1. ა) მუ იმენდ მუჩეს იეჰოვაქ? ბ) მუს ნიშნენს, „გიღდას იეჰოვაშ იმენდ“? (ქოძირით „განმარტება“)

 იეჰოვაქ სარკო იმენდ მეჩჷ მუშ მოჸოროფეეფს. მალას ვეჸუაფ ლახალა, ოწუხებელ დო ღურა (გამოცხ. 21:3, 4). თინა მეხვარებ „თვინიერეფს“, მიდგას თიშ იმენდ უღნა, დედამიწა სამოთხეთ გინართინუან (ფსალმ. 37:9—11). თინა ჩქინო შეიოლებერო გინაშქვანს, ასე მიღნან თიშე ბრელით უჯგუშ ურთიერთობა მიღდან მუწკუმა. თენა მართალო სარკო იმენდ რე! მუშენ შემლებნა ბჯერდან, ნამდა ღორონთიშ არძა დუნაპირებ შისრულებ? იეჰოვა სიტყვას დღას ვა ტახუნს. თაშ ნამდა, შემლებნა მიღდან თიშ იმენდ b (ფსალმ. 27:14). თეს ვოძირანთ, მუჟამსით მოთვინებათ დო ხიოლით უჯინეთ, მუჟამ შეასრულენს იეჰოვა მუშ განზრახვას (ეს. 55:10, 11).

2. მუ დამტკიც იეჰოვაქ უკვე?

² იეჰოვაქ უკვე დამტკიც, ნამდა ასრულენს მუშ დუნაპირებუეფს. გუვარჩუათ თეშ არგამა მაგალით. გამოცხადებაშ წიგნის მოჩამილ რე იეჰოვაშ დუნაპირებ, ნამდა თინა ართ წმინდა თაყვანიშმცემლობას გაკოშაყარანდჷ ხალხის არძა ერშე, ტომშე დო ნინაშე. თე ჯგუფ ამდღა არსებენს დო თის „ანაყუ ხალხ“ ჯოხო (გამოცხ. 7:9, 10). მართალ რე, თე ჯგუფშა მიშურს შხვადოშხვა რასაშ, ნინაშ, კულტურაშ დო წარსულიშ ქომოლკათა, ოსურკათა დო ბაღანეფ, მარა თინა იშენით მშვიდობიან, გაერთიანებულ მსოფლიო საჯიმალო რე (ფსალმ. 133:1; იოან. 10:16). თე „ანაყუ ხალხ“ დუდგინოდვალირ მაქადაგებელ რე. თინეფ  ირიათო მზათ რენა, გეგნოჩან შხვეფს იმენდ უჯგუშ მსოფლიოშ გურშენ (მათ. 28:19, 20; გამოცხ. 14:6, 7; 22:17). „ანაყუ ხალხიშ“ ნაწილ ქორეთ-და, იმენდ უჯგუშ მსოფლიოშ გურშენ თქვანო ხოლო მანგარ ძვირფას იჸუაფ.

3. მუს ოცად სატანა?

³ ეშმაკის ოკო, იმენდ მემდინუან. თინა ოცად, ქუდმოჯერუან, ნამდა იეჰოვა ვა ზრუნენს ჩქინდე დო ვასრულენს მუშ დუნაპირებუეფს. სატანაქ იმენდიშ უმშო ქუდომტუეს-და, გაბედულებას მივოდინუანთ დო შილებე იეჰოვაშ მსახურება ხოლო მივოტუათ. მუჭოთ გუვარჩიენთ, ეშმაკიქ მინდომ, იობშა იმენდ მეუდინუაფუდკო დო იეჰოვაშ მსახურება მეუტებუაფუდკო.

4. მუს გუვარჩიენთ თე სტატიას? (იობ. 1:9—12)

⁴ თე სტატიას გუვარჩიენთ, მუ მეთოდეფით ოცადუდ სატანა, იობის ართგურობა მიოდინაფუკო (წეკითხით იობიშ 1:9—12). თეს გეძინელ, გუვარჩიენთ, მუშ გურაფა შემლებნა იობიშ მაგალითშე დო მუშენ ოკო ფშუდან, ნამდა ღორონთის უჸორთ დო შეასრულენს მუშ დუნაპირებუეფს.

5, 6. მუქ აღოლ იობის ჭიჭე დროშ დინახალე?

