1. а) Иегова биске кандыг идегелди берген? б) Иеговага идегээри дээрге чүү дээни ол? (Тайылбырны көрүңер.)

 ИЕГОВА Аңаа ынак шупту улуска кайгамчык идегелди берген. Удавас Ол аарыг-аржыкты, хилинчек-човалаңны болгаш өлүмнү узуткап кааптар (Ажыд. 21:3, 4). Биче сеткилдиг улус Ооң башкарылгазы-биле бүгү черни сесерлик кылдыр кылыптар (Ыд. ыр. 36:9—11). Ынчан бис Иегова-биле оон-даа быжыг найыралды сайзырадып алыр бис. Ол аазаашкыннарның канчаар күүсеттинип кээрин бодап кээрге, сеткил-чүрээвис дойлуп, хөлзей бээр! Ол бүгү албан бүдер деп чүге бүзүреп болур бис? Чүге дээрге Иегова Бодунуң сөзүнге кезээде ээ болур. А ынчаарга бистиң Аңаа идегээр * шупту чылдагааннарывыс бар (Ыд. ыр. 26:14). Иегованың аазаашкыннарын күүседиптер үени өөрүшкүлүг болгаш шыдамык манаар бис (Иса. 55:10, 11).

2. Иегова аазаашкыннарын албан күүседир деп канчаар бадыткаан?

² Иегова аазаашкыннарын албан күүседир деп бадыткаан. Аңаа хамаарыштыр бир чижекти көрээлиңер. Ажыдыышкын номунда Иегованың аазаашкынын бижип каан. Ол бистиң хүннерде «янзы-бүрү дылдарлыг сөөк-язы, аймак, чон улусту» чыып аар, а олар Аңаа чаңгыс демниг бараалгаар дээн. Ол тускай бөлүктү «мөөң чон» деп адаан (Ажыд. 7:9, 10). Ол бөлүкче делегейниң аңгы-аңгы булуңнарындан янзы-бүрү улус кирип турар-даа болза, олар бот-боттарынга ынак улуг өг-бүле-дир (Ыд. ыр. 132:1; Ин. 10:16). Оон аңгыда, ол чүткүлдүг суртаалчылар кайгамчык келир үе дугайында идегелди өске улуска чугаалаарынга белен (Мф. 28:19, 20; Ажыд. 14:6, 7; 22:17). Чугаажок, ол мөөң чонга хамааржыр болзуңарза, ол идегелиңерни үнелеп турар силер.

3. Эрликтиң сорулгазы кандыг?

 ³ Эрлик Бурганның бараалгакчыларының келир үеже идегелин хунаап алырын күзеп турар. Ооң сорулгазы кандыгыл? Иегова бисти тогбас база Бодунуң аазаашкыннарын күүсетпес деп бодалды ол бистиң бажывысче сиңирерин күзеп турар. Бир эвес идегеливисти ышкыныптар болзувусса, холувусту сула салып, безин Бурганга бараалгавайн барып болур бис. Эрлик Иовту шак ынчаар аажылаан. Иов Иеговага шынчы эвес апаар кылдыр, ол ооң идегелин ышкындырыптарын кыскан.

4. Бо статьяга чүнү сайгарар бис? (Иов 1:9—12).

⁴ Иов Бургандан хая көрнү берзин дээш, Эрлик кандыг арганы ажыглааныл? (Номчуптуңар: Иов 1:9—12.) Иовтуң чижээнден чүнү өөренип ап болур бис? Бурганның ынакшылынга база Ол аазаашкыннарын албан күүседиптер дээрзинге чүге чигзинмес ужурлуг бис? Бо статьяга ол айтырыгларны сайгарар бис.

5, 6. Иов-биле кыска үе дургузунда чүү болган?

⁵ Иов дыка аас-кежиктиг болгаш чедиишкинниг турган. Иегова аңаа аажок ынак чораан. Иов улуг, найыралдыг өг-бүлелиг, хөлчок бай кижи турган (Иов 1:1—5). Ынчалза-даа чаңгыс борбак хүн дургузунда Иов ол бүгүнү ышкыныпкан. Баштай ол акша-хөреңгизин чидирип алган (Иов 1:13—17). Оон ооң шупту ажы-төлү чок апарган. Чаңгыс төл чидирипкен ада-иениң ажыг-шүжүүн кижи сөс-биле дамчыдып шыдавас. А Иов кадайы-биле барык шупту он ажы-төлүн оскунуп алган! Ону дыңнап кааш, олар кайы хире ыглап-сыктап турган деп бодаар силер. Сеткил-хөңнү караңгылап, үнер арга чок байдалга таварышкаш, Иов «качыгдалдан хевин ора тыртып... черже кээп» дүшкен (Иов 1:18—20).

