1. a) ¿Xi maʼ guníʼ Jehová zuni pur laanu? b) ¿Ximodo zusihuínninu cabézanu gacané Jehová laanu? (Biiyaʼ nota).

 JEHOVÁ maʼ guníʼ zuni xiixa para ca binni ni nadxii laabe. Laani nga maʼ cadi candaa zaree guendahuará, maʼ guirutiʼ tu ziuu triste ne maʼ qué ziuu guendaguti (Apoc. 21:3, 4). Zacanebe ca binni nadóʼ, ca ni cabeza gacanebe laa, para gúnicaʼ Guidxilayú riʼ ti paraísu (Sal. 37:9-11). Ne laaca zacanebe laanu para chuʼnu jma gaxha de laabe, jma que biaʼ rúninu ni yanna. ¡Guizáʼ sicarú ora maʼ gaca ndiʼ! Yanna, ¿xiñee nuunu seguru zaca cumplir ca promesa stiʼ Dios yaʼ? Purtiʼ siempre rúnibe ni riniʼbe. Nga runi nápanu razón para cuézanu gacané Jehová laanu (Sal. 27:14). * ¿Ximodo rusihuínninu cabézanu gacanebe laanu yaʼ? Zusihuínninu ni ra cuézanu né paciencia ne guendanayecheʼ guni cumplirbe ca promesa stibe (Is. 55:10, 11).

2. ¿Xi maʼ biʼniʼ Jehová?

² Maʼ bisihuinni Jehová runi cumplir ni riníʼ. Guidúʼyanu ti modo maʼ bisihuínnibe ni. Lu libru stiʼ Apocalipsis guníʼ Jehová tiempu riʼ zucaalisaa ti grupu de binni ni zeeda «de guiráʼ nación, tribu, guidxi ne idioma» ne zuni adorarcaʼ laabe. Laacabe nga ti grupu de «stale binni» o ti gran muchedumbre (Apoc. 7:9, 10). Lu grupu riʼ nuu hombre, gunaa, xcuidi, binni de gadxé gadxé raza, idioma ne guidxi. Ne guirácabe nácacabe ti familia ni nuu tobi si lu guidubi Guidxilayú (Sal. 133:1; Juan 10:16). Laaca runi predicárcabe  né stale gana, nuucabe listu para guiníʼcabe de ca cosa galán ni chiguni Jehová lu Guidxilayú riʼ (Mat. 28:19, 20; Apoc. 14:6, 7; 22:17). Pa né lii nga nuuluʼ lu grupu riʼ, zándaca guizáʼ rusisácaluʼ guiráʼ ni cabézanu.

3. ¿Xi racalaʼdxiʼ Binidxabaʼ guni?

³ Qué racalaʼdxiʼ Binidxabaʼ guicaanu ca cosa sicarú ni cabézanu. Racaláʼdxibe guiníʼ íquenu qué rizaalaʼdxiʼ Jehová laanu ne qué zuni cumplir ca promesa stiʼ. Pa gucaabe laanu guiníʼ íquenu sicaríʼ la? maʼ qué zácanu nadxibalú ne zándaca gusaana de gúninu ni ná Jehová. Casi zadúʼyanu, gucalaʼdxiʼ Binidxabaʼ niníʼ ique Job qué zacané Dios laa ne pur ngue nusaana de ñuni adorar Jehová.

4. ¿Xi zadúʼyanu lu artículo riʼ? (Job 1:9-12).

⁴ Lu artículo riʼ, zazíʼdinu xi guiráʼ biquiiñeʼ Binidxabaʼ para nucaa Job nixeleʼ de Jehová (biindaʼ Job 1:9-12). Laaca zadúʼyanu xi zanda guizíʼdinu de ni bizaaca Job ne xiñee nabé risaca guietenaláʼdxinu nadxii Dios laanu ne zuni cumplir ca promesa stiʼ.

5, 6. ¿Xiñee guizáʼ nagueenda bichaa xquendanabani Job?