⁵ იობის ჯგირ ცხოვრება უღუდ, თინა ხარენდჷ იეჰოვაწკუმა მეგობრულ ურთიერთობათ, ჸუნდჷ ბედნერ ოჯახ დო რდჷ მანგარ მდიდარ (იობ. 1:1—5). მარა ართ დღას თიქ ირფელ მიოდინუ. პირველო ქონებაქ მეუდინ (იობ. 1:13—17). უკულ არძა სქუაქ დუღურ. მუჟამსით მშობლეფს ართ სქუა უღურნა, მანგარ ჭუას გინაფლენა, მარა წერმიდგინით, მუს გინაფლენდესკონ იჸიდ იობ დო მუშ ოსურ, მუჟამსით ვითხოლო სქუაქ დუღურეს. მუ გასაკვირ რე, ნამდა გურგოხარცქილ იობიქ ბარგ ქიგისოფკო დო დიხას ქაშანთხუკო?! (იობ. 1:18—20).

⁶ უკულ სატანაქ დალახუ იობ დო ირკოჩიშ თოლს პატი გეუჸოთ თის (იობ. 2:6—8; 7:5). ართ დროს თის მანგარ პატის ცენდეს დო რჩევას ელაკითხანდეს (იობ. 29:7, 8, 21). მარა ასე ხოლოშა ვემკანჭუდეს. თიქ გიშაჸათამილქ იჸუ მუშ ჯიმალეფშე, ხოლოშიანეფშე დო მსახურეფ ხოლო ვა ურჩქილედეს (იობ. 19:13, 14, 16).

7. ა) მუ მიორჩქუდ იობის მუშ ტანჯებაშ მიზეზო დო მუშ გურშენ თქუ ვარია? ბ) მუჭო შილებე ქრისტიანქ შეხვადას თიცალ განსაცდელს, ნამუთ ილუსტრაციას რე მოჩამილ?

⁷ სატანას ოკოდ, იობიქ ქიდეჯერკო, ნამდა იეჰოვაშე მოწონა აფუდ დინაფილინ თიშენ იტანჯებუდ. მაგალთო, სატანაქ გიმირინუ ძალიერ ბორია, ნამდა აკარღვუკო თიშ ჸუდე, სოდეთ იობიშ სქუალეფ რდეს შაყარელ (იობ. 1:18, 19). თიქ ცაშე დაჩხირ ხოლო გეგმაჸათ, ნამდა იობის ხვალე შხურეფ ვარინ, თი მსახურეფ ხოლო გუჭყვიდკო, მით თე შხურეფს ულუანდჷ (იობ. 1:16). ბორია დო დაჩხირქ ზეცაშე მორთუნ თიშ გურშენ, იობის შილებე უფიქრებუდკო, ნამდა თინეფ ღორონთშე რდჷ. შედეგო თიქ ქიდეჯერ, ნამდა იეჰოვას გურ აფუდ თიშე მოულირ. თეშ უმკუჯინუო, იობიქ ვარია თქუ ღორონთიშ გურშენ გლახაშ რაგადშე. თის წანეფიშ დინახალე ბრელ ჯგირ მუდგარენ შუდჷ იეჰოვაშე. თინა ფიქრენდჷ, ნამდა იეჰოვაშე ჯგირს ხიოლით ქოღებულენდ-და, გლახა ხოლო ოკო მიღკო. თიქ თქუ: „კინ გენედიდას იეჰოვაშ სახელქ“ (იობ. 1:20, 21; 2:10). თიშ უმკუჯინუო, ნამდა იობიქ მიოდინუ ქონება, სქუალეფ დო ჯამრთელობა, იშენით იეჰოვაშ ართგურქ ქუდოსქიდ, მარა სატანაქ თე ირფელ ვა უბაღინუ.

8. ხოლო მუ მეთოდ გიმირინუ სატანაქ იობიშ წინააღმდეგ?

⁸ სატანაქ ხოლო ართ მეთოდ გიმირინუ  იობიშ წინააღმდეგ. თიქ სუმ ითამ მეგობარ გოუტუ იობშა, ნამდა უღირსობაშ გრძნობა გურჩქინკო. თინეფ ამტკიცენდეს, ნამდა იობიშ ტანჯებაშ მიზეზ თიშ გლახა საქმეეფ რდჷ (იობ. 22:5—9). თეს გეძინელ, ოცადდეს, დარწმუნესკო თინა, ნამდა მუდგა ჯგირ საქმეეფს ვართუდკონ, ღორონთშო თეს მუთუნ მნიშვნელობა ვა უღუდ (იობ. 4:18; 22:2, 3; 25:4). თინეფ ეჭვის მიშაღალაფუანდეს იობის ღორონთიშ ჸოროფაშა, მზრუნველობაშა დო თიშა, ნამდა აზრ უღუდ თიშ მსახურებას. თინეფიშ სიტყვეფ იობის ირნერ იმენდის მეუდინუანდჷ.

