1. (a) Mang e athap ni ke pi’ Jehovah ngodad? (b) Mang e be yip’ fan ni ‘nge l’agan’dad ngak Jehovah’? (Mu guy e “Fan Boch e Thin.”)

 RIB manigil e athap ni ke pi’ Jehovah ngak e piin yad ma t’ufeg. Dabki n’uw nap’an ma ra chuweg e m’ar, nge kireban’, nge yam’. (Rev. 21:3, 4) Ra ayuweg e “piin ni yad mmunguy” ni be l’agan’rad ngak ni ngar ngongliyed e re fayleng ney nge mang paradis. (Ps. 37:9-11) Ma ra bing e kanawo’ ngodad ni gad gubin ni ngar da chugurgad ngak mi ri fel’ e tha’ u thildad nge yan i taw nga reb e dodow ni kab gel e fel’ riy nga rogon e tha’ u thildad ngak e chiney. Rib manigil e biney e l’agan’ ni bay rodad! Machane mang fan nib mich u wan’dad nra riyul’ e pi n’en ke micheg Got? Ya Jehovah e dariy ba ngiyal’ ni ma thilyeg e tin ke micheg. Ere aram fan ni bay rogon ni ‘nge l’agan’dad ngak.’ * (Ps. 27:14) Gad ma dag e re n’ey u rogon ni gad be sonnag e Got rodad u fithik’ e gum’an’ nge felfelan’ ni nge lebguy e tin ke micheg.​—Isa. 55:10, 11.

2. Mang e ke mu’ Jehovah i rin’?

² Ke mu’ Jehovah i dag e mich riy nder ma thilyeg e tin ke micheg. Am lemnag reb e kanawo’ ni ke rin’ e re n’ey riy. Ke micheg u lan fare babyor ni Revelation nra yan i taw ko ngiyal’ ney ni gad bay riy ma ra kunuy e girdi’ nga taabang ni kar bad u gubin e nam, nge ganong, ngu gubin e thin ni ngar liyorgad ngak nib taareban’rad. Re ulung i girdi’ ney e ngiyal’ ney e yima yog ni yad fapi “girdi’ ni ke muulung ni pire’ ni pire’.” (Rev. 7:9, 10) Yugu aram rogon nre ulung ney e bay e pumoon, nge ppin, nge bitir riy nib thilthil e nam, nge thin, nge rarogon e gin kar bad riy, machane yad bogi walag ni yad bay u ga’ngin yang e fayleng ni bay e gapas nge taareban’ u thilrad. (Ps.  133:1; John 10:16) Pi cha’ney e yad boch e tamachib ni yad ba pasig. Gubin ngiyal’ ni yad baadag ni ngar weliyed ngak e piin yad ra motoyil murung’agen reb e fayleng ni yad be athapeg ni kab fel’ e par riy. (Matt. 28:19, 20; Rev. 14:6, 7; 22:17) Faanra gur bang ko fare ulung nib ga’, ma dariy e maruwar riy nrib ga’ fan u wan’um e pi n’en bay yib ni kab gel e fel’ riy ni gad be athapeg.

3. Mang e baadag Satan?

³ Baadag Moonyan’ ni nge dabki l’agan’um ko pi n’en bay nga m’on. Baadag ni nge mich u wan’um nder ma lemnagem Jehovah ma dabi tay u gil’ e tin ke micheg. Faanra yag rok Satan ni nge k’aringdad ni nge dabki l’agan’dad ko pi n’en bay nga m’on, ma aram e gad ra rus, maku dabisiy ni gad ra tal ko pigpig ni gad be tay ngak Jehovah. Gad ra fil ni guy Moonyan’ rogon ni nge k’aring Job ni nge dabki l’agan’ ko pi n’en bay nga m’on me tal ko pigpig ngak Jehovah.

4. Mang e gad ra weliy ko re article ney? (Job 1:9-12)

⁴ Gad ra weliy ko re article ney e re miti ban ni fanay Satan ni nge guy rogon ni nge k’aring Job ni nge dabki par nib yul’yul’. (Mu beeg e Job 1:9-12.) Ku gad ra weliy e n’en nrayog ni ngad filed rok Job, nge fan nib t’uf ndab da paged talin ni gad ba t’uf rok Got ma ra lebguy e tin ke micheg.

