1. (a) Kunihira ki Yahwe okw’atuhaire? (b) Nikimanyisa ki kunihirra omuli Yahwe? (Rora akacweka “Amakuru g’Ekigambo.”)

 YAHWE ahaire boona abamugonza okunihira okurungi. Omu kasumi akatali ka hara naija kumaraho endwaire, kuganya hamu n’okufa. (Kus. 21:3, 4) Naija kukonyera “abaculezi” abamunihirramu kuhindura ensi ekafooka orugonjo orurungi. (Zab. 37:9-11) Kandi naija kutusobozesa itwena kuba n’enkoragana enungi na uwe kukira eiturukwegondezaamu na uwe hati. Mali oku kakunihira kurungi! Baitu kiki ekitusigikirraho kwikiriza ngu emirago ya Ruhanga yoona neija kuhikirra? Yahwe ahikiiriza byona ebyaba araganiize kukora. Nahabweki twine ensonga enungi habwaki tusemeriire kunihirra omuli Yahwe. * (Zab. 27:14) Kinu tukyoleka kurabira omu kulindirra Yahwe n’okugumiisiriza hamu n’okusemererwa kuhikya obwarahikiriza emirago ye yoona.​—Is. 55:10, 11.

2. Kiki Yahwe ekiyamazire ira kukora?

² Yahwe akooleka kara ngu ali muntu arukuhikiiriza emirago ye. Tekerezaaho ekyokurorraho kimu eky’embaganiza. Omu kitabu eky’Okusuku’rwa Yahwe akaraganiza ngu omu kasumi kaitu, naija kuleeta hamu abantu kuruga omu mahanga, enganda, hamu n’endimi kwija kumuheereza omu bumu. Kasumi kanu guruupu egi ey’embaganiza n’emanywa nka “ekitebe kingi.” (Kus. 7:9, 10) N’obukiraaba ngu ekitebe kinu kirumu abantu aba buli mulingo, abasaija, abakazi, hamu n’abaana kuruga omu nsi yoona, bali ka emu ey’obusinge. (Zab. 133:1; Yoh. 10:16) Ekindi, bekambi muno omu mulimo ogw’okutebeza. Baikara betekaniize kugambiraho abantu abandi abetegekere kuhuliiriza ha kunihira kwabo okurukukwata ha nsi empyaka enungi. (Mat. 28:19, 20; Kus. 14:6, 7; 22:17)  Obworaaba oli kicweka ky’ekitebe ekingi, okunihira okw’ebintu ebirungi ebirukwija kw’omuhendo muno hali iwe.

3. Sitaani aine kigendererwa ki?

³ Sitaani tarukugonza obe n’okunihira okw’ebintu ebirungi eby’omu kasumi ak’omu maiso. Nagonza oikirize ngu tarukwija kukufaaho kandi ngu tarukwija kuhikiriza emirago ye. Kakuba Sitaani asingura omu kutumaraho okunihira kwaitu, obumanzi nibwija kutuhwaho kandi nitusobora n’okuleka kuheereza Yahwe. Nk’oku turukwija kurora, Sitaani akalengaho kumaraho okunihira kwa Yobu kandi n’okulengaho kumuletera kuleka kuheereza Yahwe.

4. Biki ebiturukugenda kubazaaho omu kicweka kinu? (Yobu 1:9-12)

⁴ Omu kicweka kinu, nitugenda kubazaaho emitego Sitaani eyiyakozeseze kuhambiriza Yobu kuleka kuba mwesigwa hali Yahwe. (Soma Yobu 1:9-12.) Nitwija n’okubazaaho ekitusobora kwega kuruga omu kyokurorraho kya Yobu n’ensonga habwaki nitwetaaga kwikara nitwijuka ngu Ruhanga n’atugonza kandi ngu naija kuhikiriza emirago ye.

5-6. Kiki ekyahikire hali Yobu omu kaire kake?

⁵ Yobu akaba aine obwomeezi oburungi muno. Yayegondezaaga omu nkoragana enungi ey’akaba aine na Yahwe. Akaba aine eka enkooto ey’erumu okusemererwa kandi akaba ali muguuda muno. (Yob. 1:1-5) Baitu omu kiro kimu kyonka, Yobu akafeerwa haihi buli kimu kyona. Eky’okubanza, akafeerwa obuguuda bwe. (Yob. 1:13-17) Hanyuma abaana be abayagonzaaga muno bakafa. Banza otekerezeeho ebigwererezi ebi. Abazaire basaalirwa muno omu h’abaana baabo obwafa. Nahabweki tekerezaaho obusaalizi obw’amaani Yobu na mukazi we batungire obubakyetegeriize ngu abaana baabo boona ikumi bafiire. Egi niyo nsonga habwaki Yobu yataagwire engoye ze, yateera empamo, kandi yagwa hansi ahoirwemu amaani!​—Yob. 1:18-20.