9. მუქ მეხვარ იობის, ქუგურზკო ოტანჯებელს?

⁹ წერმიდგინით თეცალ სიტუაცია: იობ აშახე ტუტას დო თის ჭუას ვეგნუღანს (იობ. 2:8). თე სუმ ქომოლკოჩ ირიათო ოცად, თის რეპუტაცია გილულუას დო ურაგად, ნამდა ჯგირ პიროვნება ვა რე. სქუალეფიშ ღურაშ უკულ იობის მუთუნიშ დუდ ვა უღჷ დო გურ აფჷ ხაშილ. დიო თის ხონარ ვეკუღ (იობ. 2:13—3:1). თიშ ითამ მეგობრეფიშ აზრით, იობ თიშენ ვეჩიებ მუთუნს, ნამდა ღორონთის ოჭიშ ქურთინუ. თინეფ მანგარო ჩირთუნა! ართ მომენტის იობ დუდის ეუკინანს, გინაჯინე თე ქომოლკათას დო იჩიებ: „ონდო ცოცხალ ვორექ, ვა უღალატენქ ღორონთის!“ (იობ. 27:5). მუქ მეხვარ იობის, ქუგურზკო თესხი ოტანჯებელს? მანგარ გლახა მდგომარეობას რდუნ თიმწკუმა ხოლო, თის ვა უდინუაფ იმენდ, ნამდა მოჸოროფე ღორონთ ქიმეხვარებუდ. თის უჩქუდ, ნამდა დოღურკონ ხოლო, იეჰოვა გათელენდჷ (იობ. 14:13—15).

10. მუს მოგურუანა იობიშ შემთხვევა?

¹⁰ იობიშ შემთხვევაშე ჟირ მუდგარენს ბგურაფლენთ. ართ თინა, ნამდა სატანას ვეშულებ, ვარია ქუმორაგადაფუან იეჰოვაშე.  დო მაჟია, იეჰოვას უჩქჷ, მუ მდგომარეობას ვორეთ. იობიშ შემთხვევა შხვა მნიშვნელოვან მუდგარენეფს ხოლო მოგურუანა. გუვარჩუათ თინეფშე მუსხირენ.

11. იეჰოვაშ ნდობას ვემვოდინუანთ-და, მუშა შემლებნა ვორდათ დარწმუნებულ? (იაკ. 4:7)

¹¹ იობიშ შემთხვევა მარწმუნენა, ნამდა იეჰოვაშ ნდობას ვემვოდინუანთ-და, შემლებნა გივორჯგინათ არძა სირთულეს დო სატანას ხოლო ქივეწინააღმდეგათ. მუ იჸუაფ თეშ შედეგ? ბიბლია მეჩიებნა, ნამდა ეშმაკ ინტებ ჩქინდე (წეკითხით იაკობიშ 4:7).

12. მუჭო ამანგარენდჷ იობის გათელებაშ იმენდ?

¹² ჩქი ბოლოშა ოკო ბჯერდან, ნამდა იჸუაფ ღურელეფიშ გათელება. მუჭოთ წოხოლენ სტატიას გუვარჩით, ღორონთიშ ართგურობა მიმოდინაფუანინ თიშო, სატანა ღურაშ შიშის ირინუანს. თინა ამტკიცენდჷ, ნამდა იობიქ სიცოცხლე გინისქილიდუკონ თიშენ, ირფელს დათმენდჷ, თინეფ შქას, ღორონთიშ ართგურობას ხოლო. სატანა ჩირთუდ. თიმწკუმა ხოლო, მუჟამსით იობ არძაშ უმოს გლახა სიტუაციას რდჷ დო მიორჩქუდ, ნამდა ღურა ვეიოჩირთუდ, დათმობაშა ვა ულინ. მუქ მეხვარ თის, ქუგურზკო? იობ დარწმუნებულ რდჷ იეჰოვაშ სიჯგირაშა დო უღუდ ძალიერ იმენდ, ნამდა ღორონთ საბოლათ ირფელს ჯგირობუაშა დოთირანდჷ. თის უღუდ რწმენა, ნამდა იეჰოვაქ ცოცხალ რდუნ თეშ ვემეხვარკონ ხოლო, ღურელო იშენ ვა დიტენდჷ დო გათელენდჷ. გათელებაშ იმენდ იობშო რეალურ რდჷ. თინა ჩქინო ხოლო რეალურ ქორენ-და, ღურაშ შიშ ართგურობას ვემმოდინაფუანა.

