1. (a) Djehovha anotipasa kariro ipi? (b) Zvinoreyei “kuetsera Djehovha”? (Onai pakazwi “Nyasai Kuzwisisa.”)

 DJEHOVHA akapasa kariro yakanaka maningi ku aya anomuda. Mbai-mbai pano, ayena acapedza kurhwara, kutsukwara, uye rufu. (Zvak. 21:3, 4) Ayena acabetsera “apfawi” anomugonda kuti acinje nyika ino kuti igare paraizo. (Pis. 37:9-11) Uye mu nyika ipsva, ticagara no ushamwari we padhuze uye wakabamba na Djehovha, ushamwari uri nani kudarika watinawo zvino. Zvezvirokwazvo, tino kariro yakanaka ye ramangwana! Ngei tingagara no rugondo rekuti Djehovha acadzadzisa zvipikirhwa izvi? Djehovha aazi kumbosiya kudzadzisa cipikirhwa caakaita. Ndiyo ndaa, tino zvikonzero zvakawanda kuti “tietsere Djehovha.” * (Pis. 27:14) Izvi zvinoreya kuti ticaetsera no mwoyo unononoka kutsamwa uye no mupfaro kuti Djehovha adzadzise zvipikirhwa zvake.—Isa. 55:10, 11.

2. Zvipikirhwa zvipi zvakadzadziswa na Djehovha?

² Kubvira kare Djehovha akapangidza pamhene kuti anodzadzisa zvipikirhwa zvake. Ngationei miezaniso minganani inopangidza izvona. Mu bhuku ra Zvakapangidzwa, Djehovha akagondesa kuti mazuwa ano atiri kurarama, aizobatanidza anhu e pasi rese, e madzinza ese uye e mireketero yese, kuti azomunamate akabatana. Uye nyamasi uno, anhu awona anonyasa kuziikanwa hinga “grupu rakakura.” (Zvak. 7:9, 10) Anhu aona anoumbwa no anarume, anakadzi uye ana e pasi rese uye mireketero yese, kunyazi zvakadaro, aona anoumba mhuri yakabatana ye pasi rese. (Pis. 133:1; Juau 10:16) Anhu anoumba grupu iri rakakura anopeta masimba ari ese pakuparidzira masoko akanaka. Nguwa dzese aona akagadzirira kureketa kuno aya  anoda kupurutana ngezve kariro yawo ye nyika ipsva. (Mat. 28:19, 20; Zvak. 14:6, 7; 22:17) Kana imwimwi mecibatanidzwao pa grupu iri rakakura, zvezvirokwazvo munokoshesa maningi kariro yenyu yekuti zviro zvicagara zvakanaka mune ramangwana.

3. Ngacipi cinangwa ca Sathani?

³ Dhiyabhorosi aadi kuti imwimwi mugare no kariro ye ramangwana. Ndiyo ndaa, cinangwa cake nge ce kumuitisai kuti mutendere kuti Djehovha aamurangaririi uye kuti ayena aazombodzadzisi zvipikirhwa zvake. Kana Sathani akakwanisa kutiitisa kuti titendere kuti atina kariro, zviri nyore katiri kuremba uye kusiya kuseenzera Djehovha. Hinga zvaticaona, Sathani wakaedza kuita kuti Djobo asagare no kariro uye asiye kuseenzera Djehovha.

4. Ticaonei mu fundo ino? (Djobo 1:9-12)

⁴ Mu fundo ino, ticaona kuti Sathani wakaedza kudini kuitisa kuti Djobo asagare munhu wakagondeka kuna Djehovha. (Erengai Djobo 1:9-12.) Ticaonawo kuti tinofundei no muezaniso wa Djobo uye kuti ngei tecidikana kugara no cokwadi cekuti Djehovha anotida uye kuti acadzadzisa zvinangwa zvake.

5-6. Ngazvipi zvakaitika kuna Djobo ke nguwa doko?