⁶ Ekyayongiireho, Sitaani akaletera Yobu oburwaire oburukusaasa muno kandi oburukuswaza. (Yob. 2:6-8; 7:5) Baitu eki kitakabaireho, abantu baingi baatekamuga Yobu ekitiinisa eky’amaani. Abantu bamuhikirraga kubaha obuhabuzi. (Yob. 31:18) Baitu hati bakaba nibamwetantara. Akaba ali nk’ekinugwa hali bagenzi be, banywani be, hamu n’abaheereza be ab’omu ka!​—Yob. 19:13, 14, 16.

7. (a) Noha Yobu ow’akaba natekereza ngu amuletiire kubonabona, baitu kiki ekiyayangire kukora? (b) Omukristaayo nasobora ata kutunga ekirengo ekirukulengesanizibwa n’ekiturukurora omu kisisani?

⁷ Sitaani akaba nagonza Yobu aikirize ngu akaba nabonabona habwokuba Yahwe akaba amubihiriirwe. Ekyokurorraho, Sitaani akakozesa ihuunga ery’amaani kuhwerekereza enju nambere abaana ba Yobu ikumi bakaba bali nibalya hamu ekiihuro. (Yob. 1:18, 19) Akaleeta n’omurro kuruga omu iguru hatali kuhwerekereza igana lya Yobu lyonka baitu n’abaliisa be abaali nibalirolerra. (Yob. 1:16) Habwokuba omuyaga n’omurro bikaruga omu iguru, Yobu akateekereza ngu bikaba birugire hali Yahwe. Kandi ekyarugiremu, akaikiriza ngu nasobora kuba aine omulingo yabihiizeemu Yahwe. Eki n’obukiraaba nukwo kiri, Yobu akanga kukyena Ise ow’omu iguru. Kumara emyaka nyingi, Yobu akaba akyetegeriize ngu akaba atungire ebintu bingi ebirungi kuruga hali Yahwe. Nahabweki akateekereza ngu, obwaraaba yaikiriize ebintu ebirungi kuruga hali Ruhanga, asemeriire n’okwikiriza ebintu ebibi. Nahabweki akagamba ati: “Ibara lya [Yahwe] lisimwe.” (Yob. 1:20, 21; 2:10) Yobu n’obwaraaba y’aferiirwe itungo lye,  abaana, kandi y’arwara, akaikara ali mwesigwa hali Yahwe. Baitu Sitaani akalengaho ekintu ekindi.

8. Mutego ki ogundi Sitaani oguyakozeseze hali Yobu?

⁸ Sitaani akakozesa omutego ogundi hali Yobu; akakozesa banywani be basatu kumuletera kwehurra ngu taine mugaso. Bakagamba ngu Yobu akaba nabonabona habwokuba akaba akozere ebibi bingi muno. (Yob. 22:5-9) Bakalengaho n’okumwikirizisa ngu n’obukiraaba ngu akaba atali mubi, amaani goona agaakaba n’atamu kusemeza Ruhanga gakaba gataine mugaso. (Yob. 4:18; 22:2, 3; 25:4) Bakaba nibalengaho kuletera Yobu kuteekereza ngu Ruhanga tarukumugonza, tarukwija kumufaaho kandi kikaba kitaine makuru kumuheereza. Ebigambo byabo byakuletiire Yobu kutaba n’okunihira omu nyikara ye.

9. Kiki ekyakonyire Yobu kwikara ali mumanzi kandi w’amaani?

⁹ Teeramu akasisani, Yobu aikaliire omwiju kandi ali omu busaasi obw’amaani. (Yob. 2:8) Banywani be baikara nibamugambira ngu tali muntu murungi kandi ngu taine kintu kyona eky’omugaso ekiyali akozere. Ebirengo bye bikaba nk’omugugu ogw’amaani muno kandi omu kaire nuko kamu akaba aine obusaasi obw’amaani omu mutima habw’okufeerwa abaana be. Ha kubanza Yobu akaculeera. (Yob. 2:13–3:1) Banywani ba Yobu obubaraaba baali nibateekereza ngu okuculeera kwe kokurorraho ak’okuleka Omuhangi we, bakaba bagwire. Akaire kahika, obundi Yobu aimukya omutwe gwe aroleriire abakwefoora banywani be abagambira ati: “Okuhikya okufa kwange tidyeyihaho okuhikirra kwange!” (Yob. 27:5) Kiki ekyakonyire Yobu kuba mumanzi kandi w’amaani n’obukiraaba ngu akaba aine ebizibu? N’obwaraaba akaba ayenuubire muno, akaikara aine okunihira ngu Ruhanga we ow’okugonza akaba naija kumukonyera kumaraho okubonabona kwe. Akaba  akimanyire ngu n’obwaraafa Yahwe yakumuhumbwire.​—Yob. 14:13-15.

