1. a) ¿Ambe ambakiti ambejtsïni aiachisïni Tata Diosï Jeoba? b) ¿Ambe arhikuekasïni mintsikani Tata Diosï Jeobani? (Exe je notani).

 TATA Diosï Jeoba ambakiti ambe aiakuasti iámindu imeechani engaksï xénchajka. No ióni jimbo kʼamajkuati pʼamenchakua ambe, kómu pʼikuarherakuani ka uarhikuani (Jaŋ. 21:3, 4). Kaxumbitichani engaksï imani mintsikajka, jarhuatauati parakaksï Echerini paraisu ma úntaaka (Sal. 37:9-11). Ístu, uaati eskachi iáminduecha sánderu sési pájperaaka imani jingoni ka eska iásï. ¡Ambakiti ambeesti engachi erokuarhini jaka! Joperu, ¿andichisï seguru jaki eska Tata Diosï uaaka iámindu ambe engajtsïni aiachika? Jimboka ima méntkisï úsïnga ambe enga aiatspejka. Ka uánikua ambe jarhasti engachi jimbo uaaka mintsikani Tata Diosï Jeobani (Sal. 27:14). * ¿Ka nénachi xarhatasïni eskachi mintsikasïnga imani? Engachi tsípikua jingoni ka tekaantskua jingoni erokuarhijka eska uaaka imani ambe engajtsïni aiachini jaka (Is. 55:10, 11).

2. ¿Ambe úskia Tata Diosï Jeoba?

² Tata Diosï Jeoba xarhatastia eska úsïnga ambe enga uandajka. Ju je exeni ejemplu ma enga xarhatajka eska ísïiska. Tata Diosï Jeoba aiatspesptia libru Jaŋaskuecha jimbo eska japiringa grupu ma enga ísï mítekateka komu ‘uánikua kʼuiripuechaʼ, engaksï uápurisï anapuepiringa, táchani jásï tribueni ka táchani jásï idiomaksï uandani (Jaŋ. 7:9, 10). Nájkiruka ini grupu jimboksï jaka tatakecha, nanakecha ka sapiicha engaksï táchani jásï raseeka, táchani jásï idioma uandajka ka engaksï táchani ísï anapueka, iáminduechaksï ísïisti komueska familia ma engaksï májku kʼéri jaka ka engaksï sési pájperajka (Sal. 133:1; Juanu 10:16). I uánikua kʼuiripuechaksï tsípikua jingoni aianhpisïndi ka méntkisïksï listu jarhasïndi paraksï aianguani imeechani engaksï uéjka kurhajchani  eska parhakpinirhu iámindu ambe sési niántaaka (Mat. 28:19, 20; Jaŋ. 14:6, 7; 22:17). Enga chá kuenta úkuarhijka ini grupu jingoni, seguru eskajtsï kánikua jukaparharasïnga indeni ambe engajtsï erokuarhini jaka.

3. ¿Ambe uékasïni úni Satanasi?

³ Noambakiti uékasïndi eskachi eratseaka eska no úkuarhiaka ima ambe engachi erokuarhini jaka. Ima uékasïndi eskachi eratseaka eska Tata Diosï no uandanhiasïnga juchantsïni jimbo ka eska no uaaka ambe engajtsïni aiachikia. Enga Satanasi úska eskachi ísï eratseaka, nóteruchi balori jukaakia ka astachi úpiringa nóteru marhuakunia Tata Diosï Jeobani. Ísï eskachi na exeni jauaka, Noambakiti jánguarhintaspti paraka Jobu nóteru mintsikapiringia Tata Diosïni ka paraka nóteru marhuakupiringia.

4. ¿Ambechi exeni jaua ini jorhenguarhikua jimbo? (Job 1:9-12).

⁴ Ini jorhenguarhikua jimbochi exeni jauaka ambe enga úpka Satanasi paraka Jobu jurajkupiringa Tata Diosïni (arhinta je Job 1:9-12). Ístuchi exeaka ambechi uaa jorhenguarhini Jobueri ambe ka andisï xáni jukaparhakue eskachi méntkisï miáuaka eskajtsïni Tata Diosï xénchasïnga ka eska uaaka ambe engajtsïni aiachijka.

5, 6. ¿Néna mójtakurhispi Jobueri irekua ma ratitu jimbojku?

