1. a) Ino ma raha tsara ampan̈antin̈ainy Jehovah atsika? b) Karakory ma ‘man̈anten̈a Jehovah’ zen̈y? (Zahava “Fan̈azavan̈a.”)

 JEHOVAH mampan̈anten̈a fa ho hisy raha tsara mare miambin̈y zay olo tia izy. Tsy ho ela, izy han̈adoso aretin̈y, alahelo ndreky fahafatesan̈a. (Apok. 21:3, 4) Izy han̈ampy olo ‘pandefitry’ han̈ova tany ty paradisa, fotony iro man̈anten̈a izy. (Sal. 37:9-11) Hataony Jehovah koa raha hahavy atsika tsiaraikiaraiky hanan̈a fifandraisan̈a tsara sady manokan̈a aminany. Tsisy raha mamparavoravo mandilatra zen̈y, izikoa amy zioty edy. Zay zaka tsara ankitin̈y! Kanefa nan̈ino atsika matoky fa ho tanteraka ankitin̈y fampan̈antinan̈any Zan̈ahary aby zen̈y? Fotony raha koa fa volan̈iny Jehovah tsy maintsy ataony fo. Ke rariny atsika izikoa ‘man̈anten̈a Jehovah.’ b (Sal. 27:14) Man̈ano zen̈y atsika, izikoa maharidraha sady ravoravo fo miambin̈y fotoan̈a han̈atantirahany Jehovah fikasan̈anany.​—Isaia 55:10, 11.

2. Ino ma raha efa nataony Jehovah?

² Efa naboakany Jehovah fa man̈atanteraka fikasan̈anany fo izy. Alô atsika hizaha ohatra araiky miavaka. Amy bokiny Apokalypsy, Jehovah nampan̈anten̈a fa aminy andrantsika zioty, izy hamory olo baka amy firenena, foko, fivolan̈ana jiaby ke iro io hiray sain̈y hanompo izy. ‘Vahoaka be’ ikahian̈a antokonolo miavaka io amy zioty. (Apok. 7:9, 10) Samby isany tany faviandro lelahy, viavy avio tsaiky maro be aby io, kanefa iro miray sain̈y miran̈a lafamỳ araiky mihavan̈a tsarabe. (Sal. 133:1; Jaona 10:16) Olo an̈isany vahoaka be io koa mazoto mitory. Iro vôn̈ono hikoran̈a aminolo jiaby tihitandren̈y  raha tsara hantin̈aindro. (Mat. 28:19, 20; Apok. 14:6, 7; 22:17) Ke izikoa anao an̈isany vahoaka be io, hay be fa ten̈a raha matomboko aminao raha tsara hantin̈ainao aminy hoavy zen̈y.

3. Ino ma tanjon̈ony Satana?

³ Tiany Devoly hadoso aminao fan̈antinan̈anao io. Ataony raha hahavy anao hieritreritry fa Jehovah tsy mijery anao sady tsy mitana vava efa nataony. Ino vokany izikoa tatrany Satana tanjon̈onany zen̈y? Ho kivy anao, ke ho vôly hanompo Jehovah foeky anao amy farany. Zen̈y tsarabe raha nataony tamy Joba.

4. Ino ma raha hidinihintsika ato? (Joba 1:9-12)

⁴ Hidinihintsika ato ino aby tetiky nampiasainy Satana baka Joba hivadiky amy Jehovah. (Vakia Joba 1:9-12.) Ho hitantsika ato koa raha mety ianarantsika baka amy tantarany Joba, avio nan̈ino atsika mila mangala onon̈o fo fa Zan̈ahary tia atsika sady han̈atanteraka fampan̈antinan̈anany.

5-6. Tan̈atiny fotoan̈a fôhiky fo, ino raha nandalo tamy Joba?