10. Kiki ekiturukwegera ha byahandiikirwe ebirukubazaaho Yobu?

¹⁰ Ebyahandiikirwe ebirukukwata hali Yobu nibitwegesa ngu Sitaani tasobora kutuhambiriza kwecwaho Yahwe kandi ngu Yahwe amanyire buli kimu kyona ekirukukwata ha nyikara yaitu. Ekyokurorraho kya Yobu nikisobora n’okutukonyera kwetegereza kurungi ensonga ezindi enkuru. Tekerezaaho amasomo agamu agatusobora kwega kuruga hali Yobu.

11. Kiki ekitusemeriire kugumya, kakuba tugumizaamu nitwesiga Yahwe? (Yakobo 4:7)

¹¹ Yobu akakyolekera kimu ngu kakuba tugumizaamu nitwesiga Yahwe, nitwija kusobora kugumira buli kirengo kyona n’okusingura omu kuhakaniza Sitaani. Kiki ekirarugamu? Ebyahandiikirwe nibitugumya ngu Sitaani naija kutwiruka.​—Soma Yakobo 4:7.

12. Okunihira okw’okuhumbuuka kukagumya kuta Yobu?

¹² Nitwetaaga kuba n’okwikiriza okw’amaani omu kunihira okw’okuhumbuuka. Nk’oku twarozere omu kicweka ekyahoire, Sitaani akira kukozesa okutiina okufa kulengaho kutulemesa kuba besigwa hali Yahwe. Hali Yobu, Sitaani akagamba ngu Yobu akaba nagenda kukora ekintu kyona otwaliiremu n’okuleka kuba mwesigwa hali Yahwe kusobora kujuna obwomeezi bwe. Sitaani akaba atahikire. Nobukiraaba ngu Yobu akateekereza ngu nagenda kufa, akaikara ali mwesigwa hali Yahwe. Habwokuba akaba nayesiga oburungi bwa Yahwe, kandi aine okunihira okw’amaani ngu Yahwe naija kuhika aterekereze ensonga, kikamukonyera kugumiisiriza. Yobu akaba aine okwikiriza ngu kakuba Yahwe ataramukonyire akyali mwomeezi akaba nagenda kumuhumbuura omu kasumi ak’omu maiso. Yobu akaba nakigumiza kimu ngu nihaija kubaho okuhumbuuka. Kakuba naitwe tukigumiza kimu ngu nihaija kubaho okuhumbuuka, okutiina okufa tikurukwija kutuleetera kuleka kuba besigwa hali Yahwe.

13. Habwaki tusemeriire kutaho omutima emitego Sitaani yakozeseze hali Yobu?

¹³ Tusemeriire kutaho omutima emitego Sitaani yakozeseze hali Yobu habwokuba niyo emu ey’akozesa hali itwe kasumi kanu. Wetegereze Sitaani ekiyagambire: ‘Byona omuntu [hatali Yobu wenka] ebyanyinabyo alibihayo habwobwomezibwe.’ (Yob. 2:4, 5) Nahabweki Sitaani akaba namanyisa ngu titurukugonza Yahwe kuruga ha mutima kandi ngu nitwija kuleka kuba besigwa hali Yahwe kakuba kiba nikyetaagisa kujuna obwomeezi bwaitu. Ekindi, Sitaani agamba ngu Ruhanga tatugonza kandi ngu tateekaho omutima amaani agaturukutamu kumusemeza. Habwokuba tumanyire ekigendererwa kya Sitaani, tituhabisibwa ebisuba bye.

14. Ebirengo nibisobora kutukonyera kumanya ki? Bazaaho ekyokurorraho.

¹⁴ Tusemeriire kurora ebirengo nk’omugisa ogw’okweyongera kwemanya kurungi. Ebirengo Yobu ebiyarabiremu, bikamukonyera kumanyirra obuceke bwe n’okubuterekereza. Ekyokurorraho, akakyetegereza ngu akaba nayetaaga kweyongera kukurakuraniza obwebundaazi. (Yob. 42:3) Naitwe tweyongera kwemanya kurungi obuturaba omu birengo. Ow’oruganda Nikolay, * ow’akaba atairwe omu nkomo, n’obukiraaba ngu akaba aine oburwaire obw’amaani nagamba ati: “Enkomo eri nk’ekyoma ekya X-ray, ekonyera Omukristaayo kumanya kiki ekyali omunda.”  Obutumanyirra obuceke bwaitu, kitukonyera kubuterekereza.