⁵ Orheta, Jobu kánikua sési irekuarhispti: sési pájperasïreendi Tata Diosï jingoni, kʼéri familia ma jatsispti ka májku kʼériksï jarhaspti ka ístu kánikua jatsikuarherispti (Job 1:1-5). Joperu ma jurhiatikua jimbojku, sáno iámindu ambe tsïtaspti. Orheta, tsïtaspti imeeri jatsikuarhekua ambe (Job 1:13-17). Tátsekua, uarhiranchaaspti uájpeechani enga xáni xénchauenga. Ju je eranhaskani na enga xáni no sési pʼikuarherapka Jobu. Taatichaksï kánikua no sési pʼikuarherasïndi engaksï uarhiranchajka uájpani ma. Ísï jimbo, na xáni sánderuksï no sési pʼikuarherapi Jobu ka imeeri uarhiiti engaksï mítepka eskaksï imeeri 10 uájpeecha uarhispka. ¡Jimbosï Jobu karukupti imeeri xukuparhakuani ka tinguikuatseni jimboka kánikua no sési pʼikuarheraxapka! (Job 1:18-20).

⁶ Tátsekua, Satanasi úspti eska Jobu kʼéri pʼamenchakua ma pʼipiringa ka eska kʼuratsekua jingoni pakarapiringa (Job 2:6-8; 7:5). Kʼuiripuechaksï kánikua janhanharhisïrenga Jobuni, astaksï nirasïreendi jirinhantani paraksï konsejuechani kurhakuani (Job 31:18). Joperuksï tátsekua nóteru uékasïrendia kúrhini ka no sésiksï arhisïreendi paraksï no sési pʼikuastani. Imeeri ermanu jémbeecha ka amigu jémbeecha enga jingoni sánderu sési pájpereenga ka asta imeeri jántspiricha, nóteruksï uékasïrendia imani jingoni jarhani (Job 19:13, 14, 16).

7. a) ¿Ambe eratsesïreni Jobu eska ambe jimbosï no sési nitamakuarhini japka, ka ambe no uékaspi úni? b) ¿Néna úpirini kristianu ma sáno májkueni nitamakuarhini eska Jobu? (Exe je dibuju enga párrafu 7 uandajka).

⁷ Satanasi uékasïreendi eska Jobu eratsepiringa eska no sési nitamakuarhixapka jimboka Tata Diosï Jeoba nóteru jaiapanhentasïrengia. Ísï jimbo, úraspti kʼéri tarhiata ma paraka kuáskupiringa kʼumanchikuani nani engaksï tʼireni japka Jobueri 10 sapiicha (Job 1:18, 19). Ístu úspti eska auandarhu uératini chpiri uekorhepiringa ka eska uándikuapiringa no solu Jobueri animalichani, sino ístu imeechani engaksï animalichani eranguani japka (Job 1:16). Jimboka tarhiata ka chpiri auandarhu uératinksï uekorhespka, Jobu eratsesïreendi eska Tata Diosïsï úni japka indeni ambe ka eska ikiaxapka imani jingoni. Nájkiruka xáni no sési nitamakuarhipka, Jobu no méni no sési ambe uandaspti Tata Diosïri ambe. Miáspti eska desde iónisï Jeoba uánikua ambakiti ambe íntskuspka ka eska ísï eska na jiókuarhipka ambakiti ambe, ístu jatsispka para jiókuarhini no sési jásï ambe. Jimbosï uandapti: “Eska méntkisï kʼéri ambe exenhaaka Jeobaeri arhinhakua” (Job 1:20,  21; 2:10). Nájkiruka kánikua sentabu tsïtapka, no sési pʼikuarherani ka pʼamenchani jarhani, Jobu no méni jurajkuspti Tata Diosï Jeobani. Joperu Noambakiti no ísku pakaraspti.

8. ¿Ambe máteru ambe úraspi Satanasi para no sési úkuni Jobuni?

⁸ Noambakiti úraspti máteru ambe para no sési úkuni Jobuni. Úraaspti tanimu Jobueri amigu arhikatechani parakaksï ueenapiringa no sési pʼikuastani. I kʼuiripuechaksï uandaspti eska Jobu no sési nitamakuarhixapka jimboka uánikua no sési jásï ambe úska (Job 22:5-9). Ístuksï uékasïreendi eratsetarani eska nájkiruka ima no úpiringa iámindu imani no sési jásï ambe, Tata Diosï Jeoba no méni jaiapanhentapiringa nájkiruka ima ambakiti kʼuiripu máepiringa (Job 4:18; 22:2, 3; 25:4). Uékasïreendiksï eska Jobu eratsepiringa eska Tata Diosï no xénchasïreenga, eska no kuidaripiringa ka eska no ma ambe jimbo marhuasïreenga enga ísï sési marhuakuni japka. Imeecheri uandakuechaksï jamberi úpti eska Jobu eratsepiringa eska no méni kʼamakurhipiringa ambe enga nitamakuarhini japka.

