Lisa * ɖɔ: “Xomɛ e nɔví súnnu lɛ́ kpó nɔví nyɔ̌nu lɛ́ kpó nɔ nyɔ́ dó wǔ ye é wa ɖagbe nú mì tawun.” Nǔ nukɔntɔn e d’alɔ ɛ, b’ɛ tɛ́dó nǔgbó ɔ wú é xó ɖɔ wɛ é ɖe mɔ̌. Nǔ ɖokpó ɔ wɛ é nyí nú Anne, é ɖɔ: “Nǔ e dɔn mì hú gǎn é wɛ nyí xomɛnyínyɔ́ yětɔn, é nyí nǔ e kplɔ́n mì wɛ yě ɖe é ǎ.” Nɔví nyɔ̌nu we énɛ́ lɛ́ bǐ wɛ ɖo Biblu xixa kpó tamɛ linlin d’é jí kpó sín le ɖu wɛ din, amɔ̌, nǔ e d’alɔ yě hú gǎn é wɛ nyí xomɛnyínyɔ́ núwiwa nɔví lɛ́ tɔn.

Nɛ̌ xomɛnyínyɔ́ núwiwa mǐtɔn ka sixú wa ɖagbe nú mɛ e lɛ́ lɛ̌ dó mǐ lɛ́ é gbɔn? Mi nú mǐ ní ɖɔ xó dó ali e nu é sixú nyí mɔ̌ ɖe é we wú: xó e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó. Énɛ́ gúdo ɔ, mǐ ná ɖɔ xó dó mɛ alɔkpa e wú mǐ ɖó ná nɔ nyɔ́ xomɛ dó lɛ́ é wú.

“Sɛ́n xomɛnyínyɔ́ tɔn” ɔ tɔ́n ɖo xó nyɔ̌nu jɔ nyɔ̌nu e xó Nǔnywɛ́xó wěmata 31gɔ́ ɔ ɖɔ é tɔn lɛ́ mɛ. (Nǔx. 31:26, nwt) É nɔ yí gbe bɔ “sɛ́n” énɛ́ nɔ xlɛ́ ali kɔnugbe tɔn kpó xógbe tɔn lɛ́ kpó. É nyɔ́ ɖɔ asú lɛ́ kpó mɛjitɔ́ lɛ́ kpó lɔ ní ɖó “sɛ́n” énɛ́ ɖo ɖɛ̌ yětɔn ta. Mɛjitɔ́ gěgé wɛ tuun ɖɔ xógbe vɛ́sin lɛ́ dídó sixú gblé wǔ vǐ yětɔn lɛ́, bɔ énɛ́ sixú zɔ́n bɔ vǐ lɛ́ sɔ́ ná nɔ ba ná se xó yětɔn ǎ. Énɛ́ wú ɔ, ényí mɛjitɔ́ lɛ́ nɔ ɖɔ xó kpó xomɛnyínyɔ́ kpó ɔ, é ná bɔ wǔ nú vǐ yětɔn lɛ́ bɔ yě ná nɔ ɖótó yě, lobo lɛ́ se tónú nú yě.

Ényí a nyí mɛjitɔ́ kpó a gbɔ kpó ɔ, nɛ̌ a ka sixú kplɔ́n bo nɔ ɖɔ xó kpó xomɛnyínyɔ́ kpó gbɔn? Mǐ mɔ xósin ɔ ɖo akpáxwé nukɔntɔn Nǔnywɛ́xó 31:26 tɔn mɛ, ɖo Lẹdogbedevomẹ Aihọn Yọyọ Tọn mɛ; fínɛ́ ɖɔ: “É kɛ nu ɔ, nǔnywɛ́xó wɛ nɔ tɔ́n sín nu tɔn mɛ.” Énɛ́ byɔ́ ɖɔ mǐ ná nɔ cyán xógbe mǐtɔn lɛ́ kpó nǔnywɛ́ kpó, lobo ná nɔ lɛ́ ɖ’ayi te dó kɔnugbe mǐtɔn wú. É ná nyɔ́ ɖɔ mǐ ní nɔ kanbyɔ́ mǐɖée hwɛhwɛ ɖɔ: ‘Xó e ɖɔ gbé un ja é ka ná dó xomɛsin nú mɛ e ɖo tó ɖó mì wɛ lɛ́ é wɛ a, alǒ é ná hɛn fífá wá?’ (Nǔx. 15:1) Ɛɛn, nǔnywɛ́nú wɛ é ná nyí ɖɔ mǐ ní nɔ lin tamɛ jɛ nukɔn.