⁵ Galán bibani Job, guca xhamígube Jehová, gúpabe ti familia naroʼbaʼ ni guyuu tobi si ne gúcabe ti hombre nabé ricu (Job 1:1-5). Peru ti dxi si binítibe guiráʼ ni. Primé la? binítibe ca cosa risaca stibe (Job 1:13-17). Despué, guti guiráʼ xiiñibe, ca ni guizáʼ nadxiibe. Guníʼ ique xi biʼniʼ sentir Job. Ora rati ti xiiñiʼ binni guizáʼ racaná. Yanna, bixuiʼlú pabiáʼ naroʼbaʼ ne naná yuubaʼ gudiʼdiʼ Job ne xheelaʼ ora gúnnacaʼ guti chii xiiñicaʼ. ¡Nguehuaʼ runi gucheza Job xhaba ne biaba layú! (Job 1:18-20).

⁶ Despué, biseendaʼ Binidxabaʼ ti guendahuará feu luguiáʼ Job ni guizáʼ bisituí lú (Job 2:6-8; 7:5). Nabé biʼniʼ respetar binni Job ante guizaaca ca cosa riʼ, dede biyúbicabe laabe para gudiibe conseju laacaʼ (Job 31:18). Peru despué, maʼ qué ninacaʼ nidxíñacaʼ laabe. Ca bíʼchibe, ca bizáʼnabe, ca xhamígube ne dede ca siervu stibe bicaanacaʼ laabe (Job 19:13, 14, 16).

7. a) ¿Xi pur guníʼ ique Job cayacaná, ne xi qué niná ñuni? b) ¿Xi guendanagana cásica gudiʼdiʼ Job zanda guidxaagalú ti xpinni Cristu? (Biiyaʼ imagen stiʼ párrafo 7).

⁷ Gucalaʼdxiʼ Binidxabaʼ niníʼ ique Job cayacaná purtiʼ maʼ cadi nadxii Jehová laa. Ngue runi biseendabe ti bi guizáʼ reciu ne bisaba ni yoo ra nuu chii xiiñiʼ Job ra cayúnicaʼ ti saa huiiniʼ (Job 1:18, 19). Laaca bisábabe bele de guibáʼ ni biiti ca dendxuʼ stiʼ Job ne ca siervu stiʼ, ca ni cayapa ca dendxuʼ que (Job 1:16). Cumu biiyaʼ Job cadi normal ngue modo beeda bi ne bele que la? guníʼ íquebe Jehová ngue biseendaʼ ca ni purtiʼ cadxiichiné laabe. Neca zaqué, qué ninádibe ñuni maldecirbe Bixhózebe ni nuu guibáʼ. Bidiibe cuenta stale iza bidii Jehová laabe stale cosa galán. Ne guníʼ íquebe, pa maʼ gucuaabe cosa galán la? laaca naquiiñeʼ guicaabe ca cosa malu que. Ngue runi guniʼbe cadi naquiiñeʼ gusaana de guisaca lá Jehová (Job 1:20, 21; 2:10). Neca biniti Job ca cosa risaca stiʼ, gucaná ladxidóʼ ne guca huará, qué nixélebe de Jehová. Peru biyúbiruʼ Binidxabaʼ modo guniná laabe.

8. ¿Xi sti cosa biquiiñeʼ Binidxabaʼ para guniná Job?

⁸ Biquiiñeʼ Binidxabaʼ sti cosa para guniná Job. Bicaabe chonna hombre, ni ná naca xhamigu Job, para gucaacaʼ laabe guiníʼ íquebe qué risácabe. Guníʼ ca hombre riʼ cayacaná Job purtiʼ biʼniʼ stale cosa  malu (Job 22:5-9). Laaca guyuucabe nucaacabe Job niníʼ ique qué zanda gusiecheʼ Dios neca ñaca ti hombre guizáʼ nachaʼhuiʼ (Job 4:18; 22:2, 3; 25:4). Ni gucaláʼdxicabe niníʼ ique Job nga qué zabeendú gastiʼ neca cayuni ni ná Dios, purtiʼ cadi nadxiibe laa ne qué zápabe laa. Zándaca pur ca diidxaʼ ni guníʼ ca hombre que bicaani laabe guiníʼ íquebe maʼ qué zanda gaca chaahuiʼ guendanagana stibe.

