ALATIKE AKO 27
“Falala Kia Sehova”
“Falala kia Sehova. Ke ke lototoʼa pea mo lotomalohi.”—PES. 27:14.
KATIKO 128 Kotou Faʼa Kataki ʼo Kaku Ki Te Fakaʼosi
TE ʼU MANATU FAKANOUNOU *
1. (1) Kotea te ʼamanaki ʼe foaki mai e Sehova? (2) Kotea te fakaʼuhiga ʼae ke tou “falala kia Sehova”? (Vakaʼi “He ʼu Fakamahino.”)
ʼE FOAKI e Sehova he ʼamanaki taulekaleka kia natou fuli ʼae ʼe ʼofa kia te ia. Kua ina vave pulihi pe ia te mahaki, mo te mamahi pea mo te mate. (Apk. 21:3, 4) ʼE tokoni anai ki te kau “agavaivai” ʼae ʼe falala kia te ia ke natou fakaliliu te kele ko he palatiso. (Pes. 37:9-11) Pea ʼe ina fakafealagia anai ke tou maʼu fuli he ʼu felogoi lelei pea mo ia. ʼE toe makehe age anai ia ʼi ʼatatou felogoi lelei mo ia ia ʼaho nei. ʼI ʼamanaki taulekaleka leva ka tou maʼu. Kae he koʼe ʼe tou tui papau ʼe hoko anai te ʼu fakapapau ʼa te ʼAtua? ʼE fakahoko tuʼumaʼu pe e Sehova ʼana fakapapau. Koia, ʼe lahi te ʼu tupuʼaga ke tou ‘falala ai kia Sehova.’ * (Pes. 27:14) ʼE tou fakaha te faʼahi ʼaia ʼaki hatatou fakatalitali ʼaki he fiafia.—Esa. 55:10, 11.
2. Kotea ʼae neʼe kua fakaha e Sehova?
2 Neʼe kua fakaha e Sehova ʼe ina fakahoko ʼana fakapapau. Tou vakaʼi he faʼifaʼitaki. ʼI te tohi ʼo Apokalipesi, neʼe fakapapauʼi ai e Sehova ʼe ina fakatahitahiʼi anai ʼi totatou temi he hahaʼi mai te ʼu puleʼaga fuli, mo te ʼu telepi pea mo te ʼu lea fuli ke natou tauhi kia te ia ʼi te logo tahi. Ia ʼaho nei, ʼe ui ko “he toe hahaʼi tokolahi.” (Apk. 7:9, 10) Logo la ko he ʼu tagata, mo fafine pea mo fanau ʼe ʼomai mai te ʼu lanu mo te ʼu lea kehekehe, kae ʼe natou faʼufaʼu he foʼi famili logo tahi. (Pes. 133:1; Soa. 10:16) Pea ʼe natou toe faʼafai foki ʼi te faifakamafola. ʼE natou fia vaevae mo he tahi ʼe fia logo ia tanatou ʼamanaki ʼae ki he malama ʼe maʼuʼuli ai he hahaʼi ʼi te tokalelei mo te fimalie. (Mat. 28:19, 20; Apk. 14:6, 7; 22:17) Kapau ʼe ke kau ʼi te toe hahaʼi tokolahi ʼaia, pea ʼe mahino ia ʼe maʼuhiga kia koe ia te ʼamanaki taulekaleka ʼaia.
3. Kotea ia te fakatuʼutuʼu ʼa Satana?
3 ʼE mole loto e te Tevolo ke ke maʼu he ʼamanaki ki te ka haʼu. ʼE ina loto ke ke tui ʼe mole tokaga ia Sehova kia koe pea ʼe mole ina fakahoko anai ʼana fakapapau. Kapau ʼe lava te faiga ʼae ʼa Satana ke tou manatu ʼe mole ʼi ai hotatou ʼamanaki, pea ʼe tou lotovaivai anai ʼo mole kei tou fia tauhi kia Sehova. Ohage ko te aluʼaga ʼae ka tou vakaʼi, ʼe faiga e te Tevolo ke manatu ia Sopo ʼe mole ʼi ai hona ʼamanaki pea ke tuku ia tana tauhi kia Sehova.