Nǔnywɛ́xó ɖěvo ɖɔ: “Mɛ e nɔ ɖɔ xó dín ɔ, xó tɔn nɔ gblé wǔ mɛ hwǐ ɖɔhun.” (Nǔx. 12:18) Ényí mǐ nɔ lin tamɛ dó lěe xógbe mǐtɔn lɛ́ kpó kɔnugbe mǐtɔn kpó sixú wa nǔ dó mɛ ɖěvo lɛ́ wú gbɔn é jí ɔ, é sixú sísɛ́ mǐ bɔ mǐ ná nɔ cɔ́ nǔ e mǐ nɔ ɖɔ lɛ́ é. Nǔgbó ɔ, ényí mǐ nɔ xwedó “sɛ́n xomɛnyínyɔ́ tɔn” ɔ, é ná d’alɔ mǐ bɔ mǐ ná ny’alɔ nú gbe vɛ́sin dídó kpó xógbe syɛ́nsyɛ́n lɛ́ dídó kpó. (Efɛ́. 4:31, 32) Mǐ ná sɔ́ xomɛnyínyɔ́xó lɛ́ kpó kɔnugbe ɖagbe kpó dó ɖyɔ́ linlin masɔgbe lɛ́ kpó xógbe vɛ́sin lɛ́ kpó. Jehovah sɔ́ kpɔ́ndéwú ɔ ɖ’ayǐ ɖo ali énɛ́ nu hwenu e é vɔ́ gǎnjɛwú ná mɛsɛntɔ́ tɔn Elíi e ɖo xɛsi ɖi wɛ é. Wɛnsagun e sɔ́ afɔ Jehovah tɔn ɖó te é ɖɔ xó n’i kpó “gbe fífá ɖé” kpó. (1 Axɔ́. 19:12, nwt) Amɔ̌, è ní nyɔ́ xomɛ dó mɛ wú nɔ byɔ́ nǔ hú é ní ɖɔ xó kpó xomɛnyínyɔ́ kpó kpowun. Mǐ ɖó ná lɛ́ wa xomɛnyínyɔ́nú ɖé lɛ́. Gbɔn nɛ̌ é?

Ényí mǐ nɔ ɖɔ xó kpó xomɛnyínyɔ́ kpó, bo nɔ lɛ́ wa nǔ kpó xomɛnyínyɔ́ kpó hǔn, kpɔ́ndéwú Jehovah tɔn xwedó wɛ mǐ ɖe nɛ́. (Efɛ́. 4:32; 5:1, 2) Lisa e xó mǐ ɖɔ wá yi é ɖɔ xó dó xomɛnyínyɔ́ núwiwa Kúnnuɖetɔ́ lɛ́ tɔn wú gbɔn lě: “Hwenu e è hɛn xwédo mǐt ɔn gǎnnugǎnnu bɔ mǐ ná sɛ tɛn ajijimɛ é ɔ, asú kpó asi kpó e nyí Kúnnuɖetɔ́ é we jó azɔ̌ yětɔn lɛ́ dó, bo wá dó agban xá mǐ. Un tlɛ ko bɛ́ Biblu kplɔ́nkplɔ́n hwenɛ́nu ǎ!” Xomɛnyínyɔ́ núwiwa énɛ́ lɛ́ sísɛ́ Lisa, bɔ é jɛ nǔgbó ɔ gbéjé kpɔ́n jí dó nǔjɔnǔ mɛ.

Anne e xó è ɖɔ ɖo bǐbɛ́mɛ é lɔ ɖɔ lěe xomɛ e Kúnnuɖetɔ́ lɛ́ nyɔ́ dó wǔ tɔn é su nukún tɔn mɛ sɔ é. É ɖɔ: “Jiɖe ɖó dó mɛ wú nɔ vɛ́ wǔ nú mì, ɖó lěe mɛ e ma nɔ sɛn Jehovah ǎ lɛ́ é nɔ wa nǔ xá mì gbɔn é wú.” É ɖɔ gɔ́ ná ɖɔ: “Hwenu e un xo go Kúnnuɖetɔ́ lɛ́ é ɔ, un nɔ ɖeji dó yě lɔmɔ̌ wú ǎ. Un nɔ kanbyɔ́ nyiɖée ɖɔ: ‘Étɛ́wú nǔ ce ka nɔ ɖu ayi mɛ nú yě?’ Amɔ̌, xomɛnyínyɔ́ jɔ xomɛnyínyɔ́ e mɛ e ɖo Biblu kplɔ́n xá mì wɛ é nɔ ɖe xlɛ́ mì é sísɛ́ mì bɔ un ɖeji dó wǔ tɔn.” Nǔ ɖagbe tɛ́ mɛ é ka tɔ́n kɔ dó? “Nukɔnmɛ ɔ, un wá jɛ ayi sɔ́ ɖó nǔ e kplɔ́n wɛ un ɖe é jí jí ganjí.”