13. მუშენ ოკო დევეკვირათ, მუ მეთოდეფ გიმირინუ იობიშ დროს სატანაქ?

¹³ ჯგირო ოკო ქიდვეკვირათ, მუ მეთოდეფ გიმირინუ იობიშ დროს სატანაქ, მუშენდა ჩქინწკუმა ხოლო კინ თი მეთოდეფს გიმირინუანს. ყურადღება ქიმიაქცით სატანაშ ბრალდებას: „სიცოცხლეშ მანგიორო ირფელს გამასქიდუ კოჩ [ვართ ხოლო ხვალე იობ]“ (იობ. 2:4, 5). სატანა ამტკიცენს, ნამდა სინამდვილეს ვა მიჸორა იეჰოვა ღორონთ დო ჩქინ სიცოცხლეშო საჭიროქ ქიჸუ-და, თიშ წინააღმდეგ ხოლო მიდურთ. თეს გეძინელ, თის ხოლო ამტკიცენს, ნამდა იეჰოვას ვა უჸორთ დო თიშ გურიშ გახარებელო ჩქინ მონდომას ყურადღებას ვაქციენს. თე ირფელ წინასწარ მიჩქნან თიშ გურშენ, ვამკვაბუნუთ თიშ ტყურეფს.

14. მუს ბგებულენთ განსაცდელეფიშ დროს ჩქინ დუდიშ გურშენ? ქიმიჸონით მაგალით.

¹⁴ სირთულეეფ ჩქინ დუდიშ გიმორკვიებაშ საშვალებათ ოკო მიფრჩქინათ. სირთულეეფქ, ნამდგას იობიქ შეხვად, მეხვარ თის, ქოძირკო, ნამ მხარეთ ოსაჭირუდ გიშასწორება. მაგალთო, თიქ ქოძირ, ნამდა უმოს თანდაბლობა ოსაჭირუდ (იობ. 42:3). სირთულეეფიშ დროს ჩქი ხოლო შემლებნა ჩქინ დუდიშ გურშენ ბრელ მუდგარენ გებგათ. ჯიმა ნიკოლაი c ციხეს ქუდახუნეს თიშ უმკუჯინუო, ნამდა ჯამრთელობაშ სერიოზულ პრობლემა უღუდ. თინა იჩიებ: „ციხე რენტგენჯგურა რე, თინა ოძირანს, მუ თვისებეფ უღჷ ქრისტიანს სინამდვილეს“. მუჟამსით ქობძირუნთ, მუს მოსაჭირნა გაუჯგუშება, შემლებნა თიშე მუშობა ქიდიბჭყათ.

15. მის ოკო ვარჩქილათ დო მუშენ?

¹⁵ ჩქი იეჰოვას ოკო ვარჩქილათ დო ვართ ხოლო ჩქინ ნტერეფს. იობ შურ დო გურით ურჩქილედ, მუჟამსით იეჰოვა ეჩიებუდ თის. ღორონთიქ იობის თეცალ შინაარსიშ სიტყვეფ უწუ: „ქარწყექო ჩქიმ ძალას, ნამდგათ გუვოჭყჷ ირფელ? ირფელს ვორწყექ, მუდგაქ დუდის გიგოტირხჷ. თის ფიქრენქო, ნამდა ვეშმალებე  სქან მოხვარა?“. იობიშ პასუხშე თანდაბლობა დო იეჰოვაშ სიჯგირაშე მარდულობა იძირედ. თიქ თქუ: „აიშახ გუნაგონ მაფუდ სქან გურშენ, მარა ასე გორწყე ჩქიმ თოლეფ“ (იობ. 42:5). მუ მდგომარეობას რდჷ იობ, მუჟამსით თე სიტყვეფ თქუ? თინა ალბათ კინ ტუტას აშახედ, მთელ სხეულს წყლულეფ უღუდ დო სქუალეფ ხოლო ღურელ აფუდ. თეშ უმკუჯინუო, იეჰოვაქ დარწმუნ იობ მუშ ჸოროფაშა დო ქუდაჯერუ, ნამდა იწონუანდჷ თის (იობ. 42:7, 8).

16. მუჭოთ ესაიაშ 49:15, 16-შე ვორწყეთ, მუ ოკო ფშუდან, მუჟამსით სირთულეეფს ფხვადუთ?