5-6. Mang e buch rok Job u lan ba ngiyal’ nde n’uw nap’an?

⁵ Rib fel’ rogon e par rok Job. Rib fel’ e tha’ u thilrow Jehovah, mab ga’ e tabinaw rok ni yad ba felfelan’, ma ri kub flaab. (Job 1:1-5) Machane u lan taa borran, mab chugur i gubin ban’en rok ni mul u pa’. Som’on e mul e flaab rok u pa’. (Job 1:13-17) Ngemu’ me yim’ gubin e bitir rok. Aygum par ngam lemnag e re n’ey. Ba gel e kireban’ ni ma tay e piin gallabthir u nap’an nra yim’ reb i fakrad. Ere am lemnag gelngin e mooch’och ni tay laniyan’ Job nge leengin u nap’an nra nangew ni ke yim’ gubin i pi fakrow ni yad ragag u gubin. Dariy e maruwar riy ni aram fan ni guchthuy e mad rok ni kari kireban’ me paraw nga but’!​—Job 1:18-20.

⁶ Bin migid me k’aring Satan ba mit e m’ar ni nge yib ngak Job nib gel e amith nge tamra’ riy. (Job 2:6-8; 7:5) Immoy ba ngiyal’ ni i tay e girdi’ fan Job ma yad ma yib ngak ni nge pi’ e fonow ngorad. (Job 31:18) Machane chiney e dakurur chugurgad ko gin bay riy. Gubin e pi walagen ni pumoon, nge pi fager rok nri yad ba chugur, nge pi tapigpig rok ni goo ra pied keru’rad ngak!​—Job 19:13, 14, 16.

7. (a) Mang e lemnag Job ni aram tapgin e gafgow ni be yib ngak, machane mang e siyeg ni nge rin’? (b) Uw rogon nrayog ni nge mada’nag reb e Kristiano reb e skeng ni bod e n’en gad be guy ko sasing?

⁷ Baadag Satan ni nge mich u wan’ Job ni fan ni be gafgow e bochan ndaki fel’ u wan’ Jehovah. Bod ni k’aring bangi nifeng nib gel nge buthug fare naun ni bay fa ragag i bitir ni fak Job u langgin ni yad be abich u taabang. (Job 1:18, 19) Ki k’aring e nifiy ni nge mul u lang nga but’ nge aw ko fapi gamanman rok Job nge piin yad be gafaliy ngar m’ad ni yad gubin. (Job 1:16) Bochan nre nifeng nem nge re nifiy nem e yib u lan e lang nga but’, ma aram fan ni lemnag Job ni Jehovah e ir e ke yib rok. Bochan e re n’ey, ma aram fan ni lemnag nsana bay ban’en ni ke rin’ ni ke kirebnag laniyan’ Jehovah. Yugu aram rogon me siyeg ni nge togopuluw ngak e Chitamangin ni bay u tharmiy. I yog Job ni kab kafram i yib ni boor ban’en nib manigil ni ke pi’ Jehovah ngak. Ere lemnag ni faanra ba felfelan’ ko tin nib fel’ ni i buch rok, ma ere susun e ngki m’agan’ ko tin nib kireb ni be buch rok. I yog ni gaar:  “Nggu pining e sorok nga fithingan [Jehovah]!” (Job 1:20, 21; 2:10) Yugu aram rogon ni ke m’ay e salpiy rok Job, ma ke yim’ pi fak, ma ke m’ar, machane i par nib yul’yul’ ngak Jehovah. Ere ki guy Satan rogon ni nge fanay yugu ban’en ni nge k’aring ni nge dabki yul’yul’.