Ð’ayi wú ɖɔ xomɛnyínyɔ́nú e mɛ e ɖo agun ɔ mɛ é ɖé lɛ́ wa nú Lisa kpó Anne kpó é byɔ́ lanmɛ nú yě tawun, bo sísɛ́ yě bɔ yě ba ná kplɔ́n Biblu. Xomɛ e agun ɔ nyɔ́ dó yě wú é d’alɔ yě bɔ yě jɛ jiɖe ɖó dó Jehovah kpó togun tɔn kpó wú jí.

Lěe è kplɔ́n mɛɖé lɛ́ gbɔn é kpó fí e yě su ɖe é kpó sixú zɔ́n bɔ yě nɔ ɖɔ xó kpó xomɛnyínyɔ́ kpó nú mɛ ɖěvo lɛ́, lobo nɔ lɛ́ ko nǔ dó yě kpó xomɛnyínyɔ́ kpó. É nyɔ́ tawun ɖɔ mɛɖé lɛ́ tíin bɔ aca e mɛ yě gosín é, alǒ mɛ alɔkpa e yě nyí é nɔ zɔ́n bɔ yě nɔ wa nǔ xá mɛ ɖěvo lɛ́ kpó sísí kpó. Amɔ̌, ényí aca e mɛ mǐ gosín é, alǒ mɛ alɔkpa e mǐ nyí é kɛ́ɖɛ́ jɛ́n nɔ sísɛ́ mǐ ɔ, mǐ sixú gɔn xomɛnyínyɔ́ ɖe xlɛ́ Mawu ɖɔhun.—Sɔ́ jlɛ́ dó Mɛsɛ́dó 28:2 wú.

Jijɔ e gbigbɔ mímɛ́ Mawu tɔn nɔ bló bɔ è nɔ ɖó é ɖokpó wɛ xomɛnyínyɔ́ jɔ xomɛnyínyɔ́ nyí. (Ga. 5:22, 23) Énɛ́ wú ɔ, bo ná dó sɔ́ nǔ nú xomɛnyínyɔ́ jɔ xomɛnyínyɔ́ ɔ, mǐ ɖó ná yí gbe bɔ gbigbɔ mímɛ́ Mawu tɔn ná w’azɔ̌ ɖo linlin kpó nǔwiwa mǐtɔn lɛ́ kpó wú. Ényí mǐ wa mɔ̌ ɔ, mǐ ná xwedó kpɔ́ndéwú Jehovah kpó Jezu kpó tɔn. Gɔ́ ná ɔ, Jezu ɖɔhun ɔ, nǔ mɛ ɖěvo lɛ́ tɔn nɔ ɖu ayi mɛ nú mǐ nǔgbó nǔgbó. Hǔn, nǔ e nɔ sísɛ́ mǐ é wɛ nyí wǎn e mǐ yí nú Jehovah Mawu kpó nɔzo mǐtɔn lɛ́ kpó é. Mɔ̌ mɛ ɔ, xomɛ e mǐ nɔ nyɔ́ é nɔ húzú jijɔ agbɔ̌nnɔ e mǐ nɔ ɖe xlɛ́ kpó ayi bǐ kpó, bɔ Mawu yí gbe ná é.

Xomɛnyínyɔ́ dó mɛ ɖěɖěe nɔ nyɔ́ xomɛ dó mǐ wú lɛ́ é, alǒ mɛ ɖěɖěe mǐ tuun lɛ́ é wú sixú nɔ bɔ wǔ nú mǐ. (2 Sam. 2:6) Ali e nu mǐ nɔ wa mɔ̌ ɖe é ɖokpó wɛ nyí kú e mǐ nɔ dó nú yě é. (Koló. 3:15) Amɔ̌, ényí mǐ ka mɔ ɖɔ é kún jɛxá ɖɔ è ní nyɔ́ xomɛ dó mɛɖé wú ó ɔ ka lo?

Ð’ayi nǔ élɔ́ wú: Jehovah sɔ́ kpɔ́ndéwú nukúnɖéjí ɖé ɖ’ayǐ ɖo xomɛnyínyɔ́ ɖiɖexlɛ́ linu, bɔ Xó tɔn kplɔ́n nǔ tají ɖé mǐ dó jijɔ énɛ́ ɖiɖexlɛ́ wú. Azɔn gěgé wɛ è zán xókwín “xomɛnyínyɔ́” ɔ ɖo akpáxwé Biblu tɔn e è wlán dó Glɛ̌kigbe mɛ lɛ́ é mɛ. Nɛ̌ Mawu ka ɖe xomɛnyínyɔ́ xlɛ́ mǐ gbɔn?

