1. a) Impsini leswi Yehovha a hi tshembisaka swona? b) Swi vula yini ku “tshemba Yehovha”? (Vona “Ntlhamuselo Wa Marito.”)

 YEHOVHA a va nyika ntshembo wa ku tsakisa hinkwavu lava mu rhandzaka. A swi choti kule swaku Yehovha a helisa mavabyi, ku vaviseka ni lifu. (Nhla. 21:3, 4) A ta yentxa swaku vanhu va “ku rhula” lava mu tshembaka, va yentxa misava yi va paradesi. (Pis. 37:9-11) A ta tlhela a yentxa swaku hi va vanghanu va vakulu hintamu va yena ku tlula swoswi. Phela ku tiva leswo swa hi tsakisa! Kambe i yini xi hi tiyisekisaka swaku leswi Xikwembu xi hi tshembisaka swona swi ta yentxeka hikakunene? Minkama hinkwayu Yehovha a yentxa leswi a swi vulaka. Hi mhaka leyo, hi nga mu tshemba. * (Pis. 27:14) Hi nga mu komba swaku ha mu tshemba, hi ku tama hi lehisa mbilu na hi tsakile hi nyimela nkama lowu a nga ta hetisisa hinkwaswu leswi a hi tshembisaka swona. — Esa. 55:10, 11.

2. Impsini leswi Yehovha a swi yentxaka minkama hinkwayu?

² Minkama hinkwayu Yehovha a yentxa leswi a swi tshembisaka. Hi xikombiso, ka buku la Nhlawutelo, Yehovha a vule swaku a a ta tlhanganisa vanhu va matiko hinkwawu, tinxaka hinkwatu ni tirimi hinkwatu swaku va mu gandzela. Vanhu lava i “xitshungu xa xinyingi.” (Nhla. 7:9, 10) Hambileswi ka xitshungu lexi ku nga ni vavanuna, vavasati ni vana va ku ta hi ka matiko ya ku hambana, vanhu lava i ndjangu wun’we wa vamakwerhu amisaveni hinkwayu, lowu hanyisanaka hi ku rhula. (Pis. 133:1; Yoh. 10:16) Vanhu lava, va chumayela mahungu ya ku tsakisa hi ku hiseka. Minkama hinkwayu, va bula ni van’wana hi misava ya yinene leyi nga  kola kusuhi. (Mat. 28:19, 20; Nhla. 14:6, 7; 22:17) Loko u li wa xitshungu xa xinyingi, ha tiyiseka swaku u wu teka wu li wa lisima ntshembo lowu u nga na wona.

3. I yini leswi Sathana a zamaka ku swi yentxa?

³ Sathana a lava ku dlaya ntshembo wa wena. A lava u pimisa swaku Yehovha a nga na mhaka na wena ni swaku leswi a swi vulaka i mavunhwa. Loko Sathana o za a swi kota ku dlaya ntshembo wa hina, hi ta sungula ku chava funtshi hi nga ha nyima ku tirhela Yehovha. Hilani hi nga ta swi vona hi kona, Sathana a zame ku tshikisa Yobo ku tirhela Yehovha a tlhela a zama ku helisa ntshembo wa yena.

4. Hi ta bula hi yini ka djondzo leyi? (Yobo 1:9-12)

⁴ Ka djondzo leyi, hi ta vona leswi Sathana a nga swi yentxa swaku a zama ku helisa ku tshembeka ka Yobo. (Lerha Yobo 1:9-12.) Hi ta tlhela hi vona swaku hi nga djondza yini ka xikombiso xa Yobo, ni swaku hi mhaka muni hi fanele hi khumbuka swaku Yehovha wa hi rhandza ni swaku a ta hetisisa leswi a nga swi tshembisa.

5-6. I yini leswi Yobo a nga swi luza hi nkamanyana?

⁵ Yobo a a hanya wutomi la kahle swinene funtshi a a li munghanu wa munene wa Yehovha. A a ni ndjangu wa wukulu lowu a wu twanana naswona a a ganyile hintamu. (Yobo 1:1-5) Kambe hi siku la lin’we, Yobo a luze hinkwaswu. Ku sungula, swiharhi swa yena hinkwaswu swi file. (Yobo 1:13-17) A game a feliwa hi vana va yena hinkwavu. Pimisa hi leswi a nga titwisa xiswona hi nkama wolowo! Phela loko vapsali va feliwa hi n’wana va vaviseka hintamu. Pimisa hi leswi Yobo ni nsati wa yena va nga vavisekisa xiswona nkama va nga twa swaku a 10 wa vana va vona va file! Se swa twala leswi Yobo a nga handzulela mpahla ya yena a tlhela a wumbulukela hansi hi ku kwata! — Yobo 1:18-20.

