1. (a) Se a te fakamoemoega ne tuku mai ne Ieova ki a tatou? (e) Se a te uiga ke “fakamoemoe ki a Ieova”? (Onoono ki te “Fakamatalaga o te Pati.”)

 KO OTI ne tuku mai ne Ieova se fakamoemoega gali ki a latou katoa kolā e a‵lofa ki a ia. Ko pili eiloa o fakagata ne ia a masaki, te fanoanoa, mo te mate. (Faka. 21:3, 4) Ka fesoasoani atu a ia ki “tino agamalu” kolā e fakamoe‵moe ki a ia ke ‵fuli ne latou te lalolagi ki se palataiso. (Sala. 37:9-11) Kae ka fai foki ne ia ke mafai o maua ne tatou taki tokotasi se va fakataugasoa totino mo ia, telā ka sili atu i te gali i lō te taimi nei. Ko tafaga te gali o te fakamoemoega tenā! Kae ne a pogai e tali‵tonu tatou me ka fakataunu eiloa a folafolaga a te Atua? E seki ofa lele eiloa ne Ieova se tautoga. Tela la, e maua ne tatou a pogai ‵lei ke “fakamoe‵moe ki a Ieova.” * (Sala. 27:14) E fakaasi atu ne tatou te mea tenei mai te faka‵tali mo te kufaki mo te fiafia ki te taimi e fakataunu ei ne te ‵tou Atua tena fuafuaga.—Isa. 55:10, 11.

2. Ne a mea ko oti ne fai ne Ieova?

² Ko oti ne fakamaoni mai ne Ieova me e tausi a ia ki ana folafolaga. Mafaufau ki se fakaakoakoga tu ‵kese. I te tusi o Fakaasiga, ne folafola mai ne Ieova me i ‵tou aso nei, ka fai ne ia a tino mai atufenua, matakāiga, mo ‵gana katoa, ke ‵kau fakatasi i te tapuakiga ‵ma. I aso nei, ko lauiloa a te potukau fakaofoofogia tenā o tino e pelā me ko te “vaitino e tokouke.” (Faka. 7:9, 10) E tiga eiloa e aofia i ei a tāgata, fāfine, mo tama‵liki mai i matakāiga, ‵gana, mo telega kese‵kese, a te potukau tenei o  tino kese‵kese, e maua i ei se kautaina filemu kae fealofani i te lalolagi kātoa. (Sala. 133:1; Ioa. 10:16) E fai foki a tino i te vaitino tokouke tenā mo fai ne tino talai loto finafinau. E toka faeloa latou o fakaasi atu te lotou fakamoemoega e uiga ki se lalolagi tai ‵lei atu ki so se tino telā e fia fakalogologo. (Mata. 28:19, 20; Faka. 14:6, 7; 22:17) Kafai e aofia koe i te vaitino tokouke, e mautinoa me e tāua ‵ki eiloa ki a koe a te fakamoemoega e uiga ki mea tai ‵lei atu i aso mai mua.

3. Se a te mea e fakamoemoe ki ei a Satani?

³ E manako te Tiapolo ke fakaseai atu tou fakamoemoega. E fakamoemoe a ia ke talitonu koe me e se atafai atu a Ieova ki a koe kae ka se tausi foki Ana folafolaga. Kafai e manuia a Satani i te fakaseaiga o te ‵tou fakamoemoega, ka galo atu te ‵tou loto malosi kae e mafai foki o fakagata te ‵tou tavini atu ki a Ieova. E pelā mo te mea ka tauloto tatou ki ei, ne taumafai a te Tiapolo o fakaseai atu te fakamoemoega o Iopu kae ke fakagata foki tena tavini atu ki a Ieova.

4. Ne a mea ka mafau‵fau tatou ki ei i te mataupu tenei? (Iopu 1:9-12)

⁴ I te mataupu tenei, ka mafau‵fau tatou ki togafiti ne fakaaoga ne Satani i ana taumafaiga ke faimālō atu ki a Iopu ke fakamasei tena fakamaoni. (Faitau te Iopu 1:9-12.) Ka sau‵tala foki tatou ki mea e mafai o tauloto ne tatou mai te fakaakoakoga a Iopu, mo te pogai e ‵tau o masaua ne tatou me e alofa mai te Atua kae ka fakataunu eiloa ne ia Ana folafolaga.

