NGANI JAKULIJIGANYA 27
Tumkulupilileje Yehofa
“Myoyo mwakulupilileje AMBUJE. Mŵeje ŵamachili, ni mkajasa mtima.”—SAL. 27:14.
NYIMBO NA. 128 Tupilile Mpaka Kumbesi
YACHITULIJIGANYE a
1. (a) Ana Yehofa atupele chembecheyo chamtuli? (b) Ana ‘kwakulupilila AMBUJE’ kukusagopolela chichi? (Alole “Ngopolelo ja Maloŵega.”)
YEHOFA apeleche chembecheyo chambone mnope kwa ŵandu ŵakusamnonyela. Pachangakaŵapa, jwalakwe chachimasya yilwele, yindu yakulagasya nganisyo soni chiwa. (Chiw. 21:3, 4) Yehofa chachakamuchisya ŵandu “ŵakulitulusya” ŵakusakulupilila kuti jwalakwe chachichenga chilambochi nikuŵa paladaiso. (Sal. 37:9-11) Nambosoni chachitendekasya kuti jwalijose aŵe paunasi wambone ni jwalakwe. Yeleyitu yichiŵa yakusangalasya mnope kupunda mwatukusangalalila apano. Chelechitu chili chembecheyo chakusangalasya mnope. Nambo ana chichi champaka chitukamuchisye kuti tukulupilileje kuti Mlungu chachikwanilisya yeleyi? Yehofa jwangalepela kwanilisya yindu yasasile kuti chachiyitenda. Ligongo lya yeleyi tukwete magongo gambone ‘gakwakulupilila AMBUJE.’ b (Sal. 27:14) Tukusalosya yeleyi patukwembecheya mwakuwusimana mtima soni mwakusangalala ndaŵi jele Mlungu chachikwanilisya chakulinga chakwechi.—Yes. 55:10, 11.
2. Ana Yehofa alosisye kala chichi?
2 Yehofa alosisye kala kuti ndaŵi syosope akusatenda yasasile. Aganichisye chisyasyo chimo chakuyichisyachi. M’buku ja Chiwunukuko, Yehofa jwasasile kuti mundaŵi jetu jino jwalakwe chachasonganganya ŵandu ŵakulekangana mitundu soni yiŵecheto. Jwalakwe chachatendekasya jemanjaji kuti amtumichileje mwakamulana. Masiku agano gulu ja ŵanduji jikusakolanjidwa kuti “likuga lya ŵandu ŵangaŵalanjika.” (Chiw. 7:9, 10) M’guluji mwana achalume, achakongwe soni ŵanache. Atamose kuti jemanjaji ali ŵakulekangana mitundu, yiŵecheto soni kwakutyochela, nambope ali liŵasa limo lyapachilambo chosope lyakamulana soni lyamtendele. (Sal. 133:1; Yoh. 10:16) Ŵanduŵa akusakolanjidwasoni kuti ŵakulalichila ŵakulimbichila. Ndaŵi syosope, jemanjaji akusaŵa ŵakoseka kwalalichila ŵandu ya chembecheyo chakwete. (Mat. 28:19, 20; Chiw. 14:6, 7; 22:17) Naga wawojo ali mu guluji, ngatukukayichila kuti chembecheyo cha yindu yambone yayikwika msogolo chili chakusosekwa mnope kwa wawojo.
3. Ana chakulinga cha Satana chili chichi?
3 Satana akusasaka kwatendekasya wawojo kuti akakola chembecheyo cha yindu yambone yayikwika msogolo. Jwalakwe akusasaka kwatendekasya wawojo kuti akakulupililaga yakuti Yehofa akusiŵasamalilaga, soni yakuti chachikwanilisya yaŵasasile kuti chachitenda. Naga tukukulupilila mabosa ga Satanaga, mpaka tutenguche soni kwika pakuleka kumtumichila Yehofa. Mpela mwachituyiwonele munganiji, Satana jwalinjile kumtendekasya Yobu kuti akakola chembecheyo soni kuti aleche kumtumichila Yehofa.
