1. (a) Yooweherera heeni Yehova onivanhaawe? (b) Ontaphulela eheeni “onweherera Yehova”? (Nwehe “Enoota.”)

 YEHOVA ohaavaha yooweherera atthu ootheene ale ammusivela. Moohipisa, owo onkela omaliha iretta, oriipiwa murima ni okhwa. (Apok. 21:3, 4) Owo onkela waakhavihera “anaxariya” weera etatuxe elapo ela okhala eparadiso. (Nsal. 37:9-11) Elapo enyowani, hiyo ninkela okhalano onthamwene woolipa ni Yehova, onthamwene yoowo wootepa oreera opwaha ola ninkhalannaahu olelova. Mweekhaikhai, nookhalano yooweherera yootepa oreera ya muhoolo! Mwaha wa heeni ontthuneyaawe ororomela weera soolahera iya sinookwaniheriwa? Mwaha wooweera, khiyaavo etthu Yehova ehikwaniheriwa. Mwa yeeyo, nookhalano mathowa mantxipale anneriha “omuroromela Yehova.” * (Nsal. 27:14) Eyo entaphulela weera, ninkela onweherera Yehova moopixa murima ni moohakalala.—Yes. 55:10, 11.

2. Yoolanhera heeni Yehova okwanihenraawe?

² Yehova ohoonihera moota okwanihenraawe itthu. Nroowe noone ntakihero na yeeyo. Eliivuru ya Apokalise, Yehova aalanhera weera mahuku ahu ala, owo amwaathukumanya atthu a mahimo ootheene, muulumo ootheene yaawo yera emukokhoreleke moowiwanana. Atthu awo oothanleya ansuweliwa okhala “muloko mutokotoko.” (Apok. 7:9, 10) Atthu awo annapakela eparte anamwane, asilopwana, asithiyana, ni atthu a elapo yootheene ni muulumo oovirikana, mene nnamweera varene hiiho, atthu awo toowiwanana. (Nsal. 133:1; Yoh. 10:16) Atthu awo aneerela eparte muloko mutokotoko annilaleya mittheka sa Omwene moowiilipihera. Awo ari oolikaneene weera yuulume  ni atthu antthuna wiiwa masu a yooweherera yooreera ya elapo yooreera. (Math. 28:19, 20; Apok. 14:6, 7; 22:17) Waari weera nyuwo mumpakela eparte muloko mutokotoko, mweekhaikhai munnaroromela weera itthu sinkela otxentxa muhoolo.

3. Teevi eri yootthuna ya Satana?

³ Satana khantthuna weera nyuwo mukhalane yooweherera ya muhoolo. Mwa yeeyo, yootthuna awe eri yooweera muupuweleke weera Yehova khanoopwatthani. Nave-tho, weera owo khankela okwanihera soolanhera sootheene ororomelinhaawe. Wakhala weera Satana ononiwera onoototha ninkela okhulumuwa ni ohiya onvarela muteko Yehova. Antoko ninkelaahu woona, Satana aamwerera Yobi weera ahiye onvarela muteko Yehova.

4. Eheeni ninkelaahu woona mpuwa mwa yoosomene yeela? (Yobi 1:9-12)

⁴ Yoosomeene ela, ninkela woona moota Satana erenraawe omotxeeliha Yobi weera ahiye onvarela muteko Yehova. (Mmusome Yobi 1:9-12.) Nave, ninkela woona ele ninxutteraahu ni ntakihero na Yobi ni mwaha wa heeni ontthuneyaaya ororomela weera Yehova onokwanihera soolanhera sawe.

5-6. Okaphila ni oweha, yaakhumelenle heeni mwekumini mwa Yobi?

⁵ Yobi aakhalano ekumi yootepa oreera. Nave aakalano onthamwene wooreera ni Yehova. Aakhalano etthoko etokotoko nave, yoowirana opwaha mwa yeeyo, owo aari riiku. (Yobi 1:1-5) Mene nto, okaphila ni oweha owo aalusa itthu sootheene, wupatxerani owo alunse itthu akhalannaawe. (Yobi 1:13-17) Woottharana, anamwane oothene owo aasivelaawe yahookhwa. Nkuupuwelani moota waaraaya yooxupa. Muupuwele-tho weera, paapa omuyelela mwanaawe mmoha, anamwane awe anhala ankhala ooxupeya. Vaano nkupuwelani oriipiwa murima wa Yobi ni amwariye waaphwannye vaavo yiiwalaya weera anamwane aya oomuloko (10) yahookhwa. Tivawonto, Yobi aakhalano erazau vaavo iixupurunxaawe vathi iwakaru okhwa wa anamwane awe oomuloko!—Yobi 1:18-20.

