabelesya nindakali kulenga zintu? Ndilizibwene zyoonse zilikukuchitikila. Ubonaanga tandikwe ndaba na anduwe?’ Jobu wakasandula chakulibombya akulumba bubotu bwaJehova. Wakati: “Ndakali kumvwa buyo mpuwo yako, pele lino ndakubona ameso aangu.” (Job. 42:5) Kweelede Jobu wakachikkede mudyota, mubili woonse kawuzwide zilonda alubo wakachili kulila bana bakwe bakali mutubanda chiindi naakaamba majwi aaya. Nikuba oobo, Jehova wakatondeezya kuti ulamuyanda Jobu akuti wakachili kutambulika kulinguwe.—Job. 42:7, 8.

16. Kweendelana alugwalo lwa Isaya 49:15, 16, niinzi nzitweelede kuyeeya chiindi nituli mumapenzi?

¹⁶ Nikuba mazubaano, bantu balakonzya kututukila akwaamba zimwi zintu zipa kuti tubonaanga tatugwasyi. Balakonzya kweezya kubisya mpuwo yesu akutubejelezya “zintu zibi ziindene-indene.” (Mt. 5:11) Kuzwa kumakani aakachitikila Jobu, twiiya kuti Jehova ulizi kuti tuyoozumanana kusyomeka kulinguwe nikuba katuswaanana aamapenzi. Jehova ulatuyanda alubo tabalekelezyi pe aabo balangila kulinguwe. (Bala Isaya 49:15, 16.) Utaswiilili makani aakubeja aawambuulwa aabasinkondonyina baLeza. Mukwesu James wakuTurkey, ooyo wakaswaana buyumu-yumu ampuli yakwe, wakaamba  kuti: “Twakabona kuti twakali kukonzya kumana manguzu kuti twaswiilila makani aakubeja aawambuulwa atala abakombi baLeza. Nkinkaako, twakabikkila maanu kubulangilizi bwesu akusungwaala mumulimu waJehova. Eezi zyakapa kuti tubotelwe.” Andiswe tuswiilila Jehova mbuli mbaakachita Jobu. Makani aakubeja aawambuulwa aabasinkondoma taakonzyi pe kumana bulangilizi bwesu.

17. Twiiyaanzi kubaalumi abanakazi basyomeka baambidwe muli Bahebrayo chaandaano 11?

¹⁷ Jobu nguumwi wabakombi baJehova wakazumanana kulisimya akuba aachibindi naakali mumapenzi. Mulugwalo mwaapostolo Pawulu ndwaakalembela bantu bakuHebbrayo, wakaambuula atala abamwi mbaakayita kuti ‘nkamu mpati yabakamboni.’ (Heb. 12:1) Boonse bakaswaana mapenzi mapati loko, pesi bakazumanana kusyomeka kuli Jehova. (Heb. 11:36-40) Kulisimya kwabo akubeleka changuzu nkubakachita kwakali kwabuyo na? Peepe! Nikuba kuti teebakabona kuzuzikizigwa kwazisyomezyo zyaLeza chiindi nibakachili kupona, pesi bakazumanana kulangila kuli Jehova. Alubo akaambo kakuti bakalizi kuti bakali kuchita zintu zibotezya Jehova, bakali aachoonzyo chakuti bakali kuyoobona zisyomezyo zyaJehova kazilikuzuzikizigwa. (Heb. 11:4, 5) Chikozyano chabo chilakonzya kutugwasya kuti andiswe tuzumanane kulangila kuli Jehova.

18. Ukanzide kuchitaanzi? (Bahebrayo 11:6)

¹⁸ Tulikupona munyika ilikwiindilila kubija. (2 Tim. 3:13) Saatani uchiinkilila kunembo kusunka bakombi baLeza. Nikuba kuti tulangilila kuzooswaana mapenzi kunembo, tweelede kukanza kubelekela Jehova amoyo wesu woonse, katuli aachoonzyo chakuti “tubikkide bulangizi bwesu muli Leza uupona.” (1 Tim. 4:10) Mutalubi kuti zintu Jehova nzyaakazoochitila Jobu kumamanino, zitondeezya kuti “Jehova ulaalubomba kapati aluse.” (Jak. 5:11) Andiswe atuzumanane kusyomeka kuli Jehova, katuli aachoonzyo chakuti uyoobalongezya aabo “bamuyandaula cabusungu.”—Bala Bahebrayo 11:6.