4. Ana chitukambilane chichi munganiji? (Yobu 1:9-12)
4 Munganiji chitukambilane matala gaŵakamulichisyaga masengo Satana pakusaka kumlepelekasya Yobu kuŵa jwakulupichika. (Aŵalanje Yobu 1:9-12.) Chitukambilanesoni yampaka tulijiganye kwa Yobu soni ligongo lyakwe tukusosekwa kumbuchilaga yakuti Mlungu akusatunonyela soni kuti chachikwanilisya yindu yaŵasasile kuti chachitenda.
SATANA JWALINJILE KUMTENDEKASYA YOBU KUTI AKAMKULUPILILA MLUNGU
5-6. Ana kwakandaŵi kamnono yindu yachenjile wuli paumi wa Yobu?
5 Yindu yamjendelaga chenene Yobu. Jwalakwe jwaliji paunasi wambone ni Yehofa. Jwakwete liŵasa lyekulungwa lya ŵandu ŵakamulana, nambosoni jwaliji jwakusichila. (Yob. 1:1-5) Nambo lisiku limpepe yindu yosope yajwakwete Yobu yajonasiche. Chandanda chajonasiche chipanje chakwe. (Yob. 1:13-17) Kaneko ŵanache ŵakwe wosope ŵawile. Agambe ganichisya muŵapikanile kupweteka Yobu. Yikusaŵa yakupweteka mnope kwa achinangolo pajasiche mwanache jwawo. Ngatukukayichila kuti Yobu ni ŵamkwakwe yapweteche mnope paŵapikene kuti ŵanache ŵawo wosope 10 awile. Ngatukukayichila kuti Yobu jwalisile mnope mpaka kuligwisya pasi, kombolekasoni jwayikene pakupapula yakuwala yakwe.—Yob. 1:18-20.
6 Kaneko, Satana jwatendekasisye kuti Yobu alwale ulwele wakupweteka mnope. (Yob. 2:6-8; 7:5) Mkaniyitendekwe yeleyi, ŵandu ŵa mudela jakwe ŵamchimbichisyaga mnope Yobu. Mwamti ŵajawulaga kwa jwalakwe kukuŵenda lunda. (Yob. 31:18) Nambo yili yitendekwe yeleyi jemanjaji ŵalesile kumŵalanjila. Kupwatika pelepa, ŵachibale ŵakwe, achimjakwe ŵapamtima nambosoni ŵamasengo ŵakwe ŵalesile kutenda najo yindu.—Yob. 19:13, 14, 16.
Abale ni alongo ŵajinji masiku agano mpaka apikanichisye muŵapikanile Yobu pajwasimene ni yakusawusya (Alole ndime 7) d
7. (a) Ana Yobu jwakulupililaga kuti yakusawusya yakwe yatyochele kwapi? Ana jwalakwe jwakanile kutenda chichi? (b) Ana Mklistu mpaka asimane ni yakusawusya yamtuli mwakulandana ni chiwulilichi?