5-6. Se a te mea ne tupu ki a Iopu i se taimi toetoe fua?

⁵ Ne fanofano ‵lei te olaga o Iopu. Ne maua ne ia se va fakataugasoa ‵pili mo Ieova. Ne maua ne ia se kāiga lasi kae fealofani kae ne maumea malosi a ia. (Iopu 1:1-5) Kae i se aso fua e tasi, toeitiiti ko ‵galo i a Iopu ana mea katoa. Muamua la, ne galo atu tena maumea. (Iopu 1:13-17) ‵Soko atu, ne ‵mate ana tamaliki pele katoa. Mafaufau malie aka ki te tulaga faigata tenā. E logo‵mae malosi a mātua māfai ko mate atu se tamaliki e tokotasi. Tela la, mafaufau ki te ‵poi, te loto mafatia, mo te loto fanoanoa telā ne maua ne Iopu mo tena avaga i te iloaga ne lāua me i lā tamaliki katoa e toko sefulu ko oti ne ‵mate. E se tioa eiloa o saesae ne Iopu ana gatu i te fanoanoa kae fakasiga ki lalo i te laukele!—Iopu 1:18-20.

⁶ Ne fai ne Satani ke masaki a Iopu, telā ne fakamasei ki tena tulaga fakaaloalo. (Iopu 2:6-8; 7:5) I se taimi e tasi, ne fakaaloalo malosi atu ki a Iopu a tino i tena fa‵kai. Ne olo atu a tino ki a ia mō fakatakitakiga. (Iopu 31:18) Kae nei la, ko ‵kalo keatea latou mai i a ia. Ne faka‵kese ne latou a ia, ne ‵teke atu ana taina, ana taugasoa ‵pili, kae ke oko foki eiloa ki ana tavini i tena kaukāiga!—Iopu 19:13, 14, 16.

7. (a) Se a te mea ne talitonu ki ei a Iopu me ko te pogai o ana logo‵maega, kae se a te mea ne ita fitifiti tou tagata ke fai? (e) E fakafesagai atu pefea se Kelisiano ki tofotofoga kolā e tai ‵pau mo mea e fakaasi mai i te ata?

⁷ Ne manako a Satani ke talitonu a Iopu me ne logo‵mae a ia ona ko te mea ko galo atu i a ia a te taliaga a Ieova. E pelā mo te fakaaogaga ne Satani a te matagi malosi ke ofa ki lalo a te fale telā ne ‵kai fakatasi mo te fia‵fia i ei a tama‵liki e toko sefulu a Iopu. (Iopu 1:18, 19) Ne fai foki ne ia ke fanaifo te afi mai te lagi kae tamate ki ei a lafu manu a Iopu kae penā foki a tavini kolā ne tausi atu ki ei. (Iopu 1:16) Ne māfua mai eiloa a te matagi mo te afi mai i se malosi fai fakaatea, tela la, ne fakaiku aka ne Iopu me i a Ieova te Atua ko te Pogai. Kae ne iku atu i ei ki te talitonu o Iopu me kāti ne fakafanoanoa ne ia a Ieova. Kae faitalia loa a mea konā, ne ita fitifiti a Iopu ke muna masei atu ki tena Tamana faka-te-lagi. Ne iloa ne Iopu me i te fia o  tausaga ko ‵teka, ne maua ne ia a mea ‵lei e uke mai i a Ieova. Tela la, ne fai mai a ia me kafai e fiafia a ia o talia a mea ‵lei, e ‵tau foki o loto fiafia a ia ke talia a mea ma‵sei. Tenā, ne fai mai ei a ia: “Ke vikia faeloa a te igoa o Ieova.” (Iopu 1:20, 21; 2:10) I te taimi tenā, ne fakafesagai atu a Iopu ki tulaga faiga‵ta i mea tau tupe, feitu tau lagonaga, mo te feitu faka-te-foitino. Kae ne seki gata atu i konā a taumafaiga a Satani.