15. Noha outusemeriire kuhuliiriza, kandi habwaki?

¹⁵ Tusemeriire kuhuliiriza Yahwe hatali abanyanzigwa baitu. Yobu akateekaho omutima Yahwe obwakaba nabaza na uwe. Ruhanga akakaguza Yobu ebikaguzo ebimu kumukonyera kwetegereza nk’oku arukumufaaho. Yobu akagarukamu n’obwebundaazi hamu n’okusiima okw’amaani habw’oburungi bwa Yahwe. Akagamba ati: “Nkakuhurra habwokuhurra okwamatu; baitu hati bunu eriso lyange likuboine.” (Yob. 42:5) Yobu nasobora kuba akaba akyaikaliire omu iju, omubiri gwe gwijwire ebihooya, kandi ali mukuganya habw’okufeerwa abaana be, nambere yagambiire ebigambo ebi. Baitu nabwo, Yahwe akagumya Yobu nk’oku akaba namugonza kandi nk’oku akaba nasiimwa omu maiso ge.​—Yob. 42:7, 8.

16. Kusigikirra ha Isaya 49:15, 16, kiki ekitusemeriire kwijuka obutuhikwaho ebirengo?

¹⁶ N’omu kasumi kanu, abantu nibasobora kutujuma kandi bakatutwaza nk’abataine mugaso. Nibasobora kulengaho kutusiisa ibara, rundi ery’ekitebe kyaitu, kandi ‘n’okutuhangirra ebigambo ebibi byona.’ (Mat. 5:11) Kuruga omu kyokurorraho kya Yobu nitwega ngu, Yahwe natwesiga ngu nitwija kwikara tuli besigwa hali uwe n’obutuhikwaho ebirengo. Yahwe natugonza muno kandi talirekaho abo abamunihirramu. (Soma Isaya 49:15, 16.) Otateekaho omutima abanyanzigwa ba Ruhanga ebibatubazaaho! Ow’oruganda James, kuruga omu Turkey ow’eka ye ey’erabire omu birengo bingi nagamba ati: “Tukakyetegereza  ngu kuhuliiriza ebisuba ebirukukwata h’abantu ba Ruhanga kyakutumaziremu amaani. Nahabweki tukateeka omutima ha kunihira kwaitu okw’Obukama kandi twaikara tuli bekambi omu kuheereza Yahwe. Ekyarugiremu, tukaikara twine okusemererwa.” Nka Yobu, tuhuliirize Yahwe! Ebisuba by’abanyanzigwa baitu tibirukwija kuhwerekereza okunihira kwaitu.

17. Kiki ekiturukwega omu byokurorraho eby’abasaija n’abakazi abesigwa abarukubazibwaho omu Abaheburaniya esuura 11?

¹⁷ Yobu ali omu h’abaheereza ba Yahwe abaikaire bali bamanzi kandi ab’amaani obu baahikirweho ebirengo eby’amaani. Omu bbaruha ye hali Abaheburaniya, omukwenda Paulo akabazaaho abandi baingi abayayesere “ekitebe kyabakaiso ekingi.” (Baheb. 12:1) Bakaraba omu birengo eby’amaani; baitu bakaikara bali besigwa hali Yahwe obwomeezi bwabo bwona. (Baheb. 11:36-40) Okugumiisiriza kwabo n’amaani agabatairemu, bikafeera busa? Nangwa! Nobukiraaba ngu batarole emirago ya Ruhanga n’ehikirra bakyali bomeezi, bakagumizaamu nibanihirra omuli Yahwe. Kandi habw’okukimanya ngu basiimirwe omu maiso ga Yahwe, bakaba nibakigumya ngu nibaija kurora emirago enu n’ehikirra. (Baheb. 11:4, 5) Ekyokurorraho kyabo nikitwekambisa kugumizaamu nitunihirra omuli Yahwe.

18. Kiki eky’ocweriiremu kimu kukora? (Abaheburaniya 11:6)

¹⁸ Kasumi kanu nitwikara omu nsi ey’erukweyongerra kimu kusiisikara. (2 Tim. 3:13) Sitaani takalekere kulenga abantu ba Ruhanga. N’obuturatangatangana ebizibu omu kasumi ak’omu maiso, leka twikale tucweriiremu kimu kukorra Yahwe nitukigumya ngu ‘nitunihirra omuli Ruhanga omwomeezi.’ (1 Tim. 4:10) Oijuke ngu, empeera Yahwe yahaire Yobu n’egumya nk’oku “[Yahwe] okwali wembabazi nyingi nokuganyira.” (Yak. 5:11) Naitwe leka twikale tuli besigwa hali Yahwe nitukigumiza kimu ngu naija kuha empeera abo boona “abanyakumuserra.”​—Soma Abaheburaniya 11:6.