7 Satana jwasakaga kuti Yobu akulupilileje kuti akusimana ni yakusawusya ligongo lyakuti Mlungu ngakumnonyela. Mwachisyasyo Satana jwatendekasisye kuti nyumba jiŵaliji ŵanache ŵa Yobu ŵakwana 10 jigwe ni chimbungo chamachili. Ŵanacheŵa ŵaliji mkulya yakulya yalumo kwineku ali mkukunguluka. (Yob. 1:18, 19) Satana jwatendekasisyesoni kuti moto wakutyochela kwinani ujonanje yilango ya Yobu soni ŵamasengo ŵaŵayisamalilaga. (Yob. 1:16) Ligongo lyakuti chimbungo soni motowu yatyochelaga kwinani, yamtendekasisye Yobu kulupilila kuti Mlungu ni jwatendekasisye kuti asimane ni yakusawusyayi. Yeleyi yamtendekasisye Yobu kuganisya kuti komboleka atesile yindu yakumtumbilikasya Yehofa. Atamose yaliji myoyo, Yobu jwakanile kumjimba magambo Mlungu. Jwalakwe jwayimanyi kuti kwa yaka yejinji Yehofa jwaŵele ali mkumtendela yindu yambone. Myoyo Yobu jwatandite kuyiwona kuti naga jwasangalalaga kupochela yambone, nikuti jwasosekwagasoni kuŵa jwakusachilila kupochela yakusakala. Jwalakwe jwasasile kuti, “Lina lyawo lichimbichikwe.” (Yob. 1:20, 21; 2:10) Chipanje cha Yobu chajonasiche, ŵanache ŵakwe ŵawile, soni jwalwasile ulwele wakupweteka mnope. Nambope jwalakwe jwapitilisye kuŵa jwakulupichika kwa Yehofa. Nambo Satana ngalechela papopo.
8. Ana litala line lyapi lyaŵakamulichisye masengo Satana pakusaka kumlinga Yobu?
8 Satana jwakamulichisyesoni masengo litala line pakusaka kumlinga Yobu. Jwalakwe jwakamulichisye masengo achimjakwe ŵatatu ŵa Yobu kuti akamtendekasye Yobu kulipikana kuti ali jwangali mate. Achimjakweŵa ŵamsalile kuti akusimana ni yakuwusya ligongo lyakuti jwatesile yakusakala yejinji. (Yob. 22:5-9) Jemanjaji ŵamtendekasisye Yobu kuganisya kuti atamose kuti jwatesile yindu yambone yejinji, nambo Mlungu nganakola nayo masengo. (Yob. 4:18; 22:2, 3; 25:4) Achimjakweŵa ŵamtendekasisyesoni Yobu kukayichila yakuti Mlungu akusamnonyela, kumsamalila nambosoni kuti pangali chilichose champaka apate ligongo lyakumtumichila Mlungu. Yaŵaŵechete achimjakwe ŵa Yobuŵa yikamtendekasisye kuti alipikaneje kuŵa jwangali chembecheyo chilichose.
9. Ana chichi chachamkamuchisye Yobu kuŵa jwakulimba mtima?
9 Aganichisye yayamtendechele Yobu. Jwalakwe jwatemi pa liwu kwineku ali mkupikana kupweteka mnope. (Yob. 2:8) Kaneko achimjakweŵa ŵapitilisye kumsalila kuti nganaŵa mundu jwambone soni pangali chilichose chambone chaŵatesile. Yobu jwasimene ni yakusawusya yejinji, soni jwaliji jwachanasa mnope ligongo lya chiwa cha ŵanache ŵakwe. Pandanda Yobu nganajanga chilichose. (Yob. 2:13–3:1) Naga achimjakwe ŵa Yobuŵa ŵaganisyaga kuti ungajanga wa Yobu wagopolelaga kuti jwalakwe chaleche kumtumichila Yehofa, nikuti ŵaganisyaga mwakulemwecheka. Kaneko, Yobu jwajimwisye mtwe nikwalola achimjakwe ŵala. Ni jwatite, “Tinjipitilisya kulupichika mpaka ndaŵi ja chiwa changu.” (Yob. 27:5) Ana chichi chichamkamuchisye Yobu kuŵa jwakulimba mtima atamose kuti jwasimanaga ni yakusawusya? Atamose pandaŵi jiŵatengwiche mnope, Yobu jwakulupililaga kuti Mlungu chachimasya yakusawusya yakwe. Jwamanyililagasoni kuti atamose ali awile, Yehofa chachimjimusya.—Yob. 14:13-15.
ANA MPAKA TUSYASYE CHAMTULI KULUPICHIKA KWA YOBU?