4. Ka tou lau ia Sopo 1:9-12, kotea ʼae ka tou vakaʼi ʼi te alatike ʼaeni?
4 ʼI te alatike ʼaeni, ʼe tou vakaʼi anai pe neʼe faiga malohi feafeaʼi ia Satana ke mole nofo agatonu ia Sopo kia Sehova. (Lau ia Sopo 1:9-12.) ʼE tou toe vakaʼi anai he ʼu ako mai te faʼifaʼitaki ʼo Sopo pea he koʼe ʼe tonu ke tou manatuʼi ʼe ʼofa te ʼAtua ia tatou pea ʼe ina fakahoko anai ʼAna fakapapau.
ʼE FAIGA IA SATANA KE MOLE ʼI AI HE ʼAMANAKI ʼA SOPO
5-6. Kotea ʼae neʼe hoko kia Sopo ʼi he kiʼi temi nounou pe?
5 Neʼe maʼuli lelei mo fiafia ia Sopo. Neʼe ina maʼu he ʼu felogoi lelei mo Sehova. Neʼe ina maʼu hona famili kaugamalie mo logo tahi pea neʼe koloaʼia ʼaupito. (Sopo 1:1-5) Kae neʼe meʼa pe ke puli fuli te ʼu meʼa ʼa Sopo ʼi he ʼaho pe ʼe tahi. ʼUluaki, neʼe mamate tana faga manu. (Sopo 1:13-17) Hili ia, pea neʼe mamate ʼana fanau fuli, ʼae ʼe ʼofa mamahi ai. Fakakaukauʼi age muʼa koe siʼi aluʼaga fakaʼofaʼofa ʼaia. ʼE mamahi he ʼu matuʼā moka mate hanā fanau ʼe tahi. Kae ʼe feafeaʼi age la ki te lotomamahi ʼa Sopo mo tona ʼohoana ʼi tanā iloʼi ʼae neʼe mamate ʼanā fanau ʼe toko hogofulu? Koia, ʼe mole ʼaoga hatatou punamaʼuli ki te haga ʼa Sopo ʼo hae tona kofu moʼo fakaha tana putu pea mo takoto ʼae ki te kele.—Sopo 1:18-20.
6 Hili ia, neʼe fakatupu leva e Satana ia Sopo he mahaki ʼe mamahi ʼaupito pea mo fakaufiufi. (Sopo 2:6-8; 7:5) ʼI muʼa ʼo te hoko ʼo te aluʼaga ʼaia, neʼe fakaʼapaʼapa lahi te hahaʼi kia Sopo. Neʼe natou olo ʼo kumi tokoni ki ai. (Sopo 31:18) Kae ʼi te temi leva ʼaia, neʼe mole kei natou tokagaʼi ia ia. Neʼe liʼaki ia ia e ʼona tehina, mo ʼona kaumeʼa, maʼia mo ʼana tagata faifekau.—Sopo 19:13, 14, 16.
7. (1) Ko ai ʼae neʼe manatu ki ai ia Sopo ʼi tana tau mo ʼona mamahi? Kae kotea ʼae neʼe mole ina fia fai? (2) Kotea ʼae ʼe feala ke fai e he tehina moka tau mo he ʼahiʼahi ʼe tatau mo te aluʼaga ʼae ʼe tou sio ki ai ʼi te pāki ʼe alu tahi mo te palakalafe 7?
7 Neʼe loto e Satana ke tui ia Sopo ʼe mamahi feia la he neʼe ita Sehova ki ai. Ohage la, neʼe fakaʼaogaʼi e Satana he tuʼani matagi ke holo te ʼapi, ʼae neʼe kakai fakatahi ai te ʼu fanau ʼe hogofulu ʼa Sopo. (Sopo 1:18, 19) Neʼe ina toe fakato ifo he afi mai te lagi ʼo mamate ai te faga manu ʼa Sopo ʼo feia mo ʼana hahaʼi faifekau, ʼae neʼe tokakaga ki te ʼu manu. (Sopo 1:16) Neʼe haʼu te matagi mo te afi mai te lagi. Pea neʼe manatu ia Sopo neʼe haʼu mai ia Sehova pea neʼe ina fai ai he meʼa ʼe mamahi ai ia Sehova. Logo la te faʼahi ʼaia, kae neʼe mole fia laukovi ia Sopo ki tana Tamai ʼae ʼe ʼi selo. Neʼe ina iloʼi neʼe lahi te ʼu meʼa lelei neʼe foaki age e Sehova ki ai lolotoga ni taʼu. Koia, neʼe feuiʼaki ai kapau neʼe ina tali te ʼu meʼa lelei ʼaia pea ʼe tonu ke ina toe tali te ʼu meʼa ʼae ʼe kovi. Neʼe ina ui fenei: “Ke hoko atu te vikiʼi ʼo te huafa ʼo Sehova.” (Sopo 1:20, 21; 2:10) Logo la neʼe puli te ʼu koloa ʼo Sopo, mo mamate ʼana fanau, pea mo tau mo he mahaki faigataʼa, kae neʼe nofo agatonu pe kia Sehova. Kae neʼe ʼahiʼahi e Satana ia te tahi aluʼaga.