8. Se a te suā togafiti ne fakaaoga ne Satani ki a Iopu?

⁸ Ne fakaaoga ne Satani a te suā togafiti ki a Iopu; ne fakaaoga ne ia ana taugasoa ‵loi e tokotolu ke fakamalosi aka ne latou a lagonaga sē aoga i a Iopu. Ne ‵losi atu a tāgata konei me i logo‵maega o Iopu ne fakamaoniga me ne fai ne ia a mea ‵se kesekese e uke. (Iopu 22:5-9) Ne taumafai latou ke fakatalitonu atu me kafai foki loa a ia e sē se tino masei, e seai eiloa se aoga so se taumafaiga e fai ne ia ke fakafiafia atu ki te Atua. (Iopu 4:18; 22:2, 3; 25:4) E pelā me ne taumafai latou o fai a Iopu ke fakalotolotolua ki te alofa o te Atua ki a ia, Tena tausiga ki a ia, mo te aoga o te tavini atu ki a Ia. Ne fai ne olotou pati konā ke mafaufau a Iopu me ko seai eiloa sena aoga.

9. Se a te mea ne fesoasoani atu ki te loto toa mo te malosi o Iopu?

⁹ Mafaufau ki te tulaga tenei. E sagasaga atu i tafa o lefu, kae tigaina faeloa a Iopu. (Iopu 2:8) E tumau eiloa ana taugasoa i te fakamaseiga o ana uiga kae penā foki mo tena ata ‵lei. Ne ‵mafa eiloa ana tofotofoga e pelā me ne fatu ‵mafa, i te taimi ne loto mafatia ei a ia i te ‵galo atu o ana tama‵liki. Muamua la, ne nofo filemu a Iopu. (Iopu 2:13–3:1) Kafai ne mafau‵fau a taugasoa o Iopu me i tena nofo filemu se fakailoga me ka fulitua atu a Iopu ki tena Mafuaga, ne ‵se ‵ki eiloa latou. I se taimi e tasi, a Iopu—kāti ne kilo ‵tonu atu eiloa ki ana taugasoa ‵loi—kae fai atu: “Ke oko ki te taimi e mate ei au, ka se tiaki eiloa ne au toku fakamaoni!”  (Iopu 27:5) Se a te mea ne fesoasoani atu ki a Iopu ke maua ne ia te loto toa mo te malosi faitalia ana logo‵maega katoa? Ke oko foki loa ki te ‵toe taimi sili o tena loto fanoanoa, ne seki galo lele eiloa tena fakamoemoega me ka aumai fakamuli ne tena Atua alofa se fakatapūga. Ne iloa ne ia me kafai foki e mate a ia, ka toe fakatu aka a ia ne Ieova.—Iopu 14:13-15.

10. Se a te mea e akoako mai ne te tala o Iopu ki a tatou?

¹⁰ E akoako mai i te tala o Iopu me e se mafai o faimālō tatou ne Satani ke fulitua atu ki a Ieova, kae e lavea ne Ieova a tulaga katoa. E fesoasoani mai foki te tala o Iopu ke momea aka te ‵tou malamalama i mataupu tāua kolā e aofia i ei. Mafaufau la ki nai akoakoga mautinoa kolā e mafai o tauloto ne tatou mai i a Iopu.

11. Kafai e tumau te ‵tou fakalagolago ki a Ieova, se a te mea e mafai o tali‵tonu tatou ki ei? (Iakopo 4:7)

¹¹ Ne fakamaoni mai ne Iopu me kafai e tumau te ‵tou fakalagolago ki a Ieova, e mafai o kufaki ne tatou so se tofotofoga kae ‵teke atu mo te manuia ki a Satani. Kae ne a mea e mafai o iku mai i ei? E fakatalitonu mai te Tusi Tapu me ka tele keatea te Tiapolo mai i a tatou.—Faitau te Iakopo 4:7.

12. Ne fakamalosi atu pefea ki a Iopu a te fakamoemoega o te toetuga?

¹² E ‵tau o taofi ‵mau tatou ki te fakamoemoega o te toetuga. E pelā mo te mea ne taku atu i te mataupu mai mua, e fakaaoga sāle ne Satani a te mataku i te mate, ke fakamasei aka ei te ‵tou fakamaoni. E pelā mo Iopu, ne ‵losi atu a Satani, me ka fai ne Iopu so se mea, ke oko ki te gutugutulua i tena fakamaoni, ke fakasao tena ola. Kae ne ‵se ‵ki eiloa a Satani. Ke oko ki te ‵toe taimi faigata i te olaga o Iopu, telā ne foliga mai me ko pili o mate a ia, ne seki gutugutulua lele eiloa tou tagata. Ne fesoasoani atu tena loto talitonu ki te ‵lei o Ieova mo te malosi o tena fakamoemoega, me ka faka‵tonu fakamuli aka ne Ieova a mea. Ne fakatuanaki a Iopu me kafai e se faka‵tonu aka ne Ieova i te taimi koi ola ei a ia, ka gasuesue eiloa te Atua o toe fakatu aka a Iopu i aso mai mua. Ne talitonu katoatoa a Iopu ki te fakamoemoega o te toetuga. Kafai e tali‵tonu katoatoa tatou ki te fakamoemoega tenā, ka se mafai eiloa o fakamasei a te ‵tou fakamaoni ne te fakamataku o te mate.