8. Mang e migid ni fanay Satan ni nge guy rogon ni nge bannag Job?

⁸ Bin migid e fanay Satan dalip ni’ ni ur dake yad e fager rok Job ni ngar k’aringed ni nge lemnag ndariy fan. I yog e pi pumoon ney ni fan ni be gafgow Job e bochan ni boor ban’en nib kireb ni ke rin’. (Job 22:5-9) Kur guyed rogon ni ngar k’aringed ni nge mich u wan’ ndemtrug urngin ban’en nib fel’ nra rin’, ma dariy fan e pi n’em u wan’ Got. (Job 4:18; 22:2, 3; 25:4) Ere n’en yad be rin’ e yad be guy rogon ni nge lemnag nde t’uf rok Got, ma dabi ayuweg, maku dariy fel’ngin ni nge pigpig ngak. Thin nrogned e rayog ni k’aring Job ni nge lemnag ndakuriy ban’en nrayog ni nge l’agan’ ngay.

9. Mang e ayuweg Job ni nge par nde rus mab mudugil?

⁹ Mu susunnag u lanin’um e n’en be buch. Bay Job ni ke par nga but’ nga fithik’ e awat ni kari gafgow ko amith. (Job 2:8) I par e pi pumoon nem nga u rogned ni ir be’ nib kireb ma dariy ban’en ni ke rin’ ni bay fan. Kari tomal laniyan’ ko gafgow ni be yan u fithik’, ma ri ku be mooch’och laniyan’ ngak pi fak ni kar m’ad. Som’on e th’ab gulungan nge par. (Job 2:13–3:1) Ere faanra ke lemnag e pi pumoon nem nre n’ey e be yip’ fan ni aram e nge chel Job nge digey Jehovah, ma de puluw e n’en nra lemnaged. Rayog ni bay ba ngiyal’ ni taw ngay me pug Job lolugen nga lang me sap ngorad me gaar: “Gu ra par ni gub yul’yul’ nge mada’ ko ngiyal’ ni ku gum’!” (Job 27:5, NW) Mang e ayuweg Job ni nge par nde rus miki par nib mudugil ni yugu aram gelngin e gafgow ni yan u fithik’? Mus ko ngiyal’ ni kari  mulan’, ma de tal i athapeg nra ayuweg e Got rok nib t’uf rok. Manang ni mus ni faanra yim’ ma ra faseg Jehovah.​—Job 14:13-15.

10. Mang e gad be fil ko fare chep ni murung’agen Job?

¹⁰ Fare chep ni murung’agen Job e be fil ngodad ndabiyog rok Satan ni nge k’aringdad ni ngad digeyed Jehovah, maku manang Jehovah urngin ban’en ni be buch rodad. N’en ni buch rok Job e ku rayog ni nge ayuwegdad ni nge tamilang u wan’dad fan e pi magawon ni gad be mada’nag. Am lemnag boch ban’en nrayog ni ngad filed rok Job.

11. Faan gad ra ulul ni nge pagan’dad ngak Jehovah, ma mang e be micheg e Bible ngodad? (James 4:7)

¹¹ I micheg Job ni faan gad ra ulul ni nge pagan’dad ngak Jehovah, ma demtrug e re miti skeng nrayog ni ngad athamgilgad u fithik’ ma gad togopuluw ngak Satan. Ere mang angin nra yib riy? Be micheg e Bible ngodad nra mil Moonyan’ rodad.​—Mu beeg e James 4:7.

12. Uw rogon ni yib gelngin Job ni bochan e ba mich u wan’ e fos ko yam’?

¹² Ba t’uf ni nge mich u wan’dad e fos ko yam’. Kad weliyed ko fa binem e article nib ga’ ni ma fanay Satan e marus ko yam’ ni nge k’aringdad ni nge dab kud yul’yul’gad. Me Job e yog Satan ndemtrug ban’en nra rin’ ni bochan e nge guy rogon ni nge ayuweg e yafos rok ni kub muun ngay ni nge tal ko pigpig ni be tay ngak Jehovah. Machane de puluw e n’en ni yog Satan. Ya ki mada’ ko ngiyal’ ni be lemnag Job ni aram e nge yim’, miki par nib yul’yul’ ngak Jehovah. Bochan nib pagan’ nga rogon feni manigil Jehovah ma ri kub mich u wan’ nra munmun me chuweg e magawon rok, ma aram e n’en ni ayuweg ni nge athamgil. Ba mich u wan’ ni faanra dabi ayuweg Jehovah u nap’an ni kab fos, ma ra faseg ko yam’ boch nga m’on. Ba riyul’ e fos ko yam’ u wan’ Job. Ere faanra ba riyul’ e re athap ney u wan’dad, ma mus ni faanra ke buch ban’en rodad nrayog ni ngad m’ad riy ma ka gad ra par ni gad ba yul’yul’.