9. ¿Xiñee qué nuniti Job stipa ne qué nidxibi ora gudiʼdiʼ lu guendanagana?

⁹ Guníʼ ique cayuuyaluʼ zuba Job ndaaniʼ dé ne cayuniná yuubaʼ que laabe dxi ne gueelaʼ (Job 2:8). Caniʼruʼ ca hombre ni ná naca xhamígube que cadi nacháʼhuibe ne pur gana guiráʼ ni maʼ bíʼnibe. Guizáʼ maʼ biree Job gana pur guiráʼ guendanagana ni napa ne ora rietenaláʼdxibe maʼ guti guiráʼ xiiñibe casi ñaca rireza ladxidoʼbe. Ngue runi qué niníʼgabe gastiʼ (Job 2:13–3:1). Guníʼ ique ca hombre que pur cadi caníʼ Job gastiʼ zudxiideche Jehová. Peru cadi zaqué diʼ ni. Málasi zándaca gundisaʼ ique Job, biiyadxí laacabe ne guníʼ: «¡Dede dxi gateʼ qué zucheeniaʼ Dios!» (Job 27:5). ¿Xiñee qué nuniti Job stipa ne qué nidxibi ora gudiʼdiʼ lu guiráʼ guendanagana que yaʼ? Purtiʼ gunna dxíchibe zacané Dios stibe laabe neca xa guizáʼ nagana ra tídibe. Laaca gúnnabe zusibani Jehová laabe sti biaje pa gátibe (Job 14:13-15).

10. ¿Xi rusiidiʼ ni bizaaca Job laanu?

¹⁰ Rusiidiʼ ni bizaaca Job laanu qué zanda diʼ gucaa Binidxabaʼ laanu gudxiʼdéchenu Jehová ne ruuyaʼ Jehová guiráʼ ni rizaacanu. Laaca rizíʼdinu xcaadxi cosa de ni bizaaca Job. Guidúʼyanu caadxi de laacani.

11. ¿Xi zazaaca pa qué gusaana de gápanu confianza Jehová? (Santiago 4:7).

 ¹¹ Bisihuinni Job pa qué gusaana de gápanu confianza Jehová zacanebe laanu guni huantarnu intiica prueba ne zanda gudxíʼlunu Binidxabaʼ. ¿Xi zuni Binidxabaʼ yaʼ? Biblia ná zaxélebe de laanu (biindaʼ Santiago 4:7).

12. Cumu biʼniʼ cré Job zabani ca binni ni maʼ guti, ¿ximodo gucaneni laa?

¹² Naquiiñeʼ guni crenu zusibani Jehová ca binni ni maʼ guti. Casi bizíʼdinu lu artículo ni gudiʼdiʼ que, racalaʼdxiʼ Binidxabaʼ guidxíbinu guendaguti para gucaa laanu guixélenu de Jehová. Guzéʼtenu sti biaje ni bizaaca Job. Guníʼ Binidxabaʼ zúnibe intiica cosa para cadi gátibe, dede zusaana de gúnibe ni ná Jehová. Peru cadi dxandíʼ ngue ni guníʼ Binidxabaʼ. Purtiʼ neca gudiʼdiʼ Job ra jma nagana, ne guníʼ ique maʼ chigati la? qué nudxiidéchebe Dios stibe. Gunda biʼniʼ huantarbe purtiʼ gúpabe confianza nachaʼhuiʼ Jehová ne laaca gúnnabe pa cuézabe, zuni chaahuiʼ Jehová ca guendanagana stibe. Gúpabe fe pa qué gacané Jehová laabe né ca guendanagana que laga nabánibe, zúnini despué ne zusibani laabe sti biaje. Gunna dxichi Job ziasa ca binni ni maʼ guti. Pa gápanu confianza Jehová casi gupa Job, qué zaxélenu de laa neca gacalaʼdxiʼ binni guuti laanu.