Lin tamɛ dó gbɛtɔ́ lǐvi mɔ̌kpán e Jehovah ko ɖe xomɛnyínyɔ́ xlɛ́, bo ná nǔ e hudó yě lɛ́ é yě, bónú yě ná dó nɔ gbɛ lɛ́ é jí. (Mat. 5:45) Nǔgbó ɔ, có gbɛtɔ́ lɛ́ ná tuun Jehovah ɔ, é ko nyɔ́ xomɛ dó yě wú. (Efɛ́. 2:4, 5, 8) Ði kpɔ́ndéwú ɔ, é sɔ́ Vívɛ́ná tɔn, Vǐ ɖokpónɔ tɔn jó dó gbɛtɔ́ lɛ́ bǐ tamɛ. Mɛsɛ́dó Pɔ́lu wlán ɖɔ Jehovah sɔ́ nǔ nú gbɛxixɔ ɔ, ɖó “xomɛnyínyɔ́ tɔn ma ɖó jlɛ̌ ɔ” wú. (Efɛ́. 1:7) Gɔ́ ná ɔ, mǐ nyí hwɛhutɔ́, bo nɔ jɛ agɔ dó Jehovah có, é ka kpo ɖo ali xlɛ́ mǐ wɛ, bo lɛ́ ɖo nǔ kplɔ́n mǐ wɛ. Nǔkplɔ́nmɛ tɔn lɛ́ kpó xógbe tɔn lɛ́ kpó cí “fo ɖo gbigba” wɛ ɖɔhun. (Sɛ́n. 32:2) É ɖo wɛn ɖɔ mǐ kún sixú sú xomɛ e nyɔ́ dó mǐ wɛ Mawu ɖe é sín axɔ́ ɛ bǐ mlɛ́mlɛ́ ó. Gɔ́ ná ɔ, mǐ tuun ɖɔ xomɛnyínyɔ́ Jehovah tɔn wɛ nyí tɔn bɔ mǐ ná nɔ gbɛ ɖo sɔgúdo.—Sɔ́ jlɛ́ dó 1 Piyɛ́ɛ 1:13 wú.

É ɖo wɛn ɖɔ xomɛnyínyɔ́ Jehovah tɔn ɔ, jijɔ ɖaaɖagbe ɖé wɛ, bo nɔ lɛ́ dɔn mɛ tawun. Wǎgbɔ tɔn ɔ, é nɔ cyán mɛɖé lɛ́ kpowun ɖo mɛ mɛ bo nɔ ɖe xomɛnyínyɔ́ xlɛ́ ǎ; énɛ́ wú ɔ, mǐ lɔ ɖó ná tɛ́n kpɔ́n bo xwedó kpɔ́ndéwú Jehovah tɔn, lobo nɔ ɖe xomɛnyínyɔ́ xlɛ́ ɖo gbɛ zínzán mǐtɔn ayǐhɔ́ngbe ayǐhɔ́ngbe tɔn mɛ. (1 Tɛ. 5:15) Ényí mǐ nɔ ɖe xomɛnyínyɔ́ xlɛ́ hwebǐnu ɔ, mǐ ná cí myɔ e è bɔ ɖo avivɔhwenu é ɖɔhun. Mǐ ná dó gbɔ nú mɛ e ɖo xwédo mǐtɔn mɛ lɛ́ é, nǔɖitɔ́ hǎtɔ́ mǐtɔn lɛ́, azɔ̌gbɛ́ mǐtɔn lɛ́, wěmaxɔmɛvígbɛ́ mǐtɔn lɛ́ kpó nɔzo mǐtɔn lɛ́ kpó.

Lin tamɛ dó mɛ ɖěɖěe sixú ɖu xomɛnyínyɔ́ núwiwa towe lɛ́, gɔ́ nú xó e a nɔ ɖɔ kpó xomɛnyínyɔ́ kpó lɛ́ é sín le ɖo xwédo towe mɛ, alǒ ɖo agun towe mɛ lɛ́ é jí. Mɛɖé sixú ɖo agun towe mɛ bo ná ɖó hudó alɔdó towe tɔn, tají ɔ, bo ná dó jlá xwégbe ɖó, kpé nukún dó jikpá tɔn wú, alǒ wa azɔ̌ e è nɔ wa gbe bǐ gbe lɛ́ é, ɖi axi xwléxwlé mɔ̌. Gɔ́ ná ɔ, ényí a xo go mɛ e ɖó hudó alɔdó tɔn é ɖé ɖo sinsɛnzɔ́ ɔ mɛ ɔ, a ka sixú d’alɔ ɛ ɖo ali tawun tawun ɖé lɛ́ nu a?

Ée mǐ ná ɖo kpɔ́ndéwú Jehovah tɔn xwedó wɛ é ɔ, mi nú “sɛ́n xomɛnyínyɔ́ tɔn” ɔ ní nɔ xlɛ́ ali xó e mǐ nɔ ɖɔ lɛ́ é kpó nǔwiwa mǐtɔn lɛ́ kpó hwebǐnu.