⁶ Sathana a game a vabyisa Yobo hi mavabyi lawa a ma mu yentxa a titwa na a nga pfuni nchumu. (Yobo 2:6-8; 7:5) Phela na swi nge se yentxeka leswo, vanhu va lomu Yobo a a tshama kona, a va mu hlonipha hintamu funtshi a va ya ka yena swaku a ya va laya. (Yobo 31:18) Kambe swoswi, vanhu se a va fambela kule na yena. A tsukuliwile hi vamakwavu va yena, vanghanu hambi hi vatirhi va yena. — Yobo 19:13, 14, 16.

7. a) Yobo a a pimisa swaku i mani lweyi a mu hluphaka, kambe i yini leswi a kalaka a nga swi yentxanga? b) Hi ku ya hi mufoto, hi nga swi kotisa ku yini ku hlula swikarhatu?

⁷ Sathana a a lava Yobo a pimisa swaku i Yehovha lweyi a mu hluphaka hikusa a nga ha mu rhandzi. Se a yentxe swaku ku va ni moya wa wukulu lowu nga wisa yindlo leyi a ku ni 10 wa vana va Yobo. (Yobo 1:18, 19) A tlhele a yentxa swaku ku xika ndzilu hi le tilweni lowu nga hisa swiharhi swa Yobo ni varisi va swona. (Yobo 1:16) Se, leswi moya ni ndzilu wa kona a swi ta hi tilweni, Yobo a a pimisa swaku i Yehovha lweyi a nga swi tisa. Leswo swi yentxe Yobo a pimisa swaku a kwatise Yehovha. Hambileswo, a nga mu rhuketelanga Papayi wa yena wa le tilweni, a a swi tiva swaku hinkwaswu leswi a a li na swona a a nyikiwe hi Yehovha. Yobo a hlaye swaku leswi a nga tsaka hi ku yamukela swa swinene a a fanele a pfumela ni ku yamukela swa ku biha. A te: “Vito la Yehovha a li tami li dzunisiwa.” (Yobo 1:20, 21; 2:10) Hambileswi Yobo a nga luzekeliwa hi swilo swa yena, a feliwa hi vana a tlhela a vabya, a nga  zanga a tshika ku tshembeka ka Yehovha. Kambe Sathana a nga godolanga!

8. I yini swin’wana leswi Sathana a nga swi yentxa swaku a ringa Yobo?

⁸ Sathana a nga godolanga! A tlhele a ringa Yobo hi ku tirhisa 3 wa vanghanu va yena, lava va nga vula swaku Yobo a a hlupheka hikusa a a khatisiwa hi Xikwembu. (Yobo 22:5-9) Vavanuna lava, a va zama ku yentxa Yobo a kholwa swaku hambiloko o zamisa ku yini ku yentxa swilo swa swinene, Xikwembu a xi nge vi ni mhaka na swona. (Yobo 4:18; 22:2, 3; 25:4) Ku vula ntiyiso, a va zama ku yentxa Yobo a kanakana swaku Yehovha wa mu rhandza, ni swaku Xikwembu a xi na mhaka na yena funtshi a swi pfuni nchumu ku xi tirhela. Marito lawa ma nga ha va ma siye Yobo na a nga ha na ntshembo.

9. Impsini swi nga pfuna Yobo swaku a nga chavi?

⁹ Pimisa hi Yobo na a tshame ka nkuma na a twa ku vava hintamu. (Yobo 2:8) Na a tshame ni vanhu lava zamaka ku mu byela swaku yena a hi munhu wa munene funtshi a ku na nchumu xa lisima lexi a nga tshama a xi yentxa. Swikarhatu leswi a kumanaka na swona swi tika ku fana ni maribye, kuve hi nkama wolowo wa wun’we a rila vana va yena lava nga fa. Ku sunguleni Yobo a nga hlamulanga nchumu. (Yobo 2:13–3:1) Loko swi ku vanghanu va Yobo a va pimisa swaku ku miyela ka yena a ku kombisa swaku a ta tshika ku tirhela Xikwembu, a va be hansi. Yobo a game a tlakusa nhloko a txuvuka vanhu lava a va tiyentxa vanghanu va yena, a ku: A ni nge “tshiki ku tshembeka, anze ni fa!” (Yobo 27:5) Impsini swi nga pfuna Yobo swaku a nga chavi a tlhela a va ni matimba hambiloko a kumana ni swikarhatu leswi? Hambileswi a nga kumana ni swikarhatu swa swikulu, a nga tshikanga ku kholwa swaku Yehovha wa mu rhandza ni swaku a ta mu pfuna. A a  swi tiva swaku hambiloko o fa, Yehovha a a ta mu pfuxa. — Yobo 14:13-15.