13. ¿Xiñee naquiiñeʼ gunibiaʼnu ca cosa ni biquiiñeʼ Binidxabaʼ para bininá Job?

¹³ Galán guidúʼyanu gunáʼ nga ca cosa ni biquiiñeʼ Binidxabaʼ luguiáʼ Job purtiʼ nga ca nga ni riquiiñebe yanna. Guidúʼyanu xi guníʼ Binidxabaʼ zuni Job ne ni zuni guiráʼ binni. Ndiʼ nga ni guniʼbe: «Guiráʼ ni napa binni zudii ni para gulá xquendanabani» (Job 2:4, 5). Ni gucalaʼdxiʼ Binidxabaʼ niníʼ nga cadi dxandíʼ nadxiinu Jehová ne pa chuʼ xquendanabáninu ra naxoo, zudxiʼdéchenu Dios stinu. Laaca guníʼ Binidxabaʼ cadi nadxii Jehová laanu ne qué rusisácabe guiráʼ ni rúninu pur laabe. Cumu cabézanu gacanebe laanu la? maʼ qué riguite diʼ Binidxabaʼ laanu purtiʼ maʼ nánnanu xi guiráʼ riquiiñeʼ para guxheleʼ laanu de Jehová.

14. ¿Xi zándaca gudiʼnu cuenta ora tídinu lu xiixa prueba, ne xi ejemplu zacané laanu guiénenu ni?

¹⁴ Zanda gacané ca prueba ca laanu para guidúʼyanu paraa caquiiñeʼ guni mejorarnu. Ca guendanagana ni gudiʼdiʼ Job que gucané ni laa ganna caquiiñeʼ gaca jma humilde (Job 42:3). Ora tídinu lu xiixa prueba, laaca naquiiñeʼ gudiʼnu cuenta pa caquiiñeruʼ gusihuínninu xiixa cualidad. Nga peʼ nga ni bizaaca Nikolái, * guluucabe laabe ndaaniʼ cárcel neca guizáʼ huarabe. Laabe guniʼbe: «Chuʼ tuuxa ndaaniʼ cárcel zeeda gácani casi ora niree ti radiografía, purtiʼ racané ni laa guʼyaʼ pa napa cualidad ni naquiiñeʼ gapa ti xpinni Cristu». Pa guidúʼyanu cayaadxaʼ gusihuínninu xiixa cualidad naquiiñeʼ gúninu xiixa para guni mejorarnu.

15. ¿Tu laa naquiiñeʼ gucaʼdiáganu ne xiñee?

¹⁵ Naquiiñeʼ gucaʼdiáganu Jehová ne cadi ca enemigu stinu. Bicaadiaga chaahuiʼ Job Jehová ora guniʼné laabe. Para gacanebe Job guiníʼ ique, sicaríʼ gá gúdxibe laa: «¿Maʼ biiyaluʼ poder stinneʼ pur ca cosa ni bizayaʼ la? Nannaʼ xi guiráʼ maʼ bizaacaluʼ, ¿ñee raʼbuʼ qué zanda gapaʼ lii la?». Cumu humilde Job ne rudii xquixe Jehová purtiʼ nachaʼhuiʼ né laabe, sicaríʼ bicabi: «Maʼ huayunadiagaʼ guiníʼcabe de lii, peru yanna maʼ cayuuyapiaʼ lii» (Job 42:5). Ora guníʼ Job ca diidxaʼ riʼ, zándaca zúbaruʼbe ndaaniʼ dé, dxaʼ guiʼdxuʼ ládibe ne cayuunabe pur guti ca xiiñibe. Óraque  nga biluíʼ Jehová laabe nácarube siervu stiʼ ne nadxii laabe (Job 42:7, 8).