10. Ana ngani ja Yobu jikutujiganya chichi?
10 Ngani ja Yobu jikusatujiganya kuti Satana nganaŵa akombwele kutulekasya kumtumichila Yehofa. Jikusatujiganyasoni kuti Yehofa akusamanyilila chilichose chachikututendechela paumi wetu. Ngani ja Yobuji jikutukamuchisyasoni kola nganisyo syambone payindu yatukusasimana nayo. Kwende tulole yindu yine yampaka tulijiganye kwa Yobu.
11. Naga tukupitilisya kumdalila Yehofa, ana tuchiŵa ŵakusimichisya kutenda chichi? (Yakobo 4:7)
11 Yobu jwalosisye kuti naga tukupitilisya kumdalila Yehofa mpaka tukombole kupilila chakusawusya chilichose soni kumkana Satana. Ana yeleyi mpaka yikole yakuyichisya yamtuli? Malemba gakusatusimichisya kuti naga tukutenda yeleyi Satana chachitutila.—Aŵalanje Yakobo 4:7.
12. Ana kulupilila kuti ŵawe chachijimuka kwamkamuchisye chamtuli Yobu?
12 Tukusosekwa kulupililaga mnope chembecheyo cha kwimuka ku ŵawe. Mpela mwatwaŵechetele mungani jipite jila, Satana akusakamulichisya masengo kogopa chiwa pakusaka kututendekasya kuti tukaŵa ŵakulupichika kwa Yehofa. Satana jwasasile kuti Yobu mpaka atende chilichose atamose kuleka kumtumichila Yehofa pakusaka kulupusya umi wakwe. Apatu Satana jwalambusyaga. Tukuŵecheta yeleyi ligongo lyakuti atamose Yobu paŵayiwonaga kuti mpaka awe, jwalakwe nganaleka kuŵa jwakulupichika kwa Yehofa. Kulupilila kuti Yehofa akusatenda yambone soni kuti chachimasya yakusawusya yosope, kwamkamuchisye Yobu kuti akombole kupilila. Yobu jwakulupililaga kuti naga Yehofa ngakumasya yakusawusya yakwe jwalakwe ali chijumi, nikuti kusogolo chachimjimusya kuŵawe. Yobu jwakulupililaga mnope kuti ŵawe chachijimuka. Nombe uwe naga tukwete chikulupi chelechi, ngasitukunda kuti kogopa chiwa kututendekasye kuŵa ŵangakulupichika.
13. Ligongo chichi tukusosekwa kuŵa mesope ni matala gaŵakamulichisye masengo Satana pakumlinga Yobu?
13 Tukusosekwa kuŵa mesope ni matala gaŵakamulichisye masengo Satana pakumlinga Yobu. Jwalakwe akukamulichisya masengo matala gagogo masiku agano. Alole maloŵe gakusisya gaŵaŵechete Satana. “Mundu [jwalijose ngaŵaga Yobupe] akukomboleka kupeleka yosope yakwete kuti jwalakwejo aŵe chijumi.” (Yob. 2:4, 5) Pelepatu, Satana jwagopolelaga kuti nganituŵa tukombwele kumnonyela Yehofa soni mpaka tutende yindu yakutindana ni malamusi gakwe pakusaka kulupusya umi wetu. Satana jwajonjechesyesoni kuti Mlungu ngakusatunonyela soni ngakusatenda chidwi ni chilichose chatukusatenda pakumtumichila. Ligongo lyakuti tukumanyilila chakulinga cha Satana nganituŵa tukulupilile mabosa gakwega.
14. Ana yakusawusya mpaka yitukamuchisye chamtuli kumanyilila mwatuŵelele?
14 Tuyiwoneje yakusawusya yatusimene nayo kuŵa upile wetu wakutukamuchisya kulimanyilila mwatuŵelele. Yakusawusya yaŵasimene nayo Yobu yamkamuchisye jwalakwe kumanyilila yakulepela yakwe soni kongolela. Mwachisyasyo, Yobu jwalijiganyisye kuti jwasosekwaga kuŵa jwakulinandiya mnope. (Yob. 42:3) M’wejisoni mpaka tulimanyilile mwatuŵelele patusimene ni yakusawusya. M’bale jwine lina lyakwe Nikolay, c jwaŵichidwe mundende atamose kuti pandaŵijo jwalwalaga mnope. Jwalakwe jwatite, “Ndaŵi jinaliji mundendeji jangamuchisye kumanyilila ndamo syangusosekwa kongolela.” Patugambile kumanyilila yakulepela yetu, yikusaŵa yangasawusya kuti tuchenje.