⁵ Nilamin̈y fiain̈anany Joba. Kamarady mare iro roeny Jehovah. Nananjanaka maro koa izy, ary iro jiaby tran̈o araiky ten̈a nifankatia. (Joba 1:1-5) Pan̈arivo mare i Joba. Fa tandraraiky, nivadiky ambony ambany fiain̈ananany. Voanalohany, very fanan̈ananany. (Joba 1:13-17) Naty koa zanakanany jiaby. Miniminia hely baka! Raha jiaby zen̈y nandalo tan̈atiny fotoan̈a fôhiky fo. Izikoa fa misy raimandreny maty zanaka, tsy hay fomba hivolan̈ana alahelondro. Fa niny Joba, zanakanany folo mianadahy niaraka maty. Mira nilatsahambaratra iro roe fivadiany! Rariny izikoa Baiboly mivolan̈a fa nan̈atriaka lambanany i Joba sady nitomoan̈y nandohaliky tamy fotaka. Mare loatra raha navoa izy!​—Joba 1:18-20.

⁶ Vôly ma Satana? Aha! Mbala nasiany baibay koa ain̈iny Joba, ke evandraha nanehoko mare i Joba sady nen̈atra mare taminy aretin̈inany io. (Joba 2:6-8; 7:5) Taloha, izy najainy fiarahamonin̈y; nangataka torohevitry taminany koa olo. (Joba 31:18) Fa iziô iro miary koa fa mahita izy. Nilefalefa izy aby, na iry rahalahiny, na kamaradiny marikitry, firaka aminolo niasa taminany.​—Joba 19:13, 14, 16.

7. a) Tan̈atiny jeriny Joba, nan̈ino izy nijaly, kanefa ino raha tsy nataony foeky? b) Akory mety hahavy Kristianin̈y araiky hiaritry raha karaha amy sary io?

⁷ Tiany Satana i Joba hieritreritry fa baka amy Jehovah meloko amy Joba mahavy Joba mijaly. Tandraraiky, niaraka nihina tamy tran̈o araiky zanakany Joba folo mianadahy. Nandefa tsiko mare tsarabe i Satana baka tran̈o nisy iro io ho rongana tamindro. (Joba 1:18, 19) Nandefa môtro baka tandan̈itry koa i Satana nan̈ôro ondrikondrikiny Joba ndreky olo nampiasainy niambin̈y iro io. (Joba 1:16) Baka tandan̈itry môtro ndreky tsiko mare be io, ke mety nihevitry donko i Joba fa baka tamy Jehovah izio. Tan̈atiny jerinany, mety nan̈ano raha nampalahelo Jehovah donko izy. Ndray zen̈y, Joba tsy nety nan̈ozon̈o Babany andan̈itry an̈y foeky. Hainy baka fa, tan̈atiny taon̈otaon̈o, maro zaka tsara namezany Jehovah izy. Mety ho karaha ty raha tan̈atiny dinikinany: ‘Izikoa zaho ravoravo nahazo raha tsara maro baka tamy Jehovah, mila vôn̈ono koa zaho han̈eky raha ratsy ambelany mandalo.’ Ho izy: ‘Derain̈a fo an̈aran̈any Jehovah.’ (Joba 1:20, 21; 2:10) Ke ndray very fanan̈ananany, maty zanakanany aby io avio narary mare izy, Joba tsy nety hivadiky foeky. Mbala nisy raha hafa koa nataony Satana.

8. Ino tetiky hafa nampiasainy Satana, baka Joba hivadiky?

 ⁸ Mbala nampiasa tetiky hafa koa i Satana. Olo telo lahy niaboko ho kamaradiny Joba nampiasainy. Nataondro raha hahavy i Joba hahatsiaro ten̈a tsisy dikany. Nivolan̈a iro fa maro zen̈y raha tsy manjary nataony Joba ke zen̈y nahavy izy nijaly. (Joba 22:5-9) Ary ndray i Joba tsy nan̈ano raha ratsy, nivolan̈a koa iro fa tsisy varany izy miezaka man̈ano raha mamparavoravo Zan̈ahary, fotony ezakanany jiaby zen̈y tsy ahoany Zan̈ahary aby. (Joba 4:18; 22:2, 3; 25:4) Nataondro foeky raha nahavy Joba hieritreritry fa Zan̈ahary tsy tia izy, tsy mijery izy, avio tsisy varany izy manompo Zan̈ahary. Joba ma nieritreritry fa efa tsisy raha antinain̈y eky?