⁵ Djobo wainga ano upenyu wakanaka. Iyena waipfara nge kugara no ushamwari we padhuze na Djehovha. Djobo wainga ano mhuri yakakura, yakabatana uye wainga akapfuma maningi. (Djobo 1:1-5) Asi iyena wakaruza zvese zvaainga anazvo pa zuwa rimwe basi. Iyena wakatanga kuruza zviro zvese zvaainga anazvo zvekunyama. (Djobo 1:13-17) Pedzepo, ana ake ese akafa. Cimborangarirai kuti izvona zvakabata-bata kudini Djobo. Abereki anorhwadziwa maningi paanofirhwa no umwe we ana awo. Hino rangarirai kuti Djobo no mukadzi wake akarhwadziwa kudini uye kutsukwara kaakaita paakaziiswa kuti ana awo gumi afa. Ndiyo ndaa, tinokwanisa kuzwisisa cikonzero cakaita kuti Djobo amwese macira ake uye aburukute pasi!—Djobo 1:18-20.

⁶ Mumasure me izvi, Sathani wakabata-bata uthongo wa Djobo. Iyena wakaita kuti Djobo arhware nhenda yaiita kuti anhu anyanyaswe naye. (Djobo 2:6-8; 7:5) Zviro izvona pazvainga zvisati zvaitika, Djobo waireremedzwa maningi no anhu e mu mutanha waaigara. Anhuwo aitouya koomukumbira mazano. (Djobo 31:18) Asi paainga oosongana no matambudziko aya, ese ainga asikacamukhwedereri. Iyena wairambwa no hama dzake, shamwari dzake uye no aseenzi ake!—Djobo 19:13, 14, 16.

7. (a) Djobo wairangarira kuti waitambudzika nge cikonzero cipi, asi iyena aazi kuitei? (b) Mukristu ungabatana ne miyedzo ipi yakafanana ne mufanikiso unobatanidza ndima 7?

⁷ Sathani waida kuti Djobo atendere kuti matambudziko ese aaisongana nawo, kainga kuri kupanicwa na Djehovha. Ngo muezaniso, Sathani wakaseenzesa dutu rinosimba kuti rihidhise nyumba yainga ino ana a Djobo ecirhya. (Djobo 1:18, 19) Sathani wakaita kuti muriro umbwere wecibva kudenga kuti utsakatise mabira ese a Djobo kutobatanidza no aseenzi ake amweni. (Djobo 1:16) Ngekuti dutu no muriro zvaibva kudenga uye zveciitika hingana zvishamiso, Djobo wakarangarira kuti Djehovha ndiyena ainga eciitisa izvona. Mugumisiro wakhona, Djobo wakarangarira kuti pano ciro caakaita cakaitisa kuti Djehovha agare no shungu. Kunyazi zvakadaro, Djobo aazi kutsamwira Baba ake e kudenga. Iyena wakatendera kuti kana ecitambira zviro zvakanaka zvinobva kuna Djehovha, iyena waidikanawo kutambira zviro zvakashata zvinobva kaari. Ndiyo ndaa, iyena wakati: “Zina ra Djehovha ngarirumbwe recikudzwa.” (Djobo 1:20, 21; 2:10) Kunyazi mumasure mekuti Djobo waruza upfumi, ana uye uthongo wake, iyena wakarumbwa  akagondeka kuna Djehovha. Asi Sathani wainga asati apedza kurhwisa Djobo.