15. Ana tukusosekwa kwapikanila ŵani? Ligongo chichi tukusosekwa kutenda yeleyi?
15 Tukusosekwa kumpikanilaga Yehofa ngaŵaga achimmagongo ŵetu. Yobu jwapikanilaga mwakusamala Yehofa pajwaŵechetaga kwa jwalakwe. Mlungu jwamkamuchisye Yobu mwakuŵecheta kuti, ‘Ana mkugawona machili gangu gakupanganya? Ngumanyilila chilichose chachikumtendechela. Ana mkuganisya kuti nganimba ngombwele kumsamalila?’ Yobu jwajanjile mwakulinandiya soni pakuyamichila yindu yambone mnope yaŵamtendele Yehofa, jwasasile kuti, “Nagambaga kupikana ya ŵalakwe ni mapikanilo ganguga, nambo sambano naweni ni meso ganguga.” (Yob. 42:5) Yobu pajwaŵechetaga maloŵega jwaliji ali pa liwu pala, chilu chakwe chili chikwete yilonda soni ŵanache ŵakwe ali awile. Atamose kuti yaliji myoyo, Yehofa ŵamsimichisye Yobu kuti akusamnonyela soni kuti akusasangalala najo.—Yob. 42:7, 8.
16. Mwakamulana ni Yesaya 49:15, 16, ana tukusosekwa kumbuchilaga chichi patusimene ni yakusawusya?
16 Masiku aganosoni ŵandu mpaka atuŵechetele yachipongwe soni kututendela yindu yakulosya kuti tuli ŵangali mate. Chakulinga chawo mpaka chiŵe konanga mbili ja m’weji kapena ja gulu jetu. Kupwatika pelepa jemanjaji mpaka ‘atulambuchisyeje yakusakala yamitundumitundu.’ (Mat. 5:11) Ngani ja Yobu, jitukamuchisye kumanyilila kuti Yehofa akusakulupilila kuti tuchiŵape ŵakulupichika kwa jwalakwe atamose tuli tusimene ni yakusawusya. Yehofa akusatunonyela mnope, soni ngasiŵaleka ŵandu ŵakusamkulupilila jwalakwe. (Aŵalanje Yesaya 49:15, 16.) Tukapikanilaga kapena kuganichisya mnope maloŵe gakunyosya gakusaŵecheta achimmagongo ŵa Mlungu. M’bale James jwakusatyochela ku Turkey jwelesoni liŵasa lyakwe lyasimene ni yakusawusya jwatite, “Twayikopochele kuti kupikanila yindu yaunami yakwamba ŵakutumichila ŵa Mlungu mpaka kututengusye. Myoyo twaganichisyaga mnope ya chembecheyo chetu chakwamba ya Uchimwene wa Mlungu, soni twalipelekaga mnope pakumtumichila Yehofa. Yeleyi yatukamuchisye mnope kuti tusangalaleje.” Mwakulandana ni Yobu, m’wejisoni tukusampikanila Yehofa. Yindu yaunami yakusaŵecheta achimmagongo ŵetu nganiyiŵa yijonasile chembecheyo chetu.