13. Kaia e ‵tau ei o ‵saga faka‵lei atu tatou ki togafiti kolā ne fakaaoga ne Satani ki a Iopu?

¹³ E ‵tau o ‵saga faka‵lei atu tatou ki togafiti ne fakaaoga ne Satani ki a Iopu, me e tai ‵pau foki a auala e fakaaoga ne ia ki a tatou i aso nei. Mafaufau la ki te ‵losiga ne fai ne Satani: “A te tagata [e se ko Iopu fua] ka tuku atu ne ia ana mea katoa ke tumau a ia i te ola.” (Iopu 2:4, 5) E pelā me e fai atu a ia, me e se a‵lofa tonu tatou ki a Ieova te Atua, kae ka fulitua atu tatou ki a ia māfai ko ‵tau o faka‵sao ‵tou ola. Ne toe fai mai foki a Satani me e se alofa mai te Atua ki a tatou kae ka se fia saga mai foki a ia ki ‵tou taumafaiga ke fakafiafia atu ki a Ia. Ona ko te mea ko oti ne fakailoa mai ki a tatou, e se mafai eiloa o fakaloiloigina a tatou katoa kolā e fakamoe‵moe ki a Ieova ne togafiti a Satani.

14. E fakaasi mai pefea ne tofotofoga a mea i ‵tou loto? Fakamatala mai.

¹⁴ E ‵tau o ‵kilo atu tatou ki tofotofoga e pelā me se avanoaga ke iloa ‵lei ne tatou a tatou eiloa. A tofotofoga ne fe‵paki mo Iopu ne fesoasoani atu ke iloa ne ia ana vāivāiga kae ke faka‵tonu aka. E tasi mai i ei, ne iloa aka ne ia me ne ‵tau o momea aka te lasi o tena loto maulalo. (Iopu 42:3) E mafai foki o uke atu a mea e iloa ne tatou e uiga ki a tatou eiloa māfai ko fe‵paki mo tofotofoga. A te taina e igoa ki a Nikolay, * telā ne ‵pei ki te falepuipui faitalia te uke o ana ma‵saki, ne fai mai: “A te falepuipui e fai pelā me se mea fakaata, telā e lavea ‵lei atu i ei a uiga  ‵loto o se Kelisiano.” Kafai ko iloa ne tatou a ‵tou vāivāiga, e mafai o taumafai tatou ke faka‵tonu aka.

15. Ko oi e ‵tau o faka‵logo tatou ki ei, kae kaia?

¹⁵ E ‵tau o faka‵logo tatou ki a Ieova kae e se ko ‵tou fili. Ne fakalogologo faka‵lei a Iopu i te taimi ne faipati atu a Ieova ki a ia. E pelā me ne fai atu penei a te Atua ki a Iopu ke mafaufau faka‵lei: ‘E mata, e lavea ne koe toku malosi i te faitega o mea? E iloa ‵lei ne au a mea katoa ko oti ne ‵tupu ki a koe. E a, e mafaufau koe me e se mafai ne au o tausi faka‵lei atu ki a koe?’ Ne tali atu eiloa a Iopu mo te loto maulalo mo te lasi o tena loto fakafetai ki te ‵lei o Ieova. “Ne ‵logo oku taliga e uiga ki a koe,” ko ana pati, “kae nei ko lavea ne au koe ki oku mata.” (Iopu 42:5) A Iopu koi nofo atu eiloa i tafa o lefu, tena foitino e ‵fonu i mea ‵pala, kae ko ana tama‵liki ko ‵mate, i te taimi ne fai atu ne ia a pati konā. Kae ne fakatalitonu atu eiloa ne Ieova Tena alofa ki a Iopu mo Tena taliaga.—Iopu 42:7, 8.