9. ¿Andisï úpi Jobu uinhapikua jatsini ka balori jukani?

⁹ Ju je eranhaskani ambe enga úkuarhini japka. Jobu uaxakatixati tʼupuri jápurhu ka pauani pauani no sési pʼikuarherasïndi imani pʼamenchakua jimbo enga kámani jaka (Job 2:8). Imeeri amiguechaksï jánguarhintaxati paraka ima eratseaka eska no sési úri máeska ka eska iámu ambe enga úni jaka, méntku no ma ambe jimbo marhuasïnga. Xáni uánikua uandanhiatecha jimbo, Jobu ísï pʼikuarherasïndi enajki nóteru uaaia orhepani uérani ka no sési pʼikuarherasïndi imeeri mintsitarhu jimboka uarhiranchaaska imeeri sapiichani. Orheta pínasku pakarasïndi (Job 2:13–3:1). Engaksï imeeri amiguechaksï eratsejka eska Jobu eratsexakaia jurajkuni Tata Diosïni jimboka no ma ambe uandasïnga, méntku no ísïisti. Ma repentku, jamberi eratepariani imeeri amiguechani, Jobu arhiasïndi: “¡Jiájkani jamberi marhuakuaka Tata Diosïni iámu mintsita jingoni astakani uarhiaka!” (Job  27:5). ¿Andisï úpi Jobu uinhapikua jatsini ka balori jukani nájkiruka xáni no sési nitamakuarhini japka? Jimboka kánikua mintsinharhisïreenga eska Tata Diosï jarhuatapiringa nájkiruka no sési nitamakuarhini japka. Mítespti eska nájkiruka uarhipiringa, Tata Diosï Jeoba tsítantapiringa (Job 14:13-15).

10. ¿Ambejtsïni jorhendasïni ambe enga nitamakuarhipka Jobu?

¹⁰ Ambe enga Jobu nitamakuarhipka, jorhendasïndijtsïni eska Noambakiti nójtsïni uaaka obligaritarani parachi jucha jurajkuni Tata Diosï Jeobani ka eska Tata Diosï méntkisï jingontku jarhasïnga iámu ambe jingoni enga úkuarhijka. Ambe enga ima nitamakuarhipka ka imeeri ejemplu ístujtsïni jorhendasïndi máteru ambakiti ambe. Ju je exeani máru.

11. ¿Ambeerichi uaa seguru jarhani engachi méntkisï mintsinharhiska Tata Diosï Jeobani? (Santiagu 4:7).

¹¹ Jobu xarhatasti eska engachi jucha méntkisï mintsinharhiska Tata Diosï Jeobani, uaakachi orhepani uérakuni náki uéjki tsʼéjkukuani ka eskachi uaaka andani Noambakitini. ¿Ka ambe úkuarhia engachi ísï úska? Bibliajtsïni aiachesïndi eskajtsïni Noambakiti kéndikuchiaka (arhinta je Santiagu 4:7).

12. ¿Néna uinhaperantaspi Jobuni mintsikani eska jauaka tsíntskua?

¹² Jatsiskachi para kánikua mintsikani eska jauaka tsíntskua. Eskachi na exeka máteru jorhenguarhikua jimbo, máru kʼuiripuechaksï chésïndi uarhini ka Satanasi mémindu úrasïndi indeni ambe parakaksï kʼuiripuecha jurajkuaka Tata Diosïni. Ju je eratsentani ambe enga úkuarhipka Jobu jingoni. Noambakiti uandaspti eska Jobu niárapiringa asta jamberi jurajkuni Tata Diosï Jeobani para kuájchakuni imeeri tsípikuani. ¡Peru méntku no ísïispti! Nájkiruka kánikua no sési nitamakuarhini japka, asta jiáni jamberi enga eratsepka eska uarhipiringia, no méni jurajkuspti Tata Diosïni. ¿Ka néna úspi xáni tekaantani? Jimboka mintsikasïreenga eska Tata Diosï Jeoba sési kámpisïnga ka eska sánderu orhepatini imeeri Kueraajpiri sési peentapiringa iámindu ambe. Ístu, mintsikasïreendi eska nájkiruka Tata Diosï no jarhuatapiringa jiáni enga Jobu tsípiti japka, sánderu orhepatini jarhuatapiringa ka eska tsítantapiringa. Jobu meru mintsikasïreendi eska japiringa tsíntskua. Engachi juchajtu májkueni mintsikaaka, nóchi méni jurajkuaka Tata Diosïni nájkirukachi arhinhaaka eskachi uándikunhaaka.