¹⁶ ამდღა ხოლო ადამიანეფ შილებე შეურაცხყოფას მუმორინუანდან დო მუთუნიშ ღირსეფ ვა ვორდათინ თეშ მოქცუდან. თეს გეძინელ, ოცადდან, იეჰოვაშ ორგანიზაციაშ დო ჩქინ რეპუტაციაშ გილალუაფას დო ირნერ უბადობას ეკმაწამენდან (მათ. 5:11). იობიშ მაგალითშე ვორწყეთ, მუჭო მონდუნა იეჰოვა დო მუჭო ჯერს, ნამდა განსაცდელეფიშ დროს ართგურო ქუდოფსქიდუთ. თის ჩქი უჸორთ დო დღას ვემიოტენს თის, მიდგას თიშ იმენდ უღჷ (წეკითხით ესაიაშ 49:15, 16). ყურადღება ვემიაქცუათ ღორონთიშ ნტერეფიშ არძა სიტყვას. თურქეთის მახორუ ჯიმა ჯეიმზიშ ოჯახიქ მანგარ სირთულეეფს შეხვად. თინა იჩიებ: „ქიმეფხვადით, ნამდა ღორონთიშ ხალხიშ გურშენ რაგადებულ ტყურეფიშ რჩქილა გურს გომტახუნდეს, ათეშენ მთელ ყურადღება სამეფოშ იმენდშა გეგნიბღით დო აქტიურო გუვაგრძელით იეჰოვაშ მსახურება. შედეგო ხიოლქ ქამოსქიდეს“. იობცალო, ჩქი იეჰოვას ურჩქილეთ  დო ნტერეფიშ ტყურეფს ჩქინ იმენდშა ვაცილებე.

17. მუს ბგურაფლენთ ებრაელეფიშ მა-11 დუდის მოშინაფილ ღორონთიშ ართგურ მსახურეფიშ მაგალითეფშე?

¹⁷ იობ ართ-ართ რე იეჰოვაშ თი მსახურეფ შქას, მიდგაქ ვადინუ გაბედულება დო სიმტკიცე სირთულეეფიშ დროს. თეცალ ბრელ პიროვნება მიშინუ პავლექ ებრაელეფშა მეჭარილ წერილს დო თინეფს „მოწმეეფიშ დიდ ლაშქარ“ გიოდვჷ (ებრ. 12:1). თინეფქ მანგარ სირთულეეფ გინიღეს, მარა მთელ ცხოვრებაშ დინახალე იეჰოვაშ ართგურობა ვა უდინუაფნა (ებრ. 11:36—40). წყარშა ინუცისო თინეფს თესხი მოთვინება დო მონდომაქ? მუშო ოკო რაგად, ვარ! მართალ რე, ვა მოჭიშაფნა ღორონთიშ არძა დუნაპირებუშ შესრულებას, მარა იშენით ვა უდინუაფნა იეჰოვაშ იმენდ. ღორონთიშ მოწონას ღებულენდესინ თეშა დარწმუნებულ რდესინ თიშ გურშენ, ჯერდეს, ნამდა ქოძირუნდეს თიშ დუნაპირებუეფიშ შესრულებას (ებრ. 11:4, 5). თინეფიშ მაგალით უმოსო გინმოჭყვიდირაფუანა, ვა ვოდინუათ იეჰოვაშ იმენდ.

18. მუშ კეთება გაფნა გინოჭყვიდილ? (ებრ. 11:6)

¹⁸ ჩქი ამდღა ფცხოვრენთ მსოფლიოს, ნამუთ გლახაშე უარესშა მეურს (2 ტიმ. 3:13). სატანას ვემუტებ ღორონთიშ ხალხშა გამოცდეფიშ მონწყუალა. თი სირთულეეფიშ უმკუჯინუო, ნამუთ წოხოლე მელნა, მორთ გინოჭყვიდილ მაფდან, ბრელ იფხანდათ იეჰოვაშო, მუშენდა „ცოცხალ ღორონთიშ იმენდ მიღნა“ (1 ტიმ. 4:10). რშუდან, ღორონთიქ იობშო აკეთუნ თენა მარწმუნენა, „მუჭო მიშურს შხვეფიშ მდგომარეობაშა დო მუნერ მოჭყოლოფე რე თინა“ (იაკ. 5:11). ჩქი ხოლო ვა ვოდინუათ იეჰოვაშ ართგურობა დო დარწმუნებულ ვორდათ, ნამდა „დაჯილდოვენს თინეფს, მით მთელ გურით გორუნს თის“ (წეკითხით ებრაელეფიშ 11:6).