KULUPICHIKA KWAWO KUCHAKAMUCHISYA
Yobu jwapatile upile ligongo lyakuŵa jwakulupichika. Jwalakwe yalumo ni ŵamkwakwe ŵakwete umi wakusangalala kwa ndaŵi jelewu (Alole ndime 17) e
17. Ana alijiganyisye chichi pa chisyasyo cha ŵandu ŵakulupichika ŵakusiŵakolanga m’buku ja Ahebeli chaputala 11?
17 Yobu ali jumo jwa ŵakutumichila ŵa Yehofa ŵaŵapitilisye kuŵa ŵakulimba mtima atamose kuti ŵasimene ni yakusawusya yekulungwa mnope. M’chikalata chakwe chakwawula kwa Ahebeli, ndumetume Paulo jwasasile ya ŵandu ŵane ŵajinji ŵaŵakolasile kuti, “mboni syejinji.” (Aheb. 12:1) Atamose kuti jemanjaji ŵasimene ni yakusawusya yekulungwakulungwa, nambope kwa umi wawo wosope ŵalosisye kuti ŵaliji ŵakulupichika kwa Yehofa. (Aheb. 11:36-40) Ana kupilila soni kulimbichila kwawo kwagambile kwawula pachabe? Iyayi. Atamose kuti jemanjaji paŵaliji chijumi nganakuwona kukwanilichikwa kwa yindu yosope yaŵasasile Mlungu kuti chachitenda, nambope ŵapitilisye kumjembecheya Yehofa. Nambosoni ligongo lyakuti nganakayichilaga kuti Yehofa akusangalala ni yindu yaŵatendaga, jemanjaji ŵakulupililaga kuti chachiyiwona yaŵasasile Yehofa yili mkukwanilichikwa. (Aheb. 11:4, 5) Chisyasyo chawo chambone mpaka chitukamuchisyesoni m’weji kupitilisya kumjembecheya Yehofa.
18. Ana wawojo ali ŵakusimichisya kutenda chichi? (Ahebeli 11:6)
18 Masiku agano tukutama m’chilambo chachikusakala mnope. (2 Tim. 3:13) Satana akupitilisya kwalinga ŵakutumichila ŵa Mlungu. Myoyo, atamose kuti chitusimaneje ni yakusawusya yejinji, tukusosekwa kulimbichila kumtumichila Yehofa, tuli tukwete chikulupi chakuti “chembecheyo chetu chili mwa Mlungu.” (1 Tim. 4:10) Tukumbuchilejesoni kuti yindu yambone yaŵampele Mlungu Yobu yikusalosya kuti Yehofa ‘ali jwachanasa soni jwakusalala mtima.’ (Yak. 5:11) Kwende m’wejisoni tupitilisye kuŵa ŵakulupichika kwa Yehofa, tuli tukwete chikulupi chakuti jwalakwe chachapa upile “ŵele ŵakumsosa jwalakwejo.”—Aŵalanje Ahebeli 11:6.
NYIMBO NA. 150 Amsoseje Mlungu Kuti Akulupuche
a Patukuganichisya ya mundu juŵapilile yakusawusya yejinji, munganisyo mwetu mukusayika ya Yobu. Ana tukulijiganya chichi kwa mundu jwakulupichikaju? Tukulijiganya kuti Satana nganaŵa akombwele kututendekasya kuti tuleche kumtumichila Yehofa. Tukulijiganyasoni kuti ndaŵi syosope Yehofa akusatenda chidwi ni yayikututendechela paumi wetu. Soni mpela yaŵatite Yehofa pakumasya yakusawusya ya Yobu, pangakaŵapa jwalakwe chamasyesoni yakusawusya yosope. Naga tukusalosya kuti tukusakulupilila yeleyi, nikuti tuli mu gulu ja ŵandu ‘ŵakusiŵakulupilila AMBUJE’ yisyesyene.
b NGOPOLELO JA MALOŴEGA: Liloŵe lya Chihebeli liŵaligopolele kuti ‘kulupilila’ likusagopolelasoni “kwembecheya” yine yakwe mwakusachilila. Mpaka ligopolelesoni kumdalila mundu jwine jwakwe.—Sal. 25:2, 3; 62:5.
c Mena gane munganiji tugachenjile.