10. Leswi nga yentxekela Yobo swi hi djondzisa yini?

¹⁰ Leswi nga yentxekela Yobo swi hi djondzisa swaku Sathana a nge hi sindzisi ku tshika ku tirhela Yehovha, ni swaku Yehovha wa swi vona swilo hinkwaswu leswi hi yentxekelaka. Swi tlhela swi hi pfuna ku swi twisisa kahle swaku leswi Sathana a nga swi vula a hi ntiyiso. A hi voneni swin’wana leswi hi nga swi djondzaka ka xikombiso xa Yobo.

11. Ku ta yentxeka yini loko hi tama hi tshemba Yehovha? (Yakobo 4:7)

¹¹ Yobo a swi kombisile swaku loko hi tshemba Yehovha, hi nga swi kota ku tiyisela swikarhatu hinkwaswu hi tlhela hi hlula Sathana. Se, swi nga hi pfunisa ku yini leswo? Bibele li hi tiyisekisa swaku loko hi yentxa leswo, Sathana a ta hi baleka. — Lerha Yakobo 4:7.

12. Ku tiva swaku lava nga fa va ta pfuxiwa, swi mu pfunise ku yini Yobo?

¹² Hi fanele hi khoma swi tiya ka ntshembo wa ku pfuxiwa ka vafi. Hilani se hi nga swi vona hi kona ka nhlokomhaka leyi nga hundza, minkama yin’wana Sathana a hi yentxa hi chava ku fa swaku hi nga tshembeki ka Yehovha hi tlhela hi tshika ku mu tirhela. Sathana a vule swaku Yobo a a ta tshika hambi hi ku tirhela Yehovha swaku a kota ku ponisa wutomi la yena. Kambe a be hansi, hikusa hambi nkama lowu Yobo a nga tivona na a li kusuhi ni ku fa, a nga tshikanga ku tshembeka ka Yehovha. Ku tiva swaku Yehovha i munene ni ntshembo lowu a a li na wona, swi mu pfune ku tiyisela. Yobo a a tiyiseka swaku hambiloko Yehovha a nga mu pfuni hi nkama wolowuyani na a ha hanya, a a ta mu pfuxa ka nkama lowu taka. Yobo a a kholwa hikakunene swaku lava nga fa va ta pfuxiwa. Na hina loko hi kholwa swaku lava nga fa va ta pfuxiwa, a hi nge tshiki ku tirhela Yehovha hi mhaka ku chava ku dlayiwa.

13. Hi mhaka muni hi fanele hi yi twisisa kahle mintlhamu leyi Sathana a nga yi tirhisa ka Yobo?

¹³ Hi fanele hi tivonela ka mintlhamu leyi Sathana a nga yi tirhisa ka Yobo hikusa wa ha tama a yi tirhisa ni swoswi. Pimisa hi leswi Sathana a nga swi vula nkama a nga te: “Munhu [ku nga li Yobo ntsena] a ta humesa hinkwaswu leswi a nga na swona swaku a ponisa wutomi la yena.” (Yobo 2:4, 5) Hi marito lawa, Sathana a a lava ku vula swaku a nga kona lweyi a rhandzaka Xikwembu hi mbilu ya yena hinkwayu, funtshi hi nga tshika ku xi tirhela loko swi lava hi ponisa wutomi la hina. Sathana a tlhele a vula swaku Xikwembu a xi hi rhandzi funtshi a xi yi voni minzamu leyi hi yi yentxaka swaku hi xi tsakisa. Leswi se hi nga biwa ndleve, hina hi tshembaka Yehovha a hi nge kanganyisiwi hi mintlhamu ya Sathana.

14. Swikarhatu leswi hi kumanaka na swona swi hi pfuna ku tiva yini? Nyikela xikombiso.

¹⁴ Swikarhatu swa hina swi nga hi pfuna ku tiva leswi hi nga tshamisa xiswona. Swikarhatu leswi Yobo a nga kumana na swona, swi mu pfune ku vona lani a faneleke a yampsisa kona. Hi xikombiso, a swi vonile swaku a a fanele a lwela ku va munhu wa ku tiveka hansi. (Yobo 42:3) Na hina, swikarhatu leswi hi kumanaka na swona swi nga hi pfuna ku tiva leswi hi faneleke hi yampsisa ka swona. Makwerhu Nikolay, * lweyi a nga petiwa djele hambileswi a a vabya a te: “Ku va  djele swi ni pfune ku tsumbula wumunhu leli ni faneleke ni li yampsisa.” Loko hi vona lani hi faneleke hi yampsisa kona, hi ta tekela ku tirhela kolanu.

