“DAKULAON talaga an nagin epekto sako kan kabuutan na ipinahiling kan Kristiyanong mga tugang,” an sabi ni Lisa. * Iniistorya niya kun ano an inot na nakaakit saiya sa katotoohan. Arog man kaiyan an nangyari ki Anne, na nagsabi, “Mas nakaakit sako an kabuutan ninda kisa sa itinutukdo ninda.” An duwang sister na ini pareho nang ikinakaugma ngunyan an pagbasa kan Bibliya saka paghurop-hurop kaiyan, pero dakula an nagin epekto sainda kan kabuutan.

Paano kita makakapahiling nin kabuutan na nakakapahiro sa puso kan mga tawo sa palibot ta? Pag-ulayan ta an duwang paagi: paagi sa satong dila asin paagi sa satong mga gibo. Dangan aaramon ta kun kiisay kita dapat magpahiling nin kabuutan.

An may kakayahan na agom na babayi na ilinadawan sa Talinhaga kapitulo 31 igwa kan “katugunan nin kabuutan” sa saiyang dila. (Tal. 31:26) Tinutugutan niya an “katugunan” na ini na maggiya sa saiya sa kun ano an sasabihon asin kun paano iyan sasabihon. Dapat man na an mga ama magkaigwa kan “katugunan” na ini sa saindang dila. Aram kan kadaklan na magurang na an makulog na mga tataramon puwedeng magkaigwa nin negatibong epekto sa saindang aki. Kun an mga magurang makulog magtaram, posibleng marhay na bakong magayon an magigin reaksiyon kan saindang aki. Kaya para dangugon asin sunudon sinda kan saindang aki, an mga magurang dapat na maghinguwang magtaram nin may kabuutan.

Ika man sarong magurang o bako, paano mo gigiyahan an saimong dila para makapagtaram nin may kabuutan? May makukua kitang ideya sa Talinhaga 31:26: “Ibinubuka niya an saiyang nguso nin may kadunungan.” Kalabot diyan an madunong na pagpili nin mga tataramon asin nin tono nin boses. Sa parati makakatabang kun hahaputon ta an satong sadiri, ‘An sasabihon ko daw makakapaanggot, o makakapahupa iyan nin tensiyon?’ (Tal. 15:1) Iyo, madunong na mag-isip nguna bago magtaram.

An saro pang talinhaga nagsasabi: “An dai pinag-isipan na mga tataramon siring sa mga saksak nin espada.” (Tal. 12:18) Pag pinag-iisipan ta kun paano an satong mga tataramon asin tono nin boses puwedeng makaapekto sa iba, posibleng marhay na mas makokontrol ta an satong mga sinasabi. Iyo, an pag-aplikar ta kan “katugunan nin kabuutan” matabang sato na pugulan an sadiri na makapagtaram nin makulog asin daing kabuutan. (Efe. 4:31, 32) An negatibong mga kaisipan asin pananaram sasalidahan ta nin mabuot na mga tataramon asin positibo saka mamumuton na tono nin boses. Nagtao si Jehova nin halimbawa sa bagay na ini kan tawan niya nin asigurasyon an natatakot niyang lingkod na si Elias. An anghel na nagrerepresentar ki Jehova nagtaram sa “kalmado asin maluway na boses.” (1 Ha. 19:12) Pero urog pa sa basta sana pagtaram nin may kabuutan an pagigin mabuot. Dapat man na ipahiling ta an mga gibo nin kabuutan. Paano?

Pag inaarog ta si Jehova, an satong mabuot na pananaram iniibanan ta nin mga gibo nin kabuutan. (Efe. 4:32; 5:1, 2) Si Lisa, na sinambit  kasubago, ilinadawan an kabuutan na ipinahiling saiya kan mga Saksi. “Kan biglaan na kinaipuhan kan pamilya mi na magbalyo nin istaran, duwang mag-agom sa kongregasyon an dai nguna naglaog sa trabaho ninda para tabangan kaming mag-impake. Kan panahon na idto, bako pa man ngani akong Bible study!” An mga gibong idto nin kabuutan nakapahiro ki Lisa na siyasaton pang marhay an katotoohan.

Si Anne, na sinambit sa kapinunan, naapresyar man an kabuutan na ipinahiling saiya kan mga Saksi. Sinabi niya: “Huli sa mga ginigibo kan mga tawo sa palibot, nagin mapagduda akong marhay. Nasakitan akong magtiwala sa mga tawo.” Sinabi pa niya: “Kan makaulay ako kan mga Saksi, pinagdudahan ko an motibo ninda. Napaisip ako, ‘Taano ta tinatawan ninda ako nin atensiyon?’ Pero an tunay na kabuutan na ipinahiling kan nagtutukdo sako sa Bibliya nakapahiro sako na magtiwala saiya.” Ano an nagin marahay na resulta? “Dai nahaloy, mas nagpokus na ako sa mga nanunudan ko.”