9. Ino raha nan̈ampy i Joba hanan̈a korazy ndreky angôvo hiaretan̈a fo?

⁹ Miniminia hely baka raha nandalo. Joba nipetraka tamy jôfo, nanehoko mare ain̈inany. (Joba 2:8) Nivolan̈a iro namany aby io fa izy zen̈y olo tsy manjary, avio tsisy raha manjary raha nataony. Efa iô edy alahelony Joba tamy nifatesany zanany folo aby in̈y, fa mbala nanôsoko zen̈y koa raha nataondro telo lahy aby io. Tamy voanalohany, Joba nangin̈y fo. (Joba 2:13–3:1) Ary raha zen̈y hitandro namany aby io. Ke izikoa iro nieritreritry fa hivadiky amy Zan̈ahary niasa izy edy i Joba, diso hevitry iro. Nisy fotoan̈a i Joba nisan̈andra sady nizaha iro namany vandivandy aby io, avio nivolan̈a karaha ty: “Zaho tsy han̈eky hivadiky zen̈y foeky, nata zaho afaka fahin̈ana.” (Joba 27:5) Ino raha nan̈ampy i Joba hanan̈a korazy ndreky angôvo hiaretan̈a? Ndray tiô raha mafy niaretany aby io, izy tsy vôly nan̈anten̈a Jehovah. Natoky izy fa Zan̈ahary be fitiavan̈a tompoeny io tsy maintsy han̈ampy izy. Ary ndray san̈atria maty izy, natoky izy fa mbala vitany Jehovah fo hamelon̈o izy ndraiky.​—Joba 14:13-15.

10. Mampianatra atsika ino ma tantarany Joba in̈y?

¹⁰ Tantarany Joba io mampianatra atsika fa tsy ho vitany Satana hiforse atsika hiala Jehovah, avio hainy Jehovah raha jiaby mandalo amy fiain̈anantsika. Tantara io koa man̈ampy atsika hahay ino marin̈y raha maventy tafiditry amy fitsapan̈a nahazo Joba io. Handiniky raha sasany ianarantsika baka amy Joba atsika iziô.

11. Ino raha azontsika antoko, izikoa atsika matoky Jehovah fo? (Jakoba 4:7)

¹¹ Hitantsika baka amy tantarany Joba fa ho vitantsika hiaritry zay fitsapan̈a mandalo amintsika ndreky hanohitry Satana, izikoa atsika matoky Jehovah. Man̈amia toky atsika Baiboly fa hilefa atsika Devoly, izikoa atsika man̈ano zen̈y.​—Vakia Jakoba 4:7.

12. Nan̈ino atsika mivolan̈a fa ten̈a nankahery i Joba fatokisany fa misy ankitin̈y fitsanganan̈a amy maty zen̈y?

¹² Mila matoky angôvo jiaby atsika fa Jehovah mbala hamelon̈o olo maty. Efa nidinihintsika tamy lahatsoratra talohany araiky ty fa hainy Satana atsika mavozo maty, ke matetiky izy man̈araraotro tahotrontsika zen̈y beky atsika hivadiky. Nivolan̈a i Satana fa Joba zen̈y tsy maintsy hiala Jehovah, izikoa zen̈y hiarovany ain̈inany. Diso hevitry i Satana. Nisy fotoan̈a i Joba nieritreritry izy efa hofoaty foeky. Ndray zen̈y, tsy tan̈atiny jerinany foeky hivadiky tamy Jehovah. Vitany Joba fo niaritry, fotony izy natoky fa Jehovah tsara toetry, avio natoky izy fa Jehovah tsy maintsy han̈ano raha fo han̈ampian̈a izy. Ary ndray Jehovah tsendriky han̈adoso raha nampijaly izy aby io amy fahavelon̈onany, Jehovah tsy maintsy mbala hanangana izy amy maty fo aminy hoavy. Tamy Joba, fitsanganan̈a amy maty io raha ten̈a misy. Ke izikoa inoantsika mare koa izio, tsisy raha hahavita hampivadiky atsika, ndray fahafatesan̈a.