15. I mani lweyi hi faneleke hi mu yingisa naswona hi mhaka muni?

¹⁵ Hi fanele hi yingisa Yehovha ku nga li valala va hina. Yobo a mu yingisele kahle Yehovha nkama na a vulavula na yena. Ka mabulu lawa Yehovha a nga va na wona na Yobo, a te: ‘A wu wu voni ntamu wa mina ka swilo leswi ni nga swi yentxa? Na swi vona swilo hinkwaswu leswi nga ku yentxekela. U pimisa swaku a ni nge ku pfuni?’ Leswi Yobo a a li vona wunene la Yehovha, hi ku tiveka hansi a hlamule a ku: “Ni twe ku vulavuliwa hi wena, kambe swoswi se na ku vona hi matihlo ya mina.” (Yobo 42:5) Nkama a nga hlaya marito lawa, Yobo a a rila vana va yena na a tshame ka nkuma funtshi miri wa yena a wu tale hi swilondza. Kambe Yehovha a mu tiyisekisile swaku Yena wa mu rhandza ni swaku wa mu yamukela. — Yobo 42:7, 8.

16. Hi ku ya hi Esaya 49:15, 16, hi fanele hi khumbuka yini loko hi kumana ni swikarhatu?

¹⁶ Ni namuntlha, vanhu va nga ha hi rhuketela va tlhela va hi vona hi nga li vanchumu. Va nga ha zama ku hi chimisa kumbe va chimisa nhlengeletanu hi ku hi “hembela hi swilo hinkwaswu swa ku biha”. (Mat. 5:11) Ka leswi nga yentxekela Yobo, hi djondza swaku Yehovha wa swi tiva swaku hi nga tama hi tshembeka hambiloko hi kumana ni swikarhatu. Wa hi rhandza naswona a nge hi tshiki loko hi mu tshemba. (Lerha Esaya 49:15, 16.) U nga yingiseli mavunhwa lama hlayiwaka  hi valala va Xikwembu! Makwerhu James lweyi a tshamaka Turquia, lweyi ndjangu wa yena wu nga tshama wu kumana ni swikarhatu swa swinyingi a li: “Ni djondze swaku ku yingisela mavunhwa lama vuliwaka hi valala va Xikwembu swi nga hi heta ntamu. Se, a hi tshamela ku pimisa hi Mfumu wa Xikwembu hi tlhela hi tirhela Yehovha. Leswo swi hi pfune ku tshama na hi tsakile.” Ku fana na Yobo, hi yingisa Yehovha. Se, a mavunhwa ya valala va hina a ma nge swi koti ku dlaya ntshembo lowu hi nga na wona.

17. U djondza yini ka xikombiso xa vanhu va ku tshembeka, lava Pawulo a nga vulavula hi vona ka Vaheberu 11?

¹⁷ Yobo o va mun’we ka vanhu va Yehovha lava nga tama va tshembeka hambiloko va kumana ni swikarhatu swa swinyingi. Ka karta leli mupostolo Pawulo a nga li tsalela Vaheberu, ku tala ka vona a va vitane swaku i “rhefu la likulu la timboni.” (Heb. 12:1) Hinkwavu va kumane ni swikarhatu swa swikulu hintamu, kambe va tame va tshemba Yehovha. (Heb. 11:36-40) Ku nga va swaku ku tiyisela ku ve nyuku wa mbyana? Ihim! Hambileswi switshembiso swa Yehovha swi kalaka swi nga hetisekanga hinkwaswu ka nkama wa vona, a va tshemba swaku siku lin’wana swi ta hetiseka. (Heb. 11:4, 5) Xikombiso xa vona xi nga hi pfuna ku tama hi tshemba Yehovha.

18. U tinyimisele ku yentxa yini? (Vaheberu 11:6)

¹⁸ Ka misava leyi hi hanyaka ka yona, wubihi lo yengeteleka siku ni siku. (2 Tim. 3:13) Sathana a nga se heta ku ringa vanhu va Yehovha. Ku nga na mhaka swaku i swikarhatu muni leswi hi nga ta kumana na swona ka nkama lowu taka, a hi tinyimiseleni ku tama hi tshembeka na hi tiva leswaku “hi tshemba Xikwembu lexi hanyaka”. (1 Tim. 4:10) Khumbuka swaku leswi Yehovha a nga mu katekisisa xiswona Yobo, swi kombisa swaku Yena “a ni ntwelawusiwana ni timpsalu.” (Yak. 5:11) Ku fana na Yobo, a hi tameni hi tshembeka ka Yehovha na hi tiyiseka swaku a ta hakela ‘lava mu lavaka hi mbilu hinkwayu.’ — Lerha Vaheberu 11:6.