⁶ Оон Эрлик Иовче коргунчуг оюлганнарны чыпшырып каан. Ол бодун чөгенчиг кылдыр санап эгелээн (Иов 2:6—8; 7:5). Өске-даа улус ону хүндүлевес апарган. Ооң мурнунда улус Иовту ханы хүндүлеп, оон арга-сүме айтырар дээш, аңаа кээп турган (Иов 31:18). Ам олар оон дезип эгелээн. Ооң ха-дуңмалары, таныш-көрүштери болгаш бодунуң-на чалчалары ону өскелээр апарган (Иов 19:13, 14, 16).

7. а) Таварышкан бергелеринге Иов кымны буруудадып болур турган, ынчалза-даа ол чүнү кылбаан? б) Чурукту көрүңер. Бурганның бараалгакчызының чуртталгазынга чүү бооп болур?

⁷ Иегова Иовка чүүлзүнмейн турар деп бүзүрей бээр кылдыр, Эрлик кажар арга ажыглаан. Чижээ, Иовтуң ажы-төлү чыглып келгеш турган бажыңче Эрлик улуг хат-шуурганны чоргузупкан (Иов 1:18, 19). Оон ол отту дээрден бадырыпкаш, Иовтуң өшкү-хоюн болгаш кадарчыларын өрттедипкен (Иов 1:16). «Хат биле от дээрден келген болганда, ону Иегова чоргузупкан-дыр. Ынчап кээрге, Бурган менче хорадап турар-дыр» деп, Иов бодап болур турган. Иов ону бодап турган болза, ол дөмей-ле дээрде Адазын каргаваан. Хөй чылдар дургузунда Иегованың ону канчаар йөрээп чораанын ол утпаан. Ынчангаш Иов: «Бургандан чүгле эки чүве хүлээп аар, а багай чүве хүлээп албас улус бис бе?» деп түңнелге келген. Ол мынча дээн: «Ооң [Иегованың] ады алгаг-йөрээлдиг болзун!» (Иов 1:20, 21; 2:10). Эң коргунчуг бергелерге таварышкаш безин, Иов Бурганга шынчы арткан. Ынчалза-даа Эрлик соксаар хире эвес турган.

8. Эрлик улаштыр чүнү кылган?

⁸ Кара сагыштыг Эрлик база бир арганы  ажыглаан. Ол Иовтуң үш таныыр эр кижизин ажыглап, ону дам куду базар дээш кыскан. Олар болган чүүлге Иовтуң бодун буруудадып, ооң бузут-багы аажок улуг, кемниг херектери төнчү чок деп нүгүлдеп турганнар (Иов 22:5—9). Иов дыка хөй буянныг херектерни кылган-даа болза, Бурганга ооң ажыы чок деп бодалды сиңирерин олар кысканнар (Иов 4:18; 22:2, 3; 25:4). Оон ыңай Бурган аңаа ынак эвес, ооң дугайында сагыш човавайн турар, ынчангаш Аңаа бараалгаары кандыг-даа утка чок деп, олар Иовту бүзүредип турган. Ол үш эр улустуң сөстери Иовтуң идегелиниң имистелген сөөлгү одун өжүрүп болур турган.

9. Эрес-дидим болгаш сорук күштүг болурунга Иовка чүү дузалаан?

⁹ Иовка кайы хире берге турганын бодап көрүңер даан. Ол хүлге олуруп алгаш, аарыгдан кедергей хилинчектенип турган (Иов 2:8). Олче бергелер хары угда чүдүрлүп келген. Иов шупту ажы-төлүн чидирип алган болгаш, ооң сеткил-хөңнү карарып, баары ажып турган. Каш хонук дургузунда Иов чүнү-даа ыттаваан. Ооң соонда эштери аттыг улус ону дорамчылап, куду көрүп эгелээн (Иов 2:13—3:1). Ол чүнү-даа ыыттавас боорга, олар Иовту Чаяакчызындан хая көрнү берген деп бодаан чадавас. Ынчалза-даа олар чазып турган. Ынчан Иов бажын көдүргеш, буруудадыкчыларының караанче чиге көрүп алгаш: «Дириг чорааш, буруу чогумдан ойталавас мен!» — деп шиитпирлиг чугаалаан (Иов 27:5). Иов чүге ындыг эрес-дидим, сорук күштүг турган? Ол баш муңгаш берге байдалда безин, идегелинден салдынмаан. Бурган ооң хилинчээн кажан-бир черле соксадыптар база өлүп-даа каар болза, Иегова ону диргизиптер деп, ол бүзүреп турган (Иов 14:13—15).