13. Mang fan nib t’uf ni ngad tedan’dad ko pi ban ni fanay Satan u nap’an Job?

¹³ Thingar da tedan’dad ko pi ban ni fanay Satan u nap’an Job ni bochan e aram e pi n’en ni ku be fanay e ngiyal’ ney. Mu tay fanam i yan ko n’en ni yog Satan ni gaar: “Be’ nib girdi’ [gathi kemus ni yigoo Job] e ra pag urngin ban’en ni fan e nge ayuweg e pogofan rok.” (Job 2:4, 5) Ere n’en be yog Satan e gathi riyul’ nib t’uf Jehovah Got rodad ma gad ra digey ya nge yag nda ayuweged e yafos rodad. Ki yog ndad t’ufgad rok Got ma dariy fan u wan’ e athamgil ni gad be tay ni ngad rin’ed e n’en nib m’agan’ ngay. De mich u wan’dad e pi ban rok Satan ni bochan e gad manang e n’en be guy rogon ni nge rin’ ngodad.

14. Mang e rayog ni nge gagiyelnag e pi skeng ni gad ma mada’nag u rarogodad? Mu weliy rogon ni kan susunnag.

¹⁴ Susun e ngaud sapgad ko pi skeng ni gad ma mada’nag ni aram reb e kanawo’ nrayog ni ngad nanged riy boch ban’en u rarogodad. Pi gafgow ni i mada’nag Job e ayuweg ni nge nang boch ban’en nib meewar riy me yal’uweg. Reb riy e nang nib t’uf ni ngki sobut’nag boch e lem rok. (Job 42:3) Ku arrogodad ni boor ban’en nrayog ni ngad nanged u rarogodad u nap’an ni gad be mada’nag boch e skeng. Bay reb e walag ni pumoon ni ka nog Nikolay * ngak nni kalbusnag ni yugu aram rogon nib gel e m’ar ni ke yib ngak. I gaar: “Kalbus e bod ba X-ray ni ma gagiyelnag boch ban’en u rarogon reb e Kristiano nib t’uf ni nge yal’uweg.” Ere nap’an ni gad ra nang e pi meewar rodad, ma aram e rayog ni ngad yal’uweged.

15. Mini’ e susun ni ngad motoyilgad ngak, ma mang fan?

 ¹⁵ Ba t’uf ni ngad motoyilgad ngak Jehovah ma gathi pi toogor rodad. I fal’eg Job e motoyil ngak Jehovah u nap’an ni be non ngak. I guy rogon ni nge tamilang boch ban’en u wan’ Job, ma aram me yan i aw ni bod ni be gaar ngak: ‘Ga be guy gelngig ko tin kug sunmiy, fa? Gu manang gubin ban’en ni be buch rom. Ere ga be lemnag ndabiyog ni nggu ayuwegem?’ I fulweg Job lungun Jehovah u fithik’ e sobut’an’, miki dag ni kari ga’ fan u wan’ rogon feni manigil Jehovah. I gaar: “Ug par ni ke mus ni tin ni ke weliy e girdi’ ngog e gu manang, ma chiney e kug guyem nga owcheg.” (Job 42:5) Rayog ni yog Job e pi thin ney u nap’an ni ka bay u fithik’ e awat nib sug e malad u dow ni ka be kireban’ ni ke yim’ pi fak. Yugu aram rogon me micheg Jehovah ngak ni kab t’uf rok ma kab ga’ fan u wan’.​—Job 42:7, 8. 