16. Casi ná Isaías 49:15, 16, ¿xi cadi naquiiñeʼ guiaandaʼ laanu ora tídinu lu prueba?

¹⁶ Tiempu riʼ, zándaca tindené binni laanu o guiniʼcaʼ qué risácanu. Zándaca gacalaʼdxiʼ stale binni guni biidicaʼ lanu o guiniʼcaʼ mal de organización stinu ne guiniʼcaʼ «stale cosa malu ni cadi dxandíʼ» de laanu (Mat. 5:11). Relatu stiʼ Job rusiidiʼ ni laanu napa Jehová confianza qué zuchéʼnenu laa ora tídinu lu ti prueba, nadxiibe laanu ne qué ziuu dxi gusiaandabe ca ni ribeza gacanebe laa (biindaʼ Isaías 49:15, 16). Cadi gucaʼdiáganu ca cosa ni cadi dxandíʼ ni riníʼ ca enemigu stiʼ Dios. Guzéʼtenu ni guníʼ James, ti hermanu de Turquía, ni huadiʼdiʼ lu prueba laa né familia stiʼ. Laabe guniʼbe: «Bidiʼdu cuenta pa gucaʼdiágadu ca cosa ni cadi dxandíʼ ni riníʼcabe de xquidxi Dios, zabeeni gana laadu. Ngue runi gucuá íquedu ca promesa stiʼ Reinu ne qué nusaana de ñúnidu ni ná Jehová. Ngue gucané laadu chuʼdu nayecheʼ». Chinándanu ejemplu stiʼ Job ne gucaʼdiáganu Jehová. Cadi gudiʼnu lugar ca cosa ni cadi dxandíʼ ni riníʼ ca enemigu stinu cueecani gana laanu para cadi cuézanu ca cosa ni chigudii Jehová laanu.

17. ¿Xi rizíʼdinu de ca hombre ne ca gunaa ni qué nucheené Dios ni riete lu capítulo 11 stiʼ Hebreos?

¹⁷ Cadi Job si nga xpinni Jehová ni huayaca nadxibalú ora gudiʼdiʼ ra nagana. Lu  carta ni bicaa apóstol Pablo para ca hebreu ni naca xpinni Cristu, bizeetebe de xcaadxi xpinni Dios ne guniʼbe naca «ca testigu riʼ casi ti za naroʼbaʼ» (Heb. 12:1). Neca gudíʼdicabe lu prueba nabé nadipaʼ, qué nucheenécabe Jehová biaʼ dxi bibánicabe (Heb. 11:36-40). ¿Ñee bisaca stipa bíʼnicabe ne biaʼ biʼniʼ huantárcabe la? Bisaca ni pue. Dxandíʼ nga qué ñuuyacabe ñaca cumplir guiráʼ promesa stiʼ Dios peru qué nusaanaʼ de ñápacabe confianza zuni Dios ni maʼ guníʼ. Ne cumu guyuucabe seguru riuulaʼdxiʼ Jehová ni rúnicabe la? Gunna dxíchicabe zuuyacabe ora gaca cumplir ca promesa stiʼ (Heb. 11:4, 5). Ora guiníʼ íquenu de ejemplu stícabe, rudiini stipa laanu para cadi gusaana de gápanu confianza Jehová.

18. Intiica si guizaaca despué, ¿xi naquiiñeʼ gúninu? (Hebreos 11:6).

¹⁸ Zeʼ dxi, jmaruʼ si zinitilú guidxilayú (2 Tim. 3:13). Ne cutiidiruʼ Binidxabaʼ ca xpinni Dios lu prueba. Nga runi, intiica si guidxaagalunu despué, cadi gusaanaʼ de gúninu ni ná Jehová de guidubi ladxidoʼno «purtiʼ maʼ gudíxhenu esperanza stinu lu náʼ Dios ni nabani» (1 Tim. 4:10). Guietenaláʼdxinu guiráʼ ni biʼniʼ Jehová pur Job purtiʼ nga rusihuinni «pabiáʼ nadxii Jehová binni ne pabiáʼ riá laacabe» (Sant. 5:11). Cásica Job, gúninu stipa para cadi guchéʼnenu Jehová, ne cadi guiaandaʼ laanu «rudiibe premiu ca ni ruyubi laabe sin guiree gana» (biindaʼ Hebreos 11:6).