13. Nan̈ino ma atsika mila mangala onon̈o tsarabe tetiky jiaby nampiasainy Satana tamy Joba in̈y?

¹³ Mila alaintsika onon̈o fo tetiky jiaby nampiasainy Satana tamy Joba in̈y, fotony mbala izin̈y fo ampiasainy hamangoan̈a atsika. Satana tsy raha nankaratsy i Joba fo fa atsika koa. Izy nivolan̈a: “Zay raha anan̈anolo [olo jiaby fa tsy i Joba fo] hamiany hiarovan̈a ain̈inany.” (Joba 2:4, 5) Namandraha tihivolan̈a izy fa atsika tsy ten̈a tia Jehovah, avio tsy maintsy hiala Jehovah fo atsika izikoa zen̈y tsy hahafaty atsika. Tihivolan̈a koa izy fa tsisy varany atsika miezaka man̈ano raha mamparavoravo Jehovah, fotony Jehovah zen̈y tsy tia atsika. Efa tsy vaovao amintsika tetidratsiny Satana aby zen̈y, ke atsika tsy han̈eky hiribiribeny.

14. Ino mahatsara atsika miatriky fitsapan̈a?

¹⁴ Fitsapan̈a mandalo amintsika tokony hararaotintsika hianaran̈a momba ain̈intsika. Karakory ma zen̈y? Fitsapan̈a nandalaovany Joba iziô nan̈ampy izy hahita ino aby raha mbala nila nivoany. Ohatra, nanjary tontohitry izy fa mbala nila nanetry ten̈a izy tamy raha sasany. (Joba 42:3) Mila mandiniten̈a koa atsika izikoa fa miatriky raha sarotro. Karaha ty nambarany Nikolay, c rahalahy araiky nigadra kanefa narary mare: “Fotoan̈a nidokoako tamy prizon nan̈ampy zaho hahita toetry mbala nila nankatsaraiko.” Ho moramora amintsika hiova, izikoa haintsika ino fahalimian̈antsika.

15. Azovy ma ten̈a tokony tandrin̈esantsika? Nan̈ino?

¹⁵ Raha volan̈iny Jehovah fo tokony tandrin̈esantsika fa tsy niny fahavalontsika. Karaha zen̈y nataony Joba. Miran̈a nampisaintsain̈y izy karaha ty i Jehovah: ‘Mba diniha hely edy karakory angôvo nampiasaiko tamy zaho namôron̈o! Hitako aby raha jiaby  mahazo anao io. Anao iziô mieritreritry fa tsy vitako man̈ampy anao?’ Nanetry ten̈a i Joba sady nankasitraka Jehovah amy toetry tsara anan̈any. Ke ho Joba karaha ty: “Efa ren̈iko fo raha momba anao, fa iziôty ndraiky, masonaka foeky mahita anao.” (Joba 42:5) Mety mbala nipetraka tamy jôfo donko i Joba, taminizy nan̈aboaka volan̈a aby io. Ain̈inany jiaby feno baibay, avio izy mbala nalahelo zanakanany folo naty aby in̈y. Kanefa, Jehovah nan̈amia toky izy fa tiany mare i Joba sady nahazo sitraka taminazy.​—Joba 42:7, 8.