13. ¿Andisï sési jaki exeni ambe enga xáni úrapka Noambakiti Jobu jingoni?

¹³ Kánikua sési jarhasti míteni ambe enga Noambakiti úrapka Jobu jingoni jimboka sáno májkueni ambe úsïnga iásï. Ju je exeni ambe enga uandapka Jobueri ambe ka ístu iámindu kʼuiripuecheri. Uandaspti: “Iámindu ambe enga kʼuiripu jatsikuarheka, íntspiati para kuájpintani imeeri tsípikuani” (Job 2:4, 5). Noambakiti arhikuekaxapti eskachi jucha no mintsita jingoni xénchasïnga Tata Diosï Jeobani ka eska enga juchaari tsípikua peligrurhu jauaka niáraakachi jurajkuni. Ístu uandasïndi eskajtsïni Tata Diosï no xénchasïnga ka eska no jukaparharasïnga na engachi xáni jánguarhintajka para marhuakuni. Peru juchantsïni engachi mintsinharhijka Tata Diosï Jeobani, Noambakitijtsïni no úsïndi támisï jánhastani jimbokachi míteskia ambe enga xáni úrajka.

14. ¿Ambeerichi uaa kuenta íntskukuarheni engachi tsʼéjkukua ma nitamakuarhini jauaka, ka náki ejemplujtsïni jarhuatasïni parachi úni kurhanguni ini ambe?

¹⁴ Engachi tsʼéjkukua ma nitamakuarhini jauaka, i ambejtsïni jarhuataati parachi úni sánderu sési mítekuarhini. No sési ambe enga Jobu nitamakuarhipka jarhuataspti paraka kuenta íntskukuarhepiringa eska jatsispka para mójtakuni máru ambe. Pori ejemplu, exespti eska jatsispka para kaxumbitini (Job 42:3). Juchajtuchi uaaka uánikua ambe exeni engachi jatsika para mójtakuni engachi tsʼéjkukua ma nitamakuarhini jauaka. Inde ambesï  úkuarhinchapti Nikolái, * engaksï ónhapka nájkiruka pʼamenchani japka. Ima uandasïndi: “Ónhakata jarhani, ísïisti komu radiografia ma úkuarhini: úsïndi eskari exeaka ambe engari jatsika para mójtakuni ka ambe engari sési úni jaka”. Engachi kuenta íntskukuarhejka eskachi no úxaka iámindu ambe sési úni, uaakachi mójtakuni indeni ambe.

15. ¿Nénchi jatsiski para kurhajchani, ka andi?

¹⁵ Jatsiskachi para kurhajchani Tata Diosï Jeobani ka no juchaari ikiatspitichani. Jobu jingontku kurhaaspti enga Tata Diosï uandontskuarhekuni japka. Para jarhuatani kurhanguni ambe ma, ima sáno ísï arhispti Jobuni: “¿Exeskiri juchiiti uinhapikuani indeni ambe jimbo engani kueraaka? Ji, jingontku exexaka iámu ambe engari nitamakuarhika. ¿Eratsesïniri eskakeni no uaaka kuidarini?”. Kaxumbikua jingoni ka kánikua sési pʼikuarheraparini jimboka Tata Diosï sési kámpisïnga, Jobu mókukuspti: “Juchiiti kutsïkuecha jingoni kurhaaspka chiiti ambe, peru iásïkini exexaka juchiiti éskuecha jingoni” (Job 42:5). Enga Jobu i ambe uandapka jamberi útasï uaxakatini japti tʼupuri jápurhu, imeeri kuerpu iámu pisïrikuarhetixapti ka ueraxapti jimbokaksï uájpeecha uarhispka. Enga i ambe nitamakuarhini japka, Tata Diosï Jeoba arhispti Jobuni eska xénchasïreenga ka eska jaiapanhentasïreenga (Job 42:7, 8).