8. Kotea te tahi puleʼaki kaka neʼe fakaʼaogaʼi e Satana moʼo ʼahiʼahiʼi ia Sopo?
8 Neʼe fakaʼaogaʼi e Satana he tahi puleʼaki kaka ʼo ʼuhiga mo Sopo. Neʼe ina uga hona ʼu kaumeʼa kaka ʼe toko tolu ke natou fai he ʼu palalau ke logoʼi ai e Sopo ʼe mole hona ʼuhiga. Neʼe ui e te ʼu tagata ʼaia neʼe mamahi ia Sopo ʼuhi he neʼe lahi te ʼu gaue kovi neʼe ina fai. (Sopo 22:5-9) Neʼe natou toe faiga ke manatu ʼe mole he ʼuhiga ʼo te ʼu faiga fuli ʼae neʼe ina fai moʼo fakafiafiaʼi ia te ʼAtua, logo foki la neʼe mole ko he tahi ʼe agakovi. (Sopo 4:18; 22:2, 3; 25:4) Neʼe natou loto ke manatu ia Sopo ʼe mole ʼofa te ʼAtua ia ia, ʼe mole tokaga te ʼAtua kia ia pea ʼe mole he ʼuhiga ʼo tana tauhi kia te ia. ʼAki te ʼu plalau ʼaia, neʼe feala ke logoʼi ai e Sopo ʼe mole he puleʼaki ki tona aluʼaga.
9. Kotea ʼae neʼe tokoni kia Sopo ke lototoʼa pea mo lotomalohi?
9 Fakakaukauʼi age muʼa koe ia te aluʼaga ʼae neʼe hoko. ʼE nofo ia Sopo ʼi te lefulefu pea ʼe lotomamahi ʼaupito. (Sopo 2:8) Neʼe ui age tuʼumaʼu e ʼona kaumeʼa ʼe mole ko he tahi ʼe agalelei pea ʼe mole he ʼuhiga ʼo te ʼu gaue neʼe ina fai. Neʼe kua taʼomia ʼi te ʼu ʼahiʼahi ʼae neʼe tau mo ia pea mo lotomamahi ʼi te mamate ʼo siʼana ʼu fanau. ʼI te kamata, neʼe nofo fakalogologo ia Sopo. (Sopo 2:13–3:1) ʼE lagi manatu e ʼona kaumeʼa ʼaia ʼe nofo fakalogologo feia la ia Sopo he ʼe lituʼa anai kia Sehova. Kae neʼe natou faihala ʼosi. ʼI te tahi temi, neʼe hiki ake e Sopo tona ʼulu ʼo sioʼi lelei ʼona kaumeʼa kaka ʼaia mo ui fenei: “ ʼO kaku ki toku mate, ʼe mole au fakafisi anai ki taku agatonu.” (Sopo 27:5) Kotea ʼae neʼe tokoni kia Sopo ke lototoʼa mo lotomalohi feia logo la ʼona mamahi fuli? Logo la neʼe kua lotovaivai ʼosi ia Sopo, kae neʼe falala pe ia ʼe tokoni age tona ʼAtua ʼofa. Neʼe ina iloʼi e fakatuʼuake anai ia ia e Sehova moka mate.—Sopo 14:13-15.
ʼE FEAFEAʼI HATATOU FAʼIFAʼITAKIʼI IA SOPO?
10. Kotea ʼae ʼe tou ako mai te hisitolia ʼo Sopo?
10 ʼE tou ako mai te hisitolia ʼo Sopo ʼe mole feala ke fakakinauʼi tatou e Satana ke tou liʼaki ia Sehova. Pea ʼe iloʼi lelei e Sehova ʼotatou aluʼaga takitokotahi. ʼE toe tokoni mai te faʼifaʼitaki ʼo Sopo ke tou mahino lelei age ki te tupuʼaga ʼo te hoko ʼo te ʼu fihifihia. Tou vakaʼi he ʼu ako ʼe feala ke tou taʼofi mai te faʼifaʼitaki ʼo Sopo.