Mangnuhon na napahirong marhay si Lisa saka Anne sa mamumuton na mga gibo nin kabuutan na ipinahiling sa sainda kan mga tugang sa kongregasyon, asin nagkaigwa iyan nin epekto sa pagmawot nindang makanuod kan katotoohan. An kabuutan na ipinahiling kan  kongregasyon nakatabang sainda na buksan an saindang puso.

Huli sa dinakulaan na kultura, tibaad normal lang sa nagkapira an pagtaram nin may kabuutan saka an pagngirit. Marahay an arog kaiyan na kaugalian o nakatudan. Pero kun iyan sana an dahilan kaya ginigibo ta iyan, tibaad bako iyan pagpahiling nin diyosnon na kabuutan.—Ikumparar an Gibo 28:2.

An tunay na diyosnon na kabuutan sarong aspekto kan bunga kan banal na espiritu nin Diyos. (Gal. 5:22, 23) Kaya para maipahiling ta an kabuutan, kaipuhan na magpagiya kita sa banal na espiritu. Kauyon iyan kan pagmawot ta na arugon si Jehova saka si Jesus. Asin bilang mga Kristiyano, nagpapahiling kita nin tunay na interes sa iba. Huli kaini, napapahiro kita kan pagkamuot ta sa Diyos na Jehova asin sa satong kapwa. Kaya an satong kabuutan nagigin sarong mapuwersang kuwalidad na naggigikan sa puso asin na inuuyunan nin Diyos.

Tibaad pasil sato na magpahiling nin kabuutan sa mga tawong mabuot man sato o sa mga kabisto ta. (2 Sam. 2:6) Saro na diyan an pagpasalamat sainda. (Col. 3:15) Pero paano kun pagmati ta dai maninigo an saro na pahilingan nin kabuutan?

Pag-isipan ini: Nagtatao si Jehova nin pinakamarahay na halimbawa sa pagpahiling nin daing kapantay na kabuutan, asin an saiyang nasusurat na Tataramon nagtutukdo sa sato nin mahalagang leksiyon manungod sa pagpahiling kan kuwalidad na ini. An ekspresyon na “daing kapantay na kabuutan” dakul na beses na ginamit sa Kristiyanong Griegong Kasuratan. Paano an Diyos nagpapahiling sato nin kabuutan?

Isipa an milyon-milyon na tawo na pinapahilingan ni Jehova nin kabuutan paagi sa pagtao sainda kan saindang mga pangangaipo tangani na mabuhay. (Mat. 5:45) An totoo, dawa dai pa minimidbid nin mga tawo si Jehova, nagpapahiling na siya nin kabuutan sa sainda. (Efe. 2:4, 5, 8) Halimbawa, itinao niya an saiyang pinakamarahay, an saiyang bugtong na Aki, para sa gabos na tawo. Isinurat ni apostol Pablo na itinao ni Jehova an pantubos “sigun sa abundansiya kan saiyang daing kapantay na kabuutan.” (Efe. 1:7) Dugang pa, dawa nagkakasala kita asin napapamundo si Jehova, padagos niya kitang ginigiyahan asin tinutukduan. An saiyang mga instruksiyon asin mga tataramon siring sa “maluyang uran.” (Deu. 32:2) Imposible nanggad na lubos na mabalusan ta an gabos na kabuutan na ipinapahiling niya sa sato. Asin an totoo, nakadepende sa kabuutan ni Jehova an satong puturo.—Ikumparar an 1 Pedro 1:13.

Daing duda, an kabuutan ni Jehova kawili-wili asin nakakapahiro. Kaya imbes na pilion kun siisay sana an papahilingan ta nin kabuutan, dapat kitang maghinguwa na arugon si Jehova paagi sa pagpahiling nin kabuutan aroaldaw. (1 Tes. 5:15) Pag pirmi kitang nagpapahiling nin kabuutan, garo kita mainit na kalayo sa malipot na aldaw. Nagigin kitang gikanan nin karangahan sa satong mga kapamilya, kapagtubod, katrabaho, kaeskuwela, asin pagtaraid.

Isipa an mga kapamilya o kakongregasyon mo na makikinabang huli sa saimong mabuot na mga tataramon asin gibo. Tibaad igwa sa kongregasyon nindo nin nangangaipo nin tabang sa pag-asikaso sa saiyang harong saka natad o sa paggibo nin regular na mga aktibidad arog nin pagsaod. Dugang pa, pag may nakaulay ka sa ministeryo na nangangaipo nin tabang, may magigibo ka daw na praktikal na tabang?

Bilang pag-arog ki Jehova, lugod na an satong mga tataramon asin gibo pirming giyahan kan “katugunan nin kabuutan.”