⁶ Woottharana, Satana aamuwiiheera Yobi eretta, aani aamutannyera eretta yootepa onanara yeeyo yaawettiha atthu museru. (Yobi 2:6-8; 7:5) Yobi ehinaakuveene omphwanya eretta ele, aari oottittimihiwa ni atthu ootheene yaakhala elapo ele nave atthu awo yannawa onvekela miruku. (Yobi 31:18) Mene nto, itthu saapatxera otxentxa ni atthu yaapatxera omuthanya. Aapatxera othanyiwa ni axinnawe, anamuteko awe ni mpaka asinthamwene awe!—Yobi 19:13, 14, 16.

7. (a) Eheeni yaamupuweleliha Yobi ni maxupo yamphwanya, ni owo aakhontte opaka eheeni? (b) Moonelo anyu, maxupo heeni enlikana ni a Yobi ni amwaariye ntoko enooniheraaya efootu, eneera emukhumeleleke mukristu olelo va?

⁷ Satana uupuwela weera Yobi, uupuweleke weera maxupo ootheene ale yakhumiheriwa ni Yehova. Satana ahaproveitaari weera, epheyo yeeyo yoopa weera ekumule empa yaari anamwane a Yobi yaawo yaatxa wamoha. (Yobi 1:18, 19) Satana aapakiha weera okhuruwe mooro wirimu yoowo wiivale inama wamoha ni anamuteko awe. (Yobi 1:16) Mwaha wooweera mooro ole wakhurunwe wirimu ni etthu ele kheneereye, Yobi uupuwela weera etthu ele aapanke Yehova. Owo ahuupuwela weera itthu iye saamukhumelenle owo aromunyoonyiha Yehova. Nnaamwera itthu iye saamukhumelenle, owo khaahiñye onvarela muteko Yehova. Owo ahuupuwela weera vaavo aakhulelaawe itthu sooreera avahiwaawe ni Yehova, owo-tho, amwaakhulela itthu soonanara seera simukhumelele. Tivawonto owo enraawe: “Nittottopeliwe nsina na Yahvéh.” (Yobi 1:20, 21;  2:10) Nnamweera Yobi aalunse itthu sootheene akhalannaawe, anamwane awe nave ekumi awe yaahomeñyeene, aavirelela okhala oororomeleya wa Yehova, ni Satana aavirelela omuhasula.

8. Etthu heeni ekina Satana avarihenlaawe muteko weera amuhasule Yobi?

⁸ Satana aapaka etthu ekina weera amuhasule Yobi. Owo ahavarihela muteko alopwana araru yaawo yootherera weera yaari asinthamwene awe, yaawo yeera emmalihe miruku. Awosa yannahima weera, Yobi annaviriha maxupo ootheene ehimaka weera, amuttaruxiwa mwaha wa itthu soonanara apankaawe nave, khampwattha. (Yobi 22:5-9) Awo yaaherera omuputthaputtha Yobi yeeraka, nnamweera owo apanke itthu soorera, Muluku khaahela mwiitti itthu iye aapakaawe. (Yobi 4:18; 22:2, 3; 25:4) Mweekhaikhai, anaalopwana ale yaatthuna weera Yobi uupuweleke weera, Yehova khamusivela Yobi, khaampwattha ni onvarela Yehova waari wiihasula. Mene nto masu ala, yaamaliha yooweherera ya Yobi.

9. Eheeni yaamukhavinhere Yobi okhala olipa murima ni oororomeleya?

⁹ Nkuupuwelani ela Yobi ori vattuurani ni makhwatta ennaviha. (Yobi 2:8) Asinthamwene awe owootherera ennavirelela omwerela Yobi weera, owo khaiyone mutthu oreera murima, itthu sootheene owo aapankaawe khasavareleya muteko. Aani, itthu sootheene Yobi aavirihaawe, saari soohivileleya nave-tho, owo ahereke ovilela okhweliwa wa anamwane awe. Wupatxerani, owo khulumme etthu. (Yobi 2:13–3:1) Waari weera asinthamwene awe yuupuwela weera mwaha wa Yobi ohuuluma etthu, yaataphulela weera aamuhiya onvarela muteko mpattuxa awe, awo yaamwisoototha. Mene etempu ekineene, Yobi—eemexaka muru awehaka asinthamwene awe owootherera—owo ahaalela: “Mpaka okhwa waka, kinnakiha ohittheka waka!” (Yobi 27:5) Vano eheeni yamukhavihenre  Yobi okhala oovilela nnamweera aaviriha maxupo? Nnamwera ole aavirinhe amxupo nave okhala ntoko ari mulittini moowixa ntoko atthu akina anhimaya, Yobi khanammalenle nroromelo weera, Muluku awe ansivelo ammaliha maxupo ale, nave akhalano ehakhi weera pooti owo okhwa, Yehova ammuvinyereriha.—Yobi 14:13-15.