11. Ka tou lau ia Sakopo 4:7, kotea ʼe tou tui papau ki ai mo kapau ʼe tou falala kia Sehova?
11 Neʼe fakaha e Sopo kapau ʼe tou falala tuʼumaʼu kia Sehova pea ʼe tou lava katakiʼi he faʼahiga ʼahiʼahi pe pea mo lava tauʼi ia Satana. Pea kotea anai ka hoko? ʼE ui mai ʼi te Tohi-Tapu ʼe hola anai te Tevolo mai ia tatou.—Lau ia Sakopo 4:7.
12. Neʼe fakalotomalohiʼi feafeaʼi ia Sopo ʼaki te ʼamanaki ʼae ki te fakatuʼuake?
12 ʼE tonu ke tou tui malohi ki te fakatuʼuake. Neʼe tou vakaʼi ʼi te alatike ʼaeni kua ʼosi, ʼe tau fakaʼaogaʼi e Satana ia te mataku ki te mate ke mole tou nofo agatonu kia Sehova. Neʼe ui e Satana ʼe fai anai e Sopo he meʼa pe moʼo haofaki tona maʼuli. Neʼe manatu ia ʼe ina tuku anai tana tauhi kia Sehova. Kae neʼe faihala ia Satana. Neʼe nofo agatonu pe ia Sopo kia Sehova, maʼia ʼi te temi ʼae neʼe manatu ai ʼe mate anai. Ko te aluʼaga ʼae neʼe tokoni ki ai ke faʼa kataki neʼe ko tana falala ki te manavaʼofa ʼo Sehova pea mo tana fakatokatoka anai te ʼu aluʼaga neʼe hoko. Neʼe tui ia Sopo ʼe fakatuʼuake anai ia ia e te ʼAtua ʼi te ka haʼu, tatau aipe pe neʼe heʼeki fakatokatoka e Sehova te ʼu aluʼaga ʼaia ʼi tona temi maʼuli. ʼEi, neʼe tui moʼoni ia Sopo ʼe ʼi ai moʼoni te fakatuʼuake. Koia, kapau ʼe tou tui mo tatou ki te fakatuʼuake pea ʼe tou nofo agatonu anai kia Sehova maʼia pe ʼe tonu ke tou mamate.
13. He koʼe ʼe tonu ke tou tokakaga ki te ʼu puleʼaki kaka ʼae neʼe fakaʼaogaʼi e Satana kia Sopo?
13 ʼE tonu ke tou tokakaga tafito ki te ʼu puleʼaki kaka ʼae neʼe fakaʼaogaʼi e Satana kia Sopo. Kotea tona tupuʼaga? Koteʼuhi ʼe toe fakaʼaogaʼi pe e Satana ia te ʼu puleʼaki kaka ʼaia kia tatou ia ʼaho nei. ʼE feala ke ke fakatokagaʼi ai te tukugakovi ʼae neʼe fai e Satana. Neʼe ina ui: “ ʼE foaki anai e te tagata [ʼe mole gata pe kia Sopo] ia meʼa fuli ʼe ina maʼu moʼo fetogi ʼaki tona maʼuli.” (Sopo 2:4, 5) Koia, neʼe ui e Satana ʼe mole tou ʼoʼofa moʼoni ia Sehova ʼAtua pea ʼe tou lituʼa anai kia te ia mo kapau ʼe tou fia haofaki totatou maʼuli. Pea tahi, ʼe ina ui ʼe mole ʼofa te ʼAtua ia tatou pea ʼe mole ina tokagaʼi anai ʼatatou faiga ʼae ke tou fakafiafiaʼi tona loto. ʼE tou iloʼi te ʼu meʼa ʼae ʼe faiga ki ai ia Satana, koia ʼe mole tou tui ai ki ʼana loi.