16. Izikoa Isaia 49:15, 16 dinihin̈y, ino raha mila alaintsika onon̈o lera atsika miaritry fitsapan̈a?

¹⁶ Amy zioty koa, mety hisy olo hankaratsy atsika ndreky tsy han̈isy fôtiny atsika. Mety ho alaindro baraka atsika, na atsika tsiaraikiaraiky zen̈y na fandaminan̈a, ke ‘hamôron̈o vandy iro sady hivolan̈a fa tsisy raha manjary raha ataontsika.’ (Mat. 5:11) Hitantsika baka tamy tantarany Joba in̈y fa Jehovah matoky atsika. Hainy fa vitantsika tsy hivadiky aminany, ndray atsika miaritry fitsapan̈a. Jehovah ten̈a tia atsika, ary izy tsy mety han̈ary zay olo man̈anten̈a izy. (Vakia Isaia 49:15, 16.) Ke aza jiren̈a foeky fan̈aratsian̈a ataony fahavalony Zan̈ahary! Niaritry raha farany sarotro Rahalahy James mipetraka a Turquie an̈y. Karaha ty ho izy: “Tsapanay fa zahay koa fa mitandren̈y vandy aparitakanolo tsy tia vahoakany Jehovah, zahay nanjary kivy. Tapakevitry zahay fa hifantoko amy raha handeha hataony Fanjakan̈any Zan̈ahary ndreky hifen̈y fo hazoto amy fanompoan̈a Jehovah, ke ravoravo fo zahay.” Karaha Joba, mifen̈a fo hitandren̈y Jehovah.  Vandy alefany fahavalontsika aby io tsy hamono môtrony fan̈antinan̈a an̈atiny fôntsika ao.

17. Ino ma raha ianaranao baka amy lelahy ndreky man̈angy tsy nivadiky koran̈iny Hebreo toko faha-​11?

¹⁷ Joba zisty araiky amy panompony Jehovah tsy nivadiky sady nanan̈a korazy fo ndray iro niaritry fitsapan̈a farany mare. Mbala misy maro hafa koa niton̈oniny apostoly Paoly tamy taratasy nisoratiny tamindro Kristianin̈y hebreo aby io. ‘Vavolombelon̈o maro be miran̈a rôndro’ ivolan̈any iro io ao. (Heb. 12:1) Iro jiaby io samby niaritry raha farany sarotro, kanefa iro tsy nivadiky tamy Jehovah foeky firaka iro naty. (Heb. 11:36-40) Very bôriny ma ezakandro ndreky fiaretan̈andro zen̈y? Aha! Iro mbala nan̈anten̈a Jehovah fo. Ndray tsendriky tanteraka tamy fahavelon̈ondro raha jiaby nampan̈antin̈ainy Jehovah, natoky iro fa mbala ho hitandro fo raha aby zen̈y, fotony haindro fa iro nankasitrahiny Jehovah. (Heb. 11:4, 5) Modely nambelandro zen̈y man̈ampy atsika ho tapakevitry han̈anten̈a Jehovah fo.

18. Tapakevitry han̈ino ma anao? (Hebreo 11:6)

¹⁸ Mahairatsy fo donia misy atsika ty. (2 Tim. 3:13) Satana tsy vôly mitsapa finoan̈any vahoakany Jehovah. Ndray ino ndray ino raha sarotro mbala ho avy, irarian̈a atsika ho tapakevitry han̈ano erakany vitantsika amy fanompoan̈a Jehovah, ndreky hatoky fa amy ‘Zan̈ahary velon̈o’ nan̈apitrahantsika fan̈antinan̈antsika. (1 Tim. 4:10) Tsaraova akory nataony Jehovah nitahy i Joba. Hitantsika baka amy zen̈y fa “Jehovah ten̈a be fitiavan̈a sady mamindra fô.” (Jak. 5:11) Irarian̈a koa atsika tsy hivadiky amy Jehovah, sady hatoky fo fa izy han̈amia hatsaran̈a “lan̈iany olo mitady izy mare.”​—Vakia Hebreo 11:6.