10. Yoowereya ya Yobi ennixuttiha eheeni?

¹⁰ Ele yaamweerenle Yobi ennixuttiha weera, Satana khankela oninyeserera ohiya onvarela muteko Yehova. Nave-tho, enthoonyera weera, Yehova onnoona itthu sootheene sinnikhumelela. Yoowereya ya Yobi, ennanikhavihera osuwela ele enhela mpuwa ororomeleya waahu wa Yehova, nave ninkela woona itthu ikina ninxutteraahu ni ntakihero na Yobi.

11. Nroromelo heeni nneeraahu nikhalane navirelela omuroromela Yehova? (Yakobe 4:7)

¹¹ Yobi ohoonihera weera, namuroromela Yehova nnowera ovilela maxupo ni omukhootta Satana. Yookhumelelaaya ti heeni? Biblya onnaniroromeliha weera Satana onoonihiya.—Mmusome Yakobe 4:7.

12. Mwaha wa heeni yooweherera ya ovinyerera wa alipa okhwa yaamulipinhaaya Yobi?

¹² Nintthuneya ovarexexa yoolanhera ya evinyerero. Ntoko noonnahu yoosoma evinre, Satana onnavarela muteko woova okhwa weera nihiye onvarela muteko Yehova. Yoowereya ya Yobi, Satana enre weera, aamupaka etthu weera avuluxe ekumi awe eemexeraru omukokhorela Yehova. Nto Satana ahiisoototha. Pooti Yobi oonaawe weera ahanle okhwa, nto owo aavirelela okhala oororomeleya wa Yehova. Etthu yaamukhavihenre Yobi, naari nsivelo aakhalannaawe ni Muluku. Mwaha oreera murima wa Yehova, Yobi annaroromela weera itthu sootheene saamukhumelela, Yehova ammaliha. Yobi aasuwela weera, pooti Yehova ohimaliha maxupo awe areene ni okumi, aakela omaliha avinyererihiwa vale. Yobi khaahovela weera, ovinyererihiwa wa atthu wookhala, nakhalanoru nroromelo ntoko na Yobi, pooti noopopihiwaka okhwa khaninhiya onvarela muteko Yehova.

13. Mwaha wa heeni nintthuneyaahu opwatthela itthu Satana avarihenlaawe muteko weera amootothe Yobi?

¹³ Onnitthuneya owehexexa itthu Satana avarenlaawe muteko weera amweerere Yobi, mwaha woowera onvarela muteko itthu imoha-moharu weera aneerere hiyo olelova. Nwehe yowootha Satana ompakaawe weera anootothe olelo va: “Mutthu onaleva itthu sothesene oraiyeno nthowa na ekum’awe.” (Yobi 2:4, 5) Ni masu ala, Satana ontthuna ohima weera, hiyo khanimmukokhorela Muluku ni nsivelo, mene sanixupa vale nnoohiya omukokhorela. Opwaha mwa yeeyo, owo aatthuna ohima weera, Yehova khannitthuna nave, khampwatthela wiilipihera wootheene nimpakaahu weera nimuhakalalihe. Mene hiyo mwaha woosuwela mikhalelo sa Satana, khaninhiya nootothiwaka.

14. Maxupo anlikanxeriwa ni heeni? Muthalihe.

¹⁴ Naakumanaka ni maxupo nooneke okhala eparakha weera niisuwele nneene. Maxupo aakumannawe Yobi, yaamukhavihera woona mikhalelo sawe ni waari weera annatthuneya opaka matxentxo mweekumini mwawe. Mwa ntakihero, owo aahonelela weera annatthuneya okhala owiiyeviha. (Yobi 42:3) Emoha-moharu, hiyo-tho nookhalano eparakha yoowisuwela vaavo ninvirihaahu maxupo. Munna mmoha oneeriwa Nikolay, * yoowo atthukiwe nnamweera awereiwa veeli-veeli ohimme ha: “Otthukiwa okadeya onkhala ntoko omwaleiwa ni raio-X, iwo mutthu onnonihera mikhalelo sa mukristu.” Nasuwela vale mikhalelo  saahu soottettheya onnatthuneya wiilipihera weera nrehere.