10. Иовтуң төөгүзүнден чүнү өөренип ап турар бис?

¹⁰ Эрлик бисти Иеговадан ойталаарын күш-биле албадап шыдавас база чүү чүвеге таваржып турарывысты Иегова билир деп, Иовтуң төөгүзү көргүзүп турар. Ам Иовтуң чижээнден кандыг оон өске ажыктыг чүүлдерни өөренип ап болурувусту сайгарыптаалыңар.

11. Иеговага соксаал чок ынаныр болзувусса, чүү чүвеге бүзүреп болур бис? (Иаков 4:7).

¹¹ Бир эвес Иеговага соксаал чок ынаныр болзувусса, кандыг-даа шенелдени ажып эртип, Эрликке удур туржуп шыдаар бис деп, Иовтуң чуртталгазы бадыткап турар. Ынчан, Библияда чугаалааны дег, Эрлик бистен дезе бээр. (Номчуптуңар: Иаков 4:7.)

12. Диргизиишкинге идегел Иовту канчаар быжыктырган?

¹² Диргизиишкинге быжыг бүзүрээр ужурлуг бис. Эрткен статьяда сайгарып көргенивис дег, Эрлик бистиң өлүмден ала чайгаар коргуушкунувусту Бургандан хая көрнү бээр кылдыр, биске удур ажыглап турар. Амы-тынын камгалап аар дээш, Бургандан безин хая көрнү бээринге белен деп, Эрлик Иовту буруудадып турган. Ынчалза-даа Эрликтиң чугаазы көк меге болган. Шыдажыр аргажок, берге үелерде, безин өлүр деп баргаш, Иов Иеговага шынчы арткан. Ооң Бурганы ачы-буянныг болгаш шупту чүвени эдип шыдаар деп, Иов ыяк бүзүреп турган. Ол чүүл Иовту быжыктырган. Дириг турда, Иегова аңаа дузалавас-даа болза, дөмей-ле келир үеде ону диргизиптер деп, Иов билир турган. Ол диргизиишкинге сеткилинден бүзүреп турган. Бис база диргизиишкин албан болур деп ыяк бүзүрээр болзувусса, бисти өлүрерин кыжанза-даа, Иеговадан черле хая көрүнмес бис.

13. Эрликтиң кажар аргазын билип алыры чүге чугула?

¹³ Амгы үеде Эрлик шак ындыг арганы ажыглап турар болганда, ону эки билип алыр ужурлуг бис. Эрлик бисти чүү деп буруудадып турар-дыр эскерип көрүңер даан: «Амы-тыны дээш кижи [чүгле Иов эвес] бодунда бар-ла чүвени бериптер» (Иов 2:4, 5). Өскээр чугаалаарга, Эрлик бисти Иеговага ынак эвес база берге үеде Оон хая көрнү бээр бис деп чугаалап турар. Бурган биске ынак эвес база Ону канчап-даа өөртүп шыдавас бис деп, Эрлик нүгүлдеп турар. Эрликтиң сорулгаларын эки билир болганывыста, ооң мегезинге кажан-даа бүзүревес бис.

14. Шенелделер биске чүнү билип алырынга дузалап болур? Чижектен чугаалаңар.

¹⁴ Шенелделер үезинде бодувусту эки билип ап болур бис. Иовтуң таварышкан айыыл-халаптары аңаа бодунуң четпес талаларын көрүп кааш, эдип алырынга дузалаан. Чижээ, ол бодунда биче сеткилдиң чедишпезин билип каан (Иов 42:3). Бис база бергелерге таварышкаш, бодувустуң дугайывыста оон хөйнү билип ап болур бис. Николай * дээр акывыстың кадыы багай-даа болза, ону кара-бажыңга олуртуп каан. Ол мынча дээн: «Кара-бажың кижиниң иштики бүдүжүн тода көргүзүп турар рентгенге дөмей». Бис кошкак талаларывысты тодарадып алгаш, оларны эдип ап болур бис.

15. Кымның сөстерин дыңнаар ужурлуг бис база чүге?

