MPANGI Lisa ke tuba nde: “Ntima ya mbote ya bampangi simbaka kibeni ntima na mono.” * Yandi vandaka kutubila kima yina bendaka yandi na kieleka. Yo vandaka mutindu mosi ti mpangi Anne. Mpangi Anne tubaka nde: “Kima yina bendaka yandi na kieleka kele ntima ya mbote ya Bambangi ya Yehowa vandaka kumonisila yandi, kuluta malongi yina bo vandaka kulonga yandi.” Bampangi-bankento yina zole, ke tangaka Biblia mpi bo ke yindulaka mingi mambu yina yo ke tubaka. Kansi kikalulu ya ntima-mbote simbaka kibeni bantima na bo.

Inki mutindu beto lenda monisa kikalulu ya ntima-mbote sambu yo simba bantima ya bantu yina ke zingaka ti beto? Beto tala mutindu beto lenda monisa ntima ya mbote na mambu yina beto ke tuba mpi na mambu yina beto ke sala. Na nima, beto ta tubila bantu yina beto fwete monisila ntima ya mbote.

Nkento ya me fwana yina Bingana kapu 31 ke tubila ke vandaka ti “nsiku ya ntima ya mbote” na ludimi na yandi. (Bing. 31:26) Yandi ke bikaka nde “nsiku” yina kutwadisa mambu yina yandi ke tuba mpi mutindu yandi fwete tuba yo. Batata mpi fwete vanda ti “nsiku” yina na ludimi na bo. Bibuti mingi ke zabaka nde kana bo ke tubila ve bana na bo mambu na mawete yonso, bana na bo lenda buya kuwa mambu yina bo ke songa bo. Kana bibuti ke tubila bana na bo na mawete yonso, bana bo ta wa mpi ta lemfuka na mambu yina bo ke songa bo kukonda mpasi.

Yo vanda nge kele kibuti to ve nki mutindu nge lenda tuba na mawete yonso? Mambu yina kele na kitini ya ntete ya Bingana 31:26 lenda sadisa beto. Yo ke tuba nde: “Yandi ke kangula munoko na yandi na mayele.” Yo ke tendula nde beto fwete pona mbote bangogo yina beto ta tuba mpi mutindu beto ta tuba yo. Na ntwala ya kutuba, yo ta vanda mbote na kudiyula nde: ‘Keti mambu yina mono ke zola kutuba ta pesa bantu yina ke wa mona makasi to yo ta tula ngemba?’ (Bing. 15:1) Ya kieleka, yo kele mfunu na kuyindula na ntwala ya kutuba.

Kingana ya nkaka ke tubaka nde: “Kutuba kukonda kuyindula kele bonso kulwadisa muntu na mbele ya bitumba.” (Bing. 12:18) Kana beto ke yindula mutindu bantu ya nkaka lenda wa sambu na mambu yina beto ke zola kutuba mpi mutindu beto ta tuba yo, yo ta sadisa beto na kuyala ludimi na beto. Ya kieleka kana beto ke sadila “nsiku ya ntima ya mbote,” yo ta sadisa beto na kutuba ve mambu ya mbi mpi na kutuba ve na mutindu ya mbi. (Baef. 4:31, 32) Beto ta katula bangindu ya mbi, beto ta tuba mambu ya mbote mpi na mutindu ya mbote. Yehowa pesaka mbandu ya mbote na diambu yina ntangu yandi pesaka nsadi na yandi Eliya kikesa ntangu yandi vandaka kuwa boma. Wanzio yina Yehowa tindaka sambu na kusolula ti Eliya tubaka na “ndinga mosi ya mawete, mpi ya nsi.” (1 Bant. 19:12) Kansi beto fwete suka ve kaka na kuvanda ntima-mbote na mambu yina beto ke tuba. Beto fwete monisa yo mpi na mambu yina beto ke sala. Inki mutindu?

Beto ke landaka mbandu ya Yehowa ntangu beto ke tubaka mambu ya mbote mpi ntangu beto ke salaka mambu ya mbote. (Baef. 4:32; 5:1, 2) Lisa yina beto me tubila na luyantiku, tubilaka ntima ya mbote yina Bambangi ya Yehowa monisilaka yandi. Yandi ke tuba nde: “Ntangu yo lombaka nde dibuta na beto kukwenda na  kisika ya nkaka kukonda kukana, babakala zole ya Bambangi ya Yehowa ti bankento na bo, yina vandaka kuzinga pene-pene ti beto, bakaka konzie na kisalu sambu na kusadisa beto na kukanga bima. Na ntangu yina, mono yantikaka ntete ve kulonguka Biblia.” Mambu ya Bambangi ya Yehowa yina salaka, pusaka Lisa na kukuma kutadila kieleka ti disu ya nkaka.

Mpangi Anne yina beto me tubila, sepelaka mpi ti ntima ya mbote yina Bambangi ya Yehowa monisilaka yandi. Yandi tubaka nde: “Sambu bantu yina vandaka ve kusambila Yehowa vandaka kusadila mono mambu ya mbi, mono vandaka kutudila diaka ve bantu ntima.” Yandi tubaka diaka nde: “Ntangu mono kutanaka mpi ti Bambangi ya Yehowa, mono tudilaka bo mpi ve ntima. Mono kudiyulaka nde: ‘Sambu na nki bo ke tudila mono dikebi?’ Kansi ntima ya mbote ya mpangi yina vandaka kulonga mono Biblia pusaka mono na kukuma kutudila yandi ntima.” Inki mbuma ya mbote yo butaka? Yandi ke tuba nde: “Na nima mono yantikaka kuyindula mingi mambu yina mono vandaka kulonguka.”

