STÙDIO 27
“Speta in Geovà”
“Speta in Geovà. Sìpia coraioso e forte de cuor.” — SAL. 27:14.
CÀNTICO 3 Geovà, me forsa, confiansa e speransa
COSSA CHE NDAREMO IMPARAR? *
1. (a) Che bela speransa Geovà el ne dà? (b) Cossa vol dir “spetar in Geovà”? (Vedi “Par capir meio”.)
GEOVÀ el ga dato una bela speransa a tuti quei che i lo ama. Par esémpio, suito lu el ndarà finir cole malatie, cola tristessa e cola morte. (Apo. 21:3, 4) Lu el ndarà giutar i so servi a far dela Tera un paradiso. (Sal. 37:9-11) In Paradiso, gavaremo una amicìssia con Geovà ancora pi forte de quela che ghemo ancoi. Che bela speransa che ghemo par el futuro! Parché che podemo esser sicuri che Geovà el ndarà far quel che el ga dito? Parché Geovà sempre el ga fato quel che el ga prometesto. Alora, podemo pròpio “spetar in Geovà”. * (Sal. 27:14) Cossa che vol dir “spetar in Geovà”? Spetar contenti e con passiensa la ora che lu el ndarà far quel che el ga prometesto par el futuro. — Isa. 55:10, 11.
2. Che promessa Geovà el ga belche realisà?
2 Geovà el ga belche mostrà che el fà quel che el promete. Ndemo veder un esémpio. Nel libro de Apocalisse, Geovà el gavea belche dito che el ndaria riunir “una mùcia de gente” de tute le nassion par adorarlo in union. (Apo. 7:9, 10) Intrà questa mùcia de gente, ghen’è òmini, done e tosatei de tuto el mondo. (Sal. 133:1; Gioani 10:16) Lore le fà el so meio par predicar le bone notìssie e le ze pareciade par parlar ai altri sora la speransa de un mondo meio. (Mat. 28:19, 20; Apo. 14:6, 7; 22:17) Te fè parte de questa mùcia de gente? Alora, te dè tanto valor ala bela speransa che te ghè par el futuro.
3. Cossa che Sàtana el vol che femo?
3 El Diaol no’l vol che te gàpia una speransa par el futuro. Par quela, lu el vol farne creder che Geovà no’l se preocupa con noantri e che no’l ndarà far quel che el ga prometesto. Se noantri credemo in Sàtana, ndaremo desanimar e assar de servir a Geovà. Adesso, ndaremo veder come el Diaol el ga proà desanimar a Giò e fermarlo de servir a Geovà.
4. Cossa che ndaremo veder in questo stùdio? (Giò 1:9-12)
4 In questo stùdio, ndaremo veder come che Sàtana el ga proà intrigar a Giò de esser leal a Geovà. (Ledi Giò 1:9-12. *) Ndaremo anca veder cossa podemo imparar del esémpio de Giò, e parché che l’è importante esser sicuri che Geovà el ne ama e che el ndarà far quel che el ga prometesto.
EL DIAOL EL PROA DESANIMAR GIÒ
5-6. Cossa che ga sucedesto de colpo con Giò?
5 Giò el gavea una vita tanto bona parché lu l’era amigo de Geovà, l’era tanto sior e el gavea una fameia granda e felice. (Giò 1:1-5) Ma el ga perso quasi tuto quel che el gavea nte un sol giorno. Prima, le ze morte tute le so bèstie. (Giò 1:13-17) Dopo, anca i so diese cari fioi i ze morti. Proa pensar come questo l’è stà un bruto colpo par Giò. Se i genitori i resta tanto disgustadi quando i perde un fiol, imagina come Giò e la so dona i se ga sentio de perder tuti i so fioi. Alora, semo boni de capir parché che Giò el ga sbregà le so robe e el se ga trato in tera quando el ga savesto che i so diese fioi i era morti! — Giò 1:18-20.
6 Dopo, el Diaol el ga fato che Giò el gavesse una bruta malatia che ghe fea schifo ale persone. (Giò 2:6-8; 7:5) Vanti che Giò el restesse malà, le persone le ghe domandea consili e lo rispetea tanto. (Giò 31:18) Ma dopo che lu l’è restà malà, i so fradei, i so amighi e i so servi gnanca no i rivea pi darente de lu. — Giò 19:13, 14, 16.