8. Sathani wakaseenzesa mushobo upizve kuti aedze Djobo?

⁸ Sathani wakaseenzesa mushobo umwenizve kuti aedze Djobo. Iyena wakaita kuti shamwari nhatu dzekunyepedzera dza Djobo dzimushore. Anarume aya atatu akabhuya kuti matambudziko ese aisongana na Djobo kainga kuri kupanicwa ngekuti wainga aita zviro zvakashata. (Djobo 22:5-9) Awona akaedza kuita kuti Djobo atendere kuti zviro zvese zvakanaka zvainga zvaizwa na Djobo, Mwari ainga asikazvikoshesi. (Djobo 4:18; 22:2, 3; 25:4) Zvezvirokwazvo, awona ainga ecida kuti Djobo arangarire kuti Mwari ainga asikamudi, ainga asikamurangariri uye kuti kumuseenzera azvibetseri. Masoko aya aikwanisa kuita kuti Djobo asagare no kariro.

9. Cinyi cakabetsera Djobo kuti agare akashinga uye akabamba?

⁹ Cimborangarirai basi. Djobo wakagara pa marota uye ecirhwadziwa maningi. (Djobo 2:8) Shamwari dzake dzekunyepedzera dzecirumbwa dzecimushora, dzecireketa kuti zvese zvaakaita azvibetseri ciro. Zvese zvaiitika kuna Djobo zvaiita hinga mutoro usikathwariki, uye iyena waidikana kushingirira kurhwadziwa kaaiita ne kufirhwa no ana ake. Pakutanga Djobo wairumbwa akanyarara. (Djobo 2:13–3:1) Kana kuri kuti shamwari dza Djobo dzairangarira kuti kunyarara kaiita Djobo cainga ciri cipangidzo cekuti iyena waizosiya Musiki wake, zvezvirokwazvo awona aidzinyepera kuti iyena waizosiya. Pano nguwa yekuti Djobo—pamweni eciita zvekumutsa musoro uye ecinyasa kuringira shamwari idzi dzekunyepedzera—wakaabvunza kuti: “Dakara ndafa, andizosii kugondeka kangu kuna Mwari!” (Djobo 27:5) Cinyi cakabetsera Djobo kuti arumbwe akashinga uye akabamba kunyazi no matambudziko ese aya aaisongana nawo? Kunyazi paiinga ari pamugariro uu unoshupha, iyena aazi kumboruza kariro yekuti Mwari wake ano rudo  acapedza matambudziko ake. Djobo waizviziya kuti, kunyazi iyena akafa, Djehovha aizomumutsa.—Djobo 14:13-15.

10. Zvakaitika kuna Djobo zvinotifundisei?

¹⁰ Zvakaitika kuna Djobo zvinotifundisa kuti Sathani aadikani kutibambidzira kuti tisiye Djehovha uye kuti Djehovha anoziya zvese zviri kuitika katiri. Zvakaitika kuna Djobo zvinotibetsera kuzwisisa zvese zvinobatanidzwa pakugondeka kedu kuna Djehovha. Ticaonawo mafundo atingafunda no muezaniso wa Djobo.

11. Kana tikarumbwa tecigonda Djehovha, ticagara no rugondo ripi? (Tiyago 4:7)

¹¹ Djobo wakapangidza kuti kana tikarumbwa tecigonda Djehovha, ticakwanisa kushingirira muedzo upi hawo uye ticawina pakurhwisana na Sathani. Mugumisiro wakhona ngaupi? Bhaibheri rinotigondesa kuti Dhiyabhorosi ucatitiza.—Erengai Tiyago 4:7.