Mambu ya mbote yina Bambangi ya Yehowa vandaka kusadila mpangi Lisa mpi mpangi Anne, simbaka kibeni bantima na bo. Yo sadisaka bo na kundima kulonguka kieleka. Ntima ya mbote yina bampangi monisilaka bo, sadisaka bo na  kuyantika kutudila Yehowa ntima mpi na kutudila bansadi na yandi ntima.

Bantu ya nkaka ke tubaka mambu ya mbote mpi ke sekaka sambu kisika yina bo me yelaka bantu ke vandaka mutindu yina. Yo kele mbi ve. Kansi kana beto ke sala yo kaka sambu beto me yelaka mutindu yina, yo lenda monisa nde beto ke landa ve mbandu ya Nzambi ya kumonisila bantu ntima ya mbote.—Tala mpi Bisalu 28:2.

Ntima ya mbote ya Nzambi kele kikalulu ya mbuma ya mpeve santu ya Nzambi. (Bag. 5:22, 23) Yo ke tendula nde beto fwete vanda ti mpeve santu ya Nzambi sambu yo sadisa beto na kuvanda mpenza ntima-mbote. Kana beto sala mutindu yina, beto ta landa mbandu ya Yehowa mpi ya Yezu. Beto Bakristu, beto ke tudilaka bantu dikebi ya masonga. Beto ke salaka mutindu yina sambu beto ke zolaka Yehowa Nzambi mpi bantu. Ntima ya mbote ya masonga ke katukaka na ntima mpi Nzambi ke ndimaka yo.

Yo lenda vanda pete na kumonisila bantu yina ke sadilaka beto mambu ya mbote ntima ya mbote to bayina beto me zaba. (2 Sam. 2:6) Mu mbandu, beto lenda pesa bo mersi. (Bakol. 3:15) Ebuna nki beto ta sala kana beto ke mona nde yo ke lomba ve nde beto monisila muntu mosi ntima ya mbote?

Yehowa kele mbandu ya kuluta mbote na yina me tala kumonisa ntima ya mbote ya nene mpi Ndinga na yandi ke longa beto mutindu ya mbote ya kumonisa kikalulu yina. Bo me sadila bangogo “ntima ya mbote ya nene” mbala mingi na Masonuku ya Kigreki ya Bukristu. Inki mutindu Nzambi ke monisilaka beto ntima ya mbote?

Banda ntama, Yehowa ke monisilaka bantu yonso ntima ya mbote ntangu yandi ke pesaka bo bima yina bo kele na yo mfunu sambu na kulanda kuzinga. (Mat. 5:45) Nkutu na ntwala nde beto zaba Yehowa, yandi monisilaka beto dezia ntima ya mbote. (Baef. 2:4, 5, 8) Mu mbandu, yandi me pesaka mwana na yandi mosi kaka ya kubutuka, ya yandi ke zolaka mingi sambu na bantu yonso. Ntumwa Polo sonikaka nde Yehowa pesaka kimenga ya mwana na yandi “na kutadila bunene ya ntima ya mbote na yandi ya nene.” (Baef. 1:7) Beto ke salaka masumu mpi beto ke pesaka ntima ya Yehowa mawa kansi yandi ke landaka kaka kutwadisa beto mpi kulonga beto. Malongi na yandi mpi bangogo na yandi kele bonso “mvula ya fioti.” (Kul. 32:2) Ya kieleka, beto ta kuka ve ata fioti kufuta Yehowa sambu na mambu yonso ya mbote yina yandi ke sadilaka beto. Kana Yehowa monisilaka beto ve ntima ya mbote ya nene, beto zolaka ve kuvanda ti kivuvu sambu na bilumbu ke kwisa.—Tala mpi 1 Piere 1:13.

Ya kieleka ntima ya mbote ya Yehowa ke simbaka ntima mpi yo ke pusaka beto na kuvanda mpi ntima-mbote. Yo yina, beto fwete pona ve bantu yina beto fwete monisila ntima ya mbote. Beto fwete sala bikesa ya kulanda mbandu ya Yehowa ya kumonisila bantu ntima ya mbote konso kilumbu. (1 Bate. 5:15) Kana beto ke landa kumonisila bantu ntima ya mbote, beto ta vanda bonso nti ya madidi na kilumbu yina ntangu kele ngolo. Beto ta pesaka kikesa na bantu ya mabuta na beto, na bampangi na beto Bakristu, na bantu yina beto ke salaka ti bo, na bana ya nzo-nkanda na beto mpi na bantu yina ke zingaka pene-pene ti beto.

Yindula mambote yina bantu ya dibuta na beno to bampangi ya dibundu na beno ta baka kana nge monisila bo ntima ya mbote na mambu yina nge ke tuba mpi na mambu yina nge ke sala. Mbala ya nkaka mpangi mosi ya dibundu na beno kele ti mfunu nde muntu mosi kusadisa yandi na kuyidika nzo, na kutula bunkete na lupangu to na kusadila yandi mambu ya nkaka mu mbandu, kusadisa yandi na kusumbila yandi bima. Diaka, kana nge ke longa nsangu ya mbote mpi nge me kutana ti muntu yina kele kibeni ti mfunu ya lusadisu, keti nge ta sadisa yandi?

Sambu na kulanda mbandu ya Yehowa, beto fwete bika nde “nsiku ya ntima ya mbote” kupusa beto na kutuba mambu ya mbote mpi na kusala mambu ya mbote.