OWINJHIVA enonne wihina Yesu aakomeliwe vantxikwani na goyi dhipaddi dhabilidhene wigakomeliwe apanga abili. (Mat. 27:35-38) Mowindala, athu amodha enubuwela wihina Bibliya kanawoga ebaribari awogaga wi mwiili wa Yesu wahegeredhiwa wi okoyiwe mmahame.​—Marcos 15:42-46

Aliba ohudhera amodha a Muthenga dhixa enowanganyedha wi muthu apiwe oofwanelela okoyiwa mmahame ninga enereya naathu amodha. Aliwa enorumedha wi athu yala yakoyiwe ni makalelo oohiyana ni athu amodha. Jornalista Ariel Sabar, ohuleba rivista nimodha, alebaga mwahaya bwaddi athu amodha egubuwelaga ndala: “Vamwigimanyoni, yakomeliwavo baathu yathambwe othega, ni mayeroditu amodha, enovanya mubuwelo onawoga wi akudda Roma yowenya wi muthu ninga yola akoyiwe mmahame.” Akudda Roma yafuna yatote manyazo apanga mwamakalelo oopiha mbani, ehiyaga mwiili wewa ohunna egumi ogakomeliwe vantxikwani wihina anenyama amukokolani yatakune. Magogoddoya yahala yavokeriwa okokolani.

Mbwenye Arkeyolojiya, anawoga muselu mmodhene wohiyana, wodhela maJudewu amodha yapiwe. Yaka ya 1968, ehifwanyiwa makuva amuthu aapiwe malabo a Yesu. Makuva ala efwanyiwe waddamela oJeruzale mmahame a emudhi yaari Majudewu. Makuva ala, efwanyiwe wego winakala makuva, obe neere kaxa munakala makuva. Makuva ala mamodha, nahikalavo nikuva naddoddobwa naakomeliwe peregu yamujhila, olapawa yanna 11,5 sentimeturu (4.5 in.) Ironi anihina: “Ddoddobwa ela mwinnyaya aari mulobwana dhaala ithaniwa Yehochanan,” siyeyo “ ekavihere omariha muselu wakanganeliwa muwari mwa muthenga dhixa wodhela okoyiwa wa Yesu.” Ddoddobwa ya “Yehochanan, muselu mmodha ononiha wi akudda Roma yowenya muthu aakomeliwe vamwigimanyoni okoyiwa mmahame.”

Nikuva nne naddoddobwa nnotatamula muselu dhohiyana-iyana wodhela makalelo Yesu aakomeliwiye vantxikwani. Mbwenye ethu ehinanganyedheya siila: Muthu akomeliwa vantxikwani ninga mpanga yowenyeya okoyiwa, ohiya orahileliwa mburo bure-bure. Mowindala, ele Bibliya anawogiye wodhela muruthu wa Yesu wokoyiwa mmahame ebaribari. Teto muselu enawoga Arkeyologu enorumedha ele Bibliya anawogiye.

Yathimaya sowihina, di Yehova aavuhulele wihina Yesu aakoyiwe naaliba oreela, kaavo aneriha wi madhu a Yehova ehakwanele.​—Isa. 53:9; 55:11.