15. Nintthuneya weera ninwiriyaneke taani?

¹⁵ Onnitthuneya opwatthela itthu Yehova onthalihaawe, ohiya itthu entalihaaya amwittani. Yobi anawiriyana vaavo Yehova uulumawe. Muluku aapatxera omuupuxera akhalaka ntoko aamulela ha: ‘Muhona ikuru sootheene kivarihenlaaka muteko weera kipattuxe itthu? Miyo koosuwela itthu sootheene sinookhumelelani, munoona weera nkinoothokororani?’ Yobi ahaakhula mowiiyeviha mwaha woomuroromela Yehova, owo waakhula enre: “Miyo maru aka yera yiwaka sa weyo,” nto vanano, “maitho aka awoona weyo owithoni.” (Yobi 42:5) Yobi araaya eera akilaathiyeene vattuurani ni makhwatta yaasanre murutthuni mwaawe envihaka. Nnaamweera wareene hiiho, Yehova aamuleela Yobi weera annamusivela, annampwattha ni aamwaakhulela okhala nthamwene awe.—Yobi 42:7, 8.

16. Moovarihana ni Yesaya 49:15, 16, eheeni ninkelaahu wuupuwelela naavirihaka maxupo oowereriwa?

¹⁶ Olelo va, atthu pooti oniruwana ni oniramusa. “Awosa-tho pooti onanariha ororomela wahu ni mareherero ahu ehimaka itthu soohilanheriwa.” (Math. 5:11) Eliivuru ya Yobi ennanixuttiha weera, nnoowera okhala ororomeleya wa Yehova nnaamwera nivirihaka maxupo. Yehova onnansivela vantxipale ni owo olaihera weera khankela oninyanyala. (Mmusome Yesaya 49:15, 16.) Muhiiweleleke iye sinuulummwa ni amwiittani a Muluku! James ni tximweene awe Turkey othalinhe ha vaavo owo ni amusi awe yaavirihaaya maxupo: “Opwattha itthu soowothiwa woohima sa  atthu a Muluku saamunikhulumula. Mwa yeeyo, hiyo naaweherera paahi yooweherera ya Omwene wa Muluku, nave, hiyo naavirelela onvarela Muluku ni tho tiyeeyo yaanitteliha murima.” Hihale ntoko Yobi, naavirelela onvarela muteko Yehova, Soowootha sa amwiittani ahu, khasinkela onanariha yoowehereraahu.

17. Eheeni nyuwo munxutteraanyu ni ntakihero na alopwana ni athiyana anihimmwa va Aheberi ekapitulu 11?

¹⁷ Yobi aari murumeyi mmoha a Yehova yoowo nnamweera aaviriha maxupo, aavirelela olipa murima ni oororomeleya. Ekaratta murummwa Paulo aalepenlaawe aHeberi, ahaathaliha asinna yaawo yaari ororomeleya ni “owo awitthana anna awo okhala nihutte ntokotoko na anamoona.” (Aheb. 12:1) Ootheene awo yaaviriha maxupo oohiyana mwekumini nnaamweera varene hiho, awo yaavirelela ororomeleya wa Yehova. (Aheb. 11:36-40) Neereke ovilela waaya wahaakhavihera? Waakhula ti wooweeera aani! Nnaamweera solohera sa Yehova yahoona sikwanelaka etempu aya, awo yaavirelela okhala oororomeleya wa Yehova. Mwa yeeyo, arumeyi ale oororomeleya yaanaroromela weera yahaakhuleliwa ni Yehova. Tivawonto, awo yahaahovelaaya weera iprofesia sootheene sa Yehova saamukwanela muhoolo. (Aheb. 11:4, 5) Tivawo tho, ntakihero naya ninnanikhavihera okhala oororomeleya wa Yehova.

18. Eheeni nyuwo mwiithanlenlaanyu opaka? (Aheberi 11:6))

¹⁸ Mahikwaano itthu sinnavirelela oxupa. (2 Tim. 3:13) Satana nlelo khahiyerenre oweerera arumeyi a Muluku nave, hiyo noosuwela weera ninkela oviriha maxupo. Nnaamweera varene hiiho, onnatthuneya ovirelela ororomeleya wa Yehova nroromelaka weera, “yoweherera ahu enlipa wa Yehova Muluku mukumi.” (1 Tim. 4:10) Yehova aareeliha vantxipale ororomeleya wa Yobi, eyo ennoonihera weera “Yehova Muluku a ikharari.” (Yak. 5:11) Antoko Yobi, hiyo nintthuneya okhala oororomeleya wa Yehova, “nroromelaka weera, Yehova onimwaalivela ale ammuroromela ni murima wootheene.”—Mmusome Aheberi 11:6.