Tanti fradei e sorele i ga infrontà tante dificoltà. Lori i capisse quel che Giò el ga sentio (Vedi el paràgrafo 7.) *
7. (a) Cossa che Giò el pensea sora el so sofrimento e cossa che no’l ga fato? (b) De acordo cola ilustrassion, cossa che pol suceder coi servi de Geovà?
7 El Diaol el volea che Giò el pensesse che Geovà l’era drio farlo sofrir. Alora, lu el ga fato un forte vento trar do la casa ndove i diese fioi de Giò i era drio magnar insieme. (Giò 1:18, 19) Lu anca el ga fato vegner do fogo del cielo par copar le bèstie de Giò e i òmini che i era drio tenderle. (Giò 1:16) Come el vento e el fogo i ze vegnesti del cielo, Giò el ga pensà che l’è stà Geovà che el gavea fato quele robe. Fursi Giò el ga pensà che Geovà l’era disgustà con lu. Anca cossita, lu el ga seità leal a Dio e no l’è restà inrabià con lu. Giò el ga pensà che se lu l’era restà contento de ricever le robe bone de Dio, el gavea de acetar anca le robe rugne. Par quela el ga dito che el ‘nome de Geovà el seitesse a esser lodà’. (Giò 1:20, 21; 2:10) Alora, Giò el ga seità a esser leal anca dopo de perder quel che el gavea, i so servi, i so fioi e la so salute. Ma Sàtana no’l se ga fermà de farlo sofrir.
8. Che nantra roba el Diaol el ga fato contra Giò?
8 El Diaol el ga doperà anca nantra roba par proar intrigar Giò de esser leal a Geovà. Lu el ga doperà tre òmini che i ga fato finta de esser amighi de Giò par farlo pensar che no’l gavea valor. Questi òmini i ghe ga dito che quel che l’era drio infrontar l’era un castigo de Dio. (Giò 22:5-9) Lori i volea che Giò el credesse che anca se el gavesse fato robe bone, Dio no’l ghe dea valor. (Giò 4:18; 22:2, 3; 25:4) Lori i volea che Giò el pensesse che Geovà no lo amea, no’l se preocupea con lu e che no’l gavea de sforsarse par servirlo. Quel che lori i ga dito a Giò podea farlo pensar che le robe mai le ndaria restar meio.
9. Cossa che ga giutà Giò a gaver forsa e coraio?
9 Proa imaginar Giò sentà do nele sendre con tanto dolor in tuto el corpo. (Giò 2:8) Quei òmini che i fea finta de esser so amighi i seitea a dirghe che lu no l’era una bona persona e che quel che lu el gavea fato l’era sensa valor. Sicuro che quel che Giò l’era drio infrontar l’era tanto fadiga de portar avanti. E lu el gavea ancora de dàrghene fora col sofrimento par via dela morte dei so cari fioi. Nel scomìnsio, Giò el ga sol scoltà quei tre òmini. (Giò 2:13–3:1) Pol esser che quei òmini i gàpia pensà che Giò el gavea tasesto parché l’era drio abandonar el so Creador. Ma lori i era sbaliadi parché Giò el ghe ga dito che el ‘seitaria leal fin morir’! (Giò 27:5) Cossa che lo ga giutà a gaver forsa e coraio anca se l’era drio sofrir tanto? Seitar a fidarse che Geovà el ndaria finir fora col so sofrimento. Lu el savea che anca se el morisse, Geovà el ndaria ressussitarlo. — Giò 14:13-15.
COME CHE PODEMO FAR COMPAGNO A GIÒ?
10. Cossa che imparemo con quel che ga sucedesto con Giò?
10 Quel che ga sucedesto con Giò ne insegna che el Diaol no’l pol farne abandonar a Geovà e che Geovà el vede tuto quel che sucede con noantri. La stòria de Giò anca la ne giuta a capir meio come che podemo esser leai a Geovà. Adesso, vedemo arquante altre robe che podemo imparar del esémpio de Giò.
11. De cossa podemo esser sicuri se noantri seitemo a fidarse in Geovà? (Tiago 4:7)
11 Giò el ga mostrà che se noantri se fidemo in Geovà, semo boni de infrontar le dificoltà e meterse contra el Diaol. E cossa che ndarà suceder se lo femo? La Bìblia la ne assa sicuri che el Diaol el ndarà scampar via de noantri. — Ledi Tiago 4:7. *