16. Mang e susun ni ngad lemnaged u nap’an ni gad ra mada’nag e skeng nrogon nib puluw ko Isaiah 49:15, 16?

¹⁶ Ku arrogon e ngiyal’ ney nrayog ni nga i yog e girdi’ e thin nib kireb ngodad, ma yad be rin’ boch ban’en ni nge m’ug riy ni gowa dariy fadad. Ku rayog ni ngar guyed rogon ni ngar kirebnaged thidad ara ulung rodad mar ‘tunguyed urngin mit e thin nib kireb nib togopluw’ ngodad ngaur weliyed. (Matt. 5:11) Kad filed ko n’en ni buch rok Job nib pagan’ Jehovah ngay ni gad ra par ni gad ba yul’yul’ ngak u nap’an ni gad ra mada’nag e skeng. Gad ba t’uf rok Jehovah ma dariy ba ngiyal’ nra digey e piin be l’agan’rad ngak. (Mu beeg e Isaiah 49:15, 16.) Dab mmotoyil ko pi toogor rok Got u nap’an ni yad ra t’ar e thin nga dakendad!  James nreb e walag ni pumoon ni ma par u Turkey e ba gel e skeng nra mada’naged chon e tabinaw rok. I gaar: “Gu nanged ni faan gamad ra motoyil ko pi ban ni yibe weliy u murung’agen e girdi’ rok Got, ma ra muleg lanin’mad. Ere gu tedan’mad ko athap romad u tan Gil’ilungun Got ma gamad be par ni gamad ba pasig ko pigpig romad ngak Jehovah. Bochan e re n’ey, ma aram me yag ni nggu pared ni gamad ba felfelan’.” Gad ma motoyil ngak Jehovah ni bod ni rin’ Job! Pi ban ni be wereg e pi toogor rodad e der k’aringdad ni nge dabki l’agan’dad ko pi n’en bay nga m’on.

17. Mang e ga be fil ko n’en ni rin’ fapi pumoon nge ppin ni yad ba yul’yul’ ni kan weliy murung’agrad ko Hebrews ko guruy ni 11?

¹⁷ Gathi kemus ni yigoo Job e tapigpig rok Jehovah ni par nde rus mab mudugil u nap’an ni mada’nag boch e skeng nib gel. U lan fagi babyor ni yoloy apostal Paul ngak e pi Hebrew e ki weliy murung’agen boch e tapigpig rok Got riy me yog ni yad fa ulung i girdi’ “nrib michan’rad ngak Got.” (Heb. 12:1) Yad gubin nib gel e skeng nra mada’naged, machane ra pared ni yad ba yul’yul’ ngak Jehovah u n’umngin nap’an e yafos rorad. (Heb. 11:36-40) Ere gur, yan i aw nib m’ay fan e athamgil nge maruwel nib gel ni ur ted? Danga’! Yugu aram rogon ni gathi gubin ban’en ni micheg Got ngorad nra guyed ni ke lebug u nap’an ni ka yad ba fos, machane ur pared ni be l’agan’rad ngak Jehovah. Maku bochan nib mich u wan’rad ni yad ba fel’ u wan’ Jehovah, ma aram fan nib pagan’rad ni yad ra guy ni ke riyul’ e pi n’em. (Heb. 11:4, 5) N’en nrin’ed e rayog ni nge ayuwegdad ni ngad dugliyed u wan’dad ni ngaud pared ni be l’agan’dad ngak Jehovah.

18. Mang e kam dugliy u wan’um ni ngam rin’? (Hebrews 11:6)

¹⁸ Chiney e gad be par u ba fayleng ni be gel e kireb riy i yan. (2 Tim. 3:13) Ka be ulul Satan ni nge skengnag e girdi’ rok Got. Ere demtrug e magawon ni gad ra mada’nag boch nga m’on, ma manga yu gud dugliyed u wan’dad ni ngad maruwelgad nib gel ni fan ngak Jehovah ni “bochan e ke l’agan’dad ngak Got ni be par nib fos.” (1 Tim. 4:10) Dab da paged talin ni pi n’en ni pi’ Got ngak Job ko tomur e be micheg ni Jehovah e “ri ma runguy ma ma taganan’ ngak e girdi’.” (Jas. 5:11) Ere ku arrogodad ni manga yugu da pared ni gad ba yul’yul’ ngak Jehovah me pagan’dad nra tow’athnag e “piin ni yad be gayiy Got.”​—Mu beeg e Hebrews 11:6.