14. Ka tou tau mo he ʼu ʼahiʼahi, kotea ʼae ʼe ha ai ʼo ʼuhiga mo tatou? Tuku mai he faʼifaʼitaki.
14 ʼE tonu ke hage kia tatou te ʼu ʼahiʼahi ko he faigamalie ʼaia ke tou ako ke tou iloʼi lelei ia tatou. Ko te ʼu ʼahiʼahi ʼae neʼe tau mo Sopo neʼe tokoni ki ai ke ina iloʼi ʼona ʼihi vaivaiʼaga pea ke ina gaueʼi. Ohage la, neʼe ina ako ai ʼe tonu ke lahi age tana gaueʼi ia tana agavaivai. (Sopo 42:3) Pea ʼe toe feia pe mo tatou, ʼe lagi lahi age he ʼu aluʼaga ʼe tou ako ai ʼo ʼuhiga mo tatou moka tou tau mo ni ʼahiʼahi. ʼE ui fenei e te tehina ʼaeni ko Nikolay, * ʼae neʼe pilisoni kae neʼe tau mo he mahaki faigataʼa: “ ʼE hage te pilisoni ko he latio ʼe kita alu ʼo fai, ʼe fakaha ai te ʼu kalitate ʼe tonu ke kita gaueʼi.” Koia, ka tou iloʼi ʼotatou vaivaiʼaga, pea ʼe tou faiga anai ke tou gaueʼi.
15. Ko ai ʼae ʼe tonu ke tou fakalogo ki ai? Pea kotea tona tupuʼaga?
15 ʼE tonu ke tou fakalogo kia Sehova kae mole ki ʼotatou fili. Neʼe fakalogo lelei ia Sopo ki te palalau age ʼa Sehova ki ai. Neʼe fai e te ʼAtua he ʼu fehuʼi kia Sopo moʼo tokoni ki ai ke sio ki tana tokaga ʼae kia ia. Neʼe ina ui age: ‘ ʼE ke sio koa ki toku mafimafi ʼi te ʼu meʼa ʼae neʼe au fakatupu? ʼE au iloʼi te ʼu meʼa ʼae neʼe hoko kia koe. ʼE ke manatu koa ʼe mole feala haku tokaga lelei kia koe?’ Neʼe tali e Sopo ʼaki he agavaivai pea mo he lotofakafetaʼi lahi ki te manavaʼofa ʼo Sehova. Neʼe ina ui fenei: “Neʼe logo ʼoku taliga ki te palalau ʼo ʼuhiga mo koe, kae ʼi te temi nei, kua au sio tonu kia te koe.” (Sopo 42:5) ʼE mahino ia, neʼe kei nofo pe ia Sopo ʼi te lefulefu, mo poloʼia tona sino katoa pea neʼe kei putu ʼuhi ko te mamate ʼo siana ʼu fanau, ʼi tana fai te ʼu palalau ʼaia. Logo la te ʼu aluʼaga ʼaia, kae neʼe fakaha e Sehova ia Tona ʼofa kia Sopo.—Sopo 42:7, 8.
16. Ka tou lau ia Esaia 49:15, 16, kotea ʼae ʼe tonu ke tou manatuʼi moka ʼe tou tau mo ni ʼahiʼahi?
16 Ia ʼaho nei, ʼe toe laukoviʼi tatou e te hahaʼi pea mo natou gaohi tatou ohage ʼe mole hotatou ʼuhiga. ʼE feala ke natou ʼulihi te matagafua ʼo he tahi peʼe ʼo he kautahi pea mo “loi mo palalau kovi ʼo ʼuhiga mo” tatou. (Mat. 5:11) Kae ʼe tou ako mai te hisitolia ʼo Sopo, ʼe falala ia Sehova ʼe tou nofo agatonu anai kia te ia moka tou tau mo ni ʼahiʼahi. ʼE ʼofa ia Sehova ia tatou pea ʼe mole ina liʼaki anai ia natou ʼae ʼe falala kia te ia. (Lau ia Esaia 49:15, 16.) Koia, ʼaua naʼa ke tokagaʼi ia te ʼu fasituʼu ʼe fai e te ʼu fili ʼo te ʼAtua. ʼE fakamatala fenei e James, ko te tehina mai Turquie pea neʼe tau tona famili mo he ʼu ʼahiʼahi fakamataku: “Neʼe matou tokagaʼi ka matou fakalogo te ʼu loi ʼae ʼe fai e te hahaʼi ʼo ʼuhiga mo te hahaʼi ʼa te ʼAtua, pea ʼe matou lotovaivai ai. Koia, neʼe matou tokakaga tafito pe ki tamatou ʼamanaki pea mo faʼafai ʼi tamatou tauhi kia Sehova. Pea neʼe matou taupau aipe tomatou fiafia.” Koia, ʼe tou fakalogo kia Sehova ohage pe ko Sopo. ʼE mole feala ki te ʼu loi ʼae ʼe fai e ʼotatou fili, ke pulihi ai tatatou ʼamanaki.