12. Kutenda mu rumuko kakabambisa kudini Djobo?

¹² Tinodikana kubatisisa kariro ye rumuko. Hinga zvatakaona mu fundo yakadarika, Sathani unoseenzesa kuthya kedu kufa kuitira kuti tisiye kugonda na Djehovha. Sathani wakabhuya nge zva Djobo eciti iyena waizoita ciro cipi haco kuti aponese upenyu wake, kutobatanidzawo kusiya kugondeka kake kuna Djehovha. Asi zvezvirokwazvo Sathani wainga ecidzinyepera. Kunyazi Djobo paaiona kuti wainga ari dhuze nokufa, iyena wakarumbwa akagondeka kuna Djehovha. Ciro caibetsera Djobo ndi rugondo rake mu nyasha dza Djehovha uye kuti ayena aizopedza matambudziko ake ese. Djobo wainga anokutenda kekuti kunyazi Djehovha ainga asikazogadziri matambudziko ake pa nguwa iyona, iyena waiziya kuti Djehovha aizowagadzirisa paacazomumutsa mune ramangwana. Djobo wainga anokutenda zvezvirokwazvo mu rumuko. Kana isusuwo tinokutenda kakadaro, apana ciro cipi haco, kutobatanidzawo kuthya kedu kufa kucatiitisa kuti tisiye kugondeka kedu kuna Djehovha.

13. Ngei tecidikana kunyasa kuziya makwanza akaseenzeswa na Sathani kuti aedze Djobo?

¹³ Zvinokosha maningi kuti isusu tinyase kuziya makwanza akaseenzeswa na Sathani kuti aedze Djobo, ngekuti iyena unoseenzesa makwanza amwewo nyamasi uno. Onai kupumha kakaita Sathani: “Munhu [haiwa Djobo basi] ucapasa zvese zvaanazvo eciitira upenyu wake.” (Djobo 2:4, 5) No masoko aya, Sathani waitobhuya kuti isusu atidi maningi Djehovha uye paya pazvinodikanwa atizorangariri kairi katatu kusiya kugondeka kedu kaari kuti tiponese upenyu wedu. Kupinda izvona, Sathani wakabhuya kuti Mwari aatidi uye kuti Ayena aakoshesi kupeta kedu masimba katinonga teciita kuti timupfadze. Asi ngekuti tinonyasa kuziya makwanza anoseenzeswa na Sathani tinogonda Djehovha uye aticengedzwi na Sathani.

14. Miyedzo ingaezaniswa no cinyi? Pasai muezaniso.

¹⁴ Tinodikana kuona miyedzo hinga mukana wekuti isusu tinyase kudziziya. Miyedzo yakasongana na Djobo yakamubetsera kuti iyena aone paainga akarembera uye aite cinjo. Ngo muezaniso, iyena wakaona kuti waidikana kutunhudzira kugara munhu unodzidodosa. (Djobo 42:3) Isusu tingagarawo no mukana wekunyasa kudziziya paya patinosongana no miyedzo. Hama inozwi Nikolay, * yainga ino cinetso ce uthongo uye yakakandwa mukaraboso yakati: “Karaboso yakaita hinga rayo-X, iyona inokwanisa kunyasa kubudisa pamhene mawara e Mukristu.” Mumasure mekuona paya patakarembera, tinodikana kupeta masimba kuti tiite cinjo.

15. Tinodikana kupurutana ani, uye ngei?

 ¹⁵ Tinodikana kupurutana Djehovha, haiwa azondi edu. Djobo wainyasa kupurutana Djehovha paaireketa naye. Mwari akaita kuti Djobo anyase kurangarira ecireketa kuti: ‘Iwewe unonyasa kuziya here kuti i simba rakadini randakaseenzesa kuti ndisike zviro zvse? Ndinonyasa kuziya zvese zvirikuitika mu upenyu wako. Unorangarira kuti inini andikwanisi kukubetsera here?’ Djobo wakadaira ecidzidodosa uye wakatenda maningi nyasha dza Djehovha. Iyena wakati: “Ndaindoita zvekuzwa nge zvenyu, asi zvino ndaakumuonai no madziso angu.” (Djobo 42:5) Djobo wainga ari papi paakareketa masoko aya? Iyena wainga akagara pa marota, muiri wake wakadzara no maronda uye ecirhwadziwa maningi ngekufirhwa no ana ake. Kunyazi zvakadaro, Djehovha akapangidza kuti aida maningi Djobo uye kuti iyena waitenderhwa na Djehovha.—Djobo 42:7, 8.