16. Eska na uandajka Isaías 49:15, 16, ¿ambechi no méni jatsiski para mirikuarhini engachi tsʼéjkukuechani nitamakuarhiani jauaka?

¹⁶ Iásï, jamberi kʼuiripuechajtsïni no sési arhijti ka ísïjtsïni pʼikuastani enajkichi no jukaparhakue. Jamberiksï jánguarhintajti parajtsïni no sési pakatani o no sésiksï pakatani Tata Diosïri kúnguarhikuani o mámaru jásï chkuanderakua ambeksï uandani juchaari ambe (Mat.  5:11). Ambe enga nitamakuarhipka Jobu, jorhendasïndijtsïni eska Jeoba mintsikasïnga eskachi no méni jurajkuaka nájkirukachi no sési nitamakuarhini jauaka. Jeobajtsïni xénchasïndi ka no méni mirikurhiauati imeechani engaksï imani mintsinharhijka (arhinta je Isaías 49:15, 16). Ju je no kurhajchaani imeechani engaksï chkuanderakua ambe uandajka Tata Diosïri ambe. Ju je exeni ambe enga uandapka James, erachi ma enga Turquía anapueka ka enga kánikua no sési nitamakuarhipka imeeri familia jingoni. Ima uandasïndi: “Kuentachi íntskukuarhespka eska engachi kurhaapiringa chkuanderakuechani engaksï uandeenga Tata Diosïri ireteri ambe, chkétakukuarhipiringachi. Jimbochisï imani ambe eratseenga enga Tata Diosïri Reinu uaaka ka méntkisï úni jarhani ambe ma Tata Diosïri iretarhu, ka ísïchi úska seguirini tsípikua jingoni irekuarhini”. Ju je májkueni úni eska Jobu ka kurhajchani Tata Diosï Jeobani. ¡Eska chkuanderakuecha engaksï uandajka Tata Diosïri enemiguecha no uaaka eskachi nóteru mintsinharhiakia Tata Diosï Jeobani!

17. ¿Ambechi jorhenguarhisïni ima kʼuiripuecheri enga Ebreu kapitulu 11 uandaajka ka engaksï no méni jurajkupka Tata Diosïni?

¹⁷ No Jobujkusï niárapti balori jukani ka uinhapikua jatsini enga no sési nitamakuarhini japka. Karta ma jimbo enga apostoli Pablu karakuapka kristianu ebreuechani, uandaspti uánikua Tata Diosïri marhuaricheri ka uandaspti eskaksï uánikua testiguechespka (Ebr. 12:1). Nájkirukaksï kánikua no sési nitamakuarhipka, iáminduksï niáraspti méntkisï marhuakuni Tata Diosï Jeobani asta uarhikuarhu jamberi (Ebr. 11:36-40). ¿Marhuaspi engaksï xáni jánguarhintapka ka no kuatantani? Jo, kánikua marhuaspti. Ísïisti, nóksï niáraspti exeni iámu ambe enga Tata Diosï aiatspipka eska úkuarhipiringa, peruksï méntkisï mintsinharhispti imani. Ka seguruksï jarhaspti eska Tata Diosï Jeoba jaiapanhentasïreenga ka eskaksï niárapiringa exeni iámu ambe enga Tata Diosï aiatspeni jaka (Ebr. 11:4, 5). Eratsentani imeecheri ejempluni uinhapikuajtsïni íntskusïndi parachi méntkisï mintsinharhini Tata Diosï Jeobani.

18. ¿Ambechi jatsiski para úni ambe uéjki úkuarhini sánderu orhepatini? (Ebreu 11:6).

¹⁸ Parhakpini pauani pauani sánderu no sési jánhaskuarhixati (2 Tim. 3:13). Ka Satanasi seguirixati tsʼéjkuani Tata Diosïri marhuarichani. Ambe uéjki úkuarhini sánderu orhepani, seguiriuakachi mintsita jingoni marhuakuni Tata Diosï Jeobani jimbokachi mintsikasïnga Tata “Diosïni enga tsípitiika” (1 Tim. 4:10). Ju je no mirikurhini eska ambe enga úkuarhipka Jobu jingoni xarhatasïnga eska Tata Diosï Jeoba “kánikua kóntpintasïnga ka pʼamojpini” (Sant. 5:11). Májkueni eska Jobu, ju je no méni jurajkuni Tata Diosï Jeobani ka seguruchi jauaka eska ima “premiu íntsauaka imeechani engaksï jirinhantajka imani” (arhinta je Ebreu 11:6).