16. E ‵tusa mo te Isaia 49:15, 16, se a te mea e ‵tau o masaua ne tatou māfai ko fe‵paki tatou mo tofotofoga?

¹⁶ I aso nei, e mafai foki o fai valevale tatou ne tino kae fai ne latou a tatou e pelā me e seai ne aoga. Kāti ka taumafai latou o fakamasei ‵tou ata ‵lei e pelā me ne tino taki tokotasi io me e pelā me se fakapotopotoga kātoa “kae ‵losi [mai] a vaegā mea ma‵sei katoa.” (Mata. 5:11) Mai te tala o Iopu, e tauloto ne tatou me e maua ne Ieova te loto talitonu me ka tumau tatou i te fakamaoni ki a ia māfai ko fe‵paki mo tofotofoga. E alofa a Ieova ki a tatou kae ka se tiaki lele ne ia a latou kolā e fakamoe‵moe ki a ia. (Faitau te Isaia 49:15, 16.) Ke mo a eiloa  ma saga atu ki pati fatufatu mai i fili o te Atua! A James, se taina mai i Turkey telā ne fepaki tena kāiga mo tofotofoga faiga‵ta, ne fai mai: “Ne iloa aka ne matou me i te fakalogo‵logo ki fakamatalaga ‵loi e uiga ki tino o te Atua, e fakavāivāi mai. Tela la, ne ‵saga atu matou ki te motou fakamoemoega e uiga ki te Malo, kae tumau i te ga‵lue malosi i te motou taviniga ki a Ieova. Ne iku atu i ei ki te fakatumauga o te motou fia‵fia.” E pelā mo Iopu, e fakalogo‵logo tatou ki a Ieova! E se fakaseai atu ‵tou fakamoemoega ne fakamatalaga ‵loi a ‵tou fili.

17. Se a te mea e tauloto ne koe mai i te fakaakoakoga a tāgata mo fāfine fakamaoni kolā e taku mai i te Epelu mataupu 11?

¹⁷ A Iopu, se tavini e tokotasi fua mai i tavini a Ieova, kolā ne tumau i te loto ‵toa kae ma‵losi i taimi o tofotofoga faiga‵ta. I tena tusi ki te kau Epelu, ne fakasino atu a te apositolo ko Paulo ki nisi tino e tokouke, kolā ne taku ne ia latou ki “molimau e tokouke.” (Epe. 12:1) Ne fe‵paki katoa latou mo tofotofoga faiga‵ta; kae ne tumau latou i te fakamaoni ki a Ieova i olotou olaga kātoa. (Epe. 11:36-40) E mata, ne seai se aoga o te lotou kufaki mo galuega e uke? Ikai, e se penā loa! E tiga eiloa e seki lavea ne latou te fakataunuga o folafolaga a te Atua i te taimi koi ola ei, ne tumau latou i te fakamoe‵moe ki a Ieova. Kae ona ko te mautinoa i a latou me ne maua ne latou te taliaga a Ieova, ne tali‵tonu latou me ka taunu eiloa a folafolaga. (Epe. 11:4, 5) A te lotou fakaakoakoga e mafai o fakamalosi aka ei te ‵tou fakaikuga ke tumau i te fakamoe‵moe ki a Ieova.

18. Se a te mea ka fakaiku aka ne koe ke fai? (Epelu 11:6)

¹⁸ I aso nei, e ola tatou i se lalolagi telā e gasolo aka mai te masei o na masei atu. (2 Timo. 3:13) E seki oti atu a te tofotofoga ne Satani a tino o te Atua. Faitalia a tulaga faiga‵ta i aso mai mua, ke na fakaiku aka ne tatou ke ga‵lue malosi mō Ieova, mo te loto talitonu me “ko oti ne fakaeke atu ‵tou fakamoemoega ki luga i te Atua ola.” (1 Timo. 4:10) Masaua, me i mea kolā ne tuku atu ne te Atua ki a Iopu i te fakaotiga, e fakamaoni mai i ei “me e lasi ‵ki te alofa atafai mo te alofa fakamagalo o Ieova.” (Iako. 5:11) Ke na tumau foki tatou i te fakamaoni ki a Ieova mo te tali‵tonu me ka tuku atu ne ia a te “taui ki a latou kolā e ‵sala malosi ki a ia.”—Faitau te Epelu 11:6.