16. Maererano na Isaya 49:15, 16, tinodikana kuedzurirei patinosongana no miyedzo?

¹⁶ Nyamasi uno, anhu akawanda angakwanisa kutituka uye kutishora. Awona angakwanisawo kuita zviri zvese kuti asvipise muhambiro wedu hinga munhu umwe na umwe kana kuti we sangano redu, uye ‘ecitinyepera zviro zvakashata zvakasiyana-siyana nge’ zvedu. (Mat. 5:11) Zvakaitika mu upenyu wa Djobo, zvinotifundisa kuti Djehovha ano rugondo rekuti isusu ticarumbwa takagondeka patinosongana no miyedzo. Djehovha anotida maningi, uye ayena aazombosii aya anomugonda. (Erengai Isaya 49:15, 16.) Ndiyo ndaa, musikadikani kuteya nzee masoko api hawo anorekethwa no azondi a Mwari! Hama ye ku Turquia inozwi James, iyo yakasongana no  miyedzo yakawanda pamwepo no mhuri yawo, inoti: “Takaona kuti kupurutana manyepo anorekethwa no azondi a Mwari zvaizotiitisa kuti tiwore mwoyo. Takakanda ndangariro dzedu pakariro yedu ye Umambo uye takagara takabatikana pa basa ra Djehovha. Mugumisiro wakhona, takarumbhwa tecipfara.” Kuita hingana Djobo, isusu tinopurutana Djehovha! Manyepo anorekethwa no azondi edu, aakwanisi kupedza kariro yedu.

17. Munofundei no miezaniso ye anarume no anakadzi anorekethwa mu bhuku ra Ahebheru kapituro 11?

¹⁷ Djobo andiyepi basi museenzi wa Djehovha wakarumbwa wakagondeka uye wakabamba paaisongana no miyedzo yakakura. Mu tsamba yaakatarira Ahebheru, muphostori Pauro wakabhuya nge zve anarume akawanda akarumbwa akagondeka uye wakadaidza anarume aya kuti “gore guru re apupuri.” (Aheb. 12:1) Akawanda e anarume aya akabatana no miyedzo yakakura, kunyazi zvakadaro, awona akarumbwa anokutenda muna Djehovha. (Aheb. 11:36-40) Asi kupeta kawo masimba uye basa rakakura raakaita zvakabetsera here? Honde zvakabetsera! Kunyazi hawo asikazi kuona kudzadzika ke zvipikirhwa zva Djehovha, awona akarumbwa akagondeka kaari. Kupinda izvona, aseenzi aya akagondeka kuna Djehovha ainga ano cokwadi cekuti awona akatenderhwa naye. Ndiyo ndaa, awona ainga ano cokwadi cese kuti aizoona zvipikirhwa zva Djehovha zvecidzadzika mune ramangwana. (Aheb. 11:4, 5) Miyezaniso yawo ingatibetsera kuti isusu tirumbwe tecigonda na Djehovha.

18. Munodikana kurumbwa meciitei? (Ahebheru 11:6)

¹⁸ Nyika yatirikurarama nyamasi uno, irikubva pakushata yecienda pakushatisisa. (2 Ti. 3:13) Sathani asati apedza kuedza anhu a Mwari. Zvezvirokwazvo, tinoziya kuti ticasongana no matambudziko akawanda maningi, kunyazi zvakadaro tinodikana kushinga kurumbwa takagondeka kuna Djehovha tecigonda kuti “tinokanda kariro yedu kuna Mwari mupenyu.” (1 Ti. 4:10) Edzurirai kuti Mwari akakomborera kugondeka ka Djobo zvecipangidza kuti “Djehovha ano usisi wakakura uye ano nyasha.” (Tig. 5:11) Tinoda kurumbwa takagondeka kuna Djehovha tinocokwadi cekuti ayena anopasa mubairo “aya anomupsvaka no mwoyo wese.”—Erengai Ahebheru 11:6.