12. Come che la speransa dela ressuression ga giutà Giò a seitar a esser leal?
12 L’è tanto importante gaver una forte fede nela ressuression. Parché? Parché come ghemo visto nel stùdio dela stimana passada, el Diaol el dopera la paura de morir che fursi ghemo par farne desobedir a Geovà. Come savemo, el Diaol el pensea che Giò el ndaria far de tuto par no morir, anca fermarse de servir a Geovà. Ma el Diaol l’era sbalià parché anca quando Giò el pensea che ndaria morir el ga seità leal a Geovà. Cossa che lo ga giutà a farlo? Fidarse nela bontà de Geovà e che el ndaria finir col so sofrimento. Lu l’era sicuro che anca che el morisse, Geovà lo ressussitaria nel futuro. Giò no’l gavea gnanca un dùbio che la ressuression la ndaria suceder. Alora, se la nostra speransa nela ressuression la ze forte come quela de Giò, la paura dela morte e gnanca qualche altra roba le ndarà fermarne de servir a Geovà.
13. Parché che l’è tanto importante saver che tràpole el Diaol el ga doperà contra Giò?
13 L’è tanto importante saver quel che el Diaol el ga fato contra Giò parché lu el dopera le medèsime tràpole par proar farne desobedir a Dio. Savemo che el Diaol le dopera anca contra noantri parché el ga dito: “El omo [nò sol Giò] el darà tuto quel che el ga par salvar la so vita.” (Giò 2:4, 5) Alora, el Diaol el vol dir che noantri no amemo a Geovà e che ndarissino far de tuto par salvar la nostra vita. Lu el vol anca dir che Geovà no’l ne ama e che no’l vede quel che femo par contentarlo. Ma el Diaol no l’è bon de imbroiarne parché se fidemo in Geovà e belche cognossemo le so tràpole.
14. Cossa che podemo far quando infrontemo dificoltà?
14 Quando infrontemo una dificoltà, semo boni de veder le robe che podemo far meio e quele che ghemo de cambiar. Le dificoltà che Giò el ga infrontà lo ga giutà a veder che el gavea de cambiar arquante robe. Par esémpio, lu el ga visto che el gavea de esser pi ùmile. (Giò 42:3) Anca noantri podemo doperar le dificoltà che infrontemo par veder quel che ghemo de cambiar. Varda el esémpio del fradel Nikolay. * Lu el gavea tanti problemi de salute quando l’è stà metesto in preson. Lu el ga dito sora quel che l’era drio infrontar: “Queste dificoltà le me ga giutà a veder quel che me tochea cambiar e che altre qualità me ocorea gaver.” Alora quando semo boni de capir quel che ghemo de cambiar, podaremo anca sforsarse par farlo.
15. A chi che ghemo de scoltar, e parché?
15 Nantra roba che imparemo con Giò l’è che ghemo de scoltar a Geovà e nò ai nostri nemighi. Giò el ga scoltà con atension quando Geovà el ga parlà con lu. Geovà el ghe ga dito che el gavea doperà tanto poder par far tuto quel che ghen’è. Geovà anca lo ga assà sicuro che el savea de quel che l’era drio suceder con lu e che l’era bon de tenderlo. Giò el ga rispondesto a Geovà: “Go scoltà parlar de ti, ma adesso te vedo coi me oci.” (Giò 42:5) Con queste parole, Giò el ga mostrà che l’era ùmile e che el ghe dea tanto valor ala bontà de Geovà. Quando el ga dato questa risposta a Geovà, fursi lu l’era sentà do nele sendre, col corpo pien de bruschi e drio sofrir tanto cola morte dei so fioi. Anca cossita, Geovà el ga parlà che lo amea e che l’era tanto contento con lu. — Giò 42:7, 8.
16. De acordo con Isaia 49:15, 16, cossa che ghemo de ricordarse quando infrontemo dificoltà?
16 Ancoi, tante persone le ne dise su e le ne trata tanto mal. Arquante le dise anca busie sora noantri e sora la organisassion de Geovà. (Mat. 5:11) Quel che ga sucedesto con Giò ne insegna che Geovà el se fida che ndaremo seitar leai a lu anca quando infrontemo dificoltà. Geovà el ne ama tanto e mai el ndarà abandonarne se noantri se fidemo in lu. (Ledi Isaia 49:15, 16. *) Alora, no stà mia scoltar le robe rugne che i nemighi de Dio i parla. El fradel James dela Turchia e la so fameia i ga infrontà arquante dificoltà. Lu el ga dito: “Ghemo capio che se scoltessino le busie che i altri i dise dei servi de Dio, ndarissino restar desanimadi. Par quela, ghemo dessidio pensar sora le promesse del Regno de Dio e seitar a far el laoro che Geovà el ne ga dato. Cossita, semo stati boni de seitar contenti.” Alora, come Giò, volemo scoltar a Geovà! Cossita, le busie che i nemighi de Dio i conta no le ndarà farne perder la speransa.
