BAWOMBO bazebi kinongo ti Yesu bambanda va dikunzi va khati tsika matongueni muadi. (Matai 27:35-38) Vayi batu bamfindanga ziphaka, boti bakubika nhitu yi Yesu ayi bazikila yawu ku dibumbi, dedi bo Kibibila kintubila.—Malako 15:42-46.

Batu bantubilanga bubi zibuku zinna zi Kibibila zintubila matedi Yesu, bamfindanga ziphaka boti basi Loma bavana nsua wu kuzikila woso mutu bamvondila va dikunzi mu phila yifuana. Jornalista yimueka bantedilanga Ariel Sabar, wusonika levista yinsudikisa mambu amomo buboti bo katuba: “Mutu wumfuila va dikunzi waba tambulanga tsingulu yingolo ayi batu ba luzabu batuba ti didi diambu dimbi kukikinina ti basi Loma baba vananga nsua wu kunzikila mu phila yifuana.” Basi Loma baba tombanga kufuisa tsoni mutu baba vondilanga va dikunzi. Diawu baba tudilanga mvumbi’andi va ndeku mbazu muingi bandia kuidi bibulu, bosi kioso kitini ki nhitu kinsobila, baba ku kilozanga ku biziami.

Batu bantombanga biuma bikhulu, basudikisa ti basi Yuda bankaka bavondila va dikunzi, basa kuba vangila ko mambu amomo. Mu mvu 1968, babakula mimvesi mi dibakala dimueka bavondila va dikunzi mu sekulu yitheti. Babakula mimvesi beni va dibumbi di dikanda di musi Yuda ku Yelusalemi. Mimvesi beni miba mu kasu. Mu mimvesi beni babakula, mvandi muba mvesi wu kikodi. Mutu beni bambanda va dikunzu mu kusadila zitsesi zidi 11.5 di zicentimetro. Sabar wutuba: “Mvesi awowo wu kikodi, wuba wu dibakala dimueka baba tedilanga Yehochanan.” Mimvesi amiomio “miawu misadisa batu bawombo baba findanga ziphaka matedi zibuku zinna zi Kibibila zintubila matedi Yesu boti banzikila mu phila yifuana.” Mvesi wu kikodi wu “Yehochanan wuvana bivisa ti basi Loma, baba vananga nsua muingi kuzikila mu phila yifuana mutu baba vondilanga va dikunzi mu bilumbu bi Yesu mu kulandudila kikhulu ki basi Yuda.”

Mvesi awowo wu kikodi, wulenda tuadisa mayindu maviakana matedi buidi Yesu kabela va dikunzi. Vayi kiedika mu mambu amomo kidi, bitongueni binkaka bavondila va dikunzi baba zikila mu phila yifuana kubika to kuba loza. Bukiedika, bivisa abiobio binkindisa mambu Kibibila kintuba matedi phila bakubikila nhitu yi Yesu ayi kunzikila mu phila yifuana.

Ayi dilutidi, Yave wubikula ti Yesu wala zikulu mu dibumbi di dibakala widi busina ayi vasi ko mutu wulenda tula nkaku muingi Diambu di Nzambi disalama.—Yesa. 53:9; 55:11