ʼE TOKONI ATU ANAI TE ʼAMANAKI KE KE FAʼA KATAKI
17. Kotea ʼae ʼe ke ako mai te faʼifaʼitaki ʼo he ʼu tagata mo fafine agatonu, ʼae ʼe talanoa ki ai ia Hepeleo kapite 11?
17 ʼE kau ia Sopo ʼi te ʼu kaugana ʼa Sehova ʼae neʼe lototoʼa mo lotomalohi ʼi te ʼu ʼahiʼahi. ʼI te tohi ʼa te apositolo ko Paulo ki te kau Hepeleo, ʼe talanoa ai ki he tahi age ʼu kaugana ʼa Sehova. Neʼe ina ui ʼe ko he ‘kau fakamoʼoni ohage ko he ʼao lahi.’ (Hep. 12:1) Neʼe natou tau fuli mo ni ʼahiʼahi fakamataku kae neʼe natou nofo agatonu kia Sehova ʼi tonatou maʼuli katoa. (Hep. 11:36-40) Neʼe to noa koa ia tanatou faʼa kataki pea mo gaue kinakina? Kailoa ia. Logo la neʼe heʼeki natou sisio ki te fakahoko ʼo te ʼu fakapapau fuli ʼa te ʼAtua ʼi tonatou temi maʼuli, kae neʼe hoko atu pe tanatou falala ʼae kia Sehova. Pea neʼe natou tui papau ʼe natou maʼu anai te ʼofa ʼo Sehova, koia neʼe natou falala ai ʼe natou sisio anai ki te fakahoko ʼo te ʼu fakapapau ʼaia. (Hep. 11:4, 5) ʼE tokoni mai tanatou faʼifaʼitaki ke malohi age tatatou falala tuʼumaʼu ʼae kia Sehova.
18. Ka tou lau ia Hepeleo 11:6, kotea ʼae ka ke fai anai?
18 Ia ʼaho nei, ʼe tou maʼuʼuli ʼi he malama ʼe ʼaʼasili age anai tana agakovi. (2 Tim. 3:13) ʼE kei hoko atu pe e Satana ia tana ʼahiʼahi ia te hahaʼi ʼa te ʼAtua. Kotea pe te ʼu fihifihia ʼe tou ʼamanaki tau mo ia, kae ʼe tou fakatotonu ke tou gaue kinakina maʼa Sehova ʼo tou falala “ ʼe fakatafito tatatou ʼamanaki ki te ʼAtua maʼuli.” (1 Tim. 4:10) Ke ke manatuʼi ʼe ha ʼi te ʼu tapuakina ʼae neʼe foaki e Sehova kia Sopo “ko Sehova ʼe ʼofa mamahi pea mo manavaʼofa.” (Sakp. 5:11) ʼOfa pe ke tou toe nonofo agatonu kia Sehova he ʼe tou tui papau ʼe ina fakapale anai “ia natou ʼae ʼe natou kumi fakamalotoloto ia ia.”—Lau ia Hepeleo 11:6.
KATIKO 150 Kotou Kumi Te ʼAtua Ke Haofaki Ai Koutou
^ Ka tou manatu ki he tahi ʼe tau mo he ʼu ʼahiʼahi fakamataku, ʼe tou manatuʼi ia Sopo. Kotea ʼe tou ako mai te ʼu ʼahiʼahi neʼe tau mo te tagata agatonu ʼaia? ʼE tou ako ai ʼe mole feala ke fakamalohiʼi tatou e Satana ke tou liʼaki ia Sehova pea ʼe iloʼi tuʼumaʼu e Sehova te ʼu aluʼaga ʼe hoko kia tatou fuli. Neʼe pulihi e Sehova te ʼu ʼahiʼahi ʼo Sopo, pea ʼe Ina toe pulihi anai mo ʼotatou mamahi fuli. Kapau ʼe tou fakaha ʼi ʼatatou gaue ʼe tou falala ki te ʼu aluʼaga ʼaia, pea ʼe tou kau anai ia natou ʼae ʼe “falala kia Sehova.”
^ HE ʼU FAKAMAHINO: Ko te kupu Fakahepeleo ʼae neʼe fakaliliu ʼaki te kupu “falala” ʼe fakaʼuhiga ki te “fakatalitali” ki he meʼa mo he fakaʼamu lahi. ʼE feala ke toe maʼu ai te manatu ʼae ke kita falala ki he tahi.—Pes. 25:2, 3; 62:5.
^ Ko ʼihi higoa neʼe fetogi.