¹⁵ Бис дайзыннарывыстың эвес, а Иегованың чугаазын дыңнаар ужурлуг бис. Кажан Бурган Иов-биле чугаалажып турда,  ол Ону кичээнгейлиг дыңнап турган. Иегова Иов-биле мынчаар чугаалажып турган чадавас: «Мээң чаяалгаларымны топтап көр. Күчү-күжүмнү көрбейн тур сен бе? Сээң-биле чүү болуп турарын дыка эки билир Мен. Мен сени кагбаан Мен, бүзүреп көр». «Сээң дугайыңда мооң мурнунда чүгле дыңнап турган мен, а ам карактарым Сени көрүп тур» — дээн Иовтуң биче сеткилдиг харыызындан Иегованың ачы-буяны дээш өөрүп четтирип турганы көскү (Иов 42:5). Иов бо сөстерни чугаалап тургаш, хүлге хевээр олурган чадавас. Ооң эът-кежи оюлганнар-биле шыптынган, а чүрээ чок апарган ажы-төлү дээш кажыыдап турган. Иовтуң байдалы өскерилбээн-даа болза, Иегова ону ынакшылынга болгаш деткимчезинге бүзүреткен (Иов 42:7, 8).

16. Шенелделер үезинде чүнүң дугайында сактыр болза эки? (Исайя 49:15, 16).

¹⁶ Амгы үеде чамдык улус биске хүндүткел чок хамаарылгалыг. Олар бистиң эки адывысты карартып, организациявысты бак атка киирер дээш, бистиң дугайывыста нүгүл-хопту тарадып турар (Мф. 5:11). Ынчалза-даа кандыг-даа шенелделерде бистиң Аңаа бердинген артарывыска Иегова бичии-даа чигзинмейн турар деп Иовтуң төөгүзүнден көскү. Дээрде Адавыс биске ынак база Аңаа идегеп чоруур улусту кажан-даа кагбас. (Номчуптуңар: Исайя 49:15, 16.) Бурганның дайзыннары бистиң дугайывыста нүгүлдү тарадып турар. Ол мегени угааныңарже кажан-даа киирбеңер! Турциядан Джеймстиң өг-бүлези шак ындыг шенелдени эрткен. Ол мынча  деп үлешкен: «Бир эвес Бурганның чонунуң дугайында мегени дыңнап туруп бээр болзувусса, сузувус бастына бээр деп билип каан бис. Ынчангаш Иегованың берген идегелинден карак салбайн, чүткүлдүг суртаалдап турган бис. Ол биске өөрүшкүлүг артарынга дузалаан». Бис Иовту өттүнүп, Иегованы дыңнап турар бис. Дайзыннарывыстың кандыг-даа сөстери идегеливисти ышкындырып шыдавас.

17. Еврейлерге 11-ги эгеде бижээн Бурганга шынчы улустуң чижээнден чүнү өөренип алдыңар?

¹⁷ Эрес-дидим чоруун чидирбейн, эң-не берге байдалдарда безин, Иеговага шынчы арткан улус эвээш эвес. Оларның дугайында Павел элчин: «Бисти хүрээлээн, бүзүрелди херечилээн хөй улустуң хөйүн көрбес силер бе?!» — деп бижээн (Евр. 12:1). Ол бердинген улус берге шенелделерни ажып эртип, Бурганга шынчы чоруун кадагалап алган (Евр. 11:36—40). Олар хей черге кыскан бе? Чок! Дириг чорааш, олар Бурганның аазаашкыннарын көрбээн-даа болза, дөмей-ле Аңаа сеткилинден ынанып турган. Иегова оларга чүүлзүнүп турар болгаш, аазаашкыннарын албан күүседир деп, олар билип турган (Евр. 11:4, 5). Оларны өттүнүп, бис база Иеговага идегээрин соксатпас бис.

18. Чүнү кылырынче хөөнненип алдыңар? (Еврейлерге 11:6).

¹⁸ Кижилер хүнден хүнче дорайтап бар-ла чыдар (2 Тим. 3:13). Эрлик Бурганның бараалгакчыларынче халдавышаан хевээр. Ынчангаш дыка хөй шенелделерге таваржып болур бис. Ындыг-даа бол, «дириг Бурганга» идегеп чоруур бис (1 Тим. 4:10). Ынчангаш күжүвүстү харамнанмайн, Аңаа долузу-биле бараалгаалыңар! Иовтуң алган шаңналы «Дээрги-Чаяакчы аажок өршээлдиг болгаш кээргээчел» деп бисти бүзүредип турар (Иак. 5:11). Иов ышкаш, Бурганга бердинген болуулуңар. Иеговаже «чүткүп чоруур улуска Ооң шаңналы турар» деп кажан-даа чигзинмээлиңер! (Номчуптуңар: Еврейлерге 11:6.)