LA NOSTRA SPERANSA LA NE DÀ FORSA E CORAIO
Geovà el ga benedio Giò parché l’è stà leal. Lu e la so dona i ga bio una vita tanto felice (Vedi el paràgrafo 17.) *
17. Cossa che te ghè imparà coi bei esempi che ghen’è in Ebrei capìtolo 11?
17 Giò l’e stà un dei servi de Dio che el ga bio forsa e coraio par infrontar le dificoltà. Ma nela so carta ai ebrei, el apòstolo Paolo el ga dito che una “mùcia de testimònie” le ze state fedele. (Ebr. 12:1) Questi fradei i ze stati leai a Geovà anca che i gàpia infrontà brute dificoltà. (Ebr. 11:36-40) Sarà che lori i ga bio benedission par via del so laoro e lealtà? Sicuro che si! Anca che lori no i gàpia visto le promesse de Geovà realisarse, lori i ze stati boni de seitar a fidarse in lu. Lori i era anca sicuri che i ndaria veder le promesse de Geovà realisarse nel futuro, e che lu l’era contento col laoro che i fea. (Ebr. 11:4, 5) El bel esémpio de questi servi fedeli el ne giuta a fidarse ancora de pi in Geovà.
18. Cossa che volemo far? (Ebrei 11:6)
18 Savemo che ancora ndaremo infrontar brute dificoltà parché questo mondo l’è cada volta pedo e el Diaol ancora el vien contra noantri. (2 Tim. 3:13) Ma volemo seitar leai e a esser sicuri che quel che Geovà el ga prometesto ndarà realisarse. (1 Tim. 4:10) Geovà el ga benedio tanto a Giò parché lu l’è stà leal. Questo el mostra che Geovà el ga tanta compassion e l’è misericordioso. (Tiago 5:11) Alora, compagno a Giò, volemo seitar a esser leai a Geovà e cada volta pi sicuri che lu el ndarà benedir quei che i fà sforso par ndar in serca de lu. — Ledi Ebrei 11:6. *
CÀNTICO 150 Ndé in serca de Geovà par esser salvi
^ Sicuro che se ricordemo de Giò quando pensemo in persone che le ga infrontà tante dificoltà nela vita. Cossa che podemo imparar del so esémpio? Imparemo che el Diaol no l’è bon de fermarne de servir a Geovà e che Geovà el sa de tuto quel che sucede con noantri. E imparemo che Geovà el ga finio col sofrimento de Giò e che suito el ndarà finir anca col nostro. Alora se mostremo che semo sicuri che queste robe le ndarà suceder, saremo intrà de quei che i “speta in Geovà”.
^ PAR CAPIR MEIO: La parola speransa in ebraico la vol dir esser tanto premoso che una roba la suceda, o fidarse in qualchedun. — Sal. 25:2, 3; 62:5.
^ (Giò 1:9-12) Alora Sàtana el ga rispondesto a Geovà: “L’è par gnente che Giò teme a Dio? 10 No te ghè metesto un muro de protession intorno de lu, intorno dela so casa e intorno de tute le robe che lu el ga? Te ghè benedio el laoro dele so man e le so bèstie le se ga spaià ntela tera. 11 Ma adesso, mete la to man sora tuto quel che el ga, e sicuro che el te maledirà ntela to fàcia.” 12 Alora Geovà el ga dito a Sàtana: “Eco! Te pol far quel che te vol con tuto quel che el ga. Ma no stà mia tocarlo. Alora Sàtana l’è ndato via de davanti de Geovà.
^ (Tiago 4:7) Alora, aceté la autorità de Dio, ma meteve contra el Diaol e lu el scamparà via de valtri.
^ Arquanti nomi i ze stati cambiadi.
^ (Isaia 49:15, 16) Sarà che una dona la pol desmentegarse del so bambin, e no gaver compassion par el fiol che ela la ze drio spetar? Anca se queste done le se desmenteghesse, mi mai me desmentegaria de ti. 16 Varda! Go scrito el to nome nela palma dele me man. Le to muràlie le ze sempre davanti de mi.
^ (Ebrei 11:6) Sensa fede no se pol contentar a Dio. Parché quei che i riva darente de lu i ga de creder che lu el esiste e che el ricompensa quei che i fà sforso par ndar in serca de lu.
